You are here: HomeColumnsKC Lian TombingKuanglai Politics

Kuanglai Politics

Written by  Kham Chin Lian Tombing Published inKC Lian Tombing Tuesday, 27 December 2016 22:02
Kuanglai Politics

 

 

 

Kham Chin Lian Tombing

 

Keu sasiam a zat ziak uh hituanlou in ka ma a (anglam a) pangte’n a sa-sa sawkkhe geihgeih thei ve uh aw. Khutkin ziak leh huaiham ziak le hipi lou hi. Amau panna fuh i cih zensam hang in kuangpi laizang a meh kithuk pen micih in i naihdan/gamlatdan kibang kim hi. Thahat ngal hat ziak a tuhzawh a, thatang-thagum tawh tuh di zat zong banglou hi. Abang hang a amaute’n a limlim leh a lunggulhhuai pente kuanglai apan tuahkhe geihgeih thei mawk uhiam, cih a pok leh a helpih gilvahna khop ka ngahtan a leng ka ngaihtuah guk ahi hi.

 

Innkuan sawngbawlna khat ahihman in field lai hilou a, kongtual munzang tangkha samlou a phaitam huan sung kensim mun a kuangpi ka sawklai in e; bangteng selung gel ka hiam aw? Keipen a khunglam a pang in suksawk in pangkha se ing e. Kua laitan hiam aw kuanglai mehpok phok lawlou, sukkin e, kinsuk e, suk kin-kin e, kin suk-suk e. Duhlam bansau policy apply ngamlou leh bawh-thut policy zangngamlou tang lelliang keidi’n kuanglai mehpok vang in la veh aw. Hong tualkum in ci in tual hongkum hial taleh zong kei apan gamla deuhdeuh diing ahihmawkteh, tualkum ding in malbang kou ngamlah’ng e. Lunggulh louh tang zuang hita’ng lunggulh laikuang mehpok lah kiam huaihuai e. Ahih hang in tulai khang a sa siim a telkhakna tam nawn hetlou ahihman in lungdam veve ing.

 

Kuangpi sa alim, kici ngeilou a, belpi sa alim kicizaw hi. Ahihhang in belpi khap 9 sung ah sa ser khat huan le’ng a limtuan ta’m maw? A sa lim leh amui pen kipahna himah leh huaisang a poimawh zaw tuh a ziak azal pen ahi hi. Sihna ziak a innkuan leh tanau nai kimukhawm in belpi sa i nekkhawm hang in limtuanlou a; moulop/pass lop a nekkhawmna mun a sa netheilou te’n ankamtui leh maltameh ngawn a nek hang un gilmul vangphual zou veve uhi. Ahi, kuangpi annek anuam, a ci uh. Ahihhang in mi zahkai leh ngentellua te’n nuam salou uhi. Kiang a pangte’n akamsung a khut guang a tawp zikzik zezen, kuanglai meh hon huai uh, hucia amaulam a an omte hon khinphei lai bang utuh, hali sim feifuai a ana et vungvung theih di’n ngaihsun ing.

 

Nidanglai in innkuan cih in sing a kibawl kuangpi khat tek nei uh a, a kizatlouh kal ciang in bang/innzawl ah khaisek uhi. Hihdi poimawh nei lawmlawm a pawt le hikhollou tangval khenkhat te’n innkuanpihte annek lap ngeilou uhi. Sungkuante’n an ana nekhin uh a, kuang bang leng nana hemkhin diam in bang ah nana khai mansek uhi. Tua ahi paunak a kuangkhai tuak i cihpen. Kuangkhai tuakte’ lungsim di jeldim thubawl  zualle, bang a kikhai kuang enkawm gaugau in silkhit a de aw, sil nailouh, ci lungsim tawk unteh. Tulai in le kuangkhai tuak i cih mi pawlkhat omlua hihang. Tulai diak houh, nekkhawmna tamsanlai hi a, innkuanpihte omna mun naih pahpahlou lah mipi om nuainuai lak a mahni sungkuan te muzou zoklou, patau sim lah hizen patau hetlou dan a om phenphan teitei– kuangkhai tuak dek tatak phial mi khenkhat om teitei ve’n. Om law diing.

 

Ankuang umna a meh a tawmlam, a kidaihlouh dilam tuanvaite’n a gen sim supsup uh zak nuam hetlou hi. Inntekte’ adi’n nuamlou a, mipi adi’n nuam tuanlou hi. Upate’n mehtawm a val, a cih uh mipi lak ah kizangthei bilbel lou hi. Mipi lak ah bel mehtam aval, cih zong zattheih tuanlouh hi. A tamleh tamnek, a val leh tawinuam laite himawk i hihciang a. Kigawlkouna hilou hi. Haqiqat baat hain (thudik laihawl ahi).

 

Ahi, tukhang hun ah zankim zankhang lai a cialna leh sapna om hetlou a kuangpi luina om phut-phut sek mah ahi. Kuangpi 7 kithuk umkhalou teng belta buh duh a phunnawi ngap-huai di hia?

 

A um teng in batphak dia kuanglai a kithuk zizia, panna mun kibangciat zenpi mi’n a lim lailai leh ahoih tata gilmul vangphual zen a anek ua, ik hiahhiah kawm a gil a zutlai ua nang lungkim ngellou nana hih maimah letuh nang-le-nang na KUANGLAI POLITICS peidan na kingaihsut thak ngaileh kilawm.

 

 

 

Read 589 times
More in this category: « Ka Lawm, Ka Gal

  • whoami
    whoami
    Tuesday, 03 January 2017 11:56

    Comment nuam lua, log in na di mu zok lou...ka dak dak a kum 2017 hong hih hial ta. NI thumni in ka mu pan ve. Kuanglai politics khelh siam kua kua na om ua?

Login to post comments