You are here: HomeRSS FeedsThe Lamka Post

The Lamka Post | August 28-29, 2016

Monday, 29 August 2016 18:45

Aug 28 zankim apan sun dak 12 sung Total Shutdown om ding;

Tribal area teng ah Sept 1 apan 4 days General Strike om ding

Lamka, Aug-28: Joint Action Committee Against Anti Tribal Bill (JAC-AATB) in Tribal Unity Day zatna ding toh kisai a niteng a hunzat dingdan bikhiah a bawl paitou zel in tuni’n Tribal mite tenna biakinn tua­mtuam ah tribal mite kip­umkhatna ding a thumna hun zat in om a, nitak in tribal mite tenna inn teng ah candle detkuang ahih banah inkuan thum­khawmna nei in pupa apan luahna gam sung hi­hdamna ding in bangkim hihthei Pathian kiang ah ngetna neih in om hi.

 

JAC-AATB in thu­suah a bawldan in Au­gust 28, 2016 zankim apan in Total shutdown kipanta in 29 sun dak 12 tan hi ding hi. August 29, 2016 sunma dak 10.00 in numeite’n Silent rally nei ding uh a, nitak dak 6.30 apan in Tribal mite tenna inn teng ah candle detkuang hiding hi. Au­gust 30, 2016 sunma dak 10.00 apan in mass rally om ding a, nitak dak 6.30 apan in Salpha Pumbuk, Hiangtam Lamka ah mipi paikhawm hiding a, Trib­al Martyr 9-te zahna piak ahih ding banah thum­khawmna om ding a, huai hun toh kituak nitak dak 6.30 apan in tribal mite tenna inn teng ah Candle detkuang hiding hi.

 

August 31, 2016 sun­ma dak 9.00 apan in Gun license nei teng in kapging banah Dakpi tumging hid­ing a, sunma dak 10.00 apan in District Hospital a Morgue ah Tribal martyr-te zahna piakna in hunzat hiding hi. Tribal Unity Day program hunpi zatna ahihleh sunma dak 11.00 in kipan ding hi.

 

Tuabang kalah, Outer Manipur Tribals’ Forum (OMTF) leh Joint Action Committee Against Anti Tribal Bills (JAC-AATB) in hongtungding Sep­tember 1, 2016 zankim apan in Manipur a tribal mite tenna bial teng ah ni 4 sung daih ding Gen­eral Strike pat sawm uh hi’n thusuak in taklang hi. Hiai General Strike ahihleh Manipur gov­ernment in maban zek a Assembly session hun a ‘Regulation of Non- Local People of Mani­pur bill-2016’ luikhiak a sawm deihlouh taklatna hiding hi. Manipur As­sembly in apaisa August 31, 2015 a Bill 3 a pass-te tungtang felsak ahi­hma Bill thak luikhelou ding leh tribal martyr-te tungtang diktak a saisak ahihma vuihlouh ding in Tribal Civil Organisa­tion tuamtuam in phu mahleh limsak a omlouh ziak hi’n thusuak in taklang hi.

 

General strike neih ding ahihleh OMTF leh JAC-AATB in August 28, 2016 a joint meeting a neihna ua thupukna hi a, OMTF ahihleh Thadou Inpi, United Naga Coun­cil (UNC), Hmar Inpui, Mizo People Convention (MPC) & Zomi Council kigawmkhawmna ahi hi. General strike ahihleh hongtungding Septem­ber 5, 2016 zankim in bei ding hi. Huai banah, tuni a joint meeting hun ah JAC-AATB in Draft pro­posal a bawl genkhawm­na a neih nung in OMTF Convenor Gaidon Kamei leh Dr R. Sanga in August 29, 2016 tan a finalized a bawl ding un mohpuak­na pia uhi. UNC presi­dent & OMTF Convenor Gaidon Kamei leh Dr. R.Sanga (Zomi Council) in Governor of Manipur a Memorandum submit ding mansa a koih a, Raj Bhavan apan chialna a om hunhun a piaklut ding ahi hi.  

 

 

Manipur Guv Najma Heptulla in PM leh HM kimuhpih; sum dinmun leh siamsinna toh kisai genkhawm

Imphal, Aug 28: Zan Kiginni in Manipur Governor thak Dr Najma Heptulla in New Delhi ah Prime Minister Nar­ender Modi kimuhpih a, Manipur state a khotang, sum dinmun leh siam­sinna lam toh kisai in, thu poimoh tuamtuam genkhawmpih uhi.

 

Tuni Pathianni a Raj Bhavan apan press com­muniqué in a taklatdan in, Dr Heptulla in Prime Minister kiang ah, state a tourism lam hatsak sem­na ding a kong zatak om ahihdan theisak a, Mani­pur kichi mun etlawmtak leh tawndan a hausa ahi­hdan mipite’n a theihna ding un, khopi lianzaw khenkhat Delhi, Mumbai, Bangaluru leh a dangdang toh Manipur state in di­rect air-connection a neih poimoh hi’n leng theisak hi. A bik in numeite mit­suan deuh in, tualaite lak a skill development leh amaute toh micro-credits linking bawl hileh sepna tamsem a bawlkhiak kia hilou in, entrepreneur a hong suah theihna ding un naktak in hanthawn ding chi’n Governor in PM theisak hi.

 

Governor in PM kiang ah, Manipur state ah kho­tang vai toh kisai in cam­paign tuamtuam a bik in, kim-leh-kiang kepb­nitna, sianthouna, “Beti Bachao-Beti Padhao” chihte uangtak in paipih in om a, mass campaign pankhia a tup leh ngimte hatsemna ding in pan nasatak leng lak in om chi’n gen hi.

 

Governor in panlak a neih lelte PM in phat mahmah a, mipite toh kizopna hoihzaw a om theihna ding a aware­ness campaign a neihte leng kipahpih mahmah hi. Khantouhna nasepna paipih zelna ding leh socio-economic ban ah siamsinna lam toh kisai a panlakna omte hatsemna ding a state tung a kithu­ahpihna leh gupna petou den ding inleng chiam hi.

 

Governor in Union home minister Rajnath Singh leng kimuhpih a, state a dan leh thupiak dinmun toh kisai leng theisak hi. Nipikal khat paita in, Manipur Gover­nor 18na len ding in, Dr Najma Heptulla in Mani­pur Governor office luah hi. Manipur state a numei Governor pang masapen hihna leng luah hi.  

 

 

Richter scale 3.7 a hat zinling in Tamenglong bial sawiling

Imphal, Aug 28:India Meteorogical Department (IMD) thusuak dungzui in, zan Kiginni nitak dak 8 vel in, Richter scale 3.7 zinling hat lawlou in Manipur state sung Tamenglong biallak sawiling hi. IMD bulletin thu­suak in a taklatdan in, zinling kipatna a hihleh latitude 24.8N leh longitude 93.5E in a huankhak sung leinuai kilometre 14 a thuk a kipan hidan in taklang hi.

 

 

ILPS ngetna in nu­mei 40 vel in relay hunger-strike zom

IMPHAL, Aug 28: Tuni Pathianni in, Sagol­band Tongbram Leikai Meira Paibi member-te’n Keishampat Leimajam Leikai ah Joint Commit­tee on Inner Line Permit System in a sai relay hun­ger strike vazom uhi.

 

A baihtheilam a JCILPS convenor lui Khomdram Ratan Singh khah ding leh Manipur a Inner Line Permit Sys­tem zat ding ngetna a kip­hinna pailel Sagolband Meira paibi member 40 vel in zom uhi. Inner Line Permit System zatkhiak a hih chiang in, state sung a leitang neitute kepbitna taktak om thei pan ding hi’n gen uhi.

 

 

Fee piak zohlouh ziak in School thuneitute’n student vawlum in ngoh

Imphal, Aug-28: Langol a Residential Kids Care School a kai Suresh Tongbram’ a pate’n a fee a piak zohlouh ziak un School thuneitute’n vawlum uh hidan in a pi­annapa Bira Tongbram in police ah report a, police in case chiamteh in Post mortem result ah sihna dan ngeina lou a si chih a kilatna om leh School thuneitute mankhe ding uh hi’n thusuak in tak­lang hi.

 

Suresh Tongbram pi­anna pa Bira Tongbram in police a theihsak dan in, a tapa School kaina toh kisai a fee a piak zohlouh ziakin School thuneitute’n fee pesiang ding in theisak uh a, fee a piak keileh School apan a tapa lakhe ding in theisak uhi. Fee piak ding neih louh ziak in a tapa lakhe ding in kuan mahleh fee pelou a, a tapa lakhe theilou ding hi’n School thuneitute’n a na theisak uhi. Sintawpni paisa zan in School thuneitute’n a tapa Bira Tongbram na­satak in vua uh a, thu­manlouh ziak a vuak a om hidi’n ngaihtuah lai hi. School thuneitute’n August 31, 2016 tan a fee pesiang di’n theisak nawn uh hi’n gen hi. S u r e s h Tongbram leng inn a tun apan buaisia in thoukhe nawnlou a, soisak a omna ziak in Kiginni i.e. August 27 in si hi. Hiai thu ah re­port a om dungzui in hospital a post mortem bawl din police in sawl a, sihdan ngeina hilou a si chih chetna a omleh School thuneitute matkhiak sawm uh hi’n police thusuak in gen hi.

 

Bira Tongbram in ahihleh a tapa Suresh Tongbram sihna tung­tang thudik a vaihawmna a om keileh siluang lak sawmlou a, a taksa tung ah vuak a om ahihdan kilatna tamtak om hi a gen in soisakna thuak zoulou a si hi’n gen a, po­lice in leng ngentel takin suizui uhi. Thusuak dan in, School thuneitute’n hiai thu ah gen-le-sak banghiam nei uh chihthu hiaithu kaihkhawm tan in bangmah zak hilou hi.  

 

 

State Govt in ‘Viral Hep-C Task Force’ bawlkhia

IMPHAL, Aug 28: Manipur a Hepatitis C natna kithehdalh zelte dalna ding kalbi lak­na leng hiding in, tuni Pathianni in, medical practitioner-te toh kithu­zak in, “Viral Hepatitis- C Task Force, Govern­ment of Manipur” chih thupi pansan in, Hepa­titis-C(hep-C) task force bawlkhiak in om hi.

 

Hiai panlakna toh kisai, tuni a conference hall, Babina Diagnostics, Porompat a Community Network for Empower­ment (CoNE); Director­ate of Health Services, Government of Manipur leh Babina Diagnostic-te’ lamkaihna nuai a “Use of DAAs for treatment of Hepatitis C” toh kisai a ni khat sung daih ding ‘training pro­gramme cum consulta­tion’ zatna hun ah thupuk uhi.

 

Training programme honna hun ah chief guest in Health Services Direc­tor leh State Health Mis­sion Director Dr Okram Ibomcha pang hi. Dr Okram Ibomcha in a gen­dan in, CoNE panlakna toh hichibang program sai a om, state in a ngaih poimoh mahmah hepa­titis-C dalna khangthu a ding a hun poimoh tak ahi chi’n gen hi. Training programme in hepatitis- C etkol dingdan toh kisai in, doctor-te kiang thu poimoh leh theihtuak omte pekhe ding chi’n gen hi.  

 

 

Pawlpi tuamtuam in or­der zukkik ding in ngen

LAMKA, Aug. 28: Hmar Inpui, Kuki Inpi, CC­pur, Zomi Council leh Mizo People Convention in Ma­nipur Government nuai a Home Department in police constable 2000 (Male) lak­na dia 2013 a PET leh Writ­ten Test a zohsa uh zukkik­na order a suah uh toh kisai in thusuah bawl uhi.

 

Thusuak in a taklatna ah, police constable 2000 lakna dia PET leh Written Test zoh ahihnung result leng puankhiak a omta himahleh paulap mumal omlou a cancelled order suah a, a thak a dikloutak a recruitment process pat thak dia order a bawl­pen poisa in mohpaih thu puang uhi. Hiai toh kisai in Apex Body tuamtuamte’n 2013 a PET leh written test zousate’n hong tung ding 30th & 31st August 2016 recruitment om thak ding a kihellou ding in ngen uhi.

 

Tuabanah, KSO-CCpur leh HSA Jt Hqtrs inleng hiai toh kisai a re­cruitment process neih thak dia government in order a bawl zukkik ding in ngen uhi. 2013 a PET leh Written Test zousa candidate te’n kinepna li­antak toh a omlai ua can­celled a om ziakin can­didate te’n theisiamlou ahihna uah order omsa enkik thak ding in ngen uhi.

 

 

ID BYF Khawmpi 30na lohchingtak in zou

Imphal, Aug 27: Imphal Division BYF Khawmpi 30na “Thutak leh Diktatna a kibul­phuhthakna” chih thupi zang in a paisa Aug, 27, 2016 in EBCC, Lamphel ah Rev. K. Kamchin Khup D.S Imphal Division in a hon khiak, tuni nitak lam in Upa D. Khamzathang chairman DWC in khak­na nei in khawmpi lohch­ingtak in zousiang uhi. Hiai khawmpi sung in thugentu ding in Rev N. Pumsuanmang, YC leh Rev. K. Kamchinkhup DS Imphal Division pang uhi.

 

Hiai Khawmpi sung in kitaitehna thuamtuam lapawlpi, Duet leh Drama chihte in Imphal Divi­sion in a huam khak Paite Veng, Canchipur, Tribal Colony, Game Village, Langol leh Lamphel te tel in kawmpi lohchingtak zousiang uhi.

 

Hiai khawmpi a kidemnate ah; Duet ah Tribal Colony, Langol leh Paite vengte’n khatna, nihna leh thumna la ua, la pawlpi ah; Lamphel, Paite Veng leh Langol in khatna, nihna leh thumna la ua, Drama ah Langol, Tribal Colony leh Game Village in khatna, nihna leh thumna la uhi.

 

 

UPC in kholak ah Tanchinhoih gen

LAMKA Aug 28: V. Munhoih, New Lamka a om United Penticostal Church (UPC) saptuam in K. Aichin Bazar, V. Munhoih, New Lamka ah tuni sunnung dak 2 in kikhopna nei uhi. Hiai kikhopna ahihleh crusade a neih hun ua halhthakna a ngah dungzui ua kholai leh mipi zak dia Pathian thu tangkoupih lunggul­hna neih ziak a hiai hun zang uh ahihdan gen uhi.

 

Revival Crusade ahihleh apaisa August 24, 2016 a, a pat uh hi a, tuni ni­tak programme zou sian­gta uhi. Crusade ahihleh Lamka Local, V. Munhoih Local leh Gangpimual Local kigawm a, a neih uh hi a, Revival Crusade neih ahih sung in Pastor B. Lalzaluai, Pangzawl Sectional Pastor in Path­ian thutak gen hi. Cru­sade ahihleh Saipum leh Hebron (Phailian) ah nei zouta ua, V. Munhoih pen a zawhna hita hi. UPC Saptuam ahihleh section tuamtuam in kikhen a, Pangzawl section nuai ah Local saptuam 11 om uhi.

 

 

NESO Advisor in ‘51st AMSU Founda­tion Day’ uap

IMPHAL, Aug 28: Tuni Pathianni in, DM College ground, Imphal ah All Manipur Students’ Union(AMSU) in, a kip­huhkhiak nung uh kum 51 chinna lopna nei ua, Northeast bial a student pawlpi upapen hihna leng luah uhi.

 

Program zatna hun ah chief guest in NESO Ad­visor Dr Samujjal Bhat­tacharhya pang a, NE bial a AMSU makaite, office bearer luite, student-te leh gumtu tamtak pai­khawm uhi. Dr Samuj­jal Bhattacharhya in a gendan in, tuni kipahna ni ahi a, NE bial a stu­dent pawlpi dangte tung a hanthawnna piakna ni leng ahi chi’n gen hi. NESO Advisor in a gen­dan in, Centre in politic toh kisai in, NE bial state 7( tu a 8 phata) in khen­zak a, Northeast region sa khat in ding den ding a, kipumkhatna toh khosa den ding a, lungsim, taw­ndan leh ngaihtuahna bangkim ah kizopna neitou den ding chi’n gen hi.

 

I lungsimte uh kikhenzak thei mah ahi. Politician-te’n khotang khenzak khin mahle uh, tawndan in NE mipite kipumkhatsak den ding a, i tawndante uh suse ding a dai dide a, a guk a panlak­na omte hihchimitna ding in cultural movement toh kuan hiding chi’n gen hi. Tulel a dan toh kituaklou a state a pawlmite hong guklutna thubuai toh kisai NESO president in a ged­dan in, Manipur in ILP system a neih teitei ding ahi chi’n gen hi. NE pum­pi in ILPS a neih ding ahi, NE state khenkhat in ILPS a zatkhiaklouh thu dot thamching a, state tam­lou chik in ILPS zangkhia chi’n gen hi. NE a pawlam mite a tamluat ziak un, sung lam leh pawlam ah kinuaisiahna kipankhin a, pawlam mite’n election a tuhlouh himhim ding uh ahi chi’n gen hi. Manipur NE state pumpi ah leitang neitu mipite bitna ding panlak hiden ding chi’n gen hi.

 

` Keynote address pia AMSU secretary gen­eral Manjit Sarangthem in a gendan in, tuni tan in khovel pumpi ah student-te’n khotang ah kikhenna maituah in neitou den uh chi’n gen hi. Himahleh tu kum zabi 21 ah, Manipur a student-te’n a tan ding bangtak in dikna tanvou a tang na uh hiam chih leh khosak theihna ding dan omsa nuai ah dikna tan­vou piak a om tengteng a zangkhe vek na uh hiam chih dotna a kibawl uh poimoh chi’n gen hi.

 

Program zatna hun ah AMSU president P Nilakanta, NESO Co-ordinator Pritam Sonam, NESO former general sec­retary Gumjhum Haider, Arunachal Pradesh leh NE state dang a kipan stu­dent makai hunkhop leng tel uhi. AMSU president Sanasam Subashchandra in souvenir leh website leng hongkhia hi.

 

 

EBC Lamka N. Division Dorcas’ khawmpi zou

LAMKA, Aug. 28: EBC Lamka North Divi­sion Dorcas’ Pawl in “Na lei siit uh let unla, a leit­angte khentam un” chih thupi pansan a khawmpi lian 8 veina apaita 26th August 2016 nitak a ki­pan Bethany EBCC a, a neih uh tunitak in zou siangta uhi.

 

Hiai khawmpi ah Evan T. Damkhothang thugenpi in pang a, khawmpi sung a Seminar a sinsaktu in Rev. Paukhanmang Guite leh Jimmy Ginbiakthang pang uhi. EBC Lamka North Di­vision sung ah khua 18 vel om uhi.

 

 

YPA Vangai block hon thak toh kisai YPA makaite’n report pia

LAMKA Aug 28: Young Paite Associa­tion (YPA), Vangai Block tungding thak ahih toh kiton in tuni sunnung dak 1:00 in YPA General Headquarter Office, Hi­angtam Lamka ah YPA heutute’n YPA Vangai Block tunding thak toh kisai report pia uhi.

 

Report kingah dung­zui in YPA Vangai Block tunding thakna di’n elec­tion sai in om a, Presiding Officer in V. Khankhup Guite leh Polling Officer ding in YPA Lamka Block leh YPA New Lamka Block pang ua, Vangai Block sung a khua 6 apan delegate te’n candidate dingin mi 13 guang in, mipi paikhawmte’n Presi­dent, Secretary, Finance leh Treasurer ding tel uhi. G. Paukhanmawi, Vice Chairman, CWC in YPA Vangai Block hongkhia in election sai in om a, 2016- 2018 sung YPA Vangai Block makai dia telching a omte ahihleh President - G. Thawngkhanpau, Buangmun, Secretary – Chinthianmuang, Buang­mun; Finance – Gou­lalmuan, Vengnuam, Jiribam leh Treasurer - G. Thangkhanlal, Mission Veng, Jiribam te hi uhi. Telching a omte’n Sep­tember 2016 sung in cabi­net expansion bawl ding ua, a poimoh leh kul bang in Unit hongkhe ding ua, Block Office ahihleh Buangmun ah om ding hi.

 

Hiai hun zatna ah, V. Khankhup Guite, Mem­ber CWC, Presiding Of­ficer in telching thak a omte kichiamsak in Upa Tualkhanthuam, Local Chairman, EBCC Buang­mun in thumsak hi. YPA/ GHQ in YPA Vangai Block a di’n Flag 5, Re­ceipt book 6, Constitu­tion Book 13, Cash Book 1, Registration Book 1, Paper Punch 1, Dublicat­ing Paper 1 (reem) banah YPA GHQ in Rs. 2000/- , YPA Lamka Block leh YPA New Lamka Block te’n Rs. 1000/- tuak a piak ban uah, President YPA GHQ in Rs. 1000/- in block thak phungvuh­na ding in pia uhi. YPA heutute gendan in Buangmun ahihleh 1997 kum a buaina ziak a khaw mipi’n a khua uh a taisan uh hi a, 2002 in khua satthak in, tu’n khosak leh nek zonna kichuptak nei theita ua, Kuva-tang, Munphiah leh Rubber chihte nekzonna in zang uhi. A ban a genna uah maban hun lemtang masa ah Unit leh Block sukmit a omte, hingsak thak dia panla ding uh ahihdan gen uhi.

 

Huailou in tutung YPA/GHQ heutute Buangmun khua a phak­na uh ahihleh khangthu a dia hiai khua a gari luttam nipen hi’n gen uhi. Young Paite Association Van­gai Block nuai ah khua 6; Buangmun, Chingmun, Vengnuam, Khedagor Doltlang leh Mission Vengte hi uhi. YPA Van­gai Block tungding thakna ding toh kisai a khualzin­na dia kiphaltak a mimal gari zangsakte tung ah YPA General Headquarter in kipahthu gen hi.

 

 

ST Demand Committee makaih in mass rally om ding

Imphal, Aug- 28: Schedule Tribe Demand Committee (STDC) in Schedule Tribe list a Meitei-te leng guanlut ding a phutna uh toh kisai a ‘peaceful agita­tion’ a neih uh sutzopna in STDC makaihna in September 18, 2016 sunma dak 10.00 apan in Thangmeiband a Thau ground apan Khoy­athong tawn in Khuman Lampak Main stadium tan mass rally nei ding uhi. September 18, 2016 a mass rally zoh in rec­ommendation leng gov­ernment ah pelut ding uh hi’n thusuak in tak­lang hi.

 

STDC co-ordinating body Convenor M Chura­mani in thusuah a bawlna ah a thilnget uh phutna mah in tunungzek in wall poster campaign, public­ity, mobilization, discus­sion programme tua­mtuam leng neih hiding in gen hi. Thau ground apan Khoyathong tawn a Khuman Lampak Main stadium tan mass rally a neih zoh un hiai program tuamtuamte neizui pah ding uh hi’n thusuak in taklang hi.

 

 

Ranjit in ‘Plant Genome Savi­ous Farmer reward 2013 sang

IMPHAL, Aug 28: Manipur a buh chi tua­mtuam 7 mangthanglou a kembittou den loubawl thanuam tak Yumnnam Ranjit kiang ah gam­sung a kipahman sang­tak ‘Plant Genome Savi­ous Farmer reward 2013’ piak in om hi.

 

Manipur’s Imphal west district a south Imphal a kipan kilome­tre 20 a gamla Yumnam Huidrom khua a teng Ranjit in buh chi 7- Moi­rangphou Koknangbi; Tumai Angangbi; Tu­mai Angouba; Phouren Phoujao; Phougang; Phoungak Phouren Ak­uppi leh Chakhao amubi-te system of rice inten­sification leh integrated pest management meth­od zang in mangthang­saklou in chingtou den hi.

 

August 24, 2016 a New Delhi program zatna hun ah Union Minister of Agriculture minister Radha Mohan Singh in Ranjit khut ah kipahman Rs 1.50 lakh, citation leh memento pekhia hi. North East bial a kipan Farmer reward sang khin Potsangbam Devakanta zoh a, a nihna ding a kipahman sangtu Ranjit a hihleh tuni Pathianni in, Yumnam Huidrom khua ah vaidawnna leh kipahpihna program zatpih uhi. Protection of Plant Varieties & Farm­ers Rights authority a buh chi 300 chiamteh leh Kum 2012 in, buh­chi 100 vel ding pelut All Manipur Trained Medic­inal and Aromatic Plants Promoters Consortium (AMAPCON) President Devakanta (60) in kum 2012 in medicinal plant leh zanglou buh chi 100 vel ching a state a bio­diversity lam kebitna a neihte ziak in Agriculture ministry reward sang hi.

 

Tuni a Rajit kipahpi­hna leh vaidawnna hun ah Central Agricultural University Vice Chancel­lor Dr M Premjit tel in loubawlna lam a mi tal­lang tamtak tel uhi.

 

 

Union Civil Aviation Minister in Imphal hongpha ding

Imphal, Aug-28: Union Minister of State for Civil Aviation Jayant Sinha in August 29, 2016 in Imphal hongpha ding a, sunma dak 11.25 vel in Imphal hongtung ding hi. Imphal ah state sung a mi poimoh khenkhat kimuhpih in sunnung dak 3.20 vel in Guwahati zuan nawn ding hi. Union Minister in Imphal a dak­kal tamlou a om sung in BJP makai-te leh mi po­imoh khenkhat kimuhpih ding hi.

 

 

 

NEWS TOMKIM

 

LSD/BCD heutu khawmpi om ding

LAMKA, Aug. 28: Evangelical Baptist Convention nuai a Lamka South Division, Baptist Children Department in hong tung ding Sept 3 & 4, 2016 sung Pethuel EBCC, Vengnuam ah Baptist Children Department heutu khawmpi nei ding uhi. Hiai hun zatna ah, Dr. Suankhanhau Gualnam, Lecturer, GBC in thugen ding a, Ms Muani Tombing in seminar ah makaih ding hi.

 

 

Dorcas’ Veng YPA in gan khah zan ding kham

LAMKA, Aug. 28: Dorcas’ Veng YPA Unit in zan zek in meeting nei ua, huai hun ah Dorcas Veng sung a ganta neite’n kholak ah khahzan lou ding in kham ua, a biktak in Ui neite’n khawlak ah khah lou in mahni inn a khih chiat ding in thupuk uhi. Ui khahzan muhkhak a om a tuahsia a tuah leh kuaman bangmah gen theilou ding inleng thupuk uhi.

 

 

Spl Campaign of Swachh Bharat om ding

LAMKA, Aug. 28: PHED, CCpur saina in zingchiang August 29, 2016 sunnung dak 1 in Bijang Loubuk Jr. High School, Zenhang Lamka ah “Freedom From Open Defecation” chih thupi pansan in Special Campaign of Swachh Bharat om ding hi. Hiai hun zatna ah, Shri Lunminthang Haokip, IAS, DC/CCpur & Chairman/DWSC in chief guest hihna toh uap in rally pai dingte flag-off ding hi. Bijang Loubuk Jr. High School apan in Peace Ground tan Rally om ding a huai ah zou ding uhi.

 

 

Tribal movement a di’n thumkhawm

LAMKA, Aug. 28: JACAATB in Aug. 31, 2016 “Tribal Unity Day” zat ding a, a puan toh kiton in tuni’n Biakin teng ah saptuamte’n thumkhawmna neih ding chih ahih dungzui in Biakin kai hun sung in hunkhat thumkhawmna in zat in om hi.

 

 

Sunna: L. Thanzau of Mimbung, Mizoram tuni zinglam dak 12:30 vel in damlouhna ziakin Mimbung ah si a, tuni mah in vuiliam in om ngal hi. RIP

 

 

 

…for more detail : Here

 

 

 

Related

The Lamka Post | August 28, 2016