You are here: HomeRSS FeedsLatest News

Angels Vision News | March 28, 2017

Tuesday, 28 March 2017 23:00

Joint Action Committee Against Anti-Tribal Bills (JAC-AATB) makaih in tuni’n YPA GHQ Hall, Hiangtam Lamka ah tribal movement pailel toh kisai banah Manipur Chief Minister thak N. Biren Singh in kihou dia JACAATB makaite chialna a bawlna toh kisai ngaihdan tuamtuam omte kikup khawmna nei uhi. Hiai hun ah nam makai leh Innpi tuamtuam apan makai tamtak paikhawm ua, tribal movement toh kisai a lunglutna nei mimal leh pawl tuamtuam kihel uhi.

Thutut kingah dan in, Manipur Chief Minister thak N. Biren Singh in Manipur singtangmite buaina toh kisai banah gam leh leitang a dia hinna ana pia tribal martyr vui nailouh a om mi 8-te tungtang genkhawm ding in JAC-AATB Chief Convenor H. Mangchinkhup kiang ah chialna bawl a, JAC-AATB in tribal society leh intellectual tuamtuamte ngaihdan lak masak poimoh a sak ziak a hiai bang public consultative meeting neih a om hi’n kigen hi. Programme ahihleh sunma dak 11:00 in kipan a, JAC-AATB Chief Convenor H. Mangchinkhup in vaidawnna thu gen in, tuni tan a JAC-AATB in pan a laknate pulak a, tribe leader leh intellectual lam apan ngahdan tuamtuam omte kikup khawmna om hi. Hiai hun ah tribe leader leh mimal tuamtuam paikhawm te’n tawlngalou a panla JAC heutute chihtakna leh tupguhna kipahpih mahmah uh ahihdan gen in, singtangmite kihumbitna dia 6th Schedule lou ngal lampi dang omlou ahih dan a gen banuah maban ah leng hihtheih tan a kithuahpih a gum ding uh ahihdan gen ua, Bill 3-te ziak a kiphinna ni 575 chingta in, maban ah lungtup mualsuah ahihma tawlngalou a paisuak ding in thupuuk uhi. H. Mangchinkhup, Chief Convenor, JAC-AATB in movement awlmoh a hiai bang a kalsuante tung ah kipahthu gen in, tuni a consultative meeting neih a om pen a khatveina hilou in, a tawpna leng hilou ding ahihna ah, tuni a ngaihdan tuamtuam genkhawm a omte hoihtak a record hi a, maban ah intellectual leh makai tuamtuamte toh genkhawmna neih ahih nawn ding banah compilation hoihtak a bawlzoh ahih chiang in Manipur Government mai ah luikhiak hiding hi’n gen hi.


XXXXXX


District Social Welfare Officer/CCpur makaih in hongtung ding March 30, 2017 apan in DSWO Office, Chiengkonpang, Tipaimukh Road ah Indira Gandhi Old Age Pension Red Card leh Blue Card neite a ding in pension sum hawmkhiakna om ding hi. Hiai toh kisai a thusuak kimu in a taklat dan in, March 30 apan April 4, 2017 sung in Churachandpur A/C huamsung a om Indira Gandhi Old Age Pension (Red Card leh Blue Card) neite a ding hawmkhiak hiding a, April 5 in Samulamlan Block leh April 6, 2017 in Singngat A/C huamsung a Manipur Old Age Pension Card neite a ding sum hawmkhiak hiding hi. Tuaban ah, April 7 in Henglep A/C, April 11, 2017 in Thanlon A/C leh April 12, 2017 in Tipaimukh A/C huamsung a om Manipur Old Age Pension Card neite a ding pension sum hawmkhiak hiding hi’n taklang hi. Pension sum hawmkhiakna ahihleh zinglam dak 10:30 apan sunnung dak 3:00 sung hiding a, April 2015 apan August 2015, kha 5 a ding, kha khat a Rs. 200 zel in kha 5 a ding Rs. 1,000 piak hiding ua, sum la ding te’n mahni Card kitawi teitei ngai ding hi. Kumdang bangloutak in tutung pension sum hawmkhiakna ah video coverage hoihtak bawl hiding ahihman in midang a ding laksak chihte phal hilou ding a, mahni mimal a sum la theilou ding te’n DSWO/CCpur kiang ah application piaklut ngai ding a, hoihtak a etfel ahih zoh chiang in pensioner kiang ah staff te’n v ape ding uh hi’n thutut kingah hi.


XXXXXX


Young Paite Assocaittion (YPA) GHQ, Central Executive Committee in March 23, 2017 ni in meeting nei ua, huai hun ah thupukna resolution no. 1 dungzui in leh YPA ki-ukna Dan Bupi 2015 Part II, Article No. 5 (vi) a kitaklang thuneihna pansan in YPA nasepna leh kalsuanna hoih leh lamzang zaw ding ngimna in YPA Lamka Block pen seh nih - YPA Lamka Block leh YPA Lanva Block in khen ua, Block in a huamkhak ding Unit-te leng lem tuak ngak uhi. Thusuak kimu in a taklat dan in, YPA Lamka Block leh YPA Lanva Block nuai ah UInit 9 tuak om ding a, Lamka Block nuai ah Lamka Unit, Central Lamka, Zenhang Lamka, Tuithapi, Saikul, G. Monglian Unit, B. Kaljang, Headcquarter Veng leh YPA D. Phailian Unit om ding a, Block Office ding in Hiangtam Lamka zang ding uhi. Tuaban ah, YPA Lanva Block nuai ah YPA Bungmual Unit, Pearsonmun, G. Mualkawi, Mission Compound, Takvom, Mata, Mualpi, Lanva leh Tangnuam Unit om ding a, Block Office ding in G. Mualkawi zang ding uhi. Block tegel a vaipo ding telna ahihleh May khasung in om ding a, huai ma teng YPA GHQ in enkai lai ding hi’n thutut kingah hi.


XXXXXXX


Board of Secondary Education Manipur (BSEM) nuai a Class X sinlel te’n apaisa March 17 apan HSLC exam a neih uh buaina bangmah omlou in paitou zel a, tuni in leng candidate te’n Science Subject exam in, buaina bangmah omlou in a ni 4 ni zousiang uhi. Tutung HSLC Exam ah CCpur District in exam centre 2 – Ebenezer Academy leh Don Bosco Hr. Sec. School zang in CCpur District Private Centre Committee-te etkaina nuai ah candidate 2,845 te’n exam pia ua, tuni a exam neihna hun ah candidate 2810 present in, candidate 35 absent hi. Thutut kingah dan in, Main Centre Ebenezer Academy A Block ah candidate 667 om lak ah candidate 658 present in candidate 9 absent a, B Block ah candidate 520 om lak ah candidate 517 present in 3 absent hi. Sub-Centre Don Bosco Higher Sec. School A Block ah Candidate 583 om in, candidate 577 present in, 6 absent a, B Block ah candidate 416 om in, tuni a exam neihna hun ah candidate 410 present in 6 mah absent a, C Block ah candidate 659 om in, candidate 648 present in candidate 11 absent hi. Tuni a exam neihna hun ah Langkhanpau Guite, Chairman, ADC/CCPur in etkhiakna nei a, tuni tan in candidate-te lak ah chiin dan kilawmlou matkhiak om nailou a, kum dang bang in tukum HSLC exam siangthou mahmah hi’n kigen hi.


XXXXXXX


Paite Literature Society, Board of Directors in tuni sunnung dak 3:00 in PLS office, PTC/GHQ office, Hiangtam Lamka ah BoD meeting nei uhi. Meeting hun ah, member-te kim theikei mahleh a tamzaw tel in PLS annual general body meeting neih hun ding leh thu poimoh tuamtuam gen khawm uhi. Hiai hun ah member paikhawm te’n PLS Annual General Body Meeting hongtung ding April 8, 2017 chiang a neih ding in thupuk ua, a mun ding ahihleh tunung sawtlou a puankhiak hiding in gen uhi.


XXXXXXX


Eastern Khuga River Flood Victim Committee-te makaih in Zenhang Lamka kho taw a Tuitha gal a om kho tuamtuam tengkhawm te’n Tuitha pang a retaining wall bawlsak ding phutna in tuni’n lampi zui in DC/CCpur kiang ah petition pia uhi. Eastern Khuga River Flood Victim Committee kichi ahihleh Zenhang Lamka kho taw a Tuitha pang a om, a kum a kum a tuilian thuak Nengthawn Veng, Meitei Christian Leikai, Nazareth Veng leh Vungkhanthang Veng te’n a bawlkhiak uh hi a, tuni’n hiai vengte apan mipi 100 val kikai khawm in lampi zuihna a neih banuah DC/CCPur kiang ah petition pia in, haksatna tuamtuam a tuahte uh va tun uhi. Thutut kingah dan in, Tuitha Lui suah lampang a om hiai kho 4 te’n kum teng in tuilian thuak in, lou leh gam tamtak mansuahta ua, huchikawmkal ah, Tum (western) lampang a om Zoumunnuam khua apan in tu in Retaining Wall kibawl in patauhna liantak tun in, Suah lampang ah leng retaining wall bawlsak dia ngetna a hiai bang rally a neih uh hi’n kigen hi. Eastern Khuga River Flood Victim Committee te’n DC/CCpur kiang a petition a piak uh kimu in a taklat dan in, Tuitha Lui suah lampang a om khua te’n kum teng in tuilian thuak gige in a gam uleh a loute uh tui in tamtak tuah mangta a, tuuk hun chiang in innkuan tamzawte mahni innlum ah teeng ngamlou in mundang a galtai zel ua, tu kum 10 paita sung in EFCI-te biakinn leng suksiat a om in, 3vei lam tundin thak a omta hi’n taklang hi. Tuaban ah, tuilian in gam tamtak a tuahmang ziak in tui luan dan naktak a kikhek in, lui gal langkha lam a omte a ding in gam liantak suak in tu in luah dim in omta a, Lui gal a om Zoumunnuam khua in tu in retaining wall kibawl lel hi. Hiai retaining wall in tui thahatna naktak in khauhsak thei ahihman in lui gal a omte a ding in vangsiatna nasatak tun thei a, khua leh khua kikal ah kitheihsiamlouhna leng tun thei hi’n taklang hi. Tua ahihman in, Eastern Khuga River Flood Victim Committee in Lui pang tuak a tengte a kibang a en a, Tum (western) lampang a retaining wall a kibawl theih leng suah lampang ah leng bawlsak ding in DC/CCPur kiang ah ngetna pelut ua, suah lampang a bawl theihlou ding ahihleh tulel a tum lampang a kibawl lel nasepna khawlsak ding in ngetna bawl uhi. DC/CCpur R. Sudhan, IAS in leng a thil nget uh hoihtak a ngaikhia in, hun lemtang masapen a amun va enkhe ding ahih dan theisak hi.


XXXXXX