You are here: HomeColumnsKC Lian TombingGreen Zogam Initiative – Malep

Green Zogam Initiative – Malep

Written by  Kham Chin Lian Tombing Published inKC Lian Tombing Monday, 26 August 2013 23:27
Green Zogam Initiative – Malep

~Kham Chin Lian Tombing, New Delhi

Delhi Paite Indongta in green Zogam Initiative hon pan a; August 28, 2013 ciang a Delhi mun a kikamkupna om diing cih ka zak apan kipahna leh lam etna liantak ka na neihman in hong kitalah man zel ing ei.


Gam keu, khua lum, tui hak cihte kum khawtawn a houlimna himahleh bang ci sukkiak ding, ci a mapatna leh kilamlahna omlou (om nailou) ahihlam i khawnung theih uhi. Zekai kei, vai nanung vuahsia in lapmahleh inn a tung thouthou, cih hiven. Khawhunte, gamsa, vasa, ngasa leh sing-le-loute Pasian in ei mihingte adia hon bawlsak ahi, cih i thei. Tua mihingte’ tung ah siamtu in tuate enkol a, zem a, kemcing diing in mawhpuakna hon pia hi. Eilam a panglou tuh, hon dou ahi, a ci tlat mai ngal a. a omdan tuh, ka thilsiamte hon keppih lou mihing pen, hon suksiatsaktu leh ka melma ahi, cih na ahih cu.


Tomkal sung a gam hing, gam niiim i piansak theihna dia kalbi khenkhat:

  1. Saptuam, pawlpi leh innkuan khatpeuh in khawmpi leh pawi i bawl ciang a sing leh gua i zatkhiak zah suankik zel ding.
  2. Tuikhuk, luitui lakna mun ahi bang a set top louh a, cement lui suahsak ding. Hiai hileh, tuikan lamciang a khawlak a bawng ek, sial-ek i palna tawh luisung i va sik hong kiam dia, siangthouna behlap ding. VAte leh ZYAte khawng mawhpuakna pe-ek ni.
  3. Lou i vat ciang in, guamta/guampi hileh, vatsiang veklou in laam li/nga tanbek hawi zel thei le.
  4. inn cih in mahni innkuan a misim zah zel singkung neih di, cih a lemtangna mun ah i zui uh awle? Singkung lian neih di lemtang loute singkung neu theibuhfai ciate bek. Huai lemtang lou lailaite’n paakbawm/paakbel.
  5. mimal kithununna (self discipline0 kitasam simte ihi ua, huai lamsang ah panlak poimawh. Tua hileh, lamkiang a singpoou maimaite bantan malam sese; vasa, ganhing nekdi le hilou khawng kaplum/that sese cihte hong kiam dia, zu-le-va in leng muangcang leh lauthawng lou deuh in hon naih ngam ding uhi.

I gam enkai pawlpite’n nekzonna kong leh khantouhna kinzaw a piantheihna ding ngimna in village grouping leh toounship building bul ana panta mah le uh lawhcing lawmlawm lou a theih ahi. ahang bel, ei Zomite nekzonna leh kingakna pen singtang loukhawh ahi hi. Khua khat inn 20/30 in a khawhzawh gam uah inn 200/300 tengkhawm mawk lehang i gam kidaihlou ding a; haksatna lianzaw piang ding hi.


I theihsa bang in, lou i neih pen a sia hilou mahleh i vatsiang a, i haltum pen sia hi. Tua himah leh, huailou dia lah lampi omlou zel. Bang lawh ding?

I mipil, misiamte hong kikup ua, hon lamlah uh ngak ni. Huai kawm in, khenkhat keimah thutum a phatuam dia ka gintak kon kum mawkmawk d’e:

  1. singtang lou vat leh halsiang a lou neih khenkhiak ding – huai di’n – loumun khenkhen louh a hihtheih (Lamka area leh singngat linete diak bang) haar zanglou a meh ciin ding. Gankhoi uangbawl ding, nek piang tham vet dia khoi di. Hol hal tawpsan ding.
  2. Sinlaite’n agricultural sciences lam hahbawl ding a sinsak ding. Hiai din Siamsinpawlpi mah hong kipat ngai ding, mawhpuakna pia hipah ni.
  3. tuivai luisuangte leh Lungthul kawl suangte Zomite aa hi a, namdang in hong luhkhiak mawk ule tuh- babare! mitsuan ding.
  4. Cash crop (Jathropa, lemon grass, cotton etc) leh horticulture kha lawhcing nailou ahi. Vai in tam a cihleh zopa in tam i cih a kibatlouh ziak leh, i gam leklua, tawnglua ahihman in, lampi ginalou sawnsawn. Hiaite gahsuahna di’n kum hong kivei zek ding. I gam enkaitute’n policy hon bawl uh ngai. I gennop bel, eimah in i nek a, i zatpah leh i muhpah dite mah suan leh khoi ding ahi. Huci kawmkal ah, company lian leh hausate’ productte hoihsem leh gina zaw dia gintakna lungput i tawpsan hunta. Hiai hileh i gam ah tualsuak ankamthau i zuakthei dia, ankam i ciing mai di uh. Siamsinte’n cikhum (sugar) bawldan khawng va sin zok ve ua, computer khawng na va zilzil sng un. I gam ua kawltu hoihdang uanglua e9ive, ban ciahciah, tangai ciahciah pha salou maw? Bihar/UP gamsung a kaang deuduau leh khutpi cia lekte sang a hoih zawtham.
  5. floriculture bang le a pai viau diam ka ci a, himahleh ei Zomite hi assam gamtawh kinaite ihihna ziak uhia, asam leh awlsam i ut ua, paktak sang in plastic paklem khawng i deihzaw mawk ua. Kitengte, moulawmte, tanu khate, pass lawmte, telcing thak kipahpihte, chiefguestte, functional presidentte, Kut Pate, Zomi Nam Ni committee te, hausapute, pension lawmte, kaam muthakte leh adangdangten pakkhi a awh ciang ua, plastic/lehkha pak sang a “PAKTAK KHI NGIAT AWH UTNA KHA” i hon tan taktak ciang un pakkhoi a nekzon theih ahita ding.
  6. Terracing – buh mah duhpen leh nepen ihihna ah buhlei ding in terracing kisinsak le. I muhphak ciang, Nagaland khawng ah leng eigam sang a kenzaw leh sezaw lak ah min a bawlthou uh. Siamna neite’n hon kupbeh un.
  7. Khutsiam silbawl – gua leh mau naang zang a (seng/lawhpi gat cihte siam om nawnlou sim ihih ukha aw) gendek ka hikei. Pateh bawl, achaar bawl, siamgat (khawl a), puankhui, gari bawl, plumbering, masonry, blacksmith, ice cream cihte kuate bawl di a tuam a?

U Ginpu (PZGT) in “gamgi icih i lungsim ahi” a ci namah a, niamna, zawnna cihte i lungsim ana hisim lim ahi. Lehlam ah, niamzenpi kitheihmawh bawl a, mobile hoihpente tawi a, gari khawng a kinuamtholh zehzeh pen tungsang i kisak mahmah hang a i niamna khat ahi hi.


Hiai zawnna, niamna leh gamkeu, gamyhul sengsung pen i lungsim ciat ah deihlouha, poisakna leh puahphat utna lungsim hong omleh, gamhing, gamnuam leh gam niim dildial kipatna hong hilel ding hi. Tua ahihman in gam puah ding in pilna, siamna leh citna ka neikei, ci mailou in; i hihtheihsun a susetu a panglou leh mi’ panlaknate gin-omtak in ana zui lehang a puahpauh, a zunzun kihilel mai hi. Zogam a hon omsak tu Pasian in a gam puahtu ding leh zuntu dia hon koih ahi.


Delhi Paite Indongta in tutung khawmpi a kigenkhiate, thupukna kibawlte leh muhkhiakte micih in i tawi ua, i simtheih ding i Zokam tuamtuam in hon sunkhia/hawmkhia zawmah  henla, hileh ut na’ng e! Singtanglam khawng a le ban hawm mai di’n ah. 

Read 2859 times Last modified on Monday, 26 August 2013 23:40

  • Rangkachak
    Rangkachak
    Tuesday, 27 August 2013 11:33

    Htp @ngaihanglaimah in na hon malep ful zel e! Ka an simsuak pah aka.

    Na hon luikhiak thute zong manpha in kuptuak hi sa liang ing; kalbi khenkhat (5) na hon gente zong navak om ka sa.

    Na gen bang in Delhi Paite Indongta (DPI) in hiai bang panlakna/initiative hon pat ding ka na kilawp riau a, a ni 28th August ciang ale hawh ding a kisingsa ka hi ta.

    DPI in i gam leilung leh sing-le-guate puahthakna nna namenlou semthei zel di'n hong pang uhen aw.

  • mm11000volts
    mm11000volts
    Tuesday, 27 August 2013 21:59

    Phur dandan in kon kum tei di -
    Gamsa kap/vasa mat, lampi kiang a singkung mawk phuk2 chihte khamzoh guih ahi kei ding, huaiziak zoudawn school naupangte lak ah syllabus ah om kha hialkei lele environmental protection lam toh kisai sinsak di. Etsakna dia - Chief Seattle's Letter to American Govt & adg dng te khawng lunglut huai theitawp dia school a hilh zel di..
    Khalui July kha tawp lak a zoudawn lam ka va zinna ua khua khat ah, singkung tampi kisuan, kung 900 vel ahi, china sing a chi ua, kum 10 a piching, tua kum 4 hita achih uh ka va mu kha,, kum 4 sing din a sang thei mahmah zenzon geuh uhi,, sing-at theih sing hi ding ka gingta. Lungsim a hong om tuh - i singtang lou te ah, loutul kum bang in suan le, vat hunnawn chiang a na piching theita, di louvat nawn hun chia halgawp mai di hilou, sumsuah theih singkung tampi kinei di chih khawng, ka ngaihtuah mai2,, a practicable diam zw thei khang...
    Lou nei khua, ganvul khua chih bang in kikhen til tel thei le, ganvulh toh lou neih kop hang a, gan uang lua huan kinei zoulou, ki um zoulou chi pawl bang le tam mahmah zel aihteh,,,

    Bangteng gen2 le2 i kho hausate mah in pan hon lak kei uleh zaw, a mau space hon piak kei uleh gam neilou te'n bangmah kihih theilou hi maimah ve o..

Login to post comments