You are here: HomeRSS FeedsThe Lamka Post

The Lamka Post | November 25, 2015

Wednesday, 25 November 2015 16:07


 

Breaking News
Turkey in Russia lenna kapkhia; NATO in Extra Ordinary meeting nei ding
MOSCOW, Nov 24: Russian President Vladimir Putin in Turkey leh Syria gamgi zul a Russia lenna kapkhiak a om naktak a mohpaih ahihdan gen in, hiai thiltung ahihleh Turkey in Russia siatna ding ngimna a, ahih leh ‘terrorist-te gamtatna toh kizoitawn hidan in gen hi.

 

Turkey thusuak in a taklatdan in, Russia lenna ahihleh theihsakna (warning) piak ahihnung a Turkey huihkhua a, a lenlut ziak a kapkhiak a om hidan in taklang a, himahleh Moscow in bel Syria huihkhua pel a Russia lennate leng ngeilou hidan in taklang hi. Hiai thiltung toh kisai in Turkey in ngetna a bawl bang in NATO in ‘extraordinary meeting’ nei ding uhi. Russia President in hiai thiltung toh kisai a khonunggu hattak om ding leh Moscow leh Turkey kizopna tanpha sethei hidan in gen hi.

 

Russian Foreign Minister Sergei Lavrov inleng hiai thiltung ziak in zingchiang, Nilaini a Turkey veh a sawm himahleh thulhkik a, Russia mi kuamah Turkey a zinlou ding leh Egypt bang a Turkey leng ‘terrorism’ lam a lauhuai ahihdan gen hi. Kha paisa inleng Egypt ah bomb in Russia passenger lenna khat kapkhiak in ana omta hi.

 

Russian Foreign Minister in a genzelna ah, Russia jet Su-24 ahihleh Syria huihkhua a lenglai Turkish F-16s in ‘air-to-air missiles’ zang a, a kapkhiak hidan in gen hi.

 

President Putin in a genna ah, Russia lenna ahihleh Turkey leh Syria gamgi zul Turkey a kipan Km 1 vel a gamla Syria huihkhua a metre 6,000 a sang a lenglai kapkhiak a om hi a, Turkey gam a lenglut kei, Turkey in a thil hih gah a lou ding chi’n gen hi. Huai banah kapkhiak a om lenna ahihleh Turkey gamgi a kipan Km 4 vel a gamla Syria gamsung a muhkhiak a om ahihleh lenna a tuang crew member 2 lenna a kipan in tawmkhia ua, ‘video footage’ tungtawn in lenna a tuangte lak a hidia gintak misi khat galvantawite’n umkual uh ahihdan muhtheih a kilang hi’n gen hi.

 

President Putin in a genzelna ah, Russia lenna leh pilot-te’n Turkey gamsung leh huihkhia hihbuai khalou ahihdan chiang mahmah a, Syria mallam a tanggam Latakia a ISIS helpawlte omna bei a leng uh hidan in gen hi. Russia in Islamic State helpawlte a beihna ah, Turkey in Russia lenna leh sepaihte bittak a Russia a kiknawn ding uh a deihlouh ziak a, a kapkhiak ahihziak in ‘terrorist’ a Turkey puantheih ahihdan gen hi.

 

Turksh military officials thusuak in a taklatdan in, Russia lenna in Turkish huihkhia zalenna ahihbuai ziak in ‘warning’ tam veitak piak hi a, himahleh a ngaihsaklouh ziak a kapkhiak a om hidan in taklang hi. Tutung a Russia lenna kapkhiak a om ahihleh kum paisa September a kipan Russia in Syrian President Bashar al-Assad paihkhiak sawm helpawlte a dounung a Russia lenna kapkhiak a om masakna pen ahi. Hiai thiltung toh kisai in NATO member Turkey in ngetna a bawl dungzui in, tunitak dak 16:00 GMT (IST 9:30) in Brussels ah NATO ambassador-te’n informational meeting” nei ding uhi.

 

UK-pansan Syrian Observatory for Human Rights thusuak in a taklatdan in, Russia lenna ahihleh Syrian government sepaihte leh helpawlte kibeihna Syria mallam a Jabal Turkmen area tanggam lak a kapkhiak a om hidan in taklang hi.

 

H e l p a w l t e thupuangtu’n a gendan in, Russia lenna hektu khat lenna a kipan in parachute in kitawmkhia a, himahleh amah leng kap a om in si a, pilot khat ahihleh a tanchin theih hilou hi’n taklang hi. Syria president melma lian mahmah Turkey in ahihleh Russia leh Syria lenna himhim in Turkey huihkhua a phak ding phallou uh ahihdan ana taklangta uhi.

Russia Jet in Syria gamgi kantan in Turkey ah a lenglut kei; Turkey in a thil hih gah a lou ngeingei ding: Putin

 

 


All Tribal Womens’ Union, Ccpur phutkhia
LAMKA, Nov 24: Tuni sunma dak 11:00 in New Lamka YPA hall ah singtangmi nam tuam tuam a pan numeite paikhawm in All Tribal Womens’ Union Ccpur phutkhia uhi. Numei pawl in pawl min a phuhkhiak uh toh kiton in, Manipur Tribals Forum, Delhi (MTFD) panlakna hu-ngaih kawm a Tribal Martyr-te luang November 30, 2015 a vui dia thupukna omsa pen enthak ding leh vui nailou phot dia ngetna in JAC Against Anti-Tribal Bill a Chief Convenor/Secretary, Convenor, Innpite leh tribe tuamtuam a makaite banah Joint Philanthropic Organisation Convenor kiang ah ‘memorandum’ pia uhi.

 

Hiai mun a kipan Tedim Road zui in Tuibuang a KIC Office a Innpite makaih a joint meeting om a, Tribal Martyr-te luang November 30 a vuilou dia ngetna in memorandum va pia ua, huai a pan hong paitou in JAC Information Centre, KKL Complex, IB Road ah JAC Chief Convenor H. Mangchinkhup kiang ah memorandum pe nawn uhi.

 

Tuni a All Tribal Womens’ Union Ccpur in memorandum a piakna ah convenor Nianglian, Niangkhanching, Ningsial, Ngaikhanvung leh Douching in suaikai uhi.

 

 


Machine zang in Street Light khuam phut
LAMKA, Nov 24: High Mash Global Electrification Company in Lamka Police Station kong Traffic point ah Street Light ding metre 20 vel a sang machine zang in tuni sunnung dak 4:00 in electric post phut uhi. Hiai electric post ah zingchiang in Company in Street Light thuah ding ua, bulb 16 bulh ding in hiai mun a kipan km khat leh a kim sung tanvak zou ding hi’n Company lam a pan thutut kingah hi. Hiai Street light in Lamka khopi sung etlawmsak mahmah ding a gen ahi.

 


Joint Consultative Meeting ah sivui ding thu PTC-GHQ khut ah koih
LAMKA, Nov 24: Tuni, November, 24, 2015 sunma dak 11 in Paite Tribe Council (PTC) General Headquarters in Tribal Martyr 9-te luang November 30, 2015 a vuikhiak dia thupukna bawl a om toh kisai enthak ding leh a hun suan dia ngetna a bawl toh kisai in Kuki Innpi, Ccpur (KIC) Office, Tuibuang ah Innpite, tribe councils, philantrophic organisation leh student organisation-te’n ‘Joint Consultative Meeting’ nei uhi. Hiai hun ah tribal sung a tribe khat in thupukna bawl a omsa toh kisai a haksatna a tuah tungtang poisakthu taklang kawm in haksatak a ‘tribal unity’ ngah a om kepbit a hatsak semnaa dia panlak deihhuai a sakthu uh taklang hi.

 

Hiai hun ah tulel dinmun enkawm in hiai bang in thupukna bawl uhi. Huaite ahihleh khatna ah, PTC/CWC in ngetna a bawl tungtang ah Joint Consultative Meeting in nguntak a, a genkhawmnung un, Tribal Martyrs 9-te luang vui hun ding toh kisai in PTC-GHQ leh a constituents unit-te tung ah mohpuakna pia ua, Salphate luang vui ding toh kisai hun leh ni ding a thupukna om bangbang PTC-GHQ in Innpite a theihsak ding in thupuk uhi.

 

Nihna ah, Innpite, JAC, JPO leh Saptuam makaite’n November 14 & 15, 2015 a Salphate luang November 30, 2015 a vuikhiak ding a thupukna om toh kisai a mipi leh pawl khenkhat in thupukna deihlou a pan a lak uh poisakthu taklang uhi.

 

Thumna ah, Manipur Tribal Forum, Delhi panlakna kipahpih leh phat-huai sakthu taklang kawm in, MTFD in amau deihna bang a thupukna omsa enthak dia ngetna a bawl uh poisakthu taklang ua, tunung a thil bangkim a Innpi/tribe council leh a kisaipih student organisation-te thuzak masa ding in ngen uhi.

 

Lina ah, tuni a Joint Meeting in mipite hun sawttak haksatna a thuak uh toh kisai ngaihtuah kawm in, Salphate luang vuikhiak ding theihchiang ahihlouh toh kiton in November 30, 2015 nung a pan hindan ngeina sutzopna ding a panla dia JAC nget ding leng thupuk uhi.

 

Tuni a ‘Joint Consultative Meeting’ a thupukna ah President, Hmar Inpui; President, KIC; President, VPC; President, UZO; President, STC; Consultant, MPC, President, TCU; President MTC leh President GTC in suaikai uhi.

 


‘Cold Storage’ hong tung pahta ding: ADCC Chairman
Lamka, Nov 24: Lamka Damdawi Inn, Morgue a zat ding ‘Cold Storage’ set nih, Guwahati a Blue Star Company a order a om enkhe dia November 21, 2015 a kuan Langkhanpau Guite, Chairman, ADC Churachandpur in Blue Star Company munpi, Guwahati vapha in tuni sunma dak 10:30 in JPO heutute kiang ah report pia hi.

 

Aman a genna ah, ‘Cold Storage’ nih Lamka a hong tunna ding in ‘Road Clearance’ poimoh a, State Government apan a fel zok theihlouh ziak a Company in hon paw theinailou ahihdan gen a, State Government apan Road Clearance ni 20 behlapsak a, Company kiang a, a lehkha va tun ahihdan gen hi.

 

Tua toh kiton in, Blue Star Company inleng Road Clearance omta ahihna ah, ‘packing’ kipan ngal ding uh ahihdan ana theisak in, ‘Cold Storage’ hon khakkhiakna ding ua ‘road clearance issue’ masak a ompen a ngiat ziak ua, tuni mah a huai lehkha pe dia Guwahati manoh a zinsuk nawn ding ahihdan leh Lamka puaktun hipahta ding hi’n leng gen hi.

 

Huailou in, Salphate vuina ding toh kisai a ADC Churachandpur in Bungmual a ADC Complex piak himaheh michih kituahna leh lungtunna ahihkeileh leng kituahna ding ahihnakleh mun khatpeuh a vui ding niallou ahihdan amah mimal ngaihdan gen hi.

 


Vaiphei Innsung Maicham Committee in Salphate gal
Lamka, Nov 24: Vaiphei namsung a saptuam tuamtuam kipawlkhawmna (Inter Denomination) Vaiphei Innsung Maicham Committee (VIMC) in tuni, November 24, 2015 sunma dak 10:00 in Lamka Damdawi Inn a JPO Information Centre ah Salphate gal uhi. Hiai hun ah VIMC a pan thugenna om a, Vaiphei Innsung Maicham Committee kichi mun tuamtuam a om, saptuam tuamtuam kipawlkhawmna ahihna ah, kimuhkhawm haksa mahmah ahihna ah, tuni a kimuh khawmna a neihtheih uh toh kiton a Salphate galna neithei uh ahihdan gen uhi.

 

Tunitan a JPO panlakna thupisa uh ahihdan gen in Damzakhuol, Treasurer, VIMC in salphate galna ding in JPO heutute khut ah galna thilpiak pia in, Kaikapthang in thumna nei in hun zangzou uhi. Vaiphei Innsung Maicham Committee in Salphate galna dia JPO heutute kiang a Rs. 2,000/- a piak zoh un, sigal a lenkhawmna mun leh JAC Camp leng pha uhi.

 


Malaysia a jail tang mi 4 tuni’n Lamka hongtung
LAMKA, Nov 24: Malaysia a restaurant a va sem pasal mi 4 - Chinminlun (25) s/o Douchinkhup of Zenhang Lamka; Mangkhansuan (19) s/o Thongkhanthang of Muallum; T. Kaisuanlian(27) s/o Kamkhanlam of Tonzang leh Thongkholun (25) s/o Jangkholet of Teisaljang, tuni, November 24 in Kolkatta a pan lenna a hong pai in sunma dak 10:30 in Imphal Airport hongtung uhi. Amaute ahihleh Lamka a pan in Heinei makaih in Zo Peoples for Zou Human Rights & Empowerment team leh innsung mite’n vadawn ua, sunnung dak 3:30 a Lamka hongtung in K. Zou tenna inn Zouveng ah vaidawnna programme saulou zang in huai zoh in amau tenna chiat ah pai uhi.

 

Malaysia a suangkultang tuni a Lamka hongtung mi 4-te a ding in Rev. Khamchinkhai, Pastor, ZPCS in thumsak a, hiai hun zatna Singngat MDC Hausuanthang leh T. Gouzalal, vice president, UZO inleng uap uap uhi.

 

Tuni a Lamka hongtungte ahihleh nektak zonna toh kisai in India a pan passport neilou in Malayasia a restaurant ah vasem ua, kum khat val bang a sepnung un innlam hong pai dia kisalai July 9, 2015 in mat in om ua, Malayasia ah jail a khum in om uhi.

 

Hiai tungtang ah Delhi a om Khamchinpau @ K. Zou in Malaysia a omte khahkhiak ahihtheihna ding ua panla in Indian Ambassador tungtawn in ngetna nasatak bawl a, tua dungzui in Nov. 22, 2015 zingkal in jail a pan pawtsak in om uhi. Amaute ahihleh jail a pan khahkhiak ahihnu mah un Malayasia a pan in Kolkatta hongtung ua, tuni’n Kolkatta a pan Imphal tawn in Lamka hongtung uhi.

 


By-election results:
Manipur ah BJP vualzou; Miz ah Congress vualzou, MP ah BJP lohsam
IMPHAL, Nov 24: Mizoram state a Aizawl North III seat ading by-elections om ah Congress candidate Lal Thanzara in vualzohna ngah hi. Lal Thanzara in vote 6,175 mu a, a zom ah Vanlalvena in vote 2,790 mu a, National Democratic Alliance (NDA) nominee Lalduhawma in vote 1,887 mu a, NOTA ah vote 64 khiak in om hi.

 

Manipur Assembly seat 60 omna a member khat leng neilou Bharatiya Janata Party(BJP) Manipur Assembly constituency nih Thangmeiband leh Thongju assembly constituency a by-election ah vaihawmna len congress party candidate-te zou in telching in om uhi.

 

All India Trinamool Congress (AITC) MLA Kh Joykishan in Thangmeiband assembly constituency ah BJP ticket in tuh a, aman vote 12,104 mu in telching hi a, a kikhinpih Indian national congress candidate Jyotin Waikhom in vote 10,197 mu a, vote 1907 in kikhai uhi. Thongju assembly constituency ah BJP ticket a tuh Th Biswajit in vote 14,606 mu in telching hi a, a khinpih Indian national congress candidate Bijoy Koijam in vote 11,393 mu a, vote 3213 in kikhai uhi. Manipur Democratic People’s Front ticket in Dr Gurumayum Tonsana in assembly constituency nih ah tuh tuak a, Thangmeiband ah vote 55 mu in Thongju constituency ah vote 54 mu hi.

 

Telching a om BJP candidate Kh Joykishan leh Th Biswajit in mipite deihsakna a tanna tung uah kipahthu gen in a constituency sung khantouhna lam ngai poimoh masa ding uh ahihdan gen uhi.

 

Thangmeiband leh Thongju assembly constituency a All India Trinamool Congress (AITC) MLA Kh Joykishan of Thangmeiband leh Th Biswajit of Thongju ahihleh Assembly Speaker’s Tribunal in ‘anti-defection law’ dungzui in May 28, 2015 in ‘disqualification order’ ana suah a, tua ziak in by-election neih in om hi.

 

Manipur Assembly election nanung pen ah Congress in seat 42 luah a, huai nung in Manipur State Congress Party MLA 5 in INC zom ua, huainung in Thoubal district sung Hiyanglam seat a by-election om ah Congress in vualzohna ngahnawn hi. Assembly seat 60 omlak ah INC in members 48 nei hi. Member dange ahihleh AITC MLAs 4, NCP 1, Lok Jana Sakhti party MLA 1 leh Naga People’s Front MLA 4 hi ua, himahleh NPF MLA 4-te’n ahihleh kitawpna ana peta uhi.

 

M e g h a l a y a ’ s Nongstoin by-election ah Hill State People’s Democratic Party candidate Diosstarness Jyndiang in vualzohna ngah hi. Madhya Pradesh a Jhabua-Ratlam seat ading a Lok Sabha by-election result suak ah BJP in seat khahsuah a, himahleh Congress candidate state unit president lui Kantilal Bhuria in vote 80,000 val a sangzaw mu in vualzohna ngah hi. Tu in MP ah Congress in Lok Sabha member 45 neita hi. Jhabua-Ratlam seat a BJP in vualzohna a ngahna ding in Chief Minister Shivraj Singh Chouhan in ni 6 sung in rally 27 nei mahle khahsuah veve hi. Avek in, state 4 ah assembly seat 5 ah leng vote khiak in om hi. June kha a Bharatiya Janata Party (BJP) makai leh Jhabhua MP Dilip Singh Bhuria in sihna a tuah ziak in a loutheilou in by-election neih kul a, BJP in Petlawad a kipan sitting MLA leh Bhuria tanu Nirmala Bhuria guang hi. Kum 2014 in BJP in a masapen ding in Lok Sabha seat ah vualzohna ngah a, state sung a seat 29 omna lak a sea 27 luah uhi. Madhya Pradesh a Dewas assembly ah leng BJP’s Gayatri Raje Puar in a kikanpih Congress’s Jai Prakash Shastri zoukhia hi. Hiai seat ahihleh BJP MLA Tukojirao Pawar in sihna a tuah ziak in hukdimlouh in awng hi.

 

Telangana a Warangal LS bypoll ah ruling Telangana Rashtra Samithin in kum 2014 a election result toh kibang ngahkik nawn a, TRS candidate Pasunuri Dayakar in a kikanpih BJP leh Congress candidate-te vote lakh 2 phial a tamzaw a kheng in vualzohna ngah hi. (Manipur Update News)

 


Chief Minister Ibobi in tuni’n IT Park enkhia
Imphal, Nov-24: Manipur Chief Minister O.Ibobi Singh in tuni’n Mantipukhri a Information Technology Park vapha in Park a facility tuamtuam omte etkhiakna nei a, huai Park hoihtak a paizom leh IT professional 130 vel in tawlngalou a sem uh ahihdan a muh in lungkim mahmah hi’n thusuak in taklang hi.

 

Square feet 20,000 tutphah a kibawl huai IT Park ahihleh Chief Minister O.Ibobi Singh in apaisa July 4, 2015 a, a honkhiak hi a, IT vendor 4 omte ah professional 130 in huai hun apan sem tou ahi uhi. Hongtungding March 2016 vel apan IT vendor dang behlap hiding a, huaihun chiang in professional 300 – 350 kikal vel in sem ding uhi. Chief Minister in tuni a huaimun a vehna hun ah MSTC shed lui pen IT Park sung leh a kim-kiang khawng a Hardware manufacturing leh assembling unit a dia zang ding in theisak hi. CM in huaimun a nutsiat ding kuan in professional-te kiang ah society leh state sung a IT nasepna munpi hithei ding a panla ding leh North east bial a dia naihtham ding khop a panla ding in theisak a, huai ding a Manipur government in hihtheihna teng a panpih ding hi’n theisak hi.

 


Nagaland state ah Chopper tuahsia, mi 6 liam
Kohima, Nov-24: Nagaland state a Phek district sung Meluri helipad ah tuzing lam in Dimapur apan huaimun boh Chopper khat leitual a boh phet in kital in kisikpuk a, a kitatsiat ziakin a sung a tuang mi 6-te liam uh hi’n official thusuak in taklang hi.

 

Chopper a tuangte ahihleh Joint Secretary makaih state National Disaster Management Authority official-te leh pilot 2 hi uh a, Meluri area a Zhipu khokiang a tuma zek a menchim nasatak enchian ding a Dimapur apan huai Chopper a tuang Meluri helipad a tuahsia hi’n Phek district Deputy Commissioner Muruho Chotso in gen hi. Chopper tuahsiatna ziak ahihleh meipi tam ziak a bangmahtan muh theihlouh a om ziak hi’n Muruho Chotso in gen hi. Aliamte kintak a Meluri health centre a etkol zoh in Kohima leh Dimapur a etkol ding in Pawan Hans Helicopter dang a puakkhiak a om in, pilot leh co-pilot leng amau headquarters a etkol din puak in om uh chi’n gen hi.

 


NPCC in Guv Acharya statement mohpaih
Kohima, Nov-24: Assam leh Nagaland state Governor lenkhawm PB Acharya in zanzek a ‘‘Hindustan is for Hindus’ chih statement a suah toh kisai Nagaland Pradesh Congress Committee (NPCC) in mohpaihthu puang in a statement khekkik ding in ngen uhi.

 

NPCC in a thusuahna ah Assam leh Nagaland Governor dinmun a letkhawmna apan awngsut a, a lunglutna sahkhua lam buaipih thei dia hun piak dia hoih a sakthu uh taklang uhi. Governor dia appointment piak ahihna ziak gen dawk kha hidan a taklang in Christian-te tenna Nagaland state ah hichibang thu in buaina piangsak thei hi’n leng taklang uhi. State 2 a Constitutional Head ahih na ah thumal zat leh genkhiak ah tuasang a pilvan zawk hoih ding hi’n leng gen uhi. Indian Constitution a secular spirit a paitangpih theih keileh kintak a khehkhiak poi moh hizaw dan inleng taklang uhi.

 


Nisin Thuhiltu suaklou ding
LAMKA, Nov 24: Lamka pansan niteng tanchinbu ‘Nisin Thuhiltu’ print-na computer leh printer lam a ‘technical problem’ om ziak in suaktheilou a, subscriber-te’n ana theisiam ding in ngen uhi.

 


Tribal Martyr-te galna di’n Rs 17,000/- pe khawm
Lamka Nov 24: Lamka Damdawi Inn a JPO Information Centre ah tuni sunnung dak 4:00 tan in mimal leh pawl tuamtuam in Salphate galna ding in Rs. 17,100/- pe khawm uhi. Huaite ahihleh Chassad Village, Ukhrul District in Rs.15,000/-; P. Zatun Zou, Gangpimual in Rs. 100/- leh Vaiphei Insung Maicham Committee in Rs. 2,000/- pia uhi. Huailou in, zingchiang November 25, 2015 in Lamka Damdawi Inn a Salphate galna mun ah Zou Youth Organization (ZYO) in singpi awmna toh kisai mohpuakna la ding uhi.

 


NEWS LAKTOM

Kho 4 in Salphate galna di’n Rs 57,000/- pia
Zan, November 23, 2015 in JAC Finance Sub-Committee khut ah kho 4 in Salphate galna ding in Rs 57,000/- pia uhi. Huaite ahihleh Lamka Block sung a pan Thingkangphai in Rs. 35,950/-; Henglep Block sung a pan Hengkom in Rs. 1,000/-; Zomi Innkuan (UK) in Rs. 5,050/-; Tuibuang Block sung a pan Kangvai in Rs. 13,000/- leh Thanlon Block sung a pan Gamhui in Rs 2,000/- pia uhi.

 


Electric Deptt in ‘surprised check’ bawl
Electric Department/Ccpur in New Lamka area ah pre-paid system tamzaw bulhta ua, huai kawmkawm in pre-paid system zang consumer-te lak a ‘metre bypass’ bawl om hiam chih a guk a enkai in ‘surprised check’ bawl zel uhi. Hiai bang a ‘surpised check’ a bawlna uah, zan in Thuangkhopau Samte of Damkam Bazar leh Houminthang of LV Lane College Veng in, amaute dan dungzui a liausak uh hi’n Manager, Distribution Subdivision MSPDCL a pan thutut kingah hi.

 


JPO in a zatlai Syntex 1 gukmang in om
JPO a pan thutut kingahdan in, a paisa November 21, 2015 zan in Lamka Damdawi Inn huangsung a kikoih Syntex khat guta pawlkhat in gumang uhi. Syntex ahihleh JPO in Morgue kong a Salphate gal a om lengkhawmte a dia singpi awmte zat dia Syntex 1000 litres a koih ahi. Hiai Syntex ahihleh JPO in a khelhthoh uh hi a, hichibang a gamtangte mohpaih mahmah uh ahihdan a gen ban uah, maban a hichibang a gamtang om a theihkhiak ahihleh a tung ua, a kituahpih bang action lak hidi’n gen uhi. Huailou in, Lamka Damdawi Inn huangsung mah a om Medical Canteen leng guta pawlkhat in hun paisa in a baang kalsia in ana luhzel ua, huai ah Canteen vanzat, everyday (milk powder) 1 kg a kithunte tamkhop leh vanzat poimoh khenkhat gukhia uhi.

 


REGIONAL | NATIONAL | INTERNATIONAL

Mizoram ah heroin toh numei 1 mat in om
Aizawl, Nov-24: Mizoram police nuai a Anti Narcotic Squad in tuni’n Aizawl khopi sung ah pasal 1 apan heroin No. 4 gram 41 mukhia in a neitu toh mankhawm uh a, huai heroin no. 4 ahihleh local market a zuakkhiak hileh Rs. 1.2 lakhs vel man phading hi’n Mizoram Excise & Narcotics department thupuangtu in taklang hi.

 

Police thusuak dan in, Heroin gram 41 toh matkhiak a om ahihleh Thanhmingliani (45) tulel a Champhai district a Khawzawl khua a teng hi a, Narcotic Drugs and Psychotropic Substances Act, 1985 nuai ah case chiamteh uhi. Police in a thudotna tungtawn in huai heroin No. 4 pen Myanmar apan Mizoram a Champhai district tawn a puaklut hidan in theikhia uhi.

 


Helpawlte gamtatna chimtak in mipi kiphin
Shillong, Nov-24: Meghalaya state a Garo Hills district sung Kharkutta khua ah tuni’n Achik National Liberation Army (ANLA) telin helpawlte gamtatna tuamtuamte chimtak leh deihlou in mipi 15,000 vel kipunkhawm in rally nei uh a, huai ah ANLA lim bawl in mei a hal uh hi’n thusuak in taklang hi.

 

Mipi paikhawmte’n tunaizek a Achik National Liberation Army (ANLA) helte’n Kharkutta khokiang a PMGSY road a nasepna khat a semlai labourer Shahujdin Sheikh (35) leh Soleman Ali (42) a pimang uh leh district a tuma zek a kipimang na thiltungte lungkim lou leh chimtak ziak a kiphinna pan ahi uhi. Mi pimangtute’n ni 2 sung a khahkhe ding leh hunchiam sung a khahkhiak a ihkei leh mipi’n helte matkhiakna ding a operation patsawm uh ahihdan taklang uhi. Labour 2-te pimang na a kigolh ANLA helte lim bawl in mei in hal uh a, district sung a helte’n a vangkim a mipimang a chin uh thangpaih latsakna hi’n leng taklang uhi. Tuni a rally ahihleh North Garo Hills sung a NGO tuamtuam- GSU, FKJGP, ADE, FAF, AAYF leh a dangdang makaihna nuai a neih a om ahi hi. Tumazek inleng Garo Hills bial mipite’n Meghalaya state a diakin Garo Hills bial a Armed Forces (Special Powers) Act (AFSPA) koih ding government kiang a phutna in rally thupitak nei uhi.

 


Ni 14 sung judicial custody ah ULFA makai Anup Chetia khum hiding
GUWAHATI, Nov 24: ULFA makai Golap Baruah alias Anup Chetia in ni 5 sung CBI custody a hun a zatkhit toh kiton in, zan Seppatni in special judicial magistrate CBI, Assam in ni 14 sung judicial custody tang ding in thutankhum nawn hi.

 

Chetia’s lawyer Bijon Mahajan in Court huang a thuthaksaite kiang a, a gendan in, judicial custody tang ding in ULFA makai sawl in om a, December 5 in court ah ding nawn ding chi’n gen hi. Tulel in Guwahati Central Jail ah khum in om hi. Golaghat (Assam) a kithahna thiltung toh kisai in CBI in RC (Regular Case) No. 4(S)/1988 pansan in kum 48 a upa Chetia mankhia hi. November 18 in SJM CBI court ah dinsak in om a, ni 5 sung CBI custody tang ding in thutan in om hi.(TNN)

 


CoPoTR in govt office-te surprise visit
Chandel, Nov-24: Committee on Protection of Tribals Rights (CoPoTR), Chandel District in Chandel district sung a government office tuamtuamte hoihtak a kai hina uh hiam chih theihna ding in ni 4 paisa apan surprise visit bawl in tuni’n leng District HQ sung a office khenkhat vapha uh hi’n thusuak in taklang hi. CoPoTR President Kohring Victor leh Advisor Ts. Beton Anal in makai in member dangte’n zui uh a, tuni’n Monsang Pantha mun a Autonomous District Council (ADC) quarters kibawlthak nasepna pailel leng va enkhia uhi. Huai quarters kibawl lel etna a neih kawm in Council office leng pha uh a, Council office a ministerial staff bangzahhiam kai mahle uh Chief Executive Officer (CEO) ahihleh kailou hi’n taklang uhi.

 

CoPoTR team in Mini Secretariat complex leh huai complex sung a office khenkhat a staff kaizah enkhia uh a, hundang a surprise neihlai toh the din tutung visit ah office staff leh departmental Head te kaihoih mahmah uh hi’n gen hi. Tuabang kalah, Statistics, IFCD, Minor Irrigation, PWD, Horticulture leh Adult Education department office-te chabi a kikalh poisakthu gen a, hiaibang visit a bawlna ziak uh mimal kuamah tupna hilou in, mipi vantang kuapeuh khualna a govt nasemte office a kaihoih chiat ding uh deihna ahihdan taklang hi.

 


Mexico ah Car tailai in Bus khawl phu, mi 24 si
Mexico City, Nov-24: Mexico gamsung Gulf coast lak a higway ah Poza Rica a Veracruz khopi apan Puebla zuan passenger Bus khat leh Car hattak a tailai kiphutuah uh a, huai ah bus a tuangte mi 22 si in Car sunbg a tuang mi 2 a kigawm in mi 24 si uh chi’n Veracruz thuneitute’n gen uhi.

 

Veracruz a Civil defence official thusuak danin, huai tuahsia ahihleh Pathianni nitak nung hi a, Car in passenger bus apan kumkhe dia mi tamtak a kisak laitak a a kongkhak lak naktak a phukha hi’n gen uhi. Car a hattai luat ziakin bus sung a tuang mi 10 vel window ah lengkhe hial in gen ua, mi 10 vel silou lel a liam in gim mahmah uh hi’n huai thusuak in gen hi. Bus a tuang passenger a tamzawte student hun-awl zang a zinkhia kiknawn lam hi’n leng kigen a, Car in a phutkhak zoh toh kiton Bus pen a kuanzak ziak a si tam hi’n thusuak in taklang hi.

 

Tuabang kalah, zan sunnung in Mexico gamsung simlam Pacific tuipiau lak a Acapulco leh a kim-kiang ah zinling tehna 5.5 magnitude vel a hat om a, hileleng zinling ziak a si-le-liam leh inn-le-lou kisia ahihleh report omlou hidan in US Geological Survey (USGS) thusuak in taklang hi.Zinling kipatna munpi ahihleh Mexico khopi apan malsuahlam tanggam lak, 260 kilometres vel a gamla hi’n Mexico City Mayor Miguel Angel Mancera in gen hi.

 


SC in Rahul citizenship thu hearing kinhuai salou
New Delhi, Nov-24: Congress Vice President Rahul Gandhi in United Kingdom (UK) a company law authority-te kiang a British national dan a declaration a bawl tungtang Supreme Court (SC) ah hek a om nung in SC in huaithu kintak a hearing neih poimohlou ahihdan taklang hi. Huai hekna ahihleh advocate 1 in a bawl hi a, Rahul Gandhi tung ah cheating & forgery toh kisai a criminal case chiamteh ding in ngen hi. Hiai ngetna ahihleh advocate in India President leh Central Bureau of Investigation (CBI) kiang ah leng pelut hi.

 

BJP makai Subramanian Swamy in apaisa kum 2003 a Rahul Gandhi in UK company law authority kiang a British national dan a declaration bawl a zuau a thilhih chih a ngohlai in Rahul in naktak a soisel in investigation a om leh maituah dia mansa gige ahihdan gen hi. A thilhih diklouhna om a, matkhiak ahihleh jail a lut ding leng man ahihdan taklang ngeita hi.

 


Govt. in Nov. 26 kichi Constitution Day in puang; Parliament Complex detvak hiding
NEW DELHI, Nov 24: Government in November 26n kichi Constitution Day dan a, a puan toh kiton in, hiai ni Parliament “special” session khat ah Parliament member-te’n Constitution bawlkhetute lak a tel B R Ambedkar tung ah zahna sangtak piakna ding program tel in government in Ningani chiang a B R Ambedkar tung a zahna piakna ding panlakna nasepna buaipihsan lel hi.

 

B R Ambedkar zahna piakna dinga panlakna nasepna khenkhat omte lak ah “Ministry of Parliamentary Affairs in Constitution Day zat hunsung teng Parliament House Complex vak chituam nalhtak toh taanvek den ding in thupuk a, hiai a ding toh kisai in Parliament special session khat sam ding inleng thupuk hi. Government thusuak in a taklatdan in, Governent in official-te kiang ah November 26 a ‘Preamble of the Constitution’ simkhe chiat ding in theisak hi. January 26, 1950 a Constitution zatkhiak a hihma in, November 26, 1949 in Constitution phuhkhiak in om hi. Constitution Day program zatna toh kisai gamsung pumpi a kum khat sung daih ding Dalit icon Ambedkar pianchampha kum 125 chinna lopna toh leng kizawitawn ngal ding hi. Hiai toh kisai Drafting Committee of Constituent Assembly a Chairman khat a hihna toh Indian Constitution bawlkhiakna a khuam poimohtak lentu Ambedkar tung a zahna piakna leng hingal ding chih ahi. Maban a Dr Ambedkar zahtak etsakna a ministries program tamtak kivualtou omte lak ah HRD, Home, External Affairs-te leng telkha uhi. November 26 a mock Parliament sessions leh Constitution toh kisai debate sai ding in college teng theihsak in om uhi. Hiai ni mah a Constitution in school assembly neihna hun a student-te Preamble to the Constitution simkhe sak chiat ding inleng school tengteng theihsak in om uhi. November 26 in class period khat sung guest speaker a hihkeileh teacher-te zang a ‘Constitution of India’ thutun omte genkhawmna hun a zang chiat ding inleng school chih theihsak in om ua, Constitution toh kisai thupi a nei a Essay competitions leh quiz chihte sai chiat ding inleng theihsak in om uhi. Social Justice and Empowerment Ministry inleng state leh UT teng kiang ah November 26(Constitution Day) lawm chiat ding in theisak hi.

 


Kitenna nung ni 5 chinni’n lenna tuahsia ah si
Jammu, Nov-24: Arjun Singh leh Vandana Singh apaisa November 18, 2015 a kitenna aneih nung uh zan in Jammu & Kashmir state sung Katra a Vaishno Devi hoh ding a helicopter a tuanna uah accident in kia uh a, a nupa ua si uh hi’n thusuak in taklang hi. J&K state sung Sanjichat apan Katra zuan a zan a leng Private helicopter sung a tuang mi 6 leh pilot kigawm mi 7 a tuanna helicopter uh kia in leilak a tuk phet in kuangzak in a vek un si uh hi’n thusuak in taklang hi.

 

Thusuakdan in, helicopter a tuangte ahihleh India a dia pilgrim centre poimoh leh lun mahmah a kigen Vaishno Devi mun veh dia kuan hi ua, tuimei tamluat ziak a tuahsia a kia hidia a kigen banah a hektu leng huai company adia Chief pilot Sumita Vijayan hi’n taklang hi. Vaishno Devi mun ah niteng in India gamsung mi kia leng sang a sim hoh gige uh a, Navratras hun zatna ah leng India mipi maktaduai a sim in Kawlbuk ah Pathian be di’n J&K state ah gari a lut in si-le-liam tamtak om uhi. Hiai helicopter tuahsiat ma zan zinglam in lenna tamtak in tuimei tamluat ziakin Jammu airport boh theilou a lengkik hi’n police thusuak in taklang hi.

 


Arunachal a Tata Sumo accident ah mi 3 si
Itanagar, Nov-24: Arunachal Pradesh state sung Aalo Town kiang ah passenger 13 pua a tailai Tata Sumo guam kuak thuktak a taikhe kha in huai ah a sung a tuang mi 13-te a vek un naktak a liam uh hi’n thusuak in taklang hi.

 

Thiltun hun ahihleh zan nitaklam hi a, Internet leh whatsapp network banah mobile phone network ginatlouh ziakin tuahsia tun lam kithuzaksak pah theih hilou in a liamte’n gen uhi. District administration leh police in thiltung a theihphet in tuahsia tunna mun delh in hotkhiakna nasep semzui in a liamte damdawi inn naipen ah pawtung uhi. Damdawi inn puaktung vek ahihnung un numei 1 leh pasal 2 in a liamna thuak zoulou in si uh a, sihna tuak pasal 2 te lak a khat driver hi’n gen uhi. Arunachal state ahihleh tanggam ahih ziakin gari tuahsia om mun mahmah hi’n thusuak in taklang hi.

 


Ahmedabad ah SEC in voter lakh 1 val paikhia: Gujarat Congress
AHMEDABAD, Nov 24: Zan Seppatni a municipal corporations 6 a elections neih a hih ding kuan a State Election Commission (SEC) in zan khat thu a Ahmedabad a voter lakh 1 valte min a paihkhiaksak ziak in, amaute’n vote khiak thuneihna a neihte uh zangkhetheilou uh chi’n Gujarat Congress in ngawh hi. Himahleh SEC in Congress a kipan ngawhna omte nial kawm in, voter-te min khat leng paihkhiak a omlou hi’n taklang hi.

 

Congress in ngawhna thu a bawl toh kisai in tuni’n zan a Ahmedabad vote khiakzoh nung leh vote khiakma a voter phazah diktak omna SEC official document 2 suahkhia uhi. November 20 a SEC in official thusuah a bawl dungzui in, Ahmedabad in voter lakh 39.83 nei chi’n Gujarat Congress thupuangtu Manish Doshi in gen hi. Himahleh zan Seppatni a SEC in vote khiakzoh a Ahmedabad a vote khia a pai voter phazah 38.79 lakh om hidan in suahkhia a, hiai in zan a polls neihma deuh a voter final list a kipan voter lakh 1 val paikhiak a om a uh a hihdan chiangtak in langsak chi’n Mr Doshi in gen hi. Congress thusuak in a taklatzelna ah, SEC kichi guptuam neilou independent body khatdan a nasem ding chih himahleh ruling BJP gum in election a BJP panlakna nasepna ah naktak in kigolh uh hi’n leng taklang uhi. Hiai thu tangkoupih ding in state congress party president Bharatsinh Solanki makaih Congress makai palaite’n Gandhinagar ah SEC official-te kimuhpih ding uhi.(PTI)

 


LS Speaker in member teng laithon khak, Inpi a gamtat kilawm langsak di’n ngen
NEW DELHI, Nov 24: November 26 a kipan December 23 tan daih ding Parliament Winter Session kipat hun ding a naih tak toh kiton in, Lok Sabha Speaker Sumitra Mahajan in gelhthoh in Inpi member tengteng kiang ah laithon khak a, thubuai tuamtuamte ziak a ngaihdan kibatlouhna thu a huihnung te’n hun tamtak a gamtat kilawmlou tunsek ahihdan theikawm in Inpi a member –te a kipan ‘pompih thamching gamtat kilawm’ lam en ahih thu theisak hi.

 

Lok Sabha Speaker Sumitra Mahajan Kuapeuh in kong bangkim ah, a mau hinkhua chiat uah gamtat kilawm leh etton tham kampau khat leh khat kal a ngah ding kilam en chiat ua, Speaker khat ka hihna toh, democracy maitaam chia kigen Lok Sabha ah leng hiaibang gamtat leh pau kilawm ngah ding kilam en ka hi chi’n gen hi. Pompih tham gamtat leh kampau kilawm pansan in i omdan uh i lak ding ua, huchi hileh siangthouna tawisang in omtou theizel ding chi’n genbeh hi.

 

Opposition member-te’n thubuai tuamtuam zang a government nawlkhin a sawm ziak ua, November 26 a kipan in Parliament winter session sousang mahmah kha maithei chih thu a thanlaitak in LS Speaker in member-te kiang ah laithon khak hi.

 

Ms Mahajan in a gendan in, pawlpi ngaihdan khatpeuh ah hitaleh democracy khat a ngaihdan kibanglou a om ding thil lamdanglua leng ana hikei a, hiaitan a om theih hun tawklua a, himahleh hun tamzaw tham a kithukimna hi in kithukimlouhna khel a Inpi vaihawmna nawngkaisak thei ding khop a gamtat kilawmlou tak toh huihnung hoihlou om sek chi’n gen hi. Hiai dinmun theikawm a, gamsung pumpi huap a thilbangkim ah a hoihlou lam in eite hon sukha sek ahi chi’n gen hi. Khat leh khat i ki houtuah ding uh ka lungsim ngaihtuahna ah hong suakkhia a, noute kiang a lunggulh ka neihte hon genkhia ka hi chi’n Speaker in a laithon ah taklang hi.

 

Parliament Monsoon session nanungpen a opposition member-te’n thubuai tuamtuam ziak a External Affairs Minister Sushma Swaraj, Rajasthan Chief Minister Vasundhara Raje leh Madhya Pradesh Chief Minister Shivraj Singh Chouhan-te paihkhiak ding a nget tinten ziak un Inpi a government masawnsak theilou in vuaksuaksak uhi. Hichibang buaina kal ah Speaker in Inpi buaisaktu opposition Congress member 44te lak a 25te tung ah ni 5 sung daih ding in suspend puankhum hi.(PTI)

 


PM Modi in Singapore Prez leh PM kimuhpih; point 10 in kilemna suaikai
SINGAPORE, Nov 24: Prime Minister Narendra Modi in tuni a Singapore vehna a neih lel a ni nihna hun ah Singapore PM Lee Hsien Loong leh Singapore President Tony Tan Keng Yam-te kimuhpih hi. PM Modi leh Lee Hsien Loong in meeting a neihna hun uah, India leh Singapore kal a pankhawmna chituamtuam khenkhat a bik in defence, cyber security leh civil aviation lam toh kisai a pankhawmna omte puahphatsemna ding kilemna thukhun leh’strategic partnership’ toh kisai in joint declaration khat tel in point 10 in kilemna suaikai uhi.

 

Tuni Sepnawnni zingkal a PM Modi vaidawnna thupi mahmah khat zatzoh a hih nung sawtlou in PM Modi in Singapore President kimuhpih a, hiai zoh in Singapore PM Hoong toh ‘official talks’ neizom ngal uhi. Kong khenkhat a bik in urban development leh cultural exchange lam a pankhawmna lianzaw sem a om theihna ding in gam nih kal ah kilemna suaikaih in om hi. Ministry of External Affairs thupuangtu Vikas Swarup in India leh Singapore kal a sector tuamtuam a point 10 a kilemna suaikaih zoh a hih in, twiiter tungtawn in, kilemna suaikaih a omte’ kong tamtak a pankhawmna omte mekchip khawm vek ding a hihdan langsak chi’n gen hi. Kilemna suaikaih a omte lak ah defence, cyber security, shipping, culture tung strategic partnership toh kisai in joint declaration khat leh gam nih kal kizopna hatdan laktu ding kilemna thukhun chihte telkha chi’n Mr Swarap in gen hi. Gam nih a PM 2te’n Singapore president (official tenna mun leh office) Rashtrapati Bhawan leh Istana-te lemlakna tuanna commemorative stamps hongkhia uhi.

 

Zan Seppatni nitak in ni nih taam ding in PM Modi Singapore tung in thugenna hun zang hi. Tuzing baihtak in Singapore a mi tallangte toh breakfast meeting khat nei hi. Hiaizoh in Emeritus Senior Minister Goh Chok Tong in PM Modi houlimpih hi. Zan Seppatni a PM Modi in Lecture a piakna hun ah Singapore PM nihna luahtu Mr Tong in India leh Singapore kal kizopna hatzaw bawlkhiakna ding a, nasepkhiak leh lohchinna a neihte toh kisai genkhia hi.(PTI)

 


TN school ah classroom a zu dawn numei student 4 nohkhiak in om
NAMAKKAL, Nov 24: Tamil Nadu a Namakkal district a Tiruchengode mun a government school khat a kai numei naupang student 4 te’n a classroom sung ua zu a dawn ziak un nohkhiak in om uhi. Teacher khat in a gendan in, zan Seppatni nitak in chief educational officer S Gopidoss thupiak dungzui in, Class XI sinlai numei naupang 4te tung ah transfer certificates (TCs) suahkhum in om chi’n gen hi. November 16 in headmistress Krishnaveni in Tamil Nadu a vuah a hahzuk luat ziak in school holiday puang hi. Exam ding om tengteng leng November 21 a neih ding in suan gamlat in om hi. Hiai ni in computer science leh business mathematics group a kipan Class XI student 7 school ah a lawmte uh khat birthday lawm ding in vapai uhi. Amaute’n zu toh kihel soft drink bottle bangzah hiam classroom ah pawlut in dawn uh chi’n teacher in gen hi. Hiai nung sawtlou in class teacher in zukham a khophawklou a om numei 4 mankhia in headmistress theisak ngal a, etchet ding in kintak in government hospital zotpih uhi. Etchetna hun ah student 4te’n zu dawn uh ahihdan mukhia uhi. Hiai thiltung toh kisai suizui ding in headmistress in panel khat bawlkhia a, birthday lawm student 7te thudotna abanban in nei ua, amaute lak a numei 4te’n zu dawn uh a hihdan genkhia uhi. Zan in panel in headmistress khut ah suizuina report bangkim pekhia uhi. Headmistress inleng report toh kisai CEO kiang ah khaksawn ngal a, CEO in numei student 4te tung a TCs suahkhum ding in theisak hi.(TNN)

 


Rusia kidouna lennate’n target 472 vel kapsia
Moscow, Nov-24: Russia kidouna lenna ‘jet fighters te’n ni 2 paisa sung in Aleppo, Damascus, Idlib, Latakia, Hama, Homs, Raqa leh Deir Ezzor province sung ah a kigawm in target 472 vel bukap uh hi’n Russia Defence Ministry thusuak in taklang hi.

 

Ministry thusuak dan in, Russia in tanker trucks 80 vel Islamic State helte hatna bial a kigen Raqa leh a kimkiang ah kapsia uh a, Raqa apan mallam 50 kilometres vel a gamla a Ful reserves omte leng kapsia in Raga khopi simlam a oli storage tank leh oil refinery omte lang hise vek uh hi’n taklang hi. Russia defence ministry in kal paita in Islamic state helte sum-le-pai a kithuahpihna pia oil transporters vanzat fuel trucks 1,000 kapsiat a om hi’n taklang a, Idlib province a maltuam lam a Saraqib leh Hama province a Qalaat al-Madiq khuate ah IS helte naktak a hihbuai a om hi’n leng thusuah a bawlna ah taklang hi. Russia force-te panlakna ziak in koilam peuh aoperation ah masawnna muh theih a om ziakin kipahhuai sakthu Pathianni paita inleng Syria President Assad in television interview a neihna ah puang hi.

 


Sri Lanka in Ocean vengbit dia forum bawl deih
Colombo, Nov-24: Sri Lanka gamsung simlam tuipi zul a khopi Galle ah zan in ‘Galle Dialogue ‘ kichi Annual maritime security conference zatna neih in om hi. Huai hun ah, Sri Lanka Prime Minister Ranil Wickremesinghe in, United Nations(UN) panpihna nuai a Indian Ocean vebitna ding tupna a Forum khat bawlkhiak lunggulh ahihdan leh huai dia panla ahihdan taklang hi.

 

Indian Ocean venbitna kong tuamtuam ah poimoh ahihdan genkawm in, gam khat kia panlak ziak a bitna om lou ahihdan leng gen a, gam hausapente leng hiai lam thil a bit tuanlou uh ahihna ah forum bawlkhiak ding tangkoupih ahi hi. 2-days annual maritiame security meeting ah leitung gam tuamtuam 38 apan palai paikhawm uh a, huai hun a kigen-uang pen ahihleh pankhawmna hidan in thusuak in taklang hi. Indian ocean venbitna ah India in mun poimohtak lenkha ahihna ziakin Indian Navy Chief Admiral RK Dhowan huai hun ah official dang khenkhat toh vatel hi. Hiai conference ahihleh zan a kipan hi a, tuni’n zou ding uhi.

 


South Korea ah US helicopter 1 kia in mi 2 si
Seoul, Nov-24: South Korea gamsung Gangwon province a Wonju lak ah zan in US military helicopter ‘Apache helicopter’ 1 tuahsia in kia a, huai ah a sung a tuang midang om kei mahleh pilot leh crew member dang 1 si uh hi’n military official thusuak in taklang hi.

 

Police leh military thusuak in a taklatdan in, South Korea ah US sepaih 28,500 vel omte leh South Korea in joint defence station ah artillery live-fire drills a neih lai ua tuabang a helicopter tuahsia hi’n gen a, Korea gam 2-te ahihleh 1950- 53 Korean War hunlai apan sungthu sukfel louh khenkhat ziak a kingik leh kidou thei dinmun a om gige hi uhi. Zan a South Korea in North Korea toh gamgi zul a artillery dril a neihna ahihleh tuipi a kigamgitna kiang lak hi a, hundang a leng gamgi thu a kitheihsiam louhna a neihna munpi khat uh leh thauvui-thautang a kikhuttuahna mun khat uh hi’n thusuak in taklang hi.

 


Galtaite huhna di’n sumseng lou in kiteng uh
Toronto, Nov-24: Canada mi tangval Samantha Jackson leh nungak Farzin Yousef in Toronto City hall a sum tamtak bei a kitenna thupitak neih sawm in Hall leng hun sawttak apan booking bawl khin uhi. Hileleng September a Turkey tuipiau a galtai naupang kum 3 mi khat genthei tak a sihna lemlak a muh nung un a sum tampi seng a kitenna ding pen tawpthak uh a, galtaite tung a sum senzawk ding a thupuk in panla thak uh hidan in thusuak in taklang hi.

 

Canada tuailai 2 te ahihleh kumlui nipilai in kimaikha in huai nung sawtlou in kitenna thupitak neih sawm in, amun leh hun bikhiah bawl uhi. Kitenna hall ding leng a khamkholh ban uah a uap ding in mi 130 leng list bawlkhia in chial khin uhi. ABC News palai toh a kihouna ah Jackson in kitenna nei taktak ding dinmun a final stage a tun nung uh September 2015 in galtaite ta naupang Aylan Kurdi(3) sihna thu hong kithang in a lemlak a muhna ua pan banghiam phatuam hihkhiak sawm a sum senglou a kiten ding thupuk uh ahihdan gen hi. Sum tampi seng lou a kitenna a neih zoh un Syrian galtaite huhna ding fund kaikhawm Ryerson University Lifeline Syria Challenge a nih ua volunteer a kipia in tutan in US dollar 17,500 galtaite huhna dia kaikhawmta uh hi’n leng Jackson in gen hi. “ka nupa hinkhua uh a bukim in a nuam huntawk mahmah a, kitenna hiaibang dan a bulpat ding mah a na hidan ei ve chih ka theikhe thak uh” chi’n Jackson in ABC News palai toh a kihouna ah gen hi.

 


Nepal in Constitution amendment bawlthak lemsa
Kathmandu, Nov-24: Nepal Prime Minister K P Oli makaih in tuzing in Nepal gamsung a political party lian omteng in meeting nei uh a, huai ah party tamzaw in Nepal constitution amendment bawl ding lemsa in huai ah Madhesis mite thilphut leng luikhiak a genkhawm ding lemsa uh ahihthu official thusuak in taklang hi.

 

Medheshi mite’ kiphinna nasatak a patnawn uh ni 1 paisa apan police in kiphinna neite betdaih sawm in naktak in panla uh a, kiphinte’n petrol bomb leh teklei zang a Nepal police-te a beih ziak un thau a khahna uah police in kiphinte 4 kaplum kha uh hi’n leng kigen hi.

 

Tuzingsang a meeting hun ah Nepali Congress, CPN-UML, UCPN- Maoist, Rastriya Prajatantra Party-Nepal, Rastriya Prajatantra Party leh Madhesi Janaadhikar Forum- Democratic Constitution amendment bawl ding leh Medheshi te thilphutte table a luikhiak ding lemsa uhi. Medheshi te thilphut tangpite ahihleh Parliament a member hih theihna dia reperentative neih theihna piak a, parliament seat leng population pansan a bawlkhiak ding chihte a point lian deuh ahi hi. Parliament session ahihleh November 26, 2015 a neih ding in bikhiah uhi.