You are here: HomeRSS FeedsThe Lamka Post

The Lamka Post | April 26, 2017

Wednesday, 26 April 2017 17:54

PM review meeting hun kuan in Works Minister in NH-37 a nasepna enkhia

Imphal, April 25: Prime Minister Nar­endra Modi in review meeting a neih ding kuan in, Works Minis­ter Thongam Bishwor­jit in Imphal-Jiribam highway dung a lampi puahthakna a etkhiak zoh toh kiton in, tuni Sepnawnni zing bai­htak in Imphal zuankik hi. Zingchiang Nilaini in Prime Minister Nar­endra Modi in Manipur government official-te toh video conferencing tungtawn in, Imphal-Jiri­bam section NH-37 dung a lampi puahthakna nas­epte enkhe ding hi.

 

Zan Seppatni in Work Minister leh a kithuahpih public works department a chief engi­neer leh top official-te’n Imphal a kipan high­way-37 tawn in Jiribam tan vapha ua, highway puahthakna toh kisai a nasepna va-enkhia uhi. Hiai highway improve­ment work ahihleh kum 2014 in BJP makaih NDA government 100 days programme lak a guantel in om mahleh mohpuakna piak a om Border Road Organisa­tion (BRO) in sepkh­iak bangmah neilou hi. Highway puahna nas­epna National Highway Infrastructure Develop­ment Corporation Lim­ited (NHIDCL)-te khut a piakkhiak ahihnung in, tu April kha sung ngei a zohsiang sawm in pan naktak in lalel uhi. NH-37 ahihleh Mani­pur a ding in, NH-2 zoh a hinna lampi poimoh mahmah in pang hi. NH-2 a kikawmtuahn­ate sukbuai ahihnung in, state a niteng van poimohte laklutna ding a, hunbit a zatkhiak theihna ding a highway puah ding in Centre leh state government noh in om den hi. NH-37 im­provement work pailel a masawnna omte work minister in a gendan in, hun bikhiah sung ngei in highway improvement work zohsiang hiding chi’n gen hi. Jiribam phakna ding kilometre 30 vel a om Makru bridge etkhiakna hun a work minister in a gendan in, tulel a govern­ment in m mipite kiang ah April kha tawp tan a im­provement work zohsiang hiding in thuchiam bawl khin mahleh vuahzu leh khosia in, road improve­ment work zohsiang hun ding zekaisak khathei ahi chi’n gen hi. Hiai lei bawl sung a, gari kiviallehte sukbuai a hihlouhna ding un, lei bawlna munte ah pumpelh(road diversion) hoihtak bawlkhiak hid­ing chi’n gen hi. Central makaite’n state a devel­opmental work-te awl­mohpih mahmah uh ahi chi’n gen hi. March 27, 2017 in NHIDCL in kilo­metre 223 a sau Imphal- Jiribam highway puahna nasepna pankhia hi.

 

 

School teacher kaplup ziak in Thoubal district mipi kiphin

IMPHAL, Apr 25: Police constable Elang­bam Rajesh, 30, s/o E Achou, Salungpham Ma­mang Leikai in zan, Sep­patni zankim pelhzek in Khagembam Santosh, 25, s/o Kh Ibohal, Thoubal Athokpam Awang Leikai kaplum a, tua toh kisai in mipi lungkimloute’n tuni in district headquarter ah kiphinna nasatak nei uhi.

 

Tuni a mipi kiphinna neite’n, tualthattu tenna inn halsak ua, huai ban ah Imphal-Moreh kikal NH-102 (Trans-Asian Highway No. 1) khaktan ua, gari kiveite a ding in nawngkaina tun hi.

 

Sihna tuak Santosh ahihleh Institute of Ru­ral Education, Wangjing (Thoubal district) a school teacher hi a, Tha­bal Chongba nopbawlna Ukhongshang Mayai Lei­kai a neihna a thiltung ahi hi. Santosh lawmte gen­dan in, Thabal Chongba neihna mun a kipan mun gamla lou a ‘lagou’ kimawlna mun ah Rajesh in naichik ah 3 vei kap ahi chi uhi.

 

Tualsung mite gen­dan in, thaukap ahihma in, police personnel in lagou kimawlna sunzom nawnlou ding in thupia a, huai toh kisai in lagou kimawlna saitu, youth organization-te toh police personnel kiselbuai uhi.

 

Hiai kiselbuaina hun ah a kiang nai a om mipite’n thauging 3-vei za uhi. Mit a mutu gendan in, police constable in naichik a kipan Santoh kap hi. Thautang 2 a awm ah lut a, thautang 1 in ahihleh a khe kha hi. San­tosh in ahihleh a liamna ma thuak zoulou in dam­dawi inn zotpih ahihlai in lamkal ah si hi. A lu­ang ahihleh postmortem ding in JNIMS hospital morgue ah koih in om hi.

 

Santosh sungkuante gendan in, thaukhahna a om zoh in, huaimun a dan-leh-thupiak toh kisai enkai ding a om, police personnel in thil tunna mun kintak a nusia ahi chi uhi. Thoubal district senior police of­fice in a gendan in, khutkhialtu ahihleh Nonpok Sekmai police station office-in-charge driver ahi chi a, mat a om ahihdan leh a thau zat, revolver leng laksak a om ahihdan leng gen hi.

 

Tuzingkal baihtak in mipi thangpaite’n khutkhialtu tenna inn mun ah kipunkhawm ua, a inn halsak uhi. Mipi thangpaite betdaihna ding in Police leh fire department-te’n hihtheih bangmah neilou uhi chi’n thuthaksaite’n gen uhi.

 

Thoubal district in a huamkhak NH- 102 dung mun tuamtuam bandh puang ua, Imphal-Moreh kikal a gari taiding phallou uhi. Kiphinna neite’n khutkhialtu capi­tal punishment piak ding ngiat kawm in, huai hun a police team-te makaihtu offi­cer tung a leng action la ding in ngiat uhi. Hiai thiltung toh kisai case chiamteh a, a om nung in, Home-in-charge, Chief minister N Biren Singh in DGP kiang ah thiltung toh kisai report pe ding in theisak hi.


 

 

Japanese Embassy Dy Chief in Khurai a bomb khiak thu ah ngaihdam ngen

Imphal, April 24: Kidoupi Nihna hun lai a Japanese Army-te’n Khu­rai Chingangbam Man­dap a bomb a khiak nung uh kum 74 a pai nung in, Deputy Chief of Japanese Embassy Shunichi In­oue in bomb thuakkhate inkuanpihte kiang ah Japanese Army-te sik-le-tang in ngaihdam negn a, bomb thuak khate zahna pak pia hi.

 

Deputy Chief of Japanese Embassy Shu­nichi Inoue in thuaktute inkuanpihte a kimuhpih hun in, ngainatak in vaid­awn in om hi. Kidoupi Nihna hun a thiltung khatpeuh a ngaihdamna ngen kawm in, Deputy Chief of Japanese Em­bassy in Khurai leh a kim a hinna tan tualsung mi 100 val thah a omte sungkuangpihte thuak­pih leh dahpih mahmah ahihdan gen hi. Kidoupi Nihna hun sung a thah a omte leh ana thuakkha mohna neiloute tung ah awlawl in kilemkikna bawlin omtou zel hi. Thu­aktu inkuante’n Khurai Chingangbam Mandap mun veh leh bomb khiak a om thuakkhate tung a zahna pia a kalsuan Deputy Chief of Japanese Em­bassy Shunichi Inoue zi kiang ah kipahpi­hna thilpiak Manipuri puansilh ‘Phanek’ pia uhi. Imphal Campaign Foundation WW2 leh Tourism Forum, Mani­pur-te’n Deputy Chief of Japanese Embassy pro­gram zatna bangkim ah kithuahpih uhi. May 20, 2017 chiang a Imphal leh Kidoupi Nihna nei­hna munte a World War 2 phawk gigena program zat dingdan toh kisai genkhawm ding in, ni nih vel paita in Deputy Chief of Japanese Em­bassy Shunichi Inoue in Imphal hongpha hi. Newspaper a bomb kh­iak thiltung leh April 20, 2017 a Khurai Chingang­bam Mandap a bomb khiak hun theih gigena zat a om a hihdan thei­kawm in, Shunichi In­oue in thuaktu inkuante kimuhpih ding leh memo­rial a amaute zahna ped­ing in thupuk hi.

 

 

Vajing ah Winger 1 khetsiat in om

LAMKA, April 25: Police a pan kizadan in, tuni April 25 zingkal dak 7:20 vel in Vajing khua ah Lamka a pan Imphal zuan a tai passenger pua Wing­ger MN06L/6515, melt­heihlouh pasal 2 in Tedim Road ah ana khamkhawl in passenger teng kum­khesak ua, tua zoh in gari glass teng khense vek uhi. Mi nihte’n driver Long­jam Birjit Singh (31) s/o L. Baba Kishore Singh of Tonglaobi Makhao Lei­kai, Bishnupur leng vua uhi.

 

Hiai thu theihphet in police-te’n va delh mahle uh pasal 2-te ana kihem­khe man uhi. Gari neitu ahihleh Khuairakpam Suresh Kumar Singh of Imphal West hi a, hiai Winger ah passenger 14 vel tuang uh hi’n Police-te’n gen uhi.

 

 

SYO-GHQ cabinet kekletna nei

LAMKA, April 25: April 15, 2017 a Simte Youth Organisation GHQ 2017-2019 sung vaipaw ding kitelna Simte Inn a neih ahihnung in tuni, April 25 sunnung dak 3 in Simte Inn ah hiai bang in cabinet kekletna nei uhi.

 

Huaite ahihleh Presi­dent: L. Dongchinthang; Vice President (Adm): H. Ginmung; Vice President (Ext): Th. Pauchinthang; Gen. Secy: N. Chinkhan­siam; Asst. Secy-cum-Fin. Secy: H. Thangkhansuan; Treasurer: H. Chinsu­anlal; Secy.Information (Int) : T. Pauminlian; Secy. Information(Ext): L. Dongzapau; Secy. Arts & Culture: Th. Doumuan; Central Advisory Board: Th. Pumzakham -Chair­man; L. Henzamang - Secretary leh member: T. Goukhomang; C. L. John; T. Pumkhokam; Rev. L. Liankhanlal; Th. Dongchinpau; Rev. K. Hangnung; L. Thong­khanpau leh P. Jamkho­dou hi uhi.

 

 

Brick field neitu pimangna a tel UG 1 mankhia

Imphal, April 25: Zan Seppatni nitak dak 6.30 vel in Imphal West Police commando-te’n February 16, 2017 a brick field neitu Soi­bam Dhanabir Singh of Tera Lukram Leikai, Rs.2 crore a tatkhiak ding a pimangna a tel KRA- cadre 1 Imphal West District lampang Lilong Thong a kipan in mankhia uhi.

 

Thusuak dungzui in, mat a om KRA-U cadre Laishram Amujao alias Sunil(38) s/o late L Mangi Singh of Khagem­palli Huidrom Leikai ahihleh 9mm pistol 1, magazine 1 leh a tang 2 toh mat in om hi. Hiai thiltung toh kisai a kigol­hkha midang 3te tung ah leng kipimangna thubuai chiamteh in om khin hi. Mat a om KRA-U activist ahihleh Lamphel police station ah pekhia uhi.

 

 

Tuilaphai ah World Malaria Day 2017 zang

LAMKA, April 25: Intensified Malaria Con­trol Project – 3 nuai a Caritas India/DSSS Imphal of Churachand­pur DPMU in tuni’n “End Malaria for Good” chih thupi zang in Lamka a pan km 26 vel a gamla Tuilaphai ah World Ma­laria Day 2017 zang uhi. Hiai hun zatna Rev. Se­hkhohen, Area Pastor, ECA Church in thumna a hong in P. Thangsuan­hau, District Project Offi­cer in vaidawn thugen hi.

 

Hiai hun chief guest hihna toh uap Dr. Kimn­gaihching Simte, CMO/ Ccpur in khotang leh student-te’n malaria dou­na a panla khawm ding in ngen hi.

 

 

IAS Officer Transfer/Posting

1. O Nabakishore Singh, IAS, Chief Secy (Cabinet/Revenue) & Chief Vigilance Commissioner, Manipur as Chief Secy. (Cabinet/DP/Power) & Chief Vigilance Commissioner, Manipur.

2. W.L Hangshing, IAS, Addl Chief Secy (IFC/PHC) as Addl Chief Secy (Fisheries).

3. Shambhu Singh, IAS, Addl Chief Secy (AR) & DG/SAT as Addl Chief Secy (PHE/AR/Forest & Env) & DG/ SAT.

4. Dr Suhel Akhtar, IAS, Addl Chief Secy (Labour & Employment) as Addl Chief Secy (Adult Education).

5. Dr J Suresh Babu, IAS, Addl Chief Secy (Forest & Envt/Home/MA­HUD) as Addl Chief Secy (Home/ MAHUD).

6. M H Khan, IAS, Principal Secy (MOBC/Adult Edn) & Member Secy State Commission for OBC as Prin­cipal Secy (MOBC/SC/Relief & DM) & Member Secy State Commission for OBC.

7. Lungmuana Lakher, IAS, Principal Secy (Vety & AH/Seri/Commerce & Industries) as Principal Secy (Com & Ind) & Commissioner (Depart­ment Enquiry) in addition.

8. J C Ramthanga, IAS, Principal Secy (Social Welfare/MI) as Principal Secy (Social Welfare).

9. Paulunthang Vaiphei, IAS, Princi­pal Secy (SCERT/Eco & Stats) as Principal Secy (Cooperation/Eco& Stats).

10. Vineet Joshi, IAS, Principal Secy (Finance/Power/Planning/Hr & Tech Edn) Resident Commissioner (Ma­nipur Bhawan, New Delhi) as Prin­cipal Secy (Finance/Planning/Hr & Tech Edn) Resident Commissioner (Manipur Bhawan, New Delhi) & Principal Secy to CM in addition.

11. Prashant Kumar Singh, IAS, Com­missioner (DP/Health & FW/GAD/ IT) as Commissioner (Health & FW/ IT).

12. V K Dewangan, IAS, CEO, Manipur as CEO Manipur & Commissioner (Election/Labour & Emp).

13. M Lakshmikumar Singh, IAS, Com­missioner (Edn-S/Tranport) & Chair­man BOSEM.

14. K Radhakumar Singh, IAS, Com­missioner (Works/IPR/CAFPD/ Cooperation) as Commissioner (Works/IPR/CAF/PD).

15. Th Chittaranjan Singh, IAS, Secre­tary to Governor, Manipur as Secy to Governor Manipur & Commis­sioner (Revenue) in addition.

16. Jason Shimray, IAS, Commissioner (Relief & Disaster Management/ Horti & SC) as Commissioner (Agri/ Horti & SC).

17. Sumant Singh, IAS, Secy (RD/PR) & Director Vigilance as Secy (RD & PR/Vety & AH) & Director (Vigi­lance) in addition.

18. Gopen Meitei, IAS, Secy (Agri/FC/ fisheries) as Secy (IFC/MI/Seri).

19. N Ashok Kumar, IAS, Secy to CM Manipur & Secy (DP/Cabinet & Condidential/IT/Tourism) as Secy to CM Manipur & Secy (DP/GAD/ Tourism) & Special Secy (Cabinet & Confidential)

 

 

Lamka khopi sung mun 16 ah 100KV Transformer koih ding

LAMKA, April 25: MSPDCL in Integrated Power Development Scheme(ITDS) tungtawn in Lamka khopi sung mun tuamtuam 16 ah electric transformer 100KV koih ding hi. Transformer koi­hna mun dingte ahihleh Vaal Veng; Vengnuam (Pethuel); Tangnuam, Kanan Veng, V. Mun­hoih, Thingkangphai, Mualvaiphei, Saikot, M. Songgel, Sumkong Bazar, Demmang Veng, Mun­hoih, Ebenezer, N. Najar­eth leh DTC Veng hiding hi. Transformer koihna ding mun ahihleh tunung sawtlou in MSPDCL in enchian ding uhi.

 

Huailou in, zan ni­tak in guta pawlkhat in Sahei Road, New Lamka ah electric transformer earth connection bawlna copper gui gumang ua, himahleh tuni zingkal in a thak thuahnawn uhi.

 

 

Nitak dak 7 tan Petrol Pump-te kihongta ding

LAMKA, April 24: Tuni, April 15 sunma dak 11 in DC/Ccur office a BRGF hall ah DC/Ccpur makaih in Lamka khopi sung a Oil Pump Owners leh LPG Gas Agency teng in SP/Ccpur, DSO/FCS leh Consumer Club-te tel in meeting nei uhi. Hiai hun ah mipite’n thautui leh LPG kiningchingtak a ngahtheihna ding ua phalna tellou a bazar a zuaklouh ding tungtang genkhawm uhi.

 

Hiai hun ah mun­dang a Oil Pump-te ni khat a dakkal 24 sung hon ahihlai in Lamka a Oil Pump-te nitaklam dak 4 a kikhak zel pen zingchiang a kipan zingkal dak 7 a kipan nitak dak 7 tan hon ding leh a poimoh leh se­cuirity leng piak ding in thupuk uhi. Oil pump toh kisai in lemtang zaw ding etna in May 2017 a kipan in Tuibong Service Sta­tion leh M/s Suakhnun & Sons-te kha khat hal in kikheltuah ding uhi.

 

LPG toh kisai mipi’n kiningchingtak a, a muhtheihna ding uh toh kisai genkhawmna hun ah, LPG Agency-te’n a haksatna uh gen ua, khenkhat in kha khat quota truck 30 nei himahle uh truck 20 khong muzou uh hi’n gen uhi. Hiai toh kisai in DC/ Ccpur in LPG Agency-te’n district quota kimtak a, a muhtheihna ding ua pan­la ding leh mipite’n deih hunhun ua a laktheihna ding ua amah hihtheihna tan a panla ding ahihdan gen hi.

 

 

Ccpur district ah NFSA nuai a hawm ding antang kha 1 in 15,662.25qtls poimoh

LAMKA, April 25: Ccpur district sung a as­sembly constituency 6 - Ccpur, Henglep, Saikot, Singngat, Thanlon leh Tipaimukh ah Nation­al Food Security Act (NFSA) nuai a Rationing Agent-te’n Ration Card tungtawn in kha khat in mipi lak a hawmkhiak ding antang Kg 15,66,225 (15662.25 quintals) po­imoh uhi.

 

Ccpur district sung a assembly constituency 6 a AAY Household/Card Holder 5,835-te a ding in kha khat in antang Kg 2,04,225 leh Priority Household 54,480-te a ding in kha khat in antang Kg 13,62,000 poimoh a, AAY Household leh Pri­ority Household-te a dia poimoh zah a kigawm in Kg 15,66,225 (15662.25 quintals) pha hi.

 

Ccpur district sung ah AAY Household 5,835 om a, innkuan khat a ding in kha khat in antang Kg 35 zel piak hileh antang Kg 2,04,225 poimoh ding hi. Ccpur AC sung a AAY Household 3,515- te a ding in kha khat in antang Kg 1,23,025 po­imoh a; Henglep AC sung a AAY Household 754-te a ding in kha khat in an­tang Kg 26,390 poimoh a; Tipaimukh AC sung a AAY Household 541-te a ding in kha khat in an­tang Kg 18,935 poimoh a; Singngat AC sung a AAY Household 579-te a ding in kha khat in antang Kg 20,265 poimoh a; Thanlon AC sung a AAY Household 446-te a ding in kha khat in antang Kg 15,610 poimoh hi.

 

Ccpur district sung a Priority Household 54,480 om a, kha khat in inn kuan khat a mi 5 kiang a antang Kg 5 zel piak hileh kha khat in antang Kg 13,62,000 po­imoh ding hi. Ccpur AC sung a Priority House­hold 33,529-te a ding in kha khat in antang Kg 8,38,225 poimoh a; Henglep AC sung a Pri­ority Household 5,747- te a ding in kha khat in antang Kg 1,43,675 po­imoh a; Tipaimukh AC sung a Priority House­hold 5,703-te a ding in kha khat in antang Kg 1,42,575 poimoh a; Singngat AC sung a Pri­ority Household 4,867- te a ding in kha khat in antang Kg 1,21,675 poimoh a; Thanlon AC sung a Priority House­hold 4,634-te a ding in kha khat in antang Kg 1,15,850 poimoh hi.

 

 

Kipahpihna hun zang

LAMKA, April 25: Bengaon Mayai Com­munity Hall ah April 23, 2017 in Young Stars Club, Bengaon Maning Awang ah piles leh fes­tula natna toh kisai a herbal physician Kabiraj Md Jay Khan kipahpi­hna hun zang uhi. Hiai hun ah All Manipur Arts & Culture and Sports Development Society in kipahpihna in award pia uhi.

 

 

Raja Goukhothang’ Statue hongkhe ding

LAMKA, April 25: Hongtung ding April 29, 2017 (Kiginni) sunma dak 10 in G Tonjang khua ah Pauminthang Guite, Guite Innpipa in Raja Goukho­thang Guite’ statue hong­khe ding a, Upa Thangchin­lian Guite, Sr Adviser, Guite Innpi in Pathian min in laan ding hi.

 

Upa Henkholun Doungel, Chief of Saihen­jang in thumna in hiai hun pan ding a, Thang­khosei Guite, Chief of Tonjang makaih in Raja Goukhothang Guite sun­na om ding a, tua zoh in zahna pak piakna in zui ding hi.

 

Hiai hun ah Guite In­npipa; Guite Innpi Chief Adviser; Doungel Innpi; Kipgen Innpi; Haokip In­npi; Sitlhou Innpi; Chon­gloi-Hangshing Innpi; Khuptong-Valte Innpi; Tonsing Innpi; Ngaihte Innpi; Hmar Innpui; Vai­phei Innpi; Gangte Innpi; Zou Innpi leh Hangmi Innpi a pan makaite’n thugen ding ua, Lang­khanpau Guite in kip­ahthu gen in Rev Jangk­holam Doungel, Chief of Kotsohoi in thumna in hunkhak ding hi.

 

 

Bank A/C leh Aadhar zoptuahna ding hun bikhiah omlou

LAMKA, April 25: Bank Account neiteng in Aadhaar Number toh zoptuah ding chih leh April 30, 2017 tan a hih felloute Bank Account hentangsak hiding chih thuthang om ziak in tu­lai in Lamka khopi sung a Bank tuamtuam omte lunthei mahmah uh hi’n thutut kingah hi. Hiai toh kisai in SBI/Ccpur branch a semte’n Know Your Customer (KYC) form a hawmkhiak sen­glouh hun uh leng om hi’n thutut kingah hi.

 

Bank Account leh Aadhar number zop­tuahna ding pen Govern­ment deihdan himahleh hiai toh kisai a hun bikh­iah bawl a omlam theih hilou hi’n Bank official-te’n gen uhi. Huai ban ah April 30, 2017 tan a Bank Account leh Aadhaar number zoptuah ding chih thu official omlam theih ahihlouh ban ah hiai pen ut hunhun leh mahni lemchan bang a hihtheih hizaw hi’n gen uhi.

 

Huai ban ah Bank Ac­count leh Aadhar number zoptuahna ding toh kisai in Aadhaar Card zang a Bank Account hongte a dia poimoh nawnlou leh kizomtuah khin ahihman in awlmoh ding om nawn­lou ahihdan leh Bank offi­cial-te’n gen uhi.

 

 

DSE ah admission kihong lel

LAMKA, April 25: Diploma in Special Education (Deaf/ Blind)/ DSE (Db) sin utte a ding in Hel­en Keller Institute for Deaf and Deaf­blind, Mumbai leh Clark School for the Deaf, Chennai ah admission kihong lel hi. Hiai course sinna ding in class XII zoh ngai hi. DSE (Db) ahihleh kum 2 course hi a, Rehabilitation Council of India in a recognised ahi. Lunglutna neite’n Centre for Community Initiative Office, Nehru Marg ah thuchian kantheih ding hi.

 

 

Menchim in Mizoram leh mun­dangte kikawmtuahna khaktan

Aizawl, April 25: Nipikal paita a akipan tats­atlou a vuah nasatak a zuk det ziak a menchim in Na­tional Highway 54 a khak­tan ziak in, zan Seppatni a kipan gamsung mundan­gte toh kikawmtuah thei­lou in Mizoram khaktan in om chi’n Mizoram Di­saster Management and Rehabilitation Director C Lalpeksanga in gen hi.

 

Mizoram state simlam bial leh state khopi Aizawl khopi sung mun tuamtuam ah menchim om hi. Vuah zuk ziak a telephone line-te a kitan ziak in, mun tamtak ah telecommunication sys­tem sukbuai in om chi’n Lalpeksanga in gen hi. A paisa Pathianni a kipan in Hunthar Veng a kipan in mun bitzaw ah inkuan 22te hepkhiak in om uhi. Pathianni in Aizawl ah sawng 3 nei building khat kichim hi.

 

 

 

 

 

 

NEWS TOMKIM

 

ADCC Chairman office renovation bawl ding

LAMKA, April 25: Ccpur Autonomous District Council Chairman, Vice Chairman leh EM kilepthakna om toh kiton in Tuibong a ADCC Chairman leh Vice Chairman office renovation bawl hiding leh Vice Chairman Room leng partition bawlthak hiding hi. ADCC Chairman leh Vice Chairman thak in office chamber-te renovation bawlzoh ahih chiang in luah ding uhi.

 

 

E-Waste Management workshop om ding

IMPHAL, April 25: National Institute of Electronics and Information Technology (NIELIT), Imphal, Ccpur Extension saina in hongtung ding May 1-5, 2017 sung in Govt employee-te a ding in ‘5 Day Awareness Workshop on E-Waste Management’ om ding hi. May 1, 2017 sunma dak 10:30 in R Sudhan, IAS, DC/Ccpur in workshop hongkhe ding hi.

 

 

VDF in theihsakna bawl

LAMKA, April 25: CDVDFWA sung a VDF personnel-te lak a MGEL toh kisai a buaina neite’n April 27, 2017 sunma dak 9 a kipan sun dak 12 kikal in SP/Ccpur office, Reserve Line ah VDF makaite toh MGEL tungtang hihveng theih ding hi. Hiai hun kipia tan a ngaihsaklou a om leh a khonung a kuamah mohsa theilou ding uh hidan in Jt Secy., CDVDFWA in theihsakna bawl hi.

 

 

Mualnuam SDO/Hq ah MLA lawm ding

LAMKA, April 25: Mualnuam SDO/Hq., Mualnuam khua ah April 27, 2017 chiang in 56-Thanlon AC a pan BJP ticket a telching a om Vungzagin Valte, MLA leh Chairman, MTDC kipahpihna programme om ding uhi. Huai ding toh kisai in tuni’n Imphal a pan in Lamka ah Vungzagin Valte hong giaklut a, zingchiang in Mualnuam zuan ding hi.

 

 

SUNNA:

 

Dimneineng w/o Pastor Sehlal Singson of Bethel, Ccpur, zan nitak dak 6 vel in si a, tuni’n kivui hi. RIP.

 

Ningngaihvung (58) of Ngente, Tedim Township, zan, April 24 in cancer ziak in si a, tuni’n kivui hi. RIP.

 

Khaitinpau Khaute f/o Haumuan Khaute of Saipum, damlouhna ziak in tuni, April 25 nitaklam dak 4 vel in si a, zingchiang in kivui ding hi. RIP.

 

 

 

 

 

 

…for more detail : here