You are here: HomeRSS FeedsThe Lamka Post

The Lamka Post | July 22, 2017

Saturday, 22 July 2017 08:20

Tripartite talks hun ding suan gamlat hinawn

SENAPATI, JULY 21: United Naga Council (UNC)-te tung a thang­paihna behlapsaktu hid­ing in, district bawlna thubuai toh kisai a ‘tri­partite talks’ hun ding suan gamlat in om nawn hi.

 

Zingchiang Kiginni a Senapati district head­quarters a United Naga Council (UNC), Central Government leh State Government of Manipur-te’n ‘political level’ a tri­partite talks nei ding uh chih himahleh Ministry of Home Affairs (MHA) in UNC makaite kiang ah kha nawn bullam a talks neih ding in hehpihna toh ngen uhi.

 

Ministry of Home Af­fairs (MHA),Government of India Joint Secretary Satyendra Garg in a gen­dan in, Manipur State Government in MHA ki­ang ah kihouna neih ni ding July 22(Kiginni) hi­lou in July 23(Pathianni) hitheileh chi’n ngen hi. Satyendra Garg in a gen­dan in, tripartite talks a tel ding cabinet minister-te’n Kiginni a Manipur Legislative Assembly ses­sion pailel taikan theilou ding uh hidan in Manipur State Government in tak­lang chi’n gen hi. UNC in Pathianni a kihouna neih ding tanpha pom­pih khin mahleh Pathi­anni a kihouna nei ding a Manipur State Govern­ment thusun in tripartite talks a tel ding Ministry of Home Affairs (MHA) official-te tung a lemtan­louhna pia hi.

 

MHA Joint Secre­tary in a gendan in, July 24(Seppatni) a Parlia­ment Session pailel a Question Hour hun a Union Home Minister a kihel ding ziak in, MHA official tengteng Pathi­anni a kipan a loutheilou a Delhi a, a om det uh po­imoh chi’n gen hi. Hich­ibang dinmun omte ziak in, tripartite talk neih nawn ni ding in August 5 a hihkeileh August 11 bikhiah in om chi’n Sa­tyendra Garg in gen hi. Government of India in tripartite talks poimoh ngaih mahmah a, kha nawn bullam a kipan thil bangkim pai dikvekta ding chi’n a lam et thu gen hi.

 

District bawlna thubuai toh kisai a tri­partite hun ding July 10 a Ukhrul district headquar­ters a neih ding a bikhiah masak a om, July 21, 2017 a Senapati district head­quarters mun a nei ding in a hun suan gamlat in om hi.

 

Tripartite talks neih hun ding suk gamlatna thu ah tuni’n UNC in a lungkimlouh thu taklang nawn hi. UNC President Gaidon Kamei in thiltung khatpeuh maituah ding a kigingsa a om den ding in Manipur a Naga mipite kiang ah gen thakthak hi. UNC in a taklatdan in, tripartite talks a tel party khat in district bawlna thubuai toh kisai a kihouna pailel suksiat sawm a panla den hidan in taklang hi. May 19 in UNC, Manipur Government leh Central government in, kha khat sung ngei a political level a ‘tripartite talks’ nei ding in kithukim uhi. Kha khat sung hun bikhiah a om June 19, 2017 in bei hi.

 

UNC in a taklatsa bang in, N Biren Singh lamkaihna nuai a Mani­pur government thak leh Centre a Narendra Modi government in, communal Ibobi Singh government in a bawlkhiak buaina omte sukvengsak ding in chiam khin a, thudik vaihawmna om ding kithalawptak a ngak uh hidan in taklang uhi. May 19, 2017 a Se­napati headquarters a tri­partite talks nanungpen ah Memorandum of Under­standing (MoU) 4 bawl­sate leh Government of India thuchiamsate lept­kiplouh ziak a, economic blockade tanpha pankhe ding a United Naga Coun­cil-te’n haksatna liantak tuak uh a hihdan theih­pihna in “focal point No 1 of agreement” namkipna thak nei uhi.

 

 

State Assembly 2nd budget session Day 2

Report 9 luikhiak in om, Inpi in Rs. 1035,05,43,250/- passed; Manipur Appropriation (No. 3) Bill 2017 pompih

Imphal, July 21, 2017: Tuni Sintawpni in 11th Manipur Legislative As­sembly 2nd budget ses­sion pailel ni nihna ah, report 9 luikhiak in om hi. Shri Th. Biswajit Singh, Minister, Power in Joint Electricity Regula­tory Commission for Ma­nipur & Mizoram (Meter­ing for Grid Connected Renewable Energy) (First Amendment) Regula­tions, 2016 leh Joint Electricity Regulatory Commission for Mani­pur & Mizoram (Electric­ity Supply Code) (Sixth Amendment) Regula­tions, 2016 luikhia hi.

 

Shri Y. Joykumar Singh, Deputy Chief Minister (in-charge of Finance) in Finance Accounts (Volume-I), 2015-2016, Government of Manipur; Finance Accounts (Volume-II), Government of Manipur; Appropriation Accounts, 2015-16, Government of Manipur; Audit Report (Report No. 1), 2015-16, Manipur; Audit Report (Report No. 2), 2015-16, Manipur; Audit Report (State Finances-Report No. 2 of 2016), 2015-16, Manipur and Accounts at a Glance, 2015-16-te lui­khia hi.

 

Question Hours

Assembly second session ni nihna a question hours hun a MLA, Khangabok A/c Shri Surjakumar Okram dotna bawl Art & Culture Minister Shri L. Jayantakumar Singh in a dawnna ah, fiscal year 2017-18 ading a budget provision Rs. 1.5 crore toh Manipur State Film and Television Institute (MSFTI) in October, 2017 a kipan in PG Diploma Course in Documentary pankhe ding chi’n gen hi. Minister in a gendan in, fiscal year 2017-18 ad­ing a budget Rs. 1.5 crore toh Manipur University of Culture ah course tua­mtuam Graduate Course in Dance, Music, Sankri­tana, Umang Lai Haraoba, Thang-ta, The­atre, Tribal Studies leh­Visual Art piak in om chi’n gen hi. Manipur State Film & Television Institute zatkhiak ding zekaisakna thu toh kisai dotna Art And Culture Minister in a dawnna ah institute faculty leh staff lakna neih hiding chi’n gen hi. Faculty members, support staffs, academic infrastructure leh van­zat poimohte tellou in academic program kipan theilou chi’n gen hi. Gov­ernment masa in Imphal International Airport min khek ding a Cabinet thupukna a lak toh kisai dinmun toh kisai a MLA, Wangkhei A/C, Shri Okram Henry Singh dot­na bawl Chief Minister in a dawnna ah, September 21, 2016 in State Cabinet meeting in Imphal In­ternational Airport khek ding in thupuk a, state mipite deihna bang a, a poimoh bang a panla ding a, Ministry of Civil Aviation, Government of India kiang a lemsakpi­hna piak ding in thupuk in om chi’n gen hi.

 

MLA, Lilong A/C Md. Abdul Nasir dotna bawl Agriculture Minis­ter V. Hangkhanlian in a dawnna ah Government of India in Manipur state ading in, Imphal West, Imphal East, Bishnu­pur, Thoubal, Chandel, Churachandpur, Senapa­ti, Tamenglong leh Ukh­rul tel in district 9 ading in, kum 2016-17 sung a National Food Security Mission a zat ding in Rs. 739.44 lakh pekhia chi’n gen hi. District chih a makaite kithuahpihna tungtawn in hamphatna tang dingte telkhiak in om uh chi’n gen hi.

 

Opposition Congress MLA Khumukcham Joyk­ishan Singh in Manipur Assembly a Question Hour hun a dotna a bawl toh kisai a Manipur Chief Minister Nongthombam Biren Singh in Inpi a theihsakna ah, Manipur a NSCN (IM)-te “unof­ficial designated camps” khenkhat om a hihdan report om chi’n gen a, himahleh state a Naga helpawlte official camp om a hih thu nial hi.State mun khenkhat a NSCN (IM)-te unofficial desig­nated camp tamlou om hidan a report omte gov­ernment in poimoh ngaih mahmah ahi chi’n gen hi. , MLA Joykishan in tu­nai zek a Ukhrul district a NSCN(IM)-te’n nautang mi 2 a thahna uh toh kisai a dotna Manipur Chief Minister in a dawnna ah, Ukhrul police-te’n thil­tung toh kisai a suo motu case lakhin uh ahi chi’n gen hi. Police-te’n ngoh a omte matkhiak sawm in panla lel ua, amaute mat­khiakna ding in hun lut zek lai ding chi’n gen hi.

 

Evening session

Tuni Sepnawnni nitak­lam a ‘evening session’ ah Inpi in August 2017 sung ngei a laihsuah ding in, departmental expen­diture tuamtuam ading in Rs. 1035,05,43,250/- kithutuaktak in passed uhi. Budget estimate 2017-18 toh kisai a gener­al discussion neihna hun a opposition member-te dotna leh ngaihdante toh kisai Finance Minister in a hilhchetna ah, depart­ment khenkhat in Utili­zation Certificates (UC) a piaklut theihlouh ziak uh leh ACC Bills kichi DCC Bills a khekna ziak in budget neuchik bawlkh­iak in om chi’n gen hi. GST zatkhiakna leh fi­nancial resource-te hoi­htak a etknaina ziak in, surplus revenue om ding a, budget in a poimoh ngaih thilte leng genkhia hi. Hamphatna kituak­loute venbitna ding leh hoihtak leh a huntak a fund allocations piakkh­iakna ding in DBT in po­imohna lian mahmah a, Centre Govt a kipan grant lak kichi baihsam mahleh hoihtak a grant zatkh­iak ding thil haksapi ahi chi’n gen hi.Tulel a bud­get, state a developmen­tal project-te a zat ding a hih ziak in, chiang leh kithalawp huai mahmah chi’n gen hi.

 

Tuni a session nei­hna hun ah Finance Minister Shri Y. Joyku­mar Singh in Manipur Appropriation (No. 3) Bill 2017 pawlut a, Inpi inleng pompih ngal hi. Opposition member Shri Kh. Joykishan Singh, K. Ranjit Singh, Surjaku­mar Okram, N. Loken Singh leh K. Govindas Singh –te’n leng private members ’resolution-te pawlut uhi. Nouneltak a genkhawm a hih nung in, Inpi in State thak bawlna, bial, gamgi a hihkeileh State-te a omsa minte heilamdang a hih hun a, aloutheilou a, a sukkhak ding State(s) a State Leg­islature phal la masa a, article 3 of the Constitu­tion of India bawllemna ding a, August 31, 2015 Inpi in a passed Resolu­tion No.117 genkik thak­thak ding in thupuk uhi.

 

 

Pawlpi leh institute tuamtuam in CMRF ah Rs.10 lakh val thoh

Imphal, July 21: Tuni Sintawpni in pawl­pi, hospital leh mimal tuamtuam te’n State a tuilian thuakte panpihna ding in Chief Minister’s Relief Fund ah sum tam­tak thoh nawn uhi.

Tuni’n Chief Minis­ter’s Relief Fund (CMRF) in pawlpi leh institute tu­amtuam a kipan in a vek in Rs. 10.80 lakh ngah hi. Chief Minister’s Secretar­iat a program zatna hun ah sum thohkhiakte Chief Minister Shri N. Biren Singh khut ah pekhia uhi. Tuni a CMRF a sum thoh pawlpi leh institute tua­mtuamte a hihleh Shija Hospitals and Research Institute in Rs. 3 lakh, Manipur Chemists and Druggists Association in Rs. 2.5 lakh, Indian Tour­ism Congress (NE) in Rs. 2 lakh, Manipur Horse Riding and Polo Associa­tion in Rs. 1 lakh, Sangai Healthcare and Research Center in Rs. 1 lakh, Ma­nipuri Muslim Online Fo­rum in Rs. 50,000, Waik­hom Mani Girls College in Rs. 50,000 leh Shishu Nistha Niketan, Imphal in Rs. 30,000 thoh uhi. Chief Minister in CMRF a sum thoh mimal leh pawlpi tengteng kiang ah kipahthu gen hi. CM in mipite kiang ah tuilian ziak a inn kisiate tunding thakna ding leh tuilian thuakte panpihna ding a sum thoh chiat ding in­leng ngen hi.

 

 

DC/Ccpur, bike zang in office kai

LAMKA, July 21: Ccpur district khangthu a masapen hilai ding in Shyam Lal Poonia, IAS, DC/Ccpur, tuni July 21, 2017 (Sintawpni) in Royal Enfield (bike) zang in office kai ding kuan a, a pailam inleng Royal Enfield zang mah in kiknawn a, a nung ah DC/Ccpur official gari leh security escort-te’n zui uhi. Tuni a DC/ Ccpur peinih nei gari zang a office a kai ziak in Lamka khopi sung a lamlian hoihlouh dan chiangtak a mu ding ahi­hman in phattuamna nei ngei ding in mi tamtak in lam-et thugen uhi.

 

 

Panpihna pete tung ah YPA-GHQ in kipahthu gen

LAMKA, July 21: Young Paite Assn., GHQ in Mizoram a tuilian leh menchim thuakte huhna dia panpihna pekhawm tengteng tung ah kip­ahthu gen uhi. YPA-GHQ thusuak in a taklatna ah, Mizoram a district tuamtuam a tuilian leh menchim ziak a si-le-mang leh inn-le-lou bei a beidongtak a omte panpi­hna dia phatuamngaitak leh kiphaltak a sum-le-pai, antang, silh-le-teen leh a dangdang thoh­khawm tengteng tung ah kipahthu gen uhi. Huai ban ah hiai toh kisai a pan nasatak a lakpih, YPA New Lamka Block, YPA Lanva Block, YPA Lamka Block, YPA lmphal Block leh a sung a unit om tengteng tung ah leng kipahthu gen uhi.

 

Huai ban ah gari zatman ding a sum-le-pai a pang V. Hangkhan­lian, District Incharge Minister, V. Khaikhanmung, Vice Chairman, ADCC, T. Paukhanlian, EM/ADCC, Langkhanpau Guite, Ex-Chairman ADCC leh Thangkhosuanmung Guite, MDC-te tung a leng a kipah thugen uhi.

 

Pankhawmna leh kituaktak a kalsuan khawmnate’ ziak a unau haksatna tuakte Rs. l,53,120/-, anntang bag 184 leh silh-le-teen bag 4 a panpih theih a om ahih­dan taklang in Aizawl, Mizoram a vaidawn, Central Young Mizo Association (CYMA) leh kipiakkh­iakna hun va uap, SSPP Head­quarters, Aizawl, Pastor V. Biak­muan, Local Pastor, EBCC Aizawl leh heutu tuamtuamte tung ah leng kipahthu gen uhi. Huai ban ah giahna ding leh nek-le-tak leh a poimoh bangbang saisak a inntektak a omsak T. Lalkhan­hau leh a innkunnte, Mangza­lian Suante leh a innkuante leh Mangminthang leh a innkuante’ kipiakzohna mangngilh hingeilou ding ahihdan taklang kawm in genthei, haksa leh panpihngaite’ lam a baan zakthei zel dia Pathian in hon vualzawl a hon makaih zel ding a deihthu taklang in, “Thupi­na tengteng Pathian in tang hen” chi’n YPA-GHQ in kipahthu genna thusuah bawl hi.

 

 

Thautang in Sangaikot MDC’ inn tohlet glass kapvang

LAMKA, July 21: Zan, July 20 sunnung dak 1 vel in Phailian a om Sangaikot MDC Pum­tulthang Lienzaw tenna inn tohlet (window) glass thautang in kapvang a, himahleh si leh liam bel kuamah omlou uhi. Hiai hun in Sangaikot MDC a inn uah omlou a, innsung ah inn ngak numei khat kia om in vangla-melmuh (Television) en a omlai a common room a tohlet glass thautang leng ka kapkha hi’n thutut kingah hi. Glass them leng in inn ngak a om numeinu mailak dengkha a, himahleh thau­tang ahihleh mulou uhi.

 

Hiai toh kisai in tuni zingkal dak 7 in Lamka Po­lice-te’n thil omdan enkhia in a mun mahmah a ‘spot enquiry’ va bawl ua, tohlet glass pen thautang in a khak mah ahihdan mukhia uhi. Kapkhak a om tohlet ahi­hleh common room tohlet khat hi a, Phailian lam pang a om ahi. Himahleh a lamdang mahmah ahihleh thautang pen innsung leh innpua hoihtak a zonsuak himahleh muh hilou a, huai ban ah Sangaikot MDC in­leng hiai toh kisai a muan­moh ding kuamah neilou ahihdan gen hi.

 

 

Accelerate in lohchinna ngah student-te kipahpihna hun zang

LAMKA, July 21: Accelerate in a institu­tion ua kai, engineering leh medical division a lohchinna ngahte kipah­pihna tuni, July 21, 2017 sunnung in Accelerate Coaching Institute, Radi­ant Building, Bijang ah nei uhi.

 

Hiai hun zatna Sir George leh Miss Lily in makaih ua, Sir Lun Haokip in introductory speech gen in Lucy Mate in thilpiak piakna makaih hi. Dr. Alex Touthang in hasotna thugen a, gen­nop neite’ a dia hun hon a om in, Sir Achung in kip­ahthu gen in hunkhak hi.

 

Accelerate Coaching Institute a pan 2017 in Engineering ah student 9 leh Medical division ah student 5 in lohchinna ngah ua, amaute ahihleh; Engineering ah Than­glenmang Haokip, IIT Dhanbad; Obed Letmin­thang, NIT (Mechani­cal) Agartala; Seiminlen Kipgen, MIT (Civil En­gineer); Seilalmuon Ha­okip, GNA University (Aerospace Engineer), Punjab; T. Ginlaljohn, MIT, Manipur; T. Thang­minlen Haokip, NIT (Civ­il Engineer), Manipur; T. Lamgoumang, MIT (Me­chanical Engineer), Ma­nipur leh S. Lungoulen Haokip, NERIST (B. Tech) hi uhi.

 

Medical Division ah Pausuanmung Tang­pua, NEET; Lalhman­gaihzuali, NEET; Omega Zobungpui Khawbung, NEET; Merlyn Chinnei­hoi Haokip, B.Sc Nursing leh Lamneikim hi ua, tu­lel in Accelerate Coaching Institute ah Engineer leh Medical sinlel student 47 om uhi.

 

 

Floor test ah TR Zeliang vualzou

Kohima, July 21 : Tuni Sintawpni a Na­galand State Assembly a floor test ah Nagaland Chief Minister T.R. Ze­liang in vote 47 mu in vualzohna tang hi.

 

Zeliang in 60-mem­ber Assembly ah Naga People’s Front (NPF) MLA 36, BJP MLA 4 leh Independent member 7te gupna ngah hi. Chief Minister lui Shurhozelie Liezietsu in NPF MLA 10 leh Independent 1 tel in vote 11 ngah hi. Liezietsu a hihleh Assembly mem­ber a hihlouh ziak in, As­sembly ah tellou hi.

 

A paisa Nilaini a Governor P.B. Acharya in Assembly a majority proof bawl ding lohsappih Liezietsu a tawpsak nung dakkal bangzah hiam nung in, Nagaland Chief Minister 19na ding in Ze­liang kichiam hi. Hiai zoh in Zeliang kiang ah July 21 a Inpi a majority nei a hihdan chetna peding in theihsak in om hi. Himahleh NPF in kum 6 sung party a kipan Zeliang nohkhia hi. Assembly a Zeliang in motion of confi­dence a puaklut toh kiton in, Zeliang leh Liezietsu gumtute kal ah debate sou­sangtak om hi. Houlimna zoh a hih nung in, Assembly Speaker Imtiwapang Aier in vote khe ding in mem­ber-te theisak a, Zeliang in vote 47 ngah a, confidence motion nial member-te’n vote 11 khia uhi. Hiai zoh in Speaker in Zeliang in Confi­dence Motion ah vualzohna ngah chi’n puang hi. Cabi­net keklet ding thu toh kisai in Chief Minister Zeliang in MLA-te kimuhpih ngal hi.

 

 

Personal Interview om ding

Lamka Post a Sub-Editor leh Printer Trainee/Helper lakna ding in zingchiang, July 22 (Kiginni) sunma dak 10:30 in Lamka Post office ah personnel interview om ding hi. Hiai hun ah Sub-Editor lakna dia written test a telte leh Printer Trainee/Helper dia kingetna pe teng telkim chiat ding a theihsak ahi.

Sd/- Editor/Publisher

 

 

DC/Ccpur in Vimala High School enkhe nawn; School huangsung hahsiangpih

LAMKA, July 21: District Level Officer (DLO) teng leh DC/Cc­pur in meeting a neih hun ua thupukna dungzui in DLO khat in Govt School khat enkai a, a school et­kai uh khantouhna dia mohpuakna kipia dung­zui in, Shyam Lal Poo­nia, DC/Ccpur in Vimala Raina Govt High School tangkha in, zan leh tuni in school enkhia hi.

 

Tuni sunma dak 9 in DC/Ccpur leh Medi­cal team khat in Vimala Raina Govt High School enkhe nawn in DC makaih in student leh teacher-te’n school huangsung hahsiang in social work nei uhi. School hoihzaw­kna ding deihna in school fencing bawl hiding in DC/Ccpur in gen a, huai ban ah student-te school uniform quality check bawl in, student-te toh mid-day nekhawm ua, siangthouna lam toh kisai in Medical team in khut silsiang ding dan sinsak in projector zang in docu­mentary film en uhi. DC/ Ccpur in school a veh hun in school etkhiakna toh kisai a mohpuakna len School Managing Com­mittee-te toh meeting nei uhi.

 

Ccpur DLO-te’n dis­trict sung a school etkai­na toh kisai a mohpuakna a letkhakna uh school-te ahihleh hiai bang ahi.

 

DC/Ccpur in Vimala Raina Govt H/S; SP/Cc­pur in Vungzagen Hr Sec School; DFO in Ccpur Govt H/S; Addl DC in Saikot Govt H/S; Addl SP (L & O) in N Molhoi JB School; Addl SP (Ops) in T Champhai Jr H/S; SDO Kangvai in Kangvai H/S; SDO Ccpur in New Ba­zaar Jr H/S; SDO Heng­lep in Henglep Govt H/S; SDO Tuibong in Seikam UPS; SDO Mualnuam in Tualkhohau Govt H/S; SDO Singngat in Singngat Govt H/S; SDO Sangaikot in Tuining H/S; SDO Saikot in Muolvaiphei UPS; DTO in Goukhai H/S; CMO in Phungkhothang Jr H/S; DAO in Saikul Jr H/S; DPO-ICDS in INA Memorial School; GM-DIC in Khopuibung Jr H/S; CDPO-ICDS in Gelmol Khonom UPS; EE PWD in Kholmun JB School; ZEO in Rengkai Hr Sec School; EE DRDA in Muolbem JB School; DIO DIPR in Tol­len JB School; DGM MSP­DCL in Bijang Loubuk JB School; DSO-CAF & PD in Mantop Leikai JB School; DSWO in Khomoi Lower Primary School; DEO Ex­change in Gelmol Khonom UPS; DYC NYK in Gandhi Memorial H/S; EE/IFCD in Kumbi Pukhri Jr H/S; DPM NHM in Matijang JB School; E-District Manager in Pengjang JB School; EE/PHED in Dongjang JB School, DHO in Lingsiphai Jr H/S; Jt Director, Vety in Tuibong H/S; DSO Sericul­ture Department in S Kot­lian JB School; DYASO in Khengjang JB School leh Treasury Officer in New Lamka Upper Primary School enkai ding uhi.

 

 

Rayburn College in Degree zou student-te kipahpihna hun zang

LAMKA, July 21: Hebron Veng, New Lam­ka a om Rayburn College in tuni zingkal dak 7:30 in amau college audito­rium ah degree zoukhia student-te kipahpihna hun zang uhi.

 

Hiai hun ah student-te nu-le-pate ban ah de­gree sinlai student-te tel ua, KP Vanlalsanga, Dean of Students, Dis­cipline and Welfare in hiai hun zatna makaih in, Dr. David G Tung­nung, College Chaplian in thumna in hun pan hi. T Lianchinpau, Vice Principal, Rayburn Col­lege in welcome address gen a, T Paukhankhual, Dean of Examination in degree student lohch­inna ngahte mellahna leh award leh scholarship piakna makaih a, lohch­inna ngah student-te a pan thugenna om in, Rev. Khen P Tombing, Princi­pal, Rayburn College in hasotna thugen in, thum­na in hunkhak hi.

 

Rev. Khen P. Tomb­ing in phakchiam nei a laisim ding in student-te hasuan a, tupna chiang­tung teitei dia panlak ding leh officer liantak hihhun a leng panpih ngaite panpih dia hasuan in inn-le-lou, neih-le-lam thupitak tunding sang a mihing khat tungding in gen neizaw leh phattuamna neizaw ahihdan gen hi.

 

Award leh scholar­ship hawmkhiakna hun ah Manpur pumpi ah BA Honours Sociology ah ni­hna a pang Alicya in Dr Robert G Rayburn Merit Scholarship Awards 2017 sang a, kipahman in cer­tificate leh Rs 8,000 sang hi. BA Honours Politi­cal Science ah Manipur pumpi a 5na a pang M Langngaihmung in kip­ahman in certificate leh Rs 5,000 sang a, Sociol­ogy department a pan Lecturer Janice Vung­biakching Guite, Head of Department, Niang­hawmching, Cindy Lalh­nunmawi, Gouliansiam leh Nemngaihlun ban ah Political Science Depart­ment a pan Lecturer T Lawmpi, Head of Depart­ment, Dr Nehkhomang Haokip, HS Kaiminlun, P Nengthianpau, Suan L Hauzel leh T Lianchinpau kiang ah leng kipahpihna thilpiak pia uhi.

 

Huai ban ah COHSEM nuai a Class XII ah 83% mu leh tu a BA First Semester sinlel Lal­gouboi Vaiphei; 81% mu leh tu a BA First Semester sinlel Mami Tinglomkim leh 90.6% mu leh tu a B Com First Semester sinlel Carolyn Chingthianmawi in Merit Scholarship Award 2017 sang ua, kip­ahpihna in Rayburn Col­lege in College admission fee leh kum khat sung tu­ition fee awlsak  

 

Huai ban ah COHSEM nuai a Class XII mah 77% mu leh tu a BA First Semester sinlel K Marie; 75.8% mu leh tu a BA First Semester sinlel Lhingneichong leh 85% mu leh tu a BA First Se­mester sinlel TD Jackson Ginhaulian Zou kipahpi­hna in Rayburn College ah kum khat sung tuition fee awl ding uhi.

 

Rayburn College a pan 2014-2017 sung a Manipur pumpi a Top 10 a pang ban degree student-te ahihleh 2014 kum in BA English hon­our 4th position ah Tin­peneng Haokip, 2015 in BA Geography honour ah 2nd position in Jamkho­sei Khongsai leh 4th posi­tion ah Sangminthang hi ua, 2016 in B Com ah 1st position in Jangkholam, BA History Honour 4th position ah H Wellborn Ginkhankhual, BA His­tory honour 10th position ah Chinnngiahmawi, BA Political Science 5th posi­tion ah Lunmalsawm leh BA English Honour 10th position ah Neihlianch­ing ban ah 2017 in BA Po­litical Science honour 5th position ah M Langngai­hmung leh BA Sociology honour ah Alicia hi uhi.

 

 

CDVDFWA in meeting nei ding

LAMKA, July 21: Ccpur District VDF Wel­fare Assn (CDVDFWA) in July 23, 2017 (Pathianni) sun dak 12 in SP/Ccpur Reserve Line ah General Body Meeting nei ding uhi. Huai hun ah CDVDFWA member teng kimtak a telchiat ding in theihsakna bawl uhi.

 

 

Felicitation pro­gram nei ding

LAMKA, July 21: Tuibong a om Dr. S. Rad­hakrishnan Foundation School a pan tuma zek a Imphal a State Level Subro­to Mukherjee Tournament 2017 a kuan football team-te vaidawnna leh kipahpih­na nei July 24 sunnung dak 1 in School huangsung ah nei ding uhi. Huai hun ah football team member-te kiang ah certificate piakkh­iakna nei ding uhi.

 

 

ZEO/Ccpur in CM Relief Fund ding kaikhawm

LAMKA, July 21: Zonal Education Office, Ccpur in Manipur a tuil­ian ziak a haksatna tuak­te panpihna ding a Chief Minister Relief fund ding in ZEO/Ccpur nuai ah semtute a pan relief fund ding kaikhawm lel uhi. Hiai toh kisai in ZEO/ Ccpur in Education Dept nuai a sem grade-IV/ peon-te’n Rs. 100/- leh a tunglam ban ah teacher/ officer teng in Rs. 200/- zel July 24, 2017 tan a ZEO/Ccpur office a pe­khawm ding in theihsak­na bawl hi. Huai toh kiton in DI of School/Henglep block in tuni’n Chief Min­ister Relief Fund ding in ZEO/Ccpur khut ah Rs. 27,100/- pekhia hi.

 

Samulamlan block sung a Keirap Aimol High in ahihleh Chief Minister Relief Fund ding in ZEO/ Ccpur ah Rs. 26,00/- ana peta uhi. Ccpur district a pan Education Depart­ment in Chief Minister Relief Fund dia Rs. 2 lakh val kaikhawm zou ding a lam-et ahihdan ZEO/Cc­pur in gen hi.

 

 

Silen leh Bongmol ah Free Health Camp nei

LAMKA, July 21: Diocesan Social Service Society (DSSS), Imphal/ Caritas India, Ccpur, National Health Mis­sion (NHM), Ccpur leh Kuki Students Organ­isation (KSO) Leimata Area pangkhawm in Si­len leh Bongmol khua ah July 19-20, 2017 in Free Health Camp nei uhi. Hiai medical camp ahihleh Rev. Henkholun, Area Pastor, ECA Church in thumna in hong a, P. Thangsuanhau, District Project Officer (DPO) a pan Health Camp toh kisai pulakna om in, Lhunkhothang, Secre­tary, Liemata Area Chief Assn in thugen hi.

 

Thangsuanhau in Caritas India in India gamsung ah malaria nat­na toh kisai mohpuakna liantak nei ahihdan gen a, khotang heutute toh kikupkhawmna a pan Health Camp neih po­imoh ahihdan theihkh­iak a om hi’n gen hi.

 

Lhunkhothang in hiai hun ah Caritas In­dia leh NHM in Health Camp neihna dia Leima­ta Area telkhiak a omna tung ah kipahthu gen hi. MSACS, Ccpur leh SHALOM NGO leng hiai camp ah kihel in ANC check up bawl ua, camp hunsung in Dr. Lhingnei Thangeo, MO in charge, District Mobile Medical Unit (DMMU) in Silen khua ah damlou 192 en a, Dr. Jotin, MO, Sagang PHC in Bongmol khua ah damlou 175 en a, Medical Officer-te ahihleh nurses leh Henglep PHC, Charoi Khullen leh L. Khengjang PHSC staff-te’n kithuah­pih uhi.

 

DMMU a pan Tech­nician-te’n sisan test tua­mtuam bawl ua, typhoid, diabetes, blood group leh a dangdang hiai hun ah a thawn in test uhi. Huai ban ah damloute a poimoh bang un dam­dawi leng a thawn in pia uhi. Camp lohchinna dia kithuahpih CMO/Ccpur leh Medical Team-te ban ah KSO Leimata Area leh Liemata Area Chief Assn tung ah Caritas India in kipahthu gen uhi.

 

 

Service Delivery Fortnight zatna paitou lel

LAMKA, July 21: District Family Welfare Officer (DFWO), Ccpur panlakna nuai a “Paidan thak, Lam-etna thak, Inkuan khantouhna di’n hanchiam ni” chih thupi zang a innkuan khan­touhna ding leh mimal kitoudelh theih ding ngimna a Service Deliv­ery Fortnight, July 11 a pan July 24 sung hun zatna paitou zel in, mun tuamtuam ah DFWO leh staff-te’n poster takkhia uhi.

 

Service Fortnight zat hun in delaying age at marriage, healthy spac­ing, post partum FP, male participation in FP, post abortion FP chihte tel in service delivery fortnight toh kisai a theih tuak tuamtuamte poster tungtawn a takkhiak in om hi.

 

Service delivery fortnight zatna a ni taw­pni July 24 in PCC-OT, DFWO Office building ah female sterilization leh NSV kichi nau neilou dia kibawlsak nuamte a ding in camp om ding a, hiai hun ah Imphal a pan Dr. Nabakanta Sharma, DM (O&G) Senior Lapa­roscopist/Gynaecologist, Imphal in operation bawl ding hi.

 

World Population Day zatna in June 27, 2017 a pan July 10, 2017 sung Population Fort­night a zang in mun tua­mtuam ah poster/banner takkhiak hi a, July 11 a pan July 24, 2017 sung Service Delivery Fort­night a zat in om hi.

 

 

BRO, 80 RRC HQ a lamlian bawlhoih dia ngetna donsak hilou

LAMKA, July 21: Bungmual a Lalpuith­luaii Foundation School gei a lamkawina mun, Tipaimukh Road kum khotawn a tuivung a om ziak in hiai lampi taw­nkhate’ a ding in nawng­kaina liantak om hi.

 

Tipaimukh Road ahihleh BRO, 80 RRC HQ 1522 RMPL in a et­kai uh hi a, bialtu MDC leh awlmohtu tamtak in 80 RRC official-te kiang ah ngetna bawl mahle uh ngaihsak hilou a, khat­vei leisai sung mahle uh nullah hoihtak a omlouh ziak in leisai teng buan­nawisuak in nawngkai veve hi.

 

Mipi leh student-te awlmohna ziak in bialtu MDC, CT Lian Guite leh Khaikhanthang Hangzo, IRS (Rtd) in gelhthoh leh kam mahmah in Bung­mual a 80 RCC Camp in-charge Mr. Bhatt kiang ah bangzahvei hiam hiai thu tunta mahle uh a phatu­am ding sepkhiak omlou a, a camp uh toh meter 200/300 khong lel a gam­la a om lamlian kisiatna puahlouh a om in BRO, 80 RRC HQ 1522 RMPL in a mohpuakna uh zou­lou ahihdan langsak hi.

 

 

 

 

 

 

NEWS TOMKIM

 

Police-te’n zu tamtak mankhia

LAMKA, July 21: Tuni sunnung dak 4:30 in Addl SP/Ccpur leh SDPO/Thanlon makaih in Police-te’n New Bazar Bus Parking area lak ah zu check ua, huai ah local zu tel in zu tamtak mankhia uhi. Matkhiak a om zute ahihleh tuni nitaklam dak 6 in Tuibong a Mini Secretariat huangsung ah SDPO/ Thanlon makaih in police-te’n bua uhi.

 

 

GST toh kisai workshop om ding

LAMKA, July 21: DC/Ccpur makaih in zingchiang, July 22 sunma dak 11 in DC/Ccpur office a BRGF Hall ah Good and Service Tax (GST) toh kisai workshop om ding hi. Huai hun ah IGP (BSF)/Mualkoi, Lamka tel in District Level Officer, SDO/BDO, DIO(NIC), Ccpur, oil pump operator, cable operator, press/media editor teng leh Ccpur District sung a trader/dealer teng tel ding uhi. Huai hun ah Taxation Dept in GST toh kisai sinsak ding uhi.

 

 

Science Exhibition & Quiz Competition om ding

LAMKA, July 21: Zingchiang, July 22 sunma dak 11 in Vimala Raina High School ah RMSA/Ccpur saina in District Level Science Exhibition & Quiz Competition om ding hi. Hiai hun N. Chingkhei Singh, ZEO/Ccpur in hongkhe ding hi. District Level Science Exhibition & Quiz Competition result puankhiakna leh kipahman hawmkhiakna ahihleh hongtung ding July 24, 2017 sunma dak 11 in Synod Hall, IB Road, Lamka ah om ding hi. Hiai hun Shyam Lal Poonia, DC/ Ccpur in chief guest hihna toh uap in kipahmante hawmkhe ding hi.

 

 

SUNNA :

Haukhan f/o Suanzamuon of P Kamdou Veng, Lamka, zan July 20 nitak dak 7 vel in damlouhna ziak in si a, tuni’n kivui hi. RIP.

Mang Khan Lian s/o Suang Chin Khup of Tangnuam, Lamka, tuni July 21 sunnung dak 1 vel in Lamka Damdawi Inn ah si a, tuni mah in Tangnuam hanmual ah kivui hi. Amah ahihleh Singngat kho kiang a om Simbuk hausate sungkuan ahi. RIP.

 

 

 

 

for more detail : Here

 

 

 

RELATED

The Lamka Post | Jluy 21, 2017