You are here: HomeNewsWorld NewsInternationalIsrael in West Bank ah tenna inn 20,000 bawlthak sawm

Israel in West Bank ah tenna inn 20,000 bawlthak sawm

Written by  Published inInternational Thursday, 14 November 2013 14:59
Israel in West Bank ah tenna inn 20,000 bawlthak sawm

JERUSALEM, Nov 13: Israel in a opkhum gamte a tenna ding inn bawlthak a sawmte lak a tampen hun hiding a kigen ah, West Bank ah inn thak 20,000 val bawlkhiak sawm ahihdan thusuak in taklang hi. Settlement watchdog - Peace Now director Yariv Oppenheimer in a gendan in, Israel housing ministry in tenna ding inn (settler homes) 20,000 bawlna ding a tenders suahkhia ahihdan taklang hi.

 


Thusuak in a taklatdan in, Prime Minister Benjamin Netanyahu's office in West Bank a tenna inn 1,200 bawlna ding toh kisai a nasep a pattak banah inn dang 18,800 bawlna ding a panla nawn hi'n taklang hi. West Bank a inn 20,000 bawlna ding ah sum 45 million shekels (USD 13 million, 10 million euros) sehkhiak a om ahihdan leng thusuak in taklang hi. Tua banah hiai bang a government in settlement kekletna ding a sum tamtak a sehkhiak pen Israel government in Palestinian toh kihouna ding paulap a nei a, huai sung a nna thupitak sepsuah sawm hi'n ngawhna om a, Israel prime minister inleng gam nihte kal a kilemna leh muanna tundingna ding a panla taktaklou hidan a gen in om hi.

 

 

Hiai thu ahihleh Palestinian negotiator-te'n Israel toh kihouna lohsam ahihdan leh Israel in West Bank leh Gaza Strip a tenna inn a bawl sunzopna ding a pan a lakna khawllou ahihdan theihkhiak ahihnung a taklat a om ahi hi. Palestinian negotiator Mohammed Shtayyeh in zan a, a taklatdan in, Israel apan 'political will' omlou a kihouna tungtawn a kilemna bawlsang in kilemna bawllou a kihouna zawh hoihzaw ding ahihdan gen hi.

 

 

Israel leh Palestinian kihouna ahihleh kha thum vel khawlsak hita a, kihouna sutzop nawnna ding in US secretary of state John Kerry, zanhal in Middleeast lenglut nawn hi. Palestinian negotiator Mohammed Shtayyeh in a genzelna ah, Israel in khovel gam tuamtuamte nawhna leh phutna ziak a kihouna a panla ahihdan leh kilemna taktak bawlkhiak ding lunglutlou hi'n taklang hi. Tua banah 1967 a "Ni Guk Kidouna" hun a Palestine gam a laksakna munte a tenna ding inn bawl khawllou ahihdan leh huai munte mah Palestinian- te'n, "Gamchiam" achihna mun uh hi a, huai gamthu tellou a kihouna in bangmah gen neilou hi'n taklang hi.

 

 

Israel in settlement kekletna a khawlsanlouh in kihouna tungtawn a kilemna tan tunna ding a lunglutlou leh chitaktak a panglou ahihdan langsak ahi chiin Shtayyeh in gen hi. (AFP)

 

 

Read 579 times
Login to post comments