You are here: HomeRSS FeedsLatest News

Angel's Vision News | June 11, 2016

Tuesday, 14 June 2016 19:02

Khovel pumpi a Gua zang a pen bawlkhe masapen Ginkhanpau @ Giapau Vualnam, Proprietor, Zogam Bamboo Works in Gua zang a khovel pumpi a Pen lianpen bawlkhia a, Guiness Word Record a dia application pelut tuni’n BCD Hall, Zenhang Lamka ah Bamboo Pen Display & Measurement Programme zang uhi.

Hiai hun ah theihpihtu in Langkhanpau Guite, Chairman, ADCC leh DC/CCpur sik in Alfred Khaute, AC to DC banah B. Dongzalian Simte, Chairman, Zomi Council, KS Tawmbing, DFP/CCPur, Lianzapau Samte, President, SSPP GHQ leh nam tuamtuam makai banah mun tuamtuam apan deihsaktu mi tamtak paikhawm uhi. Hiai hun zatna ahihleh Upa Vungzapum, Local Chairman, Zenhang Lamka EBCC in Pathian khut ah laankhiak in, V. Chinkhenpau, Adviser in vaidawnna thu gen a, Zogam Bamboo Work neitu Ginkhanpau Vualnam tamchin pulakna a neih banah innsung khosak haksatna ziak a a siamsinna sunzom theilou ahih dan leh gua zang a thil tuamtuam a bawlkhiakte hoihtak a puah ahih theihna dia sponsor poimoh mahmah ahih dan gen hi. Ginkhanpau Vualnam in Zogam Bamboo Works kichi hong piankhiak dan leh, hiai tan a tunna dia pan ana lakpihte mellahna nei a, a neulai a tagah kepna a om ahih dan leh Class X pass mahleh maban sunzom zoulou a hichi om ahih dan gen hi. Aman 2008 kum vel in gua zang in Pen bawlkhia in, a deih a tam mahmah ziak in tu in pe senglou ahih dan gen a, ittu leh deihsaktute tungtawn in Zogam Bamboo Works kichi pankhia in DIC ah leng registration bawlkhit a omta ahih dan a gen banah, nikum June kha in khovelpumpi a Pen saupen, lianpen leh golpen bawl dia kisa in Guiness Book of World Record ngah theihna ding in application pelut in, October kha in dawnna ngah in nasep pan ngal uh ahih dan gen hi. Hiai Pen bawlna ding in a gua ding zonna in kal 1 val vengveng lut a, Tuithapi khua ah va mukhia in gua neitute kiang ah Rs. 250 a ava lei uh hi’n gen hi. Hiai Pen bawlna ding in ni 80 sung vengveng lut a, official lam te’n documentary bawl a mipi muh a lahkhiakna leh tehna (measurement) nei dia thupiak a om ziak a tuni a hiai programme zat a om ahih dan gen hi.

 

Tulel a World Record Holder pen Feet 18 a sau hi a, tua Zogam Bamboo Works in a bawl Pen pen feet 21 a sau ahihman in world record ngah lamet thuai a sakthu gen a, tuni a programme zatna pen leng documentary a dia poimoh ahih ziak in tuansak hiding ahih dan gen hi.DC/CCpur ai-oh a tel Alfred Khaute, MCS in India gamsung pumpi minthangsak thei dia CCpur Dsitrict apan hiai bang thil bawlkhiak a om pen kipahpih mahmah ahih dan gen in, a kul leh poimoh bangkim DC/CCPur kiang a tun ding ahih dan a gen banah chiklaipeuh a panpih dia mansa a om ahih dan gen hi. B. Dongzalian Simte in Gia Pau Vualnam kichi pen Gua Pau a kek hial hoihsa ahih dan a gen banah aman Zomi Council Chairman a let lai a hiai bang thil sai a om a, theihpihtu a pangthei dia a om pen vangphat huai sawnsawn ahih dan gen hi. Lianzapau Samte, President, SSPP GHQ in a thugenna ah, i thil hih theihlou pen suanlam a hih theih leng sawmlou leh hih leng hih sawmlou himhim tamtak a om lai in, Ginkhanpau Vualnam pen huchibang mi hilou ahih dan muh theih a om in, a tupguhnate thupi sa mahmah ahih dan gen a, mahni hihna tan pel a midang zang thei mihing ahih man in mi thupi khat ahi chi hial hi. Langkhanpau Guite, Chairman, ADCC in a thugenna ah, Ginkanpau Vualnam in khosak haksatna thuaklou in lamzangtak a hinkhua ana zangtou hileh hiai tan a tunzoh gintak huailou ahih dan gen in, haksatna a thuak pen amah a dia vualzawlna hizaw ahih dan gen a, maban ah lohchinna hon ngah touh a deihsak thu gen hi. KS Tawmbing, DFO/CCpur in hiai Pen bawlna dia kizang gua pen Sap te’n Dragon Bamboo chi ua, South East Asia ah tam mahmah in, nidang lai in tui-theileh chii bawm dia kizangte ahih dan gen a, mi tamtak in hichibang gua mu in a etliam maimai lai un, Ginkhanpau Vualnam in hichibang thil bawl theihna dia bang mit zang hi hiam chi’n dotna bawl hial a, a kul leh poimoh bang a kithuahpih dia mansa ahih dan gen hi. Zogam Banboo Works in World Record ngahna dia Pen a bawl pen ni 80 sung vengveng a buaipih uh hi a, tuni’n T. Chinzasawm, SO/IFCD leh V. Jamkhanmang, SO/PWD makaih in teh in om a, 7020.80 milemetre a sau, 380 milemetre a lian/gol hi a, ser 18 geih pha hi. Measurement teng lak zoh in zat theih taktak ahih dan latsakna in mi poimoh chial a om teng in dom in white board ah ZBW chih gelh in, official record ding in suai kai uhi.

 

XXXXXXXXX


Covenant Children’s Home Managing Board, Staff leh naupang te’n tuni zingkal dak 7:00 in Covenant Children’s Home Auditorium, Mualkoi ah tukum a Home apan Class X leh Class XII exam a lohchinna ngahte kipahpihna programme zang uhi. Hiai hun ah Managing Board, Staff leh naupangte banah sungkhat lainate kihel ua, Rev. G. Suanzalian, Chairman, Managing Board in vaidawnna thu gen hi. Programme hunsung in Covenant Children’s Home a om naupang te’n special item lahna nei in, Home a om Miss Ngailalven in mipi paikhawmte mai ah a testimony gen hi. Rev. Khen P. Tombing, Director, Covenant Children’s Home in hasotna thu gen in, Covenant Children’s Home kivaipuak dan pulakna nei hi. Aman a gendan in, tulel in Covenant Children’s Home ah chawmna (sponsor) ngah naupang 200 leh Home Based Care tungtawn a etkol naupang 248 omlel ahih dan gen in, tukum apan nu hiam, pa hiam ahihkei nu-le-pa neiloute kiang lak hita ding a, saptuam dangte lak hi nawnlou ding hi’n gen hi. Home in a tuppen ahihleh naupangte a neu uapan goihtak a chiiltouh a, nu hoih, pa hoih, gam leh nam heutu banah dam a dia vualzawlna hi thei ding khop a etkol touh hi a, Home a om naupang te’n leng Pathian in amau apan thutup a neihte muhsuah theihna ding panla ding in naupangte hasuan hi. Thutut kingah dan in, tukum in Covenant Children’s Home apan in 27 in Class X Board exam maituah in First Division in 13 in lohchinna a ngah banuah Second Division in naupang 4 in lohchinna ngah ua, mi 10 in compartment mu uhi. Class XII ah naupang 18 in board exam maituah in Science Stream ah naupang 2 in lohchinna a ngah banah Arts Stream ah 11 in lohchinna ngah ua, Commerce Stream ah naupang 1 in lohchinna ngah in, mi 4 in compartment mu ua, Rev. H. Chin Thiansong, Mamber, Managing Board in lohchinna ngahte ding in thumsakna nei ding hi.


XXXXXXXXX


Songtal Siamsin Award Committee in tuni zinglam dak 10:30 in Mini Auditorium, Dorcas Hall Campus ah Songtal khosuak tukum a Class X leh Class XII a lohchinna ngahte kipahpihna leh lohsamte siatvatna programme zanguhi. Hiai hun zatna ah Songtal khosuak tukum a Class X leh Class XII a lohchinna ngahte banah Songtal khosuak mi hunkhop paikhawm ua, Pastor K. Pumsuanthang in Pathian kiang ah hun lankhia hi. Programme hunsung in G. Pauthansang, Asst. Secy, Songtal Siamsin Award Committee in vaidawnna thu gen in, Khamsuan Ngaihte, Secretary, SSAC in secretary report pia a, Langkhanpau Guite, Chairman, ADCC, C. Hangshing, MCS (Retd), CT Lian Guite, MDC leh K. Paukhansuan, Director, Trinity Centre banah Songtal kho Hausa te’n thugenna hun zang uhi. Tukum in Class X Voard Exam ah Songtal Khosuak mi 26 (1st Division ah mi 13 leh Second Division ah mi 13) in lohchinna ngah in, Class XII Exam ah mi 24 (First Division ah mi 10 leh Second Division ah mi 14) te’n lohchinna ngah ua, programme zatna hun ah Joel Tonsing, Chairman, SSAC makaih in lohchinna ngahte pahtawina hun zat hi a, Rev. H. Chin Thiansong, Co-ordinator (Ministries) PCI (R) in hasotna thu gen in amaute a ding in thumsakna nei ding hi.


XXXXXXXXX


Zou Gospel Artiste Association ZOGAA) in a bawlkhiak “Mangpa Phatna Mama Nuompen hi” kichi Zou Gospel Video Album honna leh latna zingchiang sunnung dak 1:00 in ZPCS Sunday School Hall, ZPCS Lailam Veng ah om ding hi. Hiai hun zatna M. Gouzamang Guite, EM/ADCC in Chief Guest hihna toh uap in hongkhe ding a, Chinlunthang, President, UZO GHQ, B. Dongzalian Simte, President, Simte Tribe Council leh Th. Jamchinthang, Thanlon MDC te’n Chief Host, Guest of Honour leh Function President hihna toh hiai hun zatna ah kihel ding uhi. “Mangpa Phatna Mama Nuompen hi” kichi Gospel Music Video Album ahihleh Zou Gospel Artiste Association in a bawl hi a, hiai album a laa om teng Joseph Doulunlal in a sak hi’n kigen hi.


XXXXXXXXX


Khangthah Zuun Pawl (General Headquarters) in tuni’n Simte Inn, Sim Veng ah tukum a Class X leh Class XII a lohchinna ngahte kipahpihna leh thumsakna programme zang uhi. Hiai hun zatna Armstrong Pame, IAS, Joint Secretary, TA & Hills, Govt. of Manipur in Chief Guest hihna toh uap in Guest of Honour in T. Goukhomang, ZEO/CCPur pang a, Chief Host in Th. Jamchinthang, Thanlon MDC leh Special Guest in T. Lamminlal Simte, MCS pang hi. Programme ahihleh sunnung dak 1:00 in kipan a, H. Doumuanthang Simte, President, KZP GHQ in vaidawnna thu gen in, Rev. Dr. L. Liankhanlal, Executive Secy., SBCA in student paikhawmte a ding in hasotna thu gen in lohchinna ngahte thumsak hi. Programme hunsung in mi poimoh chial a omte apan thugen ngaihkhiakna om in, Simte Literature Society leh KZP Education Foundation te apan thugenna om hi. Chief Guest in a thugenna ah, lohchinna ding in kua dan mah hilou in etmah poimoh a, laisimna ding in hun kibawl siam poimoh mahmah ahih dan gen a, student-te theih dia poimoh mahmah ahihleh i haksat hunlaitak a khemtu hong hat ding a, huai dou zou dia pan i lak poimoh mahmah ahi chi’n gen hi.


XXXXXXXXX


Manipur state solkal in singtangmite sukha thei ding Bill 3 a passed nung a leng singtangmi MLA leh Outer Manipur apan MP thangso Baite in kitheihkhembawl a tuni tan kam khat leng Singtangmite a ding a kampau a neih thu uah lungkimlouhna in Outer Manipur Tribal Forum (OMTF) in Manipur ah President rule koihding naktak in phutna nei uhi. OMTF in zan nitaklam a India President kiang tungding Memorandum a khiakna uah OMTF in Manipur singtangmite sik le taang in MLA 20 a neihte uh leh MP khat a neih un Bill 3 toh kisai a daih dide uh lamdang sakthu gen ua, singtangmite palai dia MLA himahle uh a mohpuakna uh a theihlouh ziak un palai taak nawnlou uh hin leng tua memorandum in taklang hi. OMTF ahihleh singtang gam a pawlpi tuamtuam Hmar Inpui, Mizo People Convention, Thadou Inpi, United Naga Council leh Zomi Council kikhaikhawmna dan a bawlkhiak a om hi a, singtangmite haksatna omte tuni tan genlouh a om nilouh ziak in, singtangmite haksatna hihveng na ding in phualpi solkal a kigolh a President Rule a koih ding ahi chi hi.

 

OMTF in India President kiang tungding Memorandum a khiakna uah a taklat zel dan un, Manipur state solkal in August 31, 2015 a Protection of Manipur Peoples Bill, 2015; the Manipur Land Revenue and Land Reforms (Seventh Amendment) Bill, 2015; leh the Manipur Shops and Establishments (Second Amendment) Bill, 2015 kichi tuni tan paisuak pih teitei sawm a pan a lakna uah President tangtak a kigolh a Manipur state sung a President Rule koih ding leh singtangmite kihumbitna ding a lampi bawlsak ding in ngetna nei a, Manipur Chief minister Okram Ibobi Singh in kumlui December 29, 2015 in member 18 omna Joint Action Committee Against Anti-Tribal Bills (JAC) kiang ah Bill 3 te phaixzang bial helpawl Cor Com te agenda hidan a gen hin leng President zasak uh a, huai ziak mah in Manipur state solkal in Special assembly sam theilou hin leng gen hi. OMTF in memorandum a a taklat zelna uah India gamsung a newspaper minthang mahmah Indian Express in tuka June 2, 2016 a a suahkhiakna uah ILP koihding deihpawlte makai Khomdrom Ratan kichi India solkal in ban a puankhum helpawlte lak a khat United National Liberation Front (UNLF) a ding a pangding in kichiamna nei hin gen a, kichiamna a neih hun ah UNLF secretary Secretary, Nongyai in kichiamsakna nei hin leng Indian Express in taklang chi hi. Hiai thu toh kisai in Manipur Police Department in a manzou leh a omna theithei kiang ah kipahman in Rs 5 lakh piak hiding chin thupuan bawl ua, Singjamei police station, Imphal West ah lewng case chiamteh a om hin OMTF in taklang hi. Hiai thu in Manipur state solkal leh organization khenkhatte phaizang helpawlte thuthu a pai uh ahihdan kilangsak hin gen a, kumlui a Bill 3 kipassed te kia hilou in, Meitei te’n singtangmite hamphatna omte laksak na ding in maban ah bill 3 mah paisuak sawm uh hin leng OMTF in gen ua, tutung a bill 3 te a paisuak leh tunung zrk chiang in Manipur Population Commission, Manipur Land Reforms Commission leh Scheduled Tribe list a Meitei te guanlut a omtheihna ding ua panlak sawm uh hin OMTF in gen hi. Hiai toh kisai in kumlui August 25, 2015 in Manipur state solkal leh JCILPS in Memorandum of Understanding (MOU) bawl in huai ah kilemna a bawlnung uapan kum 1 a chinnung in Manipur Population Commission leh Manipur Land Reforms Commission kichi Dan a suah theihna ding in Assembly ah passed ding in thupuk uhi. Hiai point thumte ahihleh Manipur a nam lianzaw Meitei te’n a hun sawt lut ding a singtang gam awlawl a laksak a sawmna ziak un hin leng OMTF in taklang uhi.


xxxxxxxxxxx


Zan sunnung dak 12:00 vel a Tuitha Lui a kia T. Khamchinkhup (25) s/o Laltuakmawi of Khominthang, New Lamka luang zankhovak a zon ahih nung in tuni sunnung dak 3:00 in a kiatna mun khang zek ah muhkhiak in om hi. Thutut kingah dan in, zan zinglam in T. Khamchinkhup leh a naupa Muankhanlian te’n Ngurte kho kiang a Tuitha Lui a ngakuai khai ding in kuan ua, hun bangtan hiam lui kiang a aom nung in a U-zaw T. Kamchinkhup tangkhial in tui sung ah kelut a, a nau pan hutkhiak sawm in panla mahleh tui a hat luat ziak in lohsam a, a muh zoh nawnlouh tak in a nu-le-pate hilh ding in inn lam ah hong taikik vengveng a, huai apan T. Kamchinkhup tui a kia ahih lam theih khiak in om pan hi.

 

Hiai thu theih phet in mun tuamtuam apan mipi kidelh huan in a theih tawp suah in panla ngal ua, pawl khat in a kiakna mun apan zongsuk in, Saikot Lei, Rengkai Lei banah Saidan Lei tanpha ah tangpang pawl om in Hmar Youth Association (HYA) Saikot Unit, Mualvaiphei Unit leh Rengkai Unit tel in Unit tuamtuam in kithuahpih uh a, YPA New Lamka Block leh YPA GhQ tel in Unit tuamtuam in naktak in panlak pih uhi. Phatuamngai mimal leh pawl tuamtuamte panlaka tungtawn a T. Khamchinkhup luang zan khovak a zon ahih nung in tuni sunnung lam dak 3:00 vel in a kiakna mun apan laam 30 vel a gamla ah muhkhiak in om a, Saikot a om Zarzousang in sikchiang zang in tuisung apan kai khia in Saikot Playground puaktun in om a, Saikot Val Upa, Saikot VA, HYA Saikot Branch tel in Saikot khua a pawl om teng makaih in hun zatna om a, mimal leh pawl tuamtuam in puandum in tuam uhi. T. Khamchinkhup luang ahihleh tuni nitaklam dak 5:00 in a tenna inn Khominthang puaktun in om a, zingchiang in New Lamka Hanmual ah vuiliam hiding hi’n kigen hi.Khamchinkhup te innkuan ahih uhleh Vangaitang apan hong kipan hi ua, Khominthang, New Lamka a om nung un, Khominthang YPA Unit phuhkhiak a om hun ah President masapen in a pianna Pa Laltuakmoi pang hi. Khamchinkhup in ahihleh pianpih sanggam 6 nei a, a mah ahihleh a unau lak ua a lianpen apan simsuk in a 3 na hin leng kigen a, a zi leh ta 2 nusia hi’n kigen hi.


XXXXXXXXX