You are here: HomeNewsWorld NewsInternationalPhilippines a zinling ah mi 20 si

Philippines a zinling ah mi 20 si

Written by  Published inInternational Wednesday, 16 October 2013 22:36
Philippines a zinling ah mi 20 si

MANILA, Oct 15: Tuzingkal dak 8:12 a Central Philippines a 7.2-magnitude a hat zinling a om ziak in mi 20 in sihna tuak ua, Philippines gamsung a Khristian biakinn upa-pen a kigen tung a biakinn dak khaina (tower) a kisiat banah lampi leh inn tamtak kisia hi'n thusuak in taklang hi.

 


Hiai zinling hattak ziak in innsung leh damdawi inn a om mi tamtak taikhia ua, zinling beinung in mun khenkhat kikhongling zoulai hi'n kigen hi. Hiai zinling ziak in tuni'n Phillippine gamsung pumpi a school leh office-te khak in om hi.

 


Zinling kipatna mun ahihleh Bohol Island a om Carmen khopi a kipan km 33 vel a gamla mun hi a, zinling ziak in tsunami bel om hiallou hi'n thusuak om hi. Thiltung ziak in Bohol ah mi 4 si a, Cubu province sung ah mi 15 a sih banah Siquijor Island a mi 1 si hi'n Civil defense spokesman Maj. Reynaldo Balido in taklang hi. Hiai zinling ziak a mi 33 in liamna tuak uh hi'n thusuak in taklang hi.

 


Cubu province a sihna tuakte lak a mi 5 ahihleh long a tuanglai hi ua, zinling ziak a tui kihawt in a tuanna long uh lumlet hi'n kigen hi. Tua banah Mandaue a vanzuakna mun khat a tung (roof) a kichip ziak in a nuai a omte lak ah mi 2 delhlum a, mi 19 in liamna tuak uhi. Huailou in nupi khat innsung a kipan taikhia, insawng chim in a lu dengkha in si hi.

 


Cebu a kipan vanglamelmuh(TV) khahkhiak a om tungtawn in inn sawngnih kichim sung a kipan naungek kha-8 miding lengkhia muhtheih a om hi'n kigen hi. Zinling ziak in Loboc khopi a om 17thcentury limestone church leh Spanish colonial hun lai a kibawl biakinn kisia ahihdan thusuak in taklang hi.

 


Zinling hat diakna mun Cebu province sung ahihdungzui in Cebu international airport sung ah leikhang liantak om a, lamlian mun tamtak kisia hi'n kigen hi. Philippines gam bel zinling tamna mun a kigen 'Pacific Ring of Fire' kichi sung a omkha ahihziak in zinling tung mun mahmah a, nikum inleng central Philippines a 6.9 magnitude a hat zinling ziak in mi 100 in sihna ana tuakta uh hi'n kigen hi.(AP)

 

 

Read 605 times
Login to post comments