You are here: HomeColumnsKC Lian TombingGing Mak

Ging Mak

Written by  Kham Chin Lian Tombing Published inKC Lian Tombing Wednesday, 03 September 2014 11:15
Ging Mak

~ Kham Chin Lian Tombing, New Delhi

 

Belhawm a gin-ngaih chih paunak om hive'n. Luita tui gin-ngaih chihle om. Chih simsimte' (deihtak simte') "kilong" ging a ngaih, chih phuahbeh le diklou khol dia hia? Thilging lampang a thupil leh paunak dang tampi omlai inteh.

 

Music lampang gen dek nana kisa kha di ua.

 

Tuma deuh zing khat nnasem a ka kuanlam bike a ka taileh ka bilsung ah thil ging mak deuhmai puak romrom leh a chang a puaksuatsuat za ing. Ging ngaihnophuai loutakmai leh chizauhuaipi hi a katheih man in lamsik a khawlzen in ka bilsung ka check na a; glove bun a helmet kawm a lemlou chik a sawk fuaifuai ahihman in bangmah omlou dan in ka tai nawn hi. Bangtan hiam nung in hong kipanthak zel.

 

Ka paikawm a ka ngaihtuahna ah sahik lah hipeuhmah ke'nchin, maimom (khenkhatten keihem a chihte uh) houh bilsung a hong lut khanglang a de aw chisim. Ka inn uah tua maimomte kimumu hi. Akimulou ahihleh lungme, lungmulbi leh lungkhap chihkhawng. Eilamdan a hiaite tam himaizenleh nipi lam chiah a thuak hak mah di. Thoukang le om zezeuh; innhikte chu lauhuai phial a lian, gol phephaw, ngou hehua ahi. Eilama te chu vom ninelh, neu tingteng geuh. Innlawi chu tamzel e..aneu, anou ade aw i chihleh a piching ngen. Alian hehaw, san pempuam zezente le tawm tuanlou. Gulhik le chu omlou abang. Vangvot leh litpi le ka mu ngeikei, gamlak a kivak munlouh ziak a diam ah chilelah a gamlak dile omlou ahizel a. Chiikpi lah chu kaang theuthuau zezen, muk dal kui nguaunguau zezen in.

 

Bawng atamtuk in a sa a omkei; bawngsa dia bangkol kikawi kilehzial zezente himahmah di, nek phiauphiau hilel, leizawh chang a. Bawng meipei votvot chu vangzel e. Thousi thouvai leh chippi mah omlou hipah. Voksa chu neklouh a hoih. Tam mahleh a sianglou tamzaw in ka thei. Aksa, ngasa leh sa dangdang atam. Tengkol a kimu kei zel a hi ve'n. Vaite'n theile uzaw ne utthou di uh e. A hawm a buakna ua haipuak gumgum ngap kuamah a lou uital thau thetthot leh vokpi noukai luaihluaih a tam maizen tawh. Zulei leh va ak tam pha ngial in, Delhi State bird kawlgit bel vaang peuhmah.

 

Maiteh le om mah e. Beteh le kimu. Tangkuangteh zuakpa bel a neihzah leigaihvek i sawm leh phallou tazen. Damdawi ahi, midang le a deih om di chi hive'n. Samphok alian aneu muh di om ta mawnglou. Tangkha zaw tampha ngial e. Thanglei pak a tam maizen tawh a kung dilah khatvei le ka mu naikei. Vai malta dawng ngat giugeu ngapthawh sim a kam nih i suahsawm vialleh a kamkhatna apen sa-ik olh-olh zen a deihkhop huai thei ahi. Pawng ngapthawhlouh ahoih. Huchi sa lelah pum khenkhat mit in ne lele nekngamhuai khop a thaklou hizel. Meh lampang ka theihtamlouh tawh hiaizah hi mai heh.

 

Office tungta. Glove lakhia, bilsung mah buaipih. Limlang a i etchia lah kimulou. Bilsung pen en ut kisa in limlang mai ah sik ngat teitoi lele i mit in i malam mah en teitei ahih maimah chia! I khoihkeileh bangmah chilou, i khoih chia ging huamhuam zel. Khai, ganhing hi peuhmah di hita. I khoihchia lau a nungtawn lutzel, i khoihkeileh pawtkhiaksawm a konglam hon naih gekgek himahmahta inteh chia ngak zel. Puchiil nungtawn houh honglut a zenpeuh de aw chih dia lah gultawng/inn-nuai leivuilak a va lut thahahlou, ut lele huchi didan omlou aihchia. Hong pawt di ngak top. Pawtkhe diaklou.

 

Ngapthawhpen peon chikkum a piang a bangchikchia retire di ahia chih theihbutlouh khat i etsak lelah, sakhital talgawm) zen a a vaimittang tawh a et lelu lele bangmah mutuanlou. Ei bang le amau kumzah khawng i phak chia bang a kichitel diammaw? Tua le -ve 8 point something kibun biubiau. Mit chu ana poimawhtak ahi. Nirman Bhawan a sorkar innluah ut-a apply lai a mitdel nih a form hawmtu om hive uh aw. Ka va kuanleh 'nang tumalam in na lakhin', hon na chita rengreng. Khatvei kong hawhna ahi, khatvei kon muhpatna, nang le khatvei non muh patna ahi, mitdel hilechin le khawng va kichithei bekleh pha ve. Ka office te uh, eilam deuhte khat in keima zek a ana apply, huaipa di hon nasa uh chu hihtuak a gendan ua. E'n huailai in vaipau i theikhol ka hiven. Huai gel chu piltak ahi uh, en kilkel lele a lai honpiakte uh kisimthei vetlou. Hindi a kigelh! Hiai form pen hiai, hiaipen huai, huaipen hiai a piak di..adu ada gen ziahziah lel uh. E'n lah en kelkul lele gamlak a sakhi eh, saipi tai on on lele kimu khollou maithei. Ki sami teuhlou. Khalam zaw gendah ni tutung.

 

James Bond film luisim deuhta Octopussy kava et laizangleh sa hawl didan ka theikhe thakve, samilou ka chidek na a. Pawnlak, loutul hia tullou, bi leh lou, sialluang, munphiah kawmlak gumphuttouh, kikoukawm hawk-hawk a a gamsa tuahphut dilah lau, tangpangte'n gamsa hon sak dilah lau a kitoukou huhu chu nuamchiamlou. Matlouh zawkmah leh nuihzathuai hetlou la-aw. Huai film a vaite hihdan in a gingthei di khuangta (khuangpi puak volvol di chu haksa deuh kha'nteh) leh gingthei chikim khawng thuahle sahawl noptuam di hi v'aw. Guitar (guiter hilou a'i aw?) leh tam-ngai, gawseem/seemgua (sem chihlouh a seem chihdi) zaw phatuam vaklou khade, puak-hak law pawpaw di. Phit bangle nuam inteh. Zangkhai di, hilele a mut a tawlhuai sim dia.

 

Sausim ta chi o? A tawpna di'n. Peon senior, thadah khedeuh nna khat sep zual di bang nileng a ngimzou pa'n mulou ahihchia atangval zawdeuhpa sam. Aman tuh en vengveng a bilsung a pat samzang khat hon dokkhe hiau. Huaizawh a ging ruapruap beihiau. Leltak.

 

Abei pahmawk a behlap zek ni.

 

A hawmpi leh makpipi thilging i zaveu a. Belhawm agin ngaih chi eu-au na hang a eilawi tuh a belhawm dile omlou lampang a de aw chi simsim ke. Mi'n belhawm bek gingsaksak eilah beldim gingta mawngmawnglou. Beldim a omkei taklele a kimchiang dim bek ginsaktak uthuai. Huaiziak a "ginglou mak" kisa mawkdan ka'i, chile lah ei na-ngon man le hithei zel. Putek khat in, "khawvel kilamdang ta e, ak bang hamta pualpual, vuah banglah ginglou a zu didip," a chihdan a.

 

A zapeuh in ngaihtuah heh.

Read 645 times Last modified on Wednesday, 03 September 2014 11:22

  • whoami
    whoami
    Friday, 05 September 2014 11:29

    Sa hawl non genleh nidanglai , loutul, puthak mahmah lak a 'heih' 'kheihkheih' chi a kikkou lai non phawk sak. angpang pan ana kap manlou, khahsuah. Khenkhat 'aw ging' suah lou a pai thulthul pawl om, sa hidi chi a kap ek mawk chihbang le om thei tham dan ana hi aka

Login to post comments