You are here: HomeRSS FeedsThe Lamka Post

The Lamka Post | February 10, 2017

Friday, 10 February 2017 22:21

Panneerselvam Vs Sasikala

AIADMK No.2 Panneerselvam camp zom; Gover­nor in Sasikala leh Panneerselvam kimuhpih

CHENNAI, Feb 9: AIADMK party general secretary V K Sasikala in, Tamil Nadu Chief Minister len ding a pan a lak ziak a kiphinna nei Caretaker Tamil Nadu chief minister O Pan­neerselvam in, tuni Nin­gani in, AIADMK party presidium chairman E Madhusudhanan a kipan in gupna ngah hi.

 

Tuni mah in Mad­husudhanan in O Pan­neerselvam, a tenna inn ah kimuhpih hi. Meeting zoh a Madhusudhanan in thuthaksaite kiang a, a gendan in, a sia leh pha theihna in, Panneer­selvam’s camp zom ding a theihsak ahihdan gen hi.

 

Panneerselvam in thuthaksaite kiang a, a gendan in, Madhu­sudhanan in AIADMK permanent general sec­retary len ding a, tutan a Sasikala a tenna mun chief minster lui J Jaya­lalithaa tenna mun Poes Garden residence (Veda Nilayam) leng ‘Amma’ a dia memorial khat ding a khenkhiak hiding chi’n gen hi. Panneerselvam in a gendan in, AIADMK in a khansemna ding in Madhusudhanan in na­ktak in panpih a, MGR nungthuaptou den chi’n gen hi. Chief minister lui J Jayalalithaa a sih nung in, Sasikala in ka kiang ah, Madhusudhanan in AIADMK general secre­tary len ding chi’n a hon theisak a, chief minister ding in ka thukimpih chi’n Panneerselvam in gen hi. Himahleh ni nih sung in thilteng kikheng lumlet vek a, Sasikala in general secretary len a, Sasikala in party suksiat sawm in chief minister dinmun tuh hi’n gen hi.

 

`Tuni Ningani nitak dak 5 a AIADMK chief VK Sasikala in Gover­nor C Vidyasagar Rao a kimuhpih madeuh in, ‘Amma’ vualzawlna ngen in J Jayalalithaa’s memo­rial at Chennai’s Marina Beach mun veh masa hi. Ms Sasikala in minute 15 sung Governor C Vidyas­agar Rao a kimuhpih hun in, ruling AIADMK party MLA tamzaw thamte gupna ngah ahihdan gen a, government thak bawlkhezou ding uh ahi­hdan leh Chief Minister thak a pang ding ahih­dan theisak hi. Hiai zoh nitak dak 7 in Governor in O Panneerselvam leng kimuhpih a, legal expert-te thuzak ding ahihdan thei­sak hi. Governor toh meet­ing zoh a, interim Chief Minister Mr Panneer­selvam in agendan in, thu­dik a thukhenna sepkhiak hiding chi’n gen ahi.

 

 

Fake encounter 1528 thu a Ibobi in ngaihdam a nget ding ahi: Manipur BJP

Imphal, Feb 9: Tuni Ningani a Lamshang constituency, Imphal West district a kipan BJP candidate Sorokhaibam Rajen Singh a ding a flag kaihpalhna programme zatna hun a, Manipur BJP chief Bhabananda in a gendan in, Ibobi gov­ernment in kum 15 vai a hawm sung a human right bohsiatna huaisetak om ahihdan a pompih a, ex­trajudicial fake encounter 1528 –te ziak a ngaihdam a nget teitei ding ahi chi’n gen hi.

 

Tulel in fake encoun­ter 1528 thubuaite Su­preme Court ah awk den­lai hi. Congress in kum 15 sung Manipur a vai a hawm sung a extrajudi­cial killing case om pan ahi chi’n gen hi.

 

Government of In­dia leh NSCN-IM kal a frame work agreement suai kaih a omte thuchian leh parliament budget a national sport university bill pass louh thu mipite tung a puangkhe ding a, BJP a phut sang in, Ibobi in amah makaihna nuai a state a kum 15 sung kivaipuakna dikloute pompihzaw leh kimetzaw tham ding ahi chi’n Bha­bananda in gen hi. UNC in district thak bawl a omte zukkik ding deihna a, ni 100 sung economic blockade a puan sukbeina ding in chief minister in sepkhiak bangmah neilou chi’n soisel hi.

 

Centre a Congress’ makaih UPA govern­ment hunlai pek a kipan NSCN-IM peace process paizomtou zel ahi chi’n Bhabananda in gen hi. BJP makaih NDA in thu­neihna a luah nung a ki­pan in NSCN-IM makai Muivah, India gamsung kia ah om theita chi’n gen hi. Hiai toh kisai Prime Minister Narendra Modi khuak pilna zang a BJP tung a thillamdang om ahi chi’n gen hi.

 

 

Assembly election phase 2 a ding notification suah

IMPHAL, Feb 9: March 4 leh 8, 2017 a 11th Manipur assembly election om ding toh kisai a Election Commission of India in first phase a ding election notifica­tion suahkhiah ahihnung in tuni, Feb 9 in second phase a assembly con­stituency 22 a ding noti­fication suahkhiah in om nawn hi. Manipur Govt in district thak 7 bawlkhe mahleh 11th Manipur as­sembly election a district thakte’n leng bawlkhiak ahihna uh district mah pansan ding in election thuneitute’n theihsakna bawl uhi.

 

Second phase a elec­tion neihna ding assem­bly constituency 22 a ding in Feb 16 tan nomination file theih ding a, Feb 20 tan in kizukkik nuamte a di’n kizukkik theih ding hi. Second phase a poll­ing ding ahihleh March 8 hiding hi.

 

Election Commis­sion of India in first phase a assembly con­stituency 38 a ding in Feb 7 in notification suahkhia hi. Tuni a sec­ond phase a ding elec­tion notification suah­khiak ahih toh kiton in assembly constituency 60 a ding notification suahkhiak hita a, can­didate-te’n nominaton paper file panta uhi.

 

 

SVEEP Action Plan toh kisai meeting nei

LAMKA, Feb 9: Kripa Singh Yadav, IRS, Central Awareness Ob­server makaih in tuni, Feb 9, 2017 sunma dak 11:30 in BRGF Resource Centre ah SVEEP Action Plan toh kisai genkhawmna om hi.

 

Kripa Singh in hiai hun ah District sung a Department tuamtuam a Head-te’n election ding toh kisai a panlakna a neihte uh genna hun pia a, Election Commission of India deihna bang a tutung State Legislative Assembly Election 2017 festival bang a zat ding chih ahih toh kiton a, Festive Mood a zat ahih theihna dia department chih in pan a lak ngai ahi­hdan gen hi. Meeting hun ah district sung a nau­tang toh kisai khakna nei deuh, Medical, Education, ICDS, Nehru Yuva Kendra ban ah Block tuamtuam a SDO/AERO teng leh Elec­tion Icon leh Campus Am­bassador chihte tel uhi.

 

 

Ccpur district a AC 6 a di’n mi 24 in nomination form lata

LAMKA, Feb 9: March 4 leh 8, 2017 a 11th Manipur Legisla­tive Assembly election om ding toh kisai a Feb 7 in assembly election phase-1 a ding election notification suahkhiak in om a, huai toh kiton in tuni, Feb 9, 2017 tan in Ccpur district sung a AC 6 a ding in intending candidate 14 in a kisaipih Returning Officer-te a pan in nomination form la uhi.

 

Huaite ahihleh 55-Tiapimukh AC a di’n Ngurivung, IND; Dr. Chal­tonlien Amo, INC; Dr. L. Fimate, BJP leh Ngursan­glur, IND.

 

56-Thanlon AC a di’n Vungzagin Valte, BJP; Thangkhangin Ngaihte, LJP leh Dr. Chinkholal Thangsing, INC; Ne­ngzakham, NPP leh P. Khamsanglian, IND.

 

57-Henglep AC a di’n T. Manga Vaiphei, INC; TT Haokip, BJP; Mangcha Thangjom, IND; Sehpu Haokip, NPF leh Jainson Haokip, IND.

 

58-Ccpur AC a di’n Phungzathang Tonsing, INC; V. Hangkhanlian, BJP; C.T. Lian Guite, IND; Dr. DK Mang, IND; Khamminthang, IND; Thangbiaklian Hangzo, IND leh K. Paukhansu­an, NPP. 59-Saikot AC a di’n TN Haokip, INC leh Joseph Lalrothang, IND.

 

60-Singngat AC a di’n Chinlunthang, BJP; Henlianthang Thanglet, IND leh Ginsuanhau, INC hi uhi.

 

 

UNC makai 8-te court a kilangsak di’n theisak

IMPHAL, Feb 9: Manipur high court in zan in state government kiang ah Feb 16, 2017 ma ngei a United Naga Coun­cil (UNC) office-bearers 8-te court a kilangsak ding in theisak hi. Hiai thu ahihleh UNC in Ma­nipur a national highway tegel a economic block­ade a bawlnung ni 100 chinni, zan Nilaini a eco­nomic blockade bawl a om toh kisai a PIL bawl a om hearing a neihnung a court in state govern­ment a theihsak ahi. UNC president Gaidon Kamei leh information secretary SK Stephen ahihleh state goverment in a matnung in tu in judicial custody ah omlel uhi.

 

Huailou in Manipur High Court in Manipur DGP LM Khaute leh se­nior Indian Oil Corpo­ration (IOC) official-te kiang ah economic block­ade nuai a state sung a thautui puaklut a omdan report kimtak pelut ding inleng theisak hi.

 

Manipur High Court in hiai thupiak a bawl ahihleh UNC in economic blockade khawllou a sut­zop hiding a thupukna a bawl ban ah Election Commission of India (ECI) in state sung a elec­tion process a pat toh kiton a court in hiai thei­hsakna a bawl ahi.

 

 

MGNREGA toh kisai in Partici­patory Planning training nei

LAMKA, Feb 9: State Institute of Rural Development (SIRD), Manipur a pan Hari Mo­han Sharma, Principal leh Dr. A. Somendro, As­sistant Professor in tuni, Feb 9, 2017 sunma dak 11:00 a pan SDO Henglep Office ah Participatory Planning (LB & GS) un­der MGNREGA chih toh kisai sinsak uhi.

 

Hiai hun ah Ma­hatma Gandhi National Rural Employment Guar­antee Scheme nuai a dan zuih ding tuamtuam omte toh kisai sinsak uhi. MGNREGS ahihleh Feb 2, 2006 a India a district 200 a patkhiak a om hi a, lohching hi a theih ahih toh kiton in April 1, 2008 in India gamsung a district tengteng huam telsak a om in innkuan a sepna neiloute kum khat a ni 100 tha sepsak ding chih ahi.

 

SIRD, Manipur ahi­hleh Rural Development and Panchayati Raj De­partment, Govt of Mani­pur etkaina nuai a om hi a, innkuan khosak haksa diakte dopsangna dia gov­ernment scheme tuamtuam omte mipi lak ah tangkou­pih zel ua, hiai bang training kha khat in 10-15vei kikal nei zel uhi. Tuni a training hun ah Henglep Sub-Divi­sion sung a hausa leh VA member 30 vel kihel uhi.  

 

 

Cycle a India gamsung 5vei taisuakta Bhausaheb, Lamka hongtung

LAMKA, Feb 9: Cycle zang a India dung-le-vai a 5vei taisuakta, cyclist Bhausaheb, tuni, Feb 9, 2017 sunnung dak 1:30 vel in Imphal a pan Lamka hong taitung in DC Ccpur kimuhpih hi. Kum 44 a upa, Bhausaheb Bha­war s/o Vithal Rao ahihleh Hasnabad, Jalna District, Maharastra a om hi a, ama’n National Cycling for National Integration chih minvuah in khotang a thil­hoihlou tuamtuam mou vanken sangtak kiphut­luih, nu sung a om numei naungek thah chihte beisak ding tangkoupih in May 1, 1993 a pan 2006 kikal in India gamsung pumpi thumvei cycle zang in taisuak a, Jan 1, 2007 a pan Mumbai a pan kipannawn in tunitan a India gamsung nihvei taisuak nawnta ahi­hdan gen hi. Aman North East state a tuailaite lak a khamtheih doudal ding tangkou­pih a, India gamsung 5vei a taikual hun teng a Mizoram leng phagige ahihdan gen in, North-East bouruak nuamsa leh singtang mite lak nuamsa mahmah ahihdan gen hi. Bhausaheb in ahihleh a sanggamnu pasal nei ding mou vanken tamtak a pasal lamte’n a nget ua kipan a haksat dan midangte lak ah tangkoupih ding lungsim in nei a, khovel a thautui kepbit ding lungsim a nei kawm a Cycle zat ding a tel toh kiton a Oil and Natu­ral Gas Corporation Limited (ONGC) in a zat ding cycle pia in, a cycle zat Rs. 36,000/- man hi’n gen hi.

 

 

Pawlam mite kiang a ticket pelou di’n JCILPS in theisak

IMPHAL, Feb 9: Election maituah Ma­nipur ah political party khenkhat in pawlam mite kiang a ticket a piak thu un kiselna sousangtak piangsak hi. Congress in pawlam mite kiang a tick­et a piak toh kisai galvan­tawi Maoist Communist Party Manipur (MCPM) in a naktak a, a demnung in Joint Committee of In­ner Line Permit System (JCILPS) inleng tuni’n Congress kiang ah paw­lam mi khat kiang a ticket piak a om enthak ding in ngen hi.

 

T u a l s u a k m i t e humbitna ding tangkoupih JCILPS in ahihleh pawlam mite ki­ang a maban a assembly election om ding a po­litical party-te’n ticket a piak uh deihlou ahihdan taklang hi. Huai ban ah Congress in Nepali com­munity a pan Khadga Tamang kiang a ticket a piak uh zukkik ding in­leng ngen uhi.

 

JCILPS office a thuthaksaite kiang a con­venor-in-charge BK Moi­rangcha in a genna ah, Manipur State Darbar in 1946 a Nepali beh (clans) 64 Manipur a tengthei dia lemsakpihna a piakte lak a ‘Tamang’ beh telkhalou hidan in gen hi. Tamang kichi 1951 ma a Mani­pur a Nepali beh omte lak a telkhalou ahihdan gen in hiai toh kisai in JCILPS in Nilaini in Ta­mang kimuhpih ding in sam a, aman leng va pai ding ahihdan gen mahleh JCILPS makaite kiang a pailou hidan inleng gen hi.  

 

 

Polling personnel 1528 in Ccpur College ah training pan

LAMKA, Feb 9: 11th Manipur Legislative Assembly election ding toh kisai in Ccpur district sung ah polling person­nel ding in mi 1528 guan in om uhi.

 

Huaite ahihleh Pre­siding Officer 382, Poll­ing Officer-I ah mi 382, Polling Officer-II ah mi 382, Polling Officer-III ah mi 382 hi uhi.

 

Amaute’n tuni, Feb 9, 2017 a kipan in Ccpur College, IB, Road, Hill Town ah training pan uhi.

 

Tuni, Feb. 9, 2017 sunma dak 10:00 in Pre­siding Officer batch-I, II, III & IV a omkhate train­ing nei ua, zingchiang Feb. 10 in Presiding Of­ficer batch V, VI, VII, & VIII a omkhate training ding uhi. Feb. 13 in Poll­ing Officer-I a batch I, II, III & IV a om khate train­ing ding ua, Feb. 14 in Polling Officer-I a batch V, VI, VII, & VIII a om­khate training ding uhi. Feb. 15 in Polling Officer- II a batch I, II, III, IV, V, VI, VII, & VIII a omkhate training ding ua, Feb. 16 in Polling Officer-III a batch I, II, III, IV, V, VI, VII & VIII a omkhate training ding uhi.

 

 

Defence Service a luttheih dingdan kisinsak

LAMKA, Feb 9: National Cadet Corps (NCC) Rayburn College in tuni, Feb 9, 2017 sun­ma dak 11:00 in Rayburn Chapel ah VL Renga Hril­er, Director (Personnel), Director General, NCC, Ministry of Defence, Gov­ernment of India toh hun zatkhawmna nei uhi.

 

Rev. Khen P. Tomb­ing, Principal, Rayburn College in hiai hun ah vaidawnna thugen a, VL Renga Hriler in Defence Service a luttheihna ding lampi omte toh kisai gen in, H. Ginsuanlian, Coun­sellor in dotna leh dawnna hun makaih hi. Leuten­ant Suan L. Hauzel, ANO-NCC, Rayburn College in kipahthu gen in hun zangzou uhi. Hiai hun ah India in galvan tuamtuam a neihte uh lahna leng om a, Rayburn College a pan lunglutna nei student tamtak kihel uhi.

 

 

Khuga Battalion in Ex-Ser­vicemen Rally nei ding

LAMKA, Feb 9: Feb 11, 2017 sunma dak 10 a kipan in Khuga Bat­talion in Ex-Servicemen Rally nei ding uhi. Hiai hun ah medical free check-up, SUVIGYA pansan a pension anoma­lies etchetna, tuailaite a di’n career counseling, March 5-8, 2017 sung Rangapahar, Dimapur a Naga leh Hill tribes-te ban ah Gorkha-te a ding bik a soldier general duty special recruitment om ding toh kisai in online registration leh mini-ral­ly nei ding uhi. Huai ban ah operation hun a In­dia sepaih hinna chante sungkuante kiang ah leng zahtakna in VEER NARI pe ding uhi.

 

 

Voluntary Blood Donation Camp om ding

LAMKA, Feb 9: Lamka Damdawi Inn a Blood Bank saina in hon­gtung ding Feb 14, 2017 sunma dak 9:00 a pan sunnung dak 2:00 kikal sung Awareness Cam­paign-cum-Voluntary Blood Donation Camp om ding hi. Dr. Kimn­gaihching Simte, CMO/ Ccpur in sunma dak 9:00 in Camp hongkhe ding hi.

 

Huai ban ah Dr. Paulunmang Vaiphei in Voluntary Blood Dona­tion toh kisai Awareness Campaign nei in, Blood Bank, Lamka a sisan tak­sapna a bei ding tupna a Voluntary Blood Dor­nors’ Association kichi puankhiakna leh kichi­amna makaih ding hi. Sunma dak 10:00 a pan sisan a thawn a thohnua­mte a pan sisan lak kipan ding hi.

 

 

K. Patlen(Khuchijang) ah CFC Hall hongkhia

LAMKA, Feb 9: Tuni zingkallam dak 9:00 vel in K. Patlen (Khuchijang) khua ah North Eastern Region Community Resources Management Project (NERCORMP) Ccpur in Govt of India Project 2016-2017 tungtawn a Common Facility Cen­tre (CFC) Hall a bawl uh hongkhiakna om hi. CFC Hall ahihleh D. Khuala Vaiphei, Project Manag­er, NERCORMP in hon­gkhia a, NERCORMP a pan Jamkholal Lhun­gdim, IDO, Clarence Seikhongan, BDO, Facil­itating Partner NGO Ru­ral Aids Service leh kho­sung mipite ban ah VA member-te’n uap uhi. Hiai CFC Hall ahihleh kum 65 nung a K. Patlen khua a pucca building kimawl masapen hilai hi.

 

 

Khua 205 a pan naupaai mi 359 om

LAMKA, Feb 9: Ccpur district a Lamka khopi pawlam a nurse omlouhna mun khua 205 ah numei naupaai 359 om a, naupang kum 0- 2 kikal 1582 om hi. Numei naupaaite leh naupang kum 1-2 kikalte Mission Indranush nuai ah dam­dawi kha 4 sung a kizom in kap ding uhi. Huaite ahihleh kha teng a ni 14 ni in kap ding ua, Feb 14, March 14, April 14 leh May 14 in kap ding uhi.

 

Huaite ahihleh Tipaimukh block a khua 29 ah naupang 528, nu­mei naupaai 98; Sam­mulamlan block a khua 83 ah naupang 327 leh nuamei naupaai 60; Singngat block a khua 40 ah naupang 222 leh numei naupaai 67, Than­lon block a khua 27 ah naupang 242 leh numei naupaai 70 leh Henglep block a khua 26 a pan naupang 263 leh numei naupaai 58 om hi.

 

 

SVEEP Signature Campaign nei

LAMKA, Feb 9: District Election Officer (DEO) Ccpur makaih in tuni, Feb 9, 2017 sunma dak 11:00 in BRGF Re­source Centre, DC Of­fice ah ‘SVEEP Signature Campaign, Churachan­dpur’ kichi om hi. Hiai hun ah Kripa Singh Yadav, IRS, Central Awareness Observer, R. Sudhan, IAS, DC/DEO, Ccpur leh Rakesh Balwal, IPS, SP/Ccpur in ‘I Sup­port Free, Fair & Peace­ful Manipur Legislative Assembly Election 2017’ chih thupi nuai ah, amau’ thumal deihte behlap in a suai uh kai uhi.

 

Hiai hun ah Kripa Singh Yadav in ‘Work for Strong Democracy’ chih thumal gelh in a nuai ah suaikai a, R. Sudhan in ‘Free & Fair Election: Vi­brant Democracy’ chih gelh in suaikai a, Rakesh Balwal in ‘Let’s Work for Free Election’ chih thum­al gelh in a suaikai hi.

 

 

Flying Squad Team in zu mankhia

LAMKA, Feb 9: Manipur Legislative As­sembly Election 2017 ding toh kisai a bawlkh­iak a om Flying Squad Team khat in tuni, Feb 9, 2017 in Tuitha Lei, Reng­kai ah local zu bangzahhi­am mankhia uhi. Dhamu Singh leh Nianghoihkim, SI makaih, Saikot Assem­bly Constituency Flying Squad team-te’n Lamka- Sugnu Road tawn a tai garite check a bawlna uah, Sugnu lam zuan a tai gari bangzahhiam a pan Distilled Illicit Country made (DIC) Liquor/Lo­cal Zu liter 18 leh a kim mankhia in Excise De­partment khut ah pekhia uhi. Kha nawn March 4, 2017 a assembly election neihna ding ni tamlou lel in a saptak toh kiton in Lamka khopi sung a lut leh pawt dingte Flying Squad Team-te’n mun bangzahhiam ah gate bawl in, thilkham tua­mtuam leh sum tamtak puaktuah ding sun leh zan in enkai den uhi.

 

 

EFCI Saikawt in Golden Jubilee lawm

LAMKA, Feb 9: Evangelical Free Church of India (EFCI) Saikawt Presbytery in tuni, Feb 9, 2017 a kipan Feb 12 tan daih ding in EFCI Cam­pus, Saikawt ah 50th Presbyter’s Conference-cum-Golden Jubilee (1968-2017) zang uhi.

 

Khawmpi ahihleh tuni sunma dak 10:30 in kipan a, sun hun in Bussiness Session-I nei ua, zingchiang, Feb 10 sunma dak 10:30 in Business Session-II nei ding uhi. Huai ban ah Feb 11 sunma dak 10:30 in Golden Jubilee suang­phuh honna leh latna nei ding ua, sunma dak 11:30 in Golden Jubilee lawm ding uhi. Feb 12 sunma, sun hun leh ni­tak in mipi biakna nei ding uhi.

 

2016 census dung­zui in EFCI Saikawt Presbytery nuai a khua 16 a pan inn 1,325 om a, member 6,828 om uhi. EFCI General Head Of­fice ahihleh Shillong, Meghalaya hi a, Manipur ah Presbytery 5 a kikhen in huai lak ah Saikawt Presbytery lian pen hi.

 

 

LJP ticket in Holkholun Lhungdim candidate ding

LAMKA, Feb 9: Tuni sun dak 12 in Holkholun Lhun­gdim in maban a 11th Manipur assembly election om ding a 59-Saikot AC a pan LJP ticket a candidate ding ahihdan puankhiakna hun zang hi. Hiai hun ah Holk­holun in innsungmi leh tanau-lainate kaikhawm a, vaihawmtu Pathian seh ahihman in Pathian in a deih leh ching ding leh a deihkeileh chinglou ding ahih­dan gen hi. Huai ban ah maban a election ding a kua­mah chi-le-nam khenlou a pangkhawm ding in ngen hi. 59-Saikot AC sung ah tui, kihawmtuahna lampi, damtheihna lam leh tenna inn-le-lou puahlouh a omte puahnuam a tutung a MLA candidate sawm ahihdan leng gen hi.

 

 

KNO in political party guptuam neilou

Imphal, Feb. 9: Kuki National Organisation (KNO) in tuni, Ningani a March 4 leh 8, 2017 a 11th Mani­pur Legislative Assembly election, 2017 ding toh kisai thusuah a bawlna ah, KNO in United People’s Front (UPF) toh political party gup ding thu a kilemna bang­mah bawllou ahihdan taklang hi. Stephen Kuki, Un­der Secy, Information & Publicity, KNO in a taklatna ah, UPF in ahihleh deihtuam neikha thei a, himahleh KNO in ahihleh tua bang a political party khatpeuh toh kikawina neilou hidan in taklang hi.

 

 

 

 

 

 

 

 

NEWS TOMKIM

 

PS ah thaulong 1037 koihlutta

LAMKA, Feb 9: Manipur Assembly election ding ziak a District Magistrate/Ccpur in a paisa Jan 4, 2017 a licensed thau nei teng in Police Station ah koihlut vek dia order a suah nung tunitan in Police Station ah thaulong 1037 koihlut hita a, licensed thau 65% vel koihlut hita hi’n thutut kingah hi.

 

 

BJP member a pan kitawp

LAMKA, Feb 9: Henlianthang Thanglet in zan in President BJP Manipur State kiang ah BJP membership ahihna a pan kitawpna pia hi. Aman NPP a zoh toh kiton in maban a Manipur assembly election om ding ah 60-Singngat AC a pan NPP ticket in candidate ding ahihdan gen hi.

 

 

Mimang muh hita

LAMKA, Feb 9: Feb 7, 2017 a inn a pan pawtkhia S. Douvanlal s/o (L) Nengkhup of V. Munhoih, mun tuamtuam zon ahihnung in damtak in mukhia uhi. Hiai toh kisai a phatuamngaitak a panla pawlpi tuamtuam leh mimalte tung ah President, SYO, New Lamka unit in kipahthu gen hi.

 

 

National Deworming Day hong ding

LAMKA, Feb 9: District Health Society Ccpur saina in zingchiang, Feb 10 zingkal dak 9:30 in Gandhi Memorial High School Molnom ah R. Sudhan, IAS, DC/Ccpur National Deworming Day hongkhe ding hi.

 

 

Media certification neih poimoh

LAMKA, Feb 9: DC/DEO Ccpur in theihsakna a bawlna ah, 11th Manipur Legislative Assembly election 2017 om ding toh kisai in TV channel, cable TV, cinema, social media, radio, sms, voice message leh e-paper a political advertisement bawl dingte’n media certification a neih uh poimoh ding hi’n taklang hi. Hiai toh kisai in advertisement bawl a om ding leh English version a copy nih piaklut masak ngai ding hidan inleng theihsakna bawl hi.

 

 

SUNNA:

T. Ginkham (84) f/o T. Vungminthang of Zion Veng, New Lamkam teknat in tuni sunma dak 11:00 vel in si a, tuni mah in New Lamka YPA hanmual ah kivui hi. RIP.

 

 

 

 

 

 

 

 

…for more detail : here