You are here: HomeColumnsGapkhuamGullau Hang Eih!

Gullau Hang Eih!

Written by  Pauzagin Tonsing Published inGapkhuam Tuesday, 05 November 2013 01:06
Gullau Hang Eih!

~By: Pauzagin Tonsing

 

Nidang in thukhotaang houlimna diing in Pumbuuk i zang ua, khang hong kikhekzek in Hotel Houlimna i chi nawn ua, tuni chiang in chu social media network chih ahita. Hichi bang a houlimnate pen paih dia lah hi deuhlou laak dia lah hideuh lou lah dik mahmah khawngngen genna ahi sek hi. Ahihna tak tuk khotaang limlangh ahi mai hi.

 

 

Tulai a hichi bang pumbuuk houlimna dia i zat social media network a kigen tam pen tuh khotaang siatna leh gamsung siatna ahi mai hi. Ning-a-ning hilehle gengen mai, a gendan di omlouh chiang a huai a houlim teng bang kitawng in, a khenleh mimalmal khawng a kikou zialzial mai. Khotaang hoihna gen di thei ki-omlou, gamsung khantouhna gen di thei ki-omlou, politiks vai a lam-et phak di om a galmuh omlou, neektaak zonna a zungpi kaai a kingakna tham ching om a kuama’n mulou, siatna ngen siatna ngen gen himai. Ahoihlam mawngmawng gen di theilou, gen di le om lou bok himai thei.

 

 

Huchi kallak a kuahiam in thilhoih khat hon gen lehle thilsia suahsak thouthou kihimawk hi. Thilhoih chih himhim om thei dia gintaakna le om zou nawnlou, gamsung khantouhna tung thei dia le ngaihtuahna om lou, politiks a khosuahna om dia le lametna nei nawnlouhna hun tung bang hi. Solkal in scheme leh program tuamtuam mipite a dia hoih pipi hon bawllehle mipite’ lamet phak dia ngaihtuah lou, kuahiam khat mi hoih mahmah hong kipanlehle gingta thei nawn lou di khop a kingaihsiatna khovel a ki-om suak phot hi.

 

 

Khangthakte lak a chu maban a lam-et om mawngmawng lou tuk a muhna, lungkiatna, nguina, kingaihsiatna, ngongtatna leh gamla muhna a mial bikbek sakna lian mahmah ahi chih chiang hi.

 

 

Upa lam deuhte’n bangchi in i khotaang mu ahi di ua aw chih ngaihtuahna a let mahmah lai in Shiv Khera gen bang in sia satheite’n bawlhoihna dia lungsim leh tha hon sen tak man un pahtakhuai ka na sa mahmah hi. Khotaang siatna a mavual, khuangpu line a dingdeuh a I theih khamtheih leh zu khaamna Bijang Women Welfare Association in a hon pan ua, lungsim a nuam a a hahdam sot chih di ahi. Naak tak in hon bei ua, khosung sianthouna kia hilou in botlohsak theite siansak in hong om diing hi. Tu-le-tu a agah muhtheihte ban ah tulel a naupang nou leh tuailai dawng thitthette’ hun hong tun chiang in gahkhum tak mu diing i hi. BWWA zahna salam ka pia. mihoih khenkhat hong kipankhia uhi.

 

 

Alang alang ah khotaang siatna awlmohna a hong lian hiaihiai a, nupi pawlte hong kisiak sot mahmah uhi. Tuni New Lamka lak ah nupi pawlte kisa taktak diing in pan hon la uhi. Hiai nu pawlte kipatdan leng thupi leh phattham ching mahmah ka sa hi. Khenkhate’n awlmoh lo zozen in kisa zok in zubel a khensiat chiang un a nizing in zubel dang a om thou hi. Tuadan a hihlou in I biak Pathian mah buan masa in, thupha tawi ngaihnate a thupha tawi in, khotaang siatna tuntute a diing a thumna toh hon pan uhi. Hiai in tup taktakna a latsak kia hilou in gulauna a tun a, pilvaang theite a diing a mei zial theih mai diing, kigin man diing, kisakkhawl man di in ‘mihing itna kha’ toh nna hon patdan uh phattham a ching hi.

 

 

Khamtheih leh zu kia hilou in tu in noptaalna leh thaangtatna pen khotaang melhemsaktu ahihdan thei in YPA in pan hon la nawn hi. Tuakia hilou in nungchang kilawm leh khoheidan hoih kawkmuhtu leh lamhilhtu nna hon laak nawn uh thupi ka sa hi. Pentecostal Town ah kua mohpuak diing hiam chih kinolhtuahna lai ah YPA in hangsan tak a pan hon laak uh zathuap tham leh tosawn tuak mahmah ka na sa hi.

 

 

Thilhoih sem dia kuahiamte hong kipan diing hilou in eimahmah kipat ngai ahi, en I pat keileh kua’n hong pan diing hiam chi a thilhoih sem i hihnaak leh maban sawn chu thilhoih mah ana hi tuantuan hi. Huaiziak in Nupi pawlte leh Phatuamngai pawlpite kalsuanna tosawn siausiau in i khotaang siatna bawlhoih theileng a gah lou diing eite mah i hi.

 

 

Khotaang siatna awlmoh a pan laak ahihlai in pumbuuk houlimna a awlmoh mahmah a kigente genkhaak (address) nai hetlou a om hi. Gamsung khantouh louhna leh kineeksiatna ah zong pan lak a hun mahmah hi. Chihtak louhna leh kikhongaihlouhnate zong et a kuul hi. Kuate hiam hong pai a ei gam khantouhna dia hong sem di ua i gintaak sung chu i gam neeksiat in a om dia, chipzaakna thupi a tungzaw diing hi. Ei mahmah kipan a, neitu hihna tak tang a i kipat uh ngai hi.

 

 

Ahi a, khovel a kikhekna dia force nih omte khat zawkzawk a tun a ngai. Iraq ah Sadam Hussein leh a vaihawmna ning a mipite a kiphinphin hang un kikhekna a tunzohlouh tak in gamdang in beihpi hon suah ua kikhekna a tung thouthou hi. Tu in Syria mipite a kiphinphin hang ua bangmah a tohloh zohlouh hang un US leh gam khenkhat in beihpih a suah dek uhi. Kikhekna zaw ahun tun chiang in sunglam apan (internal force) ahihzoh louh tawp in polam apan (external force) kikhekna tunsak thouthou in a om hi. Gu in gulau peuhle lametna thak hong piangsam na lou di hia.

 

 

© September 3, 2013 | Pauzagin Tonsing

Read 879 times
Login to post comments