You are here: HomeRSS FeedsLatest Articles

Nang Lou A Christmas Guolnop...!

Tuesday, 08 December 2015 00:55

(A tribute to our martyrs)


-Shonnou Suantak

 

"Annbang ka it,nanglou in zaw;
Simlei nunnop,pallun zongleh,
Ngaihtam kasialna ding lel hi..."
-Muana Ngaihte(Ngaih Anglai Vol-II)

 

Guolnop a nop theina di'n lungsim nopna poimaw masa hi.Lungsim a puohgih neipumpum a guolnop mankhu,a nopna umlou hi.Itpen-ngaipen toh heikhom in hinkhuo bukimsah a,lungsim kipahsah in,khovel a guolnop thupipen jong ahimai hi.Tuajieh in,Itpen-ngaipen toh umkhomlou,khattang a sawlbang heite di'n guolnop umzie umlou a,midangte een-na leh lungsim gimna piengsah in,ngaitam sielna giap suoh hi.Lengtong Pauno in "Ngaih nangtoh omleng mun khempeuh nuam e" na chia a,tuami'n guolnop umzie genchieng mama hi.Khattang lungzuong a sawlbang heite di'n,December habul apat lungzuon huoisedieh a,midangte thalawpna husa a ngai deudeu leh,amauh' lunglenna uong semsem a,Christmas huikhi'n nasan injong thanopna pezoulou in hinkhuo khu 'mauna,mauna,mauna ngen' hiden hi(Paupu).

 

Phalbi khovot chiichiei,huivot laang hiiuhiau,daitui kai zingzeng leh meilum kai zizie te apat Christmas ki galmu thei phiel ahita.Christmas laa ing ngailai leh,lengkhopna hall sung a ki um ma kibang ahita! Pupu Santa Claus jong shopping habol mama tava.Neulai hileh,phalbi sagep(meima) khattei kinei taven(hahaha).Sweet Christmas kipan ahita a,Advent Christmas husa akija panpanta!

 

Ei Christiante' adi'n Christmas khu I Guolnop thupipen uleh nuompen ahi.Bawngsa du jieh mai hisamlou in,aneu-alien,ateh-akhang in kumbul apat i na galdot vevaw uh khu Christmas guolnop ahipen mai hi.Mundang/gamdang a umte nasan Christmas hunchieng in innkuonpite toh mankhom hamtang sawm in,innlam kizuonchiet hi.

 

Ki upasah zuollei,neulai in kiphur dieh abang!Christmas chieng a puontha hing ki leisah jel ahijieh in,ki ngahla mama hi.Nu-le-pate'n jong a tate lunggul thei in,nei-leh-neilou thu hilou in,puontha khattei hingguon jel ua,tuakhu 'Christmas Puon' kichi'a,Christmas ni tung masang kisil ngamvetlou hi.Christmas(25th Dec) zingkal annehzaw chieng in kilakhe vakhien in,kisil ngampan hi.Puonte kisawp nailou,a kikhipna te nasan ahibangbang a plastic sung akikoi chup chitchet ahitoh,a tha gim nam vingveng tazen hi!

 

Hibang a kinepna leh thalawpna toh,innkuon a Christmas vaidawnna dia i kisingsah vapuol lai un,daining komkhat a koima theipilou a mittui nul ana um hi.Azi-ata toh Christmas guolnop mankhom ding lunggul vevaw,a nu-apa toh Christmas shopping peikhom ut mama,azi-ata Christmas puon' leisah nuom mama,lah hithei non talou,a tahsa Lamka District Morgue a lumden mai I unau Salphate'n jong Christmas guolnop mangnuomlai va chi'ng e! Ni 92 valzen mittui ana nulta Salpha' innkuonte,a lungkham mangbat uh dawn jangkhaipi dending hinazenpi,puohgih guonbe pawlkhat ki um a,Salphate chiemmuina dan a bawl jong ki um va-ia hi.I pankhomna uh etlawm na suse dia kipei 'virus' pawlkhat um a,Tribal Unity mahni phattuompi dia zang sawm pawljong ki um kia leuleu hi.

 

A tamzaw te'n I 'movement' uh chimtah simta kibang a,lusuun innkuonte sa'ng in,a gal-et thaw pawlkhat in Salphate luong hepkhiet kal ngahla zaw bang hi.I ki gense tuotuo vua,dih I kisa chiet uhi.Lamkaite'n mipite a chi ua,mipite'n Lamkaite I chijel ua,akal a thulaisat ding um manglou in I kalsuon uhi.Salphate a neituom um I bangsah ua,I namneu lungsim uh pulah in,buoipilou di teng I buoipi zaw uh abangta!

 

Annbang ka it,nanglou a Christmas guolnop bang kachi maituo ding? Christmas shopping pei hunta e lawm,hei a vaithamden natai? Bawipu,Christmas puon' nang nget hun tungta,bangjieh a tutan hing ngenlou na hiei? Lawmpa aw,Christmas noptah a mangkhom ding chia iki chiemna na manghil hita maw? Khattang sawlbang heidia nang phal amah?chitekhu guolnop lungsim mongmong neilou a,hasetah a lusuun innkuonte kahlaa ahi ngeiding hi.

 

#Bull's-eye:Panpihdan i theilou leh,panpina nasep semte kipahpi beh ni.Mittui nulte hehnepdan i theilouleh,a mittui luonna ding uh bawlbe da ni.Tribal Unity hatsem nadia pan i lah ngap louleh,pienpi sanggam itna toh panlatute su thasetu in pangda ni.Gam-le-nam adia tawmngai suo ngaplou ihileh,i tawdim in kitou khinkhien vai in,panlatute subuoi sedah ni.Salpha' khapham te simmoh keini,ashi ut uh hikei,itna vang a hinna pie uh hizaw!

 

'Long live Tribal Unity,Respect Salphate'!