You are here: HomeRSS FeedsLatest News

Angel's Vision News | May 4, 2016

Wednesday, 04 May 2016 23:00

Tuni sun dak 12:00 in DC/CCPur Lunminthang Haokip, IAS makaih in BRGF Resource Centre, DC Office omplex ah District Consultative Committee (DLRC) Meeting om a, CCPur District sung a Bank Branch chih a manager teng banah Nengkhanpau Hauzel, LDM/CCPur, 16-New Lamka West MDC CT Lian Guite leh Joel Haokip, SDO/Thanlon tel in mi poimoh bangzah hiam hiai meeting ah kihel uh.

Hiai meeting ah DCC/DLRC meeting masa a thupukna lak a omte etkikna om in, CD Ratio toh kisai genkhawmna om a, Bank tuamtuamte sum zatdan etkhawmna om hi. Thutut kingah dan in, tulel in CCPur District sung ah Bank Branch 14 om in, March 2016 Quarter Ended sung in Government in 37,000 lakhs val deposit a bawlna uah bank te’n Rs. 17,000 val mipi lak ah hawmkhia in Credit-Deposit (CD) Ration 46 percent tungzou a, bank chih in quarter ended sung a government deposit-te 40 percent tan bek mipi lak a hawmkhiak ding chih himahleh SBI/Pearsonmun, Axis Bank, HDFC Bank leh ICICI Bank te’n a hawmkhiak ding zah uh hawmkhelou uh hi. CCpur District sung a bank branch om te’n a sep dung bang uh semlou in bank paidan theilou leng mipi hunkhop a om ziak in bank-te mipi’n phatuampih taktaklou uhi. Hiai toh kisai in bank branch chih in kha khat a 2vei bek Financial Literacy Awareness bawl ding in DC/CCPur in theisak hi.

 

XXXXXXXX


Zomi Council Cabinet Meeting thupukna dungzui in tuni sunma dak 11:00 in Election Commission-te makaih in PTC Conference Hall, Hiangtam Lamka ah Zomi Council Cabinet post awng om teng a ding in election om hi. Election ahihleh Zomi Council Office, Khominthang, New Lamka a neih ding chih himahleh kho siat banah kikawmtuahna a nawngkai ziak a PTC Conference Hall a neih a om hi a, Zomi Council nuai a om tribe 9 apan palai 5 chiat paikhawm General Secretary, Finance Secretary, Treasurer, Secretary (Administrative Affairs), Speaker leh Dy. Speaker ding telna nei uhi.

 

Election ahihleh Proposal system a pai in secret ballot a vote khiak chih hi a, himahleh proposed a omte tuh tu ding kuamah omlou in uncontest in ching vek uhi. 2016-18 sung a Zomi Council vaipo ding telching thak a omte ahihleh General Secretary ding in Khamneihthang Vaiphei, Finance Secretary ding in Paukhogen, Treasurer ding in T. Chinlunthang leh Secretary (Administrative Affairs) ding in Dr. R. Sanga banah Speaker ding in Khamminlun @ KG Tungnung leh Dy. Speaker ding in G. Chin Khan Muan hi ua, telching thak a omte Thangzamang, Interim Speaker in kichiamsak in, Rev. Palet Thuomngel, Lamka Area Pastor, CBA in vualzawlna pia in thumsak hi.

 

XXXXXXXX


Zan nitak zanlai dak 12:30 vel in Bongbal khua ah meltheihlouh galvan tawi pawlkhat in lampi bawl a nasem a om Khumanthem Tondonba Singh (23) s/o Kh. Kwaklei of Imphel East pikhia in tuni tan a omna theih hilou a, kuate pikhiak hiam chih tanpha leng theih hinailou hi. Thutut kingah dan in, Tondonba Singh ahihleh Poklen (JCB chi khat) hektu hi a, Lingsiphai a om T. Lala, Special Contractor etkaina nuai a om Takvom khua lut ding PMGSY lampi bawlna a nna sem a om hi ua, Tuingal Lui bul a kingah uh hi’n kigen hi. Zan nitak zanlai dak 12:30 vel in meltheihlouh galvan tawi pasal 7 vel a giahna buk uah va lut ua, Tondonba Singh leh Mohori Pa pimang a mit tuam in a khut uh nungleh hen in pikhia ua, Mohori Pa ahihleh a upat tak deuh ziak in khah khe thak uh hi’n kigen hi. Hiai thu puankhiak ahih tan in kuate khut nung hi hiam chih theih hinailou a, kipuang leng a omlouh banah Contractor Pa kiang ah demand leng bangmah omlou hi’n kigen hi.


XXXXXXXX


Langkhanpau Guite, Chairman, ADC/CCpur makaih in ama office chamber ah Member of District Council te’n meeting poimoh tak nei in, mipi’n tuisiang dawn ding kiningching tak a ngah theihna ding leh huihpi leh vuahpi ziak a haksatna thuak te’n panpihna a ngah theih ding dan utoh kisai genkhawmua, Constituency tuamtuam apan MDC hunkhop paikhawm uhi. Thutut kingah dan in, tuma lam a MDC Team New Delhi a zin te’n Drinking Water & Sanitation a Dy. Adviser kiang ah CCpur District in tuisiang dawn ding kitasam uh ahih dan gen in, Dy. Adviser in DPR bawl theih ngal dia Memorandum pelut dia theihsakna a piak dungzui in tuni a meeting neihna hun ah memorandum piaklut ding dan genkhawm ua, MDC chih in SDO-te toh kithuah a mahni bial chiat a vuahpi leh huihpi ziak a haksatna tuak omte enkai a, panpihna a ngah theihna ding ua District Disaster Management Authority (DDMA) kiang ah report pe ding in gen uhi. Tuaban ah, tulai in CCPur District ah sum leh pai deihna ziak in kinap kithang mahmah a, mi sisan hiam ahihkei leh mi neihsa sum-le-pai a kuamah kimawllou ding in Langkhanpau Guite, Chairman, ADCC in Pathian min in ngetna bawl hi.


XXXXXXXX


CCPur District in khantouhna lam manoh in, kuapeuh in khantouhna ding in kikawmtuahna poimoh masapen ahih dan thei in, mun tuamtuam ah fund tuamtuam zang in lampi bawl in om a, huchi kawmkal ah, Lingsiphai khua apan Songpi khua tan kikawmtuah lampi bawltu in ginatak a abawllouh ziak in Lingsiphai kho mipi’n lungkimlouh thu Press/Media ah tun uhi. Thutut kingah dan in, hiai lampi ahihleh 1997 kum a Songpi/Mission Compound tan kawmtuah dia kibawl in a lampi min ding in leng Zogam Road chi’n minvuah in om hi.

 

April kha bul in lampi bawlna kipan in, nasem te’n suang leh leisan sung in kha 1 val bang paita mahleh tuni tan maban sutzoplouh in om hi. Vuahzuk hun chiang in lampi nawi mahmah in khe a paite a ding in haksa mahmah in gari a leng tai theihna vual hilou a, Road Roller a gawi mam ahihlouh ziak in suang kisungte dawk khe sesouh in phawk mahmah hi’n kho mipi te’n gen uhi. Ama in hiai lampi black topping hikei mahleh suanghum (balu single) hoihtak a sun ahih ziak in nuam mahmah a, kho mipi te’n black topping neita ding chi a kipak tak a aomlai ua hichi bang dinmun a koihsak a om pen khase mahmah ua, black topping lou thouthou ding ahihleh suanghum (balu single) mah sun sak nawn ding in ngetna bawl uhi. Hiai lampi ahihleh bang fund a kibawl hiam chih theih ahihlouh banah kua contract na nuai a nna sem hi hiam chih natan leng kho hausa in a theihlouh banah thuzak a leng omlou uh hi’n khosung mipi te’n gen uhi.

 

XXXXXXXX