You are here: HomeRSS FeedsThe Lamka Post

The Lamka Post | November 15-16, 2016

Wednesday, 16 November 2016 17:40

Imphal a thautui taksap ziak in Journalist-te’n protest dharna nei

IMPHAL, Nov 14: Sardar Hills leh Jiri­bam sub-division-te full-fledge district 2 a bawlkhiak sawmna thu a United Naga Council (UNC) makaihna toh Na­tional Highway nih a in­definite economic block­ade pailel sukbeina ding a Manipur government in panla taktak nuamlou hidan a mohsa kawm in, tuni Seppatni in Mani­pur Press Club kong ah journalist-te’n protest nei uhi.

 

October 30, 2016 zankim a kipan indefinite economic blockade ziak a state a laklut ding van poimohte khaktansak a hih nung a, mipite ading a nasepna dia poimoh petrol taksapna liantak a tuah ziak un, khopi sung a tai reporter-te’n haksat­na liantak tuak uhi. State government in Senapati district sung a Sadar Hills leh Assam toh gamgi Imphal East district a Jiribam subdivision-te full-fledged district a bawlkhe ding a panlakna a neihte UNC in naktak in dal hi.

 

All Manipur Work­ing Journalist’s Union (AMWJU) lamkaihna toh Journalist-te’n kiphinna neih ahih sung in, report­er-te’n UNC kiang ah, hindan ngeina naktak a sukha, kiphinna a neihte uh khawlsan ding in ngen uhi. Hun sawttak daih thei ding thubuai ziak a blockade a paizomtouh zel leh maban nitamlou nung a, news coverage bawl ding thil haksapi suak ding hi’n leng tak­lang uhi.

 

Tuni a protest nei journalist-te’n “UNC, blockade lakhia in,” “ka thautuite uh kangsian­gta,” “Home Depart­ment in convoy ading in security saisak hen,” “Government kingakna tak hih sawm un” leh “No petrol, no reporting,” chih thute kigelhna plac­ard tuamtuam tawi uhi.

 

Tuabangkal ah tuni’n Ima Panthoibi Market a lamsik a numei vanzuakte’n Dingku Road dung ah counter-blockade bawl uhi. Counter-blockade a omlouhna ding a UNC in kiphinna a zukkik ding ahi chi’n gen uhi. Black market in petrol litre khat Rs 250- 300 kikal a zuak in om a, nekvan po­imoh mante leng khang hulhul hi. Tuni a kiphinte’n truck-te escort a Imphal pitung a hihtheihna ding a security ar­rangement kintak a sai ding in ngen uhi.

 

Chief Minister Okram Ibobi in, tulel a Imphal-Dimapur highway leh Imphal-Jiribam highway a koltang vanpua truck leh oil tanker tengteng Imphal tut vek ahihtheihna ding a secu­rity arrangement kiningching bawlkhe ding ahihdan chiam hi. Tulel in Nation­al Highway 2 a Nagaland section a mun tuamtuam ah van leh thautui pua truck a za a sim koltang uhi.  

 

 

UNC, Manipur Govt. leh MHA-te’n New Delhi ah tripartite talk nei ding

IMPHAL, NOV 14: Manipur a district thak bawlkhiak ding thu a buaina pailel dinmun toh kisai genkhawm ding a Gov­ernment of India a kigolh toh kiton in, zingchiang Sepnawnni zinglam dak 11 in North Block, New Delhi ah Government of Manipur, Unit­ed Naga Council (UNC) leh Min­istry of Home Affairs (MHA)-te’n ‘tripartite talk’ nei ding uhi. UNC team-te’n buaina sukveng sak a om ngei ding hidan in a lamet thu uh gen uhi.

 

Manipur Government leh Naga mipite kal a, Sadar Hills thu a Memorandum of Understanding (MoUs) 4 a suai kaih a omte UNC in laithon leh lungsimtak toh Gov­ernment of India a zahtaksak ding kinem mahmah uhi. Hiai MoU 4te ahihleh December 14,1981, No­vember 10, 1992 in Government of Manipur leh ANSAM kal ah, September 27, 1996 in Govern­ment of Manipur leh Naga Stu­dents’ Federation(NSF) –te kal ah leh June 23,1998 in Government of Manipur. UNC leh ANSAM-te kal ah. November 24, 2011 a Ministry of Home Affairs (MHA), Govern­ment of India in laithon tungtawn a kamchiam a bawlte leh district thak khatpeuh bawlkhiakna ding a, Nagate pupa gam leitang inchi khat leng sukkhak hilou ding chi a kithukimna a bawlte uh pansan in, suaikai uhi.

 

Tuni Seppatni nitaklam a, ki­houna nei ding a UNC delegation team-te’n New Delhi a pawtsan ma ua thuthaksaite kiang a, a gen­dan un, November 15,2016 a New Delhi a ‘tripartite talk’ tungtawn a gahsuah om dingte pansan in tu­lel a national hihways a indefinite economic blockade pailel toh kisai a dinmun kiptak a neihte uh kinga ding hi’n gen uhi. UNC makaite’n hiai kihouna tungtawn a buaina pailelte sukveng a hihngei leng lam en mahmah uhi. UNC president Gaidon Kamei makaih 6-member team-te lak ah All Naga Student Association, Manipur (ANSAM) president Seth Sethshang-te leng tel uhi. UNC thusuak dungzui in, a paisa Pathianni in Ministry of Home Affairs tungtawn in Govern­ment of India in kihouna nei ding in UNC kiang ah chialna bawl hi.

 

Tuma deuh a, All Naga Stu­dents’ Association, Manipur (AN­SAM), Naga Women Union (NWU) frontal organisation-te toh “emer­gency United Naga Council (UNC) Presidential Council Meeting” nei­hna hun ah, Nagate tenna bial sung a Trans Asian Railways leh National Project bawlna ‘ban’ puankhumna tel in indefinite economic blockade pailel khauhsak sem ding in thupuk uhi. Meeting hun in, Naga mipite’n a luahna gam leitang thu a, a dik­na uh, hihna, khangthu, tawndan, chindan, ngeina, leh kivaipuakna a neihte uh Government of India a ki­pan gelhthoh a official kam chiam bawl a hihma teng, kuamah dang toh kilemna bawlpih ngeilou ding uh a hihdan nam­kip thakna leng bawl ua, communal Government of Manipur toh leng po­litical a kizopna omte tatsak khinta uh a hihdan puangkhin uhi. Manipur Government in Sadar Hills leh Jiribam sub division-te full fledged district a puangkhe ding a, .deihsak tuam nei a thupukna a lak deihlou a kiphinna in, Novem­ber 1, 2016 nitak zankim a kipan ‘Naga-te tenna bialteng a Trans Asian Railways leh Nation­al projects pailel ‘ban’ puankhummna tel in, In­definite economic block­ade pailel enkik thak ding in, “emergency United Naga Council (UNC) Presidential Council Meeting’ sam uhi.

 

Thusuak in a taklat­dan in, Sadar Hills leh Jiribam district bawlkl­hiak nading thubuai toh kisai a United Naga Council (UNC) makaih a indefinite economic blockade a paizomtouh zel ziak in, Imphal East district a Khurai area a pawlpi tuamtuamte’n Imphal-Ukhrul road dung ah Kiginni a kipan in indefinite counter-blockade pankhia uhi.  

 

 

Escort truck 250 in Jiribam zuan

IMPHAL, Nov 14: National highway dung ah United Naga Council leh Jiribam District De­mand Committee-te’n a tuamtuak a, economic blockade a neihlai tak uh himahleh, tuni Seppatni in Imphal-Jiribam road tawn in, niteng van po­imohte la ding in, secu­rity escort khauhtak toh truck 250 valte’n Jiribam zuan uhi.

 

Tuni Seppatni zinglam dak 11:30 vel in Indian Reserved Battal­ion, Manipur Rifles leh Police Commando-te a kipan personnel-te’ ven­bitna khauhtak nuai ah LPG cylinder hawm pua truck 1, LPG bullet tanker 63 leh oil tanker 45 tel in gari 268 in Keithelmanbi nusia ua, zingchiang Sep­nawnni in Jiribam tung ding uhi. CAF&PD apan thusuak dungzui in, hiai convoy-te’n Assam state mun tuamtuam a kipan truck dimsa a kiguang vante a teikhiakzoh chi­ang un, Imphal mah zuan in hong kik nawn ding uhi.

 

Tuabangkal ah tuni’n leng Imphal khopi sung mun tuamtuam a counter-economic block­ade neih a om sutzop in om hi. Ima Panthoibi Street Vendor Union Khuman Lampak mem­ber-te’n Senapati district ading vanpua Winger vehicle(MN03-W 0813) sung a kipan in van tua­mtuam omte suahkhiak­sak vek uhi. Economic blockade lakkhiak a hi­hma teng counter block­ade paitou den ding chi’n Union Secretary Y Indra­mani in gen hi. Imphal khopi a kipan singtang bial a van pawkhia garite tung ah action khauhtak lak hiding a, taithei nawnlou ding in khawl­sak hiding uh chi’n vau hi.

 

 

Lamka leh Imphal kal ah Line Bus leh Direct Bus-te tailou

LAMKA, Nov 14: Imphal a parking tung­tang a buaina om ziak in tuni, Nov 14 a pan in Lamka leh Imphal kikal a passenger pua a pai Ccpur District Mini Bus Trans­port Assn (CDMBTA) nuai a Direct Bus-te leh Tedim Road Bus Own­ers Transports Coopera­tive Society (TRBOTCS) Kiran Group nuai a Line Bus-te a tai omlou in khawl uhi. Hiai toh ki­sai ahihleh CDMBTA in theihsakna ana bawlsa hi a, tua toh kiton in Direct Bus leh Line Bus-te tuni’n a tai omlou hi.

 

Tuni zingkal in TRBOTCS Kiran Group nuai a om Bus 6 vel Lam­ka honglut in New Bazar Parking ah kidoh mahle uh CDMBTA in theihsak­na a bawlsa dungzui un kamsiamtak in sawlkik ua, Line Bus 6-te leng passenger pawlou in kik uhi.

 

 

PTC-GHQ in Gen. Secy kitaw­pna tungtang genkhawm

LAMKA, Nov 14: Tuni, Nov 14 zingkal dak 7 in Paite Tribe Council (PTC) General Headquar­ters, Central Working Com­mittee in PTC-GHQ office, Hiangtam Lamka ah emer­gency meeting nei uhi.

 

Hiai hun ah John K. Ngaihte, Gen. Secy., PTC-GHQ in Mrs. Pam­sialchiang sihna tungtang a, a seppihte kuamah donglou a, DC/Ccpur ki­ang a ‘To Whom It May Concern’ chih certificate a piak toh kisai a hih­khial kisa a, PTC-GHQ a dinmun a let pen ‘moral ground’ a kitawpna a piak tungtang genkhawm uhi.

 

PTC-GHQ CWC in hiai thu sawtkuamtak a genkhawmnung un Gen­eral Secy in kitawpna a piak pomsak ua, huai ban ah ‘To Whom It May Con­cern’ kichi ‘Note’ a suah leng CWC in bangmahlou (null and void) a koih in, District Magistrate kiang ah leng hiai certificate cancel ahihdan gelhthoh in pia uhi.

 

Huai ban ah PTC-GHQ a General Secy in kitawpna a piak a pom­sak uh toh kiton in, Paite Tribe Council Ki-ukna Dan (11vei puahphatna, 2013) Bung 5, Article XII Clause 48 (vi) pansan in H. Pauzalal, Secre­tary (Internal) in Gen­eral Secretary len ding a mohpuakna pia in nam­kip ngal uhi.

 

 

 

8th Seikam Football Tournament zousiang

LAMKA, Nov 14: Kholmun Play Ground a 8th Seikam Memo­rial Open Football Tour­nament lamzangtak a paitou in tuni sunnung dak 1 in closing cer­emony leh final match om hi. Hiai hun ah chief guest, functional presi­dent leh guest of honour in TN Haokip, President, MPCC & MLA 59-Saikot AC; Khaipao Haokip, MDC leh Lunminthang Haokip, IAS, DC/Ccpur pang uhi.

 

Chief Guest in a thugenna ah, kimawlna khatpeuh ah vualzou om a, vuallel leng om ahihman in kimawlmite ‘game spirit’ neitak a kimawl ding leh vual­zohdan leh vuallelh dan leng siam ding in hasu­an hi.

 

Guest of Honour in a genna ah, Ccpur district a pan kimawlsiam tamsem a piankhiak theihna dia ‘infratructure’ poimoh ahihdan leh NEC fund tungtawn in Hiangtam Lamka a Lamka Public Ground puahna pailel a, maban ah Tuibong a Peace Ground leng bawl hiding hi’n gen hi. A kimzaw pek 6 ah en in...

 

 

KSO-GHQ in Sadar Hills tungtang ah UNC dawnna pia

IMPHAL, Nov 14: KSO General Headquar­ters in tuni a thusuah a bawlna ah, hun sawttak a kipan buaipih a om Sadar Hills District tungtang pen Kukite a ding kia hi­lou a, vaihawmna lem­chang zaw ding leh Sadar Hills sung a tengkhawm Kuki, Naga leh Meiteite lak a khantouhna omna ding deihna ziak hi’n tak­lang hi. Tua toh kiton in Sadar Hills full-fledged district a puanna ding toh kisai in KSO-GHQ leh Kuki Inpi Manipur kigolh ngeilou a, Sadar Hills a nam tuamtuamte’n a tan dia kilawm mah ngen uh ahihman in JAC panlak­na toh kisai inleng Kuki pawlpite kigolhlou uh hi’n taklang hi.

 

Himahleh full-fledged district a Sadar Hills puankhiak ding toh kisai a UNC in Nagate gam laksak sawmna hi­dan a ngaihdan a neih ban ah nam (ethnic) thil a dis­trict bawlkhiakna toh kibang a ngaihdan a neih pen KSO in lam­dangsa ahihdan taklang hi. Himahleh tunitan in state sung a namthil pansan a district bawlkhiak om nailou a, Sadar Hills Dis­trict honkhiak ding tung­tang a UNC in a hihna diktak taklang leh pawlpi pichinglou ahihdan lang­sak a, ‘Naga Issue’ suaksak hidan in KSO in taklang hi. Huai ban ah UNC in Naga pawlpi tuamtuamte kiang a kiphinna nei ding leh a khebul ua state Govt a kun­theihna ding a ‘economic blockade’ bawl hidan in leng taklang uhi.

 

UNC President Gaid­on Kamei in khangthu toh kisai a thudik a theih ut leh ‘history’ a sinbeh poimoh hidan a taklang in makai khat in hiai bang a thu a gen ding hilou hi’n KSO in taklang hi. The Sangai Express staff reporter in interview a bawlna a, UNC President in Sadar Hills a Kukite pawlam mi hidan a, a gen pen pichinhuailou leh UNC president dang kuamah hiai bang kampau zang om nailou hidan in­leng KSO in taklang hi.

 

Gaidon Kamei in a theih dia poimoh ahi­hleh British-te khutnuai a pan Sadar Hills humbittu Kukite hi ua, Kukite gam neitu hilou hile uh sisan seng a gam ana humlou ding uh hidan in taklang uhi. Huai ban ah Kukite pen gamdang a kipan pem­lut hilou uh hi’n leng tak­lang uhi.

 

UNC in Manipur singtanggamte Naga area hisak in Southern Naga­land movement tungtawn in NSCN in ‘Naganization’ pankhia a, huai pansan in Old Kuki tribe-te Christian­ity pansan a Naga suaksak hidan in taklang uhi. Huai ban ah UNC leh NSCN-IM in 1992-1995 sung in ‘eth­nic cleansing war’ tung­tawn in Kukite hawlkhia a, Tamenglong, Senapati leh Ukhrul districts sung a Kuki khua 360 laksak in huaite Nagate’n pupa a pan a luahna gam uh hisak hi. Huai ban ah NSCN-IM leh Govt of India in ‘frame­work agreement’ a bawl tungtawn ua Sadar Hills leng Nagate’n pupa a pan a luahna gam uh hidan a taklang uh hi’n KSO-GHQ thusuak in taklang hi.

 

Kukite’n ahihleh Kuki Inpi makaihna nuai ah nam tuamtuamte kituak leh kilemtak a tenkhawm lunggulh gige ua, himahleh UNC in bel Kuki khangthu bangmahlou suahsawm hi­dan in ngoh uhi. Huai ban ah UNC President thugen in nam nihkal a kitheih­siam louhna piangsak ding leh huai in a vualzou omlou a, nam nihte a dia manna tunzaw ding hidan inleng KSO-GHQ in taklang hi.  

 

 

Rayburn H/S in Exhibition nei

LAMKA, Nov 14: Tuni, Nov 14 sunma dak 11 in Rayburn High School student-te’n khut­siam silbawl tuamtuam a bawlte uh lahkhiakna/ exhibition nei uhi. Hiai hun Langkhanpau Guite, Chairman ADCC in ‘rib­bon cut’ in hongkhia a, naupangte khutsuak, thil kibawlte enkhia hi.

 

Tuni a lahkhiakna/ exhibition neih om stu­dent-te thil bawlkhiakte ahihleh Class IX leh X student-te a pan Photog­raphy leh Flower Exhibi­tion, Science Exhibition leh Arts & Craft Exhibi­tion hi a, huai ah student-te’n motor/engine, gua (bamboo) leh pakkeute (dry-flower) tungtawn a, a thilbawlte uh lak uhi.

 

Hundang in Ray­burn High School in ‘co-corriculum activity’ tua­mtuam, debate, drama, painting, dancing leh thil dangdang in kidemna ana neita uhi.

 

 

Assam bang in BJP in Manipur ah vualzohna ngah ding: Ram Madhav

IMPHAL, Nov 14: National BJP General Secretary Ram Madhav in kum nawn a Manipur a assembly election om ding a BJP in vualzohna a ngah leh Manipur a nekguk-takgukna beithei ding ahihdan gen hi.

 

BJP Manipur Unit saina a Social Media Vol­unteers’ Meet neihna hun a Ram Madhav in a genna ah, Okram Ibobi makaih Congress Government in state sung a ‘unemploy­ment’ khangsak hidan in ngoh hi. Hiai Meet ahi­hleh MFDC, Palace Com­pound a neih hi a, kum nawn kum bullam a state assembly election om ding toh kisai a Mani­pur BJP in election cam­paign patkhiakna kawm a, a sai uh ahi.

 

BJP General Secre­tary in a genna ah, BJP in vaihawmna a lak leh Manipur state sung Sin­gapore toh kibang ding hi­dan in gen hi. Huai ban ah Assam a BJP in vualzohna thupitak a ngah bang a maban a state assembly election om ding a leng BJP in vualzohna ngah ding a kimuangngam ahihdan Ram Madhav in gen hi. Congress in vai­hawmna a letgigena mun Assam a BJP in vualzohna a ngah tungtawn in North East India ah BJP a ding in kong hon in om hi.

 

Hiai hun zatna ahi­hleh BJP makaite ban ah Assam Finance Minister Himanta Biswa Sarma inleng uap a, Manipur BJP president Kshet­rimayum Bhabananda Singh leh election man­agement committee con­venor Thounaojam Cha­oba Singh inleng thugen uhi.

 

 

School tuamtuam in ‘Children’s Day 2016’ lawm

LAMKA, Nov 14: Tuni, Nov 14 in Lamka khopi sung a school tua­mtuam in ‘Children’s Day’ lawm uhi. Sunma dak 9:30 in Ebenezer Academy in amau school campus ah Madam RB leh Miss CN makaih in ‘Childrens Day’ lopna pan ua, Madam KC in thumna in hunpan hi. Sir Ginzalian, Vice Principal in introductory speech gen a, student-te’n spe­cial item tuamtuam lak in Teacher-te a pan item tuamtuam lahna om ban uah Unique Talent Show Competion nei uhi.

 

Hiai hun ah Sir H. Liankhanlal, Principal in School Board member-te mellahna nei a, Ebene­zer Academy school a kai naupangte’n Children Home panpihna dia Do­nation Box a koih tung­tawn ua a muhkhiak uh Rs. 21,720/-, a kimtuak a hawm in, Rs. 10860/- tuak in Amazing Grace leh Only Grace Children Home panpihna di’n pe­khia hi.

 

Ebenezer Academy in Evangelistic Week a neihlai ua refreshment taang in naupangte’n Children Home panpi­hna ding in ana pe ngeita uhi. Tuni a Children’s Day zatna ah student-te leh teacher-te’n item tua­mtuam ah kipolhlimna nei in Madam KN, Dean, Higher Section in kip­ahthu gen in Sir PC in thumna in hunkhak hi.

 

Programme zatsung mah in award tuamtuam hawmkhia ua, student 4 kiang ah Best Personality of the Year 2016, student 5 kiang ah Academic Ex­cellency Award, student 2 kiang ah Best Sports Person of the Year 2016, student 7 kiang ah Most Inspiring Students of the Year 2016 leh student 1 kiang ah Most Respon­sible Leader of the Year 2016 Award pia uhi.

 

Huailou in, tuni sun­nung dak 1:30 in Pearsonmun a om The Malsawm Ini­tiative Centre ah leng Children Day zatna om a, hiai hun zatna ahihleh Ccpur Dis­trict Legal Service Authority (CDLSA) member-te’n leng va uap uhi. Amaute’n student-te ban ah nu leh pate kiang ah Pathian hon pidan a lungkimdan siam a, lungkelou a panlak poimoh ahihdan gen in naupangte leh hilhtute kiang a kipahna thilpiak a piak ban uah school a zat ding kimawlna vanzat hunkhop pia uhi.

 

Huai ban ah, Headquarter Veng a om The Excel Foundation Academy inleng tuni’n a school mun uah Children’s Day-cum-Maiden Anniversary Celebration Programme zang ua, CT. Lian Guite, MDC New Lamka West in chief guest hihna toh uap hi. The Excel Foundation Academy ah tulel in Peter G. Bieklien, Principal etkaina nuai ah Prep a pat Class V tan om a, stu­dent 140, teaching staff 12 om ua, Mang Gangte in Chairman hihna lenlel hi.

 

Huailou in, tuni sunma dak 9 a pan in Mualkoi a om Covenant School in amau school mun ah Children’s Day zang ua, student-te’n a bawl uh thil tuamtuam lahna a neihzoh un teacher-te toh kipol­hlimna hun zang uhi.

 

Huai ban ah, The Dawn School a kai Class X student-te’n Children’s Day zatna dan in tuni sunma dak 10:30 in Lamka Damdawi in a Children Ward a damloute veh ua, huai ah naupang damloute kiang ah bawngnawi, biscuit leh chocolate chi­hte pia uhi.

 

Young Learners School inleng kumdang a, ahihsek bang un Children’s Day zatna in tuni’n ABC Home, Lajang­phai leh Nehru Marg a om Destitute Children Home leh Mercy Society veh ua, naupangte kiang ah blanket khat chiat pia uhi.

 

 

 

 

Morgue ah anngawl thumna kipan

LAMKA, Nov 14: All Tribal Women Union (ATWU), GHQ makaih in tuni zingkal a pan in Lamka Damdawi Inn huangsung a morgue kong a Tribal Mar­tyr-te sun a lenkhawmna mun ah anngawl thumna kipan hi. Hiai anngawl thumna ahihleh ATWU in Manipur singtanggam Sixth Schedule nuai a en­kol ding a ngetna a bawl bohzui a Delhi a central makaite kimuhpih dia zin ATWU makaite a ding bik a thumna ahi.

 

 

Zingsol Aksi gospel album hongkhia

LAMKA, Nov 14: Zan, Nov 13 sunnung dak 1 vel in Tangmual Presby­terian Church ah C. Neiboi Vaiphei in a bawl Zingsol Aksi Gospel Video Album thak honna om hi. Huai hun Elder Dr. DK Mang in chief guest hihna toh uap in gospel video album thak hongkhia in gospel album thak honkhiak a om kip­ahpih mahmah ahihdan gen hi.

 

C Neiboi’ pasal C Sawma in a zi’n Pathian itna taklatna dia gospel al­bum a bawl kipahpih ahih­dan gen kawm in mipite’n leng kithuahpih a, a guk a ‘write’ sak mailou a lei­sak siausiau ding in ngen hi. Hiai hun zatna ahihleh Lalboi, Chief of Henglep in guest of honour hihna toh uap hi.

 

 

‘1-Day BJP Political Conference’ nei

LAMKA, Nov 14: Tuni sunma dak 11 in Hen­glep Sub-Division sung Gothol khua a Commu­nity Hall ah ‘One Day BJP Political Conference’ om hi. Hiai hun zatna Ngam­khopao Haokip, Chief of N. Zalenphai in makaih a, Upa Ngama, Phuaisan­bung in thumna in hun pan hi.

 

Hilkholun Haokip, Chief of N. Gothol in vaid­awn thugen a, tua zoh in Mangiton Singh, Sr. BJP Leader & Ex-Vice Presi­dent, BJP Manipur; Salam Ibohal Singh, Ex-MLA & Sr. Leader BJP Manipur; M. Bhorot Singh, Ex-MLA & former President, BJP Manipur leh T. Thang­zalam Haokip @ T.T. Ha­okip, former Dy Speaker, Manipur Assembly & Pro­spective BJP Candidate for 57th Henglep AC in thugen uhi. Tuni a ‘One Day BJP Political Confer­ence’ ah Henglep block sung a khua tuamtuam a pan kho hausa (chiefs) 260 val tel uhi.

 

 

SSPP-JHQ Lam­ka Dept keklian

LAMKA, Nov 14: Tuni, Nov 14 sunnung dak 1:30 in SSPP Joint Head­quarters Lamka in SSPP Tower, Hiangtam Lamka ah department kekletna nei uhi. Tuni a Depart­ment keklet a omte ahi­hleh Education Depart­ment, Sports Department, Social & Culture leh Infor­mation and Publicity ahi.

 

Department tua­mtuam a mohpaw dingte ahihleh T. Tuanzakhup, President SSPP Jt. Hqtr in kichiamsak a, D. Kam­chinmang, Local Pastor, EBCC Hiangtam Lamka in amaute a di’n thumsak hi.

 

Hiai hun zatna Lian­zapau Samte, President, SSPP-GHQ leh GHQ makaite’n uap in hasotna thugen uhi. President, SSPP-GHQ in a genna ah, SSPP kichi mimal ziak a mawk puksiat ding hilou a, groupism leh kigen­siatna chihte neihlouh a, mahni mimal hamphatna ding zong a kalsuanlou ding in makai thakte ngen hi. Huai ban ah SSPP motto tawisang kawm a maban a chihtakna toh panla ding inleng member thakte ngen hi.

 

 

Vanman khangsaklou di’n ADCC Chairman in ngen

LAMKA, Nov 14: Tuni sunnung dak 3:30 in Langkhanpau Guite, Chairman, ADCC in amah office chamber ah thuthaksaite kimuhpih a, economic blockade leh sum note thak tungtang a mipite’n haksatna liantak kituak chiat ahihdan gen hi. Huai ban ah Lamka khopi sung a dawr bawl mahajon-te’n godown a van koihsa (stock) omte a beisiangma mipite khual­na a vanman khangsak­lou ding leh thautui leng man tam taktak a zuak­lou ding in ngen hi.

 

Huailou in, India Govt in Rs 500/- leh Rs 1,000/- note-te ‘demon­etised’ ahihdan puang mahleh December 30, 2016 tan hun piak ahih­ban ah March 2017 tan a leng Bank a sum note lui­te khentheih lai ding ahi­hziak in dawr bawlte leh siamsinna innte’n leng mipite khualna a sum note luina ana laksak lai ding in ngen hi. Huai ban ah hiai toh kisia a mipite leng pataulou ding leh Rs 500/- leh Rs 1,000/- note-te zattheihlouh hi­nailou ahihdan gen hi.

 

Tua ban ah Lamka leh Imphal kikal a pas­senger service CDMB­TA leh TRBOTCS kal a parking thu a buaina om tungtang leng pawlpi nihte’n mipite khualna a, a baihtheilam a kilemna pichingtak hon bawlkh­iak uh a deihthu gen in, kitheisiamtuahtak a pan­la ding in pawlpi nihte ngen hi.

 

 

 

 

 

 

 

NEWS TOMKIM

 

Lalthazam in Saikot SDO len ding

LAMKA, Nov 14: Dy Secy to Govt of Manipur in order a suahna ah, Smt Lalthazam, MCS, AC to DC/Ccpur in SDO/BDO, Saikot hihna toh lenkhawm ding hi. Huailou in, G Shantikumar Kabui, MCS, ADC/Senapati PD, DRDA in Dy Secy (AR) & Dy Secy (SAT) lenkhawm ding a, A Shivadas Sharma, MCS, Dy Secy (AR) & Dy Secy (SAT) in ADC/Senapati PD, DRDA len ding hi.

 

 

Mi 125 kiang ah Aknou pia

LAMKA, Nov 14: Tuni sunnung dak 1:30 a pan in Tuibong a ADCC Office ah ADC/Ccpur nuai a Veterinary Dept in tu kum a ding in beneficiary 125 kiang ah Aknou 25 zel pia uhi.

 

 

‘Itna Tullou’ Film hong ding

LAMKA, Nov 14: Zingchiang, Nov 15, 2016 sunma dak 11 in Zogal Memorial Hall, Zoveng ah Zo Film Company in a bawl (L) Nengdoukham leh (L) Dimkhonieng theihgigena dia kibawl “ITNA TULLOU” Zou feature film, Zou Artist Union (ZAU) saina in honkhiakna om ding hi.

 

 

HSA in ngetna bawl

LAMKA, Oct 14: HSA Jt HQ in tuni a thusuah a bawlna ah, student-te a dia kumtawp/ final exam hun ding ahih toh kiton in, HSA functional area sung a nitak dak 6:30 a kipan naupang/student kholai pawt kham ahihdan taklang hi. Huai ban ah examna subuaithei ding a pawlpi tuamtuam inleng bandh/ strike bawllou ding in ngen uhi.

 

 

Tribe leader-te’n SP kimuhpih

LAMKA, Nov 14: Lamka khopi sung a bolero kigu mun mahmahte ziakin Tribe leader-te’n B. Dongzalian Simte, Chairman ZC, Thangjang Haokip, President, KIC; Joseph Lalrothang, President, Hmar Inpui leh Upa Vanlalrinliana, President, MPC HQ Manipur te’n SP/CCpur leh H. Balram, Addl. SP (Ops) kimuhpih in Police Check Post tamptak bawl beh di’n ngen uhi.

 

 

Sunna:

Lianlaldin (2) s/o Soiminlun of Neihsial Veng, Lamka a paita 31-10-16 ni-a tuisa kibuak kha Shija Hospital a ki-enkol damsuah zoulou in tuni 14-11-16 dak 4:30am velin si hi. RIP

 

Nengkhovah Haokip (68) w/o L Helthang Haokip of Kholmun village zan dt 13- 11-16 nitak dak 3:30 vel in lungtang natna ziakin si a, tuni’n kivui hi. RIP

 

 

 

 

 

…for more detail : Here

 

 

 

 

__________________________________________________________________________________________________________

 

THE LAMKA POST | NOVEMBER 16,2016

 

 

 

‘Tripartite Talks’ ah Manipur Govt tel­lou; Economic Blockade sutzop hiding

SENAPATI, Nov 15: United Naga Council (UNC) thusuak in a tak­latna ah, tuni a New Delhi a kihouna ah Manipur Government in ‘district thak nih’ bawlkhiak a sawm tungtang a thu­chian bangmah om thei­hlouh ziak in tulel a ‘eco­nomic blockade’ pailel sutzop hiding hi’n tak­lang hi. Tuni a New Delhi a kihouna ah Manipur Government sik-le-tang a Chief Secretary of Mani­pur leh Special Secretary in-charge of Home, Gov­ernment of Manipur tel ding chih himahleh Ma­nipur Government a pan palai kuamah a tel omlou hi’n thusuak in taklang hi.

 

Himahleh UNC in ahihleh Sadar Hills leh Jiribam tungtang a lai poimoh (documents) tuamtuamte leh hiai toh kisai a Nagate dinmun ban ah hiai tungtang thu (history) Government of India kiang a nouneltak a theisak hidan in thu­suak in taklang hi. UNC president in hiai thu pen Central Government khut a omta hi’n gen a, himahleh hiai tungtang a thil deuhhuailou tung a om leh Manipur Chief Minister O Ibobi Singh in a moh a puak ngai ding hidan in gen hi.

 

UNC thusuak in a taklatna ah, tuni a ki­houna ah UNC a pan palai 6 tel ua, kihouna ahihleh Joint Secretary, Ministry of Home Affairs (MHA) Satyendra Garg in makaih hi. Sunma dak 11 a kipan in kihouna ki­pan a, dakkal khat val kihouna nei uh hidan in thusuak in taklang hi.

 

Tuni a New Delhi a kihouna toh kisai UNC president Gaidon Kamei in thuthaksaite kiang a, a genna ah, tulel a Mani­pur buaina pen Ministry of Home Affairs in a bai­htheipen a hihveng ahi­hna dia theihtawp suah a panla ding ahihdan chiam hi’n gen hi. Tuni a kihouna pen hiai bang dinmun ahihman in, Manipur Govern­ment tel a kihouna neih ahihna dia Central Gov­ernment in chiklaipeuh a meeting samthei hidan in thusuak in taklang hi.

 

“Manipur Gov­ernment toh kikal a kizopna a hoihlouh ziak in tangtak in Manipur Government toh ki­houna omtheilou a, tua ziak a Central Govern­ment palai a hong pang himahleh kihouna ah Manipur Government a pan palai kuamah tellou ahi” chi’n UNC makai khat in gen hi.

 

Tua bangkal ah, Gaidon Kamei in, “Ma­nipur Chief Minister O Ibobi Singh in ‘Pan­dora’s Box’ a honkh­iak ziak a tuni a mi nautangte’n thuak uh ahi” chi hi. Huai ban ah Mr Ibobi Singh leh a team-te’n thagum a bet­daih hon sawm uh leh Naga mipite a kituahpih bang thukna piak hid­ing leh a dinmun a pan UNC nungtolhlou ding ahihdan UNC president Gaidon Kamei in gen hi.  

 

 

Cabinet meeting in Nitha man khangsak ding leh MSPCL staff tamsem lakbeh ding in thupuk

IMPHAL, Nov 15: Manipur Cabinet in tuni zingkal in CM secretar­iat ah CM O Ibobi Singh makaih in cabinet meet­ing nei ua, schedule em­ployment tuamtuam 15 a worker-te thaman khang­sak ding in thupuk uhi.

 

Government thu­puangtu leh Rural De­velopment & Panchayati Raj minister in a gendan in, Minimum Wages Act, 1948 pansan in worker-te thaman khansak ding thu toh kisai, hun lemtan dungzui a zat ding in thu­pukna lak a om hi’n gen hi. Manipur a schedule employment tuamtuam 15 nuai ah, February 1, 2011 a kipan zat ding in, Unskilled labour-te tha­man niampen Rs. 122.10 bikhiah in om a, Semi-skilled labour-te thaman Rs. 129.97 leh skilled labour-te thaman Rs. 132.60 tan in bikhiah in om hi. Cabinet thupukna dungzui in, unskilled labour-te thaman Rs. 225 tan a khansak in om a, Semi-skilled labour-te thaman Rs. 248 in khansak in om a, Skilled labour-te thaman Rs. 273 a khansak in om hi. Labour department nuai a kibawlkhia advisory board in revised wage rate pompih hi.

 

Scheduled Employ­ment tuamtuam 15te ahihleh Agriculture; Con­struction, road and bridg­es construction worker, Public Motor Transport, Shops and Establish­ments, Dam construc­tion leh Irrigation works, Water supply, sanitation, drainage, wood, bamboo, cane furniture leh a dang­dangte ahi hi.

 

Cabinet meeting in, Director IPR post kichi professional post leh Director(IPR) post kichi IAS (Senior Scale) cadre post dan a bawlkhe ding inleng thukim hi. Cabi­net meeting in Manipur State Power Company Limited (MSPCL) a sem ding extra staff lak beh ding inleng thupuk hi. Huaite ahihleh Junior System Assistant 132, Watchmen cum Cleaning Assistant 21 hi uhi.

 

Tuate ban ah Cabi­net in Rural Development & Panchayati Raj Depart­ment for Deen Dayal An­tyodaya Yojana-National Rural Livelihoods Mis­sion (DAY-NRLM) leh Deen Dayal Upadhyaya- Grameen Kaushalya Yo­jana (DDU-GKY) nuai a contract staff 27 la ding inleng thupuk hi.

 

 

UCM, AMUCO, KIM, KSO leh JAC-SH in CM kimuhpih

IMPHAL, Nov 15: Kuki Inpi Manipur leh Kuki Stu­dent Organisation tel in CSOs tuamtuam in tuni, Nov 15 nitaklam in CM Secretariat ah Chief Minister O Ibobi Singh leh Council of Minister-te kimuh uhi. Hiai hun ah district thak bawlkhiak ding ngetna leh UNC in hunchiam omlou a ‘economic blockade’ a bawl tung­tang tel in tulel a state sung dinmun genkhawm uhi.

 

Chief Minister a kimuhpih khit ua Kuki Inn, Imphal a joint CSOs-te’n thuthaksaite kiang a, a gen­na uah, Chief Minister leh a team-te kiang ah state sung a niteng poimoh van tuamtuam kitasamte pe ding a ngen uh ahihdan gen uhi. Himahleh Joint CSOs in ahihleh UNC kiang ah blockade lakhe dia nget sawmlou leh UNC in NH a blockade a bawl ziak a mipite’n buaina a tuahlouhna ding ua panla dia Govt ngen uh ahihdan gen uhi.

 

Joint CSO-te’n Govt toh a kihou sung un Govt lam a pan Sadar Hills leh Jiribam full-fledge dis­trict a bawlkhiak ding tungtang a panlakna omlou ahihdan mukhia uh hi’n AMUCO presi­dent Ph Devan in gen hi. Himahleh Govt in bel tunai zek in Sadar Hills leh Jiribam full-fledged district a puankhiak ana sawmta hi.

 

Tuni a Chief Minis­ter leh Council of Minis­ter kimuhpih CSO tua­mtuamte ahihleh UCM, AMUCO, Kuki Inpi Ma­nipur, JAC-Sadar Hills, CCSK leh KCSO hi ua, amaute’n ahihleh state sung a nam tuamtua­mte tengkhawmte lak a kituahna om theihna dia “district re-organ­isation” bawl ding deih uh ahihdan taklang uhi. Huai ban ah hiai a tung a CSO teng in zan inleng meeting ana neikhawm ua, huai ah kituahtak a tenkhawm ding chih thu tel in thupukna bangzah­hiam bawl uhi.

 

JAC-Sadar Hills Convenor Lekhothang Kipgen in a genna ah, Govt in a tup tangtunlou leh ahihna a dingkiplou a om ziak a tunung sawt­lou a Manipur kuangzak thei ding ahi chi hi. Huai ban ah kum 40 val paisa a nget a om Sadar Hills district bawlkhiak ding tungtang tunitan pichin­louh a om ziak in huai in Manipur buaisak ding ahi chi hi.

 

KIM president Thangkhosei Haokip in a genna ah, tulel in Ma­nipur ah government kua hihiam chih theihzoh hi­lou a, Manipur gamsung kivaipuakna pen lung­khamhuai mahmah hi’n gen hi.

 

UCM president Johnson Elangbam in a genna ah, Jirbam leh Sadar Hills kia hilou in British hun a kipan dis­trict gamgi bawl a om tunitan kisenlai ahihman in district reorganisa­tion poimoh hi’n gen hi. Huai ban ah Joint CSOs in ahihleh tunung sawtlou a district re-organisation bawl ahihtheihna ding a Bill bawlkhe ding a Gov­ernment phu a, anuam-ahaksa palkhawm ding uh ahihdan leng taklang uhi. 

 

 

CDMBTA in a buaina uh Inpite kiang ah tun

LAMKA, Nov 15: Ccpur District Mini-Bus Transport Assn (CD­MBTA) in Keishampat, Imphal a Govt in Park­ing mun dia a sehsak a tan zohlouh tungtang uh leh hiai toh kisai a Tedim Road Bus Owners Trans­ports Cooperative Society (TRBOTCS) Kiran Group toh a kal ua kitheihsiam louhna ziak a zan a kipan Lamka leh Imphal kikal a bus service khawlsak a om tungtang Ccpur dis­trict pansan Innpite thei­sak in, a buaina tungtang uh tun uhi.

 

Hiai toh kisai in tuni, Nov 15 sunnung dak 2 in KIC Office, Tuibong ah Hmar Inpui, Mizo People Convention, Kuki Inpi Ccpur leh Zomi Coun­cil makaite meeting uhi. Hiai hun ah CDMBTA makaite Innpite kiang ah a buaina tungtang uh report in hiai toh kisai a Govt a kipan lai poimoh leh document tuamtuam a neihte uh leng copy pia uhi. Innpite’n leng CD­MBTA in buaina a tuah tungtang ngaikhawk in etzuipih a, panlakpih ding uh ahihdan gen uhi.

 

 

World Diabetes Day zang

LAMKA, Nov 15: Tuni sunnung dak 1:30 in Lamka Damdawi Inn OPD Conference Hall ah District NCD Cell leh Ccpur District Hospital pangkhawm in World Di­abetes Day zang uhi.

 

Hiai hun ah chief guest, functional presi­dent leh guest of hon­our in Dr. P. Binata, MS (Ophthalmology), Jt Di­rector (Health) & SNO (NPCDCS), Govt of Ma­nipur; Dr. Kimngaihch­ing Simte, CMO/Ccpur leh Dr. J. Son Gokham Samte, Medical Supt. District Hospital pang uhi.

 

Chief guest in a gen­na ah, tuni chiang in dia­betes damdawi hoihtak omta ahihman in lauhuai nawnlou leh zunkhum neite’n damdawi nek ding dan bangtak a, a nek uh leh damsiangthei hi’n gen hi. Hiai hun zatna ahi­hleh Doctor leh Nurse-te’n leng uap uhi.

 

 

Gilead Balm Care Center kum 14 chinna zang

LAMKA, Nov 15: Tuni sunnung dak 12:30 in Gilead Balm Care Cen­ter in GBCC Chapel L. Tawna Road, Elim Veng, New Lamka ah a kum 14 chinna lawm ua, Thangk­hosuanmung Guite, EM/ ADCC in chief guest hi­hna toh uap in Pastor M. Gousuan, Local Pastor EBCC, Khominthang in thugen in thumsak hi.

 

Chief Guest in a gen­na ah, hinkhua a ‘selfish’ luatna leh mahni nopsak­na ding kia ngaihtuahna in siatna tun ahihna ah mahni kia kikhuallou a, inkuanpih, khopih-tuipih leh minam tanpha a ngai­htuah poimoh hi’n gen hi.

 

Huai ban ah kibawl­hoih ut chi in a lampi ding zong kei lehang hoihna hongtung ngeilou ding ahihna ah, tu a hunlai a kingaihtuah a kibawlhoi­hna dia panla chiat ding in ‘inmates’(te) ngen hi.

 

Gilead Balm Care Centre patkhiak ahihnung tunitan in mi 1700 omta ua, huaite lak ah tuni chi­ang a saptuam a dinmun poimoh taktak len leh missionary, Theologian ban ah Govt. leh private a sepna hoihtak­tak nei hunkhop omta uhi. Hiai GB Care Centre ah state pua Mizoram, Nagaland leh Arunachal ban ah Manipur a dis­trict tuamtuam a pan in ‘inmate’ om ua, tulel in khamtheih sal a tang, hinna thak zangnuam a kibawl hoihnuam mi 61 om lel uhi. Huai ban ah hiai Care Centre a pan mah in hinna thak nei a sihkhamuanna nei a si mi 200 val omta uhi. Gilead Balm Care Centre ahihleh 2002 a, “Libera­tion of Substance Abuser Through Christ” chih tup a nei a patkhiak a om hi a, tulel in voluntary a sem mi 10 om uhi.

 

 

Gultuk numei naupang SikhLi Regt. Khuga Batallion in enkol

LAMKA, Nov 15: Tuni, Nov 15 sunma dak 11 vel in Mata-Mualtam khua ah gul in naupang tu (bite) a, etkol man ahih zuak in damtak in inn zuanthei hi.

 

Thutut kingahdan in, gul in a tuk ahihleh Ching­nunhoih (4) d/o Thang­khanlam of Mata-Mualtam hi a, a inn kiang ua omlai gul in va tu a, huai phet in kintak in Khuga Dam a om SikhLi Regt. Khuga Batal­lion-te kiang tut in om a, amaute panlakna in etkol­theih in om hi.

 

Khuga Dam a om Medical Officer Capt Ravinder Rai, Sikh­Li Regt. Khuga Batallion in a genna ah, Ching­nunhoih ahihleh a hun a etkolman ahih dungzui in a dinmun lauhthawng huailou a, a poimoh bang a damdawi piak ahih dungzui in damsiang pah dia lamet-huai ahihdan gen hi.

 

Tutung a pen ahi­hleh gul in a tuk (bite) khakte lak a Khuga Batal­lion in a etkolkhak uh a nihna hita a, hichibang tuahsia tuakte panpih dia mansa a om gige uh ahihdan SikhLi Regt. offi­cial-te’n gen uhi. Huailou in. SikhLi Regt. Khuga Batallion-te’n a vangkim in damlouhna tuamtuam nei amau va naihte ana enkol zel ua, damlouhna toh kisai a kuapeuhmah panpih dia chiklaipeuh a mansa a om uh ahihdan leng gen uhi.  

 

 

Manipur a bank-te a sum note neute beisiang; ATM-te kikhak

IMPHAL, Nov 15: Tuni Sepnawnni a Imphal khopi sung a ATM booth tengteng a kikhakvek ziak in, sum note lian­zaw lakhe nuamte’ tung ah buaina leh haksatna uangsem tun hi. State sung bank-te a sum note neuzaw a beisiangvek toh kiton in, bank thuneite’n RBI kiang ah state ad­ing Rs 304 crore piakbeh ding in ngen uhi. Chik­chiang a sumlom hong­tung ding chih theihbut a hihlouh ziak in, maban a mipite zat ding bank-te kikhakvek thei dinmun in om hi.

 

Imphal a SBI head office in ATM pansan in sumpiak khiak khawlsan chi’n bank official thu­suak om hi. Imphal leh phaizang bial a veng tua­mtuam a SBI branch-te ah sum beisiangvek phial hi. Bank-te a bik in State Bank of India, Imphal a sum a beisiang vek ziak in, tuni’n ATM booth-te zat theih omlou hi. Tuni a ATM booth pawlam a mipi sautak a kivolh nung dakkal tamlou sung a ATM booth-te a sum a om nawnlouh ziak in, ATM booth mai a kivual mipite lungkimloutak in inlam a a kik uh ngai maimah hi.

 

SBI thusuak in a tak­latdan in, Rs 100 note-te a beisiang vek ziak leh ATM-te a Rs 2000 note thakte bulhtuahna toh kisai a Mumbai a kipan sukfel ding omte a zekai ziak in, bank-te’n ATM a sum guanlut ding khawl­san uh hidan in taklang hi. SBI branch tamzawte a sum a beisiang vek ziak in, mipite’n Rs 500 leh Rs 1000 note luite, sum note neuzawte toh a khen theihlouh ziak un buaina liantak tuak uhi. Novem­ber 8-9 kawmtuah zan­kim a kipan Centre in Rs 500 leh Rs 1000 currency note-te sihsakvek ding a thupuan a bawlnung No­vember 11 a kipan in state sung a ATM 74 lak ah 19te kia in nasepna pan­kik thei ua, November 11 a Rs 107 crore a hongtun nung in, November 12 leh 13 in ATM dangte’n mip­ite kiang ah sum piakkh­iak pankhia uhi. Thu­suak dungzui in, mipite buaina sukkiamna ding in, bank account a kipan sum khenna,deposit leh withdrawal leh ATM akipan sum piakkhiak a omte khansakna ding toh kisai panlakna pailel hi­dan in taklang hi. Imphal a Rs 2,000 note thakte a hongtun nung tan inleng state a ATM-te’n Rs 100 note-te kia suahkhia uhi. Gamsung mundang a te hihbang in, state sung ah Rs 2000 not-te bank branch-te kia ah piakkh­iak in om uhi. Thusuak dungzui in, state sung a ATM-te a Rs 2,000 note thakte guanlut a hihthei­hna ding in, bulhtuahna nasepna paizomzel hi’n taklang hi. Pathianni tan in state sung a SBI branch tuamtuam ah Rs 1000 leh Rs 500 note-te Rs 100 crore vel ding koi­hlut in om hi.

 

Tuabangkal ah, Narendra Modi gov­ernment in National Socialist Council of Nagaland-Isak-Muivah (NSCN(IM)-te deih­sakna tuambik pia in, Manipur a Ukhrul leh Tamenglong district 2te ah Rs 122 crore hud­ing Rs 2,000 leh Rs 500 currency note thak truck dimtek a kithun thonkh­ia hidan in, Imphal a local daily newspaper khenkhat in, “thequint. com” thusuak pansan in suahkhia uhi. RBI’s Gu­wahati regional branch thuneihna in NE state tengteng huamkhavek a, Guwahati a kipan special helicopter khat a Ukhrul leh Tamenglong a sum tamtak thotkhiak in om a, district nihte’n Rs 61 crore tuak ngah uhi.

 

 

CM leh Guv in Na­tional Press Day, 2016 zatna uap ding

Imphal, Nov 15: Directorate of Informa­tion and Public Relations, Government of Mani­pur in zingchiang, Nov 16 sunma dak 10 a kipan 1st Battalion Manipur, Banquet Hall, Imphal ah National Press Day zang in One Day Workshop nei ding uhi. Hiai hun ah chief guest, president leh guest of honour in Dr. Na­jma A. Heptulla, Hon’ble Governor Manipur; Shri O. Ibobi Singh, Hon’ble Chief Minister Manipur leh Shri K. Radhakumar Singh, IAS, Commission­er, IPR, Manipur pang ding uhi.

 

 

CCC in vanman khang­saklou di’n theisak

LAMKA, Nov 15: UNC in National High­way te a hunchiam om­lou ‘economic blockade’ a bawl paitou lel ziak in niteng poimoh tuamtu­am kitasam a om toh ki­sai in tuni’n Ccpur Con­sumers’ Club in thusuah bawl hi.

 

CCC thusuak in a taklatna ah, Lamka kho­pi sung a dawr bawlte’n ‘economic blockade’ hun lemchang a la a, niteng poimoh van tuamtuam koihkholhsa (stock) omte man khangsaklou ding in theisak uhi. Hun paisate a ‘economic blockade’ om chiang a hun lemchang a la a, van tuamtuam stock omsate selmang a, man tamtaktak a zuak om ziak in CCC in hiai tungtang ngenteltak a enkai ding leh a poimoh leh godown tanpha enchian ding uh hidan in taklang uhi.

 

Huai ban ah ‘eco­nomic blockade’ bawl ahihnung kha kimkhat leng ching nailou ahih­man in stock omte man khangsaklou ding leh hiai theihsakna zuiloute tung a ‘action’ khauhtak lak hiding hi’n taklang uhi.

 

 

 

Election Commis­sion DG in Manipur hongpha ding

IMPHAL, Nov 15: Maban a Manipur As­sembly Election ading a poll kisakkholna omte enkhe ding in, November 21, 2016 in Director Gen­eral of Election Commis­sion of India (Manipur in-Charge) Sudeep Jain in state hongpha ding hi.

 

Thusuak in a taklat­dan in, kum nawn bullam deuh a neih a om ding, state a general election sep­suah ding toh kisai Director General hong veh hun in thupukna lak in om mai­thei ding hi. Political party-te’n state a single phase election election neih ding phut uhi. September 2016 a Chief Election Commissioner Nasim Zaidi makaih Election Commission of India full commission-team-te’n a hon­gveh nung ua, Director General ECI Sudeep Jain hongzinna ding vai toh ki­sai vehna poimohtak hiding a, poll toh kisai a kisakkholna omte leng etkikna om ding hi. Gao, Uttarkhand, Punjab leh Uttar Pradesh-te toh kibang in 11st Manipur Legislative Assembly election neih hiding hi.

 

 

Blockade leh Counter block­ade in nautangte buaisak

Imphal, Nov.15: Manipur state sung Na­tional Highway dung a UNC indefinite econom­ic blockade leh Imphal khopi pansan khotang pawlpi khenkhatte coun­ter blockade-te’n hill district a mohna neilou nautang kiviallelhte tung ah buaina leh haksatna li­antak tun hi. Tuni’n leng Khuyathong ah counter blockade supporter-te’n Sadar Hills zuan ding vanpoimoh tamloute lakkhiaksak vek uhi.

 

Imphal leh Kang­pokpi kawmtuah passen­ger bus a tuangte’n Khuy­athong a Kangpokpi bus parking mun a counter blockade supporter-te’n van nen, damdawi tanpha a puakte uh laksakvek uh hidan in complaint thehlut uhi. Sapormeina, Sadar Hills a kipan numei khat in a gendan in, ki-ensak ding in Imphal pha ua, doctor-te chah damdawi a leite nasan uh counter block­ade supporter-te’n Khuy­athong a laksakvek uh hidan in gen hi. Damdawi natan hawi a hihkeileh damloute thah ding chi­hlouh ngal tupdang bang­mah neilou uh ahihdan langsak a, khat leh khat kal a kitheihsiamlouhna a om sang a, daihsan mailouh ngal lampi dang ding om­lou chi’n gen hi. Counter blockade sup­porter-te’n mihing hin­na toh kisaikha emer­gency thil leh vante bek a theihsiam uh poimoh mahmah chi’n gen hi. Passenger dang khat in a gendan in, bus sung ah blockade supporter-te’n naupangte nektheih tawilai nasan laksak ua, mihingtung a thiltung ding in deihhuailou chi’n gen hi.

 

Sadar Hills civil body tallang a, thangpai mahmah makai khat in a gendan in, state Govern­ment in a hon bawlsiat zihzehna thu a thangpai­hna leh hehna a om laitak a, dohzoutak a economic blockade leh counter blockade puakgikte hun sawttak daih dide san a hihnung a, a kintheilam a buaina omte sukveng a hihkeileh thangpaihna omte sungkhia a kalbi khauhtak lak poimoh khong ding ahi chi’n gen hi. Kangpokpi bus pas­senger dangte’n a gen­dan un, counter blockade supporter-te’n lungsim neitak a counter block­ade a neih uh poimoh a, phaizang mite toh thuak­dan kibangvek a hih ziak in, counter blockade ziak a, thuakna a behlap ding uh hilou hi’n gen uhi.

 

Tuabangkal ah economic blockade leh counter blockade ziak in, Kangpokpi ah van­man nasatak in khang a, petrol man litre ah Rs. 250-300/- leh diesel man litre ah Rs. 120- 150/- tung hi.  

 

 

Salt Brook School in Annual Day zang

LAMKA, Nov 15: Tuni, Nov 15 sunma dak 10:30 in Tuibong a Salt Brook School in 13th Annual Day zang uhi. Hiai hun ah chief guest, guest of honour leh func­tional president in T. Manga Vaiphei, Min­ister (PHED, Labour & Employment, Science & Tech); Seiminthang Len­thang, MCS, SDO/Cc­pur leh James Doujapao Haokip, MCS, SDO/ Tuibong pang uhi. Rev. Thanglen Haokip, KBC in thumna in hun pan a, student-te a pan tal­ent show leh lasakna om in K.Thangkhankhup, HoD, Academic in top­per award piakkhiakna makaih hi.

 

Chief Guest in a thu­genna ah, private school bawl kichi thil baihlam hilou leh kuhkalna leh tupna toh pan ngai hi’n gen hi. Tu hun Computer Age hita ahihman in, stu­dent-te’n certificate nei­hna ding lel a laisimlou a, siamna taktak ngahsawm a sin ding in student-te hasuan hi.

 

Chief Guest in a gen­zelna ah, nu leh pate’n sum-le-pai tamtak seng in tate itna leh lam-etna toh private school ah kaisak ua, khenkhat in state pawlam ah hak­satak in tate siamsin ding a sawlkhia hi’n gen hi. Himahleh student khenkhat in nu leh pate haksatna theihpihlou a nuamtal pawl om ahi­hman in, student-te’n nu-le-pate itna leh tate khualna a ziak a haksatna a tuahte uh theihsiampih a kuhkaltak a laisim ding in ngen hi.

 

Salt Brook School ah ahihleh tu kum in student 1800 val om a, tu kum leh kum paisa in Board of Secondary Education Manipur nuai a High School Leaving Certifi­cate Examination ah pass percentage 100 tung hi.

 

 

Manipur a pan truck hawm 286 Silchar tung

IMPHAL, Nov 15: Thautui tel a van poimoh tuamtuam paw ding Manipur a kipan truck hawm 286 tuni zing­kal in Assam state sung Chachar district head­quarter Silchar tung uhi. Hiai thu ahihleh UNC in NH a hunchiam om­lou economic blockade a bawl ziak a thautui leh niteng poimoh ki­tasam Manipur a ding in tanchin kipahhuai suak hi.

 

Truck 286 lak ah oil tanker 46 leh bullet tank­er 63 tel a, huaite ahihleh ni 2/3 nung a Silchar a kipan Imphal hong­tung kik ding ua lam-et ahi. Huai ban ah Assam Government in Manipur a thautui kitasam pan­pihna ding a Oil Tanker 17 pia hidan in official thusuak in taklang hi. Blockade bawl ahihnung ni 16 chingta a, tua ziak in state sung a thautui ki­tasam petmahta hi.

 

Thautui taksap ziak in state sung ah petrol litre khat ah ‘black’ in Rs 250-300 kikal in kizuak a, huai ban ah school transport pawl inleng thautui omlou chih ziak a service a khawlsan ziak un school tamtak khawl­loh uhi.

 

State Government in Imphal-Jiribam tawn in Silchar a thautui paw ding in zan in truck hawm sawlkhia a, hiai toh kisai in Manipur Consumer Affairs, Food and Public Distribution Director M Yaiskul Singh leng tu in Manipur a ding thautui leh van poimoh puak dingdan ngaihtuah in Silchar ah omlel hi.

 

Manipur Govt in Sa­dar Hills leh Jiribam dis­trict piching a puankhiak a sawm deihlouh ziak in UNC in October 30 zan­kim a kipan hunchiam omlou in National High­way ah economic block­ade bawl hi. Huai ban ah hiai kiphinna toh kisai mah in Naga area sung a national project nasep­na pailel teng leng khak (ban) hi.

 

 

 

 

 

 

NEWS TOMKIM

 

SDPO/Thanlon in charge la

LAMKA, Nov 15: AJ Khongsai, MPS in zan in Sangboi Gangte, MPS a pan in SDPO/Thanlon charge la a, office kai in nasep pan ngal hi. Sangboi Gangte, MPS ahihleh 1st Bn IRB ah suan in om hi.

 

 

GLS in kipahpih

LAMKA, Nov 15: Lunzamang Thangjom s/o Elder Lienkhopao Thangjom of Chiengkonpang in Madras University a pan M.A. (Public Administration) final examna a first class a, a zohna tung ah Gangte Literatire Society in kipahpih ahihdan Secretary Information Thangtinthuom Gangte in thusuah bawl hi.

 

 

Bank leh ATM Booth ah mipi tam

LAMKA, Nov 15: Govt of India in Rs 500 leh Rs 1000 note ‘demonetise’ a bawlnung in ni khat a sum lakkhiak theih ding zah bikhiah (limit) a bawl ziak in niteng in Bank leh ATM booth a sum lakhe ding mipi tamthei mahmah hi. Lamka khopi sung a ATM booth kihonnate ah sum la ding in mi tamtaktak kivual ua, Bank ah leng mi a tamtheih luat ziak in sunnung dak 1 vel khong in Bank khak in om hial hi. Huailou in, sum lakhe ding mipi a tam mahmah ban ah Rs 500 leh Rs 1000 note luite bank a deposit ding leng kiam tuanlou in niteng in tam deuhdeuh banglai hi. Lamka khopi sung a bank tuamtuamte lak ah SBI/Ccpur Main Branch ah mi tam diak a, staff khenkhat zankhang a innlam pai pan leng om uhi.

 

 

‘Itna Tullou’ (Zou Feature Film) hongkhia

LAMKA, Nov 15: Tuni, Nov 15 sunma dak 11 in Zougal Memorial Hall, Zouveng ah Zou Artist Union (ZAU) makaihna in “Itna Tullou” (Zou Feature Film) honkhiakna om a, S. Tiken Singh, Work Manager leh N. Ibochau Singh, Special Contractor in chief guest leh guest of honour hihna toh uap uhi. Hiai hun zatna Paul TK Lal leh Bliss Lhingboi in makaih ua, Upa Thangkhokam in thumna in hun pan hi. M. Thanga Zou, Director Zo Film Company in vaidawnna thugen in Film toh kisai pulak hi. Zogam Ronald Lalpu, Lead Hero, ‘Itna Tullou’ in kipahthu gen in John Zamkhomang in thumna in hunkhak hi.

 

Hongkhiak a om ‘Itna Tullou’ film piching a bawlkhiak a om kip­ahpih mahmah ahihdan chief guest in gen a, ma­ban a lamzangtak a mipi lunglutna leh market li­anzaw luahthei ding film bawlkhe ding in deihsak­thu gen hi.

 

Hiai hun ah Zou Gospel Artist-te ban ah M. Lawrence leh Hatboi, Sianpiah leh Muannu, James Arjun leh Bliss Lhingboi, Paukhanlian in a vangkim in lasa ua, programme zoh in Film Preview Show bawl uhi.  

 

Sunna:

T Thangchinlian s/o Ngillou of Valveng, New Lamka in damlouhna ziakin tuni 15- 11-16 nitak dak 7:30 in si a, zingchiang in New Lamka YPA.

 

 

 

 

 

…for more detail : Here