You are here: HomeNewsSports NewsBrazil a 2014 FIFA World Cup stadium khat kichim

Brazil a 2014 FIFA World Cup stadium khat kichim

Written by  Published inSports News Tuesday, 03 December 2013 15:44
Brazil a 2014 FIFA World Cup stadium khat kichim

Expo2020 a Sao Paulo in Dubai a zawhlouh­ma dakkal tamlou in kumnawn FIFA World Cup hun a Opening Match, semifinal leh match dang 4 kimawlna ding mun Itaquerao stadium kibawllel kichimsia hi. Hiai thiltung a nnasemtu mi 2 a sih banah hiai bang a mipi tamtak omna ding mun kisia in Brazil kisakkholhna lungtunhuailou leh patauh­huai ahihdan langsak hi'n thusuak om hi.

 

Hiai thiltung ahihleh FIFA in December 31 tan a stadium 12 bawl zousiang ding a theihsakna a bawl toh kiton a nasepna kisanlaitak a thiltung hi'n kigen hi. FIFA in Brazil kiang ah World Cup 2014 kimawlna ding stadium teng December 31 tan a zou­siang ding in huntawp pe mahleh Brazil in February 2014 tan hunpe ding in ngen hi. Brazil in bel stadium bawlna 94 % zawh hita hi'n taklang a, hiai Itaquerao stadium kichim pen leng FIFA in inspection a bawl pahdingte lak a telkha hi'n kigen hi. Himahleh hiai sta­dium a siat banah stadium dang 6 leng FIFA in etkhiakna a neihding a mansiang nailou ahihdan taklang thak hi.

 

Brazil in 2014 World Cup stadium bawl a omte peuhmah a hoihtheipen "World Class" hiding chi'n ana taklang sek mahleh stadium bawlna a zekai mahmah banah nasepna mun ah tuahsia tung mun mahmah hi. Nikum a Confederations Cup omlai inleng Brazil mipi'n World Cup zintun ding deihlouhna in lamlian leh kongzingte zuihna ana neita uhi.

 

Confederations Cup final ah Brazil in Spain 3 - 0 in ana zou mahleh tutung a sta­dium kichim in a minhoihna teng liahkhuh hi'n kigen hi. 2014 FIFA World Cup Stadium bawlna zekai lua leh nasepna mun a tuahsia tung sekte toh kisai in December 4 - 6, 2013 sung FIFA makaite'n Brazil khopi a meeting neiding uh hi'n kigen hi.

 

Brazil gam ahihleh “Home of Football” chih in om a, tua ziak mah in World Cup leh Football kimawlna toh kisai in government in sum tamtaktakseng zel hi. Kumnawn World Cup ding toh kisai inleng Brazil in $15 billion seng a, tua banah 2016 Olympic a ding inleng $15 billuion mah sengnawn ding hi. Tu a kichim Itaquerão stadium ahihleh $152 million val beiding a bawl himahleh van man a khanluat ziak in a zawhtan a $350 million bei zouding a tuat ahi hi. Football toh kisai in Brazil in khovel a record hoihtak nei mahleh tutung a hiai stadium thupi mahmah khat a kisiat ziak in zahlak dimdem hi.

 

Itaquerão stadium siatna toh kisai in worker's union pawl in government kiang a thiltung ni 30 sung a suikhe ding leh hiai stadium pen World Cup roster a kipan lakhe ding in ngetna bawl uhi. Brazilian Football Confederation (CBF) president Jose Maria Marin in a genna ah, "World Cup 2014 Open­ing match neihna ding mun kisia/chim chih ka theih in poi kasa petmah, hiai mun ah June 12, 2014 chiang a World Cup honna omding ahi ngal a" chi hi.

 

Sao Paulo a Itaquerão stadium kia a hiai bang tuahsia ana tung hilou a, Brazil gamsung ah stadium 3 ah leng hiai bang tuahsia ana tungta a, nasemtute sihna ana tuakta uhi. Kumnawn World Cup kimawlna ding stadium 12 lak ah 6 lel zawhsiang hipan hi'n thusuak om hi.

 

FIFA general secretary Jerome Valcke in London a kipan a taklatdan, hiai thiltungte ziak a World Cup 2014 thupilou tuanlou ding ahihdan leh hiai tournament pen thupi mahmah ding ahihdan taklang hi.

Read 784 times
Login to post comments