You are here: HomeRSS FeedsLatest News

Angel's Vision News | September 23, 2016

Saturday, 24 September 2016 11:24

Amstrong Pamei, IAS, Jt. Secretary (TD & Hills), Govt of Manipur leh Mrs. Mannuamching, IAS, Director, Tribal Affairs & Hills te'n tuni sunnung dak 1:30 in ADC/CCpur nuai a government school function hoihpen a kigen New Lamka Upper Primary School pha in, New Lamka UPS in TD & Hills tungtawn a World Class Computer Studio a ngah uh enkhia in, school paidan toh kisai genkhawmna nei uhi. Hiai hun ah bialtu MDC CT Lian Guite banah Soiminlian Lengen, MCS, CEO/ADCC te leng kihel in, World Class Computer Studio leh school functioning dan toh kisai enkhia uhi.

Thutut kingah dan in, World Class Computer Studio ahihleh Tribal Affairs & Hills in District Council omna district 6 apan khat chiat koih dia District Council chih a proposal a piaklut dungzui in, CCpur District a ding in New Lamka Upper Primary School telkhiak a om hi'n kigen a, Computer room ding hoihtak bawlsak ahih banah Server Computer 1 tel in computer 12, Smart Noteboard (touch screen) 1, projector 1 leh solar piak hi a, a sum a tuat in Lakh 12 man phazou hi'n kigen hi. Hiai hun ah Amstrong Pamei, IAS in New Lamka UPS function dan a muh in kipak mahmah in, Studio kibawl dan lungtun huai a sakthu gen a, Headmaster leh Staff-te toh kihou in, school a blackboard kizang teng White Board a kheng vek hidia a gen banah World Class Computer Studio a computer hilhtu ding contract basis a mi 1 lak hiding hi'n gen a, bialtu MDC CT Lian Guite toh school khantouh ding dan genkhawm ua, 14th Finance a fund hong pai ding ah school building bawlna ding a tel theihna dia proposal pelut ding in theisak hi. Amstrong Pamei, IAS, Jt. Secretary (TD & Hills), Govt of Manipur ahihleh sunnung dak 2:30 in Imphal ah kiksuk nawn hi.


XXXXXXXXX


All Tribal women Union, Information & publicity apan thutut kingah dan in, zingchiang September 24, 2016 sunma dak 10 in District Hospital morgue ah Numei pawl Bukpi te'n Salphate galna neiding uh hi. Hiai hun ah ATWU thumpawlte leh mipite toh kithuahkhawmna banah gamsung buaina toh kisai in Pathian kiang ah thumkhawmna neiding uh a, hiai hun ah gamsung buaina toh kisai a lunglut na nei kuapeuh teltheih ding hin thutut kingah hi.


xxxxxxxxx


Glocal Volunteer-te saina in hongtung ding October 1, 2016 in rayburn College Hall, New Lamka ah Rev. Dr. Martin Luthar King Jr. hinkhua leh a nasepte pansan in Peace & Non-Violence Workshop om ding hi. Hiai Workshop ahihleh Glocal Volunteer te'n Rayburn College, VK Tawna high, Discipleship Theological School leh Centre for Peace Education, Manipur toh pangkhawm a asai uh hi a, Rev. Khen P. Tombing, Principal, Rayburn College in Workshop hongkhia in, Rev. Th. mangthianlal, President & CEO, Glocal Volunteer makaih in Devotional Talk om ding hi. Programme hunsung in Non-Violence toh kisai a Documentary film kibawl suahkhiak hiding a, Dr. Leban Serto in Rev. Dr. Martin Luther King Jr. tangthu pansan in i gamsung a lemna leh muanna om theih ding dan toh kisai sinsak ding a, mun tuamtuam apan lunglutna nei khempeuh tel theih ding hi.


XXXXXXXXX


District Election Officer Lunminthang Haokip, IAS, DC/CCPur makaih in Election Staff leh Election Icon te'n Lamka pansak Press/media-te kimuhpih in, maban election siangthouthak a neih ahih theihna dia panlak ding dan pulakna nei uhi. Hiai press conference ah SDO teng leng kihel ua, DC/CCpur in election kichi India khua leh tui te'n vaihawmtu bawlna dia poimoh mahmah ahihman in kuapeuh in mawk ngaih thah mailou a, mahni vote chiat khe ding in ngetna bawl a, tu in summary revision pailel ah kuapeuh in min bawl dik ngaite bawl dik a, January 2017 tan a kum 18 chiang ding te'n leng apply theih hi'n gen hi. Maban ah Systematic Voter's Education & Participation (SVEEP) tungtawn in Public Awareness Rally neih ahih ding banah Polling station teng ah Gram Sabha neih hiding a, kha nawn sung in Local Cable TV tungtawn in talk show sai hiding hi'n gen hi. Hiai hun ah Election Youth Icon dia telkhiak a om te'n leng mellahna nei uhi.


XXXXXXXXX


Joint Action committee Against anti tribal bill leh Zogam Online Website saina in, zingchiang September 24, 2016 nitak dak 6:30 apan in Gangpimual ah singtang gam buaina ziak a hinna pia salpha 9 te zahna program neiding uhi. Hiai hun ah salphate zahna in candle lighting om ding a, lasa siam tuamtuam apan lasak ngaihkhiakna om ding banah, mi poimoh tuamtuam apan thugenna hun zat hiding hi. Hiai hun zatna ah JAC in kuapeuh telchiat ding in ngetna nei uhi.


xxxxxxxx


Zou Presbyterian Youth Fellowship in Diamond Jubilee lopna dan a ZPCS Campus, Zomi Colony a Diamond Jubilee Celebration Committee-te saina a Volleyball Tournament a neih uh paitou zel a, tuni'n Closing ceremony leh final kimawlna nei in, nitaklamd ak 4:00 in kipahmante hawmkhiakna nei uhi. Hiai tournament ahihleh kum nawn January 2017 chiang in Zou Presbyterian Youth Fellowship te'n kum 60 chinna Diamond Jubilee thupitak a lopna a neihna ding utoh kisai a kisakkholna dan leh ZPCS nuai a District 10 omte lak ah kimeltheih tuahna leh kitanauna hoihzaw om theihna ding tupna hi'n kigen a, August kha apan in activity tuamtuam nei ua, hiai pen activity 3na hita hi'n kigen hi. Thutut kingah dan in, hiai tournament ah District 10 apan Pasal lam ah team 12 leh numei lam ah team 9 kihel ua, Pasal lam ah S. Muvanlai ZPYF te'n champion hihna la in , Hiangtam (B) ZPYF te'n 2na la ua, Numei lam ah S. Vengnuam ZPYF te'n champion hihna a lak banuah ZPYF Central Church te'n 2na la uhi. Champion team in kipahman in Rs. 5,000 leh medal sang in, Runners-up te'n Rs. 3,000 leh medal sang uhi. Hiai hun ah mun tuamtuam apan saptuam mipi tamtak paikhawm in, M. Zamkholian, Headmaster, Chinkham modern School in Chief Guest hihna toh uap in, Guest of Honour in S. Jamliankhup, SI pang a, Upa Hauliankhup in Functional President hihna toh a uap banah Siama, Singngat OC in Chief Host hihna toh Daimond Jubilee Volleyball Tournament hunkhakna hun uap hi.


XXXXXXXXX


Sub Divisional officer Churachandpur in SDO/CCpur huamsung a om village authority leh VDC te kiang a theihsakna a bawl kimu in a taklat dan in, zingchiang September 24, 2016 zinglam dak 9:30 in YPA Hall, Hebron veng, New lamka ah New Lamka area a Polling station teng a ding in Local bodies leh RWA meeting poimohtak om ding hi. Hiai hun ah Special summary revision of electoral rolla, relevant part, verification of names, claim and objection toh kisai genkhawmna om ding ahihman in, VA/VDC member, Booth Level officer, supervisor, booth level agent leh mipi kuapeuhmah telding in SDO/CCpur in theisak hi. huailou in September 25, 2016 Pathianni sunnung dak 1 in YPA Hall Hebron veng new lamka ah Booth level agents te a ding in Special Campaign om ding hin Seiminthang Lenthang, SDO/CCpur in thusuah bawl hi.


xxxxxxxxx


Singngat Area Sports Association (SASA) in MK Thomas Mini Stadium, Singngat a SASA Open Football Tournament a 25veina a sai uh tuni'n Closing Ceremony leh final kimawlna om hi. Hiai hun zatna P. Tongthang, Zou, Special Contractor in Chief Guest hihna toh uap in, Functional President in M. Thianzathang, President, Muluo Phungpi Organization pang a, Guest of Honour in Hangzamoi Tonsing, Government Advocate pang in, Chief Host in Nengkhanlam, Chairman, Singngat Vision 2020 a pang banah Dominic K. Munluo in Special Guest hihna toh hiai hun zatna uap a, sSingngat leh a sehvel apan kho hausate tel in mipi tamtak in hiai hun zatna uap uhi. The 25th SASA Open Football Tournament Closing Ceremony ahihleh sunnung dak 12:30 in kipan a, mi poimoh chial a omte apan thugen ngaihkhiakna a om banah Singngat Standard School tel in school tuamtuam te'n special item lahna nei uhi. Thutut kingah dan in, hiai tournament ah Singngat leh a sehvel apan banah Lamka khopi sung mun tuamtuam apan team 15 kihel ua, September 1, 2016 in tournament kipan in tournament hunsung in goal 125 a kikhum khiak banah player 35 in yellow card mu in player 1 in red card mu uhi. Tuni final match ah SSPP Rayburn College leh Corinth Memorial Team, Singngat kimawl in full time tan ah goal 1 tuak kikhum in, penalty ah Corinth Memorial Team in 5-4 a vualzou in champion hihna la uhi. Champion Team Corinth Memorial Team in kipahman in Rs. 30,000 leh trophy sang in, Runners Up SSPP Rayburn College in kipahman in Rs. 15,000 a sang banah Third Place hihna la Seinou Memorial Team in kipahman in Rs. 5,000 sang ua, SSPP Rayburn College in Best Discipline Team hihna la in, kipahman in Rs. 1,500 sang uhi. Programme hunsung in Chief Guest a pang P. Tongthang Zou, Special Contractor in tournament a kihel team teng kiang ah football khat chiat a piak banah Closing Ceremony uap kho hausa teng kiang ah Hausa Puansan khat chiat pia in thugenna hun zang hi. Aman a thugenna ah, Singngat Assembly Constituency pen Zou pau zangte a dia kikoih deuh ahih man in maban election ah midang hong kigolhlouh a deih thu gen in, Zou nam sung ah leng laisiam vai hawm thei mi hunkhop a om banah laisiamlou vaihawm thei leng hunkhop om a, bialtu MLA Ginsuanhau mipi'n i deih nawn kei leh amah leng om ahih dan mipi paikhawmte mai ah gen a, Singngat bial khantouhna dia kuapeuh i pankhawm uh poimoh mahmah ahi chi'n gen hi.


XXXXXXXXX


GAMSUNG THUTHANG

India gamsung a ding a sumsinna munpi lianpen hidan a chiamteh a om Mumbai khopi nawl a om Navi Mumbai ah school naupang te'n Navy te munpi kiang a pasal 5 vel ginlelh huaitak a kivialleh lai mu uh ahihdan a gen ziak un, tu in Navy te munpi kiang ah security hihkhauh in omlel hi. Tuabang a Navi Mumbai a Navy te munpi buluh na om phut thei chih ziak in, Navi Mumbai ah India in commando a neihte lak a a suanpen National Security Guard commandos tem un 3 ah koih in om ngal uh a, team khat ahihleh buaina om ngeingei leh kintak a zat ngal theih ding in Delhi ah mansa a koih in om uhi. Mit a mutu school naupang te'n a gendan un, pasal mi 4 leh 5 te'n ahihleh puan vom ngen silh uh a, galvan leng tawi uh hin gen uhi. Navi Mumbai a Navi te munpi ahihleh Mumbai apan Km 50 vel a gamla a om Uran kichihna mun a om hi a, operation nasatak a pat a om toh kiton in, tua Uran kiim a school tuamtuam omte leng a vek ua khak in om ngal uhi. 2008 kum a Pakistan tawsawn helpawl Lashkar E taiba in Mumbai tuipi tawn a Mumbai khopi sung a buluh nung uh ahihman in, tua thiltung bangbang a tun louhna ding in Mumbai khopi sungteng ah Check point tamtak dinkhiak a om in, security naktak a hihkhauh hi a, long khawlna munte leng search operation bawl a om in, helicopter zang in helpawl hidia gintak te zonna nasatak in pailel hi. Tu in Mumbai tuipi zul a om Gateway of India, Raj Bhawan, Bombay High, Bhabha Atomic Research Centre leh mun poimoh tuamtuam te ah security tamtak sawllut a om in, Hotel a giakte indentity tanpha leng hoihtak a etkhiakna Crime Branch in a neih ban uah, Mumbai police nuai a Patrol pawl in tuipi zul ah speed boat 14 sawllut in tuipi zul venbitna naktak in enkai uhi. Tuabang a Mumbai khopi sung leh pua ah galvilna nasatak pat a om toh kiton in, Mumbai leh Pakistan kal tehtuah a om Gujarat tuipi zul ah leng venbitna khauhsak thak in om ngal hi.


xxxxxxxxx


Manipur state sung a ILP koihding deih a kiphinna nei Joint Committee Inner Line Permit System (JCILPS) nuai a numei pawl kibawlkhia Women's Wing apan makaite'n Manipur Governor Dr Najma A Heptula kimuhpih sawm mahle uh Governor in kimuhpih a utlouh ziak in, tua JCILPS numei pawlte thangpai in Governor tenna inn Raj Bhawan luhsawm uhi. Police thusuak in a gendan in, JCILPS women wing apan volunteer hunkhop covenor Th Apabi, Momon Leima leh co-convenor S Memcha Leima makaih in Governor tenna inn buluh sawm in Keishampat lam a kipan kipan ua, himahleh Governor tenna inn a tunma un Thoubal Bus Parking ah Imphal West District police hunkhop in khawlsak in paisuak saklou uhi. Police toh Women wing volunteer te kal a kinawk tuahna om nung in Police in Women Wing apan makai 4 telkhia in Governor kimuhpih theiding uh hiam chin a gate tan tonpih uh a, gate bul ah secretary to the Governor toh kimu mahle uh tua Governor Private secretary in tuni a ding a a kimuhpih hun uh beita hidan a a genkhum ziak in, tua numei pawlte thangpai in a kong ah kiphinna nei uhi. Women wing Convenor Apabi in thuthak saite mai ah, bangziak a dikna tangkou pih a kiphinna nei nupi teek taktak te minute 10 sunglel leng Governor in kimuhpih utlou hihiam chin a khasiat thu gen a, Manipur state assembly in a kinthei bangpen a Special session sam a ILP koihna dia Dan a bawlding ahi chi hi. Huailou in JCILPS Convenor BK Moirangcha in a genna ah tuni apan Manipur lutding lampi teng ah state polam mite check na kipan ding hin gen a, tuni mah in Moreh apan gari hongtaite etkhiakna nei in, huai ah Burma a hong kipan phalna kichian neilou hunkhop Tengnoupal Police te khut ah pelut uh hin kigen hi.


xxxxxxxxxxxxx


GAMDANG THUTHANG

Afghanistan solkal in Taliban helpawlte zungkalh sawm a beihpi a suah uh paitou zel toh kiton in, Afghanistan gamsung a Taliban chihlouh helpawl dangte Afghan solkal lam a pang ding in laklut sawm in nasatak in kisa lel uhi. Tuabang a Afghan solkal in Taliban chihlouh thautawi pawlte toh kilemna neihpih sawm a pan a laknate uh lohching tou zel in, tunin leng Hezb-i-Islami toh ceasefire puang thei ta uh hin kigen hi. Hezb-i-Islami helpawlte ahihleh Gulbuddin Hekmatyar makaih thautawi pawl hi ua, a gamtatna uh huam theih luat ziak in, Kabul ngawngtan tu Butcher of kabul chia minloh a om in, 1990 kiim lak vel a minautang poikhoih lou tamtak a lompi a a thah ziak un, a makai uh Gulbuddin Hekmatyar tung ah war crime tamtak bulhkhum in leng omkhin hi. Hezb-i-Islami leh Afghan solkal in kilemna a neihtheih ziak un, Afghan solkal apan High peace Council makai Sayed Ahmad Gilani in Afghan khangthu a ding a chiamteh tham ching hin gen a, Hezb-i-Islami makai Hekmatyar tung a war crime koih a omte leng lakkhiak a om hin gen hi. Hezb-i-Islami makai Hekmatyar ahihleh Soviet union hunlai a Soviet in Afghanistan luah sawm a beihpi a suah hun uh 1980 kiim lak vel in, Soviet panlakna deihlou pawl in ana om a, 1992 apan 1996 kikal a Afghanistan gamsung a tualgal om hun in, Kabul ah mi nautang tamtak a thah ziak in Butcher of Kabul min piak in om ngeita hi.


xxxxxxxxxx


Syria buaina toh kisai in kikaptuahna khawlsak a om guitung zoulou a kikap tuahna nasa zawsem a om nawn nung in, tunin Syria solkal in Aleppo khopi nasa zawsem a beihthak hiding chin thupuan bawl uhi. Syrian Army in minautang te kiang a thupuan a bawldan un, opposition thautawi pawlte luahkhumna bial teng ah operation nasa zawsem neih a sawm ziak un, kuamah Rebel thautawi te omna mun a omlou ding leh kihemkhe ding in theisak ua, Syria sepaihte hatna bial a tailut teng kuamah mat omlou ding uh hin leng thuchiam bawl uhi. Tulel in ahihleh Aleppo khopi sung ah milip 2,50,000 vel dingte Rebel te ukkhumna mun ah omlel ua, amaute a ding in nek leh taak bangkim UN tungtawn a puaklut himahleh tukal sepnawnni a UN apan huhna pedia kuante bomb khiakkhum a om ziak un, tuni tan UN in huhna pen awn nailou hin kigen hi. UN in zan a huhna piaknawn ding toh kisai in bangkim mansiang nawnta hidan a thupuan a bawl toh kiton in, Damascus khopi kiang a om Foua leh Kefraya ah leng UN in minautang te nekding puaklut sawm in kisa lel a, Syria gamsung Lebanon toh gamgi a om, Madaya leh Zabadani ah leng UN in huhna puaklut sawm in kisa lel hi. March 2011 apan Syria galpi om nung, tuni tan in Syria buaina a siteng a vek a gawmkhawm in milip lakh 4 val si uh a, Syria gamsung a teeng milip kimkhat 11 million veldingte'n a gamsung uh nusia in galtai uhi.


xxxxxxxxxxx