You are here: HomeNewsWorld NewsInternationalSyria opposition pawl in condition omsa a kihou ding deih

Syria opposition pawl in condition omsa a kihou ding deih

Written by  Published inInternational Tuesday, 05 November 2013 14:19
Syria opposition pawl in condition omsa a kihou ding deih

CAIRO, Nov 4:Syria tualgal pailel a opp o s i t ion/rebel pawl tuamtuamte’n UN makaihna nuai a Syrian government toh kihouna ding a condition omsa neihding deih uh ahihdan leh huai condition a ngiatte uh leng zan in taklatna nei ngal uhi. Hiai thu ahihleh international envoy-te’n kilemna thugenna ding a condition bangmah bawlsa a omlouhding chihthu a taklatnung ua, opposition pawl in adawnna uh ahi hi.

 

 

Syria government leh rebel pawlte kihouna ding “Geneva 2” chih a om genkhiak ahihna hunsawttak paita mahleh tunitan a hun leh ni ding bikhiak hinailou lai hi. Syria tualgal a pawlnihte lemna dohkan umkhawmna ding toh kisai in khovel a thunei gam tuamtuamte kal a ngaihdan kibangloutak om a, khenkhat in Syrian president Bashar al-Assad gum mahmah ua, khenkhat in lah rebel pawlte gum in, Syria vaihawmtu khekding tanpha ngaihdan a neih ziak ua, Geneva 2 pat ding zekaisak a om nilouh hi’n kigen hi.

 

 

Syrian opposition makai National Coalition PresidentAhmad Jarba in Geneva kihouna ding toh kisai a genna ah, lemna thu gen ahihma a president Bashar al-Assah in a dinmun a nutsiat hunding chiangtak puankhiak leh bikhiah ahihkeileh lemna thugenna hun a tellou ding ahihdan uh leh kihouna hun a Iran a tellouh ding chihte “pre-condition” bawlkhia uhi.

 


Tua bangkal ah, international envoy for Syria, Lakhdar Brahimi in a genna ah, Syria buaina toh kisai a government leh rebel pawlte kihouna ding nawngkaina tuamtuam om mahleh tua pan kal tamlou nung chiang a neihtheih ahihngei lam-en ahihdan gen a, Geneva 2 kihouna ding a Syria a vaihawmna khekding thu ah Bashar Assad in a dinmun a letzom bel gingtalou ahihdan gen mahleh hiai thupen amah mimal muhdan lel hi’n taklang hi.

 


Geneva 2 kihouna ding toh kisai a Iran tungtang a genna ah, Tehran ahihleh hiai lemna thugenna a telding a manta ahihdan leh UN inleng Iran in hiai kihouna a panmun a neih hoihsa hi’n gen a, himahleh Iran tungtang bel bangmah thutanna omnailou hi’n gen hi. US State Department official thusuak in a taklatdan in Syria buaina toh kisai a lemna thugenna hun a Iran a telding leh president Assad in a thuneihna a koihkhiak ding chih lemsakpihna a bawl ngaiding a, tua bang ahihkeileh hiai lemna thugenna hun a hongtel kipahpih hilou ding hi’n taklang hi.

 


Arab League in ahihleh Syrian opposition makai National Coalition leh a kaihzatamte Geneva 2 kihouna a telding in chial a, mihing 100,000 val hinna mansuah ahihnung a kihouna tungtawn a kilemna tungding ding in ngen hi. (Reuters)

Read 511 times
Login to post comments