You are here: HomeColumnsGapkhuamKa Na Zuihneel Khak Teite

Ka Na Zuihneel Khak Teite

Written by  Pauzagin Tonsing Published inGapkhuam Friday, 05 December 2014 02:29
Ka Na Zuihneel Khak Teite

~ Pauzagin Tonsing

 

A bangkha kitangkha a diam ah khotang vaikhawng ana kipawng awlmoh mahmah tei a, khotaang kipawlna tuamtuamte khawng ah ana kihel in, zuihneel (experience) bangzah hiam ana kineitei sam hi. Abiik in Siamsinpawlpi (SSPP) ngial ah chu ka hun hoih sungteng i chi hia ahihkeileh ka hansan hun teng i chizaw hia ana kizangkha chih di ahi sim hi.

 

Pawl X ka simlai un Don Bosco High School ah SSPP Unit a Finance Secretary ka na lenkha tei hi in ka kithei a, huai hunlai in khawmpi leh Sports kha a nuam thei mahmah a, makaite lah piching in a kingaklah thei mahmah hi. Akum a i hisaapleh kum 20 paisa in chih didan chu ei ve, 1990 khawng ahi. Namlam zir in Pearsonmun a lawmpa Haukhenmangte’ inn ah a kidur thei mahmah a, zan dak 11 khawng in kipaikik, lawmte toh IB Road tan kiton in huai ban kei kia in Zomi Colony, Lamka Hanmual zotna lampi mial beengbuung tawn in zan dak 12 khawng in i hong paizaw ‘chimul’ a chih uh kithei ve aw, thou sisi mai sam ei ve.

 

Huchi in Pawl X zou Imphal Brighter Academy ah SSPP chih omlou ahih chiang in ei mite kipawlkhawm in Paite Student Union chihpian hiam in Dr Zamzachin Guite-te’ inn ah kithuahkhawmna khawng kinei a, hun tawk in nuam a kisa mahmah hi. Pawl X zoh a zalenna hong om zek pen zangsiamlou in Class XI second year na diing in Lamka a Bethany College a kai in ka hong dur mahmah nawn uhi. Hiai ah SSPP Branch ka hon phutkhe nawn leuleu uhi. Heutupa Eugene Chinkhansiam-te lawi toh ka hon nawk tou noknok ua, a nuam chih di ahi di.

 

SSPP Bethany College Branch min in akhatvei na diing in Paite Vernacular Worskhop kichi Paite Literature Society (PLS) leh Tribal Reseach Institute (TRI) toh kithuah in ka hon sai uhi. Kilunglut tak ahi diing a Lamka khosung a High School om teng, 20 val, khe a siksuak in chialna ka hon bawl ua, Hiangtam Lamka a YPA Hall lui pen omlai hi ven, dim zen in naupang leh sinsaktute a hong paikhawm uhi. Hiai hun in Paite Laipau a pianthakna kichian, kilatthakna khat ka na neikha hi. PLS lamte’n lohching hon sa deuh uh chu ahi di ua, kou gen leh ngetbeh hilou hon sum sanction uh tawm hon sa uhi.

 

Kihalh leh khel hunthou ahih chiang in Bethany a Class XII zom peihlou in Churachandpur Govt College ah ka kisuantou leuleu hi. Kisuan tou panpan chilou di in SSPP CCpur College Branch Secretary diing in a hon man pah leuleu ua, kihel zel himai. I tuina lam a zaw kilangh pahpah kihi maithei.

 

Huchi in Diphu Govt College, Karbi Anglong ah B Sc ka hon zom nawn hi. Huai hun in eimi siangset 11 College ah ka kai uhi. Omna lamlam a dur chih mahtak SSPP Diphu Branch ka hon phuan uhi. Huchi in i kiang a pau kitheihpih hun khop bang in a hon zom ua, Diphu Govt College ngial bang ah Literary Meet a kidemnate ah Poem Recitation in Paite leh Essay Writing in Paite bang ki-om sak in, a kaiteng telkim in Medal 6 (item nih a Gold, Bronze leh Silver) kha Paite pau a dia reserved himai hi. Student Union election chiang bang in mi tampi di hon sa ua, hong maivil phaphet lou uhi. Tuakia hilou in khatvei bang ngial chu Congress leh CPI kituhna lai ah SSPP tosawn in Magazine Editor post lawmte khat k’on tuhsak uh chu a nuam churchur thou mai.

 

Sinna tuamtuam zoh in Lamka a om den di dinmun ki-om hi. Huchi in 2003 apan in Heutupa H Mangchinkhup’ President na nuai ah SSPP GHQ ah General Secretary-na len in kisousang tou mahmah hi. SSPP bangle zuak thak ek a, a dinmun bangle dopkang ek hoihsakna om in, SSPP image himhim leng kaihsangtouh hoih kisa in, tua diing a ngaihtuah ek nung in kum 3 a dinsuah zoh nawn in a om dia aw chih tanpha kigenkhawm hi. Kiphuahthakna dia zaw hun ana lut mah ahi chih theih hi. President fel tak zuih ana nuam mahmah hamham a, vaipote bang kithutuak in kilchih kivehkual kha hi. I zoudawn lam awlmohna lian mahmah ahih ziak in ‘Zoudawn Tour’ kichi sek a, tuni chiang in pawl tuamtuam in awlmohna tuamtuam leh ngiim tuamtuam in ‘Zoudawn Tour’ neinei uhi. Zoudawn kia hilou in SSPP Headquarter leh Joint Headquarters omna teng a team in va kisiksuak vek in, haksatna tuamtuamte amun mahmah a genkhawm in, mailam paidan diing kikupna urhsuun deuh a neih theih in a om hi.

 

Zoudawn a i siamsinna awlmoh a, naupangte a dia panlak theih dandan a la in, Zoudawn lam a Unit leh Block-te phawn halh theih bangbang in kihih tou hi. Unit leh Block khawng hong thou khe iai-iai in Block khawmpi bang kinei thei in nuam va kisa hun tawk hi. Huchi kawm in siamsinna innte khatkhat a puahphat theihna diing in pan kila a, concerned MLA/Minister leh Pawlpi tuamtuam bang kihoupih in target masa bang Bukpi nihvei thumvei va kisiik tei hi. Huchi kawm in SSA toh pangkhawm in Lungthul khawng ah Bridge Course chi in coaching khawng kihih a, Sinzawl a School bang kipha thithe sam hi.

 

Pawlpi sung mahmah hatsak ngahna lam tuamtuam ah om hi. I pawlpi term thak kipat teng a kithakphuan gige ahihna ah hihdan khat neih ngai ahi chih kigenkhawm khiukheu gige hi. On-going work kipiaksawn chih lah omlou, file luite et taktak diinglah omlou pen SSPP GHQ Office a full-time nasem omlouh pen a ziakkhat in kikoih hi. Huchi in Chowkidar/Peon khat leh Office Assistant (Executive Assistant) khat kikoih a, huai in nasep le zangkhai sak mahmah hi. Tupdan tangtun man ngial hileh GHQ office a sem diing Officer khat om beh lai diing chih ahi a, kipichin manlou hi.

 

SSPP in siamsinna i pibawl mah hinapi in India Solkal huhna toh SSPP Residential School i neih uh fund muhkichian louh ziak a muihthei mai dinmun in a om hi. Asaite toh tha, sum leh ngaihtuahna tampi mah toh beih in a om a, vangneihhuai tang in huai hunlai in Pu T Phungzathang in TD Minister a lenkha zomah a, dingsuah thak thei in a hong om hi.

 

Huan, SSPP Scholarship Trust kichi heutumasate’n ana bawl uh kuapeuh in hoih i sak uh ahi. Ahihhang in phuankhe mahle pichin theihlouh in a om a, koisan tak a khial hiam chih ngaihtuah leh genkhawm ek in a om nawn hi. Kum khatval vingveng heutu masate’ ngaihdan leh kawkmuhna toh a kisui nung in SSPP Foundation Trust (SFT) chi in, ama a pichintheihlouhnate en kual in bawllem in kipan nawn hi. Hiai SFT tuamna mahmah ahihleh SSPP Presidential Election hun in SFT member-te leng President teeltute mah in teel ahi. Ngun tak a ngaihtuahte a diing in Scholarship Trust lai a function theihlouhna bangtan hiam amu ban di un ka gingta. Mihing ngaihtuahna kibanglou, hoih kimlou, muhdan kibangkimlou ahihna ah Presidential Form of Organisation i hihna uah a hoihlou om hun ale SFT pen pukse lou diing chih kha deihpi khat ahi. President in a Cabinet leh member-te khek zihzeh in in buaise in, President in Standing Committee thuzoh tawplehle SFT chu tangtak a ana ding giugeu ding in, a sep ngei mah ana sem miaumiau thei diing chih ahi hi. SSPP a chipzakna dang hong tun hun a leng SSPP image bawlthak a, hun teng a rebuilding chih gige louh diing.

 

Tuaban a sum muhna diing bang ahle i lak a khosakna hoihzaw deuhte’n a neihdandan uh hon thohkhawm theihna di ua SFT in lemtaang a bawl ban ua SSPP GHQ malakna a SSPP member chih pankhak theihna diing ngimna in SSPP Annual Membership, SSPP Patron leh Life Membership fee apan percent bangzah hiam SFT a lut diing, tuaban ah nautang in a thoh theihna diing ua SSPP Flag Day bawl a, hiai ni a public lak a fundrive zoh dandan SFT a lut diing chih khawng kiguang hi. Puahthak apan tuni chiang ah paitou zel a, SFT a gah masate muh theih in a om ua, tunung ale SSPP mahmah in hamphat pih pah theih diing a i om man un kipahhuai mahmah hi.

 

Awlmoh mahmah dang nawn ahihleh SSPP pen Skul kaite’ pawlpi ahihlouh diing, i nam lak a naupang lamteng a huam diing chih ahi nawn leuleu hi. YPA in kum bikhiah chet om keimahleh naupanglam a huam kei a, paidan ngeina ah SSPP in skul kaiteng a huam hi. Huchi kallak ah skul kailou i jat sung ua naupang tampite a diing mun a om kei hi. Huaiziak in SSPP pen ‘exculsive’ ahihlouh diing in ‘inclusive Pawlpi’ ahih diing chih kigenkhawm hi. Heutumasa Pu L Chinkhanlian-te hun, Pu N Thangkhomangte hun khawng a hiai ngaihdan ana kivawkkheta ahihman in kum 10 paisa a makaite na tawm toh kigenkhawm hi. Thupukna ana laksate khawng uh hon gen in, tuate sepsuahna bang in ‘Inclusive SSPP’ hih hoih sakna hong lian mahmah hi.

 

Tuaban ah i Nampi Pawlpi in leng Insitution a jatbing student organisation neih hoihlou sakna nei in, huan ei lak mahmah ah leng Insitution based a SSPP vaipo diing bangle ahithei deuh nu-le-pate’n hon phallou uhi. Kum khat mahmah sui leh suut ahih nung in, tuateng kigawm in Insitution a SSPP Unit pen Village a Unit koihzawk diing in thupukna kila hi. Milip toh houlim a kigemkhawm theilou ahihna ah chi in leaflet khat copy sing bangzah hiam press a sun in mipite theihsiam sakna diing in inn chih a kihawm hi. Ahihziak in, ei lawi kikhekna pom siam pahpahlou i hihna uah a hong lohchinna diing in a tompen in kum 5 bang lut diing ahi chi kawmkawm in huai nasep kipan hi.

 

Awlmoh dang mahmah nawn ahihleh Mizoram SSPP leh i nam vai uh ahi nawn hi. Muhdan chiangtak in Mizoram ah Paite in kimin mahle uh khankhiakna kibanglou, kipatna mun kibanglou leh ngaihdan kikalh taktak lak ahihna ah makaite uh nasep haksa ahi chih a kimuhpih mahmah hi. Huchi kawmkawm in SSPP Mizoram hatna diing in MZP Headquarter toh kizopna hoih tak neih ngai ahih kimu hi. Aizawl a MZP HQ office na tawm SSPP GHQ in veh in, MZP HQ inleng Lamka a SSPP GHQ Office bang hong veh in sepkhawm tuamtuam kinei thei hi. Siamsin vai chauh hilou in Mizoram a i jatte’ khantouhna diing bang SSPP HQ makaite ban ah eimi intellectual-te toh Aizawl khawng a kikum khawm thei in ki-om a, huan huailai a Mizoram CM Pu Zoramthanga a Office a va kiveh in, huai hun a Opposition Leader Pu Lalthanhawla bangle a inn ah va kimu hi.

 

I Pawlpi i hatsak chiang in ei sung chauh hilou in kim-le-kiang ate baanpha ban in ki-om hi. Amasa in Zomi Students Federation hatsak ngai ahihdan kigeelkhawm ek in, puah theih bangbang in kipuah hi. Ahihhang in SSPP bang a tribe dangte a ana hat khollouh ziak un kipawlkhawmna bang nawngkai sak hi. Huchih hun in leng a tribe a student organisation dinglah simsimte bang bawllem pih in, tosawn in Zomi sung a tribe om teng kimtak a ZSF a tanmun kichian nei in kikoih thei hi. Tuaziak mah ahi diing a tuni chiang in ‘ZSF Vaanglai’ khawng a chichi uhi. State level tan bang ahle ZSF phawkphak in hong om a, Tribal student union tuamtuamte gen ahih chiang in ZSF zong minlohkhak in hong om ban hi.

 

Huan, Churachandpur District Students Union (CDSU) bangle One Man organisation dan in ana om a, student organisation-te kinawktuahna kaal ah dingzou taktak lou in a om hi. ‘Startegy tuam guan kuul eh’ chi in hihdan khat hon kinei hi. Huchi a dingzou vetlou ahihleh ZSF in CDSU role le play kawm mai ni chi in i District issue tuamtuam kikhoih in kihatsak mahmah hi. Huchi dinmun a om chiang in CDSU constituent member ZSF a omkha loute lam apan kipawlkhawm hoihsakna hong lian hiaihiai hi. Strategy guan pen hong lohching in CDSU ah kituaktak in sepkhawm theih in hong om a, a hathatte thunun mai hong hilou in Churachandpur a student organisation-te platform khat hong kikop thei nawn uhi.

 

Huchi in CDSU platform zattak hong suak nawn in State Level a ATSUM zong puahthak ngai ahihdan hong langkhe nawn hi. Huai hun in Pu E Vungkholian leh Washington Shinglai in ATSUM pumpuak uhi. Pu Vungkholian va zongkhia a bangchi puahthak diing hiam chih kikum diing in SSPP in mi bang kisawl hial hi. ATSUM function theilou a om puah hoihsakna in Hill District a student makai tuamtuamte toh kihouna khawng kinei in hun bangtan hiam nung in puahphat hong ut chiat uhi. Huchi in Senapati District Students Association (SDSA) makaihna in Senapati District Headquarter ah kiteelna kisai a, ATSUM dinsuah in hong om nawn a, himahleh heutupa E Vungkholian in President nna len nawnlou phot hi.

 

I vaanglai ana om chiat, i zuihneelsa (expereinced) ana om chiat in hunlui khawng i sut chiang a i lungleeng in, akhenleh nuam kisa, a khenleh khasiat tha suak, a khenleh sepbeh tuak i sak tam a tam, va sem dek hiallele upat nung a football pek mah kibang di, a hon denkhak hial keileh tai a kidelhzou nawnlou. I hun lai chiat in i nam leh jat a dia hoih i sakte kisuum hetlou a tamthei pen sep sem chiat ni.

 

© October 15, 2014

 

[Source: Siamsin Thelnah (SSPP JHQ Mizoram Silver Jubilee Magazine), pp 105-108]

Read 589 times
Login to post comments