You are here: HomeNewsWorld NewsNationalGenkholh a om bang in Odisha leh AP Cyclone in nuai

Genkholh a om bang in Odisha leh AP Cyclone in nuai

Written by  Published inNational Monday, 14 October 2013 13:16
Genkholh a om bang in Odisha leh AP Cyclone in nuai

Bhubaneswar, Oct 12:Tui kifawn, pingpei leh huihpi kithuahkhawm 'Cyclone Phailin' tehna dan a 'hat petmah' chi a chiamteh a om in genkholh a om bang in tuni'n Odisha coast nawk a, Gorakhpur a leitolh (landfall) om hial hi. Kum 23 nung a cyclone phailin in India a nawk thupipen hiding a gen in om a, hiai huihpi ziak in Odisha leh Andhra Pradesh a kipan in mihing 7 lakh mun bitzaw a suankhiak in om uhi.

 


Hiai thiltung ziak in India a state tuamtuam leh central solkal a kipan panpihna toh kisai bangkim felta a, hiai thugelh ahihtan in thiltung ziak a 5 in sihna tuak ua, amaute leng sing puk in a delhlup hi'n NDTV thupuangtu'n taklang hi. Phailin ziak in India ah mihing 1.2 crore in buaina tuak ding a gintak hi a, Odisha a kipan in mihing 4.5 leh Andhra Pradesh a kipan in 1.4 lakh vel in buailoh ding hi'n kigen hi.

 


Tunitaklam a phailin in Odisha state a phak ziak in huihpi leh vuah tamtak in state sung pumpi tuamdim a, huihpi hattak in lei muttolh (landfall) hial hi'n thusuak in taklang hi. Hiai cyclone phailin dakkal khat a km 200 a hat a nung in leitual mut a, genlawk a omsang in bel hatlou zaw deuh hi. Himahleh luiphaite (coastal area) ah bel dakkal 6 tanpha a tui kifawn hattak omtheilai hi'n kigen hi.

 


Tuni zingtung a kipan in nileng in Odisha leh Andhra Pradesh ah vuah tamtak zu den a, Odisha khopi Bhubaneswar tel in coastal district 7 a power supply hihbuai in om a, Andhra Pradesh ah bel Ichchapuram a kipan Palasa kikal a power supply khaktan in om hi.

 


Huihpi hatluat ziak in electric khuam leh singkung tamtak bulkalh hi. Howrah-Visakhapatnam kal a pai rel 56 cancel in om a, rel 16 lampi dang tawn a taisak in om hi. Lamlian a kikawmtuahnate leng tui tamluat ziak a nawngkai mahmah ding a gintak hi a, Odisha khopi Bhubaneswar airport leng zingchiang nitaklamtan hontheih hilou ding hi'n kigen a, tuni'n leng lenna 10 cancel in om hi. Tu zingkal in panpihna van tuamtuam ton 500 val bhubaneshwar airport puaktung in omta hi.

 


Prime Minister Manmohan Singh in cyclone thuakte panpihna omthei teng a panpihna piak hiding hi'n taklang a, Home Minister Sushil Kumar Shinde panpihna leh hutkhiakna nasem ding a helicopters 18, aircraft 12 leh long nih central government in mansa a koih ahihdan taklang hi. Odisha's Disaster Management Minister Surya Narayan Patra in cyclone phailin a kipan kiventheihna omteng a kivenna bawl a om ahihdan taklang hi.

 

 

Panpihna nasem ding in army jawan 10,000 val koih in om a, lenna 40 toh airforce-te Nashik, Ranchi, Bangalore, Nagpur ah Barrackpore koih in om ua, Navy team 60 leng kimansa in om uhi.

 

 

The Met department thusuak in a taklatdan in tua pan dakkal 24 sung a phailin in West Bengal, Chhattisgarh, eastern Uttar Pradesh leh Bihar nuai ding hi'n taklang hi.

Read 710 times
Login to post comments