You are here: HomeRSS FeedsThe Lamka Post

The Lamka Post | February 02, 2017

Thursday, 02 February 2017 18:59

Union Budget 2017:

Finance Minister Arun Jaitley in Lok Sabha ah Union Budget pekhia; MGNREGA ah Rs 48,000 crore guan in om

NEW DELHI, Feb 1: Tuni Sepnawnni in Union Finance Minister Arun Jaitley in April 1, 2017 a kipan ding financial year 2017-18 a ding Union Bud­get luikhia hi. A khatveina ding in, general budget ah tukum a railways budget guanlut in om hi. A mas­apen hilai ding in, scheme lamzangtak a sepkhiak theihna ding leh sum zat­khiak dingdan panpih ding ngimna in, budget luikhiak ding leng February 1 a suk­nai a om ahi hi.

 

Kiginni a kipan ding state 5 a election thu po­imoh om ding a tunma ni nih lel in a sap a bud­get luikhiak a om ahi hi. A tuambik a gakna thu­suah bawl a om ah, gov­ernment in poll maituah ding state-te a ding Union Budget a special scheme a puan ding Election Com­mission in kham hi.

 

Lok Sabha a Finance Minister Arun Jaitley in budget speech a neihna hun ah thupi tuamtuam 10 in budget proposal hawmzak hi. Huaite ahihleh Farmers; rural population; energizing youth; poor and under­privileged; infrastruc­ture; financial sector; digital economy; public service; prudent fiscal managemen leh tax ad­ministration ahi hi.


Budget highligts

RURAL POPULATION: Mission Antyodaya in gentheitak a khosa inkuan crore 1 huamkha ding hi. MGNREGA a ding in Rs 48,000 crore guan in om a, financial year paisate toh teh a fund tampen a kiguan masakna hilai ding hi. Tu in numeite kihelkhakna 55% hita ding a, aman­pha thei tawp a space technology zatkhiak ding chih ahi. Prime Minister Gram Sadak Yojana ad­ing in Rs 19,000 crore guan in om hi. State-te tel in FY 18 in Rs 27,000 crore zatkhiak hid­ing hi. Pradhan Mantri Awas Yojana a ding in Rs 23,000 crore guan in om hi. May 2018 tan a village electricity 100% tung ding in Rural liveli­hood mission ading in Rs 4,500 crore guan in om hi. Mihing lakh 5te ading in Mason training piak hiding hi. Panchayat Raj: Human resource reform programme patkhiak ding, rural programme ading in Rs1,87,223 crore guan in om hi.

 

YOUTH: Siamsinna ah kumteng a zilna gah piangkhia omte tehna paizia(system) hoihtak bawlkhiak ding, science lam uangbawl sem ding chih ahi. Second­ary education ading in Innovation fund bawl ding, UGC reforms toh kisai in, ranking pansan a College-te chiamteh a, thuneihna(autonomy) tamsem piakkhiak ding, SWAYAM platform patkhiak ding, entrance exam tengteng ading a National testing agency phuhkhiak ding, CBSE, AICTE leh body tuamtuamte zalentak a koih ding. Foreign pau a course toh kithuah Indian international skill centre 100 phuhkhiak ding, skill acquisition leh knowledge awareness patkhiakna ding in Rs4,000 crore guan in om hi. Leather/ footwear sector ah sepna tamsem bawlkh­iakna ding a Special scheme patkhiak ding. Tourism hatsak semna ding a spe­cial zone 5 bawlkhiak ding chihte tel hi.

 

Mizawngte leh dai kilkal a mite: Numeite ading a Rs500 crore corpus toh kithuah Mahila Shakti Kendras phuhkh­iak ding, numei leh naupangte ading a scheme tuamtuam ading Rs1.84 trillion tan allocation khansak ding, kum 2018 a phak natna, kum 2025 tan a TB natna suk­beina ding leh kum 2019 tan a, 29 tan IMR sukkiam ding a Action plan bawlkhiak ding, kum teng a PG medical seat behlap ding Jharkhand leh Gujarat a AIIMS thak nih phuhkhiak ding, medical device a ding rule thak patkhiak ding. Labour rights toh kisai in, labour omsa tengteng gawm­khawm a zangkhaizaw a kipuahthakna dan bawlkhiak ding, SC-te tung allocation Rs52,393 crore tan in khansak in om a; ST-te ading in Rs31,920 crore piak in om a, minority affairs ading in Rs4,195 crore guan in om hi. Senior citizen-te ading in, health details toh kithuah Aadhaar-based smart card piak hiding uhi.

 

FISCAL MANAGEMENT: Total bud­get expenditure: Rs21 trillion. Budget announcement tuamtuam a zatkhiak ding in Rs3,000 crore. Pension-te tellou in defence expenditure Rs2.74 trillion. Kibawlkhe lellel ministries tengteng ading in Consolidated outcome budget. FY18 ading a fiscal deficit GDP 3.2% tan in bikhiah in om hi. FY 18 a revenue deficit leng 1.9% tan in bikhiah uhi.

 

CHEAPER VS DEARER: Mobile, Pan Masala, LED lamps, Silver coins, Cig­garette, Processed cashewnuts leh Alu­minium product-te man khang ding a, Railway e-ticket, Fingerprint reader, Solar cells, POS machine leh Liquefied natural gas(LNG)-te man kiam ding hi.  

 

 

Nagaland ULB Poll thu a kinawk­tuahna ah mi 2 si, 10 val liam

KOHIMA, Feb 1: Zan Sepnawnni nitak a ki­pan Nagaland khopi tam­tak a Urban Local Bodies (ULB) poll a Numeite a dia 33% reservation piak thu a kiphinna toh kisai in kiphinte leh police-te’ kinawktuahna ah mi 2 in sihloh ua, midang 10 val liam uhi.

 

Zan Sepnawnni nitak a kiphinte’n Chief Min­ister TR Zeliang tenna inn lut a sawm ziak un buaina a om ziak a Po­lice-te thaukhahna ah mi 2 kaplup in om ua, midang tamtak liam uhi. Nagaland state commer­cial capital Dimapur ah curfew khauhtak koih in om chi’n Nagaland DGP LL Doungel in gen hi. State thuneite’n tu in state sung pumpi ah hunchiam om­lou in mobile internet ser­vice khaktansak ua, din­mun sousangtak khoudai ding in security personnel tamsem sawllut in om hi. Nagaland State Election Commission in, ULB 7 a polling hun ding kha nih a, a suan gamlat khaklouhna ULB dang khenkhat ah, tuni Nilaini in, dinmun sousangtak toh vote khiak in om hi.

 

State sung pumpi ah bandh tuamtuam tel a kha khat sung phial ding kip­hinna neitou den, Naga tribal pawlpi group tua­mtuam akipan kiphinte’n a bawlkhiak uh, Joint Coor­dination Committee (JCC) in state government kiang ah, numeite ading 33% res­ervation kibawl veina lian­tak a neih uh toh kiton in, poll paipihlou ding in ngen uhi. JCC in a taklatdan in, Article 371(A) of the Con­stitution nuai a Nagaland in kihumbitna chituambik a neih, huai bel custom­ary law zuih ding phalna leh numeite tung a politi­cal right piaklouh himhim chih thu bohsiatsakna hi­dan in gen uhi.

 

A paisa Seppatni in state government in poll hun ding suan gamla ding in thupuk khin mahleh zan Sepnawnni in Gauhati High Court in Nagaland government kiang ah, Nilaini a poll sai ding in theisak hi. State govern­ment thusuak dungzui in, state sung a ULB seat 32 lak ah seat khenkhat ah tuni’n vote khiak in om hi. ULB dangte a vote khiak hun ding ahihleh kha nih ading in suan gamlat in om khin hi.

 

 

 

Police in zu mankhe nawn

LAMKA, Feb 1: Manipur assembly elec­tion siangthou leh zalen­tak a neih ding deihna leh zukham ziak a khotang a buaina bawl omlouhna ding in SP/Ccpur panlak­na in kum paisa a kipan in Lamka khopi sung ah zu kham in om hi.

 

Huai toh kiton in zan nitaklam inleng Po­lice Drug Cell makaih in Police-te’n Khu­mujamba leh Rengkai Road area a zu zuakna munte check uhi. Huai hun ah zu litre 68 val leh IMFL litres 3 val mankhia uhi.

 

 

Congress in Feb 3 in candi­date list puankhiak sawm

IMPHAL, Feb 1: Manipur assembly elec­tion phase nih a kikhen a March 4 leh 8, 2017 a om ding toh kisai in Con­gress in February 3, 2017 chiang a candidate list puankhiak sawm hidan in thusuak in taklang hi.

 

Manipur Pradesh Congress Committee (MPCC) a pan thusuak dan in, Congress in party candidate ding a bawlkh­inta leh huaite February 3, 2017 chiang a puankh­iak hiding in taklang hi.

 

MPCC in ahihleh Manipur a assembly con­stituency 60 teng ah can­didate guan sawm hi.

 

Tua bangkal ah, All India Congress Commit­tee (AICC) president So­nia Gandhi leh Congress makaite kimuhpih ding in tuni, February 1 in Chief Minister Okram Ibobi Singh in Imphal a kipan New Delhi zuan hi. Huai ban ah Congress candi­date list toh kisai buai­pih a MPCC president TN Haokip leng tulel a New Delhi a om hidan in thusuak in tak­lang hi.

 

Congress Central Screening Committee meeting ahihleh zingchi­ang, Feb 2 in New Delhi ah om ding a, huai zoh chiang in Sonia Gandhi makaih in Election Committee meet­ing nei ding ua, February 3 in Manipur assembly elec­tion a candidate list ding bawlfel ding uhi.

 

Manipur ahihleh gam leipuak dan in sehnih - singtang leh phaizang in kikhen a, assembly seat 60 om lak ah singtang a kipan seat 20 leh phaizang a ki­pan seat 40 om hi.

 

Assembly election ding toh kisai a campaign ahihleh tunung sawtlou a kipanta dia gintak hi a, tutung Manipur assembly election ah party tuamtu­am om mahleh BJP leh Congress kibei ding hi’n kilang hi. BJP in ahihleh candidate 31 min puang­kheta a, Congress Min­ister leh MLA khenkhat Congress ticket tangkha ngei dia kilam-ente’n leng election campaign panta ua, himahleh election campaign ahihleh awl pai mahmah hi.  

 

 

KNF(N) in C-in-C ‘wanted’ a puan a om mohpaih

IMPHAL, Feb 1: Kuki National Front (KNF)- Nehlun faction in thusuah a bawlna uah, Manipur police in KNF(N) commander-in-chief ‘wanted’ a, a puan uh mohpaihthu suah uhi.

 

Manipur Police in January 30, 2017 in ‘crim­inal gang member’ nihte mat ahihtheihna ding ua a omna hilhtheite kiang a Rs 1 lakh chiat piak hiding in thusuah bawl hi.

 

Manipur police de­partment a PRO in ‘gang member’ nihte min a tak­latte ahihleh James @ Max @ Seiboi Guite (33) s/o Lamthang Guite of Bun­glung village, Saikul police station, Kangpokpi district leh James @ Henkholen Kipgen (36) s/o Somang Kipgen of Gangpijang, Kangpokpi district hidan in taklang hi.

 

James @ Henkholen Kipgen ahihleh KNF (N) a C-in-C hidan a taklat hi a, himahleh KNF(N) in ahi­hleh pimang a om mi nih thahna toh kisai a ‘want­ed’ a puan a om KNF (N) member nihte hiai thiltung a kigolhkhalou uh hidan a taklang in ‘wanted’ puan a om mohpaihthu taklang uhi.

 

KNF(N) in ahihleh nasemtu mi nih pimangna leh thahna a kigolh kha­lou uh ahihdan a taklat ban uah hiai thiltung pen migilou (gangs) khenkhat nasepna hidan in taklang uhi.

 

 

KNF(N) publicity secretary Gogou Vaiphei in tuni a thusuah a bawlna uah, January 26 a Itham khua a kipan nasemtu mi 3 pimangna a KNF(N) kigolhkhalou leh hiai thiltung pen mi gilou khenkhat gamtatna hidan in taklang hi. Huai ban ah state home/police department in hiai thu ngenteltak a suichian masalou a KNF (N) C-in-C tung a ‘wanted’ a puan uh lam­dangsa ahihdan leng taklang hi.

 

Thuchian suichianlou a ‘wanted’ puan a om pen a kisaipih thuneitute hih­khelh thupi mahmah ahihziak in C-in-C tung a ‘wanted’ a puan a om enthak ding in ngen hi. Huai ban ah Constitutions of India nuai a dan in a phal dungzui a mi giloute kintak a matkhiak ahihtheihna ding ua panpihna piak a poimoh leh pe zaw ding uh ahihdan leng taklang hi.

 

KNF(N) ahihleh hiai bang a hugam­tak a gamtang ngeilou leh maban a leng gamtanglou ding hi’n taklang a, nasemtu mi 2 pimang ahihnung ua thattute tung a gawtna piak hiding a thupukna bawl uh ahihdan leng taklang hi.

 

Huai ban ah KNF(N) C-in-C tung a ‘wanted’ puan a om in migiloute mat­khiakna ding naktak a dalkha ding ahi­hdan taklang kawm in hiai bang a hi­amgamtak a gamtangmite’n lemna leh muanna piangsak ngeilou ding hidan in taklang hi. Govt in mohna neilou C-in-C tung a ‘wanted’ a puan a etthakkei leh police department ahihkeileh a kisaipih pawlpite mohna hiding a, huaiziak a thiltung deihhuailou om leh police de­partment in a pomsiam ngai ding hidan inleng vauna thusuah bawl hi.  

 

 

Manipur High Court in UNC OB-te tung ah thubuai bulhsawm

IMPHAL, Feb 1: National highway a eco­nomic blockade bawl a om toh kisai a PIL bawl a om dungzui in High Court of Manipur in tuni’n United Naga Council (UNC) of­fice bearer teng min leng kaihkhawm a, a tung a case chiamteh sawm hi’n thusuak in taklang hi.

 

Huai ban ah state leh central government inleng High Court of Manipur thupiak ngaihsaklou hidan a taklang in court thupiak limsakloute leh zuilou mite tenkhiakna ding in theihsakna bawl hi.

 

National Highway a economic blockade bawl a om toh kisai a RK Joysa­na of Imphal in PIL case 46 of 2016 a bawl tung­tang tuni’n High Court of Manipur Chief Justice Rakesh Ranjan Prasad, Justice N Kotiswar leh Justice Kh Nobin in ngai­htuah (hearing) uhi.

 

High Court of Mani­pur in national highway hong ding a theihsakna tamveitak a bawlnung a leng honkhiak ahih nailouh ziak in tuni’n Manipur High Court in national hihgway a ni­teng poimoh tuamtuamte buaina omlou a puaklut ahihtheihna dia panla ding in theisak thak nawn hi. Huai ban ah hiai toh kisai a nasepdante hiai thu gennawn hun Feb 7 chiang a report kimtak pe ding in theisak hi.

 

High Court of Mani­pur in a taklatna ah, “NH- 37 leh NH-2 a buaina omlou a niteng poimoh puaklut ahi­htheihna ding a panla ding in theih­sakna bawl ahi a, theihsakna bawl a omsate ban ah 25.01.2017 leh 31.1.2017 inleng hiai toh kisai theihsakna bawl a omta ahi” chi’n taklang hi.

 

High Court of Manipur in tuni a theihsakna a bawlna ah, Union minis­try of defence, ministry of road trans­port and highways ban ah ministry of home affairs leh state consumer af­fairs, food and public distribution in a bik in NH-37 a niteng poimoh leh thautui chihte nawngkaina omlou a puaklut ahihtheihna ding a panla ding in theihsakna bawlthak nawn hi.

 

Hiai thu gennawn hun ding a bikhiah a om Feb 7 chiang a, a kisaipih state leh central government palaite’n hiai toh kisai a panlakna omte report pe ding in theisak hi. Huai ban ah hiai theihsakna zuilou a report-loute om leh a kisaipih mite tung a court thu­piak zuilou hidan a ngohna bawl hid­ing hi’n leng taklang hi.

 

Huai ban ah High Court of Ma­nipur in advocate general of Manipur government kiang ah UNC office bear­er teng min pe ding leh hiai thubuai a, amaute leng telsak ahihna ding ua UNC makaite min kaikhawm a pelut ding in theisak hi. State government kiang ah leng thautui, nek-le-tak leh niteng poimoh tuamtuam puaklut a omdan report ding in theisak hi.

 

Huai ban ah court in hun paisa a theihsakna a bawl bang in NH-37 bawlhoihna toh kisai report leng pe ding in state government theisak hi.

 

Hiai thu ahihleh Raj Kumar Joysana Singh of Moirangkhom Sou­gaijam Leikai, Imphal in national highway a economic blockade bawl a om pen constitution toh kituaklou ban ah dankalh a gamtatna hidan a PIL a bawl court in hearing a neihnung a thupukna a bawl ahi.

 

Raj Kumar Joysana Singh in court a ngetna a bawlna ah, state a dia van poimoh teng puaklutna lampi national highway a dankalh a economic block­ade bawl UNC pen ‘unlawful organiza­tion’ a puangkhe ding leh a kituahpih bang action la ding a court in state leh central government theisak ding in ngen hi.

 

Zan a hiai thu genna hun ah, Ma­nipur High Court in secretary ministry of defence leh ministry of road trans­port and highways kiang ah NH-37 37 (Imphal-Jiribam road) kintak a bawlhoih a, niteng poimoh leh thautui puaklut ahihtheihna dia panla ding in theisak hi.

 

Hiai thu ahihleh Consumer Af­fairs and Food Distribution Depart­ment in Jan 30, 2017 a theihsakna a bawlnung a Advocate General in re­port a bawl tungtawn a court in thu­piak a bawl ahi.

 

Huai ban ah court in ASG S Ru­pachandra kiang ah Jan 25 a thupiak bawl a om ban ah NH-37 bawlhoih a om hiam chih leh security kiningtak koih a om hiam chihte leng enkhe ding in thei­sak hi.  

 

 

IAS/IPS/MCS 17 suan in om; R Sudhan in DC/DEO Ccpur len ding

NEW DELHI, Feb 1: Narendra N Butolia, Secretary, Election Commission of India in tuni, Feb 1, 2017 in Chief Secretary, Govt of Manipur kiang ah Manipur assembly election ding toh kisai a IAS, IPS leh MCS Officer 17 hiai bang a suankual (transfer/posting) a om ahihdan theisak hi. Huai dungzui in R Sudhan, IAS, MD, MSPDCL & Commissioner of Excision and Excise in Lunminthang Haokip, IAS, DC/Ccpur khek in DC/ Ccpur in hong pai ding hi.

 

Officer transfer/posting a omte ahihleh hiai bang ahi. Amaute ahihleh khatvei thu a, a sepna mun ua join ton ding a theihsak hi ua, joining report leng ECI a khak ngal dia theihsak hi uhi.

 

1. Shri R Sudhan, IAS, (RR:2006), MD, MSPDCL and Commissioner of Excision and Excise as DC/DEO, Ccpur & RO (58-Ccpur & 59-Saikot AC) in place of Shri Lunminthang Haokip, IAS, (SCS:2005).

2. Shri Shyam Lal Poonia, IAS, (RR:2010), Secy., MPSC, Jt Secy., Tourism as DC/DEO, Thoubal in place of Shri M Joy Singh, IAS (SCS:2005).

3. Shri B John Tlangtinkhuma, IAS,(RR:2008), Di­rector, Communication & Industries as DC/DEO, Tamenglong & RO (53-Tamenglong AC) in place of Shri Maranchan Luikham, IAS, (SCS:2005).

4. Shri C Arthur, IAS, (RR:2007), DC/DEO Senapati and RO (47-Karong AC) as DC/DEO Imphal West in place of Shri Robert Singh Ksh., IAS, (RR:2010).

5. Shri Robert Singh Ksh., IAS, (RR:2010), DC/DEO, Imphal West as DC/DEO, Senapati and RO (47-Karong AC) in place of Shri C Arthur, IAS, (RR:2007).

6. Shri K Kabib, IPS, (RR:2005), SP/Senapati as SP/ Imphal East in place of Shri A.K. Jhalajit Singh, IPS, (SPS-2009).

7. Shri H Jogesh Chandra, IPS, (SPS:2010), SP/Bishnupur as SP/Senapati in place of Shri K Kabib, IPS, (RR:2005).

8. Shri L Mangkhogin Haokip, IPS,(RR:2007), CO, 8/IRB as SP/Bishnupur in place of Shri H Jogesh Chandra, IPS, (SPS:2010).

9. Shri Luckyson Kashung, MCS, Dy Secy., IT as ADC/Imphal East, ERO/RO (14-Yaiskul and 15-Wangkhei AC) in place of Smt O. Leimaton Devi.

10.Shri Balkrishna, Dy Secy, Revenue as DC/Kang­pokpi, ERO/RO (50-Kangpokpi AC) in place of Shri T Manihar Singh.

11.Shri Pawan Yadav, IAS, (RR:2014) as SDO/Ch­ingai/ERO/ARO (45-Chingai AC) in place of Shri K.G. Daigong (Shri Yadav will be holding this charge in addition to his present charge of SDO/ Ukhrul (LM) in Ukhrul District). 12. Shri Ravindar Singh, IAS, (RR:2014) AC to DC/Se­napati as SDO/Phainung/AERO/ARO (47-Karong AC) in place of Shri N Brajmohan Singh.

13. Shri M Rajkumar Singh, IAS, (RR:2015) AC to DC Thoubal as AC to DC/Imphal East/ERO/ARO (3-Khurai AC) in place of Smt Polly Makan.

14. Ms Roji Rajmukar, MCS, Adm Officer (Edu-U) as SDO/ERO/RO/Bishnupur in place of Shri Sha­mim Ahmed shah.

15. Smt Bhagyashree Laishram, MCS, ARC and Under Secy, Power as SDO/ERO/RO (30-Lilong AC) in place of Shri Firoz Khan.

16. Dr Th Charanjit Singh, MCS, BDO/Kakching as AC to DC, Thoubal, ERO/RO (31-Thoubal AC) in place of Shri S Abdul Hakim.

17. Shri L Beet Chandra Singh, MCS, Under Secy, MA­HUD as SDO/Saikul, ERO/RO (46-Saikul AC) in place of Shri L Sukumar Singh.  

 

 

25 AR-te’n mi 2 a pan galvan mankhia

LAMKA, Feb 1: 25 Bn Assam Rifle-te’n in zan nitak dak 11:30 vel in Koite khua ah pasal 2 a pan thau long 4 leh a tang hunkhop mankhia in Lam­ka Police Station ah pekhia uhi. Mat a om mi nihte ahihleh Seiminlun Sitlhou (41) s/o T. Sitlhou of Koite Village a pan in double barrel 1 leh a tang 6; Lal­chungmang Singson (22) s/o Liankholun Singson of Bethel, Ccpur a pan in 9mm pistol country made 1 leh a tang 2, single barrel 2 leh a tang 17, double bar­rel 1 leh a tang 12 ban ah M-16 tang 28 hi’n Police a pan thutut kingah hi.

 

Hiai thu ah Police in FIR No. 9(2)2017 CCP PS, U/S 400/34 IPC & 25(1-C) A Act bulh in sui­zui lel uhi.

 

 

MPCC Secretary lui Jyo­tin Waikhom in BJP zom

Imphal, Feb 1: A paisa Assembly election term 3 a Thangmeiband Assembly Constituency a kipan Congress candidate dan a election tuh Ma­nipur Pradesh Congress Committee (MPCC) Sec­retary lui Jyotin Waikhom in, tuni Nilaini in Congress Party a kipan in kitawpna lai pia in BJP zom hi.

 

BJP Manipir Pradesh President Ksh Bhabananda leh state BJP makai dangte’n tuni mah in Congress Secre­tary lui vaidawnna leh laklutna program sai uhi. Jyotin Waikhom in thuthaksaite kiang a, a gendan in, mem­ber-te kipumpiaknate mangngilh zen a Con­gress makaite’n kihazatna lungsim a neihte uh ziak a lungkimlou ahihdan gen hi. Thangmeiband Assembly Constituency a kipan 3vei election tuh khin ahihdan gen a, bat hau chih suanlam in, tu in Congress makaite’n election tuh theilou ding in nawlkhin chi’n gen hi. BJP Ticket Committee Convenor Th Chaoba in Jyotin Waikhom vaidawn kawm a, a gendan in, ma­ban state assembly polls ah kikhenna om ding ahi chi’n chiam hi.

 

 

Bible sin di’n Thangsu­anpau Chennai ah kuan

LAMKA, Feb 1: Thangsuanpau of Zo-ar Veng, Bungmual tuni’n Chennai a Blind Mis­sion College ah C.Th leh Computer sin ding in Lamka nusia in kuankhia hi. Amah ahihleh tulel a The Malsawm Initiative (TMI) a Chaplin ahihban ah Pathian’ thugen a mun tuamtuam a kizang ahi.

 

Amah ahihleh Than­lon Sub-Division sung Hanship khomi hi a, lou­vatna a maukang in a mit pekkha in huai a kipan khua muthei nawnlou in mitdel in om hi. Aman Aizawl a blind school a lai va sin in, a zohnung in Lamka ah hong paikik a, tu in Chennai ah Bible sin ding in kuan nawn hi.

 

 

Chin Lushai Conference pailel; Mizoram a pau kizang kia Zosu­ante pau ahikei: CM Hawla

Aizawl, Feb 1: Tuni Nilaini in Chief Minister Lal Thanhawla in Diakkawn YMA Con­ference Hall, Kolasib ah Chief Guest hihna toh thuah in, Zo Reunifica­tion Organization (ZoRO) General Headquarters saina toh ni 3 sung daih ding 125th Chin Lushai Conference zatna uap hi.

 

Chief Minister Lal Thanhawla in thugenna ah, Zo suante kipumkhat­na leh kihuaikhawmna ding in government in­leng a hihtheihtawp suah in panla lel chi’n gen hi. Government 3 nuai ah tulel in khosa mahle hang, Pathian in a hon thukimpih hunchiang a, kivaihawmna khat nuai a khatvei tei om khawm ngei ding ihi uh chi’n gen hi. Himahleh, huai hun a tun mateng, lametna hing toh hun bangtan hiam­sung i ngak uh poimoh ding chi’n gen hi. ZoRO panlaknate phat kawm a, Chief Minister in a gen­dan in, kum 1966 leh tu hun tanpha in, UNO toh kisai in ei(Mizo)-te lak ah theihna kibatlouhna lian­tak om chi’n gen hi. Gam leh nam veina toh kisai a Chief Minister in a gendan in, a gen kia hilou in, lungsim leh ngai­htuahna ban ah chihtakna leh dikna chihte i neih gige uh poimoh ahi chi’n gen hi. Hiai tungtawn a Zo suante ki-unauna hatsak semthei ding i hi uh chi’n CM in a lam et thu gen hi. Zo suante’n Mizoram kichi a Jerusalem uh hidan in pom uh chi’n CM Hawla in gen a, tua toh kiton in, Mizoram a khosa Zo su­ante kiang ah, nu-leh-pa hihna liangkou a kinga ahihlam phawk thak a, hiai dungzui a kalbi lak leng mohpuakna a koih ding in chial hi. Lal Thanhawla in a gendan in, Mizoram a pau kizang, huai kia Zo suante ahikei a, Mizoram pawlam a Zo suante pau zat teng­teng leng telkha vek a, kua­peuh in Zo suante pauvek hidan a i pompih ding uh ahi chi’n gen hi. Zingchiang February 2 in Conference sunzom nawn ding uhi.

 

Chief Minister ahi­hleh Parliamentary Sec­retary Hmingdailova Khiangte leh Kolasib MLA P.C. Zoram Sanglian-te’n kithuahpih uhi. January 29, 1892 in Fort William ah Chin Lushai Conference masapen neih in om hi.

 

 

Sielmat lei ah gari check

LAMKA, Feb 1: Tuni sunma dak 11 in Lamka Traffic Police-te’n Tedim Road, Sielmat lei kiang ah gari taituahte check ua, huai ah gari document kimlou a tai leh gari pei nihnei hek helmet khulou kigawm mi 21 val man ua, huaite TR cut sak vek uhi.

 

 

 

 

 

 

 

NEWS TOMKIM

 

ICI/KTP Khawmpi nei ding

LAMKA, Feb 1: Hongtung ding Feb 10-12, 2017 sung Sielmat ah Khristien Thalai Pawl, Independent Church of India in “Sandamna Ropui” chih thupi zang in 33rd General Conference nei ding uhi.

 

 

Street Light vaklou omlai

LAMKA, Feb 1: MANIREDA in Lamka khopi sung a Solar Street Light 200 val a koihte lak a khenkhat vaktheilou om ziak in hun bangtanhiam paisa in mimal leh pawlpi khenkhat in bawl uhi. Huainung in Steet Light vakloute leng vaktheita a, himahleh mun khenkhat ah a vakthei nailou leng hunkhop omlai hi.

 

 

National Lok Adalat

LAMKA, Jan 2: District Legal Services Authority, CCpur in Feb 11, sunma dak 11 in CJM office ah National Lok Adalat sai ding uhi.

 

 

Kuva ne khial in si

LAMKA, Feb 1: Kom kuva nekkhelh ziak a Lamka Damdawi Inn a etkol a om Sebastian Haokip, spokeperson of BJP, dam zoulou in tuni, Feb 1 sunnung dak 4 vel in si a, a luang Kaprang ah zingchiang in vui hiding hi.

 

 

SUNNA:

Upa (L) Khamzakai of Kamdou Veng Part IV, tuni sun dak 12:30 in awmna ziak in si a, zingchiang in Kamdou Veng hanmual ah kivui ding hi. RIP

 

Vungpum (102) f/o Thangnou, Gangpimual, tunitak dak 7 in teknat in si a, zingchiang in Gangpimualkoi hanmual ah kivui ding hi. RIP

 

Ngaineihthieng @ Bebem (33) d/o (L) Pumthang, Chiengkawnpang, zan nitak dak 12 vel in cancer ziakin si a, tuni’n Chiengkawnpang hanmual ah kivui hi. RIP

 

Lambiakthang (36) s/o H. Jamgou, Bungmual, Lennuam Veng, tuni zingkal lam in si a, tuni mah in Bungmual hanmual ah kivui hi.

 

Niangkhanching (68) sis/o Ngulzatuang, Kanan Veng, New Lamka, damlouhna ziakin tuni zinglam dak 9 in si a, a U Ngulzatuang inn, Bungmual pansan in kivui hi. RIP

 

 

 

 

 

 

 

…for more detail : here