You are here: HomeRSS FeedsThe Lamka Post

The Lamka Post | August 12-17, 2016

Wednesday, 17 August 2016 15:41

Lamka leh Sub-Div HQ 6 ah lohchingtak in I-Day zat in om

LAMKA, Aug 16: August 15 in India gam­sung pumpi ah 70th In­dependence Day zatna om a, tua toh kiton in Cc­pur District HQ, Lamka ah leng Peace Ground, Tuibong leh Singngat, Mualnuam, Thanlon, Pherzawl, Henglep leh Kangvai Sub Divison Hq ah lohchingtak a I-Day zat in om hi. Tuibong Peace Ground ah I-Day zatna ah chief guest in Lunminthang Haokip, IAS, DC/Ccpur pang a, National Flag kaipalh in salute la in thugen hi. Sub Division Headquater-te a zatna ah chief guest in SDO/BDO-te pang uhi.

 

Lamka a I-Day zatna ah chief guest in parade inspection bawl in salute la a, huai ban ah depart­ment tuamtuam in stall a bawlte uh enkhia hi. Hiai hun a DC/Ccpur in a genna ah, India gamsung a state 28 leh UT 7 a In­dependence Day zat a om toh kiton a, Ccpur District ah leng buaina omlou a thovengtak a zattheih a om ziak in kipahthu gen hi. August 15, 2015 a Cc­pur District HQ a I-Day zatna pen Lamka Public Ground, Hiangtam Lam­ka a neih himahleh Lam­ka Public Ground bawlna pailel ahihziak in DLO meeting a thupukna bang a Peace Ground, Tuibong a zat a om ahihdan gen hi.

 

DC/Ccpur in a gen­zelna ah, Ccpur district sung a sub-division 9 leh block 3 a pan mi 2.9 lakh om a, Ccpur district mip­ite biakinn tuamtuam ah kai mahle hang lungsim munkhat leh kituaktak a i om ding uh ahi chi hi. In­dia in zalenna a ngahna ding a Mahatma Gandhi, Jawaharlal Nehru, Sar­dar Patel, Subhash Chan­dra Bose, Lala Lajpat Rai, Sekhar Azad leh Bhagat Singh chihte panlakna mangngilh theih vual ahihlouh ban ah India in zalenna a ngahna dia hin­na pia sepaih hangsante leng mangngilh vuallouh ahihdan gen in amaute zahna pia hi.

 

Tu kum a district HQ a I-Day lopna ah parade contingent 33 tel ua, DC/Ccpur in kho hausa (Chief/Chairman) 33 ki­ang ah Red Blanket leh Govt Dept tuamtuam a nasemhoih telkhiak mi 89 kiang ah Appreciation Certificate/ Award pia hi. Parade contingent Group B ah Ccpur High School leh NCC Jr Wing in 1na la ua, Raynurn High School Jr NCC Wings in 2na leh JNV Bhagat Scouts in 3na la uhi. Group C (Senior Boys) ah JNV/ Tuinom Dr. Boys in 1na la a, St Mary School, Sr Boys in 2na leh Rengkai Higher Sec. School Sr. Boys in 3na la uhi.

 

Group C (Senior Girls) ah St Mary School, Sr. Girls in 1na la a, GM Model High School Sr. Girls in 2na leh JNV/ Tuinom Sr. Girls in 3na la hi. Group D (Junior Boys) ah New Lamka Up­per Primary School Jr Boys in 1na la a, Tuibong Jr High School Jr. Boys in 2na leh JNV/Tuinom Jr Boys in 3na la uhi. Group D (Junior Girls) ah Tui­bong Jr. High School Jr Girls in 1na la ua, New Lamka Upper Primary School Jr Boys in 2na leh Seilal Upper Primary School Jr Girls in 3na la uhi. Contingent-te lak ah 1na late’n Rs. 2000 + Footbal & Volley ball sang ua, 2na late’n Rs. 1500 + Football & Vollyball sang ua, 3na late’n Rs. 1000 + Fottball & Volley ball sang ua, contingent teng in Rs 500/- leh Football & Volleyball sang chiat uhi.

 

Huailou in, Mualnu­am SDO/BDO HQ, Mual­nuam ah leng Indepen­dence Day lohchingtak a zat in om hi. Hiai hun ah Thangboi Gangte, MCS, SDO/BDO Mualnuam in national flag kaipalh in thugen hi. Huai ban ah SDO/BDO Mualnuam in kipahman tuamtuam hawmkhia in IAY Spe­cial Package 2nd Phase a ding 1st instalment in bank draff Rs. 18,500 zel pekhia hi. Hiai hun zatna ahihleh bialtu MDC Langkhanpau Guite, Chairman, ADCC in leng uap in thugen a, parade contingent-te kiang ah Rs. 1000/- zel pia in, hiai hun uap kho hausate leng Rs. 500/- chiat pia hi.  


 

 

AFSPA kalh a mahni a kihallum Chittaranjan theih gigena hun zang

IMPHAL, Aug 16: Tuni Sepnawnni in Ma­nipur Students’ Federa­tion (MSF) saina in kum 12 paita a Armed Forces Special Powers Act (AF­SPA) deihlouh lahna a, mahni a kihallum Pebam Chittaranjan Mangang sih champha kum 12 chinna zat in om hi.

 

August 15, 2004 in Bishnupur bazaar, Bish­nupur district ah Chit­taranjan, amah leh amah in kihal a, a zingchiang August 16 in hospital ah si hi. Amah phawk gi­gena in, tuni’n MSF-te makaihna in “To Excel Right to Life”, “We stand against AFSPA” leh “Re­peal AFSPA chih thupi zang a rally neihna hun ah Imphal khopi sung a school tuamtuam a kipan student 3000 val tel uhi. Hiai toh kisai in tuni’n Thau ground, Thang­meiband Imphal West leh Bishnupur bazaar ah program zat in om hi. MSF president Takhel­lambam Nandababu in a gendan in, hun sawttak Centre in AFSPA lakkh­iak ding ngetna nawlkhin a, Act kalh a crusade leng Irom Chanu Sharmila patkhiak ahi chi’n gen hi. Kum 16 sung AFSPA kalh a anngawl a kiphi­nna nei Sharmila in Au­gust 9, 2016 in an ngawl khawlsan ahihdan puang a, electoral politics zom a panthak la ding a hi­hdan gen hi. Himahleh Act kalh a kiphinna a neih sumzomzel ding in thuchiam bawl hi.

 

MSF makai Nandaba­bu in a genzelna ah, Draconian law AFSPA pansan in Manipur mi tamtak thah in om ua, state sung a numei teng­teng kipumkhat a Act dou a panla chiat ding inleng ngen hi. August 11, 2016 in Naga Students’ Fed­eration (NSF) lamkaihna toh Nagate tenchilhna hill district 4- Chandel, Senapati, Tamenglong leh Ukhrul ah AFSPA kalh in mipi 4,000 val in rally thupitak nei uhi. Rally zoh in Naga mip­ite sik-leh-tang in, NSF, Naga Hoho, Naga Moth­ers Association leh Naga Peoples Movement for Human Rights ( NPM­HR) -te’n Prime Minis­ter of India khut ah joint memorandum pia uhi.

 

 

Court in JCILPS convenor lui tung ah thukhenna limsit

IMPHAL, Aug 16 : Tuni Sepnawnni in Ma­nipur High Court divi­sion bench in, JCILPS’s Convenor lui Kh Ratan Singh tung a ‘wanted tag’ thubuai toh kisai a thukhenna bawl ding limsit in koih uhi.

 

Justice N Koteswar leh Justice Kh Nobin Singh makaih HC divi­sion bench in court ah petitioner council Senior Advocate Lalit Singh a kipan soiselna omte ngaihkhiaksak hi. Au­gust 19, 2016 in thubuai toh kisai thukhenna puankhiak himaithei ding hi. Manipur HC in Kh Ratan tung a wanted tag thubuai toh kisai pai­pih zel theih ding hidan a, thupuan a bawl zoh nung August 9, 2016 a kipan in Court ah want­ed tag thubuai hearing pat in om hi. July 20, 2016 in Chief Justice Rakesh Ranjan Prasad leh Justice Songkhup­chung Serto makaih bench dang a kipan in hiai thubuai suankhiak in om hi.

 

 

Prof M Dhaneshwar Singh in MU VC mohpuakna la ding

IMPHAL, Aug 16 : Tuni Sepnawnni (Aug.16) a Manipur University Vice- Chancellor Prof H Nandakumar Sarma ap­pointment term a bei toh kiton in, zingchiang Nilaini in, Manipur Uni­versity senior most Pro­fessor, Prof M Dhanesh­war Singh in, kum 65 a chin matan a hihkeileh Vice- Chancellor thak in office a luah nawn mateng Manipur University Vice- Chancellor mohpuakna la ding hi.

 

 

Petrol man Rs 1/ Litre leh Diesel man Rs 2/Litre in kiam

New Delhi, Aug 16: Tuni Sepnawnni a kipan in Petrol man Rs 1/litre leh diesel man Rs 2/litre in kiam hi. Tu in Delhi ah pretrol litre a Rs. 60.09 in zuak in om a, diesel leng Rs 50.27/litre azuak in om hi.

 

July 31,2016 a thautui man etkikna nanungpen neih ahih hun in, petrol man Rs 1.42/litre leh die­sel man Rs 2.01/litre in sukkiam in om hi. India a petrol leh diesel man etkol ahihlouh ziak in, market rate dungzui in thautui man bawllem in om zel hi.

 

 

JAC makaih in Mass Dharna nei

LAMKA, Aug 16: August 15, 2016 in Joint Action Committee Against Anti-Tribal Bills (JAC) makaih in Sal­phate’ Pumbuk, Hiang­tam Lamka ah ‘Mass Sit-in Protest/Dharna’ om hi.

 

Hiai hun ah veng tua­mtuam a pan mi hunk­hop paikhawm ua, Rev. Lian Benson Khuptong, General Secretary, Evan­gelical Lutheran Church in Pathian thutak gen in, mipi paikhawmte toh bill tungtang houlimna nei uhi. Hiai hun ah JAC, Outer Manipur Tribals Movement (OMTF) leh Manipur Tribal Forum- Delhi (MTFFD) palai bangzahhiam tel ua, mipite a pan dotna omte JAC, OMTF leh MTFD makaite’n dawnna leh hilhchetna nei uhi.

 

 

BYF-LSD in Business Session-2016 nei

LAMKA, Aug 16: Zan, August 15, 2016 sun­ma dak 10:30 in Evangel­ical Baptist Convention, Division Baptist Youth Fellowship (DBYF), Lamka South Division in EBCC Hebron Biakinn ah Business Session-2016 nei uhi. Programme ahi­hleh session 2 in kikhen a, session masa ah busi­ness session nei ua, Rev. V. Nenglian, Divisional Superintendent, LSD in business session-2016 hong a, S. Paukhanmung, Chairman, DBYF, LSD in vaidawn thugen in, M. Thiankhangin, Secretary, DBYF, LSD in Secretary report pia hi.

 

Hiai hun ah, kho tua­mtuam 5 in ngaihtuah ding a thu a sunkhawmte uh lak ah, Khominthang BYF in kum teng a DBYF khawmpi, kum tawp lam a neih sek pen August kha sung a neih hihen chih hi a, hiai pen kum nawn a pat etkhiakna ding a zat ding in thupuk uhi. Huai ban ah, Bethlehem in BYF Tuailai pawl kum 50 a chin toh kiton in Head­quarter ah department piching khat in om henla, Director khat etkolna nuai ah omta hen chih hi a, hiai pen ahihleh, DBYF in thupukna lalou in hiai thu pen DWC a put-up ding chi in thukim uhi.

 

Tangnuam leh Peth­uel BYF in Music/Key­board kisinsakna Divi­sion in hon saita hen chih leh DBYF in khochih kivehtuahna Division dang tel in hon sai zelta hen chihte ahihleh, hun bangtanhiam sung gen in om mahleh lemsalou phot uhi. Huai ban ah, DBYF-LSD 2017-2018 year plan ding a guan a om point tuamtuam 11 ahihleh ahi bangbang a paipih ding in thupuk ua, DBYF-LSD 2017-2018 budget ding a proposal a guan uh, Rs. 2, 94,000/- namkipna leng nei ngal hi.  


 

 

TPF leh NEIPP in Tripura leh West Bengal CM-te mohpaih

IMPHAL, Aug 16: August 9, 2016 a Stable ground Agartala a Tripu­ra People’s Front (TPF) leh North East Indige­nous Peoples’ Parliament (NEIPP)-te’n Interna­tional Day of World’s In­digenous Peoples, 2016 lop a sawm uh Tripura leh West Bengal Chief Minister-in dal uh hidan a ngawh in mohpaihna sangpen puankhum uhi.

 

Tuni, Sepnawnni a, Press Club, Imphal a thuthaksaite ma a TPF president Patte Kanya in a gendan in, pawlpi nih in official permission ngah ua, himahleh state nih a CM-te’n event lop ding khaktansak uh chi’n gen hi. Himahleh West Ben­gal CM Mamata Banerjee leh Tripura CM Manik Sarkar-te panlakdan toh kisai bel taklanglou hi. Tripura a civil society-te’n state sung a dan toh kituaklou a teng Bangla­desh milip khang hattak awlmohna thu tangk­oupih uhi. Patte Kanya in a genzelna ah, Stable ground a event lopna chi­amtehna a political con­ference uap ding a kisa Manipur a kipan palai 50 velte police-te’n hen­tang uhi. Himahleh event neihna mun ding a nung sawtlou in suan in om hi. NE bial a gam leitang neitu mipite a pankhawm nak uhleh dan toh kituak­lou a hong pemlutte bai­hlamtak in dal theih ding chi’n gen hi. Tripura ah dan toh kituaklou a hong pemlutte’n leitang neitu mipite tung ah thuneihna bangkim luahkhum vek uh chi’n gen hi. Tutan a mipi kivaikhawmna gam a zalenna zangkhethe­ilou a om touh nilouh uh hi’n leng gen hi. NEIPP in buaina leh lauhthawngna kibang maituah NE bial a teng nam tuamtuamte huaikhawm a platform kibang zang a panlak khawm ding tup in nei hi.

 

Tripura a state milip lakh 38 vel omna lak ah Tripura mi-leh-sa diktak lakh 12 vel phazou ua, kipemtuah mite a kipan lauhthawngna toh kho­satou lel uh chi’n Patte in gen hi. Tripura state ah leitang neitu pawl tuamtuam Tipra, Re­ang, Jamatia, Kaipeng, Noatia, Koloi leh Halam, hill tribal namte om uhi. NEIPP coordinator Ningthouja Lancha in pawlpi nihte kalh a Tri­pura leh West Bengal CM in event zat ding a kham uh mohpaihna sangpen puankhum hi. Dankalh Bangladeshi, Hindu a hihkeileh gamdang mi khatpeuh tung a tenthei­hna piak ding tup a nei political vaisaina khat­peuh chin leh ha suang in dal hiding chi’n gen hi. Bangladeshi Hindu-te tung ah India khua-le-tui hihtheihna ding kong honsak ngei ding inleng lam etna toh tu nai zek a Home Minister Rajnath Singh in Lok Sabha ah Citizenship (Amend­ment) Bill, 2016 pawlut hi. Hiai Bill toh kisai Act a suah ding phallou ding uh hi’n leng Lancha in gen hi.

 

 

Ni 2 sung in Birth Certificate 52 piakkhiak in om

LAMKA, Aug 16: Lamka Damdawi Inn a Birth Certificate lakna mun ah ni 2 sung in Birth Certificate 52 piakkhiak in om hi. Huaite ahihleh August 12, 2016 in 24 leh tuni, August 16 in 28 hi a, huai lak ah singtangmi 2 lel om hi.

 

‘Birth Certificate’ late’n ahihleh District Hospital ah Birth Certifi­cate lakna mun ah Execu­tive Magistrate order tawi in va la ua, himahleh tuni a SDO/Ccpur office a hiai thu kansui ahihna ah ‘Birth Certifi­cate’ la singtangmi 2 lel register a om hi’n Press-te kiang ah thutut bawl uhi.

 

SDO/Ccpur office ah register bawllouh a pe­tition/deed writer-te’n amau kiang va paite’n Aadhaar Card a neih ua leh huai pen identity prove dia zang a pekhe zel uh hiding a gen ahi. Hiai toh kisai a Birth Certifi­cate la khenkhat in school admission a ding leh elec­toral roll a ding chi pawl om mahleh school admis­sion hun ahihlouh ban ah tulaitak a electoral roll re­vision leng bawl hilou hi’n thutut kingah hi.  

 

 

Siaklalzawm sihna thu ah kilemna bawl

LAMKA, Aug 16: Mr Siaklalzawm (40) s/o Mr Thiankhogen of Kangvai sihna toh kisai in SP/Ccpur leh SP/Bish­nupur panlakna in tuni, August 16, 2016 sunma dak 9:30 in SP/Bishnu­pur Office ah “Kilemna/ Agreement” bawl uhi. Tua toh kiton in hiai toh kisai a kibawlkhia Joint Action Committee Against the Killing of (L) Siaklalzawm leng hiai thu saiveng hita ahihman in sukbei hita hi. Hiai toh kisai a panlakna a kithu­ahpih tengteng tung a Khaiminlun, Convenor leh K Paul Capvung, Secy in kipahthu gen uhi.

 

 

Extra-judicial killing toh kisai a data pekhawm di’n ngen

LAMKA, Aug 16: Extra-judicial Victims Families Assn., Manipur (EVFAM) in Manipur a extra-judicial killings toh kisai a thudik a vaihawm­na omna ding a panla a, Supreme Court ah Writ Petition (Criminal) No. 129 of 2012 ngetna ana pia uhi. July 8, 2016 a Supreme Court thupuk­na dungzui in, Manipur a police/paramilitary/ army-te gamtatna ziak a that a omte toh kisai a thu poimoh (information) omte kaikhawm ding in EVFAM theihsak in om hi.

 

Hiai toh kisai a District Legal Services Authority, Ccpur thupiak dungzui in, mohna neilou security force-te gamtatna ziak a sihna tuakte innkuante’n thudik a vaihawmna a ngahna ding ua extra-judicial killings toh kisai a information kaikhawm a pekhawm ding in theih­sakna bawl uhi.

 

Hiai toh kisai in Cc­pur Govt College huang­sung a Room No. 2, 1st Floor ah Legal Aid Clinic kihong a, huai ah extra-judicial killings toh kisai a lai poimoh piak ding neite’n va piaktheih ding hi. Lai poimoh khenkhat piakkhawm poimohte ahihleh informant ide­nitity proof, authority khatpeuh kiang a com­plaint bawlna lai, FIR copy, inquiry/investiga­tion bawl a omna copy, compensation/ex-gratia piak ahihleh huaite piak­na lai, postmortem bawl­na report copy, newspa­per reports leh thiltung mit a mu om leh a muh­dan uh a genna uh state­ment chihte ahi. Hiai lai poimoh kigente ahihleh August 16-20, 2016 sung sunma dak 11 a kipan sunnung dak 2 kikal in piaklut theih ding hi.  

 

 

Dist Level Inter-Schools Games Trial-cum- Selection Test 2016 om ding

LAMKA, Aug 16: District Youth Affairs & Sports Officer (DYASO), Ccpur saina in hongtung ding August 22, 2016 a pan September 15, 2016 kikal sung in discipline tuamtuam a ding, Dis­trict Level Inter-Schools Games Trial Cum Selec­tion Test 2016 om ding hi.

 

Lunkhosei Haokip, DYASO/Ccpur a pan thutut kingahdan in, Thalkap (Archery) Under 14 leh Under 17 numei leh pasal a ding form-te August 22, 2016 tan in DYASO office ah submit theih ding a, Trial/ Test ahihleh August 22 in om ding hi. Judo Under 14 leh Under 17, numei leh pasalte a ding form-te August 22, 2016 tan in submit theih ding a, Au­gust 23, 2016 in test/trial nei ding uhi.

 

Huai ban ah, Tae­kwondo Under 14 leh Un­der 17, numei leh pasal a ding mah hiding a, hiai ding in form-te August 22 tan a office mun a sub­mit ngai ding a, August 24 in trial/test nei ding uhi. Volley Ball, Under 14 leh Under 17 pasal a ding kia hiding a, Football ahi­hleh Under 14 kia, numei leh pasal a ding hiding hi. Hiai ding a lunglutna neite’n form la in August 31, 2016 tan in office ah submit theih ding a, Sep­tember 1 - 3, 2016 kikal sung in trial/test om ding hi. Huai ban ah, Under 14 leh Under 17 numei leh pasal a ding mah in Ath­letics leh Badminton om ding a, Kabaddi ahihleh Under 17 numei leh pasal a ding in om ding hi.

 

Hiai a ding in form-te September 10, 2016 tan in office ah submit theih ding a, September 13-15 kikal sung in trial/ test om ding hi. Hiai kimawlna chituamtuam a ding a lunglutna neite’n tuni a pan DYASO Office, Tuibong ah form laktheih ding hi.

 

 

Lamlian tuang uap a meh/van zuak in om

LAMKA, Aug 16: Ccpur District sung ah kha teng in gari 100 val in registration bawl gige in gari kibehlap hat mahmah hi. Niteng phial in gari kibehlap mahleh lampi keklet ahihlouh ziak in lampi neusuak mahmahta hi. A diak in Thangzam Road, New Bazar area a lampi a neu ban ah, dawr bawlte’n lampi lam saupi a luahsek ziak un kochiik mahmah hi.

 

Hiai toh kisai a vang­kim in a kisaipih depart­ment in footpath tung a meh zuak/vanzuak phal­louh chi a order suah in, police-te tanpha duty sek mahle uh, tu in bel a ngei bang nawn in, foot­path tung ah meh/vante zuak in, mun khenkhat ah, lampi tanpha het­pha in a meh/vante uh phoukhia uhi. Hiai bang a lampi kochiktak a meh/ van zuakte’n mun lianpi luahsek ua, tuni inleng Diesil Auto nih taikhawm lai, gari a pelhna lam uah kihettuah kha uhi. Hiai toh kisai, khe a paite kia hilou in gari a taite a ding tanpha in nawngkaina li­antak om a, a kisaipih de­partment lam in a etkai uh poimoh hi.

 

 

‘National Deworming Cam­paign Training’ om ding

LAMKA, Aug 16: Zingchiang, August 17, 2016 sunma dak 10 a pan in YPA-GHQ Hall, Hiangtam Lamka ah Churachandpur Block/ Town area a teacher-te a ding in ‘National Deworming Campaign Training’ om ding hi. District Health Society a pan thutut kingahdan in, training ahihleh ses­sion 2 in kikhen ding a, session masa, zinglam dak 10 a pan sun dak 12:00 kikal in ADC nuai a teacher-te leh CDPSA nuai a private school teacher-te training masa ding uhi.

 

Session 2na, sun­nung dak 1 a pan dak 3 kikal in ZEO nuai a teacher, mission school teacher, KV/JNV a teacher, special school a teacher-te leh play/ pre-school a teacher-te training ding uhi. Hiai Deworming Campaign ahihleh zan, August 11, 2016 a honkhiak hi a, naupang kum 19 tante kiang ah hutlou piaksuak hiding uhi.

 

 

CM makaih in Mizoram Bharat Scouts & Guides Council Meeting om

Aizawl, Aug 16: Mizoram Bharat Scouts & Guides (MBSG) in tuni’n Chief Minister Lal Than­hawla makaih in Chief Minister’s Banquet Hall ah State Council meeting nei uhi. Chief Minister Lal Thanhawla ahihleh MBSG President ahi.

 

Chief Minister in Presidential Address a genna ah, Mizoram Bharat Scouts & Guides in state dang toh teh a nasepkhiak tamtak nei ahihdan leh a sepkh­iakte phathuai mahmah hi’n gen hi. Huai ban ah Scouts & Guides Move­ment tungtawn a khotang hinkhua bawlhoihna ding leh khua-le-tui hoih leh manpha hiding a tuailaite bawl dingdan ban ah hiai tungtawn a ‘nationwide cleanliness mission’ a lo­hchinna ding tungtang ngaihtuah a nakzaw sem a panlak poimoh hi’n gen hi. Chief Minister in National Awards ngahte kipahpih thu gen kawm in maban a leng lohch­inna thupi zaw a ngah uh a deihsakthu gen hi.

 

Hiai council meeting ahihleh State Chief Com­missioner leh Director Sports & Youth Services Zothanmawia in makaih a State Secretary in nas­epkhiakte report pia hi. Hiai hun ah Annual Ten­tative Programme for 2016-17 pomna leng nei uhi. Hiai hun ah kum paisa a State Council Ex­ecutive Committee thu­pukna dungzui a ‘State Chief Commissioner pen Sports & Youth Services Director in a letkhawm ding chih thupukna pom uhi.

 

Hiai hun ah study group in ‘Mizoram Bharat Scouts & Guides pen dan dungzui a Au­tonomous Association a bawl ding’ chih thu a puaklut tungtang uh leng nouneltak in genkhawm uhi. Hiai meeting ah vice president ding in mi 3 - Boichhingpuii, Laldingli­ani leh Tintlunga Hniah­lum telching uhi. Tulel in Scout Wing ah member 1996 leh Guide Wing ah 2442 om a, member teng kigawm in 4437 pha hi.

 

 

Scholarship ngahna di’n Adhaar card poimoh teitei lou

Aizawl, Aug 16: Tunai zek a New Delhi a nationwide Workshop on National Scholarship Portal-II neih a om toh kizawitawn in, tuni Sep­nawnni in Secretary JH Zoremthanga makaih Mizoram Scholarship Board member-te’n Min­istry of Minority official-te kimuhpih ua, Ministry kiang ah Adhar card a kipan Mizoram awngsut ding in ngen uhi.

 

Meeting hun in, Mizoram Scholarship Board official-te’n Min­istry of Minority kiang ah Mizoram a student tamzawte’n Adhaar card a neihlouh ziak ua tribal scholarship ngah theilou ding tamtak om uh ahi­hdan leng theisak ua, ni tamlou paita a enrollment leng khawlsan uh hidan in theisak uhi. Ministry inleng Board-te ngetna awlmohtak in ngaihkhiak sak ua, Adhar card zatna a kipan Mizoram awngsut ding thu a pompih uhtoh kiton in, Adhar card tellou in Mizoram student-te’n kum 2016 a ding scholar­ship apply thei ding uhi. Adhar card ngai seselou a student-te’n tribal schol­arship apply thei ding a panla Chief Minister Lal Thanhawla leh state scholarship board tung ah Mizo Zirlai Pawl(MZP) in kipahthu gen hi.

 

 

Leitolh ziak in Aizawl ah inn 2 phelkhia

Aizawl, Aug 16: Vuahzuk ziak a lei kia (sinking) a thuk deuh­deuh ziak in Aizawl khopi a Hnunthar ah memchim omthei dia muanmoh ziak in inn nih phelkhiak in om hi.

 

Thusuak in a taklatna ah, nipikal paisa Kiginni a kipan vuah khawllou a, a zuk ziak in Aizawl kho­pi sung a Hnunthar Veng ah leituang niam deuh­deuh a memchim omthei dia muanmoh in om hi. Tua toh kisai in veng­sung vaihawmtute leh YMA makaih in tuni’n social work in Lalhlu­puii, Luangmual leh La­lengmawii’ inn phelkhia uhi.

 

AMC council Lal­muanpuia leh DC of­fice staff Caroline in hiai mun va enkhia ua, panlak dingdan gel uhi. Huai ban ah bialtu MLA Lal Thanzara leh AMC councilor-te’n leng so­cial work ah sum-le-pai a panpihna pia uhi.

 

 

 

 

NEWS TOMKIM

 

EVM checking bawl

DC/Ccpur Office a Election Dept ah tuni a pan in Seiminthang, Data Entry Opperator/Ccpur leh Roshan Kumar, Data Entry Opperator/ Bishnupur makaih in Electronic Voting Machine (EVM) checking nei uhi. DC/ Ccpur office ah EVM machine control unit 341 leh ballot unit 359 om a, EVM battery leh a dangdangte zattheih lai ding hiam chihte enchian uhi.

 

 

ZRO in Kamminkhup ‘suspend’

Lt. Colonel TK Zomi, Director, Ministry of Defence, Zomi Re-unification Organisation in August 13, 2016 a ‘suspension order’ a suahna ah, ‘immoral character’ ziak a August 12, 2016 a kipan Mr Kamminkhup @ George (6th Batch) s/o Soikhothang of Torbung pawlpi’n ‘suspend’ ahihdan taklang hi. Tua toh kiton in Mr Kamminkhup in ZRO/ZRA toh kizopna nei nawnlou ahihdan leng taklang hi.

 

 

Posting/Utilisation orderpelutdi’ntheisak

Chief Medical Office/Ccpur nuai ah Grade-IV semte’n a posting/utilisation order uh xerox copy bawl a, Aug. 2016 sung a CMO/Ccpur office ah pelut ding in CMO/Ccpur in tuni’n theihsakna bawl hi.

 

 

Mi 338 in NFSA Card pekik

National Food Security Act (NFSA) nuai a Ration Card nei mi 338 in tunitan in DSO/FCS Office ah pekik (return) uhi. Tunai zek a pan tunitan a NFSA Ration Card pekikte ahihleh Ninglianching of Rengkai, Chingkhochin of Bijang, Paumuanching of Vengnuam, Vungsuanmang Valte of Lailam Veng, Dalsuanmung of Chiengkonpang, Nengshi of Bijang leh Nengboi of Bijang hi uhi.

 

 

Baptist Saptuamte’n Aug 15 in thumkhawmna nei

Indian Baptist Women Union (IBWU) in kum bangzahhiam paisa a pan August 15, “Day of Prayer” dan a, a puan dungzui in tu kum inleng zat in om nawn hi. Hiai ‘Day of Prayer’ ahihleh, India gamsung pumpi a Baptist saptuamte’n Au­gust 15 a, a zat sek uh hi a, tu kum in leng saptuam tuamtuam in hiai ‘Day of Prayer’ zang in, amau saptuam chiat ah thum­khawmna nei uhi.

Tu kum Indian Bap­tist Women Union in ‘Day of Prayer’ hun a thumna point ding chi in point tamtak, saptuamte kiang ah hawm uhi. Lam­ka khopi sung a Baptist saptuam tuamtuam in leng amau omna biakinn chiat ah thumkhawm­na nei ua, huai hun ah, IBWU in thumna ding a point a piakte ban ah, amau local in poimoh a sak uh behlap in thumna hun zang uhi.  

 

 

SUNNA:

Kimngailun d/o Liantinmang of Hmuia Veng, Lamka, tuni, August 16, 2016 zingkallam dak 8 in si hi. Amah ahihleh hun bangtanhiam a pan damlou hi a, Imphal a ki-ensak dia a hoh Imphal a tunnung uh sawtlou a si ahi. RIP.

 

 

…for more detail : Here

 

 

 

 

Related

  1. The Lamka Post | August 12, 2016
  2. The Lamka Post | August 13, 2016
  3. The Lamka Post | August 14, 2016
  4. The Lamka Post | August 15, 2016