You are here: HomeColumnsGapkhuamDakkal 6 Negu Hang Eih!

Dakkal 6 Negu Hang Eih!

Written by  Pauzagin Tonsing Published inGapkhuam Wednesday, 03 May 2017 12:15
Dakkal 6 Negu Hang Eih!

~Pauzagin Tonsing

 

Abu a dan toh hong kituah chiang a dik, a paidan di a hong pai chiang a dik, apailouhdan di a thil paisaktu i hihleh negutu kihi. Sum tampi diklou tak a lak kia nekgukna hilou hi ve aw.

 

Thukizakna leh paungaihna tungtawn khawng in job card nuai a mahni card chiat lak theih chih khawng a hong omom a, mak ka na sak sim chu ama a kua kiang a ana om a dia aw chih ana ngaihtuah hi veng aw. Card ana kinei tei lou ahihna a atong-azam ka na theihlouh ziak lel zaw hi. Jobcard holder-te kiang a a card om mai di a ana koih chu ka hi ve.

 

Solkal in ngaipoimoh in a mahni kivaihawmna a niamtheipen tan (grassroot) a om diing chih hun sawtkuam apan deih in pan ana la uhi. Khosung khantouhna diing ah khosung mite in amau khua apoimoh bang uh a kingaihtuah ua, Solkal in huaite sepsuahna dia pan a lakpih diing chih khawng a kisakdan uh ahi sekta hi. Nidang in bel ei khosung a poimoh bang a chin enlou in, amau poimoh a sakte uh a hon hihsak ua, huai in apoimohna tak semkha lou a chi uhi.

 

Solkapa a hoih a, khantouhna kichi himhim mimal a atun diing ahi chih a deihdan uh ahi. Gam changkang leh khangtou hihna diing a mimal a khosakna (economic dinmun) a khantouhna a om keileh gam khangtou kihithei lou diing chih a muhdan uh ahi. Mimalmal a khantouh theihna ding in huai mimal’ hamphatna dia guan a omte amau kiang a direct a atung diing, a tunlouh chiang in lamkim-mualsang a nesetute apan neksiatna leh suhsakna uanglua ahihman in chi in tuni chiang in mimal hamphatna di omte mimal kiang mahmah ah, i inn mun mahmah a chih di tuk in a hon tun uhi.

 

Hichi tuk a solkalpa’n a hon awlmoh lai in ei leh ei ana ki-awlmoh lawlou i hi di ua aw chih sim in a om hi. Solkalpa’n i khantouhna di a deih ziak un thuneihna ei khut ah a hon pia ua, ei-le-ei kivaihawmna diing in khaw chih ah thuneihna a hon pia uhi. Khosung khat a thuneihna i tawi pen na tawm ana zang dikzou tuan samlou hile kilawm hi. Thuneihna neuchik i neihkhak chiang a ‘chance om naakleh ana huai pah pompom, ana negu tungtung pah’ hile kilawm hi.

 

Hiai tan a Jobcard i chih mai MNREGS kia na ngaihtuah kha mai thei a, na lungsim in na khosung ua vaipawte na mitkha in a hong langh mai thei in ka gingta. Duhgawl lua na sak bang a om dia, na iplah sim mai thei hi. Jobcard ngial tak bang a khosung vaihawmtute kia diklouh hilou in ei jobcard neitu mahmah bang inle tha ngah peihlou hi ve hang aw. India solkal in ni khat tha a sim dak kal 8 vel ahihlai in ei lawi in zing dak 10 khawng a sem in sun dak 12 (dak kal 2 lel) khawng a i nasep zou in ni khat sem a kingai i ve uai!!! Dak kal 6 bang negu (corrupt) i voi!

 

Solkalpa’n hon awlmoh lua in khosung a thuneihna tampi a hon pia a, i khosung a solkal’ nna khat peuhpeuh ah khomite’ lemsakpihna, hoih chihpihna omlou in bangmah a sem nawn kei hi. I khosung a solkal skul a semtute na tawm in kho Hausa’ suailou a loh a laklouh diing uh ahi, huai skul enkaitu ding khosung mi tel in komitti a hon bawlsak uhi. Hiaite’n lem a chih kei uhleh maban sawn thei hetlou ahi a, skul lah om, naupang omlou, sinsaktute lah amun a omlou, ahihhang a sinsaktute in kha bei teng a loh la ziahziah thou. Dikou deuh mah zaw hi ve aw.

 

Huaiziak in, chance i muh nakleh nekguk teitei di sa kawm a diktat hih ut hi lel tak ve hang aw. District level hiam state level hiam a sang deuh a nekgukna neite i mohsa kei di chihna hilou in, amau chance a hauh ziak ua negu tam, neguk di bangle lom lian deuh hilel di dan hi in. Eite’n leng chance i neih nakleh kidek zou tuan samlou in, a lom neu deuh ziak a nekgukna niam chih hituan lou in, a lom tawm ziak a diktat zaw deuh chih om tuanlou hi ve aw.

 

I pipute un hiai diktat ana ngaisang mahmah ua, ahihna chiangchiang a ana gin-om un chin, chitak leh diktatna toh ana khosa uh hi ve aw. Diktatlouhna, zulhzauna chihte bang ana haw mahmah un, diktatlou deuh ‘chi’ ana om chi un, kigui zuih chi a sungta-putu di bang a ana et hetlou pawl bang uhle ana om hi ve aw. I khantouh zelna ah diktatna pen i bosak kha ua hi ve aw, i ngeina dan (traditional value) ua diktatna telkha in khovel toh kituak a i paitouhna lam ua koisan hiam a nawse kha hi didan hi veng hang.

 

Hiai I ngeina dan uh tunding kik kisam hi. I Khristianna in leng a hon sinsak ahi. Diktatna mah hi ve aw a poimoh maw, mimal in dingkhe di, innkuan chidam di, nam khosuak di i chihleh hiai diktatna mah a kibulphuh ahih keileh mangthang lel di i hi. Buk bengbung in inn tung daal nei hial in teeng mahle diktatna a kibulphuh lou zaw sawt daih lou ei ve.

 

Tuailai-Pro e Pro lou e chih hilou, hiai bang movement om in om keitaleh hiai diktatna kha mimal a dia poimoh mahmah ahi. Hiai movement paulap in lawikhat in midang diktatlou a a theihte uh khuttal in kawk fenfan lai hang a, huchite bangle diktatlouhna di chance muhkhak louh ziak maimai bangle hithei i hi. Mahni mimal hamphatna di chance mu hile uh diktatna palzuut di ngen bangle hithei i hi a, kidiktatsak a midangte khuttal a kawk pah fengfang bangle diklua le hilou thei zel.

 

Ei a thuneihna om chiangchiang ah diktat sawm in panla leng kuamah hon suh theihlouh, kuamah hon guksak theihlouh kibulphuhna kip om diing ahi.

 

© Pauzagin Tonsing | May 3, 2017 (6:49am)

Read 267 times
Login to post comments