You are here: HomeColumnsR SangaAmanpha Hinna Leh Neekzonna

Amanpha Hinna Leh Neekzonna

Written by  Dr. R Sanga Published inR-Sanga Wednesday, 18 March 2015 02:05
Amanpha Hinna Leh Neekzonna

~ R. Sanga

 

Thupatna:
Naungek apianna ‘Nu’ in kha khua vengveng asung a apa-ai nung in mihing khat hong piang a; chikmah a amuh ngei louh khovak hon mu ahihman in gim-gentheihna leitung hinkhua mang diing ahihlam kiphawk ahi ngei diing a, kikou in, kap pah saisai in atha neih tengteng a kipeek in lungkham lua mahbang pah mawk hi. Hinna nei a hong piang ahihna ah naungek ahihlai akipan damna hoih kiphamoh a, apianna nu-le-pa in hawmthoh leh duat mahmah in vualpha a ahong khanlet diing deihna ziak in naungek pianchil akipan piching dinmun, amah-le-amah kivakthei ahih masiah sum-le-pai tampi seeng in khoilian uhi. Nat-le-sat athuak zek chiang in damdawi pia in, Doctor siam penpen naihpih pah diing ahi chih ngaihsutna ah piangpah zel hi.

 

Hinna pen mihingte kipiak theih hi het lou, Siamtu, Pasian in akibang a michih apiak ahihman in manpha ahihlam milip in phawkthak di’n adeihhuai hi. Leitung a mihing khatvei ahong piankhiat chiang in leitung nuntakna nusia a, sihna atuahkhak nungsiah piangkiik nawn het lou maimah hi. Nihvei/thumvei pianthak theih hileh ana phamsa mi tampi mahmah piangthak a leitung nuntakna bulpatthak ut peuhmah diing un uphuai hi…!!

 

Neekzonna Chituamtuam:
Phualpi & State Sorkar nuai a sepna nei bang, Private Company tuamtuam ah sepna nei a neekzonna di’a anei mi tampi aom lai un; sumsin a neek zong mi zong hunkhop om uhi. Mahni mimal a sep diing zongtawm a niteng a kiloh in neektawm zong a khosa mi tampi om veve uhi. Tua bang a neekzonna tuamtuam om ahihna ah, mihingte in neekzonna toh kisai in aniam-asaang omsak in, khateng loh tamzaw angah mite in loh tawmzaw angah mite niamkoihna i lak ah om abang sim hi. Tuachi diing bel hi lou hi. Pasian mai ah, kuamah aniam tuam leh asaang tuam om lou, kibang vek hi hangh chih pen Kristian sabiak paizia ahi hi. Pasian in deihsaktuam nei lou ahi chih phawk tawntung diing a thil hoihtak ahi. Neektawm zong a khosa mi in zong ahun chiang geih a kikoih a, sum tamzaw khaloh asaang mite in zong tua mah bang a kiliansak lou diing, Pasian in michih amah toh kituak neekzonna hon piak ahihdan pomsiam chiat kisam hi. Kisimmoh diing kuamah om lou i chihnopna ahi hi.

 

Nasep-silbawl kong bangkim ah mi khat in anaupan lai akipan sep kihtaak himhim nei lou a, taima, kuhkal, ginom leh chihtakna toh apichintan dong kingaknatham ching a naa asep peuhmahleh zi-le-pasal nei a tate vaakzou in a innsung khosakna vaiveng gige diing ahi chih thudik ahi. A zulhzau mite pen khotang tokbuai, aomna saptuam hihminsia leh achipih-sapihte a diing a minsiatna tuntu in pangthei leuleu uhi. Chihtakna nei lou, ginomna tasam leh lunglutna mumal zong anei thei lou mite pen midangte hazatna toh akidim mi hi nuam mahmah zawmah lai uhi. I mihinpihte it diing leh meithai-tagahte khotuah a, panpih angaihna mun ua panpih diing pen “Sabiak Siangthoupen” ahi chi in Laisiangthou in gen hi. Dai kilkal a mite (i.e., mi genthei leh khosakna haksate genna ahi), neektawm zong mite leh mi neizou leh hausate zong Pasian khutsuak vek ahi uhi. Pasian mitmuh in akibang vek hi hangh…!! “Mi kisatheite Pasian in a dou a, mi kingainiamte a domkaang hi…”

 

Zomite Neekzondan:
Zomite neekzonna pipen ahihleh tanglai akipan pu-pa ngeinadan a neekzonna pen mah: Kumteng a Lou neihna kisuan kual zel, Lou chiingkhat sung ah buh-le-bal, malta, siing, ai-eng, vaimim, taang, phulun, etc., etc., chiingkhawm vek mai, tukawl tawi a, azu-a-haam thuak a kawl a nisuak sim a Loukuan ahi lailai hi. Thakhat thu a hiai Lou-neihdan pen kheek guih haksa lua ahi kha diing, himahleh tuni a ngaihsuthuai mahmah bel Zohuan (Farming) bawl kithamanzaw ahihlam phawk a, ngaihsutna kheek thil kul leh poimoh lua ahi hi. Zohuan bawltheihna diing a thil kul-le-poimoh masa penpen ahihleh lungsim ngaihsutna kimansa neih diing kisam hi. Mi tamtakte in sum-le-pai poimoh masapen bangdan in akoih ua; lungsim a kimanna nei loupi in sum tampi nei mah le’ng Zohuan piang ngei lou diing hi. Tupguhna toh kithuah chihtakna anei mi in Zohuan bawlthei ngeingei diing in uphuai hi.

 

Manipur State pen “Asia Sim-Suah Kongpi” (Gateway of South-East Asia) chih in om hi. Asia Sim-Suah Kongpi ah Zomite kiteeng ahihman in “Look East Policy” ahihke’h “Act East” toh kisai Company lian taktak, sumsin mite leh mi hausate in i teenna, Zogam mitsuan in hon galdot sanlaitak uh ahihlam i phawkphak uh thil deihhuai petmah ahi. Manipur University in ‘Look East Policy’ toh kisai Seminar/Workshop tamveipi ahuaihot khinta a, phaijang mite in kong tuamtuam ah kisakkholhna nasatak neitou lellel uhi. Tu hun a Zomite in zong kisakkholhna kichian i neih keileh tunung sawt lou in Meileng Khawlna (Railway Station) Bishnupur leh Lamka (Churachandpur) District gamgi kiang nai ah hong om petmah diing a, vai ngalsaute leh gamdang akipan mi tuam leh zaat tuam hunkhop Zogam sung ahong lut chiang un aguaitu a pang lou in nasem leh midangte a di’a seem a sum tam lou loh a pangthei lel a i om diing uh thil mulkimhuai petmah hong suak diing ahihman in ‘Geeldan & Tupna Kichian’ neih hun lua ahita hi. Lungsim a kisakkholhna leh kimanna neih baan ah ataktak a sep hun hong tung ahita hi.

 

Zomite Khanloh Hunta:
Zomite in apilpi a i neekzonna uh kivelthak a; Gam-leitang hausakna phattuampih ahih taktak theihna diing a Geeldan & Tupna Kichian bawlkhiak kisam takpi hi. Gam-leitang neihdan toh kisai Hausate leh mipite kaal ah kintak a Zomite in bawllem hun lua petmah ahi chih bil nei peuh in za uhen, huchi lou in zaw melmakte’n Sorkar thahatna zang in hon laaksuh diing ua: Hausate in zong zaangna dopna bangmah ngah lou in i teenna, Zogam huapsung pen mumal loutak in Phualpi & State Sorkar thuneihna nuai ah suanlut in hong om diing lah ahi ngal a…!! Hiai hun ahong tunma ngei a Pawlpi Makaite makaihna nuai ah Hausate leh mipite kaal ah gam-leitang neihdan (land holding system) bawllem diing kisam hi. Gam-leitang neihdan toh kisai mipite leh Hausate in kitheihsiamna hoihtak nei a, Gam-le-Nam itna chidamhuai, lungpi geel a ngaihsutna dik-le-tang nei in saptuam makaite leh NGOs tuamtuam in zong poimoh ngaih chiat le’ng tunung chiang a kisik het lou diing hi hangh… Kum 2015 pen Zohuan pibawl a neekzonna detdou bawlkhiak kum chi in phuang le’ng deihhuai hina mai zen e.

 

Gam-leitang neih louh ziak a Zohuan bawl thei lou, Zodawn akipan New Lamka ah mi tampi kisuan in i khosa uhi. Sorkar naseem hi lou, kilohna detdou nei lah hi sam lou, niteng a neek zongtawm a kilohna diing maitawm mi tamzaw hi diing in uphuai hi. Sorkar phal louh neekzonna tuamtuam, etsakna di’n: Assam State sung a Chingpi (Rhino) kaap ahihke’h khamtheih thil (e.g., Damdawi, Heroine No. 4, Ganja, Opium, etc., etc.) chihte niteng a buaipih mi hunkhop om gige hi. Laisiangthou toh kituak lou leh Pasian awi louh thil hih zongsang a neekzonna di’a nei niteng in Zomite lak ah pung hulhul hileh kilawm....!! Huchibang thil hoih lou leh mulkimhuai, Sorkar thilkhaam hih a neekzon pen Pasian deih louh leh Kristian paidan toh kikalh ahihlam i phawk chiat a, tawpsan diing a hoih lua ahi hi. A siangthou leh Pasian lungtuak a neekzonna ah khamkhop piang lua ahihman in, thil khaam hih chitchiat lou in Zohuan bawl le’ng khangsawn nawnte in hamphatpih diing uh ahihman in Hausate leh Pawlpi makaite baan ah mipite in zong lungpi geel hun ahita hi.

 

I Sepgah ah Lungkim Ni:

Khaw-ul kai puappuap a neek-le-taak kiningching ngah diing hi lel hi. Khaw-ul kai zoihzoih kawm a an neek diing chih leh neekzonna toh kisai leitang khuat a buh-le-baal kineipan diing ahihlam pianchil akipan thudik omsa ahi hi. Sem lou a hauhsak sawm, sem lou a khaloh saang, sem lou a inn-le-lou hoih neih sawm chihte tulai in i lak ah ki-elna thupitak om abang maimah hi. Awi lou mite nangawn in zong ahih nop louh uh Kristiante hihdan suak gawpta, i Pianna gam hamsiat a om lou diing a diam…? Gam vaihawmtute paidan ahihke’h milim be mite chiindan chihte tengteng Kristian kichite lak ah thil hoih lou leh Pasian deih louh chiindan kilawm lou uang tektek, tunglam akipan hon mu gige om ahihlam phawk tawntung a meizial hun i theih keileh Amah thangpaihna ah i tuaklut kha zenzen diing uh, pilvang chiat in mimal kivelpha thak chiat ni.

 

Midangte sepgah deihgoh a, huaihamna leh hazatna ziak in khotang hinkhua melhemsak in; thil kilawm leh kilawm lou nangawn khentan zou lou a mi kimkhatte in ahinkhua uh azatkhak chiang un midangte a diing in siatna thupitak atun thei hi. Diktatna in Nam a tawisaang chih pen a thu kia a thei mai lou in ataktak in hinpih le’ng Zomite Nam Hampha leh Vualzawlna naak hong suakthei diing hi.

 

Thukhupna:
Hinna leh Neekzonna in kizopna kiptak nei ahihman in lam chituam tuam ah pilvanna diing tampi om hi. I mi hinpite a diing a dongkholh hi lou a, mi phatuam hithei chiat diing in i kalsuan zia ah pilvang mahmah le’ng i gam chidam diing hi.

 

Mihing hinna pen manpha petmah ahi chih thudik omsa ahi a, leitung nuntakna ngaihtuahna ziak a neekzonna khat peuhpeuh ah eimah, mimal tempaina leh siamna toh kituak a kalsuan diing kisam hi.

 

Neekzonna toh kisai, Zohuan bawl lunglut a Lemongrass, Turmeric (Ai-eng), Ginger (Siing) chihte a chiing ut mi kuapeuhte theih diing in hiai ah tam lou i taklangh diing:

 

    • Atung a haichii kigente achii suan diing ka hon kawkmuh thei diing;
    • Haichii na chiin khempeuh agahte zuakna diing ka hon kawkmuh thei diing;
    • Haichii gahte zuakna toh kisai adetdou kizopna bawl na lunglut aleh ka hon kawkmuh thei diing;
    • Kumteng a azuakna mumal lou chihte himhim om lou in, akituahpih geih in na haichii gahte kumteng a hon leisak gige diing mi ka hon kawkmuh thei diing;
    • Thuzaktheihna: E-mail: This email address is being protected from spambots. You need JavaScript enabled to view it. Phone: +91 9436022454.
Read 450 times

  • pheisam
    pheisam
    Thursday, 19 March 2015 11:08

    A Paragraph tawpna a thuvual 6 te kipahpih huai sa mah mah ing. A pawlpi a zong ihih zawhlouh Pu Sanga in ahon kawkmuh /makaih theih te manphalua hi . Hichidan kithuhilhna te a thawn hikei leh chih deih huai mah mah hi.

    Haichi dangte bang le hon kawkmuh touzel lai leh achih huai mah mah hi.

Login to post comments