You are here: HomeColumnsKimbawi' PaKhattang Muvanlai Leh Kei

Khattang Muvanlai Leh Kei

Written by  Kimbawi’Pa Published inKimbawi' Pa Sunday, 01 June 2014 19:11
Khattang Muvanlai Leh Kei

~By: Kimbawi’pa

 

Gam lumna mun Moreh bang, Dimapur bang, Tlabung (Demagiri) leh Umkiang, chihte ah posting in ka paikha hi. Dimapur ahihleh khawpi ahi a, mihing leh motor thawm zak di a om gige hi. Moreh ahihleh sumdawng a kiveina munpi petmah ahi a, mihing kivei muh di a om den hi. Demagiri bel gamgi bul, mihing tawmna mun ahi a, sun hun chiang in Lunglei a kipan hong pai TATA Sumo khawng a passenger hong tuangte chihlouh mihing muh di a vang mahmah hi. Huai ban ah, khua lumlua a hihman in kuamah le pawtpawt khollou in a dai sipsip hi. Gamgi bul e, chilou in vasa ham zak di a vang mahmah a, kokkek zaw a hau ngial ua, huai ham pen chimtakhuai khop a zak in a om hi.

 

Tu’n ut leh utlouh gen man hilou in Umkiang ah hon sawl nawn ua, gam lumna mahmah ahi nawn hi. Sun hun, khaw lum lai a vialvak mi a tam kei. Himahleh a lampi poimoh (NH-44) in a totkhak a hihman in chimtakhuai di khop in motor a ging den a, lamlian (main road) a tomkha va pawtkhiak lel di le lithuai vungvung mun ahi. A sun-azan chih omlou phial in motor a tai zungzung mai a, zingkal, dak 8.00AM lak khawng bang a chu Assam lam a kipan motor zingthou vai a hong kuan uh chu pelh senglouh phial ahi.

 

A mun pen gamgi bul ahi sam a, ei tendan a phaizang a inmun bawl lou in mualtung leh dainawl ah in a bawl zawsop uhi. A khawkim leh kiang kuva kung in a dim a, huai kawm ah a teng uhi. A khawsakna uh kuva chiin leh ngasa bet hi pen a bang hi. Assam gamgi tanpha ah kuva kung a chiing dim uhi. BSF-te’n a kuva tangte uh man in Office ah hong submit (pe) nak ua, ka chimtak thei mahmah hi.

 

I late uh ka ngaihtuah a, chidaih di, ka thupi a hong lut dek ka hita hi. I late uah ‘mu’ chih i ngaina ua, ‘mu bang ngai’ ‘ mu bang hon ngai ve’ng’ chih bang a om veu hi. Himahleh Muvanlai pen Paite la lak ah ka mu khol kei hi. Khupching leh Ngambawm’ tangthu ah ‘Musi’ chih a kilang a, huai tuh ‘silmu’ a kichi hi. ‘Mu bang ngai’ chih khawng a gen napi in ‘Muvanlai’ hiam a ‘Mu’ min kigenna i late uah a om khol kei hi. Tedim lamte’ late ah bel a kilang zeuhzeuh hi. Muvanlai tawisang masa a ka theih Lusei la a Siampuii Sailo in ‘Chung Muvanlai a lo leng der der e thangvan ah’ chih hi’n ka thei hi. Huan, C.Lienzapau in ‘Chung Muvanlai’ chih la nalh zet a, phuak a siamtak a ahon sak leh I pakta mahmah taget uhi. Pahtak louh vual ahi kei, a thu a hoih in a sa siam tel mai!

 

Eilawi in I late uah Muvanlai pen genkha khol kei mah leh I saptuam heutute un ‘Muvanlai’ pen Bible ah a kigelh a, ‘MUVANLAI’ bang a thathak a hat di kigelh a hihman in hiai mu pen changtel leh gen in a nei bel sim uhi. Huan Muvanlai i chih uh English a ‘Eagle’ kichi hilou ‘Kite’ a chih uh houh ahi daih mai diam, chih khawng ka ngaihtuah khemkhem hi. ‘Eagle’ a chih uh pen lianpi khat a hihtuak a, tua eite’n Muvanlai i chihte uh bangpi a lian in ka thei hi. ‘Mubung’ I chihte uh houh Eagle ana hi daih diam, chih tanpha ka thei tuan kei hi.

 

Awle , ka gennop a thupi kei, Umkiang ah vasa a tam tuan kei. Baibek, tuivangou, tuklou, chihte a thawm uh a kiza deuh hi. Sunni a hong sang hiaihiai a, khua a hong lum pan a, dainawl ah tuklou a hong ham kalhkalh hi. Chimtak a ham tawp di ka sak chiang in nikai’(afternoon) tanpha a ham kalhkalh lai hi. Baibek nupa ahi ngei di ua, a hong kilak sek ua, huaite zaw a dawilok himhim ahi ua, a lengmang pah zel uhi.

 

Huchi’n tuklou ham ging ngaikhe kawm in sunni a hong sang hiaihiai a, ka Office nung ua vau kung keu khat ah Muvanlai a hong tuang a, huai ah a hong ham vangvang hi. A kallak chiang in lengkawm in a ham vung-vung a, ka en zel a, ka Office kong lam ua singkung a teh keu pian khat a taung in a ham vangvang zel hi. Khat kia a hihziak in koppih bei hi ngei di’n ka gingta hi. ‘Tuktu-vi-vi-vi’ chia ham hi pen in ka thei hi. Amah kia ahi a, hiai bang a khattang deuh mai a ahong ham chiang in ka lung a khoih mahmah a, kei toh ka kibulh hial hi.

 

Muvanlai lah khattang; kei lah khattang hi pen in ka kithei hi. Vasa dangte’n koppih nei ua, a kop ua a thum uleh thukhawm ua, a ham uleh hamkhawm ua bangziak tak a hiai Muvanlai koppih bei a om a d’aw, chih bang ka ngaihtuah khemkhem hi. Kei lah Umkiang a khattang, nektheih lim bek lah omlou, lawm di lah omlou, huchi himai ka hi sam hi. Himahleh Muvanlai bel a lunglen leh a utna munmun a leng a boh thei ahi a, kei bel huai ka hi kei hi. Huaiziak a Muvanlai’sang a chim zaw hi’n ka kikoih hi. Office verandah khawng a tu motor hong taite etliam maimai khawng ka hun zatdan ahi deuh pen hi.

 

Huan, MU kichite himhim sahing ne a kivak ahi ua, ak bang, vasa dangte bang a boh un a man ua, a sa a sial a ne uhi. Himahleh hiai a ka Muvanlai gen in ahihleh ak khawng a hong boh a, a mat lam ka thei kei zel hi. Vasa dangte houh man a kivak a diam, chih tanpha ka thei kei hi. MU chi himhim theigah ne a kivak a om lam ka thei kei bok a ahi. Bang a kivak a daw, chin kingaihtuah lenglah haihuai pi khat hong suak di a bang zel hi.

 

Ahia, kei ka hihleh ka sepna toh kisai a hiai mun a va om ka hi a, ka om di mah ahi. Ka tung a thuneitute’ hon sawl ka hihziak in. Himahleh hiai Muvanlai pen in superior officer/authority nei a dia aw, bangziak a hiai bang mun nuamlou tel a suankhua-khua a khattang a hamham a dia aw, chihte ka ngaihtuah hi. Mite’ hon chihdan hileh Customs-te side-income nei gige-dan ua hon ngaihdan uh hileh hiai Muvanlai in Umkiang khawmkim a velhna lam a side-income mu a diam? Chih bang ngaihtuah in a om khemkhem hi.

 

Muvanlai zaw amah thu a kitholh a, a utna munmun a leng thei ahi a, a khiaklahna mun hong bel hi sam di’n ka ngaihtuah hi. Kei hile’ng bel hiai mun tak khiaklah di et a en vetlou di ka hi a, hai ka sak ni a om maimah hi. Hiai ka muvanlai gen pen kei hile’ng bel gamgi zul a leng suk di ing a, huai Bangladesh gamgi bul, kuamah tenlouhna mun a vasa tam hive’n, huaite ham sese lou a tang di ing a, man a ne mai di ka hi. Huaite a kipuahvah pingpeng di’ng a, huichia Bangladesh gam tuipai tak tung a, kuamah sukbuai louh a leng diaidiai di ka hi.

 

Hiaite ka ngaihtuah chiang in Muvanlai hih ut hi kei mahle’ng amah bang a om ka ut hi. Leng di ing a, ka it, ka ngaih, ka khiaklah teng kiang a hoh mai di hi’ng a maw. Himahleh Umkiang ka tunna dia motor a dakkal 6-7 tan bang lut a, huai le lampi hoih hi diak lou a kitah-kitah a tun ahi lai hi. Ka kiknawnna dia lah huchi boka! Muvanlai’ lampi zaw a phok omlou a, traffic jam, chih le omlou a, bandh leh blockade in le dal tadih lou a, a ut leh lengsang diaidiai a, a ut leh niam len suk zel hia maw, ka chi hi.

 

Zalen tak a a-ut leh singkung a tuang a, a ut leh vanlaizawl a leng a, a ut leh ham a, a utkei leh dai a, amah thu petmah a om thei Muvanlai tuh a enhuaina khat om in ka thei peuhmah hi. ‘Mikhial na hihlam na khiphawk hia,’ ‘Hotdam ngai na hihlam na thei hia,’ ‘Na kilan theita diam,’ ‘Jesu Khris na lal leh hondampa in na pom hia,’ chia chialpi lah ngai lou lai, ‘Sih khamuanna na nei hia,’ chih bang le dot se louh a muang hia, muang leh muang lou ei va buaipih ngai lou a zalen ahi mai a, a lehlam tak a hampha taka hi.

Read 827 times

  • pheisam
    pheisam
    Monday, 02 June 2014 10:13

    Kimbawi Pa le ahong kilangnawn chiai chiai ta a, nuam e.
    Mubung ichih uh (amukhangei le om ingel duam ah ) , huai Andes tangdung lam a om , Condour acih te uh tawh kibangding in um ing. Muvanlai pen Musi ichihte houh ahihial diam maw , Musi bel neudeuh hi ven. Sangpi pi in bel leng zel mah uh .

    Mulukolh lah hilou, Musi lah hilou , Musane lah hideuh chiah lou, Mupi ichihsuk mai te pawl , Singtanglam khawng a ineulai deuh khawng a imatkhak chiang a antang nou khat khat khawng inteng a ki dong thei te pawl houh Muvanlai ahimai tam maw ? Vanlai a sang sim pi a alenchiang ua Muvanalai chi hang a ahong niamlen deuh chiang ua Musi /Mupi khawng cisuk vel mai mai bangle kihilim houh adiam maw ?

  • tempawng
    tempawng
    Monday, 02 June 2014 15:19

    simnop na e....
    Muvanlai kichite suntang lai khawng a vanlaizawl,sangtak a leeng ki enkha sek mah ve aw neulai..

    aknou/akpi chihte khong hong la sekte houh a diam maw..musi chu neu chilchel deuh aka

  • dingmuansang
    dingmuansang
    Thursday, 26 June 2014 00:01

    Areh Pa Thang...laigelh tawpsan ta di houh hon sa kha hang...housim in na pan a ngaihtuah di omlou in na nuse ngeikei a hiai ahi na laigelh te simnop kasak gige na...adang le ngak lel2 kahi...

  • dingmuansang
    dingmuansang
    Thursday, 26 June 2014 00:01

    Areh Pa Thang...laigelh tawpsan ta di houh hon sa kha hang...housim in na pan a ngaihtuah di omlou in na nuse ngeikei a hiai ahi na laigelh te simnop kasak gige na...adang le ngak lel2 kahi...

Login to post comments