You are here: HomeRSS FeedsLatest News

Angels Vision News | December 20, 2016

Wednesday, 21 December 2016 13:33

THUTHANG LAKTOMTE

@@ CCpur District VDF Welfare Association te'n SP/CCpur tungtawn in galna sum pia

@@ Phualpi solkal in Manipur ah President Rule koihsawm..... MUTSU in Manipur University nuse ding in theisak

@@ Turkey capital Ankara ah Russian ambassador thau a kaplup in om

 

 

TUALSUNG THUTHANG

 

Churachandpur District VDF Welfare Association in tuni nitaklam dak 5:00 in SP Office Tuibuang ah a member pih uh sihna tuak Seiminthang Haokip h/o Niengneikim of L. Phailien, Henglep Sub-Division galna nei uhi. Hiai hun ah member-te banah SP/CCPur Rakesh Balwal, IPS leng kihel in, SP/CCpur in thugenna hun saulou zang in, Seiminthang Haokip zi Mrs. niengneikim khut ah galna sum Cheque in pekhia a, sum lakkhiakna lam haksatna a tuah leh a  kinlam a theisak thak ding in gen hi. CCpur District VDF Welfare Association member sihna tuak Seiminthang Haokip ahihleh apaisa November 17, 2016 a Sinna ziak a Lamka Damdawi Inn a si hi a, aman zi leh a ta pasal khat nei hi. Churachanpdur District VDF Welfare Association ahihleh 2012 a kiphut khia  hi a, tulel in member 600 vel om in, VDF personnel te'n Association kiphut khiak apan thupukna alak uh dungzui in, member sihna tuak te galna ding  in kha loh apan kha teng in 200 cut in, sihna tuak sung kuante kiang ah galna sum pe zel ua, tuni tan in CCpur District VDF Welfare Association member 2 kiang ah galna sum peta uh hi'n Laltingen Vaiphei, President, CCpur VDF Welfare Association in gen hi.

 

 

Manipur Nursing Council (MNC) in ANM Final Year leh First Year result a puankhiakna ah Female Health Worker Training School, CCPur in hih hoih mahmah in Final Year ah Topper hihna a lak banuah First year ah 6th leh 8th Position hihna la uhi. Thutut kingah dan in, Manipur Nursing Council saina in Manipur pumpi a nursing institute tuamtuam a kai ANM First Year leh Final Year te'n apaisa October 2016 in exam pan in, December 14, 2016 in result puankhiak hi a, huai ah FHW Training School, CCPur a kai Miss Nemsanglun d/o (L) Thongbiakmang of Tawna Road, Elim Veng, New Lamka in Mark 501 mu in All Manipur ah Topper hihna la a, First Year simlel Miss Anjali Neilam Vaiphei of D. Phailian in Mark 584 mu in All Manipur ah 6th Position in pang a, Miss Lynda Nianghauching of Beulahlane in marj 564 mu in All Manipur ah 8th Position in pang hi.

 

District Health Society, CCPur saina in tuni sunma dak 11:00 in CMO Conference Hall ah National Health Mission nuai a om Reproductive Maternal Health leh Adolesence toh kisai RMNCH +A Review Meeting om hi. Hiai meeting ah Imphal Arun Kumar Meitram, Nodal Officer, UNICEF Co-ordinator in a uap banah Dr. Kimngaihching, CMO/CCPur, Dr. J. Son Goukham, Medical Supdt., Dr. VC Pau Tonsing, DFWO/DIO CCpur leh RBSK leh PMSMA a Nodal Officer-te banah CHC/PHC a Medical Officer Incharge teng leh Block Programme Management Unit teng kihel uhi. Hiai hun ah Dr. Kimngaihching, CMO/CCPur in vaidawnna thu gen in, DFWO leh Medical Supdt., District Hospital banah UNICEF Co-ordinator te'n thugenna hun saulou nei ua, Henglep Block, Tipaimukh Block, Samulamlan Block, Singngat Block leh Thanlon Block a Block Programme Manager te'n April 1, 2016 apan November 30, 2016 sung a RMNCH + A toh kisai a sepsuah tuamtuam a neihte uh pulak in, RMNCH +A tungtawn a sepsuah ding tuamtuam omte genkhawm uhi.

 

Siamsinpawlpi JHQ Lamka in tunung sawtlou in Class X exam dingte khualna in Siamsin Free Coaching kichi sai sawm in, Fund Drive na dan in zingchiang in "Marathon for a cause" chih thupi zang in Mini Marathon sai sawm uhi. Hiai ding toh kisai a thusuah kimu dan in, Mini Marathon a tel ding khempeuh zingkal dak 5:30 in SSPP JHQ Lamka Office, SSPP Tower, Hiangtam Lamka tunkim ngai ding a, registration bangkim zohfel ahih nung in Mini Marathon a tel ding khempeuhte Pastor D. Kamchinmang, Local Pastor, EBCC/Hiangtam Lamka in thumsakna nei in, Ricky Vanlallawm Guite, Chairman, Standing Committee, SSPP GHQ in Flag-Off ding hi. Kum thak 2017 a SSPP Member Class X exam di ngte awlmohna toh siamsin khangthakte khualna a mipi a tam theilam hiai hun ah tel ding in SSPP JHQ Lamka in chialna bawl hi.

 

Paite namte a ding Pathian thu leh Siamsinna kipat masakna mun Phaitong [Thanlon Division] khua in apaisa December 18 - 19, 2016 in Centenary Biakin thak lopna Program thupitak in zang ua, hiai hun ah Centenary Biakin honna leh Latna Rev. S Vung Minthang, General Secretary EBC in nei hi. Program hunsung in Rev. S Vung Minthang, GS/EBC, Rev. L. Khaikhansong, Divisional Supdt. Thanlon Div. leh Upa G Thangchinlian, Phaitong hausapu in thugenna hun a zat ban uah EBC Central Choir, EBCCPhaitong Lapawl leh mimal lasa siam tuamtuam te'n Pathian phatna la sa in Biakna program nuamtak in zang uhi. EBCC Phaitong in  Centenary Biakin lopna in a nimasa in Sialtal liantak khat gou ua, a ninih ni in Bawng khat leh Vok nih gou in mipi annkuang luina nei uhi. Hiai Centenary Biakin ahihleh Pucca Building a kibawl, a tuang a Tile kiphah ahih ban ah Singtang dawn a Biakin omte lak ah vou tuam mahmah ahihdan thutut kingah hi.

 

Bijang a om SBI-RSETI in kum nawn 2017 January khasung in tuailai kum 18 apan kum 45 kikal mite a ding in course tuamtuam ah Free Short Term Training neih sawm ua, lunglutna nei te'n ngaihven theih ding hi. Thusuak in a taklat dan in, January 2017 sung a Course tuamtuam training piak dingte ahihleh Dress Designing for Women, Piggery, Rural Entrepreneurship Development Programme (REDP) leh Mushroom Cultivation hi a, Dress Designing ahihleh January 5, 2017 a course pat ahih ding banah hiai a dia seat omzah ahihleh 25 hi'n kigen hi. January 12, 2017 in vok vulh lunglutte a ding in ni 6 sung daih ding training pat hiding a, January 23, 2017 apan in Rural Entrepreneurship Development Programme toh kisai training pat ahih nawn ding banah January 31, 2017 apan in ni 6 sung daih ding Mushroom Cultivation a lunglutna neite a ding in training pat hiding hi'n thutut kingah hi. Hiai toh kisai lunglutna nei te'n SBI-RSETI Temporary Office, Bijang ah office kai hunsung in ngaihven theih ding a, form leh thil bangkim huai mun mah ah ngah theih ding hi.

 

60-Singngat (AT) Assembly Constituency a Intending Candidate Chinlunthang in hongtung ding December 22, 2016 sunma dak 11:00 in Ex-Minister (L) Pu Thangkhanlal Inn, Zoveng, Zenhang Lamka ah Candidate ding ahih dan puankhiatna nei ding hi. Hiai hun ah ngainatu leh deihsaktu mipi kuapeuh hiai hun zatna a kihel ding in Intending Candidate Chinlunthang in chialna bawl hi.

 

Go Grace Mission, Churachandpur saina in Synod Hall, IB Road ah "Return to your Rest" chih thupi zang in ni 2 sung daih ding Winter Retreat tuni'n kipan hi. Hiai hun ah Go Grace Mission member-te banah mun tuamtuam mipi hunkhop in uap ua, hun zatnate Session 4 a kikhen in tuni'n Session 2 zou uhi. Winter Retreat ahihleh zinglam dak 10:30 in kipan a, Upa Ricky Vanlallawm Guite in hongkhia in, James Lalpu Hatzaw, Worship Leader makaih in Praise & Worship hun zat hi a, Session teng ah N. Thangkhansiam in thugenna hun zang in, tuni a hun zatna masa ah "Return to your Cross" chih thupi zang in thugenna hun a zat banah Hun Nihna ah "Return to your Worship" chih thupi zang in thugenna hun zang nawn hi. Zingchiang zinglam dak 10:30 mah in hun zat hi nawn ding a, huai ah "Return to your Pain" chih thupi zang in Speaker a pang N. Thangkhansiam in thugenna hun zang in, session Nihna ah "Return to your Hope" chih thupi zang in thugenna hun zang nawn in, Lainat Ministry te'n Presentation nei in, Upa Dr. T. Nengkhanmang in Winter Retreat neihna khak ding hi. Go Grace Mission te saina mah in December 22, 2016 nitak dak 5:00 apan in St. Paul's Institute Campus ah Lamka Worship Night minvuah in Praise & Worship hun zatna om ding a, huai hun ah Lalmuan Guite leh N. Thangkhansiam te'n thugenna hun zang in, Rody Za Lien Sing leh Ningmuanching te'n leng uap in Pathian phatna la vas a ding ua, Worship Team-te makaih in mipi paikhawm te'n lasak khawmna nei ding uhi.

 

 

 

GAMSUNG THUTHANG

 

Narendra modi makaih NDA solkal in tulel a Manipur state sung buaina toh kisai awlmohna liantak nei kawm in, tua buaina toh kisai bang chileh hihveng a om theiding hiam chih PM Narendra Modi makaih in genkhawmna nei uh a, huai ah President Rule koih hileh tua buaina hihveng baihlam pen ding ahihdan mukhia uh chihthu om hi. Muanhuai taka pan thusuak kimu in a taklat dan in, Seppatni zingkal in PM Narendra Modi makaih in Cabinet meeting poimoh tak om a, huai hun ah tulel a Manipur buaina toh kisai genkhawm in, buaina sukveng ding dan tuamtuam kikum khawm uh a, President Rule koih ding tanpha a thupukna bawl uh hin kigen hi. United Naga council in ahihleh tuma in leng Manipur ah President rule koihding in ngetna ana neikhinta uh a, Phualpi solkal in Manipur a President rule koih a sawm tungtang ah tulel a Manipur state vaihawmtu O Ibobi singh nuai a Minister khat in Imphal Free press a theihsakna ah Manipur buaina hihveng na dinga Phualpi solkal in President Rule koih louh ngal a lampi omlou ahihdan state solkal zasak hin gen hi. Tuabang a Manipur state sung buaina toh kisai in, BJP MLA Khumukcham Joykishan in phualpi solkal kiang ah thil omdan tun ding leh bangchi bang a hihveng theih ding hiam chih kikup pih ding in Imphal nusia in delhi zuan ding chihthu om hi. Huailou in, Manipur University a kai singtangmite kipawl khawmna Manipur University Tribal student union (MUTSU) in zan nitak a thusuah a bawlna uah, December 28 in Manipur university Student Union (MUSU) election om ding chih himahleh, tulai state sung buaina banah All Manipur student Union, Manipur Students federation, Kangleipak student association leh SUK banah SC student Union in Manipur University a buaina a bawlsawm ziak un, kumnawn January 7 leh 9 kawmtuah lakvel a neih hiding chin a hun suan uhi. MUTSU thusuak in a genzelna ah Manipur University a kai singtangmi student peuhmah in banghiam a tuah louhna ding un, room sung a kikhum a, innluah a omte leng innluahna mun a om ding ua theihsak hi ua, buaina pumpelhna ding in tuni leh zingchiang tan a Manipur University campus nuse chiat ding in leng theihsakna bawl uh a, MU a kai singtangmi student teng in Manipur University student Union Election om hunding bildoh tak a en ding in leng theisak uhi.

 

Manipur state sung a Economic blockade khauhtak om nung a, Counter Economic blockade bawl a kithukkikna paitou zel ah phaizang mite'n Imphal khopi nawl mun tuamtuam ah Economic blockade doudalna nei in, check point hunkhop dinsuah uh hin kigen hi. Counter Economic blockade gumpawl te'n checkpoint a dinsuahna munte uh ahihleh Sekmai Nongthonband, Saijang area, Imphal East district , Uripok leh sagolband area hi uh a, huai munte ah gari taikha phot in van pua uh hiam chih etkhiakna nei in, van puak a omte suahkhiak sak in haltum uhi.  Huailou in, Pathianni sunning a Imphal east district sung a om khurai mun a Ukhrul zuan gari tamtak halsiat a omna toh kisai in, Naga sung a student pawlpi lianpen Naga students federation (NSF) in thusuah a bawlna uah, Manipur state solkal in Manipur state sung a Naga mipite bitna ding ngaihtuah a venbitna a piak mateng uh Manipur lutding gari himhim taisak hilou ding chin thusuah bawl uhi. NSF assistant general secretary Kesosul Christopher Ltu in a gendan in, Manipur lutding gari himhim in Nagaland a tot ding uh phalsak hilou ding ua, himahleh student khenkhat innlam a Christmas zangdia paite bel khahkol hiding chin NSF thusuak in gen hi. NSF in hiai thupukna a lakna ziak uh ahihleh, Pathianni a Ukhrul zuan gari tamtak kizuilai gari halsiat kia hilou a, passenger te van puak teng leng haltum sak a om ziak ua, thupukna a lak uh hi a, NSF in Manipur Baptist convention church suksiat a om a, Pathianni a kikhawm dia kuante leng hawlkik a om thu uah ngaikhawk mahmah uh hin gen ua, thiltung deihhuailou om ngeingei leh NSF daai maimai lou ding hidan a gen in, Manipur state solkal in a moh teng a khuk vek ngaiding hin gen hi.

 

UNC in Manipur state sung lutding lamlian poimoh nih a Economic blockade a bawl ni 49 a chin taak banah, thiltung deihhuai lou khenkhat om ziak a, Manipur state sung a namkal buaina tanpha piangthei dia a kilat ziak in, tua buaina bangchi leh hihveng theih a om ding hiam chih kikum ding in Civil Society Organisation tamtak in zingchiang December 21, 2016 sunma dak 11 in Khwairamband Keithel ah meeting poimoh tak neiding uhi. Meeting neihna ding toh kisai in, seppatni in Civil society Organisation tuamtuam 15 in meeting nei uh a, huai ah Manipur state sung a Nam teng kituak tak a tenkhawm theihna ding in,  'Goodwill Mission for Peaceful Co-existence' chih min phuak uh hin kigen hi. Hiai Goodwill mission in a tup ahihleh tulel a Manipur buaina hihvengna ding a thulai gen a panding ban ah Manipur state sung a nam tuamtuam tengkhawm te kal a kithutuahna leh lemna om theihna ding a panlak ding chih hin kigen a, tua Goodwill mission a Convenor ding in CIRCA's principal functionary Ningthouja Lancha guan in om hi. Goodwill mission phuhkhiak ahihhun a meeting a paikhawmte ahihleh  Tangkhul People's Organisation, Naga People's Union, Zeliangrong Union, Ten Union Social Upliftment Khurai, HERICOUN, LIPUN, Khwairamband Keithel women vendors, Komrem Union, ICHAM, CIRCA, Manipur Muslim Welfare Organisation, Malem Kanba Lup, Nagaram Women Society, KIMACS leh Manipur Muslim Online Forum hi ua,  Nagaram community hall a meeting a neihkhit nung un, thuthak saite kimuhpihna nei in, huai ah Pathianni a Khurai a thiltung toh kisai pulakna nei uhi. Hiai hun a  Ningthouja lancha in a gendan in, buaina om hun in CIRCA leh ICHAM in mipi thangpai tamtak Khurai Lamlong Keithel a omte khouhdaih sawm mahle uh, Escort gari khat chauh in zui hin gen a, mipi kiphinna neite tua escort gari a tuangte'n mock bomb leh tear gas a kapkhum ziak ua, mipi thangpaihna tokthou hizaw ahihdan gen in, bangziak a Ukhrul zuanding gari te a paima ua, Deputy Speaker Preshow Shimray, MLA Victor Keishing, DIG IK Muivah leh Imphal West Additional SP S Ibomcha om hinapi mipi huaizah escort ding a security tawmchik zuihsak a om uh hiam chin dotna bawl hi. Tunin leng tua goodwill mission te nasep masakna hiding in, Lamlong leh Yaingangpokpi kikal ah Goodwill mission team te'n meira Paibi te leh Local club tuamtuam kihoulim pihna nei uh a, Goodwill Mission in Pathianni a thiltung mohpaihthu puangkawm in, zingchiang December 21 a meeting om nawn hun ah state sung a nam tuamtuam tengteng apan representative kihel vek ding in chialna bawl uhi. 

 

 

 

GAMDANG THUTHANG

 

Turkey gamsung a khopi poimoh mahmah Ankara ah tulel a Turkey gamsung a Russia solkal  in ambassador dia a sawl uh Andrey Karlov thau a kaplup in om hi. Russian ambassador Andrey Karlov ahihleh kaplup a om hun in, photo exhibition neilai hi a, a nung lam apan kaplup in om hi. Turkey solkal thusuak in a gendan in, Russian ambassador Andrey Karlov ahihleh Ankara khopi sung a Photo Exhibition neihna mun a thugen a omlai a nunglam apan thau a kaplup a om hi a, Police in kintak in thaukhahtupa leng kaplum ngal uh chi hi. Foreign Ministry spokeswoman Maria Zakharova in thiltung toh kisai a genna ah, Russian ambassador Andrey Karlov kaplumtu ahihleh Ankara khopi sung a Turkey Police a sem hi a, naichik apan kap a om ziak in a mun ah sin gal hin gen hi. Local broadcaster NTV television in thiltung toh kisai in, Police in thaukhahtu pasal pen kaplum mahle uh midang 3 in liamna tuak uh hin gen a, Turkey leh Russia in kizopna bawlhoih thak a sawm uh sukmit sawmna ziak a kihih hiding a gintak in om hi. Thaukhahtu pasal in thau a khah khitnung a  Aleppo khopi leh Syria mangngilh kei un chih a genlai Associate Press photographer in ana lak khak ziak in, kuate pawl khutnung hihiam chih theihzui hinailou hi. Hiai thiltung ahihleh Syria buaina toh kisai a Russia, Turkey leh Iran in Moscow khopi a meeting neih a sawm ma ni ua thiltung hin kigen hi. Kaplup a om Russian ambassador Andrey Karlov ahihleh Russia gamsung a ding in 1976 kum in Diplomatic service zom a, 2001 apan 2006 kikal in North Korea ah Russian ambassador hihna len in, 2013 apan Turkey gamsung a Russian ambassador hihna letsak a om hin kigen hi.

 

Kum 56 paisa a kilemna bawl a omsa Indus Waters Treaty bawlthak hiam ahihkeileh kheklamdang ahihleh pomtheih hilou ding hi'n Pakistan in taklang hi. Hiai thu ahihleh India in Pakistan kal thu ahihziak in gamdang a kigolh ding uh lemsalou in gam nihte'n a genkhawm ding uh ahi chi'n pang hi. Special Assistant to Prime Minister Tariq Fatemi in a gendan in, Indus Waters Treaty (IWT) in a tunkhak kilemnate bawlthak leh kheklamdang ahihleh Pakistan in pomtheilou ding hidan in gen hi. Hiai thu ahihleh India in gam nihkal a ngaihdan kibatlouhna omte gamdang kigolhlou a gam nihte'n a genkhawm ding uh ahi chih thu a gen pansan a, a gen ahi hi. External Affairs Ministry thusa Vikas Swarup in zan a, a genna, project toh kisai a 'technical design parameters' bawlkhiakna ding a Pakistan in dalna bawltheilou ding leh Kishenganga project tungtang a leng gam nihte a pan exeprtte'n a bawlkhawm uh hidan in gen hi. India in ahihleh hiai toh kisai a gam nih a pan expert-te'n ngaihdan a genkhawmna ding ua hun kiningchingtak piak hiding hi'n gen hi. Himahleh India in hiai toh kisai a hun sautak behlap lai ding a ngetna a bawl in Pakistan patausak hi'n thusuak in taklang hi. Islamabad in ahihleh hun paisa a gam nih a pan palaite'n kikupkhawmna a neihnung uh leh project leng zohsiang phial hita  dinmun a omlai a, hun behlap ding a gen pen Islamabad in lemsalou hidan inleng taklang hi. Hiai kilemna ahihleh 1960 a bawl hi a, India in Indus basin suahlam a lui 3 - Beas, Ravi leh Sutlej bawl a, Pakistan in tumlam a lui 3 mah - Indus, Chenab leh Jhelum ah project bawl hi. IWT ahihleh Permanent Indus Commission nei a bawl hi a, huai ah gam nih a pan commissioner khat tuak tel uhi. Tulel a buaina ahihleh Kishenganga (330 megawatts) leh Ratle (850 megawatts) hydro-electric plants tungtang hi a, India in Kishanganga leh Chenab lui ah hydro-electric plants bawl a, huai pen Pakistan in IWT kalhna hidan in taklang hi. Tui thu a India leh Pakistan kal a kitheihsiam louhna ahihleh kha paisa a Prime Minister Narendra Modi in India a kipan Pakistan gamsung a luanglut luite daltan hidia vauna a bawl ziak a gam nihkal a kitheihsiam louhna sousang hi'n thusuak in taklang hi. Huai ban ah India in project nih a bawl pen kilemna toh kisai a dan bawl a omte kalhna hidan in Pakistan in taklang hi. Hiai thu ziak in World Bank in hun bangtanhiam paisa in gam nihte'n project toh kisai a, a nasepna uh khawlsan ding leh kitheihsiam louhna omte gam nihte'n lampi dang zong a genveng ding in theisak hi.

 

 

 

 

 

RELATED

 

 

ANGELS VISION NEWS | DECEMBER 14, 2016

 

 

ANGELS VISION NEWS | DECEMBER 15, 2016

 

ANGELS VISION NEWS | DECEMBER 17, 2016

 

ANGELS VISION NEWS | DECEMBER 19, 2016