You are here: HomeRSS FeedsLatest Articles

TRVM | Chief Moderator Desk ✍

Friday, 13 May 2016 00:49
Leaders' Writer: Pu LT Ngaihte
 
                                                                                                 LUNGSIM THAWMHAU
 
 
I biakna la khat ua, ‘Lungsim thawmhau kep ding tampi a om, Tungsunni tuibang kiam hi,’ khuangpi toh icih zaza uh, tulai igam mipi lungsim putdan toh kituak pha mahmah ding in ka gingta hi. Aziak bel, tulaitak i  gam mipite lak ah, a sia deihte lou ngal kipaklou dingdan in muh theih takpi hi. Lungliapna nasatak in hon tuam a, patauhna thupi tak genkhiak vuallouh inei uhi.
 
 
Lawibual a ka Gang khat, sakap siam khat in Sahang liam zuih alauhhuai dan hon gen a, a ‘aw’ bang hon kiamsak hial a, a mit-hah bang hong hisim guauguau a, nakpi in gen leh Sahang in naza kha taktak lai di mah bang in, hon hilh siausiau bang phial in. Amah gendan in, Sahang kiang naikha a i omleh, bizang in zong liahzou akicih mahbang in, kimulou hinapi in, hon ‘hih hiauhuau khat’ om ahi aci hi. Sapte'n ‘under the sword of Damocles’ acih uh hinkhua ahi.
 
 
Damocles icih Syracuse kumpi Dionysius II office a kongkhak ngaktu hi a, aman kumpipa thupi saphet hilou in, adinmun na eng mahmah hi. Huai thei in, Kumpipa'n amah toh dinmun kikhen ding lemsa takpi a, nikhat akongkhak ngakpa Kumpipa dinmun ah dingsak uhi. A laltutphah tung atu a, atunglam a ettouh leh Temsau hiam mahmah leh lianpi khat Sakol mul zangkhat lel a kikhai mu a, keleh a lutung satbal suk kha ding ahihman in, lau petmah hi. Huai a tung a akiak mankhak ding lau in, kintak a Kumpi tutphah nutsiat a ut maimah hi.
 
 
Lungsim ngaihtuahna kingakna tuh ikim a thil i muhte ah kinga hi. Adiakin khalam hinkhua i cih lungsim ngaihtuahna hilel hi. I taksa khosakna mun apan mun tuampi ngaihtuah theih ahih ziak in.
 
 
Lungsim ngaihtuahna aniam leh asaan pen i ngaihtuah ah kinga hilel. Damocles in a tung a temsau mulou hileh, lungsim nuam deuh kha ding. Ahihziak a mukei leh temsau a si kha ding hizel. Makai mipi ngaihsak loute khong ngaihtuahna a kha tampi sung i omtak man in, i gamsung mite ngaihtuahna niam mahmah ding in amuh theih. Niam maimai hilou in lung-ke dedu, hi geuguau, lungmuanglou, thawmhau cihte in genkha vek hi.
 
 
Hicibang dinmun a omna in, ihmut limtak hon laksak a, mai ah nuihmai hon laksak a, lungsim ah thanopna hon laksak a, taksa pumpi ah damlouhna ahon tun hi. Lungsim a lametna taksap ziak in suicide bang a hongtam a, nasepna a lunglutlouhna ziak in accident-te hong pung a, sihsia leh hinsia ahong pung mahmah hi. 
 
 
Ahihleh, hiaite apan bangci suahtak ding ihia le? Haksa maithei - alampi omsun tuh lametna leh kinepna Jesu a tangtak a ngak ding, Amah tangtak a et ding, Athupiakte i theihna dia ei-leh-ei Bible kisim ding. Biakna leh Khotang a makaite i hah-et luatciang in, lungkiakna hinkhua in hon tuam hi. Saptuam nasemte Pathian thugen dan khong lel a lametna i neih ziak ua lungkiakna leh lungkhamna hongtung ahi. Mipi makai a ineih khakte uh tungkia a lametna i neihlel ziak un hichitak a tualsung buaina a tung hi. Sum-le-pai duhgawlna a kisun let tektok sa ahih ziak un a tangthei khuk om nawn kei uh. Huaite suahtaksak i ngak ziak un, hicitakin ilak uah kimuhdahna a tung hi.
 
 
Mihing ah kinepna nga nawnkei ni e. Bible mahmah sim in, Jesu tangtak in mimal in enle hang, huai ah lametna leh kipahna, thanopna leh damtheihna a hong tung nawn ding. Social Reformation icih keukau uh, ipoimohpen uh kipatna ding, apoukhiakna ding, zung akaih patna ding leng mimal lungsim mah ahi. Huai ‘team’ te pat di, huai ‘Pawl’te patdi cih hi mawk lou in, ei mahmah a kipan ding ahi. Mimal panlakna in ahon bawlhoih dia, inkuan a bawl hoih dia, khawsung a bawl hoih dia, namsung a bawlhoih dia, District a bawlhoih dia, UT/6th Schedule /State/gam pumpi a bawlhoih ding. Akipatna bei a thil omkhe theilou ahi. Mimal lou ngal akipatna di Pathian in bawllou ahi.
 
 
[Note: Tutung CMD Pu LT Ngaihte in gamsung awlmohna liantak toh a hon gelhsak man in a tung ah kipahna lian petmah hi.] 
 
 
TRVM|COFRELA|27|CMD-03