You are here: HomeRSS FeedsThe Lamka Post

The Lamka Post | September 12, 2013

Thursday, 12 September 2013 12:34

Govt in boundary diktak a thei kei: UCM

IMPHAL, Sep 11:  Nilaini a United Committee Manipur (UCM) thusuak in a taklat dan in, tulel a Manipur leh Central Government vaihawmtute'n Indo-Mynamar gamgi zul a state gamgi diktak bangmah theihna neilou uh ahihdan taklang ua, state political boundary kichian khung ding leh tulel a daikaihna thubuai a kintheilam a genveng ahihtheihna ding a mipi kiphinna pan ding uh ahihdan puang uhi.

 

Imphal UCM office mun a committee president Y Nabachandra in thuthaksaite kiang a a gendan in, state political boundary kichian bawlkhiat ahihtheihna ding a tulel a Indo-Myanmar gamgi thubuai toh kisai Central leh Manipur Government in gamgi kichian bawl ding a panla ding in phut in om chi hi. Manipur government in state assembly a emergency special session sam a gamgi thubuai toh kisai genkhawm ding leh thupukna kichian bawlkhe ding a phut uh ahihdan leng genbeh hi. (NNN)

 

TC Manipur unit in mohpaihthu puang 

IMPHAL, Sep 11:  Manipur state Congress government in suspension of operation (SoO) pact pansan in state sung a helpawl tuamtuamte toh kilemna suai kaihpih a, amaute tung ah license taktaklou pekhia uh chi'n Trinamool Congress Manipur unit in Nilaini in amohsakna thu uh taklang uhi.

 

Nilaini in party office mun ah press conference nei ua, Central leh state Government toh kilemna thu paipih helpawl tuamtuamte state government in gamtang thei ding a phalna pia hi'n Manipur Pradesh Trinamool Congress president leh MLA Kh Joykishan in mohsa mahmah hi. SoO pansan a kilemna suaikai helpawl tuamtuamte'n sum tam pipi demand bawlsek ua, mipite tung a siah dong uh hi'n gen hi. Helpawlte kiang a license piakkhiat a om in, state sung a sual nasepna paipihthei ding a state government in phalna pia hihiam chi'n dotna bawlkhum hi.

 

Zan, Sepnawnni a Churachandpur District Hospital mun a Kangleipak Communist Party-Nongdren Khomba group cadre-te'n huhamtak a state police personnel-te tung a gamtatna a neih thu utoh kisai state Trinamool president in naktak in mohpaih hi.(NNN)

 

State employee-te DA&DR 7% tan in pung ding

IMPHAL, Sep 11:  Nilaini in Chief Minister’s Secretariat mun ah Cabinet meeting poimohtak neih in om a, Manipur Cabinet in tulel a state Government employee-te tung a  65%  Dearness Allowance (DA) leh  Dearness Relief (DR) piak a om pen kha nawn chiang a kipan in DA leh DR 7% tan in khangsak ding in thupuk hi.

 

Official thusuak in a taklat dan in, Nilaini a Cabinet in  meeting a neihna hun ah state government nasemtute kiang a 7% additional allowances piakbelh ding a thupukna a lak zoh nung un, October kha a kipan state employee-te DA leh DR  72% tan in khangta ding hi. 14th Finance Commission mai a state financial plan puaklut ding thu toh kisai leng Cabinet ah genkhawm uhi. (NNN)

 

Investment project ah Assam in hihhoih

GUWAHATI, Sept 11:  Nilaini a apex industry body Associated Chambers of Commerce and Industry of India (Assocham) thusuak in a taklat dan in,  gamsung a investment project tuamtuam paipih a om 70% vel omte lak ah Assam in a 4na luahpha ban a northeastern state dangte sang in hihhoihpen suak hi.

 

Assocham thusuak dungzui in, March 2013 tan in Assam in public leh private sum nakte a kipan in Rs 71,342 crore vel ding sum pung kaikhawm mahleh state sung ah Rs 51,350 crore man huding investment project paipih a, 28% investment project-te kipan theilou in omtou denlai hi.

 

Haryana in investment implementation rate 82% ngah in sangpen hihna luah a, a zom ah Jammu and Kashmir (81.4%), Punjab (79%) leh Assam hi'n kivualsuak hi. March 2013 tan in Assam ah 22.5% investments puankhiat in om a, investment project 5% sang a tamzaw ding thil tuamtuam khenkhatte ziak in khawlsak in om hi. 

 

India state tuamtuam ah Rs 52,000,000 crore investment pokhethei ding investment project 43% vel dingte patkhiatlouh in omtou denlai hi. Investment 34% vel dingte puankhiat theihlou in tang den a, project 6% paipih a omte khawlsak in om a, project 3% vel a thu-leh-la bangmah theihbut in omlou hi'n Assocham national secretary general DS. Rawat in gen hi.(NNN) 

 

AFSPA in kum 55 mualsuahpihta

IMPHAL, Sept 11:  Armed Forces Special Powers Act (AFSPA) tuni in kum 55 in upata a, hiai 'black Act' in a sukkhakna mun a khosa mipite'n Act deihlouh ziakin kum 50 val bang kiphinna neita mahle uh, khovel pumpi a democracy lianpen India in ngeingaihlouh leh huhamtak a paipih veve lai ahihdan tuni thusuak in taklang hi.

 

Nilaini in United Naga Council (UNC), Sharmila Kanba Lup (Save Sharmila Movement) leh Just-Peace Foundation (JPF)-te'n AFSPA lakkhiat ding a deihthu uh taklang uhi. Pawlpi khat hihna zar in, UNC inleng a baihtheilam a AFSPA zukkik ding a phut ahihdan UNC president L Adani in thuthaksaite theisak hi. AFSPA deihlouhna ziak a government tung a mipite'n kum 55 kahtam a lohna Constitution of India nuai khua-leh-tui hihna nei a diak a North East mipite tung a nelhsiahna om ahihdan kilangsak ahi chi hi. Khovel leh gamsung pumpi ah AFSPA thubuai toh kisai thehzak in omta a, mipite vaihawmna gam chih minvuah ahih ngal leh India government in pan a lak poimoh ahi chi'n human rights defender Babloo Loitongbam in thuthaksaite kiang ah gen hi.

 

September 11, 1958 in AFSPA phuankhiat in om a, Sharmila Kanba Lup kichi kiphinna gumtu hunger striker Irom Sharmila in, tuni September 11 'Black Day' dan in ana minloh hial hi. Nilaini in Sharmila Kanba Lup banner nuai a numei pawlte'n leng Jawaharlal Nehru Institute of Medical Sciences (JNIMS), Porompat in Imphal kiang ah Black Day theihgigena dan in, sit-in-protest nei uhi. (NNN)

 

ATSUM in member thak 8; nasep pat hipahta ding

IMPHAL, Sept 11:  Nilaini in Imphal Nagaram a ATSUM office mun ah All Tribal Students Union, Manipur (ATSUM) member thak 8 laklut in om a, hiai toh kiton in ATSUM tribal issue toh kisai a nasepna panpahta ding ahihdan thusuak om hi.

 

Laklut thak a om member 8te ahihleh - Helen Kipgen in  deputy speaker thak len ding a, Satminthang Kipgen in assistant general secretary thak len ding a, Thangjalun Baite in external affairs secretary, Thangneikham Guite in secretary incharge of planning and mobilisation len ding a, Ch Nisuathang Aimol in secretary incharge of social and culture len ding a, ban ah R Machunlungpou in secretary looking after the disabled persons affairs len ding hi. ATSUM's advisory committee member ding in D Stephen Zeme leh Dr Helmang Touthang guan in om uhi.

 

Khalui a New Delhi mun a camping nei ATSUM makaite'n a taklat dan un, tribal issue toh kisai a gupna penuamlou tribal MLA peuhmahte tung ah All Tribal Students Union, Manipur (ATSUM) in 'anti-tribals' chi a puankhum ding in thupuk uhi. ATSUM general secretary Vareiyo Shatsang in a gendan in, ATSUM makaite'n New Delhi pansan Manipur Tribal Rights Forum, Delhi (MTRF-D)-te kimuhpih ua, Manipur a tribal mite dinmun toh kisai genkhawm uh chi hi. Prime Minister leh President of India kiang ah leng memorandum khat tuak thehlut in om a, PM kiang ah population census nanung pen pansan a Manipur a Assembly seats bawllem thak ding in ngen uhi. North Eastern states a ADC dangte toh kibang a Autonomous District Councils 6 upgrade ding thu leng memorandum ah taklat in om hi.

 

ATSUM President Muan Tombing, General secretary Vareiyo Shatsang ban ah midang bangzah hiamte'n New Delhi pansan a om All India Tribal Students Federation (AITSF), Manipur Tribal Rights Forum, Delhi leh civil organisation tuamutam a makaite kimupih ding in New Delhi mun ah camping nei uhi.

 

Nitamlou paita a ATSUM makaite'n a taklat dan un, Armed Forces Special Powers Act (AFSPA) chihlouh Manipur ah mipite nopsakna ding dan himhim bawl omlou a, kum 55 sung Manipur ah khauhtak in AFSPA zatkhum in om mahleh tu in singtang leh phaizang bial teng mipite'n a deihlouhna thu uh naktak a tangkoupih uh ahihdan taklang uhi. Gam leitang humbitna ding chi'n state government in panlazel mahleh singtang bial mipite nopsakna ding panlak chih om ngei nailou hi’n taklang uhi. (NNN)

 

Thumkhawmna om ding

LAMKA, Sept 11: EBC Hebron ah zingching, 12th September sunnung lam dak 3 in saptuam pawl tuamtuam apan numeite’n a 4veina ding in ‘Sualdouna’ in thumkhawmna nein awn ding uhi. Lamka khopi sung a sual douna chituamtuam ah numeite’n naktak in panla ua, Phailian, Tuibuang, Bijang leh Headquarter veng ah zu leh khamtheih chituamtuam tamtak man in hihsia uhi.  

 

Medical Supdt in mohpaih

Lamka, Sept 11:  Zan, Sepnawnni nitaklam dak 2:20 vel a Health Minister Pu Phungzathang Tonsing’ team in zan sunnung dak 2:20 vel a Lamka Damdawi Inn a veh laitak ua Hq Veng, 46th Bn Assam Rifles camp a kipan Assam Rifles uniform silh, KCP ki-surrender te’n police leh VDF omte mipi leh security-te mai a kilawmloutak a, a va soisakna uh Medical Supreintendentin mohpaih thu puang hi. Aman a genna ah, VVIP omlai a hiai bang gamtatna pen VVIP te muhsitna banah damdawi inn staff te bangmah lou a muhna ahihman in hiai bang gamtatna kuaman sunzom lou ding in ngen hi. Damlou gim mahmahte a dia gimna kibehlapna hi’n leng gen hi.   

 

Admission form kihawm lel

LAMKA, Sept 11: District Institute of Education & Training (DIET), Churachandpur, government of Manipur nuai a sepna nei nailou sinlai naupang pawl 10+2 zousate a ding in Diploma in Elemantary Education (D.EL.Ed) 2 years course sintheihna ding admission form kihawm lel hi.

 

Lunglutna neite a ding in DIET Centre, Headquarter Veng, Lamka apan in admission form laktheih ding a, huai a poimawh bangkim gelh in October 3, 2014 tan in hiai mun mah a piaklut ngai ding hi.

 

Hiai course apply theihna ding in general ah 50% mark muh poimawh a, ST/SC/OBC-te a ding in bel 45 % mark muh poimawh ding hi. Pawl XII a mark muhdan zil a selection bawl hiding hi'n thutut kingah hi.

 

Zomi Council in Ngetna bawl

LAMKA, Sept 11: Zomi Council in ngetna thusuah a bawl kimu in a taklatdan in, a hongtung ding October 25 - 27, 2014 sung Lamka Public Ground a The Third World Zomi Convention kichi khovel pumpi a Zomite a dia khawmpi thupi mahmah neih hiding hi.

 

Hiai hun zatding toh kituak a saptuam, student pawlpi, phatuamngai pawlpi, pawlpi tuamtuam leh mimal in leng programme bawllou ding leh hiai hun subuaikha ding a bandh, blockade, general strike leh rally chihte kuaman bawllou ding in ngetna bawl uhi.

 

Hiai toh kiton in, October 25 & 26 nitak chiang in ‘Be a Blessed Nation’ chih thupi pansan a thugen ding in saptuam pawl tuamtuamte biakinn a sawl hiding a, tua ahihman in hiai nitakte a programme dang ana bawl lou ding in leng saptuamte kiang ah ngen uhi.

 

Laibu honna om ding

LAMKA, Sept 11: A hongtung ding September 14, 2014 zinglam dak 11:00 in Rayburn College Auditorium, Hebron veng, New Lamka ah Lian Samte in a bawl "THE GOOD OLD DAYS" (A Bunch of Memories) kichi laibu thak honna leh latna om ding hi. Hiai hun zatna Paite Literature Society (PLS), Siamsinpawlpi, GHQ leh Chairman, ADCC, CCpur banah mi poimawh tamtak in uap ding uhi.

 

Science Congress a teldingte min suahkhiak hita

LAMKA, Sept 11: A hongtung ding October 11 - 13, 2013 sung  Manipur Science Centre leh Government Ideal Blind School, Takyel in hong tung ding Oct 11-13, 2013 chiang in State Level 21st National Children's Science  Congress - 2013 sai ding ua, hiai a ding in school tuamtuam apan student 7 telkhiak in om uhi.

 

Amaute ahihleh, Kangjamba Khuman of Foundation School, David M. Shoute of Rayburn, Chawnglemmawi of The Dawn School, Suanbiakson Hauzel of L. Foundation School, Nengneingah of Soikholal Ideal H/S, Harbir Kaur of Don Bosco Hr. Sec School, Calvin Ngamgin Touthang of Dr. S. Rahakrishnan FS leh Manbiakkim Thawmte of Dawn hi ua, amaute Oct 4, 2013 tan a Dr. Lalzagou Neihsial kiang a, a ki-report uh ngai hi. Amaute ahihleh tuma bangtan hiam paisa a District Level Competion saina apan telkhiak leng hi uhi.

 

ZYA leh ZSF in KCP te mohpaihna sangpen in mawhpaih

LAMKA, Sept 11: Zomi Youth Association, General Headquarters, Lamka in tuni a thusuah a bawl kimu in a taklatdan in, HQ Veng, Lamka West a om 46 AR pawl in a kep uh KCP helpawl kipekhete gamtatna mawhpaihna sangpen a mawhpaih ahihdan taklang uhi.

 

Thusuak in a taklatna ah, “Friends of the Hills People” kichi 46 AR pawl kepna nuai a om, helpawlte gamtatna lamdang leh mi tamtak dipkosak ahihdan leh mipi’n AR-te tung a muanna a neihteng uh bangmahlou suaksak hi’n taklang uhi. Hiai bang a helpawl kipekhete AR-te’n zalentak a khopisung a ut leh dah a, a khahzan ziak un KCP cadre-te leh AR pawl mawhpaihna sangpen a mawhpaih ahihdan leng taklang uhi.

 

Damdawi inn kichi damlou leh natna neite kepdamna ding mun hi a, damlou leh damlou kem a lungngaitak a om mite patauhsakna ding mun hilou a, himahleh KCP cadre-te’n kilawmloutak a vengbittute tung a khut a khak uh mawhpaih kawm in hiai bang a gamtatna in buaina huaise zaw tunthei ahihdan taklang uhi.

 

ZYA GHQ in hiai bang a gamtang KCP cadre-te tung a dan bang a gawtna peding a thuneitute ngen kawm in HQ Veng a om 46 AR-te a omna ua pan suankhe ding leh district sung a haksatak a muanna leh lemna tunding a om hihsethei ding peuhmah district a pan koihkhe ding in ngetna leng bawl uhi.

 

Tuabangkal ah, Zomi Students’ Federation (ZSF) inleng KCP (Nongdren Khomba) zanhal zek a government kiang a kipekhete Lamka Damdawi Inn a, a gamtatna uh mohpaihna sangpen a mohpaih uh ahihdan taklang uhi. Hiai bang gamtatna in hill area a haksatak a muanna hong om theipen deldep sak kia hilou in mipite lungtang ah lauhthongna tun ahi chi’n leng taklang uhi.

 

Thusuak in a taklat zelna ah, 46 AR te’n a kepte un hun paisa ahleng mun tuamtuam ah buaina bawlta ua, bangziak a, amaute AR uniform silh a khopi sung a nuamtak a gamtang thei uh hiam chih taklang kawm in hiai KCP helpawl AR te kiang a omte a paikhiak masiah uh ZSF daih maimai sawm lou ahihdan leng taklang uhi. 

 

DIG (Range - III) in Lamka pha

LAMKA,  Sept 11: S. Manglemjao Singh, IPS, DIG(R- III) in tuni sunnung dak 1 in Lamka hongpha a, Tuibuang a SP/CCpur office ah zan a Lamka Damdawi Inn a mualphoutak a Hospital duty Police leh VDF te KCP Surrender pawl in a vuak tungtang thu genkhom uhi.

 

Hiai thu ah Hospital Security duty incharge Holkholet in SP/CCpur ah complain a bawl dungzui in Police inleng FIR No. 79(9) CCP PS, U/S 447/186/333/353/325/34 IPC bulh uhi. SP/CCpur office ah SP/CCpur, SDPO/Thanlon, CO- Ist IRB leh OC/Police Station te tel uhi. Huai zawh nitaklam dak 4:00 in Tuibuang a 27- Sector Assam Rifles a Brig. Madan, Commander kimuhpih in thil omdan genkhom uhi.

 

MGNREGS kum 2013- 2014 a ni 8 a nasepna munding GPS la uh

LAMKA,  Sept 11: CCpur District ah MGNREGS kum 2013-  2014 nasepna ni 8 a ding order suak a, block tuamtuam in amau area sung a ni 8 sung nasepna ding plan a bawlna munte uh SDO/BDO staff te'n Global Position System (GPS) in lemla uhi. GPS a lemlakna munte uh na hoihtak a kisemna hiam chih Delhi apan satelite tungtawn in ettheih ding hi. Huai lou in kum 2013- 2014 apan in Job card nasepna thaman leng ni khat thaman Rs. 153/- hita ding a, Rs. 9/-  a pung chihna ahi. 

 

EE/PHED CCpur stay  

LAMKA, Sept.  11: Th. Baite, EE/PHED, CCpur apaisa Sept 31 in EE/Monitoring & Evaluation Divn Imphal a kisuan ding in order suak a, himahleh Govt in zan in order zukkik a, amah mun ah Dhaballo Singh, EE/Monitoring & Evaluation Divn Imphal kik nawn ding hi.  

 

Patta copy submit tam

LAMKA, Sept 11: Kangvai apan Lamka Police station kal Tedim Road kekletna(widening) ding toh kisai a Tedim road zul mun leh mual inn nei teng in patta xerox copy SDO/CCpur office ah submit ua, tutan in 100 valta hi. Office record leh a neitu tua omlelte kibanglou tamtak om hi.    

 

CDSA office ah Club Managers meeting nei

LAMKA, Sept 11: Churachandpur Distirct Sports Association (CDSA) saina in a hongtung ding September 14, 2013 in Lamka Public Ground ah, (L) Thonsonlian Memorial Distirct 2nd Division League, 2013 kipan ding hi. Hiai ding toh kisai intuni zinglam dak 11:00 in CDSA office ah CDSA nuai 2nd division a om team/club tuamtuam a manager ten meeting nei in, fixture bawl uhi.

 

CDSA lam apan thu kimu dan in, tournamnet hon ni, September 14 in, Manipur Hill District tuamtuam a Distirct Sports Association te apan official 5 chiat hong hoh ding ua, friendly match leng nei ngal ding uh hidan in gen uhi. (L) Thonsonlian Memorial Distirct 2nd Division League, 2013 a ding in team/club tuam tuam 24 tel ding ua, opening match ah, Headquarter Youth Club, Hq.YC leh Koite Youth Club kimawl ding uhi.

 

Charity match ah ZFC vualzou

LAMKA, Sept 11: All Manpur Football Association (AMFA) saina a hongtung ding September 15, 2013 apan State League, 2013, Imphal om ding kisakkholhna dan in tuni’n Football Club (ZFC) leh Kuki Sporting Club (KSC), Imphal te’n charity match nei uhi. Hiai hun ah, G. Thangkhosuanmung, Chief of Hiangtam Lamka in chief guest hihna toh uap in, official bangzah hiam in leng uap uhi.

 

Chief Guest, G. Thangkhosuanmung in a thugenna ah, Manipur state league 2013 a dia Zosuan namte lak a ZFC leh KSC te lak a selection ngah ahih dungzui ua, kuhkaltak a apan touh uh a deih thu gen hi. Huai ban ah, games and sports kichi in gamgi neilou ahih dungzui a, tuni a charity match neihna tung tawn a, khat le khat kikal a ki-itna a tut a deih thu gen in Pastor Ngamboi in player te a ding in thumsak na nei hi. Charity Match ah, ZFC in KFC 2-0 in uhi.

 

CJWO pawl in sit-in-protest nei ding

LAMKA, Sept 11: Zan sunnung dak 2:30 vel a, District hospital campus sung a KCP ki-surrender pawl in, Police/VDF te a vuak uh toh kisai, Churachandpur Joint Women Organisation (CJWO) pawl in tuni’n emergency meeting nei uhi.

 

CJWO lam apan thu kiza dan in, meeting hun ah, duty na mun a ginomtak a duty lai KCP pawl in hiai bang a khopi sung a gamtatna a neih pen uh a mohpaih thu uh puang in, a lungkim louh uh lahna ding leh, hiai bang thil a tun nawn louh ding deihna in zingchiang, Sept 12, 2013 zinglam dak 10:30 apan District Hospital campus ah sit in protest nei ding uhi.

 

Hiai hun ah, khopi sung a numei pawl tuamtuam, khentuam omlou, kuapeuhmah tel chiat ding in chial uhi.

 

Football trail cum selection test a din kuan ding

LAMKA, Sept 11: A hongtung ding September 13-15, 2013 kikal sung Khuman lampak sports complex, Imphal ah, State Level Inter School under 14(numei le pasal) football trail cum selection test om ding hi. Hiai ding toh kisai in DYASO saina in zan leh tuni’n Lamka Public Ground ah, district level trail cum selection nei ua, huai ah mi 16 telkhia uhi.

 

Lunkhosei Haokip, DYASO lam apan thu kimu dan in, State Level School, Under 14 football trail cum selection a dia telkhiak a om mi 16 te, September 13, 2013 zinglam dak 6:00 a New Bazar Bus Parking mun a Disrict team manager, kimuhpih chiat ding in theihsak hi. Hiai state level school under 14 (numei le pasal) football trail cum selection a, district ai-oh a kuan dingte, Vanlalkham Zote in makaih ding hi.

 

Car Mela neih in om

LAMKA, Sept 11: Tiddim Motors in tuni’n District Transport Office, Hmar veng ah, car mela hong nei uhi. Tiddim Motors official ten a gen dan un, hiai bang a Churachandpur a car mela a hong neih uh tutung a tawh sim in a 4 veina hita a, visit tu hoih mahmah ahihdan gen uhi. Hiai car mela ahihleh zingchiang Sept 12, 2013 tan nei zou ding uhi.

 

Headmaster leh DDO len

LAMKA, Sept 11: Vimala Raina High School in hun bangtan hiam sung Headmaster neilou a a om nung un, headmaster ding in tuni’n T. Donglianpau, Science Graduate Teacher in Thangkhanlal apan headmaster hihna charge la hi.

 

Traffice police duty ten BP Stroke ziak a puk Hospital ah pua

LAMKA, Sept 11:  Choilien@Barnabas, 50 S/o Thienkhogin of Tahiti Veng, Rengkai, tuni zinglam dak 11:30 vel in, Thangjam Road Laitui Pharmacy khang ah BP Stroke in kipuk a, damdawi inn puak tun himahleh, dam zoulou in si hi.

 

Muanhuaitak a pan thu kiza dan in, Barnabas ahihleh, damdawi inn a check up dia kuan, himahleh damdawi inn a tun ma a hiai bang thil tuak hidan in gen uhi. Hiai bang thil tun theih ahih phet in, Tipaimukh Road leh Thangjam Road junction a duty, Traffic police ten, Tollen to Phailian kikal a tai diesel auto khat man tang in, damdawi inn ah pawtou ua, doctor ten ahih theihtan un panla mahle uh hunkhe zou nawnlou uhi.

 

U-17 selection di’n kuan ding

LAMKA, Sept 11:  Zingchiang, zingkal dak 6:30 in CDSA office, Hiangtam Lamka ah U-17 trial-cum-selection final a tel ding in sumthianmang, Buanthanglun leh Zamthianmang te Imphal a Artificial turf ground ah Lalvullien Zote, President CDSA makaih in kuan khe ding uhi. CDSA president in a gen dan in Imphal a Artificial Turf ground ah zinglam dak 8 a ki-report ngai ding ahihdan gen hi.