You are here: HomeRSS FeedsLatest Articles

Goodbye My Dear Kickers

Sunday, 28 July 2013 22:36

~By:Mungpi Khupson

Kum sawm euau kizuih khit nunga hih kammal zat hong kul mawk pen theihsiam haksa sa ngiat ing. Ka nop ni-in hong uap a, ka dah ciang zong hong paisan peuhmah lo, ka kisapna mun peuhpeuhah phunlo pauloa hong zui den, ka khiatlah, a minpi Kickers cia zong ka sap ngamloh K cia ka nosap den khat ahi hi.

Ka kithuah cillam vua ka lung hong nopsak dante khong ka suut tohtoh ciangin, ka khasiat tha suak semsem...pasal pipi ciloin neh hong no mawk hiven, “maw.... K, citakpi mawk ding I maw, ong zuih ngap nawnlo takpi maw... kikhen liang zawzen ding I maw?” ka cih leh tangvetloin hong et a, “kei ka pai hunta hi, ong en dih ve, hi bangpi tawh mite lakah ong zuizui leng mi'n nang hong simmawh lawh ding hi. Nungkum sawn, inn pan I paikhiat ni in ong zui dah vet leng hoihzaw mah ding hiven....nanga' dingin vangikpi hi lel ing, nidang bangin vang hong pia zo nawn keng” hong ci hi. “Tuaci pau kei ve K, keia dingin manpha luateh, nang om kei lecin mipi lakah zong ka pai ngamlohpi e, khawlak vak zong nang tawhloin ka hihzawhloh lam na phawksa aiveh, I kithuah kum tam semsem mah leh kei adingin ngaihbaang semsem hi teh” ka cih leh a nung hong ngatsanin tawlkhat sung ka sip dide uh hi.

Ken ka zolzol hang mi'lakah nuamsa nawnlo hi penin thei ing, sianggen mai leng nidang bangin vaam kisa nawnlo hi. Nung kumsawn innpan phaksap gam zuana ka dinkhiat laiin hong zui dah mai ning, kei tuhun tawh kituak nawn keng, inn lum na ngak hithiatzaw ning hong cih laiin, hong ngaihloh mana hong hemgenna ka sak leh na hi vetlo. Mite in kum nih kum thum bekin a kithuahpihte uh laih pah zangzang cih bel theisam ing. a'ih hang kum sawm ka kithuahpih khit ciang nangawnin vangngaih K pen laih ding cih peuhmah ka khensat thei nai kei hi. Midang tawh kibangloin, a lungsim kip mahmah a, gentheih haksatna tamveipi thuak mah leh puuk nuam vetlo hi. Amah ka kithuahpih bangin midang thuahpih hi leng bel kum nih val hong zui khollo ding uh hi. Ka gentheihna hong theihsiampih mahmah a, guahzu, meeikai, nisa nuaiah zong hong khahsuah peuhmah loin, a nuntakna, a vekpi'n keia dingin hong pia ngiat hi.

Ka kithuah zawh uh kum nih a phak laiin, khatvei meeltheihte' kiteenna ah ka tonpih leh mi'n kilawm hong sa mahmah uh hi, mit khempeuh ama tungah tukhin hi ci leng a uanggen lua hi kei ning! Tuabang kawmkalah a neipa hih pen a nopdan kigen theilo hi! Zong kisaktheihpih hi mai ing, khangualpihte'n zong hong eng hi cihbel!! Tuani mah hi ka ciah lamun guah tam cihtak tamin lampi tengah hawktui cing zihziah hi. Keima khialhna ngiat hi... ka genkik ding zong nuamsa keng, ai zong kikhen taktak ta ding ka hih manun hong gen ning... Kei bek kikhualin inn tun mengmeng ding bek ka deih luatna tawh hawktui siakmit tan a luang zihziah pen kantanpih zawzen hiveng aw, guah lah theukhin cihbang hi nai peuhmah lo!! kawllukhu khulo lai maw.....hai lua ing....zawzen!!! Ken cina thei ding bangin na tuat kha vetlo! Inn tun teh a cina pah lian, mei lum naihsak pah, zatui pia... phadawm tuanlo ahih manin a zingteh zato tunin ka puak leh ka upmawh sang a natna na nasiain operation bang bawl liang uh hi. Tua zawh bel dop cihtak ka dop hi in, tua hang mah zong hilo dia kum sawm sung vingveng zato kitun nawnlo hi cileng ka kisiallua tam ah!!

Zanitaak in a natna hong suakkik pian ahih manin clinic paipih ka sawm leh limtak ong en a, “kei ut lo, ong paisan ta in, tu mahmahin ong paisan in, na mit hakin la hong veel dihve, tuma kum nga kum sawm hunlai bangzo ding hong sa peuhmah na maw, zani zong na boss in hong ko ngiingei ve le, khuapi sung va vakin la, nang tawh kituak ding khat va teng in, kei khawlak utnawnlo, nong it takpi leh ka thu mang in” hong ci geu hi. Kei zong limtak kingaihsunsunin utlopipi sa mah tawh hong sawlna mangin khuasung ka vak leh duangsuah hoih, etlawm cihtaka etlawm khat ka tuak kha citciata, vit sa! ka ciahpih pah hi. Inn ka tun ciang innmaiah K in hong na muak se a, kilawm lua uh teh ci'n hong na nuihsan siusiau hi. “Kilawm mah lodia nang' lah hong zui nuam nawnlo na'ih cianga, nang tawh kisun thei penpen ding ci a ka va ten' ngiat hi ei” ka cih leh a lungdamna leh a adahna kikim hi leh kilawm limtak khatvei ong en kik a bangmah genloin “mangpha maw” hong ci hi.

Kei zong ka lungsim khensat khin ka hih manin ka khut tawh ka lawn tawp penpenna ding ci'n khedap zaa leh khedap taihna la in limtak ka taih khitteh ka mobile phone tawh hoihtak a maan ka la a, “'Mangpha' ci ni leh vangngaih Kickers, kum sawm sung tawntung phunlo pauloin hong bulhsak na hih manin lungdam mahmah ing” ci'n ka khiatlah mahmah Kickers company bawl ahi ka nipini khedap tawh ka kikhenbawl taktak ta uh hi!