You are here: HomeColumnsPaitekhuakMember of Parliament (M.P.) te Poimohna leh Mohpuakna: Kua ahia I tel di uh?

Member of Parliament (M.P.) te Poimohna leh Mohpuakna: Kua ahia I tel di uh?

Written by  Published inPaitekhuak Tuesday, 11 March 2014 02:35
Member of Parliament (M.P.) te Poimohna leh Mohpuakna: Kua ahia I tel di uh?

~By: Joy Tonsing

 

Mipi kivaihawmna (democracy) gam a teng ihih dungzui un kum 5 hal a India Innpi (Parliament) a mipi palai ding telna neih hun hong tungnawn dekta. Hiai hun hong tun chiang in mipite hi’n heutute hileh buai in i buai nawn sauhsauh ding uhi. Hiai kum 5 hal a i tel Member of Parliament (M.P.) te bang dia i tel uh hia? Bang ahia a poimohna uh? A mohpuakna uh bang ahia? Bang a zat ding leh bangchi bang a zat ding ahi ua?

 

India gam mipi kivaihawmna ichi ua, himahleh mi tengteng munkhat a va paikhawm a vai va hawmtheih hilou hi. Nidang lai in Greek City State-te ah bel mi leng tam nailou in mipite paikhawm in vaihawm zel uhi (direct democracy). Himahleh tuni chiang in mihing tam lo ta ihih man in mipiteng teng kikaihkhawm a vaihawm ding chih thil hithei hilou hi. Huaiziak in India Danbupi (Constitution) in i sik-le-tang a vaihawm ding mipite’n tel a, huaite’n State ah Assembly leh Phualpi ah Parliament tungtawn in vai a hawm ding uh chi’n honna geelsak hi. Hiai i sil-le-tang a vaihawm dia i telte State ah MLA leh Phualpi ah MP kichi hi. Amau te’n Innpite ah i haksatnate va tangkou a, i sik-le-tang a dan (law) va bawl a, solkal in a sep ding bang semna hiam chihte kansui a Innpi a i sik-le-tang a vapau dingte ahi uhi.

 

Ahihleh Phualpi a vaihawmna Innpi Parliament/Innpi nasep ding bang ahia chih en masa le:

 

(i)Dan bawltheihna (law making power)-Parliament nasep poimoh mahmah leh a poimoh pen chihtheih tuh dan bawl (law-making) ahi. Solkal leh mipite zat/zuih ding dan bawlna ding a mohpuakna Parliament kiang a piak ahi. India Danbupi/ Constitution Seventh Schedule a List 3, Union List, State List leh Concurrent List om a, State Legislature in (huaichu i MLA te’n) State List a subject 66 kipete ah dan bawlthei a, Parliament in Union List a subject 97 kipete ah dan bawlthei hi. Concurrent List a subject 47 kipete ah bel Central leh State Government in dan bawltheihna nei tuaktuak ua, himahleh State dan leh Centre dan a kikalh khak leh Central dan pen tungnung zo ding hi. MP dia itelte I sik-le-tang a dan bawlna a vatel a, dan kibawl dingte hoihna, hoihlounate velchian a huai dungzui a nasem dia i tel uh ahi.

 

(ii) Executive tung a thuneihna (Control over executive)-Parliament in Minister/Ministry (huaituh solkal ichih) te tung ah thuneihna liantak a nei hi. Solkal in ana sepdi hoihtak in a sem na hia chihte etkai Parliament mohpuakna ahi. Hiai ding in Innpi ah vanzat chi tuamtuam ets. Question, adjournment motion, calling attention, short duration discussion, zero hour, special mention, resolution move chihte  om hi. Hiai ban ah Parliamentary Committee te tungtawn in MP ten solkal in nasem tatak na hia chihte sui a,  solkal in hichibang in panla uhen chi’n thusun (recommendation) pethei zel uhi.

 

(iii)Sum-le-pai tung a thuneiha (Financial Control/Power)-Parliament phalna lou in Solkal in sum paisa khat leng a zangtheikei. Sum zatna ding in Parliament phalna a ngai masa. Kumteng in Solkal in budget (kumkhat sung a sum senna’ng leh muhna’ng) bawl in Parliament ah a puaklut ngai a, hiai budget pen Parliament in a pass ngai hi. Azatna di bangtak in a kizang na hia chih leng Parliament in a enzui/kanzui/suizui thei. Department/Ministry-te demands for grants Innpi ban ah Parliamentary Committee/Departmental-related Standing Committees (DRSCs) te ah genkhawm hizel hi.  

 

MP te i chih i sik-le-tang a Phualpi Solkal a palai i sawl, i sik le tang ua dan bawl ding, i haksatna leh poimohte tangkou ding a i telkhiak ahi uhi. Phualpi Solkal in nna hoihtak in a semna uhia, amau constituency sung ah Solkal policy leh program, development funds/schemes/work te adiktak in a kisemkhe na hia, a mipite’n bang haksatna tuak ua bang poimoh ahi ua chihte enkai a, India Innpi a mipite haksatnate a tangkoupih diing uh ahi. Hiaite tangkoupih theihna ding in Innpi nihte-Lok Sabha leh Rajya Sabha ah session om chiang in vanzat chi tuamtuam om hi. Hiaite avek a gen seng hikei mahleh a poimoh diakte a tomkim in ensuk nawn leng:

 

Questions: Solkal in a nasep ding bangtak a sem taktak na hia, bangziak a a sep ding bangtak a semlou hiam chih khawng leh Solkal in policy leh program bangbang nei hiam chihte MP ten a dot/theih ut uleh a kisaipih Minister kiang ah Innpi ah Question Hour hun in dongthei uhi. Question Hour pen Solkal in a mohpuakna a zoh leh zohlouh etkhiakna dia vanzat poimoh penpen ahi. Question Hour hun a a kisaipih Minister in kana enzui ding, hiai kana hih ding achihleh (assurance a piak leh) hiaite delhzui ding in Innpi nihte’n Committee on Government Assurance neituak ua, hiai Committee in Minister in Innpi mai a a thuchiamte a  semsuah na hiam chih ana kanzui zel hi.

 

Half-an-Hour Discussion: Hiai ahihleh amin dungzui in dakkal kimkhat (half an hour) sung kikupna ahi. Tunai a Question Hour a thu kidong, thu poimoh leh kikupbeh dia hoihte puaklut theihna dia MP te’n vanzat a neih uh ahi. A poluttu MP in statement a bawl a a kisaipih Minister in dawnna a pezel.

 

Calling Attention: Mipi adia thu poimoh kin om aleh MP te’n a kisaipih Minister a theihsak theihna ding un Calling Attention bawl thei uhi. MP te’n Minister theihdia thil poimoh a pulak chiang un Minister in dawnna a pia hiam ahihkeile hun lemchang dang ah dawnna pe di’n a ngen thei hi. Hiai pen Question Hour zoh a neih ahi tangpi hi.

 

Short Duration Discussion: Hiai leng MP te’n mipite adia thu poimoh leh kin puaklut theihna ding ua kibawl ahi a, Innpi ah kikupna om in Minister in dawnna a pezel hi.

 

Special Mention: Hiai leng Innpi a thu poimoh puaklut theihna dia MP te vanzat khat ahi. Special Mention polutte MP kiang ah a akisaipih  Minister in dawnna a khak ding a, Ministry of Parliamentary Affairs in a kanzui ding (follow-up).

 

Motions: Innpi in hiai hihni ahihkeile solkal in hiai hon hih hen chih na ding leh thiltung banghiam toh kisai a Innpi in hiai ngaihdan kinei hen/paipih ni chi’n MP ten Innpi ah Motion move thei uhi. Motion-te kikupna Innpi ah om a, a voting leng om in a paisuak leh a kisaipih Minister theihsak in om hi.

 

Parliamentary Committees: Solkal in a nasepte toh kisai in mipi palaite tung ah answerable ahi uh. Hiai mipi palaite’n solkal nasepna a etkai theihna ding ua vanzat poimoh mahmah Parliamentary Committee-te ahi. MP-te Parliamentary Committee 1 bek a Member ahi teitei uhi. Parliamentary Committee tuamtuam om a, Lok Sabha leh Rajya Sabha in a tuamtuak a a kineih uh Standing House Committees leh Lok Sabha leh Rajya Sabha Member te omkhawmna Departmental Related Standing Committees (DRSCs) te om hi. Hiai Committee te tungtawn in MP te’n na tamtak semthei ua, Bill thak kipolut te bang, Solkal policy sepsuahna toh kisai bang leh thil dangdang ah Ministry te toh meeting khawng nei in, study/sui ua, a muhkhiakte uleh solkal in ana sepsuah ding thukup/observations and recommendations bawl in Innpi ah report pezel uhi. Hiai report a recommendation te atangpi in Solkal in pom in semsuah zel hi.

 

Parliamentary Committee-te MP-te adia vanzat poimoh tak ahih ban ah Ministry/Department paidan a zilna uh leh maban a Minister mohpuakna feltak a a lettheihna ding ua training ground hoihtak ahi.  Ets. Committee on Home Affairs in Home Ministry toh kisai a Parliament a Bill kipolut te ana enchian ua, report pezel uhi. Committee on Government Assurance in Minister ten Innpi a assurance (thuchiam) a bawlte uh a semsuah na uhia, a semsuah kei uhia chih enkai uh. Committee on Subordinate Legislation in Innpi a Bill kipass (Bill a kipass zoh a President in lemsakpihna a piakkhit chia Act kichi hi) te sepsuah na ding a a kisaipih Ministry in rules/regulations a bawlte ana enchian in bawldik/bawlhoih tuak, paihkhiak tuak (amendment/deletion) omte Ministry te kiang a hih ding in thusun bawl zel. Huai bang in Committee dang tuamtuam te’n mohpuakna tuamtuam nei diudeu in Executive te tung ah thuneihna nei uhi.

 

MPLADS Fund: MP te development nna semdi hilou uh himahleh development work ah bel 'say'/gen-le-sak tampi neithei uhi. Phualpi Solkal in MP te’n development work a septheihna ding un MP Local Area Developemnt Scheme (MPLADS) fund bawlsak ua, kum khat in Rs. 5 crore a constituency sung ua (Rajya Sabha MP te’n a State sung uah) development work adi’n sem thei uhi.

 

MP te’n Ministry ah lai a gelh peuhmah uh poimoh ngaih ahi a, a hitheitan in Minister in a dawn louh tawp a, Secretary in a dawn teitei ding chih ahi. A ngetna hitheilou ahih lele hitheilouh ahihdan theihsak a om ding chih ahi. Huaiziak in MP fel leh kizente adin thil tampi sepkhiak theih luat ahi. MP hiding in bel ahitheitan in laisiam, law thei, sappau/vaipau thei hile uh a deihhuai mahmah. Hiai a tung a Solkal in a sepdi bang semna hia chihleh mipite haksatna te pulakna dia vanzat i taklatte zangthei di’n MP bangchi bang i tel ding ua? Hiaite zangthei leh zang utdin siamna, pilna leh kimanna a nei uhia chihte ngaihtuah vengveng kawm in i palai ding tel leng deihhuai isa ahi.  

 

Thukhitna:

 

MP kitelna hun in support i puang sek ua, midang deuh ichihte hiam ahihkeileh eisung bang ah candidate I vawkkhe sek uh. Hiai a tung a MP te nasep ding leh nasep theihdan i gente semkhe di’n i candidate gupte ahihkeile gup sawmte achinna uhia chih ngaihtuah tham ching isa uhia? A tung a i gente semsuah thei ding in siamna, pilna aneina uhia, a chinna uhia chih i sui un in ngaihtuah ngei uhia? Ahihkeileh support top mai, elekson sung a sum-le-pai khawng hon piak uale hun sa mai, i support-te a chin ualeh lohching lodan a kingai, aban le bangmah ngaihsak nawn sese lou ihi uhia? I telching te un bang va sem, Innpi ah i haksatna uleh poimohte ava tangkou ngei uhia chihte i sui ngei uhia? Tulai khovel ah hiaite sui a haksa hetkei,  Lok Sabha leh Rajya Sabha website ah muhtheih vekta.

 

Ei amipi hi’n heutute lam apat in atung a i gente sem din i MP-te bangzah vei iva approach ta a, i haksatnate uh leh i gam-le-nam adia thu poimohte tangkou di’n iva kuun ngei uhia? Chief Guest khawng a sapsap mai a sum hon piakchiang ua lungkim mai ihi uhia? MPLADS Fund tungtawn a nasep di bangzah hiam hon piak ualeh lungkim lua ihi uhia? Palai hoih, MP hoih i deih uleh a tung a kigente ngaihtuah kawm in kua i gum ding ua, kua i tel ding ua chih ngaihtuah ni.  A hun laitak ahi. 

Read 690 times
Login to post comments