You are here: HomeRSS FeedsLatest News

Angel's Vision News | March 31, 2016

Saturday, 02 April 2016 08:11

State Bank of India, CCPur Branch leh Tuibuang Branch in Corporate Social Responsibility (CSR) tungtawn in Lamka Damdawi Inn, Sielmat Christian Hospital & Research Centre leh Centre for Community Initiative (CCI) te a ding wheelchair leh stretcher trolley lei in tuni zinglam dak 9:30 in Medical Supdt. Conference Hall ah latna nei piakkhiakna nei uhi. Hiai hun zatna DC/CCpur Lunminthang Haokip, IAS in Chief Guest hihna toh uap a, The Malsawm Initiative a kai naupangte banah mi poimoh hunkhop hiai hun zatna ah kihel uhi.

Hiai hun ah Pauneihthang Valte, Chief Manager in vaidawnna thu gen in, wheelchair leh stretcher te piakkhiakna ziak pulakna nei a, aman a gendan in, khopi khat a sum sin a om corporate hiam ahihkei company te’n a sum dawnna uap pan sum met (profit) a muhte uh percent bangzah hiam khotang a dia thil phatuam sepsuahna dia zat ding chih ahih dungzui a hiai bang nna sem uh ahih dan gen hi. Lamka Damdawi Inn, Sielmat Christian Hospital leh Centre for Community Initiative-te a dia SBI in wheelchair leh stretcher trolley-te Pastor MT Khanlal, Local Pastor, Zenhang Lamka EBCC in Pathian kiang ah latna nei in, DC/CCPur apan thugen ngaihkhiakna om hi. DC/CCpur in SBI in mipite khualna a hiai bang a pan a lakna uh kipahpih mahmah ahih dan gen in, Wheelchiar leh stretcher kichi a zangkhate a vangpha hingeilou uh ahih dungzui a kuapeuh in a zangtu hilou a, a pekhetu hih sawm a panlak chiat ding ahi chi’n gen hi. Thutut kingah dan in, SBI in District Hospital, Sielmat Christian Hospital leh Centre for Community Initiative te a ding Wheelchair 5 leh Stretcher Trolley 5 chiat pai a, DC/CCPur in piakkhiatna nei hi.

 

XXXXXXXX


United Zou Organization (UZO) General Headquarters in tuni’n Zogal Memorial Hall Complex, Zoveng ah UZO kiphutkhiak nung kum 60 chinna Diamond Jubilee lopna leh 60th Annual Assembly nei ua, sunnung lam in Business Session nei in, 2016-17 Budget tel in thu tuamtuam genkhawmna nei uhi. Hiai hun ah UZO GHQ nuai a om Block leh Unit tuamtuam apan palai tamtak paikhawm hunkhop paikhawm ua, Rev. Thangginmuanlian, Executive Director, ZCBC in thumna in hun honna nei in, Rev. Hangpi Manlun in Jubilee Message gen hi. Program hunsung in Speaker a pang Gouzalal Tungnung, Vice President, UZO GHQ makaih in gam leh leitang a dia hinna ana pia salpha mi 9-te banah 2015-16 sung a member ana mualliamsate suunna hun zat in om a, Chinlunthang, President, UZO GHQ in Presidential Address genna nei hi. Business Session hun ah Palai paikhawm te’n Annual Audit Report etkhawmna nei in, 2016-17 sung a dia Budget kibawl pomkipna nei ua, Zogal Day zat ding dan toh kisai genkhawmna nei in UZO Policy Program toh kisai report ngaihkhiakna om hi. Thutut kingah dan in, Palai paikhawm te’n 2016-17 sung a dia budget Rs. 7,90,000 puaklut a om pomkipna nei ua, Constitution Amendment bawl ding thu leh Zou Custom proposed revision amendment toh kisai genkhawmna nei uhi. Thutut kingah dan in, UZO GHQ Diamond Jubilee ahihleh nikum a zat ding chih himahleh buaina ziak a ahun suan gamlat a om in tuni a zat a om hi’n kigen a, Chinlunthangm President, UZO GHQ in UZO puanlap kaipalh in Diamond Jubilee suang hongkhia a, Rev. Tualzachin, Sr. Executive Secretary, ZPCS in Pathian kiang ah latna nei hi.


XXXXXXXX


Nehru Yuva Kendra, CCPur in tuni sunma dak 11:00 in BRGF Resource Centre, DC Office Complex ah Block Level Youth Club Award 2015-16 hawmkhiakna nei uhi. Hiai hun ah DC/CCPur Lunminthang Haokip, IAS tel in Selection Committee te’n a uap ban uah Block tuamtuam apan youth club makai hunkhop paikhawm uhi. Program zatna Lalthanzam, BO (HQ), DC Office in makaih a, H. Doungel, Youth Co-ordinator, NYK/CCPur in vaidawnna thu gen in, aman Block Level Youth Club Award pen Block tuamtuam a om tuailaite suk thathohna ding tupna a Ministry of Youth Affairs & Sports, Govt. of India in tukum a apatkhiak thak hi’n gen hi. Program hunsung in Selection Committee a tel Kham Guite, Chief Functionary, RUDRA in selection neih dan toh kisai pulakna nei in, tutung a kipahman late’n lungtun huai tak a nna sem i hih leh hihlouh kiet thak poimoh mahmah ahihdan gen in, maban ah tua sang a nak zaw sem a panla thak ding in youth club makai paikhawmte hasuan hi. DC/CCPur in hinkhua bawlhoihna ding in tuailai hun pen poimoh mahmah in Pathian deih dan a kibulphut te’n a gah sawtpi nei uh ahih dan gen hi.

 

India milip tamzawte tuailaite ahihman in, Government in tuailaite tungtawn a nna tamtak sepkhiak sawm a panla in Ministry of Youth Affairs & Sports tungtawn in program tuamtuam pankhia a, hiai pen hoihtak a i nungthuap leh CCPur District a tulai a kithang mahmah “Shoot Culture” pen bei zou ding ahih dan gen hi. Thutut kingah dan in, Block Level Award a ding in Block 10 apan application 40 val lut a, apaisa March 26, 2016 in DC/CCPur makaih Selection Committee te’n screening nei in, tuni a award hawmkhiak a om hi’n thutut kingah hi. Block Level Youth Club Award sangte ahihleh Sangaikot Block ah Hita Hengjol Youth Club in khatna la in Sangaikot Youth Club in 2na la a, Singngat Block ah S. Phaiza YC in 1na la in Singngat Thadou Veng YC in 2na la hi. Thanlon Block ah Alpha Multipurpose CS Ltd. In khatna la in, Tallian YC in 2na la a, Saikot Block ah Saikot YC in 1na la in Lenruol Duilo Val FC in 2na la hi. Samulamlan Block ah Khoirentak YC in 1na la in, Kulbung YC in 2na la a, Henglep Block ah Henglep HQRTS YC in 1na la in, Kukimun YC in 2na la hi. Tuibuang Block ah M. Songgel YC in 1na la in, Kholunphai YC in 2na la a, Lamka Block ah New Lamka Youth Club in 1na la in Neihsialveng YV in 2na la hi. Tipaimukh Block ah application omsun Parbung YC in kipahman sang in Vangal Block ah application pelut kuamah omlou a, DC/CCPur in Award-te piakkhiakna nei hi.


XXXXXXXX


Zan nitak dak 6:00 in Tuibuang Zion Veng a om GOFICO Cottage a Gulpi lian mahmah khat mat in om hi. Thutut kingah dan in, hiai gulpi pen zan sun dak 12:00 in GOFICO Cottage ah lut in, inn neite’n a mat sawm in kisa mahle uh man zoulou ua, 5 vei mawngmawng a beih nung un nitak dak 6:00 in that zou pan uh hi’n kigen hi. Hiai toh kisai inn neite gendan in, sun dak 12:00 vel in bang vang apan hiai gul lut in kil khat a om a, huai hunlai in damlou lupna ngak a om inntekpa kia hiai inn ah om a, aman a theih phet in mun tuamtuam a om a sungkhatte samkhawm in gul pen mat sawm in panla uhi. Hiai toh kisai a thil mak mahmah khat ahihleh hiai gul pen a matsawm chiang un mang zel in, gul omna dia a gintakna munte uah tuisa tanpha buak mahle uh muh khiak zohlouh in mang zel a, a nung sawtlou a hong kilang nawn zel hi’n inn neite’n gen uhi. Inn nei te’n hun sawttak a ngak nung un a gul pen hong kilang nawn in, nitak dak 6:00 vel in sikchiang zang in dawtlum thei pan uh hi’n kigen hi. Hiai gul ahihleh feet 7 a sau in inch 8 vel in lian a, tum 3 a suah nung ua leng tuk sawm a kisa lai hi’n inn nei te’n gen ua, khopi sung a gul kimante lak ah a lian pen hilai ding in tamtak in gintak thu gen uhi.


XXXXXXXX


District Hospital Management Committee in OPD timing leh Damloute veh theih hun ding bikhiah bawl thak a, timing bawlthak a omte April 1, 2016 apan zat pat hiding in taklang hi. Thusuak dungzui in April apan September sung OPD timing zinglam dak 9:00 apan sunnung dak 1:00 tan hiding a, October apan March khasung a OPD timing pen zinglam dak 10:00 apan sunnung dak 2:00 tan hiding in taklang hi. Damlou veh theih hun ahihleh zingkal dak 6:00 apan dak 9:00 sung leh nitaklam dak 4:00 apan nitak dak 8:00 tan hiding in taklang a, timing bikhiah thak a omte kuapeuh in zui chiat ding in District Hospital Management in ngetna bawl hi.


XXXXXXXX

 

ZRA Drug Cell in khamtheih doudalna sunzomtou zel in tuni in leng khopi sung mun tuamtuam dapkualna a neihna uah mi 3 apan khamtheih tamtak makhia in sunnung dak 4:30 in Lamka pansan Press/Media-te mai ah haltum vek uhi. Thutut kingah dan in, ZRA Drug Cell in report a muh dungzui in tuni sunma dak 11:00 apan New Bazar leh Old Bazar lak dapkualna nei ua, huai ah New Bazar a om Kamzahau (25) s/o Thangkhansiam, Zellang Veng a om Miss Niangngaihmawi (23) d/o Khamsuanmung leh Nghathal a om Ginlalzem (32) s/o Thangkholal apan Spasmo Proxyvon tang 100, No. 4 packet 600, Ganzas Kg kimkhat leh WY (Sakol Damdawi) tang 50 mankhia ua, matkhiak a om teng a sum a tuat in Rs. 90,000 val man hiding in kigen hi. ZRA Drug Cell in khamtheih doudalna sunzom tou zel ahihman in, khamtheih zuak a kipei kuapeuh ana tawpsan ding in theihsakna bawl in, khotang hoihna ding in kuapeuh in kithuahpihna pe ding in ngetna bawl uhi.


XXXXXXXX


Zomi Youth Association, General Headquarters in date 28/3/2016- 30/3/2016 sungteng Zodawn lam a ZYA Block te vehna leh Block term beita te Election neih pih uh hi. Date 28/3/2016 in Lamka nusia in ZYA Leijangphai Block, Leijangphai ah Election neihpih in 2016-2019 sungteng a Block vaipaw ding hih anuai abangin Block a kikhaikhawm Unit lamkai/palai paikhomte'n telching uhi.

 


Pre. Letminlun of Leijangphai.
Secy. P. Huatzathang of Pamjal.
Fin. Nangminlun of Leijangphai leh
Trea. Tunkholian of Sainoujang.


Pu. Lianzalal President, ZYA GHQs in telchingthak a om lamkai te kichiamsakna( Oath-taking) a neihsak khit in Pastor Tuanthang, NTBC Leijangphan in Pasian kiang ah thungetsakna nei hi. Tua khit in ZYA Thanlon Block O/B tetawh Thanlon ah houlimna nei uh in block te haksatna leh maban kalsuantouh dingdan kikup khomna hun zak ahih khit in Pu Liantungnung. Chief of Bukpi tenna inn ah ZYA Bukpi block O/B tetawh houlim na nei uh in Joutung ah zangiak uh hi.
29/3/2016 ni in ZYA Sinzawl Bl

 

ock lamkai tetawh Manipur Tribal Movement Road Construction Committee te vaisaina nuai a Guite road Sinzawl leh Tuivai kikal lampi bawlna pailel a nasemte kiang vapha in amun mahmah a nasepna va en uh hi. Zosuan state Mizogam tawh kikawm tuahna lampi omsun Guite road, Civil society in a bawl ta'k mai ZYA in vangsiat huai leh poi sa ahidan taklang kom in lampi bawl a omte nasep pahtakhuai asak thu taklang in lampi bawlte ading in Chini, Bawngnoi leh Singpite tamlou amaukhut ah pia uh hi. Tuakhit in ZYA Sinzawl Block lamkaite tawh meeting nei in maban panlak dingdan tuamtuam kikupkhawmna leh Blockte haksatnate genkhomna nei uh hi. ZYA Raja Goukhothang Block Office, Songtal ah Block Election nei pih in, block lamkai ding Unit leh block apan palai paikhom ten hih anuai abang in telching uhhi.


Pre. T. Pauchinsiam of Mualnuam
Secy. T.Pauzamoi of Mualnuam
Fin. Secy. Pauthanmung of Songtal leh
Trea. G. Kamkhansuan of Thuangtam.


Amaute kichiamsakna ZYA GHQs President in aneihsak khit in Pastor S. Thangzamang, EBCC, Songtal in Pasian kiang ah thumsakna nei hi. Election neih zawh ahih in lamkai lui te leh athak te in charge kipiakkhiatna ZYA GHQs President Pu Lianzalal in neisak ngal hi.
Date 30/3/2016 in ZYA Tuivel block office, Tuiveljang ah ZYA Tuivel Block 2016-19 sung vaipaw ding telna nei in, Block leh Unit palai paikhom te'n anuai a te lungkituak tak in telching uh hi.


Pre. Haudoulian Ngaihte of Maukot.
Secy. Lamkhansiam of C. Tuiveljang.
Secy. Fin. Munglianthang of Mongken leh
Trea. Thanglianlal of Maukot.

 

Amaute ZYA, GHQs President in Oath-taking a neihsak khit in Pastor G. Kamchinthang PCI (R), C.Tuiveljang in Pasian kiang ah thumna a laan in thumna neihsak hi.


Block chih a telching thak a om heutu te in amau lemtan hun masa pen ah Sam in in charge kipiak khiatna leh cabinet expansion nei in OB list GHQs ah written in theisak ding uh hi. Tualeh ZYA Tuivai Block election zong neihding chih himaleh Block centre hausapu M. Khamkhohau chief of Tonjang village in damlouhna vai a ahong beisan thut man in hunlemtang masapen a election saifel touh hiding hi.

 

XXXXXXXX