You are here: HomeRSS FeedsThe Lamka Post

The Lamka Post | April 28, 2016

Thursday, 28 April 2016 17:50

Parliament Budget Session Day 3:

AgustaWestland helicoper deal thu in Inpi buaisak

New Delhi, April 27: Tuni Nilaini in Parlia­ment Budget Session Khenpi nihna pailel ni 3na ding in Inpi nih a vaihawmna neihzom in om nawn hi. Lok Sabha a tutkhawmna pat a hih toh kiton in, Congress-te’n AgustaWestland helicoper deal toh kisai a ngawhna omte party makaite kalh a gamtatna hidan a ngawh in, hiai thubuai toh kisai genkhawm ding deih in ngetna bawl uhi.

 

Tuni a Inpi nih a genkhawm ding a kilui­khia agenda khenkhatte a hihleh: Lok Sabha: The Budget (General) Second stage: Discussion and vot­ing on Demands for Grants of Ministry of Develop­ment of North Eastern Region leh Discussion and voting on Demands for Grants of Ministry of Skill Development and Entre­preneurship hi uhi. Rajya Sabha a ngaihtuah ding leh pass ding Bill khenkhat luikhiak a omte a hihleh The Appropriation Acts (Repeal) Bill, 2015, The Repealing and Amend­ing (Third) Bill, 2015, The Constitution (Scheduled Castes) Order (Amend­ment) Bill, 2016 leh The Industries (Development and Regulation) Amend­ment Bill, 2015, hi uhi.

 

Zinglam dak 11 in Lok Sabha ah proceedings kipan a, hiai hun in PM Modi leng tel hi. Opposi­tion members-te’n March 11 a Kakrapar atomic power station a coolant leakage thubuai toh kisai tangkou­pih mahle uh government in thu neu chik ahi chi’n nawlkhinsak hi. Railways Minister Suresh Prabhu in a gendan in, kha 6 sung in high speed train Tejas pat­khiak hiding a, technology thak toh Bullet train taisak hiding chi’n gen hi. Rajya Sabha a Congress-te’n BJP MP Subramanian Swamy on chopper deal tungtang a, Sonia kaihkhiak ding ahi chia kampau a neihte ksiai a kiphinna a neih ziak un, Inpi khawlsak in om hi.

 

Inpi a Question Hour neih a hih phet in, Lok Sabha a Cong makai Mallikarjun Kharge in VVIP helicopter deal toh kisai in newspaper teng phial in item neivek ua, ngawhna omte toh ki­sai party makaite kalh a kibawl ahi chi’n gen hi. Min hunkhop leng taklat in om ua, hiai thu ngaihtuah tuak mahmah a,I genkhawm ding uh ahi chi’n gus­taWestland min taklanglou in gen hi. peaker Sumitra Mahajan in dawnna pengal a, hiai thu question hour zoh chiang a genkhawm ding ahi chi’n dawng hi. UPA Govt in dikloutak a nasemte report toh kisai a ngah hunhun in, action lakhinta a, hiai ngawhna omte kum 2013 a nekgukna thubuai toh kisai hi’n leng Cong in taklang uhi.Cong president Sonia Gandhi in­leng AgustaWestland chop­per deal bribes a kigolhkah chia ngawhna omte naktak in nial hi. Lauh ka nei kei a, ka tung a ngawhna kinawlte a dik khat leng omlou ahi chi’n gen hi.

 

 

CM in DIPR website leh ‘Cof­fee Table book’ hongkhia

Imphal, April-27: Chief Minister Shri Okram Ibobi Singh in tuni’n Imphal a CM’ Sec­retariat a hunzatna ah Department of Informa­tion & Public Relations (DIPR), Manipur a dia official website leh “Ma­nipur at a Glance” kichi Coffee Table Book banah “Manipur in 2015” kichi informational documen­tary film honkhiakna nei hi.

 

CM in a honkhiak DIPR official website a honkhiak ahihleh ‘www. dipr-manipur.gov.in’ hi a, Coffee table book “Manipur at a Glance” kichi ahihleh a sung ah Manipur state sung thu tuamtuam poimoh omte lemlak leh a thu sau­lou chiat toh kithuah a koih in om hi. Huailou in, Video documentary “Manipur in 2015” kichi ahihleh tulel a Manipur vaihawmna len govern­ment in lohchinna leh sepkhiak thupi deuh a neihte a diak in kum 2015 sung a deuhte tu­ansak in om hi. CM Sec­retariat a hunzatna ah Deputy Chief Minister Gaikhangam, Principal Secretary (IPR) Letk­hogin Haokip, Director (IPR) Somorjit Salam leh DIPR a officers leh staff tamtak tel uhi.

 

 

RIMS employee-te’n sit-in-protest nei; Prof Chingtham Arunkumar in RIMS Director len

IMPHAL, Apr 27: Tuni Nilani in Region­al Institute of Medical Science (RIMS) a non-teaching employee-te’n April 25, 2016 a RIMS OPD Block a hand gre­nade bomb hattak koih a om deihlouh lahna in sit-in protest nei uhi.

 

Zan Sepnawnni in Kangleipak Commu­nist Party-Military Joint Committee (KCP-MJC) – te’n Director of Regional Institute of Medical Sci­ences (RIMS) leh Deputy Director ban ah Medical Superintendent-te last warning piakna dan a, RIMS OPD Block a gre­nade kikam a mau koih hidan in puang uhi.

 

RIMS a staff recruit­ment a golhgukna sum la a kigolh hospital a official khenkhatte KCP-MJC etkhiakna nuai ah omlel uhi. April 11 in helte’n Thangmeiband Lairen­hanjaba Leikai, Imphal a RIMS Medical Super­intendent Dr M Amuba tenna mun ah grenade khat vakam ngeita uhi. RIMS Director Sanjen­bam Rita, Medical Su­perintendent Maisnam Amuba leh Deputy Direc­tor Y Rajendra –te nek­guk hat officer-te hidan in ngawh in om uhi.

 

Tuni Nilaini in Prof Chingtham Arunkumar in Prof Sanjenbam Rita khut a kipan in RIMS Director in-charge la hi. Tuni a kiphinna hun ah RIMS medical student-te leng tel uhi. Prof Arun­kumar in sit-in-protest neihna mun vapha a, kip­hinte kiang ah, noute tel­lou a damloute’n thuak­loh ding uh a hi chia gen in, duty sunzom kik ding in ngen hi. Kiphinte’n “Use bombs against en­emies,” “We are not your enemies” leh “We want peace” chih thu a kigel­hna placard tuamtuam leng tawi uhi.

 

 

Lhingjaneng Gangte luang kivui ding

Lamka, April-27: Manipur numei lak a ‘Pad­mashree’ award sang mas­apen Lhingjaneng Gangte (79) w/o late Dr TS Gangte zan nitak dak 10.30 vel in Dimapur ah damlouhna ziakin si hi. Lhingzaneng ahihleh Manipur a State Education Director din­mun len ngeisa hi a, Mani­pur a khotang bawlhoihna ding toh kisai a movement omte ah a hahpanna ziak in Padmashree award sang hi. Aluang ahihleh tuni’n Lamka hong kipotung a, zingchiang April 28, 2016 in Lamka ah kivui ding hi.

 

 

Gialpi leh Vuahpi ziak in khua 79 ah inn 870 val kisia

LAMKA, April 27: Churachandpur District ah Gialpi leh Vuahpi ziak a inn hunkhop kisia tung­tang ah khua leh inn ki­sia report kibehlap zel a, zan tan in khua 79 ah inn 870 kiseta hi’n SDO te’n report bawl uhi. Huaite ahihleh SDO/CCpur nuai ah khua 8 ah inn 122 ki­sia a, Henglep SDO nuai ah khua 26 apan inn 451 kisia in, JB School build­ing 1 leh Community hall building 1 kisia a, Private School building 2 leh Bia­kinn 1 kisia chi’n report pia hi.

 

SDO/Singngat nuai ah khua 7 apan in inn 32 kisia in Community hall 1 kisia chi’n report pia hi. SDO/Thanlon nuai ah khua 12 apan inn 71 kisia in, Private School building 2 leh lou hec­tres 15 kisia chi’n report hi. SDO/Tipaimukh nuai ah khua 17 apan inn 138 kisia a, PHSC building 1 leh Community hall 2 kisia a, SDO/Tuibuang nuai ah khua 8 apan inn 50 kisia a, private fenc­ing 1 leh retaining wall kisia a, Sangaikot ah khua 1 apan inn 5 kisia chi’n report om hi.

 

Gial leh vuahpi ziak a inn leh lou kisia te lak ah khua 79 apan inn 870 te panpihna ding in apaisa April 25, 2016 ni’n DC/ CCPur in gelhthoh in Chief Secretary, Govt. of Manipur ah ngetna pelut in relief ading in Antang 1,000qtls, Havai 10qtls, leh Langva 1,000 bundles peding in ngen hi. Tuni tan in Government lam pan bangtan tung hihiam chih bel kithei loulai hi.

 

 

KLA Cadre in CJM CCpur court ah kho hausa khat ngeibet

Manipur Update

IMPHAL, Apr 27: CCpur Sub Division nuai a Kulbung kho hausa Lenk­hohao Mangte in, tuni Nilaini a thuthaksaite ki­ang a, a gendan in, a kho hauhsakna huamsung a sing phuk mi 4- Lenkhosat Mangte (40), Lenkhokai Mangte(39), Haokholun Mangte (65) leh Seikho­kam Mangte (75)-te tung a thubuai khat a thehlutsa, a zukkik louh ziak a, Chief Judicial Magistrate CC­pur, Court Room sung a KLA (Touthang Group) member-te’n ngeibet uh a hihdan gen hi.

 

Hiai thubuai toh kisai genvenglouh in CJM CC­pur Court ah omtou denlai a, tuni’n hiai thubuai toh kisai hearing neih dingte lak ah taklat in om hi. Hau­sapu Lenkhohao Mangte in a gendan in, tuni Nilaini zinglam dak 10 vel in, KLA (Touthang Group) cadre a kipan tuailai khenkhat court room ah hongpai in kaihkhiak a hon sawm ua, a pawtkhiak utlouh ziak a ngeibet uh ahihdan gen hi. Court Judge kiang ah Kwakta tan police-te venbitna peding in ngen ngal a, KLA cadre-te khut a kipan suakta thei hi. KLA (Touthang Group)-te SoO nuai a om uh ahihdan gen a, hichibang a gamtang ding a lam enlou hi’n leng gen hi. Thuneite kiang ah hiai thu toh kisai enkai a, a gari zatte uh leng lak­sak ding in ngen hi. Hiai thubuai toh kisai mun bit­zaw court dang a suankh­iaksak ding inleng ngen hi.

 

 

JAC leh MTMRC team in Zoramthanga kimuhpih

LAMKA, April 27: Zan a Lamka apan Joint Action Commit­tee against anti tribal bill (JAC) leh Manipur Tribal Movemnet Road Contruction (MTMRC) team Mizoram zinte tuni zinglam dak 5 in Aizawl tung uhi.

 

Amaute’n tuni mah sun dak 12 in MNF president, Zoramthanga, MNF of­fice ah kimuhpih ua, huai zoh sunnung dak 2 in Zoram National Party (ZNP) president kimuh­pih uhi. Hiai hun ah tuni­tan a kithuahpihna a piak­te uh ziak in kipahthu gen ua, tua banah Manipur a Tribal Movement pailel leh Mizoram leh Manipur, Guite Road tawn a kikaw­mtuahna construction pailel toh kisai nouneltak in houlim uhi. Zingchiang in MSU, ZoRO leh MZP makaite toh hun zang­khawm ding uhi.

 

 

Manipur ah May 6 apan gari service omlou ding

Imphal, April-27: Joint Administrative Council (JAC) of All Mani­pur (under 5 tone) passen­ger service thusuak dan in state sung a passenger pua gari himhim hongtung­ding May 6, 2016 apan a tai (service) omlou ding a, hiai thupukna pen state government in Driver-te a dia tax puakgik nasatak om pen hihvengsak dia ngetna piak ahihnung a limsak a omlouh ziak hi’n taklang uhi.

 

State Transport de­partment in ‘one-time tax policy’ a zat pen State gov­ernment kiang ah enthak a lakhe ding in ngetna neih himahleh limsak a omlou hi’n Council Con­venor L Somorendro in thuthaksaite kiang ah leng gen a, concern de­partment ah leng ‘Mem­orandum’ tanpha piak himahleh dawnna bang­mah muh omlou hi’n leng taklang hi. One-time tax piak ding toh kisai in Vehicle services (under 5 tone) kichi - Auto Rick­shaw, Magic, Winger, 407, D.I carrier services dangte’n pom theilou hi’n leng gen hi. Hongtungding May 5, 2016 tan a one-time tax toh kisai government in Order omsa a lakkhiak keileh May 6, 2016 apan service himhim khawlsak hiding hi’n Convenor in taklang hi.

 

Hiai toh kisai pan­lakna ah passenger pua a gari service kuapeuh in thuap chiat ding leh thuneitute’n leng tax piak louh ziak a kuamah mankhe lou ding in ngen uh hi’n thusuak in tak­lang hi.

 

 

Regional Action on Inclusive Education (RAISE) in North East project honkhiak hita

Lamka April 27: Tuni sunma dak 10:30 in Manipur a dia a thumna dingin Life Café, Reng­kai, Churachandpur ah Regional Action on Inclu­sive Education (RAISE) in North East kichi proj­ect Wanneilen Serto MFS Finance Controller SSA in nei hi.

 

Hiai hun Ashley Lhain­eiphal in makaih a, Dr. Rev. LH Jackey Simte, Superintendent, AGEI, Manipur District in hun patna thumna nei in, The Malsawm Initiative a naupangte’n Laa sa ua, Kaylie Lalrokim, UN Vol­unteer project Co-ordi­nayor, RAISE North East Manipur in vaidawn thu gen hi. Hiai hun ah Bib­hu Dutta Sahu, Project Director, Raise-NE leh Vunglallian, Vice Chair­man, CCI te’n uap in thu saulou gen uhi.

 

T. Goukhomang Simte, ZEO, Churachandpur leh Wanneilen Serto, NFS Finance Controller SSA te’n Guest of Honour leh Chief Guest hihna toh uap uhi. Hiai project ahihleh Centre for Community Initiative (CCI) toh kithu­ah a honkhiak hi a, NGO tuamtuam toh kithuah a kum 5 sung daih dia pat­khiak hi a, hiai a techni­cal support lam bawl din­gin government lam apat Sarva Shikshya Abhiyan (SSA) te naupang hilhtu dia seh in om uhi.

 

RAISE in NE ahihleh NE a dia a 3na Lamka hi a, hiai ahih leh NGO’s tu­amtuam in a support ba­nah Manipur a dia muan mahmah a select a om CCI toh pangkhawm a kum 5 sung a dia project a piak uh ahi hi. Huai ban ah hiai toh kisai in govt toh pangkhawm a sukhat zoksem theihna dia SSA/ govt. School te toh pan­gkhawm a panlak tup a om ahidan Bibhu Dutta Sahu, Project Director, RAISE-NE in gen hi.

 

Huai ban ah hiai proj­ect toh kisai in SSA in panlak theih tan a panla ding ahihdan Wanneilen Serto, MFS Finance Con­troller, SSA in gen hi. CCI ahihle 2002 a vualph­aloute awlmohna ziak a patkhiak a om hi a, 2007 a sukhat a om in issue tampi a theihphak in om a, society tuamtuam leh vualph­aloute a ding bik a pat­khiak hi a, huai tung­tawn a nasep patkhia a om in, vualphalou chi a, a kingaihsiat louh ua, mi nautang toh dinmun kibang ahi uh chih tak­lat theihna dia panla hi uhi. Huai banah CCI ahi­hleh vualphaloute’ ‘tal­ent’ zonkhiak a, amau a kimuanna neithei a amau mimal kimuangtak a kh­othang a, a kihel ngamna ding ua panla hi uhi.  


 

 

KSO/IB President di’n Than­glalson @Shon Baite telching

Imphal, April-27: Kuki Students’ Organ­isation, Imphal Branch a kum 2016-2019 sung a Executive ding telna tuni’n Kuki inn, Imphal ah nei uh a, huai ah Presi­dent thak ding in Than­glalson @Shon Baite telching uhi. General Sec­retary ding in Khaimin­len Doungel leh Finance Secretary ding in Ngan­gam Haokip telching a om uh ahihdan thusuah a bawlna ah taklang uhi.

 

Kitelna zoh in KSO IB a election Returning officer Sasang Vaiphei in telchingthak a om makaite kichiamna neis­ak a, KSO Imphal Branch a Executive post dan­gte ahihleh KSO General Headquarters toh kithu­zak in May 2016 beima a guan vek hiding in thu­suak in taklang hi.

 

 

MSPDCL in Street lamp koihna ding enkhia

LAMKA, April 27: Imphal apan in K. Zilla Singh, General Manager (GM) MSPDCL Circles- II in tuni’n Lamka hongpha in Lamka khopi sung a kongzing tuamtuam a Street lamp koihna mun ding hong enkhia hi. Tu’n khopi sung a bik in Tedim Road leh Tipaimukh road ah MANEREIDA Ltd in Solar lamp koih ua, amau koih khak louhna munte ah koih som in panla uhi.

 

 

DC office ah vehicle hiring charge lak theih

Lamka, April-27: Autonomous District Council 2015 general election hunlai a Churachandpur dis­trict sung a gari (vehicle) zatkhak a om neitute’n DC/ DEO, CCpur office ah Requisition Order leh Duty Slip tawi kawm in April 28, 2016 apan office hour sung in lak theih ding a, May 31, 2016 tan hun hon hiding hi’n DC/CCpur in theihsakna thusuah bawl hi.

 

 

 

 

NEWS LAKTOM

 

Singngat block Hq ah DLCC meeting nei ding

District Level Co-ordination Committee (DLCC) meeting hong tung ding May 6, 2016 sunma dak 11:00 in Singngat Sub-Division Hqtrs, Singngat ah nei ding uhi. Huai meeting ah District Level Officer-te leh SDO/BDO te tel ding uhi. Sub-Division tuamtuam a DLCC meeting pen hun paisa inleng neih in ana om ngeita hi.

 

 

Singngat line ah electric vak thei nailou; mipi buai

Churachandpur district vuahpi, gialpi leh kekkia in a nuai ziak in CCpur district electric toh kisai nawngkaina huaisetak tun mahleh Lamka khopi leh a kim-le-kiang bel meivak hoihtak in pai thei nawnta hi. Himahleh Singngat line a mei a lut theih nailouh ziakin tuma a meimit pen tunitan mei pai thei nailou hi. Hiai toh kisai, a kisaipih Deptt apan thutut kingah dan in nasem dingte Imphal lam ah om vek ua, huaite banah, vanzat ding leng bangmah omlouh ziak a bawl theihlouh a om hi’n thutut kingah hi. Hiai ziakin Singngat mipite buai mahmah uhi. A kisaipih Deptt in kintak a bawlhoih sak ding in Singngat mipite’n ngen uhi. Tuabangkal ah, MSPDCL/ Elect dept in tuni tan in khopi sung ah Elect. Pre-paid metres box 9750 bulhta ua, huai lak ah pre-paid metres box 6800 activate sakta uhi.

 

 

PTC/GHQ CWC meeting nei ding

Paite Tribe Council (PTC) General Headquarters a Central Working Committee (CWC) in hongtungding April 29, 2016 sunma dak 11.00 in PTC-GHQ Conference Hall, Hiangtam Lamka ah meeting nei ding uhi.

 

 

World Malaria Day- 2016 zang ding

District Malaria Office/CCpur saina in hongtung ding April 30, 2016 ni’n Tipaimukh Sub Divn sung Lungthulien Dispensary ah World Malaria Day- 2016 zang ding uhi.

 

 

SUNNA:

Nialzavung (61) w/o Nangginlian of Zion Veng, New Lamka awmna (ashtma) ziakin tuni zingkal dak 2:30 vel in si a, tuni mah in New Lamka YPA hanmual ah kivui hi. RIP

 

 

 

 

…for more detail : click here