You are here: HomeRSS FeedsThe Lamka Post

The Lamka Post | October 01, 2016

Saturday, 01 October 2016 16:09

Surgical Strike ziakin:

PM in ‘2nd CCS meeting’ makaih; Punjab ah khua 1000 a kipan mihing lakh 15 mun bitzaw ah kituahkhia

NEW DELHI, Sept 30: A paisa Nilaini nitak a Indian Army-te’n Paki­stan toh gamgi Line of Control(LoC) a kipan Pak gamsung kilometre 2 kantan a, India a hong guklut sawm helte “sur­gical strikes’ nasatak a bawlkhum zoh nung un, Jammu and Kashmir a LoC leh Pakistan toh gam­gi dung a security dinmun enkik thak ding in, tuni Sintawpni in Prime Min­ister Narendra Modi in, a nihveina ding in, govern­ment’s topmost ministers leh official-te toh kimuh­khawmna ‘Cabinet Com­mittee on Security meet­ing’ makaih hi.

 

Pakistan lam a kipan thukkikna om phut thei dinmun a, a kilat ziak in, Line of Control leh Paki­stan toh gamgi dung ah security force-te galging­sa in om den uhi. Jammu and Kashmir leh Punjab state sung a Pakistan toh gamgi a kipan kilo­metre 10 in a huamkhak sung a om border district 6- Amritsar, Tarn Taran, Gurdaspur, Pathankot, Fazilka leh Ferozepur a khota 1000 a teng mipi lakh 15 vel ding mun bit­zaw a di’n pikhiak in om lel uh chi’n Punjab chief minister Parkash Singh Badal in gen hi. Badal in a genzelna ah, galtaite a ding in deihtelna nih piak in om ua, a tanaute uh bel thei ding leh school leh community centre a camp-te belthei ding uh chi’n gen hi.

 

Zan Ningani in In­dian Army in, Line of Control(LoC) pumpi a ki­lometre 2 in a huamkhak sung Pakistan-Occupied Kashmir a helte pan­mun tuamtuam terrorist launch pad 7 a surgical strikes bawlna a hel 30- 40 kikal kaplum uh a hi­hdan puang uhi.

 

Army a Director General of Military Op­erations (DGMO) Lt General Ran­bir Singh in a gendan in, surgical strike bawlna ah helte leh amau panpihtu tamtak thah a om uh hi­dan in gen a, India Army-te action lakna Pakistan leng theisak hidan in gen hi. Tuni Sintawpni in Pakistani Prime Minister Nawaz Sharif in cabinet meeting sam a, October 5 in Pakistani Parlia­ment joint session nei nawn ding uhi. Pakistan in surgical strike toh kisai a India in thupuan a bawl ‘zuau’ hidan in taklang a, gamgi zul a kikaptuahna ah bel Pak sepaih 2 thah a om uh hidan in taklang hi. India sepaihte’n gam­gi kantan hile uh Paki­stan Army-te’n thukik pah ding uh hidan inleng vauna bawl uhi. Surgical strike neih a hih sung a India sepaih 8 kaplum leh sepaih khat mankhia uh hidan a Pakistani me­dia report toh kisai India army-te’n naktak in nial uhi.

 

Army headquarters thusuak in a taklatdan in, India sepaihte’n a duty na mun uh army post a kip­an Line of Control kantan a helte beihpi suahkhum uh hidan in taklang hi. Home Minister Rajnath Singh in a gendan in, Pak sepaihte’n a mat uh India sepaihte thubuai toh kisai Pakistan toh genkhawm hiding chi’n gen hi.

 

State Department thupuangtu John Kirby in a gendan in, Uri a army camp beihna toh kibang nasepna omte’n dinmun sousangsak a, Pakistan in hel nasepna a dou ding ahi chi’n gen a, dinmun sousangtak niamsak ding inleng ngen hi.

 

 

Kalkhat beima in govern­ment in Bill pass ut: Ibobi

Imphal, Sept-30: Chief Minister O Ibobi in Assembly Session sap ding leh election model code of conduct kizatma kalkhat sung a Manipur tualsuak mite humbitna leh polam mite phalna tellou a hon­glut ding dalna draft ILP bill pass ut ahihdan gen hi.

 

Lamsang Block Con­gress Committee saina a Naoremthong Khullem Leikai community hall a ‘one day political confer­ence’ zatna hun a CM in a thugenna ah ni 15 ad­vance notice bawl a As­sembly session sap theih ahihdan gen a, Bill thak pen phaizang leh singtang a dia pom theih tuak ahih poimoh hi’n leng taklang hi. Mipite’n revised/im­proved draft Bill upload a omna official website ah ngaihdan, suggestion leh objection neihte pelut ding in ngen a, Hill Area Committee a hiai draft Bill refer zoh in NGO tua­mtuam leh Civil society tuamtuam leng consult hiding hi’n taklang hi.

 

Bill thak pen tual­suak mite humbitna ding a phattuamna taktak tun ahih theihna ding a stake­holder tuamtuam te’n sug­gestion piaklut poimoh ahihdan gen a, commu­nity tuamtuam right leh lunggulh a tunkhakvek theih ngai hi’n leng gen hi. Huai banah, Manipur gamtang kepbitna toh ki­sai in area bikhiah omlou a NSCN(IM) leh Govern­ment in ceasefire suai a kaih lai un mi 18 in sihloh a, Framework agreement suai kaih a om nawn hun apan time bomb puakzak thei ding maban a om suakta hi’n leng taklang hi.

 

Framework agree­ment in bangteng huamkha hiam chih BJP in a puankhiak ding hi’n gen a, kilemna suai­kaih a om phot kipahpih himahleh Manipur gam leitang kipumkhatna kekzak sak thei dia kuamah a gamtatlouh ding hi’n gen hi. Lamsang A/C a development work a sepkhiakte MLA Bra­jabidhu in white paper a puakkhiak pahtakhuai a sak thu leng gen a, Dy CM Gaikhangam in white pa­per a puakkhiakna tung ah Brajabidhu’ chihtakna leh ginomna kilang hi’n taklang hi. Hun zatna ah MPCC President T.N. Ha­okip leh MLA W Braja­bidhu in leng sawtlou tuak thugenna nei uhi.  

 

 

Ukhrul ah helte’n ambush a bawlna ah AR major 1 liam

Imphal, Sept-30: Ukhrul district sung Kamjong area ah tuzing dak 4.30 vel in galvan hoihtak tawi helpawl khat in 31 Assam Rifle-te ambush uh a, huai ah Assam Rifles C-company a major Mandeep Singh kapliam a om hi’n thusuak in taklang hi.

 

Thusuak dan in, Kamjong area a 31 Assam Rifle-te gari bangzahhiam a kizui lai galvan hoihtak toh kithuam helte’n ambush a bawlna ua AR Major Mandeep Singh a khuk lak thautang in kapkha a, AR personnel dang ahi­hleh a liam omlou uhi. Kapliam khak a om major Man­deep Singh ahihleh helicopter a puakkhiak a om in Imphal a Leimakhong Army hospital puaktun a om hi’n leng thu­suak in taklang hi. Hiai thu kaihkhawmtan in ambush bawltu a kipuang omlou hi’n thusuak in taklang hi.

 

 

ADC contract teacher-te’n eco­nomic blockade sutzop sawm

Senapati, Sep 30: 2011 a appointment bawl ahih a kipan tunitan kha loh piak ahihlouh ban uah regularise ahihlouh ziak un Autonomous District Council (ADC) Contract Basis Appointed Teacher’s Association in hun chiam omlou a eco­nomic blockade sutzop sawm uh hidan in thu­suak in taklang hi.

 

ADC Contract Basis Teacher’s Association in ahihleh a thilphutte uh September 26 tan a pi­chin dia huntawp a piak­nung in NH-2 ah eco­nomic blockade tanpha bawl ua, himahleh hunchiam beinung a leng Govt in bangmah ngaihsaklou hidan in taklang uhi.

 

A thil ngette uh a baihtheipen a pichin ahihkeileh hunchiam omlou a economic blockade sunzom ding uh ahihdan taklang kawm in Tribal Affairs and Hills Commissioner T. Pamei in ADC Con­tract Basis teacher ap­pointment bawlsa pen zat theih hinawnlou chih a gen leng naktak a mohpaih uh ahihdan taklang hi. Huai ban ah 2011 a appointment bawl ahihnung a kum 6 sung a ngaknung ua appointment bawl a om pen zattheih nawnlou ding chih pen candi­date-te hinkhua naktak a suksiatna hidan inleng taklang uhi.

 

ADC Contract Basis Teacher’s Association in a taklat zelna ah, ap­pointment bawl a om pen District Council Act article 29 clause III a ADC theihna piak a om tungtawn a bawl a om hidan in taklang uhi. Kum 20 val nasemlou a omnung in primary school a teacher kitak­sap ziak a ADC admin­istration nuai a telching a omte’n 2010 in teacher 136 la uh hi’n taklang hi. Himahleh Contract Ba­sis Teacher-te appoint­ment pen regularise ding leh a khaloh uh pe dia kum 6 ngetna bawl a om pen limsak hilou hi’n taklang uhi.

 

Government in a ngetnate uh a ngaihsak­louh ziak a kiphinna nei uh ahihdan leh tua ziak a lungkimlouh taklatna a blockade tanpha bawl uh ahihdan taklang uhi. Huai ban ah Tribal Af­fairs and Hills Depart­ment in bangchidan a amaute appointment zattheih nawnlouh chih taklang thei hiam chi’n dotna bawl uhi.

 

 

ADCC Chairman makaih in Delhi ah zin

LAMKA, Sep 30: ADC Ccpur Chairman Langkhanpau Guite makaih in Co-ordination Committee member bangzahhiam in chial a, a om dungzui un tuni, Sep­tember 30 in Union Fi­nance Minister kimuhpih ding in New Delhi zuan in zinkhia ding uhi.

 

Thutut kingahdan in, Manipur state a Au­tonomous District Coun­cil 6 omte 6th Schedule nuai a omlou ahihman in, 14th Finance Com­mission ah telsak ahi­hlouh ban ah kum paisa a beisak a om BRGF leng mipi’n phatuampih manglou uh ahihna ah, khantouhna om thei­hna ding in India Prime Minister tungtawn a budget bawl ahihthei­hna ding in Manipur a ADC 6 in New Delhi ah Finance Ministry, Pan­chayati Raj Institution leh NITI Ayog Dept-te bangzahvei hiam ana kimuhpihta uhi.

 

Hiai thu India Prime Minister inleng awlmoh in, Finance Minister ki­ang ah a poimoh bang­bang a kihoupih a, alloca­tion tanpha a om theihna dia Manipur state a ADC Chairman-te ana kimuh­pih dia a theihsak dung­zui a New Delhi zuan uh hi’n thutut kingah hi.

 

 

EBC Lamka North Div. Kumsim Khawmpi 10veina kipan

LAMKA, Sep 30: Tuni, September 30, 2016 nitak dak 5:30 in Moria EBCC Pearson­mun ah Evangelical Bap­tist Convention, Lamka North Division kumsim khawmpi 10veina kipan hi. Khawmpi ahihleh Upa Dr. J. Son Gokham, Chairman, DWC in hon­gkhia a, Upa M. Ginza­lian, Khawmpi Bussiness Chairman in vaidawn thugen hi.

 

Khawmpi hunsung in ‘Diktatna a Kilamthak­na’ chih thupi zang in Rev Paukhanmang Guite, Di­rector of Ministries, EBC leh Evan T. Damkhothang in thugen ding ua, Rev. N. Pumsuanmung, Youth Coordinator, EBC in sem­inar makaih ding hi.

 

Zingchiang, Octo­ber 1 sunma dak 10:30 a pan nitaklam dak 3:30 sung Khawmpi Palaite’n vaihawmna nei ding ua, kum nawn 2017-2018 Khawmpi Palai Ulian ding telna nei in budget leng guang ding uhi. EBC Lamka North Division sung ah tulel in khua/ biakinn 20 om a, tu­tung a khawmpi ah palai minkhum 477 pha uhi. Khawmpi ahihleh Octo­ber 2, 2016 nitak in zou ding uhi.

 

 

Manipur ah political party thak bawlkhiak in om

Imphal, Sept-30: Manipur ah kumthak 2017 bullak a state As­sembly election neih a om ding toh kiton in tuni’n re­gional political party thak “Manipur National Dem­ocratic Front”(MNDF) kichi bawlkhiak in om a, hiai party in phaizang leh singtang bial kipumkhat­na ding tup leh ngim a nei hi’n thusuak in taklang hi.

 

Regional politi­cal party thak bawlkh­iak a om Manipur Na­tional Democratic Front (MNDF) President Pri­yokumar Singh in tuni’n North AOC a Hotel Clas­sic a hunzatna ah party thak bawlkhiak ahihthu puangkhia in tup leh ngim bulpite taklatna leng nei hi.

 

Priyokumar in a gen­na ah, kumnawn a Assem­bly election hun ah MNDF in constituency 40 a can­didate guang ding hi’n gen a, hun zatna ah Vice Presi­dent ding in mi 4- Bijoy Koijam, Len Gangte, Siraj Ahmad leh Khogen guan a om hi’n leng taklang hi. Minister-lui Bijoy Koijam ahihleh kumlui a Thongju constituency a MLA by-election neih a om lai in BJP candidate Thon­gam Biswajit Singh sang a vote tawmzaw a muh ziak in chinglou a, huai hun in INC ticket in tuh hi. MNDF in singtang leh phaizang a kilemna leh muanna tut ding tuppipen in nei a, socirty kikim a khantouhna a om theihna ding in singtang bial ah khantouhna nasa zaw tun ding hi’n Vice President Len Gangte in gen hi.

 

 

Andro bial ah political work­er-te kinawk, gari 2 sia

Imphal, Sept-30: Thoubal district sung Andro Keithel ah zan ni­taklam dak 5.00 vel in sitting MLA Thounaojam Shyamkumar worker-te leh kumnawn a BJP party candidate a Assembly election tuhsawm Ni­maichand Luwang work­er-te kinawk uh a, huai ah gari 2 khetsiat a om hi’n thusuak in taklang hi.

 

Thusuak in a taklat dan in, kumnawn 2017 a Manipur Assembly elec­tion om ding ah BJP candidate a tuhsawm Nimaichand Luwang gumtute’n zan sunnung in Andro Keithel kiang ah meeting neih a sawm uh sitting MLA Thounaojam Shyamkumar worker-te’n dal in lamlian khaktan sak uh a, huai ah kinawk­tuahna om in gari 2 khet­siat in om hi. Hiai kinawk tuahna ah si-le-liam om chih report zak hilou hi.

 

 

HAA, KAPU leh, ZAA in Joint Fellowship nei ding

LAMKA, Sep 30: Hongtung ding October 15, 2016 chiang a Hmar Artists Assn (HAA), Kuki Artists Pro­gressive Union (KAPU) leh Zogam Artists Assn (ZAA) makaih a EBC Dorcas Hall Mini Auditorium a Joint Fellowship om ding toh kisai a kisakkholhna pailel hi. Hiai toh kisai in zingchiang, October 1, 2016 sunnung dak 2 in Lengtonghoih Studio, Vengnuam Hiangtam Lamka ah tribe tuamtuam a pan lasiamte paikhawm in lasinna nei ding uhi.

 

‘Joint Fellowship’ ahihleh ‘Campaign For Unity Through Music’ chih thupi zang a zat hiding a, a tup­pipen ahihleh unau laiguizom, khokhat-tuikhat a tengkhawmte lak a innkuan khat hihna thukzaw sem a pholhkhiak a la leh music tungtawn a khangthakte lak a ki-unauna leh kizopna hoi­hzaw bawlkhiak ding chih ahi.

 

Joint Artists Assn saina a ‘Joint Fellow­ship’ ding toh kisai a me­dia partner-te ahihleh Virthlii Online Porter, Angle’s Vision, Hornbill Cable Network, Next Digital, TC Network hi ua, amaute’n Live in telecast bawl ding ua, Next Digital in inter­net tungtawn in khovel pumpi a ettheih ding in Live in khahkhe ding hi.

 

Hiai hun ah la­siam (artists) 50 vel paikhawm ding ua, amaute’n special num­ber present chiat ding uhi. Hiai hun ah gamn­gaih la leh u-le-nau ki-itna lampang thupi bawl hiding a, veteran leh senior artist tamtak in­leng hiai hun uap ding uhi. Hiai hun zatna ahi­hleh saptuam makaite’n leng uap ding ua, art­ist mualliamsate sunna leng om ding hi. Hiai Fellowship hun sung in Artists mualliamsate min simkhakna leh am­aute sunna leng om ding hi. Hiai ‘Joint Fellow­ship’ manpha leh gah­suahtak a neih ahihthei­hna ding a kuapeuh in kithuahpih chiat ding in Joint Artists Association in ngen uhi.

 

 

Pak in Islamabad a SAARC Summit ding postpone

New Delhi/Islamabad, Sep 30: Tu kum November kha chiang a Paki­stan khopi Islamabad a 19th SAARC Summit neih ding chih himahleh tu kha bullam a Uri a India sepaihte munpi bu­luh ahihnung in India makaih a SAARC member 5 in Islamabad a SAARC Sum­mit a tellou ding uh ahihdan taklang uhi. Tua ziak in Pakistan in Islamabad a 19th SAARC Summit neih ding post­pone ahihdan leh a hun leh ni ding bikhiah thak hiding a puang hi’n Press Trust of India in taklang hi.

 

November 2016 a Islamabad a 19th South Asian Association for Regional Cooperation (SAARC) Summit om ding a tellou ding ahihdan taklangte lak a gam 5na ding in tuni, Sintawpni in Sri Lanka in tulel a buaina dinmun et a Summit neih in bangmah suanglou ding hidan a gen in hiai hun a tellou ding ahihdan taklang hi.

 

SAARC a member gam 8 om lak ah tutan in India, Bangladesh, Afghanistan, Bhutan leh Sri Lamka in November 9-10, 2016 sung Pakistan khopi Islamabad a 19th SAARC Summit om ding a tellou ding uh ahihdan taklang uhi.

 

Tu kha, September a Uri a India army-te munpi buluhna a tel terrorist-te tel a Pakistan in hiamgamna tawsawn leh terrorist-te kem leh humbit hidan a ngoh in India in Pakistan toh kihouna neilou ding leh a tuam a koih hiding a, a puannung in SAARC member gam tua­mtuam in Islamabad a SAARC Summit om ding a tellou ding uh ahihdan tak­lang in ‘boycott’ puang uhi.

 

 

SSPP JHQ Imphal in 57th Conference-cum-election nei

Imphal, Sept 30: Tribal Research Institute (TRI), Chingmeirong, Imphal ah tuni zinglam dak 11:00 apan in 57th SSPP Join Headquarter, Imphal in Presidential election leh Con­ference cum Award Distribution, 2016 nei uh a, hiai hun ah Chief guest leh Functional President in Pu H. Thangzamuan, Chief Gen­eral Manager & Officer Incharge, RBI, Imphal leh Pu B Go Lian Mang, IPS, SP, Tamenglong pang uhi. Hiai hun a presidential elec­tion ahihleh Lamka apan SSPP General Headquarter makaite’n sai uh a, President thak ding in Gin­thianlun S/o Pu H. Chinlianthang of Langol telching in om a, Rev K. Kamchinkhup, DS EBC Imphal Di­vision in thumsak hi.

 

Hun zatna ah, Guest Artiste Jems Arjun Zou leh Kelly te’n uap uhi. Hiai hun a Appreciation Award (Class I to V )2016 ngahte ahihleh Tluangbiakhoih D/o Thiauchinpau Class I of Lamphei; Chingngaih­kim D/O T. Nengkhansuan Class I of Lamphel; Zamremhoih D/o T. Ginsuanlian Class I of Lamphel; P. Ginjohnson S/o P Nangsuanlun Class I of NGV; Chinsian Guite S/o G. Luankhum Class II of Lamphel

 

Pum Siam Mung S/o Go Hau Class III of NGV; Samuel N Manglal muan S/o Jimmy N Thangsuan­lal Class IV of Lamphel; Jemi­meh Guite D/o G Vumkhanthang Class V of NGV; Joycee Niang­hoih D/o T Ginsuanlian Class V of Lamphel; Hlundinglal Guite S/o G Luankhum Class V of Lam­phel; Chingbiakkim Guite D/o Thangchinlian Guite class VIII of NGV; Maureen Nemthianmawi d/o T Thangbiaklian Class IX of Paite Veng

 

Donor Award:

ST. Peter School Award : Salomi Vungthianching D/o SN Albert of NGV hi uhi.

Tombing Vungkhothang Me­morial education Trust Award: Pamngaihlun Guite D/o Thangchin­lian Guite of NGV; Lee faith School Award: Mercy Vungbiakhoih D/O G Khupchinpau of Paite Veng; Paite Officer forum Award: Lydia Nian­glalnem D/o T. Tunthianmang of Tribal Colony; (L) L. Thangkhan­suan Memorial Award: M Baron Chothe D/o MA Joyful Chothe of Lamphel; SSPP JHQ Imphal Award: Tabitha Gousianching D/o Kapsianmung of Lamphel; (L) G Kaikhanthang Memorial Award: Samuel Mangte S/o M Kamzalam of Langol; SSPP JHQ Imphal Award: Lamhoihching Mangte D/o Lianchinpau Mangte; Paite Tribe Council Award: Vunglianmawi D/o T Vungsuansuan of Lamphel hi uhi.

 

 

Petrol man khang; Dielsel man kiam

LAMKA, Sep 30: Tuni, September 30, 2016 nitak in petrol man litre khat ah paise 28 in khang a, diesel man ahihleh litre khat ah paise 6 in kiam hi. Thautui khanna leh kiamna ahihleh tuni, September 30 zan­kim a kipan zat hiding hi.

 

 

Mobilization pro­gram zang ding

LAMKA, Sep 30: Zingchiang, October 1, 2016, nitak dak 6:30 in “Tuailai 1434Pro” makai­hna in Pangzawl Baptist Youth Fellowship (PBYF) toh Chin Baptist Associa­tion Church, Pangzawl ah mobilization programme zang ding uhi. Hiai hun Ginmuanlian in makaih ding a, P. Daimuanlian in ‘pledge’ latna leh hawmna makaih in G. Pauzarual in thugen ding hi. “Tuailai 1434Pro” in ahihleh ZPYF leh CBA Central Church, Gouchinkhup Veng ah nipikal paisa in mobiliza­tion programme ana zang khinta uhi.

 

 

ATWU makaih in meeting om ding

LAMKA, Sep 30: All Tribal Women Union makaih in zingchiang, Oc­tober 1, 2016 sunma dak 11 in ATWU Office, Dorcas Road, New Lamka ah ma­ban panlak dingdan toh ki­sai genkhawmna om ding hi’n thutut kingah hi.

 

 

GBC Annual Sports lohchingtak in zou

LAMKA, Sep 30: Grace Bible College (GBC) in a paisa Septem­ber 26, 2016 a “Run with Certainty” [I Kor. 9:26] chih thupi zang a, Annual Sports a pat uh, tuni sun­nung dak 1 in Jelshyam Chapel ah closing leh prize distribution zang uhi.

 

GBC Annual Sports ahihleh Rev. Dr. V. Gin­sianthang, Principal in hongkhia in torch light­ing nei in flag kaipalh a, September 26, 2016 zingkal dak 7 in open marathon in pan uhi. Tulel in GBC ah stu­dent 145 om ua, amaute group 4 - Golan, Kadesh, Shechem leh Hebron in kikhen ua, Ling kineih, Gawkung kal, anhawi/ ansep, flag race, sukki­heek leh numei volley ball in kidemna nei uhi. September 27, 2016 in Spelling Bee, High Jump, Long Jump, Needle race, Throw Ball, Tui dip (wa­ter filling) Chiangkhe pai (stick walk), Kikantuah (tug of war) leh pasal vol­ley ball chihte in kidem ua, September 28, 2016 in Double Act, Miaming, Kho-kho, Sepaktakro, Singlam pei, Gophelkap leh Volley ball (numei leh pasal), kidemna nei uhi.

 

Zan, September 29, 2016 in Quiz, Volley ball final (numei leh pasal), Football, Relay race leh 100m race a kidemna nei in zousiang uhi. Kidemna tuamtuamte ahihleh zing dak 6 a pan kipan zel in sunnung dak 4 tan nei­zel uhi. Tu kum a GBC Annual Sports hunsung a kidemna tuamtuamte lak a tamzaw pupa hunlai a kimawlna khenkhatte hi a, tulai vai deuh leng bangzahhiam bel om hi.

 

Tuni a closing leh prize distribution hun ahihleh Pangwao Konyak in makaih in, Pauthian­muang (Chaplain) in thumna in pan a, Rev Dr. V. Ginsianthang, Principal in thugen hi. Lalchungnung Gangte, Sports incharge makaih in prize leh presentation tuamtuamte pekhia ua, S. Zamminlian in kipahthu gen in Upa Ginzathang in thumna in hunkhak hi. Tutung a annual sports ah Shechem group in point 143 mu in group champion hihna la uhi.

 

 

Irabot pianchampha 120na zang

IMPHAL, Sep 30: Manipur a revolution­ary movement makaitu Hijam Irabot piancham­pha 120na tuni’n state sung pumpi ah zat in om hi. Hijam Irabot pian­champha zatna ahihleh mun tuamtuam ah tuni zingkal in kipan a, Brit­ish vaihawmna ana dou a khotang a nelhsiah a omte dopkangna dia panlatu Irabot zahna in lim (stat­ue) kibawlna ma a zahna pak pia uhi. Huai ban ah mun tuamtuam ah hiai ni zatna in march-past, song, recitation, cultural items, leh Irabot hinkhua toh ki­sai houlimna chihte sai in om hi.

 

Iboyaima Shumang Leela Shanglen, Palace Compound Imphal ah Irabot Celebration Com­mittee sai na in state level a Irabot Birthday zatna om a, school tuamtuam a pan march past contingent 50 val kihel in Hijam Irabot lim kibawl ma ah zahna pia uhi.

 

MDU, Imphal a Irabot pianchampha zatna hun a chief guest in chief minister O Ibobi Singh pang hi. Hiai hun a Chief Minister in a genna ah, government in Imphal khopi sung mun poimoh khat a Irabot statue bawl­sawm leh a mun ding zonna pailel hidan in gen hi. Huai ban ah Irabot ahi­hleh social activist kia hi­lou in political activist ahi­hban ah khotang kikhekna tuntu hidan in gen hi. Irabot ahihleh Manipur kia hilou in India mite theihphak leng hi a, social­ism toh kisai a ngaihdan in state sung a mipite lak a kikimna tun hidan inleng Chief Minister in gen hi.

 

Communist Party of India (CPI) Manipur State Council inleng a tuam in Palace Com­pound ah zang uhi. Hiai hun chief guest hihna toh uap CPI state secre­tary Dr M Nara Singh in a genna ah, tuni a Irabot damlai hileh state sung a helpawl hiai zah omlou ding hidan in gen hi. Gov­ernment of India in tuni a India malsuahbial a state tuamtuamte Purbanchal a chih himahleh Irabot ziak a Manipur piang­khia leh huai tungtawn a Mizoram, Nagaland, Tri­pura chihte Assam a kip­an bawlkhiak a om hidan in gen hi.

 

Hijam Irabot (30 September 1896 – 26 September 1951) ahihleh Jana Neta Hijam Irabot chi a theih in om a, amah ahihleh zalenna sualtu, politician leh social ac­tivist ahi. Amah ahihleh Manipur a Communist Party of India (CPI) phut­khetu khat hi a, lavui leh thugelh siam ahihban ah kimawlmi leng ahi hi. Aman Nikhil Manipuri Mahasabha 4th Session makaih a, Nupi Lan, 1939 in khotang a thil paidan dikloute douna ah makai in pang hi. June/July 1948 a Manipur Assem­bly election ah Bishnu­pur district sung Utlou Constituency a kipan in Irabot telching in om hi.

 

 

Mr. N Neihsial in IDAS ah CGDA len ding

LAMKA, Sep 30: Secretary (Defence Fi­nance) ding in tulel a Controller General of De­fence Accounts (CGDA) lenlel Sunil Kumar Kohli mohpuakna piak in om a, huai ban ah thuthak omma Mr N Neihsial, IDAS in kha 3 sung vel Controller General of De­fence Accounts (CGDA) len ding in additional charge piakbeh in om hi. Tua toh kiton in Sunil Kumar Kohli, CGDA in tuni’n mohpuakna pe­khia hi.

 

Indian Defence Ac­counts Service(IDAS) lak ah tulel in Mr N Neihsial (1981) pen senior most IDAS hi a, kha thum zoh chiang in regular ap­pointment ngahthei ding hi. Huai ban ah, kha thum sung CGDA mohpuakna a letsung in CGDA nuai ah Central Civil Service (Classification Control & Appeal) Rules 1965 dungzui in appointing, disciplinary leh appellate authority thuneihna leng nei ding hi. N Neihsial ahihleh Lenglong Village, Tamenglong North, Ma­nipur a pan hi’n thutut kingah hi. (NitinThuhil­tu).

 

 

Vualphaloute’n vote a khiakthei­hna ding ua panla di’n ngen

IMPHAL, Sep 30: Manipur a vualphaloute’n leng a tanvou uh phatu­amtak a, a zat theihna ding un vualphaloute sik-le-tang in Spastic So­ciety, Manipur Secretary in State Election Depart­ment kiang ah Election Commission of India toh pangkhawm a kitelna hun a vualphaloute’n vote a kh­iaktheihna ding ua panla ding in ngen hi.

 

Spastic Society, Ma­nipur Secretary Laish­ram Tokendra in tuni a Manipur press club a thuthaksaite kiang a, a genna ah, kitelna hun a vualphaloute’n vote a khiaktheihna ding un a innkuanpihte’n panpih ding uh hidan in gen hi. Huai ban ah vualphak­louhna chituamtuam nei, lungsim lam a buaina neite, theihtheihna lam a buaina neite, mahni a tangtheiloute leh a dangdangte’n a vote man­phatak uh a khiaktheihna ding ua a kisaipihte’n pan­lakpih ding in ngen hi.

 

Laishram Token­dra in a genzelna ah, vualphaloute’n a vote uh a khiaktheihna ding ua a ki­saipih thuneituite’n a tuam a Nodal Officer guang ding leh vualphaloute a dia constituency, ward leh booth level a special enrol­ment drive bawlsak ding in ngen hi. Kitelna hun a vualphaloute’n leng a tan­vou uh a zattheihna ding uh bawlsak hileh amaute’n leng a vote uh manphatak a zangthei ding uh hidan inleng gen hi.

 

 

 

NEWS TOMKIM

 

Oct 3 tan form fill-up theih

LAMKA, Sep 30: Ccpur Govt College ah examination form fill-up theihlel a, tuni, September 30 pen holiday ahihziak in fine omlou in exam form fill-up nailoute’n October 3, 2016 (Seppatni) in fill-up theihlai ding hi’n Principal a pan thutut kingah hi.

 

 

July quota NFSA antang hawmta

LAMKA, Sep 30: September 28, 2016 a kipan in FCS Godown, HQ Veng ah July quota a ding NFSA antang hawmna kipan a, Rationing Agent-te’n amau area a ding lakhia uhi. September 28 in 56-Thanlon AC sung a NFSA Agent-te’n la ua, zan, Sept 29 in 55-Parbung AC sung a NFSA Agent uhi. Huai ban ah hongtung ding October 3 & 4 in 57-Henglep AC, Oct. 5, 6 & 7 in 58/CCPur AC, Oct. 10, 12 & 13 in 59-Saikot AC leh Oct. 14 & 15, 2016 in 60-Singngat AC sung a NFSA Rationing Agent-ten antang la ding in SDO/FCS in routine bawl hi.

 

 

ZYO makaih in Cleanliness Drive nei ding

LAMKA, Sep 30: ZYO, P Kamdou Veng unit makaih in zingchiang, October 1, 2016 zingkal dak 7 in National Cleanliness Day/ Gandhi Jayanti zatna dan in P Kamdou Veng sung hahsiang ding uhi.

 

 

SUNNA:

Chiinngaihlian (28) w/o Ginkhanthang of Tangnuam, sungkhoh leh awmna ziak in tuni nitaklam dak 4:44 vel in RIMS, Imphal ah si a, zingchiang in Tangnuam hanmual ah kivui ding hi. Aman a tate naupang mahmah lai 3 nusia hi. RIP

 

Zawllalvung (83) of Rengkai, tuni zing baihtak dak 1 vel in kalna in si a, tuni mah in Rengkai hanmual ah kivui hi. RIP

 

Ngaihniang (67) w/o (L) Kamgou, sungkhoh ziakin Lamka Damdawi Inn a etkol ding in Suangdai apan hong kipua a, Singngat kho kiang ah si a, huai apan in Suangdai a vui ding in pawkik uhi. RIP

 

K. Chinpiakmung (1.5) s/o K. Songminthang, Gck, New Lamka, tunitak in khosik ziakin si a, zingchiang in YPA hanmual, New Lamka ah kivui ding hi. RIP

 

Nangsiam, Tuikumuallum, tuni zinglam dak 12:30 in Kolasib District Hospital, Mizoram ah damlouhna ziakin si hi. A luang ahihleh a tenna khua Tuikumuallum, Thanlon Sub-Division a vui ding in hong kipaw lellel hi. RIP

 

 

 

…for more detail : Here