You are here: HomeRSS FeedsThe Lamka Post

The Lamka Post | March 29, 2017

Wednesday, 29 March 2017 07:42

Governor leh CM in state mipite Cheiroaba festival chibai buk

Imphal, March 28: Manipur Governor Na­jma Heptula leh Chief Minister Nongthombam Biren Singh in state mip­ite kiang ah, zingchiang Nilaini a zat ding “Sajibu Nongma Panba Cheirao­ba” festival –Manipur New Year hunbi a tun toh kiton in, deihsakna chibai buk uhi.

 

Governor in state mipite kiang ah, “Sajibu Nongma Panba Cheirao­ba – Manipur New Year hunbi, state a lemna leh muanna midangte tung a suklatna ding a zang chiat ding in a deihsakna thu khak hi. State sung a nam tuamtuam teng­khawmte lak a kizopna omte suse thei ding thil­tung tamtak i maituah khinta ua, himahleh Manipur mipite’n a pi­chinna uh langsak in lemna leh muanna kem­bit in hiamgamna taw­psan ding in panlatou den uh chi’n Governor in gen hi. Tu kum a Sajibu Cheiraoba festival zatna tungtawn a kibatlouhna omte koihkhia a Mani­pur hoihzawkna ding a kalsuan khawm ding leh tup kibang nei a nasem­khawm ding a panla ding inleng ngen hi. State sung a teng nam tengteng kiang ah, chi-le-nam, beh-le-phung, pau-le-ham ban ah sahkhua a kideidanna neilou a, unau bang a khosak khawmna ding a, lawmta hihna hatsak sem ding inleng ngen hi.

 

Chief Minister N Bi­ren inleng a thuchahna ah, Sajibu Nongma Pan­ba Festival in Manipu­ri-te Kum Thak hunbi puangzak a, sahkhua vai leh kipahna bukimtak toh hiai hunbi lop a om zel hidan in gen hi. Festival in a bik in, inkuan chih a member-te lak leh a tang­pi in khosak khawmpih midang lak ah ki-itna leh unauna hatsak sem chi’n gen hi. Festival in eite tung ah hinkhua siangth­outak nei ding a hon thei­sak thak ahi chi’n gen hi. Festival in kipahna, nop­sakna a hon tut ngei ding ban ah state mipi teng­teng tung a muanna toh khosakhawm zel ding a naktak a hon panpih ngei ding ahi chi’n a lam et thu leng gen hi.

 

 

Assembly constituency 8 a voter-te’n parliamen­tary election a tuh ding uh phalsak hilou

Imphal, March 29: Khovel pumpi a democ­racy lianpen hidan a theih a om India ah tuni­tan in Manipur state as­sembly constituency 8 a voter-te a ding in parlia­mentary election tuhthei­hna democratic right piak a om nelhsiahsak in om denlai hi. Parliament member ding telna ah bel vote a khiak ding uh phalsak himahleh MP election a tuh ding uh phalsak ding a ngetnate ninbawm ah paihsak in omtou denlai hi.

 

Assembly constitu­ency 8 – Khangabok, Wangjing-Tentha, Heirok, Wabagai, Kakching, Hi­yanglam leh Outer Mani­pur Assembly a om Sugnu area-te Scheduled tribe candidate a ding in koih­sak in om a, hiai constit­uency-te a voter-te’n vote khethei mahle uh Parlia­mentary election a tuh ding uh phalsak hilou uhi.

 

Kum 2002 a kibawlkhia committee khat Thoubal District MP Candidature De­mand Committee in De­limitation Commission kiang ah constituency khatpeuh a kipan khua-le-tuite’n parliamentary election a tuhtheihna ding ua, Inner Manipur Parliamentary constitu­ency a assembly constit­uenciy 8te guanlut ding in ngetna memorandum pia uhi. Kum 2003 in­leng State Assembly in thupukna khat passed a, delimitation committee in assembly constituency 8te Inner Manipur Par­liamentary constituency a guanlut ding lemsakpi­hna pia uhi. Hiai thu ziak mah in, April 21, 2003 in Jantar Mantar, New Delhi ah kiphinna nei ua, hiai nung in Delimi­tation Committee chair­man Justice (Retd) Kul­dip Singh kimuhpih in, thilnget a neihte uh toh kisai theisak uhi.

 

Tuni a Manipur Press Club, Imphal a Joint Non-Government Voluntary Organization advisor P Somerendro Singh in a gendan in, assembly constituency 8 a voter-te tung a demo­cratic right zatkhiaksak a hihma teng, state gov­ernment in assembly constituency 8 a kipan Rajya Sabha MP ding a telkhiak ding ahi chi’n gen hi. Assembly constit­uency mipite tung a thu­dik a thukhenna piakkh­iak ahihkeileh mipite dai maimailou ding uh hi’n leng gen hi.

 

 

Niangkhanching omna kitheilou

LAMKA, Mar 28: Niangkhanching (60) m/o Thangkhansuan of Elim Veng, New Lamka, zan, March 27 zingkal­lam dak 7:30 vel a inn a pan pawtkhia inn a tunkik nawnlouh ziak in zan nitak a pan in a innkuanpihte’n mun tua­mtuam zong uhi. Aman highneck piansim a hing (green) silh a, lungsim veng chiahlou hi’n thutut kingah hi. Amah ahihleh hiai thu gelh ahihtan a muh ahihlam theih ahi­hlouhman in a omna theikha leh mukhate’n Elim Veng YPA makaite ahihkeileh mobile number 9856211981 & 9089739515 tungtawn a theisak ding in ngen uhi.

 

Niangkhanchiang ahihleh zingchiang, March 29, 2017 in Zou Youth Organisaition GHQ leh Young Paite Assn (YPA) New Lamka Block makaih in mipi’n zonna nei ding uhi.

 

 

JAC makaih in Public Consultation Meeting nei

LAMKA, Mar 28: Joint Action Committee Against Anti-Tribals Bills (JAC) makaih in tuni, March 28, 2017 sunma dak 11:00 in YPA-GHQ Hall, Hiangtam Lamka, Lamka ah Public Consul­tation Meeting om hi.

 

Hiai hun ah Mod­erator in Paul Lalchhan­hima, Secretary, JAC leh Thangzamang pang ua, Pastor H Jamkhanpau in thumna a hun pan in H Mangchinkhup, Chief Convenor, JAC in key­note address gen hi. Tuni a Public Consultation Meeting a thupuknate ahihleh hiai bang ahi.

 

JAC in tuni a con­sultation neih a om leh hun paisa a hiai bang a tribal pawlpi tuamtua­mte toh consultation ana neihnate a pan ngaihdan leh deihdan piakkhawm a omte lakhawm in en­chian ding a, huaite a pan in JAC in ‘Charter of De­mands’ bawl in Govern­ment of Manipur ah pe ding hi.

 

Mipi paikhawmte’n singtangmite suahtakna ding a ni 575 val Tribal Movement ana makaih JAC tung ah kipahthu gen ua, huai toh kiton in tulel a movement pailel tungtawn a kilemna bawl ahihma tan mipi makaih a panla ding in a thak in JAC gupna leh kithuahpihna pia in nam­kip thak uhi.

 

 

Postal staff-te’n pay commission zatkhiak ding ngen in kiphinna nei

Imphal, March 28: All India Gramin Dak Sevak Union (AIGDSU) in bawllem thak ding a, a thilnget a neihte tel in, Gramin Dak Sevak (GDS) committee in lemsak­pihna a piak tengteng zatkhiak ding phut in, tuni Sepnawnni in All India Gramin Dak Sevak Union, Manipur Division, N.E. Circle in Imphal Head Post Office, Babu­para, Imphal ah one-day sit-in-protest nei uhi.

 

AIGDSU, Mani­pur Division President W Ibohalbi in thuthak­saite kiang a, a gendan in, January 2016 a kipan zatkhiak a om pay com­mission toh kisai tuni tan a AIGDSU, Manipur Di­vision a ding a zatkhiak a hih nailouh ziak in, union in commission report zat­khiak ding phut in kiphi­na nei chi’n gen hi.

 

Ibohalbi in a genzelna ah, pay commission chair­man in state government tung ah pay commission zangkhe ding in lemsakpi­hna pekhin mahleh van­gtahhuaitak in, pay com­mission lemsakpihna bawl toh kisai sukneuna ding a review committee bawlkh­ia in, pay commission zat­khiak ding zekaisak a om den hidan in gen hi.

 

Tuni a kiphinna nei­hna hun ah Gramin Dak Sevak employee-te leh departmental employee-te kihel uhi. Union in a kisaipihte kiang ah, sem­tu tengteng a kibang a en vek ding inleng ngen uhi. Pay commission lemsak­pihna bawl zatkhiaklouh a om deihlouh lahna in, tuni’n gamsung pumpi ah Gramin Dak Sevak Com­mittee inleng sit-in-pro­test nei uhi.

 

 

ADCC Chairman leh Flying Squad Team in Exam Centre pha

LAMKA, Mar 28: BSEM nuai a High School Leaving Certificate (HSLC) Examination 2017 pailel tuni, March 28, 2017 sunma dak 9 in sutzop in om hi. Exam ahihleh a paisa March 17 in kipan a, Lamka ah Exam Centre nih zat in om a, Main Exam Cen­tre, Ebenezer Academy, New Lamka ah Regular candidate 1,131 leh Sub- Centre Don Bosco Hr Sec School, Salem Veng ah Regular candidate 1,569 leh External candidate 28 kigawm candidate 1,597 exam uhi. HSLC Exam pailel toh kisai in tuni’n ADCC Chairman Langkhanpau Guite leh Imphal a pan in Rani Devi makaih Flying Squard Team member 5 in Lamka a HSLC Exam Centre-te hong enkhia uhi. Hiai hun ah Flying Squard Team-te’n Mani­pur a HSLC Exam Centre teng lak a Lamka a Exam Centre-te siangthou pen ahihdan gen uhi.

 

Lamka a HSLC Exam Centre a Supervising Officer H. Thangdam; T. Hanglamthang, OC; Pumshong Hangshing AOC (Conf); M. Chaoba Stanley, AOC (Hq), SI leh Invigilator-te’n exam siangthoutak a neih ahih­na dia pan a laknate tung uah ADCC Chairman in Ccpur district mipite sik-le-tang in kipahthu gen hi.

 

Tuni a HSCL Exam ah Sceince exam ua, Cc­pur Private Centre nih a pan candidate 2810 exam ua, 35 absent uhi. HSLC Exam ahihleh March 30 in sunzom nawn ding ua, huai ah MIL/Alternative English exam ding uhi.

 

 

Khuga Flood Victim-te’n DC ah ngetna pia

LAMKA, Mar 28: Tuni, March 28 sunma in Nengthong Veng, Meitei Christian Leikai, Naza­reth Veng, Kerith Veng leh Vungkhanthang Veng a pan inn 100 kigawm Eastern Khuga River Flood Victim Committee in tuilian ziak a haksatna a tuahna uh toh kisai in DC/Ccpur khut ah Joint Memorandum pia uhi.

 

Eastern Khuga River Flood Victim Committee in DC/Ccpur kiang a ngetna a piakna ah, Khuga River nawl Zoumunuam lampang ah protection/retaining wall bawl himahleh langkhat lampang bawl hilou ahih­man in vuahzuk lam chi­ang a protection/retain­ing wall bawllouhna lam ah tuilian thuak a, tenna inn-le-lou ban ah van tamtam mansuah gige uh ahihdan theisak uhi. Hiai bang a mipite haksatna theihsiampih a Eastern Khuga River Flood Vic­tim Committee ngetna bang a protection/retain­ing wall bawlsak ding in ngen uhi.

 

Hiai toh kisai DC/ Ccpur inleng ngaikhawk mahmah in, ngetna piak ahihnung a, hiai mun lak va enkhe ngal hi’n leng thutut kingah hi.

 

 

Manipur CM in titular King tung a zahna a piak in, tamtakte pahtak loh

Imphal, March 28: Chief Minister N. Biren in Manipur titular King tung a zahna sangpen pia a, ki­saikhakpihna a neihna in, tamtakte a kipan in phat­na ngah hi.

 

BJP thupuangtu RK Sivachandra in Facebook post khat ah, N Biren in Manipur Chief Minister 12na ding ding a kichiam­na a neihzoh phet a, Royal Palace veh a Manipur titular King tung a zahna sangtak a piak in, tawndan a manphatna omte toh ki­sai a, lungpichingtak a nei­hna in, thu tamtak genkhia chi’n gelh hi. Thailand, Cambodia, Nepal gamte’n leng hichibang chindan kibang neivek ua, Royal diknate lah manphatnate nenniam naksang in, a hoihtheipen ding in hatsak sem uh chi’n gelh hi. Chief Minister N Biren Singh kichi North Eastern Circle kia himailou in, Asia bial a maban muhkholna hoi­htak nei, Manipur a taw­ndan leh zung khakkhiak a omte phoulangtu Chief Minister hong hitou den ding ahi chi’n leng gelh hi.

 

 

Old Age Pension Red & Blue Card sum hawm ding

LAMKA, Mar 28: District Social Welfare Office, Ccpur ah hon­gtung ding March 30, 2017 a pan in Indira Gandhi National Old Age Pension(IGNOAP) Scheme nuai a Red & Blue Card neite a ding in kha 5 a ding sum hawm­na sunma dak 10:30 a ki­pan sunnung dak 3 kikal in om ding hi.

 

Old Age Pension sum ahihleh April 2015 a kip­an August 2015 kikal a hi a, pensioner-te mah in a lak uh ngai ding leh sum lak nanungpen a sum lakna ‘Receipt’ a tawi uh ngai ding hi. Pensioner-te lak a mimal a pai theilou dingte’n DSWO/Ccpur kiang a ngetna a piak uh ngai ding leh huai nget­nate vetchetna (verifica­tion) bawl hilai ding hi’n DSWO/Ccpur in theih­sakna bawl hi. IGNOAP sum hawm dingdan ahi­hleh hiai bang ahi.

 

Ccpur AC: March 30, 2017 in 1/95/CCP - 400/CCP/2L kikal leh 1/ IGNOAP/CCP a kipan 300/IGNOAP/CCP kikal hawm hiding a, March 31, 2017 in 401/CCP/2K a kipan 800/CCP/04 kikal leh 301/IGNOAP/CCP a kipan 750/IGNOAP/ CCP kikal hawm hiding hi. April 1, 2017 in 801/ CCP/2K a kipan 1600/ CCP/04 kikal leh 751/ IGNOAP/CCP a kipan 1100/IGNOAP/CCP kikal hawm hiding hi. April 3, 2017 in 1601/CCP/2K a kipan 2000/CCP/04 ki­kal leh 1101/IGNOAP/ CCP a kipan 1500/IG­NOAP/CCP kikal hawm hiding a, April 4, 2017 in 2001/CCP/2K a kipan 2311CCP/04 kikal leh 1501/IGNOAP/CCP a ki­pan 1700/IGNOAP/CCP kikal hawm hiding hi.

 

S a m u l a m l a n Block: April 5, 2017 in 1/96/SML a kipan 213/ SML/09 kikal leh 1/ IGNOAP/SML a kipan 120/IGNOAP/SML kikal hawm hiding hi.

 

Singngat AC: April 6, 2017 in 1/96/SGT a kipan 500/SGT/09 kikal leh 1/IGNOAP/SGT a ki­pan 551/IGNOAP/SGT kikal hawm hiding hi.

 

Henglep AC: April 7, 2017 in 1/96/HLP a kipan 450/HLP/09 kikal leh 1/IGNOAP/HLP a ki­pan 420/IGNOAP/HLP kikal hawm hiding hi.

 

Thanlon AC: April 11, 2017 in 1/96/TLN a kipan 500/TLN/09 ki­kal leh 1/OGNOAP/TLN a kipan 405/IGNOAP/ TLN kikal hawm hiding hi.

 

Tipaimukh AC: April 12, 2017 in 1/95/ TPM a kipan 502/ TPM/09 kikal leh 1/ IGNOAP/TPM a kipan 416/IGNOAP/TPM kikal hawm hiding hi.

 

 

YPA-GHQ in YPA Lamka Block seh 2 in khen

LAMKA, Mar 28: March 23, 2017 a Central Executive Committee, Young Paite Assan., GHQ meeting thupukna dung­zui leh YPA Ki-ukna Dan Bupi 2015 Part II, Article No.5(vi) pansan in YPA-GHQ in YPA nasepna leh kalsuanna hoihzaw leh lamzang zaw ding ngim­na in YPA Lamka Block pen block nih - Lamka Block leh Lanva Block in sehkhen hi.

 

Huai dungzui in YPA Lamka block nuai ah Lamka unit, Central Lamka, Zenhang Lamka, Tuithapi, Saikul, G. Mon­glian, B. Kaljang, Head­quarter Veng leh D. Pha­lian unit om ding hi.

 

YPA Lanva Block nuai ah Bungmual, Pearson­mun, G. Mualkawi, Mis­sion Compound, Takvom, Mata, Mualpi, Lanva leh Tangnuam unit om ding hi.

 

Huai ban ah YPA Lamka Block office mun ding in Hiangtam Lamka hiding a, YPA Lanva Block office mun ding in G. Mualkawi hiding a, block nih a makai ding leng May 2017 sung a bawlfel hiding hi’n YPA-GHQ thusuak in taklang hi.

 

 

TCP-te’n gari check sunzom

LAMKA, Mar 28: Tuni sunma dak 11 in Cc­pur Traffic Police team in Tuibong Peace Ground ah gari check ua, gari lai neilou a gari taite leh gari pei nihnei hek helmet khulou mi 36 val mankh­ia ua, TR cut in liausak uhi.

 

 

Tenna inn kang

AIZAWL, Mar 28: Tunitaklam dak 3:30 vel in Lunglei Chanmanri biakinn kiang a teng Upa Thanchungnunga tenna inn kang hi.

 

Innkang kipatna ziak theih hilou a, van a kang siate leng theihtheih hi­lou hi. Meikang a nasat­luat ziak in a phelhna lam haksa mahmah ahihdan thusuak zak in om hi.

 

 

Prez in Dr. B. C. Roy National Awards, Hari Om Ashram Alembic Research Awards pekhia

New Delhi, March 28: Tuni Sepnawnni in Presi­dent Pranab Mukherjee in Rashtrapati Bhavan a program zatna hun ah Dr. B. C. Roy National Awards leh Hari Om Ash­ram Alembic Research Awards pekhia hi. Kum 2014, 2015 leh 2-16 ading in physician 49 in Dr B C Roy award sang ua, phy­sician 4 in Hari Om Ash­ram Alembic Research Awards ngah uhi.

 

 

IFCD Minister team-te’n Waisel Maril canal enkhia

Imphal, March 28: Tuni Sepnawnni zing lam in IFCD Minister Letpao Haokip, Health Minister Langpoklakpam Jayentakumar leh IFCD Department Chief Engi­neer makaih team-te’n Keishamthong Assem­bly Constituency nuai a Waishel Maril area a mun khenkhat etkhiakna va nei uhi.

 

IFCD Minister Let­pao Haokip makaih team-te’n Waishel Maril area mipite kiang ah, state a tukvuah a zuk ma ngei a tuilam(canal) hahsiang vek ding uh hi­dan in thuchiam bawl uhi. IFCD department in tukvuah zuk ma ngei in Waisel Maril hahsian­gvek ding chi a thuchiam pekawm a IFCD Minis­ter in a gendan in, IMC toh pangkhawm in nasep hoihzaw lai ding a, a kul leh poimoh ding gari li­ante JCB leh a dangdan­gte IFCD lamte a zat hid­ing chi’n gen hi.

 

IFCD Chief Engineer G Robindro Sharma in a gendan in, Waishel Maril puahthakna leh bawlna nasepte a laklak in neih himahleh MAHUD nuai ah na lianzawte sepkhiak in om chi’n gen hi. Depart­ment dang in a sepsate tuk vuah a zuk hun a tuilian a tunchiang in IFCD in a moh teng khuvek zel chi’n gen hi. Robindro in BJP Government thak kiang ah, Waisel Maril work leh a dangdangte IFCD khut a pekhe ding in ngen hi. Team-te’n Keishamthong Hodam Leirak a kipan north Nganappi Thong tan canal vel suak uhi.

 

 

District Child Protection Committee meeting neih in om

AIZAWL, Mar 28: Zan Seppatni in DC Con­ference Hall, Mamit ah District Child Protection Committee in meeting neih in om a, Additional DC, H. Lianzela makai­hna nuai ah Mamit Dis­trict sung a naupang dik­na leh tanvou humbitna ding a panlakna tuamtu­amte enkhawm in kihou­na nei uhi.

 

Meeting na ah Dr. R.Lalrinhlua, DCPO in 2017 sung a case omte report pia a, 2012-2017 sung a case omte teng­teng tehkakna neih in om hi. Kumteng in cse pungtou zel a, naupang etkol leh venbit ding a pun ban ah, dan kalh a gamtang mi a pun zel thu gen hi. POCSO case tungtang a genna ah, DCPO ahihleh naupang­te panpihtu, a bitna ding uh a zonna ding uh ahi chi hi. Numei-pasal kal a tuahsiatna ana tuakte a kibehlap zel thu gen in, mipite pilvan a poimoh thu gen a, ban ah hichi bang case tuamtuam a haksatna tuak naupang­te panpih ding a mansa a om gige uh ahihdan leng gen hi.

 

Mamit District ah ahihleh Child Care Insti­tution 4 omta a, Home a naupang koih dingte’n Child Welfare Commit­tee (CWC) leh Juvenile Justice Board (JJB) theihpihna toh koih ding in ngen a, hiai pawl 2-te theihpihna tellou a Home a mahni utthu a koih phal nawnlouh ahi­hdan leng taklang hi.

 

Meeting ah nikum 2016 a kipan naupang tung a kilawmlou tak a gamtang leh dan kalh a gamtatna tung a hak­satna nei leh dotna bawl utte a ding in dakkal 24 sung child line no 7085057230 ah dot theih gige ahihdan thu taklat in om hi. Tulel in Shelter Home CPD-ICPS ah nau­pang 25 om a, Little An­gel Childrens Home ah naupang 5 etkol in om lel uhi. Observation Home ah naupang dan kalh a gamtang 15 leh Special Home ah naupang 1 et­kol lel in om hi.

 

District sung a RD Block 3 leh Mamit khua leh a sehvel a DEO leh SDEO panlakna in Child Protection Nodal Teach­er-te a ding in training program lohching tak a neih zel hi a, mi 278 lak ah 225-te training piak in omta uhi.

 

Meeting na ah com­mittee member CMO, DEO, Adll SP ban ah President Sub Hqtrs. YMA-te leng tel uhi.

 

 

Mizoram CM in NLUP Auto Rickshaw flag off na nei

AIZAWL, Mar 28: Tuni a NLUP 4th Phase nuai a Commerce & In­dustries Department in NLUP hamphatpih mi 85-te kiang ah auto rick­shaw piakkhiakna Vana­pa Hall, Aizawl kong ah nei ua, hiai hun Mizoram Chief Minister, Lal Than­hawla in uap hi.

 

Hiai hunzatna ah Chief Minister, Lal Thanhawla leh Home Minister leh NLUP Nod­al Minister hihna len, R. Lalzirliana te’n auto 85- te flag off na nei uhi.

 

Chief Minister leh NLUP Apex Board Chairman, Lal Thanhaw­la in Solkal Flagship pro­gramme NLUP phattu­ampih mi tampi a om zel pen kipahhuai ahihdan gen in, ginomna, dikna, taihmakna leh Pathian lauhna toh pang a, ham­phatna tangte’n phattu­ampih mahmah ua, nek­zonna kong tuamtuam ah Mizoram dung leh vai ah ki zalh suak in, hiai mi lohchingte leh mi taima te’n Mizo min tawisang uh ahi chi hi. Himahleh, a diklou zawng a gam­tangte a ding in, panpih theih hi nawnlou uh chi hi. Huai ban ah solkal in programme thak New Economic Development Programme (NEDP) pan ding ahihdan leng gen hi. Mahni khe a ding thei ding in, solkal in NLUP zang a hih theih tawp suah ahihdan gen in leh, mahni ki panpih saw­mte ahihleh Pathian in panpih zel a, himahleh thil ginatak a hih pei­hlou a lohsamte kiang a mohpuakna neilou ahih­dan leng gen hi.

 

Auto Rickshaw Trade tungtang a genna ah, Chief Minister in hiai trade ahihleh trade lo­hching pawltak hi a, nek­zonna ding in zattheih ngal a, mi taima leh gim­tak sem khenkhat in auto zang a, a sepgah ua pan taxi lei in, a lohchinna uh hihpung zel uh chi hi.

 

Tutung a NLUP hamphatpih a, auto rickshaw dongte lohch­ing ding a, a deihsakthu khak a, a sungkuan din­mun uh bawlhoih a, nek­zonna muhna khel lam a, khotang a poimohtu leh khotang a dia vualzawlna hi ding in leh midangte a dia etton tak ahihtheihna ding ua panla chiat ding in ngen hi.

 

Tuni a NLUP 4th Phase nuai a, Commerce & Industries Department in Auto Rickshaw hawm­khiakna neih na ah, Commerce & Industries Department, Director, J. Hmingthanmawia in Technical Report pia hi.

 

Hiai programme ah Finance Minister Lalsawta, Industries & Commerce Minister H. Rohluna, Sericul­ture Minister Dr. B. D. Chakma, Deputy Chief Whip R.L Pianmawia, Parliamentary Secretary Hmingdailova Khiangte leh Joseph Lalhimpuia-te ban ah MLA bang zah­hiamte leng kihel uhi.

 

Tuni a NLUP ham­phatpih mi 85-te ahihleh District 6 a Cluster tua­mtuam a kipan mite hi ua, Aizawl District a kip­an 23; Lunglei District a kipan 27; Champhai Dis­trict a kipan 17; Kolasib District a kipan 8; Ser­chhip District a kipan 8 leh Saiha District a kipan 2 hi uhi. Auto Rickhaw Trade 4th Phase benefi­ciaries 109 om a, 85 in a don zoh nung un mi 24 in donglou ua, hiaite ahi­hleh sawtlou chik nung a Auto piak ahihtheihna ding ua panlakna pai lel­lel hi.

 

Auto Rickshaw 1 Rs. 1,22,000 hi a, TVS Com­pany in a bawl, TVS King Model, 4 stroke, 199.26 cc ahi hi.

 

Mizoram Sawrkar Flagship programme NLUP a Industries Sec­tor nuai ah main trade 24 leh minor trade 40 koih hi a, NLUP Phase tuamtuam nuai ah tulel in beneficiaries 26914 omlel hi.

 

 

 

 

NEWS TOMKIM

 

TO in Bill 130 val pass

LAMKA, Mar 28: Finance Dept., Govt of Manipur in zan a pan paybill leh bill dangte pass theih ding a ‘ban’ a khahkol toh kiton in tuni’n Ccpur District Treasury Office in bill tuamtuam 130 val passed in Bank ah thon uhi. Tuni a bill passed a omte lak a fund omlouh ziak a kha paisa, February khaloh ding bill pass theihlouh a om khenkhat leng tel hi.

 

 

DC’n Henglep pha ding

LAMKA, Mar 28: R. Sudhan, IAS, DC/Ccpur in hongtung ding April 3, 2017 chiang in Henglep Block Hq pha ding a, huai ah RAMSA nuai a Girls Hostel kibawl lel a mun mahmah ah va enkhe ding hi’n thutut kingah hi.

 

 

Police-te’n Kingston School khaksak

LAMKA, Mar 28: Kawite khua a om Kingstone School in court case a neih ziak in tuni sunnung dak 3:30 vel in court order pansan in police-te’n va khaksak uh hi’n Police a pan thutut kingah hi. Kingstone School ah Class X tan om a, tu kum inleng student 600 vel om a, hiai bang a school khaksak a om ziak in hiai school a kai student-te nu-le-pate lungbuai mahmah uhi.

 

 

Office suty ding

LAMKA, Mar 28: Zingchiang, March 29, Nilaini pen Cheiraoba ahih ziak in Manipur Govt nuai a office leh institution teng suty ding uhi.

 

 

Accident a si mi 2 luang Lamka hongtung

LAMKA, Mar 28: Zan, March 27 sunnung dak 12:30 vel a Tamenglong district sung Nungba Police Station nuai a Khongshang kiang NH-37 a pai passenger pua Winger/ Cruiser tuahsia a site lak a telkha mi 2-te luang tuni’n Lamka puaktung in om hi. Amaute ahihleh T Lian John Simte s/o Pumkhopau @ Pauphawh of Khuangnung Village, tulel a V. Munhoih, New Lamka a om leh Pauzamung s/o (L) M. Langgoukap of New Lamka (G) hi ua, a luang uh tuni mah a vui in om hi.

 

 

DI of School len ding

LAMKA, Mar 27: CEO/ADCC in Chairman ADCC deihna bang in tunai zek in CEO/ ADCC nuai a DI of School lenlelte circle heikual in om a, huai lak ah zan issue a suahkhaklouh Kamkhogin in Tipaimukh Block ah DI of School len ding hi.

 

SUNNA:

Sonlalpiaklian b/o T. Thangliansiam of V. Munhoih, Vengnuam, New Lamka, tuni’n si a, tuni mah in New Lamka YPA hanmual ah kivui hi. RIP.

 

 

 

 

 

 

 

 

…for more detail : here