You are here: HomeColumnsPaitekhuakZogam Musings

Zogam Musings

Written by  Joy Tonsing Published inPaitekhuak Tuesday, 15 October 2013 13:13
Zogam Musings

KUATE A MIPI PALAI HOIH?

 

MLA te bangdi’n i zang ua? MLA hoih ichihte uh bangchi bangte ahia? Zomi NamNi, YPA, SSPP Prog khawng adia sum tam pipi thohte MLA hoih chi’n i kipahpih uhia? MLA hoih i tehna hiai khawng a sum thoh tamte ahi maimah hia. Sum thoh(sak) a hoih, hoihkei chihna hipah lou in hiaite amaw MLA hoih le hoihlou i teh ding uh? Huchi di mah ahidiam?

 

“MLA te bangdia i tel uh ahia” chih article kana gelh zogam.com a kikoih ah MLA te nasep dingte kana gelh a, huai ah kana gelh khat ahihleh MLA te danbawl/legislator dia i tel uh ahi, mipi palai ahi uh chih ahi. Assembly a dan kibawl dingte ana velchian a, ei adia hoih hia hoihlou chihte ana sui a, ei adia hoihloute ana dal ding leh mipite haksatna te tangkoupih dia i tel uh ahi chih kana gelh hi. Comment khat in ei singtangmi MLA a tamtawp a 20 chauh, Phaizangmi MLA 40 te lak ah Bill leh a tuamtuam va oppose le uh le oppose zou tuanlou ding uh chihdan in gen hi. Ama ngaihdan bang le a diklou kachi tuankei. A dik mahmah. Democracy ichih numbers’ game ahingut a, number tamtam vualzohna ahi ngei ngut. Himahleh, dalzou tuanlou ding chihman a ei nasep ding pen semkha lou a ina om leh pen dik tuanlou hi. I lohchin keileh a poikei, Manipur Solkal in hon ngaihsak keileh a poikei. Assembly ah ana tangkoupih uhenla, record ah ana om hen. Nidang chiang a Phualpi kiang a vatai a nelhsiah leh ngaihsaklouh a om mah kahi uh iva chihchia i document di hiaite hong hiding uh ahi. Phualpi Solkal in hichibang a nelhsiah a om nahih uleh na mipi palai te un bangzahvei Manipur Solkal ah ana genta ua, bangzahvei Assembly House ah ana tangkouta ua hon chi le uh i gendi a omkei maimah diam? Huaini, huailai in huaimin in memorandum ka pia ua, bandh ka bawl ua chih khawng sang in bel huaini, huailai in Assembly ah ka palai te un hiai thu ana tangkoupih mah leh ngaihsak ahikei uh chih in gen nei zotham ding hi.

 

I POIMOH UH-NATIONAL PARTY MAW REGIONAL/STATE PARTY AHIHKEILEH TUALSUAK/TUALSUNG PARTY?

 

MDC election lai apaisa MLA election ah national party khat i bel ua, MDC leh MLA bang solid thrap in huai party min in i ching/kichingsak vek uh. MDC i tel uh kum 5 ching di hita, MLA le kum 1 bang val nawnta. Ahihleh hiai national party min a palai ding i kichinsak un bang phattuamna Zomi politics adin hon tun a chih gentheih ding i neita uhia? A tung a i gen i haksatna tangkoupih ding, ei adia policy, bill hoihloute ana dal ding ichih khawng national party i zop ziak a hihtheilou leh hihngamlou ihizo maimah uhia chih ki-etthak tuak mahmah kasa. Party himhim in ideology leh paidan khat ana nei tangpi ua, huaite ei thiltup toh a kituak na hia? Bangchituk in huai party ah en thu iva nei zou ua? Party policy ah gen iva neizou uhia chihte kivel poimoh kasa. National party diakdiak bang ah ei India kilkawm khat a State neuchik Manipur issue khawng bang pi a ngaihphak leng ahikei, Phualpi a solkal bawlna din le Lok Sabha MP 2 chauh neite khawng kuaman thupilua in le honna koihkei uh. Manipur ah leng singtangmi, huaite lak a leng a thupai zoulou pawl, kuamah ngaihsak louh pawl eilawi issue khawng bel kuaman ngaihsak tak le hon saklouh te ihi uh. Huaiziak in national party khawng zop a ei issue khawng honna ngaihsak lotel dua i gintak pen uh huchi taktak di ahina diam? Hiaitan ina paina uah ngaihsak a om taktak ikisana uhia chihte geel thak din hoih kasa.

 

National party phetlou, regional party/state level party khawng ah leng ei issue khawng hon ngaihsak luat uh a gintakhuai kei. Ei issue i tangkoupih ut taktak a, mi hon theih ding i deih taktak a, mi hon thulak i ut taktak leh bel eimah tualsung/tualsuak party bawl hun ahita. Unau Hmar leh Kuki te toh i pankhawm theih ua i kigawm theih uleh hoih. Huchih keilele Zomi kichi teng beek in party khat i bawl uh hun ahita. Zogam People’s Party (ZPP) ichi hia, Zogam National Party/Front (ZNP/F) ichih hia amin zo abangbang hitave, i issue te tangkoupih ding poimoh ahita.

 

Tulai a i buaipih uh AHS, SoO, District Boundary, Churachandpur to Lamka, Guite Road, Behiang Trade Centre, SAI Centre leh adang dang issue te khawng ah i tangkou pih ding ua, tua i panlaknate sang un hong phattuamzo ngei ding. Party tup-le-ngim, agenda en kibawl di hang a, i nasep didan ei kigeel ding. Churachandpur ADC opkhum di hang a, MLA 4 bang nei di hang a, Manipur MLA 60 chauh omna ah chu fractured verdict hun bang ah “Kumpi” in pangzou kei mah le hang “Kumpi bawltu” ahihkeile “kumpi lalgam kekzaksaktu/phuuktu” a pangzou di ihi. Party khat in MLA 27/28 hon nei a, ei MLA 4 toh solkal bawl din hon zawn di ua. Huai solkal iva zopna dia terms and conditions bawl di, huaite hon hihsak/sepsuah pih kei uleh kizukkik le solkal pukse mai ding. I demand teng zo va mupah keini, hon pepah kei unte himahleh thil tampi ah phattuam pah ding.

 

National party khawng iva zop chiang ua, i palai teelte un party whip leh party high command hon zahtak masak uh ngai. Party soldier hong hi masa uh, huaizoh chia a Zomi hihna uh hong hipan. Bangziak in? Party whip leh high command zuikei le uh disciplinary proceeding ahihkeileh election nawn chia party ticket tanglou maimah ding uh, party a tuitum zoulou ding uh hiven. Ei party kineih leng bel ei issue te a tangkou pih semsem uleh mipin la panpih semsem ding, ticket muh nawnlouh ding chia lauh giugiau lah omlou ding. Himahleh hiaite taksuah nadi’n bel Pawlpi heutute apat conviction, will leh commitment poimoh mahmah ding. Hiaite lou in bel bangmah lou ahizel ding. Ngaihtuah tham ching isa uhia?

 

ZOMI-SALAD KUANG MAW MELTING POT? (ZOMI-IS IT A SALAD BOWL OR A MELTING POT?)

 

Salad ah tomato, phulun san, kobi leh a dangdang akihelkhawm a, amau hihna beituanlou in salad limtak leh damtheih huaitak hong suak. Melting pot ah meh chituam tuam hong kigawm in meh chikhat hong suak a, a meh tuamtuam ten amau hihna uh mangsak uhi. Zomi koipen din i deih ua, salad bowl mo melting pot? YPA, YVA, SYO, ZYO, etc te bei a ZYA hivek di mo ahihkeileh YPA, YVA, SYO, ZYO, etc te hong kigawm khawm chiang ua ZYA hidi? Paite, Simte, Zou, Vaiphei, etc bei a Zomi hitop vek mai di mo ahihkeileh hiaite hong kigawm khawm chiang ua Zomi hidi. Zomi a kigawm tribe tuamtuam te’n amau hihna mangsak a Zomi hidi umo ahihkeileh amau hihna bei tuanlou a amau hihna bangbang toh hong kigawm khawm chiang ua Zomi hidi. Ngaihtuah tham ching mahmah. Ngaihtuahna khovel ah, ideal world ah bel i hihna tengteng uh mang vek in Zomi hisuk top maile uthuai mahmah. Himahleh atak khovel ah huai ahithei diam? Huaidin i kimanta uhia? Nidang chia i maban di uh ahi maithei, khang bangzah hiam nung ah himahleh tu-le-tu in hiai din i kiman uhia? Kuki bangziak a kiut lou, Mizo bangziak a ki-ut lou chihte toh ngaihtuah khawm le i dawnna ding uh a chiang mai din ka gingta. Zomi kichi bang ihisak ding uale-salad kuang maw melting pot? Ngaihtuah tham ching isa uhia?

Read 998 times

  • Selungmawlpa
    Selungmawlpa
    Saturday, 19 October 2013 10:45

    Simnop mah2 e..a last para a fuh kasa treuh ve diak in

  • keuhthang
    keuhthang
    Saturday, 19 October 2013 11:35

    A gelhsiam te a hong kipat chiang ua chu nuam taktak na aka....

    Selungmawlpa, na simsuak taktak na mo :D

  • Selungmawlpa
    Selungmawlpa
    Saturday, 19 October 2013 19:07

    Keuhzathang :p sim suak chih bang a kep hon dong le hin le ka thei di hahahah

Login to post comments