You are here: HomeRSS FeedsLatest Articles

Na Lum Leh Lum Na Vot Leh Vot Vet In

Saturday, 13 June 2015 14:24

~ By : Jamin H Vualnam

 

 

Kilakna 3:15-16 ah “Na thil hihte ka thei,lum lah lum lou vot lah vot louin na om a;nalum leh lum inla,na vot leh vot vanglak lechin ! Lum lah lum lou,vot lah vot lou a, na om pelhpulh jiakin,ka kam akipan in kon sekhe ding” chih thupiak leh juih ding ei Khristian,Khrist nungjuite leh Khrist hihna koppih te’n imu uhi.Bangjiak leh bang hang a hiai thupiak poimoh a kulhiam chih ngaihtuah thak in mimalmal te ki-enchian thakleng chi ut ihi.Ahangbel Toupa Pathian bangkim siamtu leh bangkim tung a thunei pa’n akam sung a pan hon siatkhiak louh nang in,ihihna,isep-ibawl khatpeuh ah hikichian vanglak lehang achidam huai in anavak huai zaw di’n gintak huai isa hi.Christ/Khrist ichih chiang in Jesu Krist,Pathian Tapa,asiangthou,dembei leh hoihbukim I Toupa Jesu Khrist,ei Khristian sahkhua phutkhetu chi’n genleng genkhial khollou ding hihang.Huan Christian/Khristian ichih nawn chiang in mi piangthak,Khrist nungjuitu,Jesu Khrist thugente a kinga,tua Khristian sabiak a kinga,Khristian sabiak gingta a zui,Khrist hindan a hing leh Khrist batna nei a nungta chihna hong suak ding hi.Tua ahihman in Khristian ikichih ngal leh tua Khrist batna i neih ngeingei ding uh chihna hong suakpah hi.Amin maimai leh apolang kicheina leh ngaizam maimailou a,iki bulphuhna,ikingakna,isabiak uh zui labang,zuilou labang a,i om ding uh hilou hi.Tuamah ahi lum leh lum kichian a vot leh vot kichian ding achih nasan.

 

Eilawi tuh gamlak loupa/Bii bang mai a huihmut na lamlam a i awn duaiduai na un iginna leh i Khristian hihna diktak baihlam tak a puangzak mengmeng ahih lam thei thak nihang.Khristian hi a,Pathian hing bia kahihngal leh gamgi nei a hing a,ka Khrist nungjuih na tawh bang achi dia ichih theih uh kisam mahmah hi.Pharisaite bang a Belam vun silh,khami lua bang a awmdeuh ngeingai,hi hat-hat zozen,huchih louh kal a lah Pathian natawm thuneih khum hileng kilawm a khovelmi/sami mahmahte ihi uhi.Apoipen tuh khalam thu leh salam/khovel thu ikhen theih louh ua aleh amak a izuih khawm helhel ngam uh ahi. I Biak Pathian in hontheilou leh honmu lou ding sa zawmah laidep,na mihinpih ngoihngoih te’n bawn zezen honchih theih leh Toupa’n bang ngaihdan hon neidia chih kiveltuak mahmah khading hi.Saptuam leh biakna a Rev,ordained,upa,elder,local-upa,dawrka-makai,tuailai ah,naupang ah hi’n mipite hileh,kipezoutak kuhkal leh ginom a agam nasepna a theihtop a kizang,mite ahat louh leh abah hun ua leng kha aa dim a thathou leh hing gige,Toupa galhangsan leh sepaihte,Biakin ah khawmpi hun ah leh biakna vai a kizang leh tallang mahmah te ziakin Toupa min iphat un ipahtawi uhi.Himahleh tuatemah agamgi khentat theilou leh a dinmun uh,ahihna uh,asabiak uh,a Khrist batna ua huihmut na lamlam a apuk doidoi chiang un mitsiphuai in lungkham huai a,dikkim in hoihkim louthei hi.Mi’n hih in semta leh kei tuabang te adi’n ka Khrist nungjuihna leh ka dinmun mah tawh akituak in bang achidia chih khenkak theilou a kikhami sak mahmah te ziaka dahhuai in poi isa a,Toupa ngaihdam na ingen uhi.

 

Chita maimai leng; zanzek a election hun in bang kachi a chih kivel thak lehang,gen leh sak ding tampi om khading hihang.Politics ahoihkei  isai/ibuai pih keiding uh bel chikhang,himahleh kei: Rev,upa,elder,saptuam,dawrka,tuailai,naupang makai leh heutu khat kava kitaklah luatpen thilhoih leh kilawm hikhollou thei hi.Ahun a ka vote kakhiat leh hun himailou maw,kidaih lah a asak akhang a kei huai a,nou huai pawl chia,khalam sang a khovel/salam thil ibuaipih nak uh.Nang ana om khinkhian le teh asai ding leh abuaipih ding,nang sang a kilawm zaw leh ahizodeuh ding midang kidaih lua hilou maw chi ut dan ihi.Tuamah ahi lum lah lumlou vot lah vot kichian lou,huihmut nalamlam a awn daidai ichih,huaimah lah Toupa deihlouh leh a huat mahmah ahi ngal a.Pilvang a gamtat leh hindan kivel kul khading hi,ahangbel biakna leh sahkhua a kivoktuam leh tallang tata,khovel/politics leh simlei vai a hong kihel luat ua,hong kidaih lah jel chiang un mite muhdan leh etdan a kilamdan ban ah,nang poisalou leh khok nasaklouh hang in na saptuampih,na biakpih leh naseppih te’n nang a muanna leh ginna hongtasam pah ua,tuamah lah Toupa deihlouh hong hi sawnsawn hi.Bible in;heutu khat in heutu nih nna asemkop theikei ana chi hilhial mahleh,eipawl in bel nih leh thum bang zulhzau tak in isemkop siuhseuh siam mahmah taget uhi.Asempeih leh a ut taktak saleng lah sepna leh posting namun a le awmpeih tuanlou hizomah lai,huchi thouthou midang a sem-ut,a sempeihte leh achin/qualified te-mah angkhak in pekhesuk navak maileng agah khumzaw in pakpalh zawleh kilawm maw.! sum-le-paai,mi-le-saa neihman a ilei/imuh sang in.

 

Huaiziakin,akikhel ma’n kivelchian in bang chibang dinmun a ding kahihiam chih ki-enchian in,lum la bang vot la bang in ka om laklawh khading chih ki-velchian thak nihang.Politics/simleivai isai leh sai kichian in ginom,chitak leh muanhuai in saivet maini,imi isa igam inam a dia phatuam di’n pan lavet leng maw.Huan saptuam leh biakna a ikizat a ipan a,Khrist nung ijuih ngal leh juikichian vet in thildang vasai in kidaih lahlah nawn dah maile bang achi de aw ! vualzawlna leh lawhchinna a awm zawmai diam maw???..Thankik bang a sanzel dumzel engzel a huih mut na lamlam a ipuk/i-awn doidoi ua,lum lah lum lou,vot lah vot lou,kichian loutak leh mulmal lou tak a i-om pelhpulh intuh vualzawlna,lohchinna,khantouhna,kilemna,muanna leh bitna chikmah chiang in hongtung keiding.Tuakia thamlou in Pathian in akam apan hon sekheta houh ahi hia le.!.aziakbel igam inam ichi isa saptuam u-le-nau veng le pam insak-inkhang lawmta kisiatna,kituahlouhna,kineksiatna,zulhzauna,khelhna ,hoihlouhna leh buaina chikim in hichi lomlom a hon pumtuam taak chi ut phial ihi.Huaiziakin kuama-peuh; numei in kei numei,pasal in kei pasal,heutu in kei heutu,nungjui in kei nungjui,makai in kei makai,upa/elder in kei upa/elder,politician in kei politician,pastor in kei pastor kahi,chi’a eimah hihna chiat thei chiang kilkel a,gamgi nei leh lum kichian hiam vot kichian vet a hinkhua izatchiat uh iki deihsak uhi.Tuading mah a Toupa thupiak leh a lam et-te mah lah ihi ngal ua.Huchi hileh aman (Toupa’n) akam apan hon sekhe lou dia,amit nauta a hon-en in honkem tontung dia,avualzawlna lamchiteng a hon vualzawlding lah ahi sin-ngal a.Bang chibang ginna nei in bangteng sem mah le’ng Toupa’n lah na thilhih khempeuh ka thei vek achih ziak in.