You are here: HomeRSS FeedsThe Lamka Post

The Lamka Post | June 29, 2016

Wednesday, 29 June 2016 21:19

NSCN-IM Chairman Isak Chisi Swu mualliam; July 4 in Zunheboto ah vuiliam hiding

New Delhi, June 28: Tuni, Sepnawnni nitaklam dak 12.40 in Fortis Hospital, New Delhi a kum paisa a kipan kal (kidney) natna ziak a ki-enkoltou den National Socialist Council of Nagaland-Isak-Muivah (NSCN-IM) co-founder leh chairman Isak Chisi Swu mualliam hi. Kum 86 a upa Isak Chishi Swu in a zi Khulu, tapa 5 leh tanu khat nusia hi.

 

NSCN-IM Chairman Isak Chisi Swu ahihleh Government of India toh ‘peace talks’ neihna a member poimoh mahmah khat ahi. Hospi­tal ah ki-enkol mahleh ‘peace talks’ toh kisai a thiltung thak omte hoi­htak in enkaitoulai hi. Ni kum a New Delhi a Prime Minister Modi leh NSCN-IM in meeting a neih uh uap ut mahleh a damtheihna din­mun et in doctor-te’n a phallouh ziak un, teltheilou hi.

 

1997 a Government of In­dia leh NSCN-IM in “Hiamkham Thukhun” (ceasefire agreement) a bawl ua kipan in Chisi Swu in GoI leh NSCN-IM kal ah dinmun po­imohtak luahtou den hi. Ni kum a Prime Minister Modi toh ‘Peace Talks’ patkhiak ahih hun inleng, kihouna om ding chi’n kithalawp mahmah a, kihouna a pankhak ngei leng lunggulh hi. Himahleh a dam theihna in a zillouh ziak in doctor-te theihsakna bang in hiai kihouna ah teltheilou hi. PM Modi makaih a NSCN-IM in ‘Framework Agree­ment’ (Peace Agreement) a bawl zoh ua suaikaihna ding a, amah suai leng a poimoh ziak in etkol a omna mun hospital ah Chisi Swu suai lak in om hi. Hiai hun in kipak leh kithalawptak in, Chisi Swu in amah khut mahmah in suaikai a, hiai ‘Peace Agreement” pen amah a ding a tup tangtunna chikhat (dream come true) hidan inleng gen hial uhi.

 

Isak Chishi Swu ahihleh 1929 in piang a, Chishilimi Naga khua a teng Kushe Chishi Swu tapa khat ahi. Ch­ishilimi Naga khua ahihleh Nagaland state sung Zunheboto district a Sema (Sumi) khota khat ahi. Chishilimi ah American Mission School khat ah laisin pan a, hiai zoh in Government High School, Kohima ah sunzom a, St. Anthony’s College, Shillong a ki­pan in Political Science (Honours) in graduate hi.

 

1950 beikuan in, helpawl zom a, Naga mipite political organiza­tion khatdan a kigen Naga National Council (NNC) ah kum 1940 bei­kuan leh 1950 kum bultan tha­thoutak in Foreign Secretary len hi. 1940 in Angami Zapu Phizo makaihna nuai ah, India a kipan Nagate leitang khenkhia a “Sover­eign Naga State” bawlkhiakna ding in campaign pan mahle uh lohching zoulou uhi. NNC foreign secretary a letzoh in NNC Vice President in kaisang hi.

 

Naga National Council (NNC) leh Government of India kal a Shillong Ac­cord suaikaih a om kalh in, January 31, 1980 in Isak Chishi Swu, Thuingaleng Muivah leh S.S. Khaplang in National Socialist Council of Nagaland (NSCN) phutkhia uhi. NSCN sung a kituahlouh ziak in, pawl nih kisuahnawn ua, S S Khaplang in NSCN-K makaih a, Isak Chishi Swu leh Thuingaleng Muivah in NSCN-IM makaih uhi. January 31, 1980 in NSCN bawlkhia ua, NSCN chairman lentou den hi.

 

 

TENTATIVE PROGRAMME OF THE LAST JOURNEY OF CHAIRMAN ISAK CHISHI SWU

1. 30th June: Delhi to Hebron

2. 1st July: State Funeral Service at Hebron

3. 2nd July: Condolence Service at Dimapur organised by Naga Hoho & Civil Societies

4. 3rd July: Dimapur to Chilshilimi, Zunheboto.

5. 4th July: Funeral in Commital service.

 

 

 

June 30 written-cum-interview om ding

LAMKA, June 28: District e-Governance Society, Ccpur nuai a District Level Resources (District Manager) post 2 lakna ding ah candidate 9 om hi. Candidate-te doc­ument etchetna June 16, 2016 in om a, huai ah mi 3 kia in mi 5 paisuak uhi.

 

Mi 5-te ahihleh Sa­sang Hauzel, Esther Nuamneining, Kamk­holal Khongsai, Peter G. Bieklien leh Michael Paul Haokip hi uhi. Can­didate 5 paisuakte a ding in June 30, 2016 sunma dak 10 in DC/CCPur office ah written-cum-interview om ding hi. District e-Governance Society Ccpur nuai ah Community Services Centre (CSC) mun 91 val ah om a, tu’n mun 3 leh 4 vel function hi’n thutut kingah hi.

 

 

ILP BILL THAK:

Manipur Dy CM in Bill thak gelh­khiakna kithuahpih chiat di’n ngen

IMPHAL, June 28: Tuni Sepnawnni in Mani­pur Deputy Chief Minis­ter Gaikhangam in state sung a singtang leh phai­zang bial a, a kisaikhak­pih tengteng kiang ah, Assembly a luikhiak ding Inner Line Permit (ILP) toh kisai bill thak khat gelhkhiak sawm a state government in panlakna a neih lel chihtakna toh kithuahpih chiat ding in ngen hi.

 

Gaikhangam in thuthaksaite kiang a, a gendan in, singtang bial a kipan Bill kalh pawlpite’n buaina omte suk siang vilvelna ding a kilak kh­iak kihta mahmah lai uh chi’n gen hi. Bill thak pass a hihtheihna ding a, am­aute leng panlakna a zop ding uh ahi chi’n gen hi. August 31, 2015 a State Assembly in a passed ILP toh kisai Bill 3te lak ah, President of India in, pompihna peding a, a khut a piaklut a hih hun in, Protection of Mani­pur Peoples Bill, 2015 kichi nawlkhinsak khinta hi. Tunai zek a all-party meeting in, July kha a om maithei ding session nawn a, state assem­bly luikhiak leh passed ding, state gam leitang neitu mipite humbitna petu ding bill thak khat gelhkhe ding in thupuk hi. Deputy CM in agen­dan in, PMP Bill, 2015 nawlkhinsak a om a hi­hdan kuapeuh in theive­kta ua, tua toh kiton a, Bill kalh pawlpi te’n leng Centre thupukna lak a kipahpih naksang un, tutan in, a thangpaihna uh laktou denlai ua, hich­ibang thukikna theihsiam haksa kasa chi’n gen hi.

 

Singtang a teng tribal mipite’n amau lun­glutna sukha chia gen in, buaina tuntu Bill 3te government in phiatvek leh chih lunggulh uhi. June 26 in, Joint Action Committee(JAC) against Anti-Tribal Bills in tribal movement ni 300 chinna leng zang khinta hi. JAC in Bill 3te kalh a kiphi­nna a neih uh sunzom­zel ding inleng thupuk hi. Manipur Deputy CM in, kuapeuh in a pompih theih ding, Bill thak gel­hkhiakna ding a, maih neilou a ngaihdan omte lakkhawm leh a kisai­pih khak tengteng a ki­hel vek ding uh lunggulh mahmah a hihdan gen hi.

 

Tuabangkal ah, tuni Sepnawnni inleng phai­zang bial mun tamtak ah, state leitang luahtu mipite humbitna ding a, kintak a ILP a hihkeileh a kibatpih dankhat zatkh­iak ding ngen in kiphinna neitou denlai uhi. ILP gum a kiphinte’n state government kiang ah, Joint Committee on In­ner Line Permit System (JCILPS) convenor lui Kh Ratan tung a ‘wanted tag’ zatkhum a om zukkik ding inleng ngen uhi.

 

 

PTC-GHQ in Isak Chishi Swu sunna nei

LAMKA, June 28: National Socialist Coun­cil of Nagalim (NSCN) Chairman hihna lenlel Isak Chishi Swu in tuni, June 28, 2016, sunnung dak 12:30 in taksa dam­louhna tuamtuam ziak in Fortis Hospital, New Delhi ah mualliam hi. Hiai thu zak ahih phet in Paite Tribe Council General Headquarters in sunthu puang kawm in L. Pumlianpau, Presi­dent, PTC-GHQ makai­hna in CWC a vice Chair­man K. Chinkhansuan leh member-te’n PTC-GHQ office ah minute 1 sung daidide in sunna hun zang uhi.

 

 

PMEGP Loan late Bank in 30% discount bawlsak thei ding

LAMKA, June 28: Zingchiang, June 29, 2016, sunnung dak 2 in Saikot HYA Hall ah SBI saina in ‘Financial Lit­eracy Awareness Pro­gramme’ om ding hi. Hiai toh kisai in kua­peuh lunglutna neite tel dia theihsak ahihban ah a biktak in PMEGP Loan leh Agriculture Loan lakha a din zoulou khenkhat a ding in 30% discount Bank in bawl­sak thei ding hi.

 

Huai banah a loan dit­zohlouh lak ua pan 30% ngaihdam a suk vaiveng theihdan lampi bawlsak theih ding hidan in thutut kingah hi. PMEGP hiam Agriculture loan lakha a sapna mu leh muloute leng tua bang a discount tangthei dingte’n ngaih­ven theih ding hi’n thutut kingah hi.

 

 

2016-17 apan in MU of Culture in academic session pan ding

Imphal, Jun 28: Northeast bial a ding a, a masapen hilai ding in, tukum pailel 2016 akipan in, Manipur Uni­versity of Culture in academic session pankhe ding hi.

Manipur University of Culture kichi phuhkhiak ding lunggulhna liantak toh state government in Ma­nipur University of Culture Act-2015 pansan in kum 2015 a kipan in hiai university phutkhia hi. University in ama campus ding kineih tuam naikei mahleh state government in, culture toh kisai kha siamsinna inn khenkhat Government Music College, Government Dance College, Manipur Film Development Society, Shri Shi Govinda Nartalaya leh a dangdangte ah academic session pat­khiak dingdan buaipih hi.

 

Tuni Sepnawnni in State works minister Ksh Bi­ren leh amah department engineer-te’n Imphal a siamsinna inn khenkhat va enkhia uhi. Manipur State Film and Television Institute phuhkhiakna ding munleng va enkhia hi.Works Minister in a gendan in, academic ses­sion 2016-17 a kipan in university of culture leh film and television insti­tute tuak ah class patkh­iak hiding chi’n gen hi.

 

Manipur University of Culture phuhkhiak a om in a tup ahihleh tawndan tuamtuam omte semnen a, teaching, research leh training pansan a thei­hna behlapsak ding chih ahi. South-East Asia mite khosakdan dinmun toh kisai a ethnic studies lam hatsak sem ding chih leng tup in nei hi. Univer­sity in course 5 pankhia a, 2016-17 academic session ading in, 4- year Degree Course in Visual Arts, 3-year degree courses in Umang Lai Harao­ba, Thang-Ta, Dance leh Music a admission bawlna ding adverstise­ment leng suahkhinta hi. University patkhiakna ding in, Manipur govern­ment in Vice- Chancel­lor ding in N Khagen­dra Singh leh Registrar ding in L Joychandra Singh leng guangkhinta hi. State government in OSD(Finance) of Mani­pur University of Culture / Manipur Film Institute ding in MCS (Manipur Civil Service) officer as OSD (Admin) leh Non­gthombam Sudip Singh, MFS leng guangkhin hi.  

 

 

Mizoram pumpi ah ‘Remna Ni’ zang ding

Aizawl, June 28: Mizoram khangthu a ma­sapen ding in, June 30, 2016 chiang in Young Mizo Assn makaih in Mizoram pumpi uap in ‘Mizo Peace Accord’ suai­kaih a om ni theihgigena ding in ‘Remna Ni’ (peace accord day) zatna om ding hi.

 

Orginising commit­tee, Young Mizo Associa­tion (YMA) central com­mittee in a taklatdan in, ‘Remna Ni’ zatna pen Mizoram a district 8 sung a zat hid­ing a, Lawngtlai district ah CYLA makaih a zat hiding a, Saiha district ah MTP general headquar­ters makaih a zat hiding hi’n taklang hi.

 

Aizawl Press Club a tuni a press confenrence neihna ah CYMA presi­dent leh organising com­mittee chairman Lalbiak­zuala in ‘Remna Ni’ zatna ding toh kisai a tunitan a kisakkholhna bawl a omte gen hi.

 

‘Mizo Peace Accord’ suaikaih ahihnung kum 30 chinna (30th anni­versary / pearl jubilee) zatn ahihleh state sung uapsuak a zat hiding a, political party leh organ­isation tuamtuam inleng amau lemchan bang a, a tuam a zat chih om tuanlou ding hidan in gen hi. ‘Remna Ni’ zatna thupipen ahihleh Assam Rifles ground, Aizawl ah neih hiding a, huai ah chief guest in Mizoram governor Lt. Gen Nirb­hay Sharma (Retd) pang ding a, guest of honor in Mizoram chief minister Lal Thanhawla pang ding hi.

 

Hiai hun ah pupa taw­ndan leh ngeina lahna om ding a, Mizo singer tuamtuam in lasa in po­litical party makaite a pan thugenna leng om ding hi. Programme ahi­hleh Assam Rifles ground ah sunma 10:30 in kipan ding a, hiai hun zatna ahi­hleh naupangte tanpha inleng uap ding uhi.

 

Organising commit­tee vice chairman Vanl­alruata in a genna ah hiai hun a security toh kisai in police personnel 200 vel zat hiding a, amaute ahihleh YMA branch 20 a pan volunteer 100 vel in panpih ding uh hi’n gen hi. Hiai hun zatna ah Mizoram a lemna leh muanna tunding a om manphatna leh khangth­akte kiang ah lemna leh muanna mantam leh thupi ahihdan genna om ding hi’n gen hi.

 

 

PTC-GHQ makaite hongtungta

LAMKA, June 28: Paite Tribe Council (PTC) Mizoram Headquarter Presidential election sai ding a zinkhia PTC-GHQ a pan John K. Ngaihte, Gen­eral Secretary; Chinkhan­mang Ngaihte, Secretary (Organisation) leh H. Pau­zalal, Secretary (Internal) in a paisa June 25, 2016 a PTC Mizoram Hqrts a vaipaw ding kiteelna a neih sakkhitnung un zan, June 27, 2016 in PTC Thanlon Block election nei nawn uhi. PTC Thanlon Block vaipawte term a bei toh kiton in, term thak, 2016- 2019 a vaipaw ding kitel­na, zan in nei ua, huai ah, President leh Vice Presi­dent ding in Thangkhen­mang leh T. Paukhansum telching ua, Secretary leh Asst Secy ding in K. Joyful leh Lianlemthang telching in Finance Secretary leh Treasurer ding in Mang­khansiam leh T. Jamkhan­lian telching uhi.

 

Huai banah OB mem­ber ding in Zenzalam, H. Vungkhansuan leh H. Tuanminthang telching in om uhi.

 

 

May kha sung in damlou 1,032 ki-etkol

LAMKA, June 28: Lamka Damdawi Inn a ward tuamtu­am ah May 2016 sung in damlou 1,032 etkol in om ua, huai lak ah mi si 10 hi. Ward tuamtuam a damlou etkol/admit a om dan ahihleh Medicine Ward ah mi 342, Peadiatrics+ Neonatal ah mi 301, Ortho Ward ah mi 31, Surgerical Ward ah mi 113, Gynae Ward ah mi 191, Eye ward ah mi 2 leh ENT ah mi 10 ahi. Huailou in, May 2016 sung mah in casu­alty/emergency department ah damlou mi 1,641 ki-ensak ua, huai lak ah mi 462 ward ah admit in om uhi.

 

 

7th MR campus sung ah IRB per­sonnel khat sisa in mukhia

IMPHAL, June 28: Tuni Sepnawnni in Hein­gang police station nuai a om Khabeisoi, Imphal East a 7th Manipur Rif­fles (MR) camp sung a tuikul sung a kipan in po­lice personnel khat sisa in mukhia uhi. Muhkh­iak a om siluang a hihleh Silshi Lamka (28) of 8th IRB Battalion personnel s/o SS Angtil of Chandel Mantripantha Village, Chandel district ahi. Tuni mah in Heingang police team-te’n JNIMS hospi­tal ah postmortem ding in paipih uhi. Tutan in Silshi Lamka sihna ziak diktak theihchet bang­mah om nailou a, tuikul sung a kelum hiding in muangmoh uhi.

 

 

ADCC Member-te’n meeting nei

LAMKA, June 28: Tuni sunma dak 11 in Langkhanpau Guite, Chairman ADCC Of­fice Chamber ah amah makaih in ADC member-te’n meeting poimohtak nei uhi. Hiai hun ah Dr. Ginlianlal Buhril, Senior Professor, Director Cor­porate Governance in hun saulou zang hi.

 

Dr. Ginlianlal in a genna ah, ni dang a High School a kaipih a tam za­wte ADC member a, a om uh kipahpih mahmah ahi­hdan gen a, “Road Way to Churachandpur” chih pansan a Lamka puah dingdan tangpi gen a, member muanhuaipipi om ahih ziak in Lamka puahthak dingdan a kin theilam a pan hon lak uh a deihsakthu gen hi.

 

Huailou in hiai hun ah Genneikhup Vaiphei, EM/ ADCC in Development vai toh kisai leh Fund tung­tang a Delhi a va zinna report tomkim pia a, huai dungzui in maban a Cen­tral Government a pat Fund hong pai lemtang om hunhun a nasep/de­velopment works tuamtu­am pan ding uhi.

 

 

Nagaland CM, NPMHR leh CorCom in Isak Chishi Swu sunthu puang

KOHIMA, June 28: Tuni, Sepnawnni nitaklam dak 12.40 a Fortis Hospital, New Delhi a mualliam Na­tional Socialist Council of Nagaland-Isak-Muivah chairman Isak Chisi Swu sihna thu ah Nagaland Chief Minister T.R. Zeliang, Naga Peoples Movement for Human Rights (NPMHR) leh Manipur pansan Coor­dination Committee in sunthu puang uhi.

 

Nagaland Chief Minister in sunthu a taklatna ah, Uncle Isak ahihleh mi nunnem, awl a pau leh Pathian laumi hi a, Naga khangthakte khalam a pitu leh lam­dik a makaihtu hidan in gen hi.

 

Naga Political problem in lam kathuam kanlel a omlai a, makai gin-om leh muanhuai in sihna a tuah pen vangtahhuai a sakthu taklang a, himahleh Pathian lemgel ahihman in kuapeuh in theisiam ding in ngen hi. Uncle Isak sihna toh kisai a Nagate’n ngaihdan ki­batlouhnate koihkhia a Naga political solution a bai­htheipen a bawl ahihna dia pangkhawm ding in ngen kawm in NSCN Chairman khamuangtak a, a tawldam deihsakthu khak hi.

 

Naga Peoples Move­ment for Human Rights (NPMHR) inleng NSCN-IM Chairman in tuni a sihna a tuahna tung ah sunthu puang ua, mahni a ding khuallou a nam a ding a sih tanpha a pang Isak Chisi Swu sun mahmah uh ahihdan taklang uhi. Naga mipi kikhenzak a omte gawm­khawm a pan a laknate khang hong pai zel ding a leng mangngilh hilou ding hi a taklang in a kha khamuangtak a, a tawl­dam deihsakthu khak uhi.

 

Huai banah Manipur a helpawl tuamtuam Kan­gleipak Communist Party (KCP), Kanglei Yawol Kanna Lup (KYKL), Peo­ple’s Revolutionary Party of Kangleipak (PREPAK), Progressive faction (PRE­PAK-Pro), Revolutionary People’s Front (RPF – the political wing of the Peo­ple’s Liberation Army – PLA) leh United National Liberation Front (UNLF) kigawmna Co-ordination Committee (CorCom) in leng NSCN-IM Chairman Isak Chishi Swu sunthu puang uhi.

 

CorCom in a taklatna ah, Sir Isak Chishi Swu in a hinkhua midangte a dia manphatak leh gah­suahtak a zang leh India malsuahbial a zalenna sualna ding a mite han­thawntu poimohtak hi­dan a taklang in a nutsiat a innkuante banah mipite Pathian in khamuanna a piak deihsakthu taklang uhi.

 

 

 

NEWS LAKTOM

 

Tuibuong chih ‘Tuibong’ chih hita ding

DC/Ccpur in zan, June 27, 2016 a theihsakna a bawlna ah, Manipur Gazette Notification No. 20/39/69-D dated 12/11/1969 dungzui a ‘Tuibuong’ chih pen ‘Tuibong’ chih hita ding hi’n taklang hi.

 

 

Application form sumbit theih hun behlap

DC/Ccpur in theihsakna a bawlna ah, Manipur Technical University nuai a B Tech Course sinna ding a application form piaklut theih hun July 5, 2016 tan behlap a om hi’n taklang hi. Application form ahihleh DC office ah piaklut theih ding a, telkhiak a om candidate-te min ahihleh July 8 in suahkhiak hiding hi.

 

 

June 30 tan electoral roll bawldik theih

Ccpur District sung a electoral roll a min diklouhiam ahihkeileh lemlak (photo) chianglou banah omna diklou bawldik nuamte’n June 30, 2016 tan in Polling Station tuamtuam a BLO-te kiang ah bawldik theih lel hi. Huailou in vote mun 2 a nei a mun khat a paihkhe nuamte a ding in hun chiamtan in bawlsak theih ding hi.

 

 

Dist Level Sc. & Maths Competition om ding

District Project Officer, SSA/ Ccpur saina in July 8, 2016 chiang in Vimala Raina High School ah “Science: Water harvesting; Mathematics: Daily Mathematics” chih thupi zang in District Level Science Exhibition & Mathematics Competition 2016 om ding hi.

 

 

PET a tel khaloute tel thak theih ding

Manipur Police Deptt nuai a Male constable lakna dia PET neih hun a tel theiloute a ding in Deptt in hun lemchang bawl sak thak hi. Thusuak in a taklatna ah, District teng a ding in hun bikhiah bawl thak a, CCpur district apan telkhaloute a ding in July 5-6, 2016, zinglam dak 8 apan a mun ngei mah ah tel theih ding hi.

 

 

SUNNA:

Zamniang (87) m/o Mahajon N. Chinkhanlian of Tedim Road, Elim Veng, New Lamka awmna ziak in tuni zingsang baihtak dak 1:00 vel in si a, tuni mah in New Lamka YPA hanmual ah kivui hi. RIP

 

Pauhang f/o Boboi Vaiphei of Phailian tunitak dak 5:30 velin damlouhna ziakin si hi. RIP

 

Sesen w/o Upa Khumlian of Shillong tuni’n si hi. RIP

 

more more detail : Here