You are here: HomeColumnsPhualvaSamsaute' Puak

Samsaute' Puak Featured

Written by  Phualva Published inPhualva Friday, 12 December 2014 12:29
Samsaute' Puak

~By: Phualva

 

Papi khat in “Kare! Bike i zat leh nungakte kua nawi nip a kua a tak ahia chih kithei mahmah eive”  a chih in tangvalte khong in bike a kipahpih leh deihluatna ziak uh khat om hi ngut ding hitah e chih hon ngaihtuahsak hi. Huai toh kizom mah leng ahi ngut dia, sawtlam pek a ka training na ua heutupa khat in motor accident toh kisai a, khangnou sisan hatlaite hattak tak a tai ut ua, a diak a bike nung a samsaute a puak chiang bang ua accident om nuamdeuh ahih a gen lamtak ka phawk thak hi.

 

Tangval lai in bike zaw ki neikei in, scooter nih bang ki khalhkha sam mahleh kua nawi nip a kua nawi tak ahia chih lam khong ki phawkkha vetlou hi. Omna mun in a zilhlouh ziak a nungak puak ding a kineihlouh man le houh a hikha mai diah ah. Mun tuamtuam omkhaknate a muhdan in a diakin ei singtangmite omnate ah tangvalte’n a bike ua nungakte pua ua hattak tak a tai uh muh ding tampi om sek ngut hi. Kholai a muh apan a ngaihtuahna hong omthei khat bel, tangvalte’ nungak puak ding a kilawpna sang mah un nungakte’ tangvalte bike nung a belh ding a kithalawpna uh lianzaw houh a de aw chih dek in om hi.

 

Vaigam, a thuklam hikei mahleh, khopi sung zing leh nitak a nasepna lampi a akum a sim aki tai chiang in lampi ah tangvalte bike nung a nungak belh muh ding om sek hi. Ahuai zong a va dakdak hikei lele lamlian a i tai chiang a muh ding  omom mai hiven, huchia ki mukhate lak a ngaihtuahna hon neisak khat om mawk hi. Vaigam a huchibang i muhte, a nung a tuang numei a kullou tantan a a hektu pasal nung a vot sisan tawp bang a belh ahiam, kawi tenton zozen ahiamte ei singtangmite mah hi deuh nak sek hi. Vai numeite huchidan a muh ding vang mahmah a i muhlam le kithei khollou zomah hi. Hiai in ei singtangmi numeite uang deuh uh ahia ahihkeileh public place a omdan siamlou deuh mah ki hi houh a diam chih khong hon ngaihtuahsak hi.

 

Huchidan a i ngaihtuahsau deuh chiang in vaigam khopi a i numeite vaite’n simmoh leh nopneh deuh uh chia i phunphun sekte bang le omdan i siamzohlouh ziak a hon maingal deuh uh ahihna tan om kha ding in a ginhuai hi. I hihlouhna pi lemching a ahoihdan a kilatsawm ding chih hipahlou in, public leh kholai a gamtat leh omdan kilawm ki tasam a i zil zek houh ngai ahi diam chih khong ngaihtuahna ah hong omthei dek mawk hi.

 

10|12|2014

Read 755 times Last modified on Friday, 12 December 2014 13:27
More in this category: « Saikot Pan
Login to post comments