You are here: HomeRSS FeedsThe Lamka Post

The Lamka Post | April 19, 2016

Tuesday, 19 April 2016 15:02

Bengal Assembly elections phase 3:

Rahul Gandhi in rally ah PM Modi leh Mamata Banerjee mohsa

RAGHUNATHGUNJ, April 18: April 21, 2016 chiang a Assembly elections phase 3na maituah ding West Bengal state ah tuni Sep­patni in Congress vice president Rahul Gandhi in Murshidabad district a Raghunathgunj leh Kandi election rally 2 ah thugen hi. Rahul in a gendan in, Prime Min­ister Narendra Modi leh West Bengal Chief Min­ister Mamata Banerjee-te naktak in dem a, thuchi­am bawl siam mahle uh tangtun ding lam limsak phabanlou uh ahi chi’n gen hi.

 

Trinamool Congres party makaite tung a Sarada scam leh Narada sting operation omte thei­kawm in, Congress vice president in state sung a nekgukna thubuai toh ki­sai in Trinamool Congres chief mohsa hi. Mamataji in state sung ah nekguk­na nulsiang hiding chi’n thuchiam bawl mahleh a mai mahmah nekgukna a hong om taktak chiang in action lak bangmah nei ngam tuanlou chi’n gen hi. Trinamool Con­gress in Sarada scam a kipan Narada scam tan tunpih mahleh action lak bangmah a neikei a, Trinamool makaite tung a sting operation toh ki­sai inleng action lak muh ding omlou chi’n gen hi. Election hunchiang in, Mamataji in action ka lading chisek mahleh bangziak a hun paisa ac­tion lamailou hiam chi’n Rahul in dong hi.

 

Mr Gandhi in a gen­dan in, Ms Mamata in thuchiam a bawlte a piakkhiak theihlouhna in Assembly polls Tr­ionamool-te sual ding in Congress phutluih in om chi’n gen hi. Ma­mataji in kikhenna tun ding, khantouhna enkai ding, tuailaite tung a sepna peding leh dan leh thupiak enkai ding chia thuchiam a bawl ziak in, kum 5 paita in Con­gress in TMC naktak in nungthuap chi’n gen hi. Himahleh chief minister a hong panni zingchiang a kipan in, Mamataji in Congress leh state mip­ite tung a thuchiam a bawlte khenglamdang leh mangngilh khin ngal ahi chi’n Rahul in Raghu­nathgunj a election cam­paign neihna hun ah gen hi.

 

 

Mamataji in state paw­lam a kalsuan tuailaite tung a sepna petu ding factory lian taktak phut­khe ding chi’n thuchiam bawl mahleh factory phuhkhiak khat leng muh ding omlou a, hiai ziak tak a Mamataji kigumlou ahi chi’n gen a, amah zohkhiak teit­eina ding a panla uh hi’n leng gen hi. Prime min­ister in ‘Make in India’ slogan khat pankhe zen in tuailaite’n sepna ngah ding uh chi’n thuchiam bawl mahleh a kilang­khia muh ding omlou chi’n Rahul in gen hi. Mipite’n vote pe sauh­sauh mahle uh tuailaite tung ah sepna piak hilou chi’n gen hi. Mamataji inleng tuailai lakh 70te kiang ah sepna piak ding thuchiam bawl mahleh sepkhiak bangmah ne­ilou chi’n gen a, mipi pai­khawmte kiang ah sepna ngah na om kha zenzen uhiam? chi’n dong hi. Lou nasemte ading a PM Modi lehMs Banerjee sepkhiak neilou uh chi’n Rahul in ngoh hi.

 

Bengal a Congress- Left alliance toh kisai Mr Gandhi in a gendan in, election zoh alliance government bawlkhiak a hih zoh lam chiang in, nekguknam abik in Saradha scam a kibual mite tung ah action khauhtak lak hiding chi’n gen hi. Congress leh Left worker-te kiang ah pangkhawm a elec­tion sualkhawm ding in ngen a, noute toh om gige ka hi, eite govern­ment hong piangkhe ding ahi chi’n gen hi.

 

 

 

Khuga Dam ah Jenny Niangbiakching kia in si

LAMKA, April 18: Lamzang khotaw a Dam ah tuni, April 18 sunnung dak 2 vel in Jenny Niang­biakching (17) d/o Thua­mzalian of Mission Veng, Hiangtam Lamka, Khuga Dam ah tuahsia in si hi.

 

Thutut kingahdan in lawmta 3-te ahihleh sun dak 12:00 vel in Lam­zang khotaw a Khuga Dam a hoh di’n kuankhia ua, amau tui liau theikei mahle uh, a daina mun ah tuiliau dan in bangtanhi­am om ua, huainung in a lawmnu Dimngaihlun in paikhe di’n sam mahleh tuiliau ut zeklai ahihdan gen hi. Hun bangtanhiam nung in tuilak ah kipeklai a om mu in a lawmpa toh a kiangnai a om ngakuai khai, pawl bangzahhi­amte kiang ah panpihna ngen a, a sapsung un Jenny pen tui ah ana tum khinta hi.

 

Jenny Niangbiakch­ing luang ahihleh nga­beng mah long a tuang mi nih in chiangpum zang in va kaikhe thei uhi. Hiai thu zakphet in Lamjang khomi phatuam ngai bangzahhiam in gari zang in Lamka Damdawi Inn dak 4:00 vel in hon paw tung ua, doctor leh nurse-te’n hahtak in panla mahle uh Casualty tut ahihtan in ana si khinta hi’n doc­tor-te’n gen uhi. Jenny luang ahihleh damdawi casualty a pan YPA Hi­angtam Lamka malakna in a tenna inn uh Mission Veng, Hiangtam Lamka, puaktung hi a, zingchi­ang in Lamka Hanmual ah kivui ding hi. Tuni a Khuga Dam a hoh dia kuan lawmta 3te ahihleh Dimngaihlun, Chinlia­nkhual leh Jenny Niang­biakching hi ua, vangsiat huaitak in Jenny in sihna tuak kha hi. Hiai toh ki­sai in media khenkhat ah, Mata Mualtam a om Hide-Out Park a hoh hidan a kigen pen dik­lou leh Hide-Out Park a hohte lak a tuni a hiai bang tuahsia tuak omlou hidan in thutut kingah hi.

 

 

‘Bokashi Piggery & Poultry Farming’ toh kisai training kipan

LAMKA, April 18: Tuni sunma dak 11:00 in NABARD Office, Gouchinkhup Veng, New Lamka ah Japan a kipan vok leh ak khoidan chi­tuam “Bokashi Piggery & Poultry Farming” kichi ni 3 daih ding kisinsakna kipan hi. Hiai hun ah Lamka khopi sung a vok leh ak khoi lunglut mi 15 tel ua, P. Khamsanglian, Progressive Farmer in Bokashi System zang a vok leh ak buk bawl ding­dan leh hiai sytem zang a a khoi dingdan sinsak hi.

 

Zingchiang in G. Thangchinkhup, DDM, NABARD in Credit Link ban ah Bank in mahni a kitoudelh mite a dia pan­pihna a piaktheih tuamtuam omte toh kisai sinsak ding a, a ni thumni in Lamka khopi sung a Bo­kashi System zang a vok leh ak kikhoi tuamtua­mte enkhia in Torbung a State Piggery leh Seitual a Poultry Farm banah New Lamka area sung a Bo­kashi zang a vok kikhoite enkhe ding uhi.

Bokashi system a vok leh ak kikhoite khang­hat in, a sa leng lim in damtheihhuai a, vok leh ak puul kichi leng omlou hi. Huai ding in a buk bawl dingdan omtuam a, vok khat a di’n a buk feet 4 kimvel leh ak khat a ding in feet 2 kimvel ahihngai ding a, a tuang a zat ding in thil chitua­mtuam 9 hel ngai hi. Vok leh ak pen a piching hun a zuakkhiak a pan kia hilou in, a tuang dia kizang leng kha 6 a phak chiang in lei hoihna suak in zuak­theih thil suahtheih ahih­ban ah, hiai bang leihoih zang a haichi kichiingte mihing a ding in leng damtheihhuai mahmah hi’n kigen hi. Hiai bang a vok leh ak khoina Lamka khosung ah leng tam­tak in panta ua, sum­sen a tawm ban ah tha leng dawn mahmah hi’n thutut kingah hi.  

 

 

Central Govt official-te kimuhpih di’n AMTWU makaite’n Delhi zuan

LAMKA, April 18: Tuni zingkal dak 6:00 in All Manipur Tribal Women Union (AM­TWU), Ccpur a makaite Central Government a heutu tuamtuam kimuh­pih ding in Lamka nusia in Delhi zuan in zinkhia uhi. Delhi a zin ding AM­TWU makaite Lamka Damdawi Inn a Morgue ah kingakkhawm in, huai mun ah Rev. V. Kham­vum, Local Pastor, EBCC Bungmual in thumna in khakhia hi.

 

Central Government a makai leh official-te kimuhpih dia zin AM­TWU makaite ahihleh Delhi ah Manipur Trib­als Forum, Delhi (MTFD) Team in ana kithuahpih ding ua, Delhi a omsung un Press Conference Hall, New Delhi ah Delhi khopi sung a om National leh International Newspaper a thuthaksaite toh Press Conference nei in Mani­pur Assembly in August 31, 2015 a Bill 3 a passed tungtang leh singtangmite buaina thu gen ding uhi.

 

Huai banah AMTWU makaite’n Congress Chair­person, Sonia Gandhi, Union Home Minister Ra­jnath Singh leh Bill 3 toh kisai a Parliament a ana tangkoupih Tarun Vijay, MP, Utarakhand ban ah Union Minister tuamtu­am kimuhpih ding uhi. AMTWU makaite Delhi a zinte ahihleh Nianglian, Convener, Ngaikhanvung, Co-Convener, Buonza­mawi, Co-Convener leh Ningsialching, Co-Conve­ner hi ua, April 24, 2016 vel in Lamka hong tung­kik nawn ding uhi.

 

 

Lamka Police Station kong ah sit-in-protest paizom zel

LAMKA, April 18: Joint Action Committee Against Anti-Tribal Bills (JAC) makaih a Lamka Police Station kiang a Waiting Shed a sit-in-protest (Dharna) neih a om tuni, April 18, 2016 in sutzop in omnawn hi. Tuni’n Vengnuam, New Lamka a mipi paikhawm in sunnung dak 3:00 tan sit-in-protest nei uhi. Manipur Assembly in August 31, 2015 Bill 3 a passed ua kipan Manipur singtanggam a kiphinna om in, huai ah Salpha 9 in sihna a tuah ban uah veng chih ah mipi’n sit-in-pro­test nei ua, bangtanhiam nung a khawlsak in om mahleh January 26, 2016, Indian Republic Day a pan hiai hun a sutzop hi­nawn a, Tribal Movement leh Salphate’ luang leng vuilouh in omlai a, hiai kiphinna leng tuni in ni 231 chingta hi.

 

 

Chikha khua ah Myanmar MP & Minister lawm

LAMKA, April 18: Kum paisa 2016 a Myan­mar a general election om a Zomi National Congress a pan Mem­ber of Parliament (MP) dia telching leh Minister dinmun ngah Zomi MP 6 kipahpihna zan, April 17, 2016 sunnung dak 12:30 in Chikha ah Zomi Youth Association (ZYA) leh Chikha Khanglai Pawlte makaih in telching a om MP leh Minister-te lopna hun zang uhi. Hiai hun ah Lamka a G Laizom Soci­ety a pan mi 50 val va tel uhi.

 

Myanmar election a eimi MP leh Minis­ter-te ahihleh Paulun­minthang Guite, MP & Minister(Education & Health), Khamkhanthang Guite, MP; Chinsian­thang, MP; Ginkamlian, MP; Chingngaihmang, MP leh MP khat pen ahi­hleh lemtanlouhna khenkhat ziak a hiai hun a telthei­lou hi’n thutut kingah hi. Lamka a G. Laizom Soci­ety a pan hiai hun zang a kuante ahihleh Lang­khanpau Guite, Chair­man/ADCC in makaih a, Myanmar Government thak a MP-te leh Minister dinmun lente kipahpihna in nampuan va silhsak uhi. Hiai hun ah Chikha kho mipi’n MP leh Minis­ter-te kipahpihna in Sial leh Vok gou in ankuang lui uhi.

 

 

HAWKER KIDEIHBEH

Lamka Post hawmtu ding, Hawker khat kideihbeh a, lunglutna neite’n Editor kimuhpih kin poimoh ding hi.

Deihthusam ahihleh mi piching, cycle nei leh tu­angsiam, sum-le-pai a gin-om banah sepna peuh a mi chitak leh gin-om kideih bik hi.

Sd/-Editor/Publisher

 

 

 

PTC-GHQ makaite’n Mizoram Chief Minister kimuhpih

LAMKA, April 12: April 12, 2016 a Paite Tribe Council, GHQ a pan L. Pumlianpau, President; John K. Ngaihte, Gen. Secy.; H. Paukhenmung, Finance Secy.; H. Pau­zalal, Secy (internal) leh Chinkhanmang Ngaihte, Secy. (Organisation) in Lamka nusia in Mizoram PTC veh ding in zinkhia uhi. Amaute programme gelsa bang in lamzangtak in paitou ua, Sialkaltang, Champhai, Aizawl leh Van­gaitang pha in April 13, 2016 in NE Khozawl/Ngo­pa pha in PTC Teikhang Unit leh PTC/Mizoram HQ toh kithuahkhawm uhi.

 

April 14, 2016 in PTC/ Mizoram HQ makaih in Teikhang ah function nei ua, huai a pan in Sialkal Range PTC Unit tuamtu­am Mimbung, Hiangmun, Teikhang leh Kawlbem a pan makaite tel in Mizoram PTC HQ Cabinets/CEC meeting nei uhi. April 15, 2016 in Ngopa-Champhai, Kawlkulh tung ua, PTC Sub-HQ Champhai ah meeting nei uhi. April 16, 2016 in Champhai a pan Aizawl pha in, zan April 17, 2016 in Aizawl ah hun zang uhi.

 

Tuni, April 18 in Aizawl ah PTC, SSPP, Of­ficers/Intellectual banah Mizoram Chief Minister Lal Thanhawla kimuh­pih in thu poimoh tua­mtuam genkhawm ua, huai banah MNF makaite toh leng meeting nei uhi. PTC-GHQ makaite ahi­hleh zingchiang in Aizawl a pan Silchar Kolasib/ Vairengte tawn in Jiri­bam, Manipur hongtung ding ua, PTC/Vangai block executive member-te toh meeting nei in April 20, 2016 in Jiribam a pan Lamka hongtung ding uhi.

 

 

JCILPS kiphinna in maban polls ah ruling Congress sawiling thei

IMPHAL, Apr 18: Manipur assembly polls hun ding a naih hiaihiai toh kiton in, Joint Com­mittee on Inner Line Per­mit System (JCILPS)-te’n leng Manipur a gam leit­ang luahtu nam tuamtua­mte humbitna ding Inner Line Permit(ILP) ngetna toh kisai kiphinna thak khat a patkhiak un rul­ing Congress government sawiling thei dinmun in koih hi.

 

Thusuak in a taklat­dan in, hiai hun dakkal poimohtak a JCILPS kip­hinna in, dan toh kituak­lou a state sung a hong pemlutte a kipan Mani­pur leitang neitu mipite humbit ding ngetna toh kisai a, ni kum JCILPS makaihna toh mipite’n kha bang zah hiam sung kiphinna a neih hun ua leng bit kisaklouhna dinmun maituah khinsa Ibobi government ading in politics lunat huai dang khat suahsak thei dinmun in kilang hi. Committee in kiphinna tatsatlou dang khat patkhiak sawm in kisingsa lel hi. Committee in tu in, gupna tamsem ngahna ding leh kiphi­nna a huailut ding tupna in public meetings tua­mtuam sai a, hiai in thil nget a neihte uh pichinna ding a government tung a kiphinna thak pankhe ding uh a hihdan langsak hi. Pawlam a kipan hong pemlutte etkai ding tup a nei in, Manipur Assembly in mipite noh hatthu ziak in August 31, 2015 in Bill 3 passed a, himahleh hiai Bill-te Act a suahna ding in, tutan in baihsam tak in a tawp tan tunpih thei tuanlou uh hi’n thusuak in taklang hi.

 

A lehlam ah Manipur tribal mipite’n singtang mite thuneihna laksuhna ding a panlakna ahi chia gen in, hiai Bill 3te phiat ding lunggulh tinten uhi. Bill 3 ziak in Churachandpur district a kiphinna huai­setak om ah tribal mi 9 te’n sihna tuak ua, mi tamtak in liamna tuak uhi. Tribal mi 9te luang tutan vuilouh in Chura­chandpur District Hospi­tal morgue ah koih in om denlai hi. Churachandpur JAC in, tribal mipite’n ‘anti-tribal Bills dan a, a gen uh thubuai kengtel Bill 3te government in a zukkik mateng siluang vuilou ding in thupuk uhi.

 

JCILPS in kum nawn a state assembly polls om ding toh kisai movement daltu lianpen khat suak ding chi’n lungkham­pih mahmah a, tup omte mualsuahna ding a Ma­nipur mipite’n a hun tan thei a na a sep ding uh deih mahmah uhi.

 

Tunai zek in Commit­tee in state sung ah dan toh kituaklou a state a hong pemlut pawlam mi 400 val mukhia ua, telch­ing a om palaite’n mipite lam etna tan sukha a kip­umpiak zou taktaklou uh a hihdan Committee in buaipih san lel hi. Com­mittee convenor Khom­dram Ratan in a gendan in, Act hi’n rule khatpeuh hitaleh, Manipur a zatkh­iak theih ding Inner Line Permit System (ILPS), Bengal Eastern Frontier Regulation a hihkeileh system dang khatpeuh hitaleh, mipi a tamza­wte deihna bang a zat­khiak ding ahi chi’n gen hi Ratan in, Myanmar, Bangladesh leh state dan­gte a kipan Manipur a dan toh kituaklou a, bei­thei ngeilou ding khop a hong kinawnlut pawlam­mite awlmoh huai a sak thu gen hi. Committee in Manipur Government ki­ang ah Manipur Land Re­form Commission phut­khe ding inleng ngen hi. Committee in maban a kiphin dingdan a gelsate uh lak ah general strike, mass rally, market block­ade, street corner meet­ing, poster campaign leh non-cooperation move­ment chihte leng telkha uhi.

 

 

CM, Dy CM leh Speaker in Meditation programme uap

Buaina omlou hileh mihingte hinkhua kichi omlou ding ahi:CM

IMPHAL, Apr 18 : Ni 3 sung taam ding a Manipur veh a hongzin Sahkhua makai leh Phi­lanthropist Sri Sri Ravi Shankar in, Seppatni ni­taklam in Bhagyachandra Open AirTheatre(BOAT), Imphal ah Art of Living Music and Mediation Programme khat sai hi. Hiai hun zatna ah Chief Minister O Ibobi Singh, deputy Chief Minister Gaikhangam leh Speaker Manipur Legislative As­sembly Th Lokeshor-te leng tel uhi. Opening session ah laam leh pro­gramme dang tuamtuam neih in om hi.

 

Nitak hun a Art of Living Manipur Chap­ter kithuahpihna toh Art of Living mukhetu Sri Sri Ravi Shankar saina toh “An Evening of Mu­sic and Meditation for Peace” porgramme khat saina hun a Chief Guest a pang Chief Minister Shri O. Ibobi Singh in a thugenna ah, state sung a om helpawl tuamtua­mte kiang ah, a velvel in kihouna nei ding in chialna bawl nawn hi. Buaina omlou hileh mi­hingte hinkhua kichi leng omlou ding ahi chi’n gen hi. CM in a genzelna ah, Guruji Sri Sri Ravi Shan­kar nungzuitute lak a khat hidan in kigen a, Sri Sri Ravi Shankarji in hel nasepna toh kisai a buai­na omte tel a state sung a buaina omte sukveng na ding a thuhilhna a neihte kipahpih mahmah hi’n leng gen hi. Sri Sri Ravi Shankar in mipi paikhawmte mai a, a thugenna ah, kihouna nei ding a hongpai Ma­nipur a helpawl tuamtu­am omte kipahpih vek ding hi’n gen hi. Gamlak a taimangna in buaina omte suveng mawklou ding a, tukhawm a kihou­na ineih ding uh ahi chi’n chial hi. Kipahna leh nop­sakna kichi huhamna in piangsak ngeilou ding a, kidouna leh huhamna zang in kuama’n kipahna leh nopsakna a ngah ngeikei a, tukhawm a ki­hou a khat leh khat kal a buaina omte isukveng ding uh ahi chi’n gen hi. Dikloutak a thukhenna omte sual a panla Ma­hatma Gandhi leh Nelson Mandela-te’n huhamna tellou panlakna tung­tawn in a tup uh tang­tun ua, himahleh thudik a thukhenna min zang a panla mipite’n a tawpna a siatgawpna tunsek uh chi’n gen hi. Nopsakna leh lemna kichi a kiton helhel ahi ua, Manipur a nopsakna om theihna ding in, tuailaite lak a lemna tut ding poimoh ahi chi’n gen hi.

 

Hiai hun zatna ah Deputy CM Shri Gai­khangam, Speaker Shri Th. Lokeshwar Singh and Former Chief Minister leh Chairman Reception committee Shri Radhabi­nod Koijam-te’n thugen­na hun zang uhi. Nam tu­amtuam te’n meditation programme toh kithuah in zangta laam lahna a nei uhi.

 

 

 

Manipur assembly secretariat tuh kineksiatna leh kikhentuamna banah fundamental rights nelhsiahna munpi ahi: ATSUM

Imphal, April 18: All Tribal Students Union Manipur in tuni a thusuah a bawlna ah, ‘the rule of law’ bawlkhiakna munpi Legislative assembly sec­retariat tuh siangthou leh thil kiselgu omlou (transparent) ding banah mipi palai dia telching a omte’n mipite aw ana pulakna ding ua lam-et ahihdan taklang hi. Huai banah assembly speaker in thuneihna piak a om dungzui a assembly ses­sion a makaih lai in, June 20, 1992 in huai hun a President of India VV Giri in India constitution Article 371C tungtawn a thuneihna piak a om zang in Manipur singtanggam a teng singtangmite deih leh lunggulhna bang in Manipur legislative As­sembly (Hill Areas Com­mittee) ah a thuneihna ana zang hi’n taklang hi.

 

Etsakna ding in Ma­nipur legislative Assem­bly a Hill Areas Commit­tee ah Chairman, Vice Chairman leh Deputy Speaker chihte om ba­nah singtanggam a teng singtangmite humbitna ding in thuneihna leh na­septheihna ding in power piak in om uhi. Himahleh tuni chiang in Manipur assembly secretariat pen kineksiatna leh kikhen­tuamna banah funda­mental rights nelhsiahna munpi suakta hidan in ATSUM in taklang hi.

 

Kum tamtak paisa a kipan in Manipur ah ST reservation quantum om­lou a, assembly secretariat ah singtangmi (ST) em­ployee gentham omlou hi. Hiai toh kisai in AT­SUM in July 22, 2014 in Hon’ble Speaker, Mani­pur legislative Assembly kiang ah memorandum pia a, ‘backlog post’ omte hukdimna dia ST-te a dia ‘special recruit­ment drive’ sai ding in ngen hi. Himahleh huai ngetna pen lam-etna li­antak toh sepsuah ahi­hngei gintak himahleh zekhemna tuamtuam toh bangmah sepsuah muh ding omlou hi’n ATSUM in taklang hi.

 

Manipur Govern­ment nuai a sepna omte a reservation policy ahiding bangtak a zuih ahihlouh ziak in All Tribal students’ Union Manipur (ATSUM) in zingchiang, April 19, 2016 a post of commit­tee officer lakna ding a interview om ding sai ahihlouhna dia panla ding leh grade tuamtu­am a singtangmite a dia backlog post omte huk­dim ahihma interview saisak hilou ding hi’n taklang hi.

 

Hiai toh kisai in AT­SUM in septu ding lakna dia interview om ding cancel di’n ngen a, hiai ngetna limsak ahihlouh ziak a thiltung deih­huailou om leh khen­tuamna toh nasep state vaihawmtute mohna hiding hi’n Micah Kamei Secretary, Information & Publicity, ATSUM in tuni’n thusuah bawl hi.

 

 

 

NEWS LAKTOM

 

Bussiness Time Reporter 2 in Lamka hongpha

Delhi pansan Business Time a Reporter 2 in tuni’n Lamka hongpha uhi. Amaute ahihleh Manipur Assembly in August 31, 2015 a Bill 3 a passed deihlou a mipi’n kiphinna a neihhun a si Salpha 9-te luang tunitan Lamka Damdawi Inn morgue a vuilouh a om tungtang a Lamka hongpha uh hi’n thutut kingah hi. Reporter 2-te’n tuni, April 18, 2016 in morgue ah Salphate sungkuante kimuhpih in houlimpih ua, huai banah tunitak dak 6:30 a morgue a Salphate sunna hun ah tel uhi. Tunitak a Morgue a Salphate sunna hun ah Khenthang Hatlang@ Calvin in thugen hi.

 

 

Police in case 2 chiamteh in suizui lel

Zan, April 17 zingkallam dak 9 vel a HQ Veng a 7th Assam Rifle-te omna huangsung a gari accident jawan 3 a liam banah khat in sihna a tuah toh kisai in Lamka Police in case chiamteh in suizui lel uhi. Hiai thu ah Police in FIR No. 22(4) 2016 CCP PS U/S 279/338/304- A IPC chiamteh ua, jawan khat si pen leng RIMS Hospital, Imphal a pua in huai ah post-mortem bawl uhi. Huailou in, zan nitak dak 8:40 vel a Zion Street, Central Lamka, Tedim Road PK Store kiang a gate bul a thil puakging ngaihtak om toh kisai inleng Police in FIR No. 23(4)2016 CCP PS U/S 427/34 IPC & 37 Expl. Subs Act chiamteh in suizui lel uh hi’n Police a pan thutut kingah hi.

 

 

SUUNNA

Lalbiakthuami (65) w/o Elder K. Liankhanthang of Zamtun Road, Zion Veng, New Lamka, tuni, April 18 sunnung dak 3:30 vel in cancer in si a, zingchiang in New Lamka YPA Hanmual ah kivui ding hi. RIP

 

Chingkhovung (72) m/o Phungliansang of Singngat, Mission Veng, tuni, April 18 zingkal in si a, tuni mah in Singngat hanmual ah kivui hi. RIP

 

 

…..kim leh chiang zaw in : hiai ah