You are here: HomeRSS FeedsLatest News

Angels' Vision News | November 05, 2016

Saturday, 05 November 2016 20:44

National Health Mission leh National Programme for Protection & Control of Deafness (NPPCD), Manipur in Guiness Book of World Record bawlkhaik sawm in tuni'n ALIMCO leh Ministry of Social Justice & Empowerment, Govt. of India toh kithuah in Khuman Lampak Indoor Stadium ah Grand Hearing Aid Distribution programme nei in, beneficiary 6,300 om lak ah mi 4,911 kiang ah Hearing Aid hawmkhia uhi. Hiai ding toh kisai in CCPur District in leng kisakkholna nasatak a nei in kha masa lam in National Programme for Protection & Control of Deafness (NPPCD) tungtawn in PHC leh PHSC tuamtuam ah Assessment Camp nei in Hearing Aid ngah theih ding mi 466 telkhiak in amaute tuzingkal dak 5:30 in Youth Hostel ah DC/CCPur Lunminthang Haokip, IAS in flag-off a, Dr. J. Son Goukham, Medical Supdt., District Hospital in thumna in khak khia a, beneficiary leh official te'n Bus 10 leh gari neu tuamtuam tamtak zang in Imphal zuan in zinsuk uhi. Khuman Lampak Indoor Stadium ah zingkal dak 8:00 apan in Hearing Aid hawmkhiakna kipan a, CCpur District tel in District 9 apan beneficiary 6,300 val paikhawm ua, NPPCD in a nek-le-taak ding teng uh a saisak vek banuah a kuan leh paina ding teng uh leng piaksak vek uhi.

Thutut kingah dan in, kum masa lam in Gujarat State in Vadodara khopi ah dakkal 8 sung in kho zaloute kiang ah hearing aid 600 ana hawmkhia in Guiness Book of World Record ah gelh lut in om a, Manipur State in hiai record omsa pelh sawm in pan nasatak in la ua, dakkal 2 leh a kim sung in beneficiary 1,000 val kiang ah Hearing Aid hawmkhia in record omsa khup uhi. Hiai hun zatna ahihleh Manipur Chief Minister O. Ibobi Singh in Chief Guest hihna toh uap in, hun zatna Thaawarchand Gehlot, Minister, Social Justice & Empowerment, Govt. of India in inntekna la in, Guest of Honour in D. Korungthang, Health & Family Welfare Minister pang a, ALIMCO apan Dharmaram Serin, Chairman, Managing Board in leng uap hi. Programme hunsung in Dr. Dhakeshwar, State Nodal Officer, NPPCD in vaidawnna thu gen in, mi poimoh chial a om te'n beneficiary-te kiang ah Hearing Aid hawmkhiakna nei in thugenna hun zang ua, Avanish Kumar Avasti, General Secretary, Ministry of Social Justice & Empowerment, Govt. of India in thil omdan pulak in, Manipur State in record omsa khup ahih dan puangkhia a, hiai toh kisai a panla tengteng tung ah kipahthu gen hi. Thutut kingah dan in, District tuamtuam apan beneficiary 6,300 om lak ah tuni a Grand Hearing Aid Distribution programme ah dakkal 8 sung in beneficiary 4,911 kiang ah Hearing Aid hawmkhiak in record omsa naktak in khup uhi.


XXXXXXXX


Khuga Dam a om 6 Sikh Light Infantry Regiment te'n CCPur District a om Ex-servicemen leh Veer Naris (sepaih panglai a galte khut a site zite) lak a pension toh kisai a buaina neite a ding in Ex-servicemen Cell (Suvigya Cell) kichi hongkhia in, hiai Cell tungtawn a case tuamtuam a lakte uh lak a hun sawttak pension toh kisai a buaina nei Mrs. Manngaihvung w/o (L) Nk. Paukhanlal case sufel in tuni sunnung dak 12:30 in SBI/CCpur Main Branch ah pension sum piakkhiakna nei uhi. Hiai hun ah Khuga Batallion apan officer bangzah hiam kihel in, Col. Vijay Hooda, CO, 6 Sikh Light Infantry Regiment in Senapati District a helte khut a si Nk. Paukhanlal zi Mrs. Manngaihvung kiang ah pension sum piakkhiakna nei hi. Thutut kingah dan in, Khuga Batallion in pension toh kisai a buaina neite a ding in apaisa July 2016 in Suvigya Cell kichi hongkhia in, pension toh kisai a buaina nei case 116 val enkai lel ua, tuni tan in pension toh kisai a buaina nei Ex-servicemen 65-te pension toh kisai sai felsakta in, Rs. 24 lakhs val amau acco utn chiat ah khumlut in omta hi. Tuni a pension sum la Mrs. Manngaihvung case toh kisai leng tuma lam apan hoihtak a etchet ahih banah a kul leh poimoh teng saisak in PCDA Guwahati tanpha ah a taipih nung un pension sum a lak khaklouh Rs. 2,41,895 teng saifel sak in tuni'n piakkhiakna nei uhi.


XXXXXXXX


Young Mizo Association (YMA) Hmuia Veng in kiphuhkhiaknung kum 60 chinna diamond jubilee a hong tung ding Nov. 12, 2016 in YMA Community hall ah lawm ding uhi. Huai tawh kisai cheplawkna dan in tuni'n YMA Community Hall, Hmuia Veng ah vengsung mipi'n indoor games nei in item tuamtuam ah kidemna nei ua, huai hun zatna CT Lian Guite, MDC 16-New Lamka West in Chief Guest hihna toh uap in hongkhia hi. Organizing Committte-te apan kizadan in YMA Women Wings makaih in Nov. 10, 2016 nitak dak 6:00 in YMA Hall ah kimawlna tuamtuam a kipahmante hawmkhiakna om ding a, huai hun ah Chief Guest in M. Gouzamang Guite, EM/MDC 17-New Lamka East pang in kipahmante pekhe ding hi. Nov. 12, 2016 in Diamond Jubilee lawpna om in huai hun ah ChieF Guest in Lungmuana Lakher, IAS, Princial Seretary pang ding hi'n kigen hi.


XXXXXXXX


L. Pumlianpau, President, PTC GHQ makaih in PTC General headquarters a a Executive Committee te'n tuni sunnung dak 1:00 in PTC Conference Hall, Hiangtam Lamka ah Executive Committee tutkhawmna a 34veina nei in, thu tuamtuam genkhawm uhi. Hiai meeting ah Executive committee teng kimtak a kihel in, tuma a Dorcas Veng Community Hall a Block leh Unit makaite toh Joint Special Meeting neihna a thupukna tuamtuam omte etkikna nei in, hiai toh kisai a sepsuah ding tuamtuam omte sepkhiak ding dan genkhawm ua, Block leh Unit makaite toh Joint Special Meeting 2nd Phase neihna ding toh kisai genkhawm uhi. Hiai hun ah member paikhawm te'n tulai buh lak hun toh a kituah ziak in Joint Special Meeting 2na Phase tu November khasung a neih di ng kichi pen December khasung a ding in a hun suan uhi. Tuaban ah, hongtung ding November 8, 2016 chiang in Rajya Saba MP Biswajit Daimary vaidawnna leh annkuang umpihna nei ding in member paikhawm te'n thupuk ua, vaidawnna programme ahihleh nitak dak 6:00 a pat hiding in gen uhi.


XXXXXXXX


Young Christian Organization, EOC in EOC C entral Church, Hill Town ah "Fleeing youthful lusts and preparing to be His Holy Instruments" chih thupi zang in zingchiang (November 6) tan daih ding Singing Festival cum Seminar 2016 zan nitak in pan ua, tusun hun ah thu leh la in kipawlh khawmna nei uhi. Hiai programme ahihleh zan nitak a Pastor Lelkap in a honkhiak hi a, hiai khawmpi ah EOC nuai a om kho tuamtuam 38 apan tuailai tamtak paikhawm uhi. Khawmpi hunsung Rev. Dr. Th. Lamboi Vaiphei, Rev. Dr. Kh. Khaizakham leh Mrs. Tracy Kipgen te makaih in Seminar om ding a, khawmpi hunsung in EOC nuai a kho tuamtuam apan Youth Christian Organization te'n lapawl sakna nei in, Lasa siam tuamtuamte apan lasak ngaihkhiakna om ding a, thu leh laa ah Pathian phat in kipolhlimna nei ding ua, zingchiang nitak in zousiang ding uhi.


XXXXXXXX


All Tribal Women Union (ATWU) makaih numei pawl te'n khopi sung mun tuamtuam a 6th Schedule toh kisai Awareness Programme a neih uh paitou zell in, hongtung ding November 7, 2016 nitak in Nehru Marg Junction, Tedim Road ah nei nawn ding uhi. Hiai hun zatna ahihleh Nu Liannem in makaih ding a, mipi paikhawm te'n Nu Goihzaniang makaih in gam leh nam a ding in thumkhawmna nei ding uhi. Programme hunsung in Thangbiaklian Hangzo, MA (International Development) leh Nu Nianglian, President, ATWU te'n diktatna leh 6th Schedule toh kisai gen ding ua, Nu Kimzaching makaih in mipi paikhawm te'n slogun sapna nei ding in, Upa T. Thangzakhum in thohlawm latna leh hun khakna bawl in programme zou ding uhi. Hiai hun ah diktatna tangkoupih ngam banah gam-le-nam a ding ding ngam mipi kuapeuh a tam theilam kihel ding in ATWU in chialna bawl hi. Tuabangkal ah, zingchiang sunnung dak 1:00 in All Tribes & Nations Assembly nuai a Team Shillong te'n District Hospital Morgue pha in, gam leh leitang a dia hinna ana pia salphate zahna leh suunna nei in thugenna hun zang ding ua, hiai hun ah lunglutna nei mipi a tam thei lam tel ding in ATWU in chialna bawl hi.


XXXXXXXX


ZEO/CCpur saina in zingchiang (November 6, 2016) in Class VIII - Class X student-te a ding in State Level National Talent Search Exam, State Talent Search Exam leh National Means cum Scholarship Exam om ding a, CCpur District apan government leh private school tuamtuam a kai student 216 kihel ding uhi. Thutut kingah dan in, State Level National Talent search Exam ahihleh Class X student-te a ding hi a, hiai exam ah government leh private school apan candidate 68 om in, State Talent Search Exam ahihleh government leh private school a kai Class IX student-te a ding hi a, candidate 113 om hi'n thutut kingah hi. National Means cum Scholarship exam ahihleh government school a kai Class VIII student-te a ding kia hi a, hiai a ding in candidate 35 om a, Exam ahihleh shift 2 in kikhen ding a, shift masa zinglam dak 10:00 in kipan ding hi.


XXXXXXXX


Tribal Movement doudal pawlkhat in Hiangtam Lamka a Salpha Pumbuk haltum mahle uh mipi thahatna toh tundin thak a om nawnta in zan nitak dak 6 in Pathian kiang ah latkhiakna leh a honna program zat in om hi. Salpha Pumbuk latna programme ahihleh nitak dak 6:00 in kipan a, Joseph Lalrothang, President, Hmar Inpui in Ribbon Cuttiong nei in, Rev. Lalhmuoklien President, Christian Goodwill Council in hasotna thu gen in, Pathian kiang ah latkhiakna nei a, Salpha sungkuan-te makaih in pak piakna om hi. Programme hunsung in, Hiangtam Lamka hausa Thangkhosuanmung apan vaidawnna thu gen ngaihkhiakna om in, H. Mangchinkhup, Chief Convenor, JAC-AATB in keynote address gen in, declaration bawl na nei a, Joseph Lalrothang, President, Hmar Inpui, Lalrinliana, President, Mizo People Convention leh B. Dongzalian Simte, Chairman, Zomi Council te'n thugenna hun zang in, Pastor D. Kamchinmang, EBCC Hiangtam Lamka in thumna in hun zatna khak hi. Hiai Salpha Pumbuk ahihleh apaisa October 8, 2016 zingkal baihtak dak 3:00 vel a pawlkhat in a hal uh hi a, mipi thahatna a tunding thak a om hi'n kigen hi. Zan nitak a salpha pumbuk kilam thak honkhiak ahih hun ah, H Mangchinkhup, chief convenor JAC-AATB in a thugenna ah Pumbuk kichi nidang in I pu ipate'n a vanzat ding uh bawlkhiakna mun in zang uh a, kivengbit uh chi hi. Khovel khantouh dungzui in tuchiang tu leh tem kiseek law nawn kei mahleh Salphate luang kisialna mun ahih ziak in, Salpha pumbuk zang in i thiltupte mualsuahna ding seek khiakna mun in zangni chi hi. Aman a genzelna ah kumlui August 31 a pumbuk hoihlou a gam leh lei venbitna ding ana seek kheloute ziak in buaina in hon nawk a, i gam humbitna ding in salpha 9 in a hinna uh ana pia uh chi hi. Manipur a phaizangmite'n singtangmite nelhsiah in Dan tuamtuam passed uh a, himahleh kumlui a Bill 3 passed a hong om ziak a kuangzak hin gen a, tuni tan movement paitou lai ahi chi hi. Manipur state solkal toh kumlui December 29 a kihouna neih chihlou state solkal lam ah kihouna om nawnlou a, himahleh phualpi solkal lam ah delh theih nana ah kidelh in, tuni tan in i pang a, tawp leng i sawm nai tuankei a, I pan theih dandan in i pangding a bangteng hong tung leh leng tolh lou a i panding ahi chi hi. A thugen a zoh kuan in, Salpha pumbuk honna hoh mipite kiang ah JAC-AATB min in declaration bawl in, huai ah Maban zek a Election omding ah, mimal, UG group te tel in pawlpi hitaleh kuaman thagum zang a vote zon phal hilou ding hin gen a, Election commission of india deihna bang a siangthou tak a neih ahihding chi hi. Tuabang toh kituaklou a Dan toh kituaklou a vote zong hiam ahihkeileh mipi deihlouh lam hih omleh mipi toh kinan tuahna omleh moh a kipuak uh ngaiding a, vote hetute'n leng OMTF leh JAC-AATB in a boycott MLA te'n tuni tan mitdel bangmai a singtangmite haksatna kitheih moh bawl uh ahihna uah, vote pelou ding in gen a, mipite'n pompih ahihna uh latsakna in a khut taklam chiat liik uhi. joseph Lalrothang, President Hmar Innpui in a genna ah tulel a singtangmite'n movement i buaipih lel uh lohsam hilou hin gen a, Ibobi makaih solkal a dinkhiak nung tanggam leh phaizang kal kikhenna uang deuhdeuh in, tuung a telching a omlai uh leng singtangmite leh phaizangmite kal bouruak se deuhdeuh ding hin gen a, Ibobi Singh tuh singtangmite a ding in Zero Ibobi ahi chi hi. Lalrinliana, President mizo Peoples convention in a genna ah tu in haksatna tuamtuam tuak mahle hang kipumkhat a dingkhawm a, i thilnget i muhchiang in nopna hong suakding ahi chi hi. Zomi council Chairman B Dongzalian simte in a thugenna ah, Zomi council kichi nam 9 kikhaikhawmna hi a, JAC kichi leng gupna naktak a a piak ban uah, tulel a tribal movement toh kisai in, mi khenkhat te'n hamsiat leh pumbuk halsiat a bei maiding in koih mahle uh, a ma a sang a hoih zawsem a tunding thak a omna in, i kithutuahna uh langsak ahi chi hi. Vau thoh mai a tribal movement bahding hilou ahihman in, kuapeuh in nunglam a i hinkhua zatdante enthak in hat leh hangsan tak in kalsuan touni chi hi. Salpha pumbuk lamthana ding in mi tuamtuam in sum a thoh khawm uh 99,850 pha a, Material cost, stationaries, transportation, refreshment leh Banner print na in 94,498.50 zatbei a om in, 7813.50 vaal hin kigen hi.


xxxxxxxxxxxx


GAMSUNG THUTHANG

India gamsung a thiltung khovel pumpi theihding ah zumhuai mahmah khat ah India gamsung a om uttar Pradesh ah numei tamtak pasal te'n a sualluihna uh video kibawlte tawm chikchik a leitheih ding a zuak a om hin kigen hi. Thusuak in a gendan in, uttar Pradesh state sung mun tamtak a numei pawngsual a omlai uh video tuamtuam India sum in dangka 20 apan 100 kikal a zuak a om in, niteng in copy 1000 val zuakkhiak gige in om a, himahleh District thuneitute hin Police hitaleh hiai toh kisai in kuamah mat neilou uh hin gen hi. DVD cassettes zuakna dawr neitu tamtak in, amau kiang a DVD lei gigete kiang ah kiman chik a numei pawngsual a omlai uh video zuak gige uh hin thusuak khenkhat in gen ua, DVD cassettes play na ding neiloute kiang ah leng Laptop pansan in numei pawngsual a omlai uh video tamtak mobile phone ah khak a om uh hin kigen hi. Min puankhiak utlou dawr bawltu khenkhat in thuthak saite mai a a gendan un, numei rape a omlai uh video te zuakna toh kisai in a man zah bikhiah chet in omkei mahleh, video a hoihleh hoihlouh zil in, 20 apan a tunglam a zuak a om hin gen a, pawngsual a om numei te lemlak leh vuaktang a omlai lem uh cheng 3 (Rs. 3) a zuak a om hin leng gen hi. Tuabang a numei tamtak pawngsual a omlai uh video bawl a omte Uttar Pradesh state sung a, Tajganj leh Sadar kichihna munte ah zuakkhiak tampen in om a, Police in hiai thu toh kisai in, Rape a omte video zuaktute zonna nei uh hin gen mahle uh tuni tan action khauhtak lak a om tuanlou hin kigen hi. .India a numei tung a tatsiatna toh kisai in, National Crime Record Bureau of India in a taklat dan un, 2014 kum in, numei tung a tatsiatna thiltung India gamsung pumpi ah record kibawl teng 3,37,992 pha hin gen a, kumlui 2015 kum in, numei pawngsual a om zah 34,000 om hin gen a, gelhlut louh tamtak omlai ding a gintak in leng om hi.


Xxxxxxxxxxxx


Delhi khopi leh a sehvel a huihsianglou nasatak a a kitheh dalh ziak in, National capital new delhi bial teng ah school khak in om hi. Delhi solkal thusuak in a gendan in, Diwali hunpi a kizatnung huih sianglou nasatak in Delhi khopi pumtuam hin gen a, tua ziak in school naupang te'n awmna a neih khakding uh lauhna in school omte khak in om a, mun khenkhat ah morning assembly neihkhit nung in, student te kiang ah muk tuamna mask thuah ding a theihsak a om in, innlam ah student te paisak uhi. Vasant Vihar a om Tagore International School in leng November kha sung a sports neiding uh chih himahleh huihsianglou tamluat ziak in, kumnawn February a ding in suan uh a, Gurgaon a om Shri ram school in ahihleh kalnawn seppatni tan school khak ding in thupuan bawl uhi. Gurgaon mah a om Heritage school in leng class lalou ding in thusuah bawl ua, Indira Gandhi International airport ah leng meipi a sahluat ziak a muh theihna metre 300 leh 400 kikal lel a tunsuk ziak in, lenna lengkhe ding leh lenglut ding tamtak zekai sak in om uhi. Huihsianglou tamluat ziak in Centre for Science and Environment (CSE) in Delhi government kiang ah naupang peuhmah kongpua kankhe lou a innsung a om chiat ding a thusuah bawl ding in theisak uh chihthu om hi.


xxxxxxxxxxxxx


Tamil Nadu Chief Minister J Jayalalithaa damlouhna toh kisai in, etkol a omna mun Appolo hospital in tuni a thupuan a bawlna uah Jayalalithaa a damlouhna apan damsiangta in, innlum a zot hun ding amah deihteel na kinga ahi chi hi. Chennai khopi a appolo Hospital thusuak in a gendan in, kum 68 a upa Tamil Nadu CM Jayalalithaa ahihleh September 22 apan a tuap lam buaina a neih ziak a Apollo hospital puantun hi a, UK apan Specialist tel a Doctor siam taktak te'n hoihtak a a etkai nung un, damsiangta chi hi,. Tu in Jayalalithaa ICU apan pawtsak in omta a, himahleh damlou dangte toh kibang in public room ah koih in omlai hi. Kal khat paita apan leng annchim ne theita in, mi toh leng kihou theita hin gen ua, a pawt hun ding gen chet theih hikei mahleh amah a kingap hunhun a pawt theita ding hin kigen hi. Jayalalithaa a damlouh sung in AIADMK apan makai tuamtuam ban ah Tamil nadu state governor Vidyasagar Rao tel in, mi poimoh hunkhop in veh mahle uh kimu theilou uhi.


xxxxxxxxxx


Mathura a Yamuna expressway ah meizun sahluat ziak in gari 20 val kiphutuah in huai ah mi 12 in liamna tuak uhi. Police thusuak in a gendan in, Agra apan kipan gari te'n thakhat a brake a mat ziak un, tua expressway a tai gari 20 vel kiphutuah uh hin gen ua, mi 12 in liamna a tuah ziak in, Mathura leh jewar mun ah etkol ding a puaktun in om uh chi hi. Liamna tuak Mathura puaktun a omte ahihleh Mathura District hospital, Life Line hospital ah puaklut hi ua, Jewar mun puaktun a omte bel Kailash hospital ah etkol in om uhi. Gautam Budh Nagar district leh a sehvel leng meisah tak in tuamchip a, tukal nilaini apan meipi a sahluat ziak in muh theihna leng metre 300 leh 400 kikal tan tungsuk hin IGI Airport meteorological department a Director incharge RK Jenamani in gen hi. Tukal seppatni in leng delhi-noida-Direct flyway ah meizun sahluat ziak mah in gari hunkhop kiphutuah ngeita uh a, meizun nasatak a a sah diakna pen huihsianglou a tamluat ziak hin leng gen uhi.


xxxxxxxxxxxx


India leh China sepaihte Ladakh mun a a kinangtua lai tak un China toh india gamgi zul km 29 a gamla ah Indian air force lenna hat mahmah C-17 Globemaster aircraft kichi lenlut sak in om hi. C-17 Globemaster aircraft bohsak a omna mun ahihleh Ladakh apan Km 3500 a gamla a om Himalaya tangdung tumlampang Arunachal Pradesh state sung a west siang district a Menchuka advanced landing ground hi a, tua advanced landing ground ah runway feet 4200 lel a sau om mahleh nuamtak a C-17 Globemaster aircraft bohthei hin IAF thusuak in gen hi. C-17 Globemaster aircraft bohsak a omna mun Menchuka advanced landing ground ahihleh Assam state sung a Dibrugarh apan paiding hilh Km 500 vel a gamla a om hi a, lamlian leng kise mahmah hin gen uhi. Tuabang a IAF lenna Arunachal Pradesh leh China gamgi bul a lenlut sak a om toh kiton in, India leh China sepaihte'n Ladakh mun a kikan tuahna a neih uh leng vengthei hin gen uhi. Zan hal in china sepaih 55 veldingte Ladakh ah lut in, MGNREGA nuai a irrigation canal bawl a omlai mipite va hawldalh uh a, India sepaihte'n hiai thu a theih phet uh 77 kuan in India gamsung thukzaw honglut ding uh daal uh hin kigen hi. China sepaihte india gamsung honglutna toh kisai in army lam in theikha lou hin pang uh a, thiltung omlou hin gen mahle uh a lemlak uh tanpha record bawl a om hin NDTV thusuak in gen hi.


xxxxxxxxxxx


GAMDANG THUTHANG

Taliban pawl in kunduz khopi a laksak nung uh North atlantic treaty organisation (NATO) a kikhaikhawm gam te'n Taliban helpawlte tung a beihpi suah a bomb a khiak khumna uah vangsiat huai tak in minautangte tenna mun a tukkhak ziak in, naupang, naungek, numei tel in mi 30 si uhi. Tuabang a NATO gamte'n Kunduz khopi sung a bomb a khiak uh minautang tenna lak a tukkhak ziak in, Afghanistan mipite'n UN kiang tutding leh thil omdan suizui hiding chin gen ua, himahleh US in bel theihkhelh khak ziak a bomb kikhiak khumna om hidan a gen in, war crimes dan a puan theih hilou ding chi hi. US makaih NATO in ahihleh Taliban commander khat thahsawm a beihpi a suah hun ua, minautang tenna mun bomb khiak khumkha uh hin NATO thusuak in gen a, bomb in minautang te omna mun a denkhat phet in mi 30 si in, midang 25 liam uhi. US leh afghan sepaih kithuah te;'n tunin leng joint operation nei in, huai ah Taliban commander poimoh mahmah nih tel in mi 65 kaplum uh hin afgan solkal thusuak in gen hi. 2014 kum apan US in Taliban helpawlte beihna khawlsan phialta hidan a theih himahleh US special force hunkhop Afghan sepaihte lak ah kihel in Taliban te beihna ah pang uh a, Kunduz khopi leh khopi tuamtuam kituhna ah afghan sepaihte'n thuak naak mahmah in, tukum kha 8 sung in Afghan sepaih 5500 si uh hin kigen hi.


xxxxxxxxxxxxx


Panama Paper luikhiak a om ah Pakistan Prime minister hihna lenlel Nawaz Sharif in sum tamtak thelthang sak in, gam tuamtuam ah company nei hidan a ngoh in om mahleh PM Nawaz Sharif tua ngohna omte naktak in nialna bawl hi. Nawaz Sharif in Pakistan gamsung a thukhenna innpi lianpen Supreme Court a lehkha a thehlut dan in, chikmah a Tax pelou ngeilou himhim hin gen a, Tax a piakna lai poimoh leh a gou ban ah a neih a lam teng 2013 kum a pelut khinta hin gen hi. Hiai thu ahihleh Panama Paper thubuai toh kisai a supreme court a genna neih a om dek ziak a PM Nawaz Sharif in a kisiamtan thu a gen hi a, himahleh tua Supreme court a lehkha a piak pomsak a om leh omlouh theih hilou hi. PM Nawaz Sharif tung a ngohna ahihleh Imran khan makaih Pakistan Tehreek-e-Insaf (PTI) party in a bawl uh hi a, Supreme court a petition a thehlut dan un, Nawaz Sharif leh a innkuan te;n nekgukna tamtak nei uh hin ngoh ua, suizui ding in leng supreme court kiang ah ngetna nei uhi. Petition dangkhat Jamaat-e-Islami in a thehlutna uah Nawaz Sharif tel a Panama papers a Pakistan mi tuangkha teng suizui ding in ngen ua, kalnawn seppatni tan in Supreme court in petitioners teng ban ah PM Nawaz Sharif kiang ah hilhchetna peding in theisak a, Nawaz Sharif tate Maryam, Hussain leh Hassan Nawaz ban ah a sungpa Captain Mohammad Safdar kiang ah leng a dawnna uh pelut ding a theisak hin kigen hi.


xxxxxxxxxxxxx


Turkey gamsung simlam pang a om khopi poimoh mahmah leh Kurdish mite omna mun hidan a kigen Diyarbakir ah Police headquarter kiang a bomb hattak a puahzak ziak in, mi 9 si in, midang 100 val in liamna tuak uhi. turkey Prime Minister Binali Yildirim in thiltung toh kisai a gendan in, tua bomb puak ahihleh hat mahmah a car a kikoih ahihban ah a puahzak khitphet in police officer nih leh minautang 7 a mun ah si in,midang 100 val liamna tuakte damdawi inn ah puaklut in om uh chi hi. Bomb puahzakna toh kisai in, Turkey solkal in danpua a a koih uh Kurdish thautawi pawl Kurdistan Workers' Party (PKK) te'n amau khutnung hidan in thupuan bawl uh a, Turkey solkal in Kurdish mite a tuam bawlna deihlouhna leh Kurdish mite tenna bial teng gamkhat a gawmding deihna a tuabang a a hih uh hin kigen hi.


xxxxxxxxxx