You are here: HomeRSS FeedsThe Lamka Post

The Lamka Post | January 10, 2017

Tuesday, 10 January 2017 16:46

Jotin Waikhom kiang a Cong ticket piak ahihkeileh kihallum di’n vau

IMPHAL, Jan 9: Maban a assembly elec­tion om ding toh kisai in Thangmeiband assembly constituency a Congress party ticket kituhna na­satak pailel ah, Thang­meiband AC a Congress ticket Jotin Yaikom kiang a piak ahihkeileh amah leh amah kihallum ding ahihdan Congress sup­porter khat in gen hi.

 

Manipur Press Club, Imphal a thuthaisaite kiang a Shijaguruma­yum Ibohal Sharma in a genna ah, “Maban a as­sembly election om ding a Jotin Waikhom kiang a Congress ticket piak ahihkeileh Chief Minister Bungalow kong ah ka ki­hallum ding” chi hi.

 

Huai ban ah, Thang­meiband Kendra Con­gress Worker Commit­tee (TK CWC) convenor Elangbam Hoy Kumar in thuthaksaite kiang a, a genna ah, election ticket hawmkhiak ahihma leh Jotin Waikhom kiang a Congress ticket piak ahihma tan Nagamapal Phaogei Shunglen a ‘re­lay-hunger strike’ neih zel hiding hi’n gen hi.

 

BJP MLA Khumu­cham Joykishan in tunai zek a Congress party a zop ziak in Jotin Waikhom toh Congress ticket naktak in kituhkha uh a, huai in Thangmeiband Kendra a Congress supporter-te lak a buaina liantak piangsak in, Jotin Waikhom kiang a Congress ticket piaklouh ding ngaitheilou tamtak om uhi.

 

Congress supporter Moirangthem Surendro @ Nondalen Khomba in a genna ah, Congress ticket deih makai nihte - a lui leh a thak hoih­tuak ua, himahleh State Congress Party in hiai thu ziak a thagumsuahna leh thilhoihlou tungthei a kipan kivenna dia thil omdan hoihtak a, a et­chian poimoh leh MPCC makaite’n Congress sup­porter luite deihsakna a piakzawk uh poimoh hi’n gen hi.

 

Huai ban ah, “Joyk­ishan in ngamkhat thu a Congress ticket ngah a sawm pen mi an nek dinglai laksak toh kibang ahi” chi’n Surendro in gen hi.

 

 

Ka tapa Akhilesh toh kal ah kituahlouhna a om kei; SP sung a buaina Ram Gopal ziak ahi: SP chief Mulayam Singh

NEW DELHI, Jan 9: Uttar Pradesh a vaihawm Samajwadi Party (SP) leh party sung a thuneih kituhna pailel ah, tuni Sep­patni zing in Samajawdi Party supremo Mulayam Singh Yadav leh Shivpal Yadav-te’n New Delhi ah Election Commission of­ficial kimuhpih uhi.

 

EC official in SP sungthu a kitauhtuahna pailel toh kisai a dotna om, Mulayam in a dawn­na ah, kei leh ka tapa Akh­ilesh kal ah kituahlouhna leh kimelmakna bang­mah a om kei a, himahleh tulel a SP sung buaina tuntu Ram Gopal Yadav ahi chi’n mohsa hi. Mi khat in ka tapa fuihsia ahi chi’n Mulayam in Ram Gopal Yadav a min taklanglou in gen hi. SP sung thubuai sukveng hiding chi’n SP founder in genbeh hi.

 

EC in dotna dang khat a bawl Mulayam in a dawnna ah, election sym­bol thu ah kitheihsiam­louhna a om a, himahleh hiai thu EC in sukveng sak ding ahi chi’n gen hi. Mulayam in Rajya Sabha chairman kiang ah leng Samajwadi Party a parlia­mentary makai ahihna a kipan Ram Gopal Yadav lakhe ding in ngen hi. A paisa Kiginni in Akhilesh paneu leh amah panpihtu Ram Gopal Yadav in EC kiang ah, UP chief minis­ter in tu a state ruling par­ty makaih ahihdan chetna document box 6 vapia ua, January 1, 2017 a Sama­jwadi Party MLA, makaite leh worker 5,000te’n meeting a neihna ua, party president ding a, Mulayam mun a Akhilesh guang uh hidan inleng EC theihsak in om hi. Mulayam in EC a theihsakdan in, Akhilesh Yadav in khawmpi a sap, dan toh kituaklou ahi chi’n gen a, party’s electoral symbol cycle leng amah camp a, a om det ding ahi chi’n gen hi.

 

 

Mizoram apan thautui tanker 2 Lamka hong tung; Town Hall ah hawm hiding

LAMKA, Jan 9: ADCC Chairman Lang­khanpau Guite makaih a ADCC team Mizoram a thautui a ngen dia kuante lohchinna bang in tuni’n dielsel tanker khat leh petrol tanker khat Lamka hong tung a, zingchiang Jan 10 sunma dak 10 in ADCC Town Office, Hi­angtam Lamka ah hawm­khiak hiding hi.

 

Hiai hun ah diesel litre khat ah Rs. 80 leh petrol litre ah Rs 90 in kihawm ding a, heavy ve­hicle khat ah Liters 100 zel in piak hiding ua, light ve­hicle khat ah liter 40 zel a piak hiding uhi. Tuabanah, petrol ahihleh light vehicle khat ah liter 30 piak hid­ing ua, three wheeler khat ah liter 10 zel piak hiding ua, two wheeler khat ah li­ter 5 zel piak hiding uh hi’n thutut kingah hi.

 

Tuabanah, mipite haksatna donzangkhaina dia saikhiak a om ahi­hman in a zuaksawn dingte’n bel lak theih louh ding hi’n leng thutut kingah hi.

 

Hiai toh kisai a panla YMA Manipur Group leh YPA/GHQ te pan­lakna ADCC in kipahpih mahmah a, Mizoram apan Lamka puaktun ahih theihna dia lamkal a a kisaipih pawlpi tuamtu­amte leh police te tung ah leng ADCC administra­tion in kipahthu gen hi.

 

Thutut kingah dan in, tu inleng Mizoram apan Lamka hon zuan diesel tanker khat leh petrol tanker khat lampi ah hong pailel uh hi’n leng ADCC Chairman apan thutut kingah hi.

 

 

Muanthang leh Hau­niang kitenna ding a hun suan in om

LAMKA, Jan 9: Mr. T. Pummuanthang s/o Upa Thongzatuan, Pearsonmun leh Miss Vunghauniang @ Hauni­ang d/o Robert Pauzalal, Sahei Road, New Lamka, January 11, zinglam dak 10:30 a Pearsonmun a kiteng ding chih himahleh T. Pummuanthang pi Khawmman (86) tunitak dak 9:30 a, a sih ziakin a hun suan a om hi’n a inkuanpihte apan thutut kingah hi. Amah ahihleh zunkhum ziak a si ahi.

 

 

34 AR-te’n ANSAM makai 3 man; khahkhiak in om ngal uh

SENAPATI, JAN 9: Tuni Seppatni nitak­lam dak 2 vel a Senapati town sung Taphou area a United Naga Coun­cil (UNC) leh ANSAM volunteer-te’n economic blockade khauhtak a bawllaitak ua, 34 As­sam Rifle personnel-te’n ANSAM President Seth Shathsang, Association Finance Secretary Joseph Adani leh Naga students’ body Executive Secretary AC Thotso-te a matkhiak nung uh sawtlou in, Se­napati town ah hindan ngeina naktak a subuai in sousang mah mahmah a, himahleh Naga mipi thangpaite a kigolh nung un, khahkhiak in om vek uhi.

 

ANSAM President Seth Shatsang in thuthak­saite kiang a, a gendan in, highway dung a ‘On Army Duty’ thumal kitak truck hunkhop tai om a hih thu za ua, himahleh a nung sawtlou in thumal kitakte a lem maimai a hihdan theikhia uhi. Hiai truck-te a chang in Army convoy-te zui in taisek uh chi’n Seth Shatsang in gen hi. Economic blockade in military/Army convoy/ transport-te huamkha kei mahleh fake label tak a tai truck-te a taisuak ding uh phal hilou ding chi’n ANSAM President in hil­hchian hi. Tuni nitaklam dak 2 vel in economic blockade supporter-te’n Army convoy-te zui a tai truck-te ana kham ua, truck-te enchian ding a, a kisak laitak un, Henbung post a kipan 34 Assam Rifle-te’n hun tomchik sung in ANSAM makaite va mankhia uhi.

 

Hiai thiltung Naga frontal organization makaite leh mipite’n a zak phet un, Henbung Assam Rifles post kidelh huan ngal ua, kinawktuah manlou in ANSAM makai 3te khahkhiak in om uhi. ANSAM makaite mat a om uh ahih thu Senapati town mipite theihsak ahi­hphet in, kintak in dawr leh sum buk tengteng khak a om ngal in hun tomchik sung in Traffic Point ah mipi tamtak pai­khawm in meeting neizui ngal uhi.

 

Hiai thil tung toh ki­sai kithuzaktuahna lam a kizenzohlouh ziak a hi­aibang thiltung om kha hidan in Assam Rifle apan thusuak om hi. ANSAM makaite khahkhiak ahih zoh un, ANSAM Presi­dent in Senapati Traffic Point a public meeting ah thugenna nei hi.

 

 

Hmar Inpui in thusuah bawl

LAMKA, Jan 9: Hmar Inpui in michih in kum thak lohchingtak a nuamtak a zat deihsak thu khak kawm in hong­tung ding March 4 leh 8, 2017 a 11th Manipur Leg­islative Assembly elec­tion om ding toh kisai in Hmar Inpui in hiai bang in thusuah bawl hi.

 

Nov. 22, 2016 a VTI, Rengkai a Hmar Inpui executive council neih hun a thupukna dungzui in March 4 & 8, 2017 a 11th Manipur Legislative Assembly election om ding a Hmar Inpui min a party support puan­glou ding in thupuk uhi. Huai thupukna pansan in, kitelna a mimal leh pawl tuamtuamte’n Elec­tion Commission of India (ECI) in kitelna toh kisai a zuih ding dan a bawl (Model Code of Conduct) zahtak a mimal zalenna leh deihtelna kuamah kisukbuaisaklou ding in ngen uhi. Huai ban ah kitelna siangthou leh zalentak a neih ahi­htheihna ding a nam­sung a pawl tuamtuam in mimal zalenna palzut­saklou ding inleng ngen uhi.

 

March 4 & 8, 2017 a 11th Manipur Legislative Assembly election om ding a India Constitution in hamphatna leh zalen­na a piak bang leh ECI in Model Code of Conduct a bawlte zahtak a michih in mahni deihtelna sian­gthoutak zang a vote kh­iak ahihtheihna ding leh Pathian deihdan a kitel­na sai ahihtheihna ding a mimal mal in thumna a phawk chiat ding inleng ngen uhi. 

 

 

Ccpur Rickshaw Lungtuak Society in lampi bawl

LAMKA, Jan 9: Ccpur Rickshaw Lung­tuak Society (CRLS) in tuni, Jan 9, 2017 in Te­dim Road dung a lampi kuakna mun bangzahhi­am bawl uhi. CRLS pawl in ahihleh CT Lian Guite, MDC New Lamka West kithuahpihna toh amau kia hilou in khopi sung a gari taituahte khualna a Tedim Road kuakna munte ah kawl-ek (ballu single) sung uhi.

 

Lampi ahihleh Dam­kam Bazaar, New Lamka leh Tedim Road-Lailam Veng junction kikal kuak­na munte bawl ua, hiai hun ah engine nei gari taituahte a pan kiphal dandan nasep kawm in kaikhawm uhi.

 

Tedim Road ahi­hleh 2014 a District Incharge Minister Phun­gzathang in Paver Ma­chine zang a, a bawl hi a, himahleh kum 2 phial­lampi puahlouh a omta ahihna ah lampi kuakna ban ah tuilawng phumna dia lampi kantan a toh­siat bawlhoih nawnlouh a omte’n gari taituahte a ding in nawngkaina lian­tak tunsek hi.

 

 

NPLFM in Manipur buaina sukveng nading in ‘tripartite talks’ kawkmuh

Imphal, Jan 9: Naga Political Lead­ers’ Forum Manipur (NPLFM) in Manipur a econcomic blockade toh kisai buaina hihveng na ding in Centre Govt, Manipur government leh United Naga Cuncil (UNC) in ‘tripartite talks’ nei thei leh buaina veng thei ding hi’n Manipur Govt kawkmuh hi.

 

NPLFM thusuak dungzui in, khotang a nam tuamtuamte’n tulel a buaina hong kipatna ziak diktak gentam nuamlou ua, economic blockade toh kisai, tulel a O Ibobi Singh makaih Congress government vaihawm ginatlouhna leh nelhsi­ahna gah hidan in taklang uhi. SADAR Hills district bawlkhiak ding dalna in Nagate’n Manipur government toh Memo­randum of Understand­ings (MoUs) 4 ah suaikai khin hi. Congress MLA/ MDC leh Naga MLA-te’n Congress party a kipan kitawp ding a thupukna a lak hun ua, politics a helna leh buaina kipan hidan in NPLFM thusuak in taklang hi. Hichibang thiltung om mahleh Chief Minister in office paid­an nawlkhin in Jiribam leh Kangpokpi (SADAR Hills) district bawlkhia hi.

 

Inner Line Per­mit (ILP) toh kisai bill 3 passed a hih hun a, Churachandpur a thah a om mi 9te luang tutan vui hinailou hi’n leng taklang uhi. Hiai thu genveng dingdan kikumkhawm ding a Union Home Sec­retary in Manipur a hongveh hun in, Chief Minister in kou state sung thubuai ah hong kigolh­dah in, dan leh thupiak buaina state mohpuakna ahi chi’n genkhum hi. Tu in Chief Minister in, amah thugensate toh kik­alh in, tulel a state buaina toh kisai Centre in limsak utlou chi’n ngawh hi.

 

Manipur state mipite’n district thak 7 bawlkhiak ding a phut kei ua, himahleh SADAR Hills leh Jiribam district-te kia phu uhi. Govern­ment in dakkal tamlou sung a district thak 7 a bawlkhiak lamdang a sak thu uh leng taklang uhi. MLR & LR Act dungzui in, Manipur hill area-te Revenue thuneihna nuai ah om khalou himhim ua, tua toh kiton district thak bawlkhiakna dan toh kikalh hi a lak theih hidan in NPLFM in taklang hi. District thak 7 bawlkhiakna in state government lohsam ahi­hdan langsak a, khotang hoihzawkna ding a thu­pukna zukkik ding in­leng ngen uhi. 

 

 

AR-te ambush-na a kigolh PLA cadre 2 mat in om

IMPHAL, JAN 9: PRO, IGAR(South) thu­suak dungzui in, tuni Sep­patni in IGAR (S) nuai a 12 Assam Rifle person­nel-te’n May 22, 2016 a Assam Rifle personnel-te ambush-na a kigolh PLA hardcore cadre 2 mankh­ia uhi. Mat a om ‘self style sergeant’ Dinesh @ Son­outan in ambush-na a kigolh hidan in kipuang a, ambush zoh a PLA in lemlak a suahkhiakte toh a lem kibang geih hi. PLA cadre dang khat ‘self style sergeant major’ Jiten toh Assembly election ma a, Manipur hong guklut a sawmlaitak ua mat a om hi uhi. PLA cadre in a gen dan in, Manipur phai­zang bial pansan helpawlte kikhaikhawmna CorCom in “Operation Yenning” min zang a security force-te operation a bawlna ua thiltung hidan in gen hi. PLA sung a dinmun niamchik luah cadre-te ganhing bangmai a etkol leh niteng poimohte uh natawm nelhsiah in ua, dinmun sangzaw len offi­cer-te’n hamphatna teng­teng tang gaivek uh hidan inleng kipuang hi. Cadre-te’n a sungkuante uh con­tact number a kep ding uh phal ahihlouh ban ah mobile phone a zat ding uh leng phal hilou hidan in gen hi. 

 

 

Thangbiaklian Hangzo in a tup-le-ngimte puangkhia

LAMKA, Jan 9: March 4 & 8, 2017 a 11th Manipur Legislative As­sembly election om ding a 58th Ccpur AC a intend­ing candidate Thangbiak­lian Hangzo in tuni sun­ma dak 11 in YPA-GHQ Hall, Hiangtam Lam­ka ah a tup-le-ngimte puankhiakna (Launch­ing of Manifesto) nei hi. Hiai hun ngainatu leh deihsaktute paikhawm in Rev. Lianbenson Khup­tong, Exe. Secy., MELC in thumsak hi.

 

Aman a tup-le-ngimte a genna ah, long term goal in Pathian deih dan leh gamsung dan toh kituak a kivaihawmna leh ki-etkolna siamthak ding; singtangmite kivaihawm­na tuam pansan a kitund­ing ding; nek-le-tak zon­na toh kisai a i gamsung uh mahni kitoudelh zou suahsak ding; damtheih­na toh kisai a kikepna pi­ching leh kiningchingtak i gamsung a bawlkhiak ding; siamsinna toh kisai a India gamsung paidan toh kituak a siamsinna mun omsak ding chih ahi.

 

Huai ban ah politics lam ah, mohna neilou Tribal Martyr-te sihna toh kisai a thudik a vaihawm ding leh amaute tungtang a buaina genveng ding; Tribal Martyr-te zahna sangpen toh vuikhiak ahih theihna ding ua pan­lak ding; Manipur sssem­bly a hunlem masapen a singtangmite tanvou In­dia dan bupi a omsa Sixth Schedule puaklut a tangk­oupih ding leh a kintheilam a singtanggam teng a 6th Schedule a kizat thei­hna dia panlak ding; Separate State Demand hatsak a hunchiam nei a kilemna (time-bound and honourable solu­tion) om theihna ding a Tribal Legislators Forum bawlkhiak a, huai tung­tawn a State leh Centre Govt phuttouh ding; Sepna zohna toh kisai a singtangmite tanvou omsa (ST Reservation) kepbit ding chihte gen hi.

 

Economy & Devel­opment tungtang ah leng pan naktak lak ding leh education lam ah Dis­trict Education Commit­tee dinkhiak a mipi toh pangkhawm panlak ding chihte a tup-le-ngim ahi­hdan gen hi. 

 

 

YPA in innkuan 84 antang pia

LAMKA, Jan 9: Tuni zingkal dak 7 in New Lamka YPA Hall, Hebron Veng ah Young Paite Assn., New Lamka block in amau block sung a YPA units 12 huamsung a kho­sakna haksa diak innkuan 84 kiang ah antang Kg 10 chiat pia uhi. Hiai an­tangte ahihleh YPA New Lamka block in panpihna a, a hawm dia tunaizek a YPA-GHQ in a piak ahi.

 

 

Kho hausa thahna thu a bandh in Moreh ah hindan ngeina buaisak

IMPHAL, Jan 9: January 6, 2017 nitak dak 7 vel a meltheihlouhte’n Nongkham Gamnuom kho hausa Otkhomang Mate leh tualsung saptu­am chairman Tilpao Ha­okip-te a pimang nung uh a ni nawn Pathianni a, a luang uh sisa a muh­khiak a om deihlouhna khotang makaite’n tuni Seppatni zinglam dak 8 a kipan dakkal 16 sung daih ding bandh a bawl ziak un, National High­way 2 in a totkhak Border town Moreh leh Imphal- Moreh road dung ah hindan ngeina buaisak zou mahmah uhi.

 

Meitei Council Moreh, Kuki Chiefs Asso­ciation (Moreh Block) leh numei pawlpi tuamtuam in a nungthuap bandh bawl sung in thiltung deih huailou zak ding om keimahleh Tengnoupal district’s Moreh ah sum­sinna leh Tengnoupal tawnkha Imphal-Moreh road dung a gari tai teng­teng khawlsak in om hi. Pawlpi tamtak in leng hiai kithahna naktak in mohpaih uhi.

 

Mate Tribe Union in mohpaih thupuan bawl kawm in, tual thattute kiang ah hilhchetna ped­ing in ngen uhi. Ching­shanglak Rilram Yekkul Area leh Nongkham Sa­tang Village Authority-te’n leng mohpaihna sangpen puang kawm in a kigolhkha helte kiang ah maban a hichibang kithahna mulkimhuai tawpsan ding in ngen uhi.

 

 

First Alumni Meet-cum-Decadal Celebration nei

LAMKA, Jan 9: St. Mary’s High School, Tuibong a kai 2006-2007 batch-te saina in tuni, January 9, 2017 sunma dak 11:00 in St. Mary’s High School Campus ah First Alumni Meet-cum- Decadal Celebration kichi zang uhi. Hiai hun Lisa, Principal, St. Mary’s High School in thumna in pan a, Lunkhomang, Secy., Decadal Celebra­tion Committee (DCC) in vaidawnna thugen in, batch mate (L) Esther leh (L) Tabitha sunna hun zang in tua zoh in power point presentation tung­tawn in hun paisate lahna om hi.

 

Anto Maria, Head­mistress, St. Mary’s High School in 2006-2007 batch, hiai hun a kihelte a ding in thumsak a, alum­ni leh teacher-te a pan thugenna zoh in Lunkho­hao, Chairman, DCC in kipahthu gen in Ancy in thumna in hunkhak hi.

 

St. Mary’s High School ah 2006-2007 batch candidate 74 in class X exam ua, huai lak ah student 41 in first division a zou in, district pumpi a first divisioner, percentage sangpen ngah uhi. 2006-2007 Batch a pan percent 60 vel in Government leh private mun tuamtuam ah sepna ngahta ua, huailak ah MSPDCL a Deputy Man­ager, Military Nursing a Leutenant, Junior Lec­turer, Primary/Graduate Teacher, Nurse, Doctor, Theologian, Professional Footballer, Actor, Singer leh a dangdang tamtak om uhi. Batchmate a pan 2006 kum a District Lev­el Science Written Quiz leh All India Computer Exam a kipahman sang a om ban uah tu kum a MPSC Exam a lohching leng om uh hi’n Lunkho­hao, Chairman, DCC in gen hi.

 

 

ATWU makaih in Mass Awareness Campaign om ding

LAMKA, Jan 9: Zingchiang, Jan 10, Sep­nawnni nitak dak 5:30 in CYA Hall, Gouchinkhup Veng, New Lamka ah All Tribal Women Union makaih in Delhi hohna report leh Mass Aware­ness Campiagn om ding hi.

 

 

New Lamka Meet pailel

LAMKA, Jan 9: (L) Funny @ Haulal­muan’ innkuanpihte sponsored-na a New Lamka Youth Club (NLYC) in PT Sports Complex, Khomin­thang, New Lamka a New Lamka Meet a sai uh paitou zel in tuni’n football kimawlna ah quarter final tungta uhi. Hiai kimawlna ah team/ club 10 tel ua, tuni sun­ma dak 11:00 in VASA vs Lawmpa FC kimawl ua, sun dak 12:00 in FC Zion (A) vs UMF kimawl in sunnung dak 1:30 in KIZATA vs BFC kimawl uhi.

 

 

Electric Power in tuibuk tepsak

LAMKA, Jan 9: Vengnuam, New Lamka a om Nu Pampi m/o Su­anthang Guite in electric power/ machine zang in tuibuk tepsak a, ni khat in litre/thawl 8 vel tepzou mahleh tuibuk deih a tam mahmah ziak a kidaih zoulou hi’n gen hi. Amah tuibuk a zuak tung in a khut a hawt­thoh in tepsak a, huai dan a tuibuk tep pen gimhuai mahmah hi’n gen hi. Himahleh tu in electric power zang a tepsak ahihnung in bel buksung a dum/zanah a kiam leh kiamlou veng lel ahihman in tawldam­huai mahmahta hi’n gen hi.

 

 

 

 

 

 

 

NEWS TOMKIM

 

T. Guite, IPS, ADGP in kaisang

LAMKA, Jan 9: Thangkhanlal Guite @ T. Guite, IPS, tunai chin a IGP Zone III apan Additional Deputy General of Police (ADGP) a kaisang hi’n muanhuaitak thusuak in taklang hi. Amah kaisanna ah Paite Tribe Council: General Headquarters in kipahpih thu puang kawmkawm in maban ah a sep-abawl khempeuh ah Pathian ompihna leh makaihna ngetsak uhi.

 

 

SP/Ccpur leh OC-te meeting

LAMKA, Jan 9: Rakesh Balwal, IPS, SP/Ccpur in tuni sunma dak 11 in Ccpur district sung a OC thak-te toh meeting nei in, kimeltheih tuahna in singpi dawnpih hi. Manipur assembly election ding ziak in Ccpur district sung a Police Station tuamtuam a OC-te kisuankhia ua, tunitan in Lamka Police Station, Singngat, Thanlon, Parbung leh Sangaikot Police Station a OC thakte’n joint-ta uhi.

 

 

Road Safety Week zang

LAMKA, Jan 9: Lamka Police nuai a om Traffic Police-te’n tuni, Jan 9 a pan Jan 15 tan daih ding in Lamka khopi sung ah Road Safety Week zang uhi. Hiai hun ah ‘Road Safety’ toh kisai in poster campaign, road marking leh special drive nei ding ua, mipite’n kithuahpih chiat ding in ngen uhi.

 

 

Suangphuh hong ding

LAMKA, Jan 9: Zingchiang, Jan 10 sunnung dak 1 in Vungzaniang Guite in Lamka Hanmual ah a pasal (L) G Thangchinlam, former Editor, Thupuaktu daily newspaper leh a tapa (L) Ginkhanmuan Guite theihgigena suangphuh hong ding hi. Hiai hun ngainatu kuapeuh in uap ding in chialna bawl hi.

 

 

Suty mahleh DTO staff-te kai

LAMKA, Jan 9: District Transport Office ah driving license luite smart card a khenvek ding chihthu om ziak in tuni, Jan 9 leh zingchiang Jan 10 pen Government holiday himahleh District Transport Office/Ccpur office staff-te office kai in nasem uhi. Niteng in driving license luite smart card a khengsak mi 40/50 bang om gige hidan in thutut kingah hi.

 

 

Sunna:

 

Rev Lianchinkhup Taithul tulel a USA a om, tuni in Gari accident ziakin si hi. Aman ahih leh Zou LST ana sut banah United Zou Organization (USA) Founder member khat hi a, train tract crossing lai train in a phutkhak ziak a si hi’n leng thusuak in taklang hi. RIP.

 

 

 

 

 

 

 

…for more detail : Here