You are here: HomeRSS FeedsThe Lamka Post

The Lamka Post | February 14, 2017

Tuesday, 14 February 2017 15:20

BJP in Govt thak bawl ding: Javadekar

IMPHAL, Feb 13: Manipur a poll phase 2 a dia party te kisaikholhna a sang tawpkhawk sukha in campaign pailel hi. Political party tuamtuam abik in, ruling Congress leh opposition BJP-te’n poll agenda ding in UNC tosawn kha 3 vel chingta economic blockade van­zat in nei uhi.

 

Manipur a ruling Congress leh Centre a BJP makaite national highway dung a UNC to­sawn economic blockade ziak in kimohsa tuah den ua, party tuamtuamte to­sawn candidate-te door to door campaign nei in, vote zong in buaithei mahmah uhi. Imphal leh phaizang bial dangdang a Congress candidate-te a campaign bawl lel Ma­nipur chief minister in Manipur kalh a gamtatna in thuakzohna limit kan­tan khinta chi’n puang hi. Ibobi in kuate hiam toh pangkhawm a thusia gel political makaite naktak in dem hi. Ibobi in agen­zelna ah, mipite’n Ma­nipuri society sung a gu thehlut pawlpi ahihkeileh mipite a haihlouh ziak un, nam tuam bik khat kimuanna zoukhia kisa a, a khengval a Manipur a dinmun omte nampaisak sawm a panla political makaite’n hoi­hlam sang a siatlam manohzaw semsem ding uh ahi chi’n gen hi.

 

Imphal kikulh lel BJP ading a elec­tion campaign nei National BJP makai in, Manipur a hun sawttak economic blockade a omna ziak Congress govern­ment ziak ahi chi’n mohsa mahmah hi. Tuni’n Union human resource minister Prakash Javadekar in, maban 11th Ma­nipur Assembly Election a zat ding“Vote for Change,Vote for BJP” slogan thumal kigelhna gari 20 hongkhia hi. Tuni ni­taklam in Imphal’s Natyapat Chuthek a BJP office media-te theihpihna toh gari 5 khahkhiak in om uhi. Hiai gari-te’n thupuan bawlna a zat ding audio-visual record loud speaker neivek uhi. Audio- visual in state a kum 15 sung vaihawm Congress nuai a mipite’n hak­satna a tuahte uh tangkoupih ding chi’n Javadekar in gen hi. State sung mun tuamtuam ah hiai gari-te taikualsak hiding ua, state sung buaina leh thubuai tuamtuamte genkhe ding uh chi’n gen hi. Video record-te lak ah Congress vaihawm sung an Bishnupur district a mini-secretariat building bawlna a sum zatkhiakna toh kisai a thil diklou omte lak ding hi. Multipurpose dam leh proj­ect tuamtuam zohsianglouhte, ruling government in fake encounter case-te a nelhsiahdan leh Manipur mipite kiang a National Food Security Act nuai a piak a om facility tuamtuam dikloutak a zatkh­iak a omte lakvek ding hi. A paisa kum 15 sung a ruling Congress government in public expenditure etkaina toh kisai a diklou thil tamtak omte leng video re­cord in phoukhe ding hi.

 

Javadekar in agendan in, BJP in Manipur a muanna leh khantouhna ban ah kikhekna a omtheihna ding a, official diktatte akipan thuneihna toh nasepkh­iakna ding in kalbi latou den chi’n gen hi. Union HRD minister in, March elec­tion zoh chiang a, BJP in thuneihna len ding ahi chi a kimuang mahmah kawm a, agendan in, vote sim zoh ni chiang March 12, 2017 in BJP in Manipur ah government thak bawl ding chi’n gen hi.  

 

 

INC candidate in flag hoisting program nei

LAMKA, Feb, 13: Tuni sunma dak 11:00 in Kangvai bazar ah 57-Hen­glep AC a INC candidate T. Manga Vaiphei in election campaign launching leh flag hoisting program nei hi. Hiai hun P. Soilienkhom Vaiphei in makaih a, Lalnghet Hmar, President, DCCI in INC flag kaipalh hi. Decan Jampau of Matejang in thumna in hun pan a, Lalzakhai Vaiphei, Chairman Election Com­mittee in vaidawn thugen hi. Tua zoh in in Rev. S. Khaik­holam, Kangvai bial Pastor in INC candidate T. Manga Vaiphei a ding in thumsak hi. Huai ban ah Chungpa Kom, MDC, Paolal Haokip, MDC, P. Kamkholal Vaiphei, MDC leh Tingkhonei, social worker in thugen uhi.

 

 

Gaikhangam in nomination paper thehlut; Total shutdown in Gaikhangam vaidawn

IMPHAL, Feb 13: March 4 leh 8 a 11th Ma­nipur Legislative Assem­bly election a phase nih ading notification suah­khit ahih tak toh kiton in,candidate-te ading nominations paper piak­lutna in paizomzel hi. February 7 leh 9 in phase nih ading notification suahkhiak in om a, Feb­ruary 14 leh 16 in nomi­nation paper-te piaklut hun beituak ding hi.

 

March 4, 2017 in As­sembly constituency 38 ah poll phase masapen a ding in vote khe ding ua, March 8, 2017 in Assem­bly constituency 22 ah phase nihna ding in vote khe ding uhi. Tutan in candidate ding in mi 60 valte’n nomination paper pelutta uhi.

 

Tuni Seppatni a deputy chief minister in Tamenglong district headquarters a veh ding deihlouh lahna in total shutdown om hi. Mipite’n deputy chief minister lem leng hal uhi. Kum 10 a sim thuneihna len deputy chief minister in district naktak a nelhsiah hidan a gen in, district head­quarters mipite’n district a phak ding deihlouh la­hna in total shutdown puankhum uhi. Shut­down sung in, district headquarter pumpi ah dawr leh sumsinna innte khak in om vek ua, kho­lai ah gari tai muhding omlou hi. Gaikhangam in nomination paper a piak zoh in, a tenna khua leng veh hi. UNC-te tosawn kiphinna tuamtuam eco­nomic blockade leh gov­ernment office-te a staff-te dalna a kiphinna leh a dangdang neih ahihna mun Tamenglong district a Gaikhangam a zin sung in, thiltung deihhuailou zak ding omlou hi. Deputy chief minister leh Home in-charge Gaikhangam in Tamenglong district headquarters a veh ding ziak in security tamtak leh venbitna khauhtak koih in om a, Imphal- Tamenglong dung a kivialleh gari taite naktak in buaisak hi. Naga mip­ite nelhsiah a, deputy chief minister in khualzinna a neih ding ziak leh mun tuamtuam a thugenna a neih ding ziak a venbitna khauhtak koih a omte’n nawngkaina liantak a tut ziak a, total shutdown puan a om hidan in Zeliangrong Baudi Manipur thusuak in taklang hi.

 

Nagate nelhsiah a, hunbi tua­mtuam a Gaikhangam in thugenna a neih ding deihlouh lahna a shutdown puang uh hidan in Baudi in taklang hi. Gaikhangam in Government of India leh NSCN(IM) kal a Frame­work agreement toh kisai “Time Bomb” dan a kampau zatte home minister khat kampau ding a kilawm­lou hidan inleng taklang uhi. Home Minister kampaute’n Naga leh Ma­nipur government kal a political a ki-unauna siatna huaisezaw tunthei ding hidan inleng taklang uhi. Home minis­ter kampau leh nasepte’n Tamenglong Bazar a amah lem hal ding phutluih hidan inleng taklang uhi. Deputy chief minister kiang ah Naga-te kalh a kam­pau nasep chihte tawpsan ding inleng theisak uhi. Mipite’n Manipur govern­ment leh home minister apan in Naga thubuai sukvengna ding a kithuahpi­hna a piak ding uh lam en mahmah uh hidan in Baudi in taklang hi.  

 

 

NPP canididate Phungzathang Tonsing in flag hoisting nei; Hon ngaidam un kingaidam tuah chiatni: P Tonsing

LAMKA, Feb 13: Tuni sunma dak 9:30 in Hebron Veng, New Lamka ah Phungzathang Tonsing in a inn, Salem House honna leh Pathian min a latna programme nei uhi. Hiai hun ah Pas­tor H Jamkhanpau, Local Pastor, EBC Hebron in Pathian min in inn lan a, tua zoh in Phungzathang Tonsing, NPP candidate, 58-Ccpur AC a ding in campaign launching-cum-flag hositing pro­gramme om uhi.

 

Hiai hun V. Chinkhenpau in makaih a, recording Secy in K. Chinkhansuan pang hi. Upa Dr. L.S. Gangte in thumna in hun pan a, Tracy Ngaihching in lasa hi. Hiai hun ah Rev. Khen P. Tombing in Phung­zathang Tonsing, NPP candidate a ding in thum­sak hi.

 

NPP candidate Phungzathang Tonsing in a genna ah, mipite’n tai­sanlou a tuni a mipi hiai zah in a uap uh kipak pet­mah ahihdan gen a, ‘vi­sion’ omlouhna a mipite mangthang uh hi’n gen hi. Huai ban ah Jerusa­lem kulhbaang bang a, a inn puksesa himahleh mipite hatna ziak a tund­ing thak a om nawn ahih­dan gen hi.

 

Political vision ka neih tamtak sep ding a omlai a, huaite semzou in khawlta leng poisalou ka hi chi hi. Ka taksa upat ziak in khawlsawm mah­leng consultative meeting leh worker’s meet neih a omte ah mipi a tamzaw in dinglai in hon chih ziak ua hong kisa nawn ka hi chi hi.

 

Bill 3 tungtang ah Assembly ah discussion omlou in hon passed-pih ua, himahleh Governor in pom ngamlou in In­dia President ah thon a, President in nawlkhin hi’n gen hi. Huai ban ah Bill thak pass mahle uh tunitan bangmah sep­suah omlou a, JCILPS convenor leng police-te’n a matnung un jail tanpha ah khum ua, huainung in a dinmun a kipan kitawp hi’n gen hi.

 

Bill 3 ziak a si Trib­al Martyr-te galna pe ding in cabinet ah nih­vei mahmah ka pawlut a, huainung in lemsak­pihna hon pia uh chi hi. Martyr-te tungtang ah kuaman panla kei mahleh Govt ah kei mi­mal mahmah a pan ana la ka hi chi hi.

 

Bill 3 ziak a Ccpur district a bik in Lamka khopi sung a buaina pen Government in police commando zang in hih­bei sawm a, huainung in army-te thahatna zang in beisak sawm mahleh mip­ite khualna ziak in Chief Minister kiang ah ka tai a, ka bialsung a hiai bang thil omtheilou ding ahi chi in ka gen a, huaiziak a “Sagaisih” houh ka diam Minister a pan paihkhiak in ka om chi hi.

 

Huai ban ah ka inn hihsiat a om ahihleh sethei mah ahi a, poikei, himahleh ka zi han tan­pha hihsiat a om pen na kasa mahmah chi hi.

 

Gamsung buaina ziak a thiltung ding teng tung khinta ahihman in kingaidam tuah chiat ni, mipite’n haksatna i thuak uh Pathian in phal hikha ding ahi chi hi. Huai ban ah Joseph zuaktute kuadang hilou in a sanggamte mah ahi ua, tutung a i buaina uh leng eilak mah ahihziak in kei hihkhelhte leh mip­ite hihkhelhte kingaidam tuah ni chi hi.

 

Hiai hun ah Thang­minlien Kipgen, President, NPP Manipur in NPP flag kaipalh a, Vivek Raj, Gen. Secretary, NPP, Manipur inleng thugenna saulou nei hi.

 

 

BJP candidate TT Haokip in flag hoisting program nei

LAMKA, Feb 13: Tuni sunma dak 11 in 57-Henglep AC a BJP candidate TT Haokip in Chiengkonpang, IB Road a, a inn ah flag hoisting program nei uhi. Hiai hun Samuel T. Haokip in makaih a, Pastor Paojal­hun in thumna in hun pan hi. Nehkholal Haokip in pulakna nei in Vungzalian, President, BJP, Ccpur dis­trict in BJP flag kaipalh a, Paosei Haokip, L. Boljol in vaidawn thugen hi. Huai ban ah Haoneilal Vaiphei, Co-ordinator, Henglep, BJP; M.K. Akhu Kamei, President, BJP Heng­lep Mandal, Seilenmang, MDC, Khousabung in thugen uhi.

 

BJP Candidate TT Haokip in genna ah, tu­tung in Henglep bial mipite deihsakna tang a telching a om ding leh gamsung khantouhna dia mipi toh pangkhawm a nasem ding ahihdan gen hi. Govt in Henglep bial a nelhsiah ziak a mipi toh pangkhawm a panlak po­imoh leh gamsung khan­touhna dia development work a tamthei lam lailut poimoh ahihdan gen hi.

 

Huai ban ah deihsak­tu mipi hiai zah paikhaw­mte tung ah kipahthu gen a, March 4, 2017 pen eite a dia ni poimoh mahmah ahih ziak in hiai ni in kua­peuh in BJP manghilh kei ni chi’n programme zoh in ngen hi.

 

Programme zoh in BJP candidate makaih in mipi’n DC/Ccpur office ah nomination file uhi.

 

 

Solar Awareness Training kipan

LAMKA, Feb. 13: Tuni sunma dak 10:00 a pan in Ccpur High School campus a NEULIT office ah ni 3 sung daih ding So­lar Awareness Training kipan hi. Hiai hun ah re­sources person Ningom­bam in, ‘Application of re-technologies to meet energy needs in rural ar­eas’ chih thupi zang in sinsak a, Shyamsunder, former Chairman, JERC (M &M) in, ‘Availability of new and renewable re­sources’ chih thupi zang in sinsak hi.

 

Huai ban ah Mithilesh, Sr. Research Scientist in, ‘Solar photo­voltaic System’ chih thu sinsak a, Prakash Jha, Sr. Research Scientist in, ‘So­lar thermal system and its application leh con­centrated solar thermal technologies for cooking and process heating’ chih thu sinsak hi. Hiai hun ah mun tuamtuam a pan in mi 40 val tel uhi.

 

 

‘Unlawful’ thupukna politics a ham­phatna ngah sawmna ahi: MCPM

IMPHAL, Feb 13: Manipur phaizang pansan helpawl khat Maoist Com­munist Party Manipur in thusuah a bawlna ah, Con­gress Legislature Party in ‘unlawful organisation’ a UNC puankhiak sawm a thupukna a bawl pen poli­tics a hamphatna ngah a sawmna ziak lel hidan in taklang hi. Huai ban ah Ma­nipur govt in hiai thu ngai­khawk taktak hileh election ding kuan hilou a, state govt thuneihna nuai a om ahih­man in hun sawttak paisa a kipan ‘unlawful organisa­tion’ a UNC puang khinta ding hidan in taklang hi. In­dian Criminal Law Amend­ment Act, 1908 section 15(1) dungzui a state govt in pawlpi khat peuh dankalh a gamtangte ‘unlawful organ­isation’ a puankhiak theihna ding a thuneihna nei hidan inleng taklang uhi.

 

 

Sharmila in BJP ngohna a bawl lenkip

IMPHAL,Feb 13: Irom Sharmila Chanu in maban a assembly election om toh kisai a BJP ticket a Thoubal assembly constituency a candidate a ut leh BJP in Rs 36 crore vel piak ding a chiam (offer) uh hi’n gen hi. Sharmila in hiai thu a puankhiaknung in zan in BJP MLA Bishwajit in Sharmila kiang a BJP in hiai bang a thu genkhalou leh sum huai zah tah ngeilou ahihdan gen in hiai thu Sharmila in a hilhchetkei leh dan dung­zui a, a tung a action lak hiding in gen hi.

 

Tua toh kiton in Sharmila inleng a thugen lenkip in, political party thak PRJA a patkhiakma a BJP Ma­nipur convenor Sur Binod in BJP a lut dia chialna va bawl leh BJP ticket a candidate a ut leh BJP in Rs 36 crore vel pe ding thuchiam va bawl hidan in gen hi.

 

 

Assembly elec­tion a candidate naupang pen

IMPHAL, Feb 13: 11th Manipur assembly election ding toh kisai a tunitan a candidate ding a kigente a lak naupang pen ahihleh Na­tional People’s Party (NPP) candidate Laishram Thanil Meetei hi a, aman Wang­khem assembly constitu­ency ah tuh ding hi.

 

Laishram Thanil Meetei in tuni’n election campaign pan hi. Amah ahihleh February 28, 1990 in piang a, Sikkim Manipal University, Shillong a pan in BBA zou hi. Aman 2016 in NPP zom in, party ah secretary organisation din­mun len hi.

 

Wangkhem assem­bly constituency a Con­gress candidate ahihleh Parliamentary Secy K Meghachandra hi a, can­didate dangte ahihleh Y Nabachandra (NEIDP) leh Jadumani (BJP) hi uhi.  

 

 

BJP leh NPP ticket tan khaklouh ziak a kizukkik ding ka hikei: PKS

LAMKA, Feb 13: 58-Ccpur AC a North East India Development Party (NEIDP) candidate Paukhansuan Khuptong in tuni sunnung dak 3:00 in a tenna inn, Ch­ingkangpa Avenue ah tualsung thuthaksaite kimuhpih hi.

 

Hiai hun ah Paukhansuan Khuptong in, tutung MLA election ding ah BJP ticket delh masapen a, huai zoh in NPP ticket delh nawn a, hiai gel a tanlouh ziak a tawpkiksawm hidan a kholak thuthang om toh kisai hilhchian hi. Hiai toh kisai in zanhal a North East India Devel­opment Party(NEIDP) ticket lakheta leh hiai ticket zang a tutung a MLA candidate ding ahihdan gen hi.

 

Aman a genzelna ah, BJP leh NPP ticket sang mah NEIDP deih huaizaw leh hiai bang party hoihtak a tankhak kipak petmah ahihdan gen hi. A symbol leng ‘Chiangkhun’ ahih ziak in Pathian in Mosi zang a Israel-te tuipisan a galkaipih bang a hiai ticket tungtawn a lohch­ing ding leh mipite hak­satna leh Bill 3 tungtang a buaina ban ah Tribal Martyr-te sihna su­alkhe ding ahihdan gen hi. BJP ticket leh NPP ticket tangkei mahleh khawlthei hinawnlou leh mipite deihna bang a paisuak ding ahihdan gen hi.

 

Huai ban ah zing­chiang sunma dak 10:00 a worker-te toh kimukhawm a, huai a pan DC/Ccpur office ah nomination filed ding ahihdan leng gen hi.

 

 

Singngat AC a NPP candidate in flag hoisting nei

LAMKA, Feb 13: Tuni sun dak 12:30 in Red Cross Road a Hangzou Building ah 60-Singngat AC a NPP candidate Henlianthang Thanglet in election office honna leh flag hoisting programme nei uhi. Hiai hun ah S. Chinsuanlian in makaih a, Rev. Jerry Zoliansanga in office laan in Thangminlian Kipgen, President, NPP Manipur in NPP flag kaipalh hi. Khaimuanthang, Chief Agent in thugenna a neih zoh in Rev. Jerry Zolian­sanga in candidate-pu a ding in thumsak hi.

 

NPP candidate Hen­lianthang Thanglet in a genna ah, NPP policy leh programme-te sepsuah ding leh Behiang Trade Centre puahphat ding ban ah BADP fund om ahih ziak in hiai fund-te mipi a dia phatuamtak a zat lunggulh a tutung election a candidate sawm ahihdan gen hi. Bill 3 tungtang a buaina omte sukvenna dia panla ding leh SoO tungtawn a singtangmite thil ngetna pichinna dia panla ding ahihdan leng gen hi.

 

Singngat area sung a road communication, water supply scheme, ed­ucation sector leh health sector-te puahphat lung­gulh leh inflastructure om masa leh semtute hong mai ding uh ahi chi hi. MLA certificate hong pia unla, gam khan­touhna ding in centre ah development fund a tamtheilam tamtheilam laikhia in i gam­sung puah ni chi hi.

 

2006 a pan CEO/ ADCC la len a, CEO ka hi­hsung in Manipur a CEO teng sik-le-tang in Centre ah fund ngen di’n hon sep ua, hiai hun sung in fund tam­tak ngenkhia in nasepkhiak leng tam mahmah hi’n gen hi. Gamsung puahna ding in mipi’n hon muang unla, NPP symbol laibu (Book) ah i vote manphatakte uh khe chiat ni chi’n ngen hi.

 

Tua zoh in Jamlet Ha­okip in kipahthu gen a, Upa Lianminthang in thumna in hunkhak hi.

 

Hiai hun zat zoh in Election Commiittee-te makaih in DC/Ccpur office ah nomination file uhi. Hiai hun zatna ah Singngat AC sung a pan mipi tamtak pai­khawm uhi.

 

 

NFI saina a NFI Education Parters’ Meet ah SSPP-GHQ makaite tel ding

LAMKA, Feb 13: Siamsin Education Initia­tive - an initiative of Siam­sinpawlpi nuai a Zodawn a siamsinna dinmun puah­phatna leh tunding thak nawnna ding a Siamsin­pawlpi’ kalsuannate New Delhi pansan a panpihtu National Foundation for India (NFI) vaisaina nuai ah NFI Education Part­ners’ Meet kichi khawmpi The Action Northeast Trust (ANT), Bongaigaon, Assam ah hongtung ding Feb 15 & 16, 2017 sung om ding hi. Hiai meet ah Siamsinpawlpi leng NFI a ding a Education Partner khat ahihna toh SSPP-GHQ General Secy Nang­muansang Lethil leh Joint SecyPu Benjamin V Jam­khanpau va kihel ding ua, amau ahihleh zingchiang, Feb 14, 2017 in Lamka nuse ding uhi.

 

Hiai hun ah Siamsin­pawlpi kipat chiil a pan a kalsuanna tuamtuamte leh society ah a piilpi a kikhekna a tutdante pow­erpoint presentation zang in hilhchetna va nei ding uhi. Tua ban ah NFI-te toh pangkhawm a SSPP in kal a suankhawmnate uh toh kisai pulakna leh maban panlak ding dan genkhawmna hun om ding hi.

 

Hiai Meet sung in field tuamtuam a national-level resource person-te’n kisinsakna hun la ding ua, phatuam zaw sem a pan­lak dingdaan kisinsakna tuamtuam leng om diing hi.

 

Program ahihleh ni nih sung hiding a, palaite February 17 in Lamka zuan in hong kiknawn ding uhi.

 

 

 

 

 

 

 

NEWS TOMKIM

 

Seilal UPS ah Blessing Day zang ding

LAMKA, Feb 13: ADC nuai a om Seilal Upper Primary School ah zingchiang zingkal dak 10:00 in Blessing Day zang ding uhi. Huai hun ah special guests in W.L. Hangshing, IAS, Addl Chief Secretary, Manipur; Soiminlien Lengen, MCS, CEO/ADCC leh Jameson Hangshing, MCS, SDO/SDM, Singngat pang ding uhi.

 

 

Kawnpui ah gari check

LAMKA Feb. 13: Tuni sunma dak 11:00 in Traffic Police-te’n Kawnpui, Tedim Road ah gari check ua, laipoimoh neilou gari hek leh gari peinih nei hek helmet khulou kigawm mi 20 val man ua, sum liausak in TR cut uhi. Lamka Police in maban a election ding ziakin khopi sung lutna lampite ah check nei zelzel uhi.

 

 

Cafe Eureka Stall hongkhia

LAMKA, Feb 12: Tuni sunma dak 10 in Bijang Family Lane (Near Accelerate Coaching Institute) ah H Dalzamang Retd (DFO) in ‘Cafe Eureka Stall’ (Hotel and Restaurant) hongkhia a, Upa Paukap, Chairman ESC, Bijang in Pathian min in laan hi. Hiai cafe ahihleh Lun Thangzawm, Manager hihna nuai a honkhiak a om ahi.

 

 

Sunna

Niangngaihvung w/o G Ginkhankhup of Enpum village, Guite Rd sawtkuamtak damlou a, a om nung in zan nitak in si a, tuni’n kivui hi. RIP

 

Peter Holsei f/o John Guite (Kuki Gospel Artist) of H Khopibung village, Saikul Block, tunitak dak 7 in damlouhna ziakin si a, zingchiang in kivui ding hi. RIP

 

 

 

 

 

…for more detail : here