You are here: HomeRSS FeedsLatest News

Angel's Vision News | July 20, 2016

Thursday, 21 July 2016 18:27

Angel’s Vision Cable Network in Digital a cable piakkhiak theihna Control Room leh office ding hun sawttak a buaipih nung in tuzingkal in Angel’s Vision office leh Digital Head-end Control Room honkhiakna nei uhi.

Hiai hun zatna ah Langkhanpau Guite, Chairman, ADC/CCpur banah Executive Member, ADCC leh MDC tel in District Level Officer hunkhop in a uap banuah mun tuamtuam apan Angel’s Vision deihsaktu leh ngainatu mi tamtak paikhawm uhi. Hun zatna ahihleh Angel’s Vision office mun, Awnsuak Road, New Lamka ah zingkal dak 7:00 in zat in om a, Elvis Gindam in hun zatna makaih in, innkong ah Rev. S. Vungminthang, General Secretary, EBC in Angel’s Vision office ding hongkhia in Pathian kiang ah laankhia hi. New Lamka YPA Hall kong Awnsuak Road, New Lamka ah Angel’s Vision main office ding honkhiak ahih toh kiton in Angel’s Vision a thusuah nop nei te’n huai mun va zot theihta ding hi’n kigen hi. Angel’s Vision main office ding honkhiakna zoh in Digital cable piakkhiakna dia Head-end Control Room kibawl Rev. Khen P. Tombing, Chief Co-ordinator, PCI (R) in hongkhia in Pathian kiang ah latna nei hi. Thutut kingah dan in, Phualpi sorkar in Digital India chih thupi pansan a India gamsung a cable operator teng in digital a cable pekhe chiat dia thusuah a bawl dungzui in Angel’s Vision in neih leh neihlouh genlouh in inn-kal kitawi zen a Digital Head-end Control Room hon bawlkhia a, Ministry of Information and Broadcasting thusuak dungzui in kumnawn 2017 apan Analog signal piakkhiak hithei nawnlou ding ahihman in, kuapeuh in Set top Box thuah chiat thei dia ana kisa khol ding in Angel’s Vision ngaina tu kuapeuh kiang ah ngetna bawl hi. Angel’s Vision Main Office leh Digital Head-end Control Room honna zoh in first floor ah deihsaktu leh ngainatu teng toh programme saulou zat in om nawn a, huai ah T. Nengzachin in vaidawnna thu gen in, T. Ginkhopau, Proprietor, Angel’s Vision in thugenna hun zang in, Angel’s Vision hon piankhiak dan banah haksatna tuamtuam tamtak pal galkaitou a Pathian panpihna a hiai tan tung thei ahih dan gen a, saptuam hi’n gam leh nam banah khotang a makai tuamtuam te’n angel’s Vision te chialna ngai poimoh a hong uapna tung ah kipak petmah ahih dan gen hi. Angel’s Vision ompihtu Pathian ahi a, tuni tan hiai tan makaihtu leng Pathian ahih banah maban a makaihtu ding leng Pathian mah hiding a, thumna mah a kinga uh ahih dan gen hi. Programme hunsung in Rev. S. Vungminthang, General Secretary, EBC leh Rev. Khen P. Tombing, Chief Co-ordinator, PCI (R) te’n hasotna thu gen in, Angel’s Vision in a maban kalsuanna ah Pathian mah bel tinten ding in hasuan ua, Miss Chingngaihlian in mipi paikhawmte zaila a awi in, T. Ginkhansong in kipathu gen in programme zou uhi.

 

XXXXXXXXX

 

All Tribal Women Union (ATWU) makaih numei pawl te’n District Morgue a salphate luang tutpih a lengkhawm leh thumkhawmna a neih uh paitou zel in, tuni in leng mun tuamtuam apan mi tamtak paikhawm in, mi tuamtuam apan thugen ngaihkhiakna om a, MK Lal Gualnam, Programme Officer, National Foundation for India (NFI) in Right to Information (RTI) Act toh kisai sinsak hi. Tuni a thumkhawmna hun ah mun tuamtuam apan mi 150 val paikhawm in, ngeina bang in slogun sapna a neih banuah lenkhawmna leh thumkhawmna nei in, mi tuamtuam te’n tribal movement pailel toh kisai a puaknat a neihte uh zalentak a pulak in, Mrs. Remi in Bible a Job tangthu pansan in Tanchinhoih gen hi. Aman a thugenna ah, Bible a kimu bang in Pathian in mi a vualzawl ding himhimte haksatna thuak masa sak teitei ahih dan gen in, tutung singtangmite buaina leng Pathian in vualzawlna a piak ut ziak a hiai bang teng tungsak ahih man in kuapeuh lungkelou a i pangtouh uh poimoh ahi chi’n gen hi. Programme hunsung in mipi paikhawm te’n Pathian phatna la tuamtuam sakhawm in hun nuamtak zang ua, gam leh leitang banah makai tuamtuamte a ding in thumkhawmna nei ua, MK Lal Gualnam in Right to Information (RTI) toh kisai sinsak hi.

 

XXXXXXXXX

 

All Manipur Written Test Successful Candidate of Police Constable (AMWTSC) Male 2013 Batch te’n thusuah bawl in, apaisa July 4, 2016 ni a Chief Minister makaih a Cabinet Minister 5-te theihpihna toh Manipur Chief Minister in July 20, 2016 tan a final result suak sak dia thuchiam a bawl suk tangtun ahihlouh ziak in poisa petmah ua, hiai thu toh kisai Hill District teng in hongtung ding July 22, 2016 chiang in KKL Complex ah genkhawm ding uh hi’n taklang hi. Hiai thu toh kisai in candidate te’n kiphinna tamvei tak neita mahle uh ngaihsak ahih louh ziak un apaisa July 10, 2016 in KKL Complex ah join meeting nei in, MLA leh Minister teng kiang ah hiai thu toh kisai Monsoon Session a puaklut sak dia ngetna bawl ding in thukim ua, tua dungzui in July 18 leh 19 in memorandum piaklut a omta hi’n taklang hi. July 22, 2016 chiang a KKL Complex a meeting neihna hun ah candidate-te banah nu-le-pate leng kimtak a tel ding in ngetna bawl uhi.

 

XXXXXXXXX

 

Phungkhothang Govt. H/S in Sarva Siksha Abhiyan (SSA) tungtawn a student-te a dia school uniform hong paite hawnkhiakna tuni sunnung dak 12:30 in school mun ah nei uhi. Hiai hun ah Kaikhanlian Guite, Dy. Inspector of School, CCPur Block in uap in, thugenna hun a zat banah student-te kiang ah uniform piakkhiakna nei hi. Phungkhothang Govt. H/S ahihleh CCPur District sung a dia government school hoih pen leh student haupen pawl a kigen hi a, tukum in hiai school ah student 600 val om in, Class X exam ah student 26 in lohchinna a ngah banuah student 12 in compartment mu uhi. Tuni a school uniform hawmkhiakna hun ah Kaikhanlian Guite, DI/CCPur Block in CCPur District sung a sinsaktu hoihpente om khawmna government school ahih man in, government school a kai naupangte kikoih niam mailou a kuhkaltak a laisim ding in hasuan a, student-te kiang ah SSA tungtawn a 2016-17 a dia school uniform hong paite hawmkhia hi.

 

XXXXXXXXX

 

Pearsonmun a om Lalthamuana leh a sungkuante tenna ding inn ding ittu leh deihsaktu te’n a bawl uh tuni sunnung dak 3:30 in Lanva MDC T. Khaikhomang in hongkhia in Pastor G. Suanmung, Local Pastor, EBCC/Pearsonmun in Pathian kiang ah laan hi. Thutut kingah dan in, Pearsonmun a om Lalthamuana leh a sungkuante khosak haksatna ziak a tenna inn se-chik a om uh ngai theilou in a sungkhat lainate banah ittu leh deihsaktu te’n bialtu MDC T. Khaikhomang panpihna tungtawn in tenna inn hoih tak tundinsak ua, bawl zoh ahih toh kiton in tuni sunnung dak 3:30 in bialtu MDC in hongkhia in Pastor G. Suanmung in Pathian kiang ah latna nei hi. Hiai inn bawlna ding in bialtu MDC in 60 percent vel sengpha ban ding hi’n a sungkuan te’n gen uhi.

 

XXXXXXXXX

 

Zomi Colony a om nupi khat in nau nei a, naungek pen hoihtak in piangkhe mahleh a taksa bukimlou in lamdang mahmah hi. Hiai naugek ahihleh apaisa July 18, 2016 (Seppatni) zinglam dak 9:30 a piang hi a, a muk tunglam teng a omlouh banah a veilam nak toh a kam kimat a, a veilam nak vang bel ngeina bang a om in, Cleft Lip dan bel hichiahlou a, naungek dinmun bel tu tan in lauh thawng huai in omlou hi. Naungek nu’ gendan in, a pasal khamtheih hih mi ahih ziak in a naupaai lai in ANC khat vei leng bawl khalou ahih dan a gen banah doctor himhim ki-ensak khalou in, ultrasound leng kilalou hi’n gen hi. Hiai naungek pen a ta 5na hita in, a ta 1na kum 10 upa damdawi inn a aneih chihlouh a dang teng innmun ah nei ahih dan gen a, naungek pian hun in inn ah kuamah a omlou in, panpihtu ding kuamah a omlouh ziak in aman kidop in, a lum leng kilak khiak hi’n gen hi. Naungek nu ahihleh Red Cross Road Junction, New Bazar a ngasa zuak a niteng nektawm zong a ainnkuante enkol hi’n kigen hi.

 

XXXXXXXXX

 

Churachandpur District sung a BJP Senior Member te’n tuni sunnung dak 3:00 in Hmar Veng ah Lamka pansan press/media-te kimuhpih in, BJP Senior member-te theihpihna lou a BJP CCPur District Office ding honkhiakna theihtawp suah a dal ding uh ahih dan gen uhi. BJP Senior Member banah BJP CCPur District a President hihna term 2 sung vengveng ana len Lhunkhojang Haokip in Press/Media-te kiang ah tulel a vaipote term nikum November kha in bei a, himahleh senior member-te theihpihna tellou in pawlkhat in Imphal ah election nei in vaipo ding leng guang uhi. Senior member te’n hiai bang thil omdan pen pom theilou in, Centre ah hiai thu tut in om a, Centre BJP in State BJP kiang ah enkai dia theihsakna a piak dungzui in tu Seppatni in State BJP President K. Bhabananda Singh makaih in State Executive Member-te toh kihouna neih in om a, executive member ding kichiantak guan ahih masiah kuaman bangmah bawllou phot ding in thukim uhi. Hiai bang kithukimna om nung a member thak te’n Party Office honna dia programme a bawl uh lamdangsa mahmah ahih dan gen a, Senior member te’n kuamah theihpihna tellou a party office honna ding pen chin-le-ha suang a dal ding uh ahih dan gen in, hiai toh kisai a sih-le-man banah liam-le-bai a om leh State BJP leh Member thak te’n a moh a puak ding uh hi’n gen hi.

 

XXXXXXXXX

 

GAMSUNG THUTHANG

 

Manipur phaizang bial a Inner line permit koihding phutna paitou zel toh kisai in, Joint Committee on Inner line Permit System (JCILPS) in state polam a hong kipan non local te’n Manipur honglut dek hun ua lai poimoh nei hina uh hiam chih etkhiakna a paipih kawmkawm un maban ah kiphinna neihding dan tuamtuam puangkhia uhi. JCILPS in thuthak saite mai a a gendan in, Manipur state polam mite etkhiakna neih ahih kawmkawm in, sit-in-protests, human chains leh kiphinna tuamtuam neihtouh zel hiding chin puang uh a, tua JCILPS thusuak dungzui in July 22 in JCILPS makaihna in Keishampat Machin-Wahengbam Leikai-Tera Keithel ah sit in protest neih hiding a, July 23 in Uripok Machin-Uripok RIMS Road-Nagamapal RIMS Road leh Ishing Chaibi ah neih hi ding hi. July 25 in Nagamapal RIMS Road Machin-Khoyathong-Thangmeiband Lilashing Khongnangkhong- Chingmeirong-Shangakpham ah sit in protest pat hiding a, huaini mah in Keishampat Machin-Heirangoithong ah leng neih ahihding ban ah July 26 in Moirangkhom-Kakwa Keithel ah neih hiding hi. July 27 in ahihleh Singjamei Bridge-Kongba Keithel-Konung Mamang ah mipi kikhop khawmna om ding a, July 28 in Keishampat Machin-Malom ah neih a om nawn in, July 29 in Konung Traffic Island-Hatta Minuthong-Telipati-Lamlong Keithel ah neih hiding hi.

 

July 30 in mipi kikhopkhawmna mah Lamlong Keithel-Khomdidok ah neih hiding a Lamlong Keithel-Top Moirang Kampu ah July 31 in sutzop hiding hi. Joint Committee on Inner Line Permit System (JCILPS) pawlin Manipur ah Inner Line Permit (ILP) System zat ding phutna a kiphinna a neih uh paitou zel in, tunin leng Imphal khopi sung ah buaina om khak ding venna ziak in, thuneitute’n police tamsem IMphal khopi sung ah sawllut in om mahle uh, student tamtak tel in nupi pawl in rally nei thouthou uhi. Inner Line permit ngetna toh kisai paitou zel kal ah Imphal a School tuamtuam akipan student tamtakte’n Chingmeirong a Assembly complex zuan a Protest Rally pai in, CM Bungalow tanpha luh a sawm ziak un, mun tuamtuam ah kinawktuahna piang a, kiphinna neite’n leng lamlian dung ah tyre halkuang in, suang tum leh sing kung tanpha phuk in lamlian lai daltan uhi. Imphal East district a om Soibam Leikai, Nongmeibung Khurai Lamlong leh Khalabung apan Meira paibis pawl in ninih a kizom a Chief Minister O Ibobi lem a halna ding un, tunin O IBobi leh a zi MLA Landhoni lemlak Porompat ah halkuang uh a Lamlong Bazar ah leng kiphinna nei mipite toh Police kal ah kinawk tuahna om in, huai ah Police personel nih in liamna tuahloh uh a, Police in mipi hawldalh na ding in SLR leh Pistol tanpha blank fire bawl uh a, tear gas zang in mipi hawldalh sawm himahle uh kiphinna nei student tamtakte hawldalhna ding a hun bangtan hiam lut hin kigen hi. Zan in leng, Progressive English School, Lamding apan student hunkhop leh Wangjing area apan numei pawlte Wangjing Keithel ah sit-in-protest nei uh a, a nung in MLA Paonam Brojen tenna inn buluh sawm uh a, MLA vengtu security te toh kinawktuahna om nung a kiphinna neite a lohsap khitnung un, Wangjing Keithel road ah tyre halkuang in lampi khaktan uhi. Tamphasana Girls’ Hr. Sec. School a student te’n leng Manipur ah ILPS zatding phutna in rally pai sawm mahle uh school gate ah numei Police te’n dal uh a, huai hun ah kinawk tuahna om hi. Student te’n campus sung apan suang (stone) a deng khum un Imphal West SDPO AG Sharma tal (forehead) a khak ziak in liam hi. Huailou in Johnstone Hr. Sec. School a student te’n TG school manawh in rally pai uh a, Police te’n Nityaipat Chuthek ah student-te nawh kik in a school uah kik sak uhi. Huailou in Khomdrom Ratan tung a Wanted puan a om tungtang zan in High court of Manipur ah gen hi a, huai ah petitioner leh defence counsels te apan hearing neihtuak himahleh Chief Justice Rakesh Rajan Prasad leh Justice S Serto makaih Division bench in Court a state government in counter affidavit pelut a Khomdrom Ratan Wanted a puan tungtang uah lungkim louhthu gen ua, mi khat Wanted a puantheih ding peuhmah Court theihpihna a tel masak ding ahihdan gen in, kua thuneihna zang a state solkal in Ratan Waned a puangthei mawk hiam chi hi. Police in lawyer dia a zat uh advocate general Th Ibohal kiang ah leng, CrPC provision kantan a Police in mimal khat Wanted a puangthei hihiam chin Court in dotna bawl a, Police in mimal khat wanted a a puantheihna uh Manual Book kichi pelut dia court in a theihsak ziak in, Manipur Police te’n Assam Police te zat Manual book Photocopy khat Court ah pelut uh hin kigen hi. Tua thubuai tu leh tu a genveng pah theihlouh ding dinmun a om ziak in, High Court in tuni tan Court adjourned bawl hi. Khomdrom Ratan ahihleh UNLF flag tawi kawm a kichiamna a neihlai internet a khahkhiak a om ziak a Police in UNLF a pang hidan a ngoh a Wanted a a puan uh hi a, Wanted kikoih lakkhiak ding phutna a kiphinna tuamtuam om ziak in Police in a nung in Ratan tung ah case thak 75 bulhkhum in Court ah pelut uhi. Tuabang kal ah, Ratan tung a Wanted puan a om lakkhiak ding deihna a JAC against the Announcement of Wanted tag on Khomdram Ratan, Singjamei makaihna a anngawl a nuakna a neih uh paitou zel in, tunin leng Singjamei Thongkhong ah annngawl a nuakna nei hunkhop om uhi. Ratan tung a Wanted tag kikoih lakkhiak ahihding deih a anngawl a nuakna nei ahihleh Singjamei Khestri Leikai a om Thingujam Bino Devi, Okram Ibemu leh Soram Manishang hi uh a, amau teng thum in zingkal dak 7 apan sunnung dak 6 tan annngawl zel uh hin kigen hi.

xxxxxxxxxxxxxx

Haryana state sung a Rohtak kichihna mun ah Dalit numei kum 20 a upa khat apaisa 2013 kum a pasal 3 in a sualluihsa uh himahleh tua Dalit numei sualluihtu pasal thumte mah in kum 3 nung in tua numei sualluih nawn uh hin kigen hi. Thiltunna mun Tohtak ahihleh Delhi apan Km 60 lel a gamla a om hi a, zan in tua numei kum 20 a upa sihsual a loupa kawm a om muhkhiak ahihnung in, damdawi inn ah thil omdan hoihtak a velchet a om in huai apan sualluih a om ahihdan theihkhiak in om hi. Hiai thu Police a tut ahihnung in Police in naktak a suizui ngal in huai ah pasal 3 mankhia uh a, amaute kipuanna apan in kum 3 paita in tua numei ana sualluih ngei uh a, Bail apan khahkhiak a om nung un, amau leng tua numei hoih a sakna uh bei tuanlou in sualluih nawn uh chi uhi. sualluih a om numei innkuan ten a gendan un a tanu uh sualluihtute ahihleh nam sangzaw apan ngen hi uh a, nidang in gam leitang thu ah thubuai ana neingei uh a, a tanu uh 2013 kum a Bhiwani mun a a sualluihnung un tua numei leh a innkuanten Bhiwani nusia in Rohtak ah teeng mahle uh zongkhe thouthou uh hin gen uhi.

xxxxxxxxxxx

India Nampa chih a om Mahatma Gandhi thattu Rashtriya Swayamsevak Sangh (RSS) hidan a Congress Vice President Rahul Gandhi in ngawhna abawl ziakin Supreme Court ah hekna bawl in om a, Rahul in ngaihdam a nget keileh kisuk mualphouna (defamation trial) maituah ding hi’n Supreme court in zasak hi. Justice Dipak Misra leh Justice R F Nariman telna Supreme Court bench ah zan in hiai thubuai genkhawm hi a, Gandhi sihna tawh kisai Rahul thugente dik maithei a gintak himahleh, thilhoih omsakna dia kampau ahihlouh ziakin Rahul Gandhi in ngaihdam a nget ding ahi chi’n Supreme Court in theisak hi. Mimal khat gamtatna pen, a omna pawlpi hiam, a kizoppih mihonpite ngawh theih hilou hi’n leng SC in Rahul kiangah theihsakna bawl hi. Congress Vice President Rahul Gandhi thugen tawh kisai Congress Party in ngaihdam ngenlou ding ahihdan party thupuangtu Randeep Singh Surjewala in gen a, hunpaisa in Rahul Gandhi kiangah tuabang ngetna tamtak om mahleh, huaite ngaihsak ding in Rahul piching huntawk chi a, politician piching khat ahihbanah khangthu tawh kisai thudik (historical fact) theichian mi hi’n gen hi. Rahul Gandhi in ngaihdam a ngetlouh ding banah, Mahatma Gandhi thahna tawh kisai in RSS kigolhdan chiangtak in Supreme Court ah evidence pethei lai ding hi’n Randeep Singh in gen hi. Thusuak in a taklatdan in Maharashtra state sung Bhiwandi a 2014 Election Rally ah RSS ziaka Mahatma Gandhi thah a om hi’n Rahul Gandhi in gen a, huai tungtang Supreme Court tut ahihnung in, July 27 a genkhawm ding chih himahleh ahunsuan ding Supreme Court in nawlkhin hi. Rahul Gandhi in May 2015 in Supreme Court ah criminal defamation case omte hihbei sawm in panla a, Supreme Court in ngaihdam ngen dinga theihsakna apiakte leng nawlkhin hi’n kigen hi.

xxxxxxxxxxxx