You are here: HomeColumnsGapkhuamAhun tak in zaw lauhuai kei

Ahun tak in zaw lauhuai kei

Written by  Pauzagin Tonsing Published inGapkhuam Thursday, 27 April 2017 22:48
Ahun tak in zaw lauhuai kei

~ Pauzagin Tonsing

 

Kongtual ah table leh chair kikoih a, a lentu leh khoihtu kimuhlou in chair khat a tai zonzon mawkmawk hi. Ka delh a, “Hiai sikha le,” chi in a kim khawng vai in ka vai hi. Tupkhak/ vaikhak ka sawm hang in ka vaikha thei kei hi. A chair a kitawl zel a ka delh a, open challenge bang ka bawl hi. Huchi in a hong khawl thei a, ka ngaihtuah thakleh, “Sikha laang ei ve,” chi in ka ngaihtuah hi. “Lau kei na vanglak ing e,” ka lungsim in a chi a, “Ahun lai tak in lauhuai ahihlam le ka phawk kei a ahoih ve hi,” chi in ka kilungmuan hi. Huchih lai tak in vuahtampi zu a hi diing a, thawm a ngaihluat ziak in ka khanglou hi.

 

Mi’n sikha i muhleh a hun laitak a kilaulou a chih sek khawng uh mangmat hi didan ka hi. Atung a sikha ahihlamle kiphawklou chi leng a om ua, sikha ahihlam phawkte’n le ahun tak a kilaulou khawng chi uhi. Khatvei ka innkongte uh pi damlou in damdawi inn ah a om hi. Ka naupang lai in chi ni. A inteekpa uh damlou enkol in a om a, a tate uh kei sang ale neuzaw ngen ahi ua, hong giak in chi in keile ka cousin-te khat toh ka va giak uhi. Nitak hong hi a, ka lupna room kiang ua a dawr sung uh hong gingging a, khawnvaak khai in ka va en uhi. Bangmah a om kei a ka lum nawn uhi. Ahong ging nawn a, a pi uh slipper kaih ging diapdiap dan khawng a hong ging a, dawr a sumbawm khawng uh a hong kilok ging hi. Ka va en nawn ua, bangmah ka mu tuan kei ua lauhuai ahihlam le ka phawk mawngmawng kei uhi. Ka lupnawn pat uhleh a hong gingnawn leuleu a, puan kilukhuh in ka lau mahmah uhi. Ama a nihvei bang ka va et lai un bel lauhuaina di mawngmawng ka phawk kei uhi.   

 

College kailai in khatvei lawmte mi thum toh cinema en diing in auto in ka kuan ua, traffic point ah auto dangkhat toh ka kiphu chot uhi. “Khe-khe-kheih!!!” chihleh kiphut khak ka thuah ua, lauhuai a hihlam mawngmawng kiphawk lou hi ve aw. Ka mittung ah mun bangzah hiam a hon khuisak ua, ka ngaihtuah thak chiang inle ka lau deuhdeuh hi. Nengchik hileh ka mit hihkha diing ahi a, huai hihkha lou chih bang ka ngaihtuah chiang in kipahhuai bang ka lehsak thak hi. Mihingte’ hinkhua ah thil himhim i tuahlai a lau velvul dan dile theih hilou, tuahkhak dandan tuahdan hihthoh mai khawng ahi sek hi. Kuahiam in gari a tuahsiat a tuahlai chet in lauhuai ahihlam a phawk khol kei a, himahleh khonung khawng a lehlau phiing hinkhua zat gige theih ahi hi.

 

Naupan lai a hinkhua zatdan khawng i nungsui chiang in bang chichi a kisuakta ahi dia aw chih bang ngaihtuah vungvung in a om hi. Sih leh hin kal khawng a ana kiche tou neknek ngen ahi hi. Hinkhua a i tuahte i khonungsui chiang in lauhuai pipi i tuak hi. Khatvei ngial bang, loutul ah lawmte toh ka hoh ua, buhlakna nung a buh kung khawng pou sipsep lai hi. A lou ken mahmah hi, suangpek bangzah hiam a om a, kou sang a lianzawzaw ngen ahi. Lawmte toh huai suang tung a tuang in loutul ah ka kitolh siak mai u chu a nuam mahmah mai hi. Himahleh, a khonung a i ngaihtuah chiang in hiai suangte hong kilep henla, ahihkeileh bangchi hiam in tua suangte hong kinangkha in kou hon delhleh delhlum maimai di hi a chih khawng ngaihtuah chiang in haa hiip zen a lauhna a hon tun hi.

 

Mihingte in i thiltuahte a khonung a i ngaihtuah chiang in hichi khaleh huchi khaleh chihna tampi a om hi. Akhonung a i ngaihtuah kik chiang in ahoihlam kipiak sang in a selam ngen kipiak in a om sek hi. Anopnate ngaihtuah khalou in, ahun laitak a kha (spirit) om pen kiphawknawn lou ahihman in a lauhuaina leh sia hon tut theihna diingte i ngaihtuah kik chiang a lauhna khawng hon tun ahi lim hi. I hunnuam zatte na tawm ah leng ahun laitak in nuam kisa in, kidur mahmah a, a khonung i a ngaihtuah chiang in lauhna bang, hai kisakna bang, ngaihtuah kimlou bang kisa in kikhuisa vungvung thei hi.

 

Thil himhim sawm (planned) leh sawmlouh thilte ah leng i tuah hun a tuah bangbang maituah lel a kihi hi. Akhenleh ngaihtuah kim kisa a hihfuh i kisak hun tampi a om hang in i hihfuhlouh hunkhop leng a om thei veve hi. Akhonung a i ngaihtuah bang in a hun lai tak in hiihkhial le pen kikhel hiilheel hi diing dan ahi.   Huchi bang a a khonung a lauhuai ahihdan phawk suah thei diing a om lai pen siatna luat ana tun khollou chihna suak hi.

 

Muhkhawl louh i tuah diingte zong lau in i liing thei kei hi. Ahun hong tung a maituah mai a ngai hi, maban a hong tung diing ka theihngeilou ka tuak ngam kei i chi thei kei hi. I maban a minute khat sung lel a hong tung diing le i thei tuan kei hi. Hoihzaw hong pai diing a gintakna leh sezaw hong tung ding a gintaakna nih a om thei a, a om bangbang, ahong tung bangbang maituah lel diing ahi hi. Ahun tak a zaw kilaulou na ding ahi. Hiai hi khovel paidan ana hilel ve aw maw.

 

© Pauzagin Tonsing | April 24, 2017

Read 397 times
Login to post comments