You are here: HomeColumnsKimbawi' PaPromotion Lopna a Thugen

Promotion Lopna a Thugen

Written by  Kimbawi’Pa Published inKimbawi' Pa Tuesday, 11 November 2014 01:47
Promotion Lopna a Thugen

~By: Kimbawi’ Pa

 

(Pathian’ panpihna leh hehpihna ziak liauliau in ka sepna ah promotion ka mu mawk hi. August 01, 1994 a join, October 29, 2014 in promotion order a hong suak hi. Huai toh kiton in Shillong a ka department ua ka seppihte’n 04.11.2014 in lopsakna a hon nei ua, huai hun a ka thugen leh bawllem zek hiai thu ahi.)

 

Tuni a hiai bang a promotion mu thei a om a, ka mi leh sa ka seppite’ lop sak theih dia ka om ziak in Pathian’ tung leh noute tung ah kipahthu ka gen masa ahi. Hiai tan ka tun theihna thu saupi ahi a, himahleh tomchik a gen k’on sawm hi.

 

Amasa in hiai k’on gen di. Haksatna tampi tuak a sepna toh kisai a hiai tan tung himahle’ng ittu ka nei a, huaite tung ah kipahthu ka gen masa ut hi. Ka nu’ sung a kipan a ka piankhiak a mual dildel a, nak lou a piangkhia a hon chi uhi. Himahleh Pathian in hon it ahi dia, ka Pupi, Laigin, naudom siam mahmah in kei a piang tung kuangngou a tuivot a hon diah a, ka khete a hon bungbu khai a hon vei leh nakkhia a hing ka hi, chih a hon hilh uhi. Huchia mihing hong suak in ka nu’n a hon it a, sum leh pai bangmah nei kei mahleh ka hoihna di’n thil bangkim ah hon na huai a, kei a di’n a thum gige hi. Huchi a Pathian leh ka nu’n a hon itna uh la kik lou leh hon delh zui zel lai in kei hon ittu di zi hoih tak a hon pia a, ka hehsan ni a le hon taisan lou a ka kiang a om peih, kei a dia muanhuai mahmah ka neih beh hi. Hiai, Pathian, ka nu leh ka zi, kei hon ittute’ ziak a vualzawlna tang hi’n ka kithei a, amasa in amaute kiang ah kipahthu ka gen masa ahi.

 

Hiai sepna toh kisai a promotion ka muhna di ah kilawplou ka hia, chih ka thei kei, a thu a ginna a sawt mahmah a, U Paukhokhai’ chih bang in kou department bel ‘lepchiah department’ khat ka suak ua; promotion thei dinmun a ding ka hihlam bang a gen chiang un le ka nuih a za mai hi. Ka Superintendent pa bang ngial in ‘promotion mu di na hita, na pending teng zou in’ a hon chih chiang bang in ka nuih a za sim maimah hi.

 

A gen kheukhou ua, ka kum ngei khol kei hi. Order suah ni di tanpha in ka nuih a za lai hi. Himahleh a hong suak a, tel chu ka hi mai hi. Huan ka seppih, Baladventure Nongbri bang kipak mahmah ahi dia, joining report bang amah gelhsa sen di’n a hon sawl hial a, pei in a hon kipeipih mai hi. Huchi kipei buai ngai hial a theilou in nuihza sim in a nung ka zui hi. Hiai thu a kithanna sawtpi a hihtakman in excitement lampang ka nei kei zel hi. Thumna ah le ka lan kei bok a, Pathian kiang a nget vak chi in le ka koih kei maimah hi. Order a hong suak a, tel ka hi tei mai hi.

 

Hiai tan ka tuna dia ka laizildan k’on gen zek ut hi. Pa’ ngaihsak deuh a laizil ana hile’ng ka laizil lai hunte haksa lawmlawm lou maithei hinapi’n ka laizil lai hunte ka haksat lai petmah hun a suak hi. Private skul leh English medium tawnkha lou a laizil ka hi a, government skul ngen a kai ka suak phial hi. Class VII ahihleh Singngat a Hill Model High School ah ka kai a, himahleh huai kum pen ka skul kai ginatlouh pen kum a suak hi. Huai omdan tuh, government skul a I kai leh laibu (text book) nei lou pi bang in a kikai thei gige hi. Himahleh Hill Model School a k’ong kai chiang in text book a tamzaw ka nei zou kei a, teacher class la dia hong lutte’n text book neilou pa chu bench tung ah a class lak sung uh a hon ding sak ua, huai kia hilou in tuition fee nangawn ka piak ginat zohlouh ziak in assembly a sapkhiak in ka om veu a, huchi’n skul kai leh kailouh ka thuah hi. Class VII final exam lou mai dia ka kisak lai in school board a tel ka pu T. Zarual leh Gang Thawnkhansuante’n a fee na piak kim kei lele exam mai in, a hong chi ua, zum pipi in exam ah ka vatu hi. Huchi’n pawl suan thei di’n a hon koih uhi.

 

Huai lai a kha, exercise book, Hindustan No. 5 khawng a note gelh theite a changkang pawl ahi ua, seki thum - .75 paise – man ahi. Jud-pen/Youth pen, a kichi mai a, huai zangte a changkang mahmahte ahi lai ua, Rs. 8/- khawng man hi’n ka thei hi. Tulai a Classmate paperte khawng hoih tak ahi. Huai lai a mi nautang in pen ka zat uh Kingson ahi a, exercise book paper hoihlou khawng bang i gelh leh mat nengnung ahi zawmah.

 

Himahleh huai a kai zom theilou ka hi pah a, Singngat Government High School mah ka tun nawn a ngai zel hi. Class VIII huai a kipan a zou in a ban skul kai taktak chih a om kei hi. Mimbung, Mizoram High School a ka paneu in sepna a muh ziak in huai lam peuh ka zuan lai hi. Ahi thei taktak kei, Lamka a E.L. Scism ah ka pa’n hon admit nawn a, Churachandpur Cinema Hall kiang a zu zuakna ah hon koih hi. Laisim chih a om thei taktak kei a, huan, huai lai a Lamka a English medium school khawng a kai theite English leh laisiam di ngen in ka koih a, zumhuai sa in ka tawp nawn zel hi. Huaizoh in Lamka a secondary I chih mai uh, Churachandpur High School ah ka pa mah in a hon admit nawn a, Tedim Road a zuzuakna mah, Highlander Hotel kichi ah hon koih nawn hi. Huan L.G. Hotel ah le bangtan hiam ka om kha lai hi. Ka giahna ahihleh tua PTC Headquarters Office, zu zuakna mah ahi zel hi.

 

Huchia laisim lah hi taktak theilou a om in a tawp in maban ka ‘uingol gamphut’ suk a, High School tuamtuam ah ‘candidate’ exam in ka diang tuah a, Chirachandpur High School min a ka exam leh ‘compartment’ ka mu a, Songtal High School min a ka exam leh ‘compartment’ mah mathematics ah ka mu zel hi. Lungkia a exam nawn louh mai dia ka kingaihtuah lai in Singngat Government High School a Headmaster Pa Tawng (D. Chinlian) in amah skul min a exam di’n a hon zawn zel a, ka va exam zel hi. Fail hiam ‘compartment’ hiam zel di lau in ka exam khak ka kisik mahmah hi. Himahleh result a hong suak a, 3rd Division in ka pass khe nulh sam hi. Huai a kipan a nunghei lou phial in BA 2nd Year tan ka zom thei hi. Himahleh a hon deihsak kichi tanau khenkhatte’ mitmei ka ven ziak in BA 2nd Year ka hih lai in Saikot ITI ah Steno ka va zil a, huai in ka mark a kai niam zot a, huan, huai kum mah in SSC tungtawn in Clerk sepna All India Radio, Imphal ah ka mu a, tua ka sepna ka join ma tan huai ah UDC promotion ka muh tan in ka sem hi.

 

Skul kaina lampang genkik le’ng, kou hun lai a government skul a kai kichi skulpute’n explain, chih omlou a, English, Manipuri hi’n Hindi hileh hon simkhia ua, ei pau a hon let uh, huai ngaihkhiak mai ahi. Government skul a kai chu, Class V tan Manipuri ngen ahi mai phial a, English paper khat, Hindi khat ahi mai hi. Mathematics bang kei zildan tak a HCF/GCM chih bang Meitei pau a Go.Sa.Gu. ahi a, LCM bang Lo.Sa.Gu. hidan ahi. Simplify bang ‘laihallu’ hi geih mai. Social Studies bang ‘sahitya anouba’ chih khawng ahi lai hi. Pau siam thei khawng hileng chu government skul a huai tan lai ka zilna pen phatuam mahmah di ahi. Hindi, Bengali, Manipuri, chihte ka gelhkop thei nawn kei a, hilele ka sim siam mahmah lai hi.

 

Clerk k’on sem ngei mai a, loh a tawm mahmah lai hi. Huchi’n sepna sangzaw neih k’on sawm nawn hi. Himahleh English medium tawn lou a laizil ka hihman in Interview Board mai a English a interview dia tut di ka kingaihtuah chiang in le ka nervous zou hial hi. Himahleh utna in hon sawl teitei ahi dia, BA 3rd Year ah ka subject Economics pen History a kheng in ka va exam thak nawn hi. 1989 a graduate di lai 1991 in BA ka pass thak hi. Ka graduate zoh a kipan in ka examnate a lohching sam in ka ma ah tel di thum a hong kilui a, Assistant Grade (Department of Tele Communications), Inspector, Central Excise leh Probationary Officer, SBI, (Interview di om) ahi uhi. Clerk nna pen chimtak ka hihman in tua sepna, Inspector ka na tel masa a, Assistant pen ka nawlkhin pah a, PO pen ka utpen ahi zel hi. Himahleh kei a dia sehlouh ahi dia, Induction Course Training toh interview a kituah ziak in ka tel thei kei hi. Hiai khawng ahi di.

 

Sepna toh kisai in facility gina om mang lou, out-flung area ngen phial ka tang a, computer gen louh manual typewriter nangawn a omlouhna khawng ngen a posting tangkha ka suak a, tulai digital khawvel in a hon makhelh pawl in ka pang kha hi. Headquarters hiam, Division hiam khawng a I hon sep leh dot ngai a tam mahmah hi.

 

Himahleh hiai sepna ka join bang le hihsual vak lou ka bang a, ka kipak veve hi. 1989 batchte toh kum khat sung a promotion mu khawm ka hi mawk a, hamphatna ngah mahmah in ka kithei hi. Hiaite tengteng TOUPA’ hon pina ziak liauliau ahi a, maban ka sep dite bang ah noute’n thumna in hon delhzui lai di’n k’on ngen hi. Ka kipak e.

 

(Hiai bang nemnum khawng in thu ka gen thei lel hi.)

Read 744 times
Login to post comments