You are here: HomeColumnsKimbawi' PaShillong Tung Nawn

Shillong Tung Nawn

Written by  Kimbawi’Pa Published inKimbawi' Pa Monday, 24 November 2014 12:25
Shillong Tung Nawn

~ By: Kimbawi’ Pa

 

Umkiang, a khiaklahna di om mahmah lou chu pawtsan thei di’n heutute’n a hon lakhia ua, nak sung a liit kaihkhiak a bang hial hi. A mun lumdan thei gegu a lampi se tak tawn a hoh veu di ka ngaihtuahna mai in le a lin vungvung hi. Motor service lah kichup lou, Bengali Muslimte’ motor khawng a tuang, nidang lai ei lam a motor tuang mah bang, cigarettes leh biri khawng a utut in a sung a tep mai, chihte om louhna mun tungkik ka hi peuhmah hi. Huan, khawlum luat ziak bang in beer bang ka va zongsang dek zawmah a, huai lel bang taisan thei dek in ka om thei di’n ka gingta hi. Huai lam zaw ning kitelhuai, gen dah zaw mai di.

 

Shillong hi’n, a koi mun hileh a khawtualte a pianken ua a neu ziak uleh a melsiat tangpi ziak uh ahi dia, a lungput (mentality) uh a neu mahmah hi. Ki-inteksak leh khawtualmi a hihna uah a kihisak mahmah uhi. A lungput uh matna chiang ka nei simta hi. Hi keukou, zahtak nei lou, huchia amau mun a ki deihkhop mahmahte ahi uhi. A gam uh hoih mahleh puah le sawm khollou uh a bang maimah lai hi. A neite hausa hulhul a, azawng leh ahau kigamla hulhul di a bang sam uhi. Tutung in hiai bang a hihna tangpi uh k’on gel hut mawk hi.

 

Khasite’ lak ah ‘tlawmngaihna’ chih in omzia nei kei leh kilawm ka sa hi. Tenna in di a bawl ma bang un dai (fencing) a kai masa phot deuh uhi. Huchi’n tenna in di a bawl ua uhi. A tenglut ua, huchi’n a huangsung uh chu a zutzut peih uhi. Nengchik pan kai maimai bang le brush in a nawtnawt peih uhi. Huangsung chu hashing peih mahmah uh. Hilele a dai pawlam ua loupa bang hahsiang dia koih mawngmawng lou zel uh a bang hi. Lampi, a huang kiang uah loupa a pou tam mahmah hi. Lampi a paite’ a dia dongkholh lawmlawm hi kei mahleh bohkhiak siang dia kilawm a tam mahmah hi.

 

‘Tlawmngaihna’ chih thumal nei lou khawng ahi maithei ua, a theihlouhman un Khasi leh Jaintiate’n misi a neih chiang un a zawngte a buai mahmah uh, chih ka kiang ua Khasi khat in a hon hilh hi. A gen a, ‘Kou Khasi leh Jaintiate ka chindan uh a hoih kei a, ka sih chiang ua mi zawngte’n sum tam pipi a bat mai uh a ngai. Nek di bawl kei le uh kuamah va hoh lou di a hihziak a huai dia sum ba zen a apan uh ngai ahi’ chi’n a hon hilh hi. Mi hausa a sih leh bel a kivuina di lam hiam, a kihalna dim un a zot kawm un sumnen a vawk zungzung zel uhi.

 

A tangpi in misi zan khat in a giahsak ngeingei a hi a, a neizou leh hausate’n bel ni zan 3 (thum) tan a giak sak uhi. A neizoute’n a misi uh a sih ni’n a suit di a khui sak ua, huai toh a lupna a lum in lace puan in a liah uhi. Ni thum sung khawng a koih sung ua nek leh dawn intek in a sik ngekngek mai ahi. Buh, meh, singpi, sang, kuva, chihte tanpha a vangkim in a hawm mai uhi. Huaite om keileh kuaman uap lou di ahi zenhouh uhi.

 

Sum deih mahmah napi’n sum dawn a siam kei uhi. I van lei di man bang sumnen I neih keileh khot louh poi salou khop in a om tentun mawk uhi. Mi lamdang deuh mah zaw hi un ka thei hi. A gam uh nuam sa lua, mun dang a pawtkhe khollou a tamzaw ahi sam ua, huaiziak in a outlook uh a kawchik vek sim uhi. Nidang a Shillong khawng a hon gen chiang ua English siam vek, Hindi thei vek hi di ua I gintak vial leh Shillong pua I pelh zek leh laitheilou phial, pau dang theilou a tam mahmah zawmah uhi. Arunachal Pradesh ah ahihleh khawta, gamtawp a omte bang in Hindi a thei vek thethup uhi.

 

Kei va omna lam pen East leh West Jaintia Hills District ahi a, a tenna munte uh puahlouh leh a mite mawl mah le uh a hausa thei sim chiat zel uhi. A luahna gam uh suangmeihol (coal) leh sunu (lime) omna gam ahi a, mimawl mahmah dia gintak theihte bang in sum a hau mahmah zel uhi. A tenna inte uh bang a hoih thei tawp a theih ua a bawl uh hi sam di’n ka gingta a, ei chihdan di hileh ‘singtang dawn’ a dia kikhual thei uh ka sa mahmah hi. Meghalay a dia huai lam a khaw om tawpna Lattacherra a chih uh bang a ken a ken maimah, hilele pucca building khawng a bawl zoute’n a bawl mai uhi. Meghalay pelh dek, a gamgi lui uh Malidor kiang ah Oil Pump khat a om a, mi teng sam mah le uh a tam kei uhi. Huai mun ah bel inn hoih a om kei.

 

Shillong I ngai thupi mahmah ua, siamsinna lam bang ah naih pen in I nei uhi. Himahleh a syllabi uh et in a standard uh niam ka sa hi. Manipur khawng a college ah teacherte’n a hon hilh khol kei ua hive’n syllabi a sangzaw tham hi. Huan, hoih le hoihzaw in ka thei hi. Huaiziak a siamsinna dia naih dia lunggulh pen di’n ka koih khol kei hi. Private khawng leh organization tuamtuam bang in school a hon vanglak uleh high school tan a tawp lou in hinger secondary (XIIth standard) tan a hong thethup zel uhi.

 

Eilawi in Shillong a siamsinna I lunggulhna ziak uh English nal (flow) deuh a pau theih hi’n ka thei hi. Himahleh kingaihtuah vengveng le English nal deuh a pau theih laisiamna ahi kei hi. Huai sang a poimoh zaw tuh mahni subject master di hi’n ka ngaihtuah hi. Mahni subject master lou pi in English nal viau lele a zatna di a tam kei. I master leh bel English nal khol kei lele a kigen thei thou hi. Huai ahi a poimoh. Huaiziak a tate zalen di phet leh sum tampi seng lel dia Shillong khawng lunggulh luat louh a hoih mai diam, chih bang ngaihtuah in a om hi.

 

Kingaihtuah dia hoih mahmah chu I khawtang uh zalen kei deuh in, khawlai pawt khawng kidam deuh in, Lamka khawng mah ah lai zil in, lecturerte bang phatuamngai deuh le uh mi gam lunggulhna di om in ka thei kei hi. I society uh bawlhoih a poimoh a, huai dia panla di kua? Hiai dotna kichiantak a I dawn theih uleh ei a hampha kihi di ahi. Unau, hiai khawng na ngaihtuah ngei hia? Ngaihtuah khawm a panlak poimoh na sa uhia? Thil hithei ahi. Mi gam a sum tam pipi sunlut sang in a hoihzaw kei di maw? I kingaihtuah uh a hun mahmah hi.

Read 505 times
Login to post comments