You are here: HomeRSS FeedsLatest Articles

~By: jamin h vualnam

 

Bangmi bang-gam hi’n,bang chibang a neeklim ine zong in,neih-le-lam khentuam lou leh kuamah hoituam neilou a,deihsak leh saklouh,angvan leh vanlouh thu chih omtuanlou a,mihing te’n akibang hamphatna ichi hia,ahihkeileh hamsiatna ichi zohia,hiai khovel a itaamsung/i-omsung/idamsung ua itan/ituah ngeingei ding uh thilkhat,kiselgu,imaituah ding leh pumpelh theih louh a om hi.Neihman,pilman,siam man,haatman,hihtheih man,hoihman leh vual tungtuan man a suahtak theih ahi kei a,huan;izawnman,imawlman,ihaiman,ihatlouhman,ihoihlouh,thulim louh deuhman hiam,inaupang man,upatman leh igentheih manhiam inleng discount hituan lou ding hi.Mivomte hi’n mikangte hitaleh,mineute hi’n miliante hihen aw,misan singsengte hi’n,samkil leh mam a naal zetzat-te hi’n,samvom leh puang phitphet te hitaleh, kuamah ngaihdam leh suakta ding omvetlou hi.Huaituh,mihing a piang ta photphot damsawt damtom thu hilou in,amah adi’n khat veitei ‘SIH’ seh ahi chih Bible a imuh bang un,ginlelh na’ng mongmong om hetlou a,100/100 dik leh Pathian thupiak ahi.Himahleh sihdan,sih-hun,sihna ziak leh sihna mun,athu leh ala kibang kim sipsip lou a,pammaih deuh,iit-huai deuh,hun nailou deuh leh poi lomlom kei chia ipuaknat leh ingaihzam deuh Mi’bel ana om veve zelsam hi.Huchi ahih lai in ei-tenna Lamka khopi(chituam deuh le) ah leng hiaibang sihna in hon makhelh in honpaipel tuanlou a,honhoi tuanlou in leh hon consession tuan samlou a, niteng in luang khat le nih ivui liam gige uh chileng a uanglua hikhol lou ding hi.Bangchi dan lamhiam in genle hang ahun atung a SI himai lou maw achih theih dia,himahleh mihing te etdan leh deihdan,duhthusam dan inbel hun-nailou deuh isak leh guihlua isak bang ana om veve zel hi.

 

Sihna ziak leh asan,aneu alian,numei pasal kibang vek a isihna uh,natna dang leh sih theihna dang omlou bang hial a,iki dembawl na uh,ken tangkha manlou ding kahi chi hileh kilawm a,isuan mahmah uh ‘SUNGNA’chih kihi vek mai.Ihinna zaw eikhut a awm hikei mah,himahleh isih hun ua sihna kigen veusek; ‘SUNGNA’ kichi chipen poisa leh awlmawh huailua isa deuh kei u maw?. Etsakna ding in:

 

I SUUN UN
Min : ABCXYZ
Kum : 32 yrs Sex : M/F
Sihni : 00/00/0000 Vuini : 00/00/000
Sihna : SUNG NA
Vuitu : EBC/PCI/CBA etc…YPA/YMA/CYA etc..

 

Isih khit/nung un a utut hitaleh bang apoina awm,bangchi bang natna hita leh hong hingthak nawn dinglah hilou a,ut leh sungna,polamna,teknat etc….hileh khemkhem nachi maithei.Ahon sihsantu/isuuntu’ adi’n zaw zatna bei in phat-tuamna om nawn keimah,himahleh anutsiat innkuante,lawm le vual,u le nau,beh le phung,veng le pam,khopih tuipih te adi’n azak leh amin; ‘SUNGNA’ chih gige pe’n ngaih in akhum ngeingui hetkei hi.Kholak leh newspaper khong ah ‘SUNGNA’ hi,ichi gaihgaih na ua,kisiam tanlou leh hi giauguau kawm a nuam sakhin chiah lou a ichihsuk gaihgaih ulah hizen.Tua ka chihna in asihna diktak leh natna diktak gen in gelh le hang bang apoina awm in asiat na awmdia eita?,Sungna iki chih zenpeuh ziak a,mi’n e e e huai maw…ahi dingmah hi,chia kuaman honhaih tuan loupi ua.Atanchin gentu,khamuan nathu leh avuitu’ te adia leng hi liailuai leh lemhet lou a omtheih ahih lam phawkthak ni hang.Eilawite iluang tung,iki vuiliam ma ua kiphat ekek a,ahoihpen,adikpen,achin pen dan a kigen a,aphat-tuam nawnlouh nung a kipahtawi pahpah phi’ng te ihi uhi.Huchih nung aleng asih na adamlouhna/natna diktak iim a gen ngam naituan lou thou thou lailai,adiktak genleh gen louh in phat tuamna leh hamphat na zaw hontun lomlom kenteh,genkei leng le kibang nachi nadia maw,akibat louhna awm hivaw;na gin-omlouhna,nazulhzauna,nachihtak louhna leh namuanhuai louhna,naginna leh na lungsim dingteng puang/genkhia hizaw nahi chih theih thak adeih huai.Na innsung mi khat asih a,aluang tung aleng asihna asan/aziak leh diktak na ngawn ahi bang a na puanzak/gen ngam kentuh,aheh pih huai,khongaih huai leh kivel/ki-et thak nang anei mipa/minu/sungkuan te nahi mai hi.

 

Ahihkei lelah ‘SUNGNA’ chihpen amin mahmah hoih/ngaih sa a deih tuntun ihi zaw uhia le?Sungna a site’n hamphat na bang hiam khat amuh ziak ua tua mah khelah ihi zaw uhia le?.Ita,ipa,inu,igang,ini,ipi ipu,isang gam uh SUNGNA loupi,mite maipha etna a SUNGNA a maw isihsak ua ivuiliam gige maimah uh.Asung na taktak a hong sihsan/omlouhsan taktak pimah hitaleh leng kipak leh lungkim tuan nading ihi na diam?.Houkhemkhem,neuchik ichi a,tua khemkhem leh houchik,neuchik ichih chih temah hive aw i khanmawh bawk leh,inekguk,takguk,zulhzauna,muanhuai louhna leh gin-omna itaksap sek na uh.Huchi lawmlawm a idamlouhna,isihna,inatna te uh gen ngamlou a,SUNGNA.SUNGNA.SUNGNA chih kia gen ngam ihih leh,igen ngam a maizumlou,kisuanglah lou,higiauguau sese lou a ipuan/igen khiat phekphek ngam nadin,eimah ki-enchian in,i innsungmite kuapeuh kivelpha a,chihtakna,gin-omna leh muanhuaina tawh panla hi lehang huchi lomlom a ‘SUNGNA’ a SI kitam/kiziing di’n uplah huai hetlou hi.Ahi a ‘SUNGNA’ chihmah deih a,hoih saleh ngaih salopetmah a, nachih ut teitei lebel thutuam,achih leng ut-tuanlou,hoih leng satuanlou ahihziak a SUNGNA mah chihmai ngai hive aw nachih teitei natak ahi poi isak.Zumhuai,zahlak huai,haksa,kisuan lahhuai in nopchiah khol takeh,ahi mah leh adiktak ah gin-om in thudik le teh,liau nang supnang hize’n lou aih chiah,tua hileh midiktat,migin-om leh mimuanhuai,mithudik,mite muan leh pahtaak iloh ban ah Pathian mah leng lungdam sak kihimai lou dii?.!.

 

Tua ahihman in unau,idamsung hun tomchik manpha a zang in,nek le dawn,gamtat khohei,tep le muam,nnasep leh thilhih ah kikem siang in,diktatna,muanhuaina,gin-omna,chihtakna leh thumanna tawh hing a nungta hileng isih hun a,’SUNGNA’ a sih teitei ngai khollou dia,huan iluang tung a isihna asan/aziak/natna/damlouhna diktak mah kuapeuh in hangsantak,kisuang lahlou,zum seselou,maimial demdum lou a kigen/kipuang khengam ding hilel hi.Tuabang hithei ding ei; ‘ADAMLAITE’ kia ihih man un leh khatvei tei ‘SI’ ngeingei ding ihi chih phawk a,huaihun chiang a ‘SUNGNA’ hilou deuh a sih sawm chiat le hang bang achi dia?Tuabang hithei dia eimah khut a kinga leh eimah mimal panlakna ahih lam phawk tontung a,thumkawm leh apanpihna ngen a,tuamah zahtak leh zui tawntung a Toupa’ lampi pialsan louh teitei sawm chiatni hang.Tuabang ahih a,sih na manpha,maitai huai kikhenna asuah theih nang in; bangkim a siangthouna,kidekzawhna,mimal ah innsung ah,khosung ah leh gamsung a hong omchiang in SUNGNA LOUDEUH in hiai leitung,i-itt leh ngaih tampi te nusia a ‘khamuang’ in kipaisan/awmlouh san ta ding hi.