You are here: HomeColumnsPaitekhuakMLA TE BANGDIA I TEEL UH AHIA?

MLA TE BANGDIA I TEEL UH AHIA?

Written by  Joy Tonsing Published inPaitekhuak Wednesday, 14 August 2013 15:02
MLA TE BANGDIA I TEEL UH AHIA?

~Joy Tonsing

 

ZEPADA in Zomi Namni in Talkshow “We the People” kichi  bang hon sai leh internet khovel ah MLA election di toh kisai nasatak in kikupna omta. Himahleh hiai kikupna apat a khenkhat in i theihsiamlouh uh hi a katheih, ban ah, innlam a leng tampi in i theihsiamlouh ua ahihleh MLA te bangdia/bang nna sem dia i tel uh ahia chih ahi.  Tamtak in MLA te development work sai/sem dia i tel uh na sakha laizang hi hang. Huaiziak tak in i MLA te’n a sepdi pentak uh semkha lou in, a seplouhdi lamlam uh ana sawksawk kha nilouh uh a hidiam? Khenkhat te adi’n houchik bang mahleh a theisiamlou tamtak i om man un hiai toh kisai kikup zek ka ut hi.

 

India gam a teng ihi ua, India gam kivaipuakna bel democracy ahi. Democracy i chih Greek pau “demos”-people/mipi leh “kratos”-power/vaihawmna/thuneihna apan kilakhia ahi a, huaiziak in democracy i chih chiang in mipi kivaihawmna chihna ahi. Ahihleh mipi vaihawmna ahihleh mipi tengteng paikhawm noinoi a vaihawm di maw chih dotna omthei nawn hi. Mihing hichizahta paikhawm noinoi a vaihawm hitheilou ahihman in i sik-le-tang ua vaihawm di kitel in huaite’n vai hon hawm uhi. Hiai i sik-le-tang a vaihawm dia i tel te state ah M.L.A. (Member of Legislative Assembly) kichi ua, Phualpi ah M.P. (Member of Parliament) kichi uhi.

 

India gam kivaihawmna kahiang (branch) thum in kikhen nawn leuleu hi-legislature (dan bawlpawl), executive (a semkhe pawl) leh judiciary (dan interpret/adjudicate pawl).

 

Legislature i chih chiang in dan bawl dia i telkhiak i MLA, MP te Assembly/Parliament khawng a tu a dan hon bawl chiang un legislature kichi hi. Legislature in dan hon bawlte executive (i.e. Minister leh a nuai ua Ministry/Department nnasemte) ten ana semkhia uhi. Dan hong kizat chiang in a hetkhak/sukkhak ten remedy a neihtheih na ding un leh Legislature in dan abawlte Constitution toh kikalh kha hiam chihte enkai ding in Judiciary (Court) te ana om uhi.

 

Ahihleh Legislature in power tampi a neihte lak ah a poimoh deuhte enzual le:

 

(i) Dan bawltheihna (law making power) - Legislature in dan a bawltheihna toh kisai in State Legislature leh Parliament in dan bawltheihna tuam ana nei nawn hi. India Danbupi/Indian Constitution Seventh Schedule a List 3, Union List, State List leh Concurrent List om a, State Legislature in (huaichu i MLA te’n) State List a subject 66 kipete ah dan bawlthei a, Parliament in Union List a subject 97 kipete ah dan bawlthei a, Concurrent List a subject 47 kipete ah bel Central leh State Government in dan bawltheihna nei tuaktuak ua, himahleh State in a bawl dan leh Centre in a bawl dan a kikalh khak leh Central dan pen tungnung zo ding hi.  Hiai State List a om subject poimoh deuhte ahihleh law and order, health, agriculture, local government leh adangdang ahi uhi.  I MLA te kha hiai State List a subject kipete a dan bawl dia i teel uh na hidan eive, development work sem dia kiteel hi zenzen lou ahi uh. Development work sem ding in bel solkal in Ministry/Department a political head Ministerte, administrative head Secretary te leh anuai ua solkal nnasemte om uhi. I MLA te Minister khawng hong kai uale bel Assembly a dan kibawlte leh government policy, development schemes te semkhetu (executive) hong hi uhi. Huai omdan bel MLA teng (Ministerte tel in) Legislature hivek ua, himahleh MLA te lak a bangzah hiam kha Executive hi uh chihna ahi.

 


Assembly/House a law/dan hong kipuaklut chiang in MLA ten ana daal/oppose theih ua, hoihlou asaknate uh taangkoupih thei uhi. Huaite gen theih/hih theihna din laisiam, hithei liai leh law thei kiphamoh hi. Parliament leh Parliament nuai a Committee tuamtuam omte ets. Departmental Related Standing Committees leh Select Committee te khawng ah MP ten bill toh kisai debate nasataktak neisek ua, coma(,) koih di leh koihlouh di chihkhawng leh word khat koihdi leh koihlouh di khawng ale sawt pipi kisel sek uhi. Eilawi in bel a Act ki pass lam le ana thei khalou hitel zel hang a maw? Contractor law toh kisai amik amak le theilou te khawng MLA i tel ching chiang a chu Asembly session om chiang khawng a discussion/kikupna te man baan deklou uh ahihman in mi kikupna alah teltheilou, a gen ule ana theiban deklou uh ahihman in a nunglam khawng a tu a ana ihmut ahihkeileh ana lusuk mai louh ahih di uh omlou hi.

 

(ii) Sum-le-pai toh kisai (Financial power) - State Legislature in state sung a sum-le-pai zatna tung ah thuneihna liantak a nei. Legislature phalna lou in Government in sum paisa khat leng a zangtheikei. Kumteng in Government in budget (kumkhat sung a sum senna’ng leh muhna’ng) bawl in Assembly House ah a puaklut ngai a, hiai budget pen State Legislature in a pass ngai hi. Huaiziak in Legislature phalna lou in solkal in sum a zangtheikei.

 

(iii) Executive tung a thuneihna (Control over executive) - Legislature in Minister/Ministry te tung ah thuneihna liantak a nei a, amaute’n ana sepdi uh a semtaktak na uhia chihte a enkai thei. Hiai ding in Assembly House ah lam tuamtuam ets. Question, adjournment motion, calling attention, short duration discussion, resolution move chihte  om hi. Council of Ministers pen Legislature muanzohna, huaichu MLA tamzaw in a gup sungteng chauh om thei hi.

 

MLA i chihte pen i sik-le-tang a Government a palai i sawl, i sik le tang ua dan bawl ding, i haksatna leh poimohte tangkou ding ahi uhi. Executive te/Minister leh a kaihzatamte’n nna hoihtak a sepkei uleh Assembly House a phoulak ding a i sawl ahi ve ua. A constituency sung ah development funds/schemes/work te adiktak in a kisemkhe na hia, a mipite’n bang haksatna tuak ua bang poimoh ahi ua chihte enkai a House a a  taangkoupih diing uh ahi.  Etsakna khat enzual le, Guite Road BRO khut a piakkhiak di toh kisai in sawtpi i sual nung un lohching thei mahmah lou a, ZSF makaihna a Mass Social Work i neihzoh ua Assembly Session ah Pu Hangkhanlian leh Pu Hangkhanpau te’n calling attention hon bawl ua, House ah a thu hon taangkoupih ua, mediate’n hon report chiang un pressure hong sang in BRO khut ah piakkhiak in hong om hi. Hiai thu ah amautegel in House a a raise ziak liuliau uh chihtheih hikei mahleh a phattuam kha mahmah a theih ahi. Hichidan khawng ah ahi i MLA te i zatna di uh.

 

MLA/MP te development nna semdi hilou uh himahleh development work ah bel 'say'/gen-le-sak tampi neithei uhi. Phualpi ah development work a septheihna ding un MP Local Area Developemnt Scheme (MPLADS) fund kichi om a, tukum apat in kum khat in Rs. 5 crore hisakta uhi. State ah leng MLA Local Area Development Scheme om a, kumkhat a bangzah chet a chihbel ka theikei. 

 

A lamdang mahmah khat bel na tate laihilh di’n teacher laisiam, aniampen a graduate tanchiang bek hileh chi’n school hoih taktak ah sum tam pipi seng in na kaisak hi. Himahleh i gamsung enkol ding, dan leh policy bawl ding, semkhe ding leh enkai ding in laisiamlou, Class X leng pass lou hiam ahihkeileh contractor sum hauh ziak a MLA khawng chingsak in i kipahpih thei mahmah uhi. MLA hiding in bel ahitheitan in laisiam, law thei, sappau/vaipai/Meitei pau thei hile uh a deihhuai mahmah. Dan bawl di in chu dan siam ahihkei beek lehle a theisiam di tan beek poimoh eive. Phualpi ah bang en tale tulel a Minister minthang leh Government in a zat/muan mahmah Pu Chidambaram leh Pu Kapil Sibal te khawng gamdang a law va zoukhia, law practice, huaikhit politics a hong lut ahi uh. Opposition lam ah Pu Arun Jaitley, Leader of Opposition, Rajya Sabha bang leng lawyer minthang mahmah ana hizel. Manipur ah bel i politician te uh laisiam a tawm mahmah, atamzaw contractor politician ahi uh. Huaiziak a i dinmun uh hichilel ana hidiam chih in om. Manipur a politician te lak a laisiamna lam a gentham ching deuh bel tua i speaker uh Pu Hemochandra Singh, Delhi University nuai a college hoih penpen St. Stephen’s a graduate ahih ban ah University minthang JNU a M.A. ana zoukhia ahi. Ban ah tulel a Inner Manipur a Lok Sabha M.P. Dr. T.Meinya bang leng  Mathematics lecturer lui ahi a Maths text book khawng leng ana bawl ngei ahi.

 

Phualpi ah bel lawyer apat politics/MP a lut kithang a, Manipur ah bel contractor apat politics/MLA/MDC lut kithang mahmah. Eilak ah leng laisiam politician i neih di kaal uh ngaklah huai mahmah. Contractor laitheilou te palai a i zat chiang in koi a bang fund laihkhiak theih di om a, koi a contract na septheih di chih chauh ngaihtuah uhi. Hiaite pen MLA te nna di hi zenzenlou. Development work khawng semkhe din Government in nnasemtu tampi ana lakhin a, huaite sem dia MLA te kitel hi zenzen lou ahi. Eilak a huai i theihsiam louh man un MLA te pen development work sem didan a ngaihtuahna liantak ana om a, mipiten huchibang nnasem dia i expect man un amau leng huaite a hong kigolh in a nnasep di poimoh pen uh dan bawlna leh mipite haksatna leh poimoh te taangkoupih chihte hon sem khalou uhi. MLA te pen contract nna sem di maimai, function khawng a Chief Guest dia zat maimai din pammaih lodeuh hilou hiam?

 

Hiaite kha mipi in theisiam in MLA di i tel chiang in sum hauhau, contract nna hon pedi, ahihkeileh kaam hon pethei di maimai te tel nawnkei le. Pawlpi bang in leng MLA support/selection i bawl chiang un bang criteria zang in i bawl ua? A sum hauhau a tel maimah ihi uhia chihkhawng etthak tuak mahmah. Laisiam, i issue-te uh House a va tangkoupih thei/ngam ding, dan bawlna a ei adia hoih di leh hoihlou di theisiam ding te teel hunta hilou hiam? Tunaichin a Manipur solkal in hausa sukbei na ding a Ordinance hon bawl dek toh kisai khawng bang laisiam MLA nei hileng House a Ordinance hon puaklut chiang un ana oppose thei pah lel ding hi.  Tulel a i dinmun uh et in Phaizang mite'n pilsiamtak in dan/law zang a hon beibei uh ahihman in MLA laisiam kipoimoh deuhdeuh ding bang hi. Pawlpi election a a kigolh pen a deihhuai hetkei, mipi’n mahni vote kikhiak thei chiat le chih a uthuai mahmah. Himahleh iva kigolhkhak taak leh leng contract work khawng chauh buaipih di maimai MLA vawkkhe nawnlou in a nasep di bangtak uh semthei ding MLA selection bawl leng mipi lam apat bang leng theihsiamna omzaw deuh din a gintakhuai. Contract work deihna ziak lel a MLA utte zaw MLA hisese lou in contractor in ana pang maimai le uh i nam din leng hoihzo din gintakhuai.

Read 405 times Last modified on Saturday, 12 March 2016 19:34
Login to post comments