You are here: HomeRSS FeedsThe Lamka Post

The Lamka Post | October 09, 2013

Wednesday, 09 October 2013 13:44

Album honkhiak hiding
LAMKA, Oct 8: Mi tamtakte’n ‘Zouvakhu’ chih min a vuahsak uh Mrs. S. Chungnu in a sak ‘Kon Ngilhzou Diam’ chih album hong tung ding Oct 11, 2013 sunnung dak 3 in SYO hall, Simveng ah honkhiak hita ding hi.

 


WCO saina in Bible camp
LAMKA, Oct 8: Evangelical Organization Church (EOC) nuai a om Women Christian Organization (WCO) saina ing hong tung ding Oct 10-13, 2013 sung Jacob Taonamol, Gelmol ah ‘Hung kipan inla hung vak in’ Isai 60:1 na pansan in Revival Camp 2013 nei ding uhi.

 


Hiai hun ah Evan Nemkhol leh Pastor Genlal te’n Tanchinhoih gen ding ua, Rev. Lamkhogin, Executive Director, EOC in camp hongkhe ding hi.

 

Don Bosco in School Day zang ding
LAMKA, Oct 8: Salem Veng, Lamka a om Don Bosco Higher Secondary School in hong tung ding October 11, 2013, sunma dak 10:30 in amau school mun ah ‘The School Day Celebration’ programme zang ding uhi.

 


Hiai hun ah Shri Lungmuana Lakher, IAS, Commissioner, Veterinary & Animal Husbandry in khuallian hihna toh uap ding a, His Grace Most Rev. Dominic Lumon, DD, Archbishop, Imphal, Shri S. Minlianthang, IAS, Jt Secretary, MOBC leh Shri Joseph Lalrothang, ZEO/CCpur te’n functional president leh guests of honour in pang ding uhi.

 

MDC Muallum in hausate kimuhpih
LAMKA, Oct 8: Tuni zinglam dak 10:00 in, Muallum MDC, Grace Zamnu in a tenna inn Lailam Veng ah, a bial sung a kho hausate samkhawm in kum 3 paisa a MDC election a om nung a a bial sung a development work tuamtuam a sepkhiakte uh toh kisai houlimpih hi. Hiaite banah maban a 5 years plan tuamtuam a neihte leng hausate theih ding in pulakna nei hi.

 

MDC Muallum in hausate kimuhpih

 

 


Tuni a kimuh khawmna hun ah, hausate ban ah, government a pan development scheme tuam tuam a beneficiary te leng tel ua, tunung a government scheme te, tua sang a hoihzaw a sepkhiak theih ding dan gen khawm uhi.

 

Khopi sung ah Pathian thu gen
LAMKA, Oct 8: Lalpa Damna ministry kichite’n tuni’n Thangzam Cinema Hall, New Bazar ah "Lalpa Lungawi kum thu" thupi zang in crusade nei uhi. Hiai hun ah, Pi Vanlalrengpuii in ‘Lalpa Damna’ chih thupi a zang in Pathian thutak gen hi. Organiser lam apan thu kiza dan in, tuni a New Bazar a a neih mah bang un zingchiang, October 9, 2013 in SA Road Junction ah nei nawn ding ua, October 10-13, 2013 kikal sung, T. Dongzakai inn, Thangjam Road ah nei nawn ding uhi. Hiai hun ah, khentuam omlou, Pathian thu ngai khe ut kuapueh tel theih ding hi’n thutut kingah hi.

Khopi sung ah Pathian thu gen

 

IMNCI toh kisai sinsakna om
LAMKA, Oct 8: National Rural Health Mission (NRHM) nuai a District Family Welfare Officer (DFWO) saina in tuni zinglam dak 11:00 in DFWO conference Hall ah, Integrated Management of Neonetal & Child Illness (IMNCI) monitoring & Supervision toh kisai kisinsak na neih in om hi.

 


Tutung in, Singngat PHC nuai a sub-centre tuamtuam a Mo-incharge, Nurse leh staff te tel in, Dr. VC Pau, District Family Welfare officer (DFWO) in sinsak hi. Huailou in, a hongtung ding october 12, 2013 in Henglep PHC nuai a sub-centre te apan nurse teng ban ah, Block Programme Management Unit (BPMU) leh MO incharge teng in DFWO conference hall mah ah training nei ding ua, huai hun ah, HMIS leh IMNCI toh kisai kisinsakna toh thuah khawm ding uhi.

 

ZRF in guta khat mankhia
LAMKA, Oct 8: Tuni sunnung lam dak 2:00 vel in, Zomi Revolutionary Front (ZRF) in tuni sunnung dak 2 vel Lanva ah sum gu dia kisa Thangminlen 20, s/o Thanglun of Gelbung, Misao Lahvom kho kiang mankhia uhi. Lanva a om Lianpau te sum a guk sawm lai hi a, aman a sumbawm uh vasawk man a, a kiang nai a om ZRF ten a mat uh ahi.

 


Amah kipuan dan in, Lianpau te omdan, minute sawt sim kuamtak enkhia a, a inn sung ua mi a tawm deuhtak a, va guk sawm hidan in kigen hi. ZRF pawl in thuhilhna hoihtak a neih zoh nung un hiai bang a gamtang nawn lou ding a thuhilh in khahkhe nawn ngal uhi.

 


DC office ah meeting om ding
LAMKA, Oct 8: A hongtung ding October 11, 2013 sunnung dak 1:00 in DC office Chamber ah, District Level Committee on Central Scheme for Assistant to Victims of Terrorist and Communal Violence ten meeting nei ding uhi. Meeting hun ah, Ms. Jacintha Lazarus, IAS makaih in, SP, CMO, DSWO leh PO-ICDS te tel ding ua, helpawl leh namkal buaina ziak a sihna tuak, case thak 4 gen khawm ding uhi.

 

Director of Health Services in Lamka pha
LAMKA, Oct 8: Tuni sunnung dak 3:00 vel in, A.Bijoy Singh, Director of Health Services, Government of Manipur in tuni sunnung lam dak 3 in Lamka hongpha in, Damdawi inn hong enkhia hi. Hiai toh kisai, Dr. N. Paulginthang, Medical Superintendent, District Hospital in a gen dan in, Director in ahihleh, amah kimuhpihna nei a, damdawi inn toh kisai improvement om thei dingdan gen khawmna nei uh hidan in gen hi.

 

Truck accident ah mi 3 liam
LAMKA, Oct 8: Imphal apan Lamka zuan a tai Truck khat lupna pua tuni sunnung dak 2:00 vel in Torbung Bangla kiang Lamka lampang ah accident a, Driver tel in mi 3 liam uhi.


Huai a liamte ahihleh Driver Paphulo (28) s/o Achou of Wangwoo Imphal, handyman Nanaoba (22) s/o Manihar of Kumbi leh Robert (20) s/o Manglem of Sangaiprou, Imphal hi ua, Lamka Damdawi inn ah etkol in om ua, gimselua bel omlou uhi. Thutut kingah dan in, School tawp laitak ahihziakin naupangte lamlian lai a, a pai ziak un amaute a pelhna lam a kipuk hi’n thutut kingah hi.

 

 

Saikot MLA Nominee in PDS antang lakhia
LAMKA, Oct. 8: Food & Civil Supply (FCS)/CCpur nuai ah PDS antang Sept. 2013 quota MLA Nominee te’n la zom zel ua, 59th Saikot AC a MLA Nominee Seithang Haokip, in tuni’n 59th Saikot AC sung a PDS centre 60 a Sub Agent te zuak ding in pawkhia hi.

 


Tuni a PDS antang puak khiakte ahihleh AAY – 455qtls. BPL – 680 qtls. APL- 200 qtls ahi. Hiaite banah, a paisa October 5, 2013 ni’n 60th Singngat AC a MLA Nominee HK Sonmuan in PDS antang sub- Centre 30 a zuak ding in pawkhia hi. Huaite ahihleh AAY- 219qtls. BPL – 344 qtls leh APL- 100qtls hi a, Sangaikot area a PDS centre 11 a ding in AAY – 123qtls. BPL- 194qtls leh APL – 50qtls pawkhia uhi.

 

 

Pulsar bike khat kigumang
LAMKA, Oct 8: Police apan kiza dan in a paisa October 5, 2013 zinglam dak 1:00 apan dak 2:00 kikal vel in L. Paubiakmuan (28) s/o (L) Lamzakam of Vengnuam New Lamka in, amau inn verandah a Pulsar- 135 vom khat MNO2A/ 8717 meltheih louhte’n gumang uh chih Police ah report uhi. Hiai thu Police in suizui lel in, case bulh ua, FIR. No. 13(10)2013 CCP PS, U/S 380/34 IPC chiamteh uhi.

 

Ka uinou a mukha na om uh hia?
Zan Oct 7, sunlai in ka uinou (German shepherd) a mang a, a omna hon hilh theitu kiang ah kipahman hoihtak ka chiam hi.

 

 

Sd/- Khaisuanmung
C/o The Lamka Post

 

PMEGP loan interview kipan ding
LAMKA, Oct. 8: Prime Minister Employment Guarantee Programme (PMEGP) nuai ah scheme tuamtuam a loan ngente a ding in personnel interview zingchiang sunma dak 10:30 in DC/CCpur office a BRGF hall ah kipan ding hi.

 


KVIB: Oct. 9: Sl. No. 1 - 150; Oct. 10: Sl. No. 151 – 300; Oct 11: 301 - 450; Oct 14: Sl. No. 451 - 600; Oct 15: Sl. No. 601 - 674.
KVIC: Oct. 17: Sl. No. 1 – 150; Oct 18: Sl. No. 151 – 300; Oct 21: 301 – 450; Oct 22: Sl. No. 451 – 600; Oct 23: Sl. No. 601 – 651.
DIC: Oct 24: Sl. No. 1 - 150; Oct 25: Sl. No. 151 - 300; Oct 26: Sl. No. 301 – 450; Oct 28: Sl. No. 451 – 603.

 


Poice boundary ziakin Senapti bandh ding
IMPHAL, Oct 8: Kalnawn a kipan in Senapati district sung dakkal 48 bandh puan hiding hi'n tuni'n tribal pawlpi tuamtuam in thusuah bawl uhi.

 


Thusuak in a taklatdan in Kuki Innpi, Saikul Gamkai, Saikul Area Naga Peoples’ Organisation leh Sadar Hills leh Ukhrul apan MDC member omte'n Manipur government nuai a Home department in June 14, 2011 a thusuah a bawl tungtang zukkik ding in ngetna September 25 in ana peta mahle uh tunitan bangmah tangtun omlouh ziak a lungkimlouh etsakna a bandh bawl hiding hi'n taklang uhi. Thusuak in a taklatzelna ah, Imphal East district police boundary in singtangmite luahna Senapati district a Saikul Sub-Division a huamkhak ziak in, hiai police boundary bawlthak ding a Manipur home department kiang a ngetna bawl ua, himahleh tuni tan hiai ngetna pichin ahihlouh ziakin October 14 zankim a kipan dakkal 48 sung Senapati district pumpi bandh hiding hi'n thusuak om hi.

 


Huailou in tulel a kibawl Maphou Dam police station leh Purum Likli police station leng Senapati district thuneihna nuai a koih ding in ngen ua, huai banah ah police station leh outpost behlap ahihleh leng Senapati police station thuneihna nuai ahihding chih leh dan leh thupiak kepbitna ding paulap a zang a district leh sub-division gamgi omsate hei lamdanglou ding in state solkal kiang ah ngetna bawl in om hi.

 


Senapati district a pan pawlpi tuamtuamte sik-le-tang in tuni'n pawlpi nih KISG leh SANPO in hiai ngetnate Manipur home minister leh deputy chief minister Gaikhangam kiang ah va pia uhi. Thusuak in a taklatna ah, hiai ngetnate solkal in October 30 tan a, a pichin keileh kiphinna chituamtuam panding uh ahihdan taklang uhi.

 

 

KISG leh SANPO in Manipur solkal in phaizang bial a police gamgite keklian kawm a singtanggam aguk-agal a laksak zel hi'n ngawh ua, singtang leh phaizang district gamgi kichiantak omsa bawl lamdang nawnlou ding in ngen uhi. Huai banah dan leh thupiak toh kisai a bawl lemngai omleh policy hoihtak paipih a mipite theihsiamsak masak poimawh ahihdan leng thusuak in taklang hi.

 

 

Tuni a bandh ding toh kisai thupukna ahihleh Kuki Inn, Imphal a pawlpi tuamtuamte'n joint meeting a neih hun ua, thupukna a bawl uh ahi hi. Kalnawn a bandh omding toh kisai in tribal pawlpi tuamtuamte'n kithuahpihna hoihtak pe chiat ding in ngetna bawl ua, state solkal in ngetna kibawlte a limsaklouh ziak a bandh bawl a om ahihman in hiai ziak a thilhoihlou tung a omleh state government mawhna hiding hi'n thusuak in taklang hi. (NNN)

Pawl tuamtuam in Border Fencing toh kisai 'White Paper' ngen
Imphal, Oct 08: All Tribal Students Union, Manipur (ATSUM), All Naga Students Association, Manipur (ANSAM), Kuki Students Organisation (KSO-GHQ) leh Hill Tribal Council (HTC) in zan in India leh Myanmar gamgi a dai kibawlna a mun mahmah ah etna va nei ua, huai nung in Moreh ah hiai a pawlpi tuamtuamte'n joint meeting nei ua, huai ah gamgi dai bawl a om toh kisai in thupukna thum la uhi.

 


Thupukna lak a omte ahihleh kho omsa kimkhen a, a lai a gamgi daikhun chih pomtheih hilou ding; khosung a teng mite lemsakna tellou a gam leitang gamdang kiang a piak chih pomtheih hi ngeilou ding chih leh hiai nasepna naktak a dal hiding chihte ahi hi. Hiai a pawlpi tuamtuam kigawmte'n central leh state government

 

 

kiang ah hiai gamgi daibawlna thubuai toh kisai thuchiang omna - White Paper luikhe ding inleng phu uhi.
Tua banah hiai gamgi dai bawlna thu a nget a omte government in a ngeingaih keileh students pawlpite'n pha a sak bang ua panla ding uh hi'n thusuak om in taklang hi. (UNA)

 

BJP Manipur Special Category Status State ngen
Imphal, Oct 08: Bharatiya Janata Party Manipur Pradesh in tuni a 14th Finance Commission Teamte toh a kimuhna hun uah India solkal in Manipur Special Category Status State a koihding in ngetna bawl uhi.

 


BJP Manipur Pradesh president Th Chaoba in a taklatna ah Manipur in summuhna neilou leh zongtak a om ahihman in Special Category Status State a omsak poimawh ahihdan taklang hi. Manipur a Congress solkal in mipite khantouhna ding a bangmah semkhelou ahihman in state veh a hongpha 14th Finance Commission kiang a tua bang dinmun ngetna chang leng phawklou hi'n Chaoba in ngawhna bawl hi.

 


Finance Commission kiang ah BJP Manipur Pradesh in memorandum pia a, huai memorandum in ngetna chi 6 tun hi'n kigen hi. Tulel a Manipur BJP president Th Chaoba ahihleh Union minister lui himahleh kum nawn a Lok Sabha election tuhlou ding hi'n kigen hi. (NNN)

14th Fin Commission team-te kiknawnta
State tawn lou in sum hong tung hen: ADC
Imphal, Oct 08: 14th Finance Commission team-te'n Manipur ni thum a hong vehnung un, tuni'n Delhi zuan in kiknawnta ua, New Delhi zuan a, a kikma un chief minister Okram Ibobi Singh leh cabinet minister-te banah state sung a top officialte kimuhpih uhi.

 


Tuni a 14th Finance Commission toh meeting neihna hun ah chief minister in India gamsung a ding a naupang sih tawmna pen Manipur ahihdan leh damtheihna lam toh kisai a India a dinmun sangtak a om banah pasal sang a numeite laisiamna a khanghat zaw ahihdan taklang hi. Huai banah kimawlna lam a leng khovel theihtham a India tawisangtu ahihdan commission team-te mai a pulak hi.

 


Chief minister in India in Look East Policy a paipih toh kisai a South East Asia gamte toh kikawmtuahna ding a Manipur pen a "kongpi" (gateway) ahihziak in hiai policy a taktak a sepsuah pah hileh chih deihhuai sakthu taklang hi. Tuabanah zawnna, tuailaite a ding a sepding mumal omlouhdan (unemployment) thu toh kisai leng commission team-te kiang a tun a, Manipur gam leitang omdan toh kisai a niteng poimawh leh kulte kiningchingtak a om gige theilou ahihdan leh hiaite ziak a state dangte toh teh a tuantual zaw ahihdan leng taklang hi.

 

 

Huailou in Chief Minister in commmision team-te kiang a Special category state a koih a panpihna leh huhna a tamtheilam peding in ngen a, state sung a dan leh thupiak enkaina ding leh Autonomous District Councils (ADC) 6-te a ding kitoudelhna ding ngaihtuahsak ding leh Manipur gam leitang lianzaw gammang in luah ahihman in hiai gammangte kepna ding a panpihna peding in ngetna bawl hi.

 

 

14th Finance Commission kiang ah Manipur government in state sum zatdan leh muhna banah fund tuamtuam behlap kul leh poimawhte nouneltak a gelh in memoranndum pia hi'n thusuak om hi. Finance commission in state tuamtuam a phakna ua, a thil muhsuahte uh leh state tuamtuamte'n a poimawhte uh ana gente uh toh kisai October kha sung a final recommend bawlding uh hi'n kigen hi.

 

 

Huailou in, 14th Finance Commission team-te'n Old Secretariat conference hall ah Panchayati Raj Institutions (PRI), Urban Local Bodies (ULB), Autonomous District Councils (ADCs), Trade Association tuamtuam a pan palaite leh political party tuamtuamte apan palaite kimuhpihna leh amaute toh houlimkhawmna leng nei uhi.

 

 

Manipur a ADC 6 omte apan palaite toh a kimuhna hun uah, ADC palaite'n ADC tungtawn a sepsuah ding a Central sponsored government schemes leh programme-te sepsuahna dinga fund hong paite, Manipur solkal tawnlou a tangtak (direct) a ADC kiang tungsak ding in ngen uhi. State government tawn a ADC nuai a sepkhiak ding fund omte saina a hun sawttak a lut ziak a ADC in direct fund ngen hi'n kigen hi. Huai banah ADC khut a state government in department 26 piakkhiak ding a gen toh kisai sepsuahna ding a ADC fund pen centre a pan direct a, a hong pai poimawh hi'n leng gen uhi

 

 

Political party tuamtuam apan palaite toh kimuhna hun ah, Manipur tanggam a sports infrastructure leh tourism lam puah poimawh ahihdan, helna leh tuailaite lak a nasep ding omlou chih tungtang houlimna om hi. Manipur in tuisiang dawnding tasam gige ahihdan leh gammang tamtak puahlouh leh zunlouh a om tungtang leh state solkal in health sector privatise a sawm tungtang deihlouh thu leh kikawmtuahna lamliante puahhoih poimawh ahihdante commission team-te toh genkhawm uhi. (UNA/NNN)

 

 

Mizo party-te'n non-political New Zoram bawlkhiak sawm
Aizawl, Oct 8:  Zoram Nationalist Party (ZNP) makai Lalduhawma in maban a assembly election om ding a non-political party 'New Zoram' kichi bawlkhiak ding deihte chihlouh political party dang kuamah toh pankhawm sawmlou ahihdan tuni'n taklang hi. ZNP in a puankhiaksa bang in ZNP policy tungtawn a sum a panpihna hawmkhe ding ahihdan taklang a, hiai panpihna ahihleh laisiamte kia a ding hilou in, laitheiloute kiang a leng piak hiding hi'n taklang hi. Panpihna sum ahihleh kibang veklou ding a, mimal khat in khosakna a kipattheihna ding a piak hiding a, a mi zir a piak hiding a, mikhat kiang a Rs 5 lakh piakna om ding a, midang kiang ah Rs 1 lakh piakna om ding chih ahi.

 

 

ZNP makai in NLUP toh kisai a genna ah, tulel a state a vaihawmna len Congress in NLUP a kisaktheihpihna ding omlou hi. NLUP tungtawn a fund pen central fund a kipan ahihman in Congress in a semkhia chih thu hi a, central solkal a kipan sepcial package a hong pai hi'n taklang hi. Thusuak in a taklatdan in Congress in NLUP a ding in CSS a pan in crore 1 heikhia a, NREGA apan in 52%, Technical Mission & National Mission Medical Plan apan 14%, Bamboo Mission 17% leh IWDP apan 55% heikhia (diverted) hi'n taklang hi.

 

 

ZNP pan Duhawma in a genna ah, maban a kitelna om ding a vaihawmthei ding a vualzawhna a ngahleh Congress in a NLUP tungtawn a panpihna a hawm bang a hawmlou ding a party sum apan mipite kiang a panpihna sum hawm ding ahihdan taklang hi. Hiai thu pen vote muhna ding a policy kiguang ahihlouhdan leng taklang a, huai banah lampi hoihtak a puah hiding hi'n taklang hi.

 

 

B. Vanngura, Gen. Secretary, ZNP Transport Department in a genna ah Mizoram a kikawmtuahna lamlian leh kithuzakna omte hoihtak a puah hiding ahihdan leh Mizoram in a poimawh niteng vanzatte bukimtak a muhtheih a koih gige ding ahihdan taklang hi.

 

 

Tua banah 2008 in Lal Thanhawla makaih Congress solkal in Driver Welfare Committee bawlkhe mahleh driverte kiang ah panpihna bangmah piak hilou ua, huai ziakin Mizoram a ding a poimawh bangkim pawluttu driver pawlpite'n congress solkal ah muanna nei nawnlou uh hi'n taklang hi. Himahleh ZNP in Lalduhawma makaihna nuai ah Transport Department bawlkhia a, ZNP in vualzawhna a ngahleh state sung a driver - private leh solkal ate'n loh a kibang a ngahtheihna ding ua panlak hiding hi'n taklang hi. Huai banah driver-te haksatna tuamtuam omte ZNP transport department nuai ah tuttheih vek ding a ZNP toh pangkhawm in driverte tungtawn a state sung a khantouhna omtheihna ding lampi gelkhawm hiding hi'n taklang hi. (NNN)


HAC tung ah ANSAM lungkimlou
IMPHAL, Oct 8: All Naga Students Association, Manipur (ANSAM) in Manipur a singtangmi MLA-te kikhaikahwmna Hill Area Committee (HAC) in a nasep ding semkhalou leh Manipur a tuantual leh niamtak a khosa singtangmite haksatna donlou a, a minpu lel a HAC a om ziakin lungkimlouh thu taklang hi.


ANSAM president Seth Shatsang in tuni a Manipur Press Club a thuthaksaite kiang a, a gendan in singtangmi MLA-te HAC member hi ua, amaute'n singtangmite haksatna leh buainate a ngaihsak ding uh ahi chi’n taklang hi.


Himahleh tukum May 3 a Seijang khomite'n inn 36 omna Silent khua luh a, inn, gari leh van chituamtuam a haltumsakna thu uah HAC bangmah theilou bangmai a om hi'n taklang hi.


The Indian Constitution Article 371 (C) in singtang gam a buaina leh a tengmite haksatnate HAC mawhpuakna hi a, ahihhang in tukum mah October 1 a Manipur police personel pawlkhat Silent khua a va lut a tenna inn 3 a hihsiat ban uah, khosung mipi naktak a a patauhsakna thu uah leng HAC in kamkhat leng genlou hi'n taklang hi.


Huai banah Indo-Muanmar gamgi dai bawl a om toh kisa inleng HAC thuneihna nuai a thiltung himahleh HAC panlakna bangmah zakding omlou hi'n ANSAM makaite'n gen hi. Tua banah ah hiai gamgi thu a state solkal leh HAC in a huntak a pan a lak keileh maban a buaina thupizaw maituah ding hi'n taklang hi. (NNN)


Manipur High Court pisa Oct. 10 kihong ding
Imphal, Oct. 8: Puja suti ziakin Manipur High Court October 5 apan 17, 2013 tan kikhak ding a, himahleh October 10, 2013 ni in bel office kihong ding hi’n official thusuak om hi. Office ahihleh, zinglam dak 10 apan nitaklam dak 4:30 tan hon hi ding a, huchilou in October 17, 2013 tan khak hi nawn ding hi. Hiai tungtang thusuah a bawlna ah N. Rajnikanta Singh, Joint Registrar (Judl. & Bench), Manipur High Court in thubuai nei kuahiam a omleh October 10, 2013 ni zinglam dak 11 apan nitaklam dak 3 kikal in filed bawl thei ding chi hi.


UNC in Nagate a ding a budget tuam bawlsak ding in ngen
Imphal, Oct 8: 14th Finance Commission chairman Dr YV Reddy makaih a team member 16 Manipur veh a honghawhte kiang ah United Naga Council (UNC) in Manipur government tawnlou a Manipur a om Nagate a ding a budget tuam bawl dingsak ngetna in memorandum pia hi.

 

Memorandum in a taklatdan in, UNC nuai a kikhaikhawm Manipur a Nagate'n July 1, 2010 a Naga Peoples's Convention neih a om tungtawn a Government of Manipur (GoM) toh kilemna bawl a om hi'n taklang hi. Huai kilemna pansan in tu in, UNC in GoM leh Government of India (GoI) toh kihouna neilel a, huai kihouna a UNC in GoM thuneihna pawlam a Nagate a ding a "Alternative arrangement" a nget thu ah kikantuahna omlai hi'n taklang hi. Huailou in Indo-Naga peace talk gukvei neih a omta ahihdan leh a nanung pen August 30, 2013 a Delhi a neih a om ahihdan leng taklat in om hi.

 

 

Naga tungthu a kihouna tamveitak omta mahleh masawnna taktak omtheilou ahihman in Manipur solkal thuneihna nuai hilou, Nagate a ding a alternative arragement bawlsak louh ngal a lampi omlou hi. Hiai ngetna ahihleh Nagate kivaihawmna ding toh kisai hi a, khentuam nei Manipur solkal nuai a Nagate' leh a luahna gam ua khantouhna om ngeilou ding ahihdan leh Manipur a MLA 60 omlak a phaizangmite'n 40 tang ua, singtanggam liantak ah MLA 20 lel om ahihman in khantouhna kikhe mahmah hi'n memorandum in taklang hi.

 

 

Memorandum in a taklatzelna ah, 13th finance commission nuai ah Nagate luahna leitang leh singtangbialte a khantouhna nasep muhding omlou ahihdan taklang a, hiai hunsung in singtang bial ah project 19 guan in om mahleh khantouhna nasep khatlel leng muhding omlou hi'n taklang hi.

 

 

UNC memorandum ah 13th Finance Commission sung a singtangbial a project liantaktak 19 guan a omte taklat in om a, sepsuah leh pichin omlou ahihdan leng chiangtak a taklat in om hi.

 

 

UNC in a taklatzelna ah, Nagate leh singtangmite khantouhna ding a lampi omsun ahihleh Manipur solkal tawnlou a singtangbial leh Nagate a ding a centre in budget tuam a bawlsak a, huai tungtawn a singtangmite amau leh amau a kipuah kei uh leh Manipur singtanggam leh singtangmite a ding a khantouhna om ngeilou ding hi'n taklang hi.

 

Tuni a UNC in 14th Finance Commission kiang a memorandum a piakna ah L Adani, president leh Gaidon Kamei, general secretary in suaikai uhi.(NNN)