You are here: HomeRSS FeedsLatest Articles

Mulkimna Bei In, A Doctor That

Sunday, 29 November 2015 15:13

By: Hauzel Gou

 

Mulkimna bei a doctor thah a, a om na mun Abu Dhabi khopi tuh Arabian Peninsula suahlam tuipi pang gamkeu neuchik a om Sultanate of Oman, Saudi Arabia, Qatar, the Gulf of Oman leh Arabian Gulf gamte’n a um kual uh United Arab Emirates –te khopi ahi. Gensau zek laile UAE tuh December 2, 1971 in Independent Federal State a puan in ana om ta hi. Asung ah State sagih Abu Dhabi, Dubai, Sharjah, Ras Al Khaimah, Ajman, Umm Al Quwan leh Fujairah kigawm a bawlkhiak ana hilel tak a, Abu Dhabi pen a gam khopi (capital) di’n kizang hi. Agamsung letdan 77,000sq Km kimkot leh Abu Dhabi State in 87% phial ana huap in leh Arabian Peninsula gam tuamtuamte lak ah hiai gam (UAE) tuh aletdan in thum-na’n ana pangzou hi. Hiai Abu Dhabi khopi ah tuh a kal laklak in banghiam gendi neneuh ana om zel a, hiai in a khopi bouruak tuh a suse zou sim mahmah sek hi. Hichibang thilhoihlou om te lak ah, zanlam in ‘Meithainu’ Thahna’ chih igelh khinta ua; tutung in damlou khat in a doctor-pa kepdan lungtun huailou asak ziak a, athahna tanchin ko’n gelh nawn hi.

 

Hospital tampi om te lak a minautang tamzawte ki etsakna mun deuh private hospital Ahalia Hospital tuh Abu Dhabi khopi laizang tak ah om hi. Hiai hospital ah tuh Indian Christian doctor Dr. Rajan Daniel (Urologist) in kum 2007 apat in ana semta a, damlou tampite’n le amah muang in ana naih deuh sek uhi. Himahleh damloute’n le doctor i ngeihdeuh uh zaw ana om ahi dia aw chih in om hi. November 1, 2012 in Dr. Rajan Daniel tuh a damlou kepte lak a khat in, a hinna mulkimna bei in ana laksak ta hi. Dr. Rajan Daniel bel kum 62 a upa ahita a, mi polhnuam leh aw (voice) neemtak a mi houpih theih gige mi ahih ban ah asepna le pension nuam ahita hi. Dr.Rajan Daniel tuh azi Mrs Geetha toh Abu Dhabi khopi a khawsa in om lel ua, tanu khat Junu nei in amah leeng India a doctor khat mah ana hi hi.

 

November 1, 2012 in Dr Rajan Daniel tuh a duty hun ngei nitaklam dak 6 vel in Hospital a amah pindan ah damloute en in om hi. A damloute lak a khat leeng huaini mah in ki check-up sak nawn di chi’n appointment la in hong kuan nawn a, hospital atunma deuh in a kiang nai a dawr ah temta hoihtak khat hon lei malam hi. Huchi’n hospital ah honglut ngal in, damlou dang ki ensak om lai ahihman in doctor-pa pindan ah alut pah thei kei hi. Huchi’n damlou ki ensak a om pen, ahongpawt khiak di ana ngak kawm in waiting hall ah ana kivial-leh hehu mai a, damlou gimlua dan in om zawzen hi. Amah ki etsak hun ding hinai kei mah leh gimlaw dan a, a om ziak in anawn a amah ki ensak pah didan in kigen mai a, damlou dang te’nle bangmah gentamlou in amah lutsak dek uhi. Huchia damlou ki ensak masapen hongpawt tak in, Doctor-pa pindan ah lut ngal a, kongkhak kintak a kalh ngal in, apuan-ak kawm a temta tuh tha-khat a dok khia in Dr. Rajan Daniel tuh mulkimna bei in mun 8 vel ah hon dawt naw-nok ta mai hi. Tua doctor-pa’ pindan sung tuh sisan in apum dimta a, minute khat-leh-akim ding khawng lel naak man in Dr. Rajan Daniel tuh amun ah singal hi. Damlou mithattu’ pen le awl in bangmah thilhoihlou hihdan a omlou in staircase zang in kum suk a, himahleh apawtna ding mun diktak thei nawnlou in Emergency Ward ah tailut kha thepthup hi. Huaimun ah tuh hospital staff te’n ana mu in sisan kai niaunuau kawm a temta toh taikhiak sawm ahi chih lamdang sa in huchi’n ana pummat ua police-te khut ah pekhe ngal uhi.

 

Tualthattu’ Mohammed Jamil tuh kum 46 a upa ahi a, Northern Pakistan a khopi lianlou chik Korhat kichi a teeng ahi hi. Amah tuh ei theihsiam di’n Pakistan singtangpa’ ana hi a, zi nei in tapa 2 leh tanu 2 tuak nei ua, atapa upa pen bel kum 16 mi ding ahita hi. Mohammed Jamil tuh hunsawt kuamtak apat in UAE gam ah lut in , Abu Dhabi Industrial area Mussafah mun a Construction Company khat a driver nna sem lel ahi. Alawmte’ gendan in Mohammed Jamil tuh akal (kidney stone) ah suang om a huaiban ah BP sangle nei sek hi’n gen uhi. Huaiziakin, tua Dr Rajan Daniel kiang ah hohzel in ana ki enkawl sak den hi. Huchia kha-thum lam bang ki enkol sakta himahleh hoihlam nawt thei tuanlou a, hiaibang thil mulkimhuai tak va hih kha a hingei ding hi.

 

Police custody sunga a omlai in Mohammed Jamil tuh amah leh amah kithah asawm ziak in psychiatric check-up in om ngal hi. Police in a thudotna uh adawnna khenkhat ah ka damlouhna in hoihlam nawt theituan lou a, bangziak hiam chia doctor-pa kadot sau luat ziak in, doctor-pa le hehlua zaw ahi ngei ding a office sung a thil om te a, ahon khet ziak a that mah kahi chi’n dawng hi. Huaiban ah doctor-pa’n damdawi honpiakte ziak in hoihlam kanawt tuankei a, huainak sang in gimlam kama nawh deuhdeuh zaw mah a, adamdawi khenkhat zaw ana thuaknopna (pain killer) ding lel ahi hi. Damdawi dikloupi honpia a hon thah tum ahihziak a huaima a ke’n amah kathah mah ahi chi’n kipuan beh lai hi. Bangteng genmah leh adamlouhna sawtsimpi a ki enkawlsak, hoihlam anawt zok louh ziak a hiaibang thiltung hiding hi. Himahleh hospital management in bangmah complaint mulou uh ahih dan uh gen ua, kuapeuh damloute’n alungtunlouhna un om leh complaint box om ah, a complaint thei gige ding uh chi’n gen uhi.

 

THUKUP:
Mihingte damlou a i om chiang in; chidamtak a i om zel uh akipah huai dan ithei khe pan sek uhi. Huaiziakin mi damtheite’n doctor apoimoh kei ua, mi damtheiloute’ chauh in ki poimoh zaw hi. Doctor ichih pen damlou chimoh beidongte a dia kinepna omsun ahi a, a huchih dungzui in, damlou a i om zek chiang in dam ut na ziak in doctor mah inaih pahpah sek uhi. Khenkhatte ngial in doctor naran le kimuang zou nawnlou in specialist te mah kimuang zaw tham a, adiktak in genle doctor chiatchiat leeng ana siam deuh zaw ana om law tham hi. Dam ut na ziak in khopi gamla zaw leh doctor siam omna banah hospital vanzat kiningching leh hoih zaw om na munte kinaih ut zaw ta hi. Huchi kawmkal ah i khopi Lamka zaang ah Pathian vualzawlna ziak in doctor tampi ineita ua, himahleh bangziak a damlou khenkhat in Imphal lam kinaih sese sek hiam chih dotna tampi om hi. Doctor khenkhat in anatna uh bangmah zong khelou a, gintak thu a damdawi pia chih kithang mahmah a, TB natna neilou pi TB damdawi pia in hoihlam lah nawt tuan mahmah lou in, gimlam ihon manoh chia Imphal lam a doctor siamzawte mah naih ngaizel chih kithang mahmah hi. Huaiziakin, damloute hoihtaka anatna uh suikhia a huchia adamdawi di diktak toh adam matan keptouh kiphamoh gige hi. Huchibang zel in, igam chidamlou takmai tuh anatna hoihtak a suikhia a damdawi hoihtak zang a i etkawl uh kisam petmah hi.

 

Hun bangtanhiam paita a pat in igam in damlouhna huaise tak mai hon nei a, tuni chiangchiang in hoihlam nawt sang in gimlam manawh hiaihiai a theih in om hi. Dam ut mahmah in unaute aw hon hunkhe maive ua chi’n ihut khiak ding kal ngaklah tak in gimthuak in thum hithit mai a, himahleh tunitan, a damna dia ipanlakdan phatuam nailou banglai lai hi. Anatna chii thum-te zaw matkhiak pah himahleh a damdawi di diktak tunitan in kipe kha nailou lailai a, hoihlam nawt thei nai tuan lou hi. Huaiziakin, hiai idamlou kep damna dia idamdawi zat te uh hoihtak a velthak in, panla thak le ut huai mahmah hilou hiam? I damlou itdante uh dikzou chiah nailou lai adiam ? Huchia damdawi dikloupi ipiak lailai tel ua leh zaw denchiah atung a igen bang in, mulkimna bei in, idamlou in ei hon leh thah kha ding hi. Akikhelma’n panla thak in asiamzawte dot a nei in, damdawi hoih mah zatsawm in idamlou gimtak mai …damna di’n panla thak le chi’n iki chial sawnsawn uhi. I haksatnate Pathian dongkawm zel in, bang damdawi zangle hiai kagam hong damthei ding hiam chihte dong in panla thak chiatni hang. I biak Pathian in sudam theilua ahi chihte mang-ngilh lou in, Toupa’ kagam uh damna damdawi Nang mah in honpia in chi’n ngenthak ni hang.

 

Atawpna di’n mitengin buaina leh hasatna ituahte midangte ziak ahi, ichi ua, himahleh kuaman lah keiziaka midangte buai ahi’ achi i om kei uhi. Huaiziakin, ibuaina leh haksatnate ibuchin/hoihkim zohlouh ziak ahi a, huaiziak mah in khat-leh-khat kikhotuah leh kipanpih tuah ngai ahi chih phawk thak in panla thak chiat le maw.