You are here: HomeRSS FeedsThe Lamka Post

The Lamka Post | October 05, 2015

Tuesday, 06 October 2015 00:59


 

Numeite’n zu tamtak mankhia
LAMKA, Oct 4: Tuni sunnung dak 4:30 vel in New Lamka Dorcas Veng a Lanva lui kiang ah zu zuakna inn khat numei pawl in luh ua, zu sante bottles 18 leh tualsuak zu polythene a kitun tuun 14 vel mankhia in tunitak dak 6:30 vel in Lanva leitung ah bawkhe vek uhi. Amaute’n vengsung hoihna ding in maban ahleng sualdouna sunzom zel ding uh ahihdan gen uhi.

 



Foggy Machine zang in Rengkai ah DDT kap
Lamka Oct 4: Chief Medical Officer, CCpur in Lamka khopi sung leh a sehvel a Dengue om ahi chih a theihkhiak toh kiton in Dengue pua thoukang thahna Thoulou kap tuni’n kipan hi. CMO in a genna ah, Rengkai area ah Dengue vei hiding a muanmoh tam mahmah a, damloute sisan test dia Imphal a thohte leng zohsiang hikei mahleh Dengue mah hiding in doctor te’n gingta uhi.

 

Hiai toh kisai a panlakna masa ding in tuni sunnung dak 1:30 a pan in Rengkai Vengsung ah DDT (thoulou) Foggy Machine zang in kap pan uhi. Hiai ahihleh CMO leh Hmar Student Association (HSA), Hmar Youth Association (HYA) leh Rengkai Village Authority panlakna a, a kap uh ahi.

 


NGMF saina in mipi’n thumkhawmna nei
Lamka Oct 4: Tuni sunnung dak 1:00 in Nationwide Gospel Music Festival Committee makaih in Lamka Public Ground, Hiangtam Lamka ah “Come, Let’s Humble and Pray” chih thupi zang in thumkhawmna om hi. Hiai hun session 4 in kikhen a, Pastor Onkhomang Touthang, Prayer Director, NGMF in makaih in Rev H. Nengzatun, Chairman, HPB in thumna in hun hongkhia hi. Hun masa Rev S. Vung Minthang, General Secretary, EBC GHQ in gam-le-nam a dia thumna makaih a, Evan. Lhunkhosei (Hesei), Tuibuang ECA in heutu leh makaite a ding in thumna makaih hi. Rev. Zathangsing Zate, Executive Secretary ICI in JAC makaite leh tulel a Manipur singtanggam buaina toh kisai in thumna makaih a, Rev R. Vanmawia, Secretary, CCGC in khasiangthou a kipumkhatna ding in thumkhawmna makaih hi.

 

Tunia thumkhawmna ah Lamka khopi leh a sehvel a pan saptuam tuamtuam a pan mipi hunkhop paikhawm in thumkhawmna nei ua, Rev. L. Khupboi Vaiphei, Director of Missions, EOC in thumna in hunkhak hi.

 


India policy in Nagate India mi hilou uh a hihdan hilchian:NSCN-K
DIMAPUR, Oct 4:  Tuni a NSCN-K in press thusuah a bawl kimu in a taklatdan in, Naga-te gam a, a deih huailou British Armed Forces (Special Powers) Acts (AFSPA) a thak a koihkhumna leh a pawlpi tung a ban puankhumna in Nagate India mi hilou uh a hilhchian a, India kichi sepaih thahatna toh lam etna bei a, dikloutak a politics toh Nagate thuneihkhum sawm gamdang thunei khat ahi chi’n gen hi.

 

 

India in democracy a paipihdan diklou a, khovel pumpi a democracy lianpen chia a kiminloh nakna in India minhoihna teng minse sak vek zel a, Gandhi pianna gam leitang sukminsiat lel siam uh ahi chi’n NSCN K in ngawh hi. Mahatma Gandhi in thagum leh sisan suahlou a kiphinna paipih ding chia paidan nei in India in thagum leh sisan suahna a neih ding naktak in dal mahleh India Government in kum 60 val sung ding Nagaland ah hel nasepna nak tak in tawsan a, hiai in India politics kichi pichinglou a hihdan genlang mahmah hi’n leng taklang uhi. Tuaban ah India in a sepaihte extra judicial extermination, kipawngsualna, kithangbawlna, inn kihalsakna, mipi a lom a khumbichilhna, kinelhsiahna, gou leh gam suksiatsakna,damsung daih ding a kisoisakna, engbawlna, warrant tellou a kimatna, trial tellou pi a kihentangna, NCO in warning pe masalou a muh peuh kaplup theihna thuneihna chihte leng pekhia hi’n taklang uhi.(NNN)

 


Mizoram Gov in India Border Roads Chief kimuhpih
Aizawl, Oct 4: Gamgi a lampi etkaidan toh kisai in zan Kiginni nitak in Raj Bhavan ah Governor Lt.Gen(Rtd.) Nirbhay Sharma leh Chief of India Border Roads Lt Gen RM Mittal, Director General-te’n houlimna nei uhi.

 

 

Governor Nirbhay Sharma in India in a gamgi dung a lampi hoihtak a neih ding poimoh a hihdan gen a, Mizoram state sung India in gamgi lampi sautak nei hi’n leng gen hi. Chief of India Border Roads Lt Gen RM Mittal kiang ah mum tuamtuam a lampi tomchik tamtak omte ginatak a etkai sang a gamgi mun a lampi sau taktak kikhungsa omte puahphat dingdan gel hoih ding chia ngaihdan a neihte leng theisak hi. Border Roads Chief inleng hiai thu toh kisai Centre zasak ding leh Delhi a Central Minister toh genkhawm hiding chi’n dawng hi. Mizoram a BRTF makaite apan Governor thukup a neihte etkai masak pen a nei ding hi’n leng genbeh hi. Border Roads Chief Lt Gen RM Mittal inleng Governor kiang ah lampi puahna ding panlakna leh nasepna a neihte uh theisak hi. Director General, BRTF a hihleh K.K.Razdan, Chief Engineer, Project Pushpak Mizoram leh Col.Prasant Tripathy, Staff Officer to DG, BORDER ROADS-te’n kithuahpih uhi.(NNN)

 

 


Chief Secretary thak Nabakishore kipahpihna nei
IMPHAL, Oct 04: Tuni Pathianni nitaklam in Bishnupur district sung Ningthoukhong a club leh pawlpite’n Public Park, Ningthoukhong ah Chief Secretary thak Manipur Oinam Nabakishore Singh kipahpihna nei uhi. Hiai hun ah Chief Guest in Commerce and Industries Minister Govindas Konthoujam pang a, functional president in Senior Social Worker K Mombi Singh pang a, retired teachers L Dwijamani Singh, RK Bishwanath Singh, K Bhubon Singh, L Budhichandra Singh, RK Brajabidhu leh chief secretary pianna pa Oinam Babumacha-te guests of honour in pang uhi.

 

 

Program zatna hun a chief secretary Oinam Nabakishore Singh in a thugenna ah, nasepna khatpeuh a lohchinna ding a vanzat poimohtak thil gelna(planning) leh panlak dingdan(strategy) ahi chi’n gen hi. Mi khat in thil khat a sepkhiak theihleh bangziak a midang te’n leng semkhetheilou ding, kuhkaltak a nasepna a thil bangkim kinga vek ahi chi’n gen hi. Chief Secretary a let sung ngei a hill districts a kivaihawmna toh kisai a hatsemna ding a panla ding hi’n leng gen hi. Ngaihdan hoihtak toh vaihawm a nasemkhe ding a district chih a administrative secretaries, DGP leh PCCF-te theisak khin hi’n leng gen hi. Vaihawmna etkai a hihtheihna ding monthly basis a singtang district teng vehsuak ding hi’n leng gen hi. Hiaibang nna semkhe ding a mohpuakna pia Chief Minister O Ibobi Singh tung ah leng kipahthu gen hi.

 

 

Thil poimoh masa omte zonsuah a hih nung a vaihawmna toh kisai sepsuah hiding hi’n leng gen hi. Commerce and Industries Minister Govindas Konthoujam kichi state makai suanhuai khat ahi chi’n phat mahmah hi.

 

 

Minister Govindas Konthoujam in a thugenna ah, Chief Secretary ding a Nabakishore guan a hih lai in state government in thil deihhuailou sepkhiak neilou ahi chi’n gen hi. Chief Secreatary post luah ding in deputation neilel senior IAS officer 2/3 chial in om mahleh amaute’n government chialna nial uh chi’n gen hi. Chief secretary thak O Nabakishore in amah department a principal secretary a let hun lai apan vaihawmna toh kisai panpihtu ding thil hoih tamtak sinkhia hi’n leng gen hi. Minister in Chief secretary in muhkholna a neihte leng kipahpih hi.

 

 

Program kipatma deuh in Ningthoukhong mipite’n Highway Loktak Project Canal ah Chief Secretary thupitak in na vaidawn uhi. Project site khat apan Ningthoukhong Bazar zuan in a khe in pai a, Keithel Goddess apan vualzawlna la a, hiai zoh in Gopinath Mandir mun zuan hi. Kipahpihna program zatna hun ah chief secretary O Nabakishore in guests of honour dan a program zatna uap retired teacher-te thilpiak toh thuah in zahna pia hi.

 

 


MHS nuai ah MO Grade IV 77 Grade III in kaisang
LAMKA, Oct 4: Regina Hongray, Under Secy (Health & FW),Govt of Manipur in Governor min a order a suahna ah, Departmental Promotion Committee in recommend a bawl dungzui in, hiai a nuai a Medical Officers (MHS Grade -IV) 77-te Manipur Health Services Grade-III (Non Specialist cadre) in kaisang ua, scale of pay Rs 15,600 - 39,1000 + GP Rs 6,000 banah allowances tuamtuam sangthei ding uhi.

 

 

Amaute ahihleh L Raichandra Singh; L Indira Devi; N Thoinao Singh; T Devjani Devi; Y Nokul Singh; M Nomita Devi; L Binakumari Devi; Joyson Mathew Monsang; O Mahendra Singh; Chingsuanchin; L Ibomcha Singh; L Subhaschandra Singh; P Merajao Singh; S Ibungouchouba Singh; L Joykumar Singh; Karong Hmanglamkhup Kom; Paolunthang Vaiphei; S Gopal Singh; Jangkholun Touthang; Thoudan Rajen Singh; RK Noni Devi; Ph Premjit Singh; S Rita Devi; Kh Gojen Singh; N Sharoda Devi; D Leima Kabui; Helen Shimray; P Dayabati Devi; M Dinesh Singh; Kimneilam; Kh Pushpa Devi; L Hema Chanu; Md Ayub Ali Syed; G Majachunglu; Ngouniba Peter; K Romesh Singh; Somorjit Ningombam; Usham Jugindro Singh; Daya Longjam; T Nengkhanmang; Lolee P Mao; L Kuber Singh; Th Nabakishore Singh; Rakibuddin Ahmed Shah; Phirthanglien Buhril; Kh Bijoy Singh; Golmei Kajairunglio; H Jamchinthang Simte; Th Modhubala Devi; H Chandrakala Devi; S Rajen Singh; Y Premchandra Singh; N Shashikumar Singh; Mary Haobam; W Ruhini Kumar Singh; N Sushila Devi; S Thoiba Singh; N Romila Devi; W Hemolata Devi; M Gambhini Devi; Leishiwon Phingshoknao; Kh Homeshwar Singh; Th Rejen Singh; L Tilakeswari Devi; Kapangring Shimray; Irengbam Sonia; Y Nando Singh; Kh Robindro Singh; Probin Chandra Arambam leh Th Dineshwat Singh hi uhi.

 

 

 


Rayburn College & High School in Oct 4 sunna ni in puang
LAMKA, Oct 4: New Lamka a om Rayburn College leh Rayburn High School Principal in thusuah a bawlna ah zingchiang, October 5, 2015 pen Rayburn College a B.A. 1st Semester sinlel Salpha Paulianmang sunna leh ‘Tribal Martyrs’ dangte sunna in holiday a puang uh ahihdan taklang hi.

 

 

Tua toh kiton in zingchiang, October 5 zingkal dak 7 in Rayburn College leh High School in a kigawm in Salpha Paulianmang sunna leh memorial service nei ding uhi. Hiai hun a tel ding teaching staff leh non-teaching banah BA 1st Semester student-te leh ngainatute’n puanvom lam deuh silhchiat ding a theihsak hi uhi.

 

 

Huailou in, October 6, 2015 (Sepnawnni) a kipan in Rayburn College leh High School ah hiai a nuai a hun kibang bang in regular class kipannawn ding hi. College lam a Morning Section-te zingkal dak 6 - 8 kikal in kai ding ua, Day Section-te zingkallam dak 8:30 a kipan sun dak 12 tan kai ding uhi. High School lam ate ahihleh zingkal dak 8:30 a kipan sun dak 12 tan kai ding uhi.

 

 

 


Salphate galna di’n Rs. 35,000/- lut
Lamka Oct 4: Manipur Government in August 31 a Bill 3 a passed deihlou a kiphinna hun a si leh liamte galna ding in tuni’n mimal leh pawlpi tuamtuam in Lamka Damdawi Inn a Reception Centre ah Rs. 1,500/- pia uhi. JPO Information Centre a pete ahihleh Elvee Printers, New Lamka in maipuang pum 84; Yah Kehellah Yah Congregation Messianesim, Imphal in Rs. 7,000/- ; Nu Donman Khongsai leh Nu Niankhonem Ngaihte, Israel in Rs. 5,000/-; The Salvation Army Youth (SAY), Lamka Corps in Rs. 3,000/-; South Korea Zomi Innpi & Manipur Tribal in Rs. 15,500/- leh Dr. Jamkhogin Lhungdim, National Game Village, Imphal in Rs. 3,000/- pia ua, tuni Salphate galna dia piakkhawm a omteng a kigawm in Rs. 35,000/- pha hi.

 

 

 


ZNP youth wing in CM Lal Thanhawla mohsa
Aizawl, Oct 4: Chief Minister Lal Thanhawla leh government officer khenkhat in October 2 a Swatchh Bharat Mission nuai a cleanliness week honkhiakna hun ah chalak tak in Gandhiji statue hahsiangdan a kineih in statue mai ah a mawkna in hun zangbei uh chi’n Zoram Nationalist Party(MNP) The youth wing ngawh hi.

 

 

ZNP youth wing in Chief Minister mohsa kawm in, CM in state siangthou leh feltak neih ding a lunggulh a hihdan a lah nop taktak leh loubawlte kivatna puante silh a mun siangloute hahsiangna a neih ding ahi chi’n gen uhi. CM leh a official-te’n midangte buphaina a hihkeileh chalak tak a panlakna a neihte uh a khawlsan ding uh ahi chi’n ZNP in phut a, Chief Minister khat in state governor a pawngkhem mawk pen state ading a zahlakna liantak hi’n leng ZNP in taklang hi. (NNN)

 

 

 


Police Constable Viva Voce nei ding
Imphal, Oct 4: Police Constable (Civil/ Male) lakna dia written test a lohching Churachandpur District a pante’n zingchiang, October 5 - 7 sung a nuai a bang in 1st MR ah Viva Voce (Personality Test) nei ding uhi. Oct 5, 2015 in Chest No. 1-1100 kikal in nei ua, October 6 in Chest No. 1101-2500 leh October 7 in Chest No. 2501-3408 kikal in nei ding uhi.

 

 


Oct 5 a pan mun 6 ah dharna neih hita ding
LAMKA, Oct 4: Joint Action Committee Against Anti Tribal Bills in tuni a thusuah a bawlna ah, zingchiang, October 5 a kipan in Ccpur District sung mun 6 ah sit-in-protest neih hita ding hi’n taklang hi. Huaite ahihleh Kangvai, Monglenphai, Light House, Ccpur Police Station, District Hospital leh Rayburn College hiding a, sunnung dak 2:00 a pan in dak 5:00 tan hiding hi.

 

 

Huailou in, zingchiang, October 5 a kipan in Ccpur District sung ah school-te ngeina bang in kainawnta ding ua, JAC in a poimoh bang in enkai ding hi.

 

 

 


Silent sit-in-protest nei ding
LAMKA, Oct 4:  Zingchiang, Oct 5 a Student Movement toh kisai pai dingdan ahihleh hiai bang ahi. student chih in mahni school chiat a mohpuakna lak ding; zingkal dak 6 a kipan sun dak 12 tan ‘silent sit-in-protest’ neih ding; hiai hunsung a dai sipsip a sit-in-protest neih ding leh thagum suahna leh kampau (verbal) peuhmah phal hilou ding hi’n press ah theisak uhi. .

 

 

 

Assam Congress in party nasepna kalh MLA 9 paikhe ding
GUWAHATI, Oct 4:  Assam Pradesh Congress committee president Anjan Dutta in a gendan in, tuni’n Assam state Congress executive body in party nasepna kalh leh kiphinna nei Assam MLA 9te paihkhe ding in thupuk a, kal khat sung ngei in amaute nohkhiakna ding thusuah bawl ding uhi.

 

 

Paihkhiak a om ding MLA 9te lak ah Jayanta Mallah Baruah, Pijush Hazarika, Pallab Lochan Das leh Pradan Barua tel ua, August apan in party in suspend puankhum khin hi. MLA dang 5te a hihleh Abu Taher Bepari, Kripanath Mallah, Rajen Borthakur, Binanda Kumar Saikia leh Bolin Chetia hi ua, amaute tung ah show cause bawl in om mahleh dawnna pelou uhi. Party disciplinary committee in BJP zom khin minister lui Himanta Biswa Sarma tel a MLA 9te paihkhiak ding lemsakpihna a piak toh kiton in executive body in paihkhevek ding in thupuk hi. Hun paisa in Sarma paihkhiak in om khin mahleh MLA 9te toh kibang in paikhiakna thusuah bawlkhum hiding hi. Assembly a hihleh ngeina bang in paitou ding hi. Party apan MLA 9te paikhiak a hihzoh chiang in Congress Legislative Party khut ah maban panlak dingdan bangkim pekhe ding uhi.

 

 

August kha a Sarma in BJP a zop nung in Delhi zuan ngal a, a hong kik hun a Guwahati airport a Sarma vaidawn MLA 9te tung ah Congress in action lakna khat pankhia hi. September 15 in Sarma in a MLA seat nusia in Assembly apan kitawp hi. Tulel in 126 member state Assembly ah Congress in kiphinna nei MLA 9te tel in MLA 77 nei hi.(TNN)

 

 

 


Oct 9 in “Naga-Assamese Round Table Talk” om ding
GUWAHATI, Oct 4: Nagaland leh Assam apan Civil society group-te’n kingeihlouhna omte sukbeina ding leh state nih a nam kal a kimuantuahna tunding nading a tukhawm a kihouna nei ding in thupuk uhi. Tua toh kiton in October 9, 2015 in Nanda Talukdar Foundation (NTF) saina toh state nih apan palaite’ “Naga-Assamese Round Table Talk” chi a kiminloh kihouna ah tel ding uhi.

 

 

NTF thusuak in a taklatdan in, kum 10 a sim kimuanlouhna leh kimelmakna omte koihkhia a khualzinna kong a pangkhawm tuah a panla ding in civil society group-te kal a kihouna khat pankhe ding a panla uh hi’n taklang uhi. Peace activist Niketu Iralu in Naga palaite makaih ding a, amaute lak ah apex tribal council Naga Hoho’s president Chuba Ozukum, Naga Mothers’ Association’s adviser Rosemary Dzuvichu, Naga Students’ Federation (NSF) president Subenthang Kikon leh adang hunkhop tel ding uhi. Academician minthang Udayan Misra in Assam palaite makaih ding a, amaute lak ah Asom Sahitya Sabha president Dhrubajyoti Bora, AASU chief Adviser Dr Samujjwal Bhattacharya, Purbanchaliya Tai Sahitya Sabha president Dayananda Borgohain, Upper Assam commissioner lui Sayad Iftikhar Hussein leh midang hunkhop tel ding uhi. Hiaibang panlakna in, state nih apan mipite kal a kum tamtak khotang vai toh kisai a kimuanmohna leh ginlelhna subei ding a, pankhawmna leh kizahtuahna hunbi thak honsak ding chi’n NTF thusuak in taklang hi.(TNN)

 

 

 


Khumujamba numei pawl in khamtheih hunkhop haltum
Lamka Oct 4: Tuni sunnung dak 4:30 in Khumujamba ah khamtheih hunkhop mat a omte hal in om hi. A paisa September 25, 2015 a pan October 4, 2015 sung Women Welfare Organisation, Khumujamba pawl in a vengsung ua khamtheih kipetuah om chih thuguk a ngah dungzui un vengsung a kiviallehte etkhiakna nei in muanmohhuai a sakte uh a taksa pumpi uh check ua, huai a pan in khamtheih hunkhop mankhia uhi. Hiai toh kisai in maban ah vengsung a khamtheih toh matkhawm a omte a min uh toh taklat hita ding hi’n gen uhi.

 

 

Tuni a khamtheih leh vanzat matkhiak a omte ahihleh ganja 22gm, SP tablet 29, zu ngou (local liquor) 1 litre, syringe 10 pieces, alzolam tablet 6 leh No. 4 powder laithem a kitun hi a, mat a om teng mun thoveng ah mipi muh in haltum uhi.

 

 

 


‘Peace and security meet’ nei
IMPHAL, Oct 4: Patsoi Police station leh Patsoi Post of 12 Bihar banah Meira Paibi Community of Patsoi Area pangkhawm in Kiginni in huai area a muanna leh bitna omna ding deihna ziak in “Peace and Security Meet” neih in om a, huai ah Meira Paibi a pan numei tamtak leh tuailai hunkhop in uap uhi. Hiai hun ah Patsoi area leh lemna leh muanna banah kituahna omtheihna dia ngaihdan leh suggestions tuamtuamte lakhawm in genkhawm ua, hiai bang a muanna leh bitna omna dia hun binei a kithuahkhawmna neih zel ding leng thupuk uhi.

 

 

 


HSA in Aizawl ah 76th Rising Day zang
Aizawl, Oct 4: Hmar Students’ Association, Joint Headquarters, Aizawl saina in October 3, 2015 in I & PR Auditorium, Aizawl ah HSA 76th Rising Day zatna om a, hiai hun zatna ahihleh R. Vanlalvena, MLA & Chairman ZOHANDCO leh Sinlung Hills Development Council (SHDC) Chairman, Hmingchungnunga in chief guest leh guest of honour hihna toh uap uhi.

 

 

Hiai hun a chief guest R. Vanlalvena in a genna ah, Mzoram ah Hmar namte’n poimohna liantak nei ua, Mizoram state neitute lak a khat ahihdan uh gen hi. Tua banah Sinlung Hills Development Council nuai a khantouhna zekaitak om pen ngaikhawk mahmah leh khantouhna ding a fund paite a ngah ding mite’n ngahlou hiam ahihkeileh makai khenkhat ginatlouh ziak leng hithei ahihdan gen hi. Hiai hun ah MZP president lui R. Vanlalvena in student-te’n lohchinna ding a chihtakna leh kuhkalna neih poimoh ahihdan leng gen hi.

 

 

Hiai hun zatna mi poimoh tuamtuam leh student pawlpi MZP leh MSU makaite’n a uap banah Mizoram a lasiam minthang Rualthankhuma Chhakchhuak (A-Grade radio artist), Juliet Hnamte, Caroline Biakthansangi, Lalruatdiki Margy Lalremruati, Rosy Vanlalhlani, Lalremkimi leh Mary Sungte in lasa in paikhawm mipite kipaksak mahmah uhi.

 

 

Session nihna ah career seminar awareness nei ua, huai ah Lily Sangpui, M.Phil scholar leh guest lecturer, MZU leh Kapremvel Pulamte, Auditor, AG, Govt. of India in India gamsung leh gamdang a competitive examinations leh job opportunities toh kisai sinsak uhi. (NNN)

 

 

 


Anthurium Festival 2015 leh Bamboo Day lohchingtak in zou
Aizawl, Oct 4:  Mizoram Tourism Department saina a ni 3 sung Anthurium Festival 2015 zat a om tuni’n lohchingtak a zoh in om hi. Hiai hun zatna ahihleh Mizoram kia hilou in state dang leh gamdang a kipan mi tamtak inleng uap uhi. Lengpui Mini Sports Complex a Anthurium Festival 2015 zatna hun a Tourism Minister John Rotluangliana in a genna ah, Anthurium Festival ahihleh khentuam neilou a kuapeuh teltheihna nopbawlna chikhat ahihziak a lohching ahihdan leh hiai festival a tel peuhmah in nuamsa uh ahihdan gen hi.

 

 

Anthurium Festival zatna mun Reiek a kipan Lengpui a suan a omna ziak ahihleh kikawmtuahna lampi hoihzawk ziak leh festival uaptu mipi a kibehlap zel ziak hidan inleng gen hi. Kumdang bang in tukum a Anthurium Festival zatna hun ah leng cultural dances, traditional attires lahna, khanglui la leh tulai la tuamtuam sakna leng om hi. Hiai hun ah Mizoram a band minthang khenkhat inleng concer nei in festival nuamsak mahmah uhi. Tua banah hiai hunsung in Mizoram a kipan kibawlkhia thil tuamtuam zuakna leh lakkhiakna ding in stall tuamtuam bawl ua, mundang a kipan festival uaptute ettheih ding in koihkhia uhi.

 

 

Tukum a Anthurium Festival zatna ahihleh Mizoram state sung banah state pua a kipan mi tamtak in uap ua, hiai hunsung mah in Bamboo Day zatna leng om hi. Mizoram Bamboo Day Committee leh Environment & Forests Department saina in cultural club tuamtuam in Cheraw Dance competition nei ua, huai ah Zofa Cultural Club, Chanmari West in khatna la in kipahman Rs.50, 000/- sang uhi.

 

 

Tuni sunnung lam in pasal khat Activa a tailai Lailam Lei ah kia hi. Hiai lei ah hun paisa inleng a kia om zel uh hi’n leng thutut kingah hi.

 

 

 

 

NATIONAL | INTERNATIONAL

Lokpal thu ah Parliamentary Panel in Nov. 14 tan hun ngah 

 

New Delhi, Oct 4: Parliamentary panel in Anti-corruption watchdog Lokpal toh kisai a Bill report toh a piaklut hun ding uh a 3veina ding in November 15 tan in behlapsak in om nawn hi.

 

 

Congress MP E M Sudarsana Natchiappan makaih 13-member Parliamentary Standing Committee on Personnel, Public Grievances, Law and Justice –te’n Lokpal leh Lokayuktas ban ah Other Related Law (Amendment) Bill, 2014 enchian lel uhi. Mr Natchiappan gendan in, November 15 tan hun behlapsakna ngah uh a hihdan gen a, Bill toh kisai in report bangkim sukfelna pailel a, a huntak in piaklut hiding chi’n gen hi. September kha tawp kuan in panel in hiai bill report toh kisai piaklut ana sawm khin hi.

 

 

December 18, 2014 in Lok Sabha ah amendment bill puaklut in om a, hiai zoh December 22 in Committee khut ah pekhia ua, tukum March 25 a report pelut dia theihsak in om khin uhi. Panel in Rajya Sabha Chairman Hamid Ansari khut a hiai report a piaklut ding chih ahi. Lokpal Act, 2013 in mipite tang a nasemte tung a nekgukna om toh kisai bangkim enkaitu ding in, Union a ding anti-graft watchdog Lokpal leh states a ding Lokayuktas phuhkhiak theihna ding chih ahi. (PTI)

 

 

 


BCCI President di’n Shashank Manohar telching in om
Mumbai, Oct 4:  Tuni’n Cricket Board hunbi thak enkaitu ding leh Board of Control for Cricket in India (BCCI) president thak ding a tuhtu omlou in Lawyer-turned-administrator Shashank Manohar telching in om hi.

 

 

Mumbai a dakkal kim khat sang a tawmzaw Board’s Special General meeting neihna hun ah Manohar in BCCI president thak luah hi.

 

 

Zan Kiginni nitak dak 7 tan a nomination thehlutna hunchiam a beitan in Manohar kia candidate paisuak omsun suak hi. Tukum March kha a election zoh a hih nung a BCCI president luah Jagmohan Dalmiya in a term beina ding kha 7 in sam lai mahleh vangtah thu a sihna tuah ziak in election sai kul hi.(TNN)

 

 


German Chancellor tuni’n India hongtung
New Delhi, Oct. 3 : Zingchiang Pathianni in German Chancellor Angela Merkel in India leh Germany kal a Inter-Governmental Consultations (IGC) om ding uap dia ni 3 sung taam ding in India hongtung hi. Chancellor a hihleh Cabinet Ministers leh dinmun sangtak nei business palai khat tel in palai hunkhop in honzui ding uhi

 

 

Tuni Pathianni in Chancellor Merkel New Delhi hong tung mahleh zingchiang Seppatni in Rashtrapati Bhawan ah thupitak vaidawn hiding a, hiaizoh in Rajghat veh ding a, makai nihte kal ah official meeiting leh palai paikhawmte kal ah inter-governmental consultations leng nei ngal ding uhi. President Pranab Mukherjee inleng India hong veh Chancellor houlimpih ding hi.

 

 

External Affairs Minister Sushma Swaraj in German Foreign Minister Frank Walter Steinmeir toh meeting nei ding ua, Chancellor leng kimuhpih ding hi. Defence, security, education, renewable energy, high technology manufacturing, skill development, science and technology, railways, water and waste management, urban development leh agriculture lam toh kisai a gam nih kal a kinaihzawk semna a om theihna ding ban ah gam nih kal a lunglutna kibang omte Prime Minister Narendra Modi leh Chancellor Merkel in meeting a neih na hun uah genkhawm ding uhi. October 6 in National Association of Software and Services Companies (NASSCOM) on ‘Industry 4.0’ in a zintun business event khat uap ding in makai nihte’n Bengaluru vehkhawm ding ua, German company Bosch a innovation leh skilling centre leng pha ding uhi. (ANI)

 

 

 


BJP in kikhenzakna Politics paipih den: Virbhadra Singh
SHIMLA, Oct 4: State mipite politics paizia sukbei ding tup a nei in Himachal Pradesh state BJP makaite’n mipite kikhenzakna politics paipih den chi’n state Chief Minister Virbhadra Singh in ngoh hi.

 

 

BJP government in thuneihna a luah teng in, ka tung a thubuai diklou bawlsam den a, himahleh a hon subuai zou uh chi’n Virbhadra Singh in Shimla a ama assembly constituency a public meeting ah gen hi.

 

 

Tulel a state a vaihawm Congress government in thudik a paipih pompih ding in BJP makaite hasuan a, state sung mun teng a kintak a khantouhna leh kong bangkim a masawnna ding mah ngaihtuah den uh hi’n gen a, mi gamtatdan teng thahsak ding a panla ngeilou uh hi’n leng gen hi. BJP makaite proganda leh chalak tak a nasepna omte’n sawt daihlou ding ahi chi’n gen hi. Gamsung mipite pil huntawkta ua, BJP khemna thangkam ah pawng puksiatlou ding uh ahi chi’n gen hi. Himachal Pradesh Cricket Association (HPCA) toh kisai CM in a gendan in, hun paisa a vaihawm BJP government in Dharamsala a five star hotel leh cricket stadium bawlna ding in sum a crore a sim huding gam pekhia ua, himahleh hiai gam leitang a singkung a za a sim pou a hihna toh zattaklou suak chi’n gen hi. Member 25 nei HPCA company khat bawlkhia ua, member tamzaw Dhumals tanaute ngen hi uh chi’n gen hi. HPCA kichi Cooperative Act nuai a a kichiamteh ngeingei ding ahi chi’n gen hi.(TNN)

 

 

 


Hospital ah Indrani Mukerjea khophawklou in etkol in om
MUMBAI, Oct 3:  A paisa Sintawpni nitaklam a drug overdose ziak hiding a muanmoh, a tanu Sheena Bora thattu hi a ngoh pipen a om Indrani Mukerjea khophawklou a muhkhiak a hih nung in Byculla jail apan in JJ Hospital, Mumbai tut in om hi. Hospital ah ni 4 sung etkol in omta a, doctor-te kampaute awlawl in sangthei panta mahleh a dinmun buaihuaipi suak denlai a, himahleh a damtheihna lam bel hoih mahmah hi’n amah enkoltu doctor-te’n gen uhi. Hiai thiltung toh kisai Maharashtra chief minister Devendra Fadnavis in suizui ding in thusuah bawl hi.

 

 

Indrani in doctor-te aw suakte sangtheizel a, a kimkhat khawphawk dinmun in om a, a nak theihna buaipih pen in nei denlai uh chi’n JJ Hospital dean Dr T P Lahane in gen hi. A dinmun lauhthawnhuailou hi’n gentheih hikei mahleh a taksa tung a gu omte thahsiangna ding in dakkal 72 sung hun la lai ding hi.

 

 

Dean in a genzel dan in, zun test a hihna ah Overdose a damlou mah hihiam chih chetna diktak tuni a suak ding hi’n gen hi. Sintawpni a sisan test-na khamtheih gu a tellam mukhelou uhi. Sepnawnni a Guwahati a, a piannu’n a sihsan ziak a Indrani kingaisia a khawphawklou a puk hiding in muangmoh uhi. Dose niamthei tawp in kingaihsiatlouhna damdawi Mirtzapine leh Etizolam-te pe den uhi. A gilsung a thil etchet a omte report toh kisai forensic laboratory apan munailou uh hi’n Dr Lahane in gen hi.

 

 

Media baron Peter Mukerjea zi Indrani ahihleh, kum 2012 a, a pasal masa toh tanu a neih uh Sheena Bora thahna a kigolh hi a ngohna a om ziak in August 25 in Khar police-te’n mankhia uhi. Sheena (24) ahihleh National College, Bandra pua ah pikhiak in om a, Indrani, a pasal nihna Sanjeev Khanna leh a driver Shyamvar Rai-te’n car sung ah soisa lum uhi. (TNN)

 

 

MSF hospital bukapna toh kisai suichet hiding: Obama
Kabul, Oct-4: US makaih coalition force-te’n Afghanistan a Taliban helpawlte target a nei a huihkhua apan kidouna lenna zang a bomb a khiakna uah zan in Kunduz khopi sung mallam ah Medecins Sans Frontieres (MSF) kichi Doctor without Borders in a etkai Hospital 1 bomb khiakhum kha in huai ah a sung a sem staff 12 leh patient 7 kigawm mi 19 si in midang 37 in liamna a tuah tungtang ah UN in war crime dan a thupuan a bawl toh kiton in hiai thiltung suichet vek hiding in US President Barrack Obama in gen hi.

 

 

US makaih coalition force in Kunduz khopi a huai hospital a beihna ziak ahihleh Taliban helte’n apaisa kum 2001 nung a masapen dia Kunduz khopi a thuneihkhum zoh ni 2/3 vel a government in a lakkik zoh ding tupna a government huhna dan a bomb a khiak uh hi a, hileleng huai hospital leng naktak a beih khak a om chih ahi hi. Hiai thu ah Kabul pansan Afghanistan Defence Ministry thusuak in ahihleh Taliban helte’n government force-te douna ah huai hospital pansan in nei uh chi’n gen a, bomb khiak a hihlai in kidouna lennate’n hospital umkual in bomb leh thau hoihtaktak in kapzom ziahziah uh hi’n Afghanistan mallam bial a MSF Programme Head Heman Nagarathnam in gen hi.

 

 

Aman a gendan in, US leh coalition force-te’n huai hospital beihna dia minute 30 sung vel zang uh hi a gen in Hospital pansan a helpawl gamtang kuamah omlou hi’n leng taklang hi. MSF President Meinie Nicolai in hiai hospital beihna pen International Human law kalhna nasatak hi’n puang hi. UN Chief Ban Kimoon in Kunduz hospital beihna naktak in mohpaihthu puang kawm in dik-le-tang tak a suizui hiding in puang hi.

 

 


Israel in Jerusalem ah Palestinian-te lutsak lou
Jerusalem, Oct-4: Israel police-te’n tuni’n Old Jerusalem khopi sung koimah ah Palestinian tuailai himhim ni 2 sung lutlou ding in thupuan bawlkhum uh a, huai toh kiton in Jerusalam a Al- Aqsa mosque compound a biakna nei ding Muslim-te leng pasal kum 50 apan a tunglamte leh numeite bel kum bikhiah omlou in phalsak ahihthu taklang hi.

 

 

Israel police in hiaibang thupuan a bawlna ziak ahihleh ni 2 paisa sung a Palestinian galvantawite’n mun a gamtatna nei ua, huai ah nupa kop 1 kaplum ua, nupi leh naupang 1 temta zang a dotliam a om ziak hi’n taklang a, Jewish te’n Jerusalem a Al-Aqsa mosque poimoh tak amau a dia mun siangthou ‘Temple Mount’ a Kiginni masa apan ni 8 sung vingveng Feast of tabernacle kichi ni poimoh a zat ziak ua Israel leh Palestinian mite kikal sousang sak in kal 1 sung kinawktuahna avangkim in omtou hi.

 

 

Al-Aqsa mosque kiangnai ah nupi leh naupang kumchinglou soisatute Israel sepaihte’n delhzui in alak ua 1 kaplum uh a, Palestinian galvantawite’n Israel gamsung simlam bial a rocket a kaplut ziak unleng Israel kidouna lenna zang in sepaihte’n Gaza strip lak huihkhua pansan in 2vei hial a bukapna uah siatna nasatak tungkhin hi.

 

 

 


French Prime Minister in Russia pilvang di’n ngen
KYOTO, OCT-4: Russia sepaihte’n kidouna lenna leh galvan tuamtuam zang a Syria a President Bashar al-Assad government tunding tupna a Islamic State jihadists pawl douna nasep a neih lel toh kisai opposition gum pawlte telin a dang tung a khutkha lou dia pilvang ding in French Prime Minister Manuel Valls in Russia ngen hi.

 

 

Japan gamveh a zin French Prime Minister in Tyoto khopi a thuthaksaite kiang ah Syria a President Bashar al-Assad government deih lou a kiphin moderate rebel group-te tung a Russia in khut a khak ding lunghimoh huai a sakthu gen a, Russia in target diklou a khoih hetlouh poimoh ahihthu Russia President Vladimir Putin kiang a ngen ahihdan leng taklang hi. Valls in opposition pawlte banah civiliante tung a Russia in khutkhakna a neih leh thildik hithei lou ding ahihdan leng gen a, Syrian Observatory for Human Rights monitoring group IS helte lou leng Russia in target a nei ahihthu a gen lung himohhuai lua ahihdan taklang hi.

 

 

 

NEWS LAKTOM

Pearsonmun khosung ah curfew puang
Pearsonmun Village Authority, Young Paite Assn Unit, Zomi Mothers’ Assn Unit leh Village Welfare Committee in October 3, 2015 a Joint Meeting a neih hun ua thupukna bang in October 5, (Seppatni) a kipan in Pearsonmun khosung ah nitak dak 6 a kipan zinglam dak 5 tan ‘Curfew’ puang uhi. Curfew hunsung in khopua a kipan lut leh khosung a kipan pawtkhiak phal hilou a, zu leh khamtheih puaklut leng kham uh ahihdan thusuah bawl uhi.

 

 


SSC Exam ah candidate 463 lak ah 450 exam
Staff Selection Commission (SSC) saina nuai a BSF, CISF, CRPF, SSB, ITBP, NIA, SSF leh Assam Rifles Constable lakna ding in tuni, October 4 in Ccpur SSC exam centre Ccpur College ah sunma dak 10:00 in exam om hi. Tuni a examna ah Ccpur District a candidate 463 om lak ah candidate 450 exam ua, candidate 13 absent uhi.

 

 


Salphate innkuante’n Dharna tute veh
Manipur Government in August 31 a Bill 3 a passed deihlou a kiphinna ziak a state security force-te kaplup Salpha 9-te sungkuante’n tuni nitaklam dak 3:30 vel a pan in Lamka khopi sung mun tuamtuam a dharna/ sit-in-protest neihna munte a banban in veh uhi. Hiai hun a Salphate sungkuante’n a genna uah, Salphate ahihleh Manipur Assembly in Bill 3 a passed deihlouna ziak leh singtanggam leh singtangmite humbitna dia hinna pia ahihman un, Bill 3-te toh kisai a singtangmite ngetna dawnna kipahhuai leh Bill 3 singtanggam leh singtangmite tung a zat hilou ding ahihdan thu zak ahihma vui hikeithei leh chih a deih thu uh gen uhi.

 

 


Sunna:

Thanglianmang (33) s/o S. Manlian, President, YPA New Lamka block, tuni zinglam dak 4 vel in stroke in si a, tuni’n New Lamka YPA hanmual ah kivui hi.
K. Zamlalmuan (34) s/o K. Ginkhozam, Lailam Veng, tuni sunnung dak 4 in sinna in si a, zingchiang in Lamka hanmual ah kivui ding hi.
Pi Goihman (90) m/o Chingkhanvung, Hebron Veng, New Lamka, tuni sunnung lam in teknat in si a, zingchiang in New Lamka YPA hanmual ah kivui ding hi 

Niangkhawl (59) w/o (L) P. Khamzamang, Mualveng, tuni sunnung dak 2:30 in Kidney fail in si a, zingchiang in Lamka hanmual ah kivui ding hi.