You are here: HomeRSS FeedsLatest Articles

~ By : 100 Lal Guite

New Lamka

 

Leitung a mihing apiangkhe phot in a lunggulh leh duhthusam tuh mahni dinmun ban a kaltouh leh midang thunuai a omlou a zalenna ahi. Mimal, innkuan leh pawl tuamtuam ahihkeileh abiktakin Nam tuamtuamten midangte nuai apan a suakta a, zalentak a kivaipuakna deihziak in khovel kilchih ah buaina, kithahna leh hiamgamna in apumdimta hi. Hibang kal lak ah midangte theihpih bat leh awlmoh phak leng hilou, Manipur a Singtangmite maban ding thuk deuh a i ngaihtuah khak chiang in lungzinhuai mahmah hi. Tulel dinmun in Manipur a khosa Singtangmite a lomlom a khen in sehthum kisuah in, mahni phut dan chiat in Simleivaai i sai uhi. Himahleh tuni chiang tan in kuamah alohching zaw sam omlou in hun sawtkuam i beisakta hi. Hichibang a hun sawtpi i na sukbei nung a bangmah koloklou ahihleh bangchibang in panla thak leng phatuam zaw ding hiam chih tuh mi tampi ngaihdan hidin a gintakhuai hi.

 

Manipur singtang mite alom a gen in Naga, Kuki leh Zomi chi in i  kikhen uhi. Hichibang kal lakah thathak laktheihna dia lampi omsun tuh i Singtangmi hihna ziak leh sahkhua zuih kibatna (Khristian) hihna ziak bek a kipumkhat a pankhawmna poimoh hi. Tuni tan a Singtangmite kipumkhat theihlouhna ziak hidia i  gintak tuh, a kallak a sa-le-gaal a na kinei kha in, hun paisa a i kithah-i kimat khaknate ziak leng ahikha maithei. Huaiban ah i pankhawm khak ding lau a ei sang a nam lianzawte bang in leng hon tauh tuahtuah leng ahi kha ding. Bangteng hileh Singtangmite Khristian sahkhua zui i kichih ngal leh hun paisa a i kithah kimatnate i kingaihdam ding uh i Laisiangthou hon sinsak dan leng ahi (Matt. 6:14). Ei-le-ei leng i kingaihdam theih kei lebel i Khristian hihna leng bangmahlou suak dinga, van-gam kai ding leng kinephuai vetlou ding hi. Unau meelhaih a, i hailai nite (eg. 1960=K v/s H, 1993=K v/s N, 1997= K v/s Z) chihte sutsut gengen nawnlou in, Nampi maitam bang i neih theih leh hiaite khawng mangngilh theihna din thum zaw leng i chi hi. Nam piching zaw leh lianzawten a khangthu uah a vualelhna thu uhiam ahoihlou lamte sang in khangthakte a dia ettontheih thil leh masawnna ding thilte pibawl zaw uhi. E’n leng hiaite i pibawl ua, Black Day hiam Martyr’s Day chihte pibawl a i file luite i pholhpholh leh i tuailai khangthakte lungsim isubuai deuhdeuh dia, masawn nak sang in ahoihlouh lam a nungkik a, ui aluaksa nenawn bang lel i hi ding hi. I Laisiangthou in “Na melmate uh it unla, a tung uah thilhoih hih un, huan na kipahman uh athupi dia, tungnungpen Pathian tate na hiding uh” (Luke 6:27-26). Phuba kila tuah kei unla, hehna tuh Pathian awn zaw un phulakna kei a ahi, ken ka thuk ding Toupa’n achi” (Rom 12:19)

 

Manipur Singtangmite i kipumkhat theihlouhna khat uh hi a ka gintak nawn khat tuh i kilohna min mahmah uleng ei a mah i chih tinten ziak uh ade aw ka chi hi. A phatuam thei dia kipumkhat theihna ding ahihnak leh ei a mah chi tentun tuanlou in e.g. NKT chih dandeuh in NKZ khawng chi maimai phot lengleng, pangkhawm a i lohchin nakleh ei min ngei chiat mah a khen dan ding leng hong om nalou ding a diam? I omna state dinmun i thei vek ua, Solkal in amohpuakna, ahihding mah uh asepsuahna ding ua leng mipite ei-le-ei ki-gawt a bandh bawl photlouh a bangmah kipanlou, misi khat aomleh JAC kiphuh a bandh bawl photlouh a anung-ama suui chih omlou. Hichibang ahihna ah, Simleivaai toh kisai in tuh kum khat sung bang i bandh zoh keileh among leng dawkphalou ding abang hi. I unau Naga lamte eilawi sang a nget aneih-chiang ua athupai zawkna utuh: nek-le-taak thil poimoh chiteng phimzang khat natan amau gam tawn masalou a hong lut theilou in, state pumpi hon gawl-meek thei ahihziak uh ahi. Himahleh hichibang a apan theihna uh om den ding hi tuanlou in rail lampi hong lutsuak chiang in bel a kiphintheihna hong kiamta ding ahihman in manmohhuai khat suak hi. Huaiban ah Pu Namo in a buaina uh kha 18 sung a sukveng ding achih theih leh hong taksuak kha zen takpi leh eilawi Jesu hongpai (rapture) nung a dak heuhou dingte mah i bang kha diam chih ngaihsut tham ching hi. I unau Nagate leng aduhthusam uh tung zou tuanlou ding leng ahimaithei, himahleh phualpi in apiak tantan, a zaal zohpih thei dia a kawng ua luai hun hilou hiam? Amau zaw eilam hon poimoh kholkei unteh, hileleng amau, a kongpi a taang pangthei i singtangmi hihpihten hon nuse le uh adangte Aktuam a khumsa toh kibang mailou ding idiam? A khang-akhang a singdang pansan thei khop a deihngeen a kiphintheite sulnung ah, imuan-isuan-i tuailaiten bangtan tha anei zou lai di ua? A madawkte sulnung ah kitheihsiamna toh, taam-neem theih a omte, Gam buaina kilkawi ah a matawng din hon hemkhe thei kei ding uh kuan achi thei a? A innteek kisate nasan in sesum suanga gampam limbang abelh theihleh, e’n bang simthu lelta ding?

 

Simleivaai ah deihsak thil a ngah ding bangmah a om nawnkei ding chih chiangsa ahi. Thagum-thatang suahnalou a lah bangmah kinephuailou. I kiim-ipaamte ah daak kiimvel mah dih! Simleivaai ah deih ngeen in kiphin taktak ni chileng a kongpi a pangkha theite lou ngal in hon gum zou kei ding chih theihsa ahi. Huaiziakin, nidanga sa-le-gaal a na kinei kha ihihtaak leleng kimangngilh sak a, kei/nang/amau chihte omsak lou a, i pankhawm theih matan zaw bangmah tan tunglou ding i bang hi. Pangkhawm in panla nuam leng zong a phattuam nawnlouh hun hong tung pah ding ahihman in manmohhuai mah i chilou theikei hi. I unau saupi na tungsa a i  koihte leng a duhthusaam uh tangtun khongkhong ding sa a, lam-en tak a a om lai ua tulel a Phualpi solkal in “Nam thil a vai kihawmlou ding” achih leh eilawi a dia vualzawlna thupitak hilou ding adiam? Huaiban ah IMte 36th Raising Day a aheutu pen in a thugen na ah “Nagate hamphatna ding kia hilou in zalenna sual tengteng adia panlak ahi” achi zawmah hi. Kei mimawl ngaihdan in 6th Schedule leng baihlam tak a ngah ding bang in i ngaihtuah maithei na dia, i unaute tellou in zaw baihliai in i laikhe zou na diam?. I muhtawp in leng ataktak hi zoulou deuh state sorkal deihdan a hei lamdang/local adjustment chih hiam hong hise taleh bangpi phatuam tuanlou maithei hi. Banghang hiam i  chihleh tua iluahna Districtlou ngal zanggam mite maingal tak a aluttheihna District dang omlou ahihman in suhum-tawhum in ahum ding uh chih theihsa ahi. 6th Schedule ngahzou, a ahibangtak a zat hileh agam leitang kepbitna singtangmite khut ah om dia, midangte hong lut theilou in development fund tuamtuamte ah leng kuaman hon duhgoh theilou ding hi. Tua ziaktak mah ahi koimah a-chikmah a thil om ngeilou Namniamte hih-ut thakna ziak. Dinmun sangzaw delh a asak akhang vai a, i gam dangka tung a apau uh gelhtheih ding khop 8th schedule a dopsang ahih nung ua kiakniam ut thak chih tuh bangmah dang ziak hilou in kihazatna leh kineksiat utna ziak ahi ichilou thei kei a, chizau huai nasa kei maw?

 

6th Schedule toh kisai genbeh zek lai leng, avang kim in genkhiak in omzel mahleh paisuak taktak theilou in muih zel hi. Tun leng MDC lenlel ten a hun beidek geigei in hon gen lang nawn ua, ahi dingmah ahi, kipahhuailua, himahleh amau muanlouhna pumpi hituanlou in, mal pan a haksa deuh lou ding hia ichihna hiaite ziak ahi. Hiai dan tuh India malsuah bial a om nam niamzawte leh zawngkhalte kihumbit theihna ding khualna a i gam dan bupi 244 nuai a guan ana om ahi. Hiai dungzui in Assam ah - North Cachar Hills, Karbi Anglong leh Bodoland Teritorial Council, Meghalaya ah - Khasi, Jaintia leh Garo District Council, Mizoram ah - Chakma, Mara leh Lai District Council leh Tripura a - Hrangkhawl District Councilte hiai provision nuai ah na omhi. Hiaite leng state solkal nuai a om ahihman in lungkim gige hituankei le uleng apoimoh mahmah gamleitang kepbitna ah phatuam pha in Meghalaya ngial ah leinuai hauhsaknate ah phualpi in leng thuneih khum theilou in hauhsakloh petmah uhi. Ei a toh akibat theihlouhna khat nawn ah amaute omkhakna statete ah agam leitang kidaih in, ami tawm ua, kuamah dang in aluah khakna gamte uh vadeihgoh tuanlou hi. Ei a bel phaizangmite luahna gam neulua in ami lah tamlua uh ahihmanin i luahkhakna gam peen akeek theihna uh omsun ahihman in MLR Act bang zat khum in i om ua, bangmah i genzou tuankei uhi. Huaiban ah hiai provision nuai a na omsa a tamzawte akhonung a nget-hat ziak a piak a om leng hilou in state khenzak hun a bawlkhawm a na omkha ahi uhi. Hichibang bilbial kallak ah thilhaksapi suak ahihman in koilam hiamte kikhamuanna kallaka kizehtellouh in i phukhezou taktak na diam chih ngaihsut tham hi.

 

I gam-ilei (i Zogam) ichichi na ua, neitu hihna bangmah i neihlouh kia hilou in i omna mun min leng chikmah chiang in ikheng lamdang zou nawnkei ding uhi. I khopi i china ua i sum neih sunsun i zatna dawr kaite Singtangmi sang in namdangte tam zawta. I lauh mahmah tualsung leh Govt. a thuneihna sangtak nei securityte nasan in a suui sau ngam nawnlouh uh zu man lel in leng Lamka mipite sum nikhat lel in leng bangzahta a luakkhe ding ua? Hiai ei sumte mah zang in tunung chiang in i mun-i mual teng hon leikhe lai ding uh lah ahingal a. I mabaan tuh Tripura a Tribalte dinmun sanga leng huaise zaw thei ahi. Phaizang District a leng English a gelh hina zenpi, bang dia ei District a Innmun/Loumun Pattate nasan Bengali Script a gelh a om lailai ahi ding chih na ngaihtuah kha ngei hia? Gari number isimtheih hetlouhpi a namphu a gelh ding chih hong om zel! agelh loute gari laksak ding chih hi zawmah, pangkhawm lou in i nangzou na diam?. Nidang a Secret Heart High School, Hundung/Ukhrul a ka School kaipih lawmte khat toh khatvei ka kimukha zenzen ua, tomkha ka houlim kha uhi. Ama hon-gen pipen tuh: “Nou lamten maban bangchih sawm a panlana hi ua? Na heutute un koilam hon manoh pih sawm ahi ua? Kou banghiam ngah nei le ung singtangmi dangteagam neitu kichiten hon nopneh lawlou ding uhiam? Kou ahihleh tulel dinmun in leng ka luahna gam uah hong lutngam tuankei ua, kou a din lauhthawng huai hetlou himahleh mabaan sawnsawm in sihngam in ka pang uhi.Amau deihsakna muang a banghiam muh iki lam-et le zaw piang ngeilou ding ahi aw! Na luahkhakna gam ulah a mitsuan pen uh ahingal a” hon chih leh gen ding avaang mahmah mai hi. Hiai bang mah in lawmte nnasepnatoh kisai a amau gam singtaang dawn khota khat a a vahohna ua atunna pa uh singtang pamawl tak hidiagintak khat in hiai atung apa gendan mah in hon awlmohdan hon na genpih nilouh achi hi. Hiai bangmah inmi dangdang in leng amau gam a vahoh khaten awlmohhuai hon sak dan uh agen uh vazakha zel uhi.

 

Ahitak a gen in Manipur gam in a uap lian zaw tham 90% Singtanggam puahna dia Phualpi kumpi in hon piak teng toh State solkar kinaamtaak in, phaipitual mun neuchik a zeek a om ahihziak in phaizang mite ani ni in a khang hulhul ua, pilna-siamna, inn-le-lou thil teng ah phakzoh vual ding ahinawn kei uhi. Hiaite tengteng leng bangmah dang ziak hilou in, ei mohna leh ikipumkhat theihlouh ziak mah ahi. Tuni’n kipumkhat a pankhawm theihna ding hun tomchik i neilai ua, huai leng akikhel hak nawnkei ding. Siloam diil sawtpi kitoklou maithei ahi.

 

Ngaihdan dang khat ah, Manipur a Singtangmite kithutuak a pangkhawm hileng, bangmah i ngahbeh zoh tuankei leleng, India constitution in dan hoihtak ana bawlsa om hi. India constitution Articles 371-C nuaiah singtangmite hamphatna ding tanvou kuamah in asukbuai theihlouh Special Provision “Hill Area Committee”na om hi. Hiai dan dungzui in India President in HAC tungtawn in singtanggam direct a enkol in State Governor tungtawn in singtanggam puahna ding sum-le-paai a tuam in hong pai ding hi. Huai thu chiang zaw a theinuamten phamta Pu T.K. Hangzo, Chief Judicial Magistrate in agelh SSPP Magazine Silver Jubilee Edition-1987 ah ettheih ding hi.

 

Hiai atung a igen zat ahihtheihna dia duhthusam khat gen lai leng:- Assembly Election hun nawn chiang in singtangmi MLA candidate teng thuzoh in Naga/Kuki/Zomiten amau area chiat ah mohpua in aching teng lak a kuamah in Minister dinmun laklouh dia “Hill Area Committee” nuai a om vek ding. Hiai i gen in Minister tangthei ding i milian neihte kaihniam nopna hi zawlou in - Huchibang Minister dinmun tang thei dingte Hill Chief Minister chihbang hong hile uh, Minister khat hihsang in uthuai zawtham ding hi. Huaiban ah singtangmi MLA dangte leng Portfolio nei in mohpuakna kihawm vek thei ding uhi. Hichibang a i pankhawm theih le bel singtanggam puahna dia fund hong pai teng Governor tungtawn in ahibangtak in zattheihta ding hi. Ei a dia hamphatna omsate nasan i zat theihlouhna tuh i kipumkhat theihlouh ziak mah uh ahi a, huai mah midangte duhthusam ahi zel hi.

 

Singtangmi teng khekhat a ding a, phualpi kumpi in eite ki-etkolna dia hon bawlsaksa HAC hoihtak a zongthei hi in huai ka deihkhop kei uh chi a aban ngen hileng tuh awm deuh leh kilawm ahi a, kipumkhatloupi a sangpi gengen leng paunak in Sakhi manlou Ngaltang tum achihmah abatna chiang omleh kilawm hi. India malsuah gam a state te i et leh Mizoram leh Nagaland kia Khristian State achih theih hi. Hiai statete gel i etleh ei omna khawng sang in agam kipuah zawdeuh adiam i chih theihna tuh lampite amaam sawt zaw deuh a, milip in leng tang rual zawdeuh uh ade aw chih theih hi. Ei lak ah bel agam sang in mimal kipuah in khang zaw a, building hoih taktakte kilam mahleh a zotna din leng hawktui leh buannawi pal ngai veve hi. Lamlian kibawlten lah khatvei kan tukvuah dou zoulou, midangten phualpi apan milian-milal antuun lianpipi hon puak theite hoih taktak a vaidawn a hamphatna tampi atan lai ua, eilak a i vai-dawnna tuh public curfew leh bandh peuh na hi zel. Hiaite ziak khawng mah in Khristian i kichih ngal leh i thugin bulpi “Min natung a hih na deih bangin mitung ah hih sam in” (Luke 6:31) chih zangkhawm theite mah toh nekhawm-takhawm thei in kipumkhat leng chih tuh duhthusam ahi.

 

Athu a hiai tan  i gen banah Pu Pauzachin Zaila in zom ni:

 

Ei tuibang kigawm leng, kuan gibang honkhen dia?

Ei gibang kikhensa, kuan tuibang hong gawm dia?

Gawmlou ding singdang in, khenlou ding KIGAWM LENG