You are here: HomeColumnsR SangaTheihkholhna (Awareness)

Theihkholhna (Awareness)

Written by  R.Sanga Published inR-Sanga Wednesday, 15 April 2015 12:30
Theihkholhna (Awareness)

~ By : R. Sanga

 

Thumapi:

Mi khat in bang hiam thil khat peuhpeuh ahih diing chiang a athil hih diing pen toh kisai theihkholhna hoihtak aneih aleh lamzang in lohchinna in zui zel hi. Theihkholhna in mengmuhna piangsak a, tua mengmuhna anei mite pen sia-le-pha theihna siang anei, mi pilvang ahi naknak uhi. Pilvanna nei mite in naa khat peuhpeuh ahih ua, asep diing chiang un atawmma un atukna diing uh theihkholhna kichian nei in hih diing leh hih louh diing khensiam naknak uhi. I sep-le-bawl diing khempeuh muhkholhna nei loupi a Ui-ngol gamphut mawk diing hi lou hi.

 

Gamvai Theihkholhna:

 

Tulai in District Councils Kitelna thawmging in Manipur State pumpi azelsuak pha mahmah hi. Candidate sawm a kisate tengteng in Manipur State sung kivaihawmna Daan Laibu tuamtuam theihkholhna (awareness) nei leh mailam thil saupi mengmuhna nei uh hi ngei diing in lamen phot peuhmah le’ng maw…! Abiktak in, “The Manipur Hill Areas District Councils Act, 1971 & Rules, 1972” haizan (digest) dimdem a, asung a thu poimoh taktak kigelhte lak a ‘Thuneihna leh Nasepdan diing” (Powers and Functions) theihkholhna nei a kithalawp mahmah chiat leh awlmohna diktak neih ziak a Candidate sawm uh hi diing a gingta in hangsan leh phathuai uh ka sa hi.

 

Tua teng baan ah, mipi sik-le-tang a palai a pang diing hizaw mah lai uh ahihman in akipiakzohna  uh phathuai mah hi lou hiam hon chisak hi. Mipite hoihna diing a nasemtu hong hi diing mite pen mi hampha leh taima, zingthou pahpah, haksatna leh alauhuai thilte nasan phu paisuak ngap a mipite nunglam a pai maimah lou a, mipite mai a madawk gige diing a kisa ngap uh ahihna ah gensiatna chiteng thuak ngap leh kouna leh demna maituah a meisa tawng gige diing a akalsuanna uh mipite in zong theihkholhna (awareness) hoihtak i neih uh hun lua hita lou hiam chih hon ngaihtuahsak mahmah hi. Mi kizen, hangsan, Daan thei, mohpuakna semsuah ngam, kua pen hi diing hiam chih i theihsiam uh kul leh poimoh masa hi. Aziak bel deihtel hun hong tung petmah diing ahihman in pilvangtak a i deihpen kua hi a, bangchi bang mi hi peuhmah hiam chih taldom zen a ngaihtuah vengveng kawm a ‘Vote’ khiak diing kisam hi.

 

Zohuan Bawl Theihkholna (Awareness):

 

February 16 & 17, 2015: Theihkholhna (Awareness) Program, Jubilee Hall,  RIMS, Imphal ah, “National Workshop on Medicinal Plants Sector in North Eastern Region” chih thupi a nei in India gamsung a misiam leh mipil taktak paikhawm in ni nih, Hunzek nuamtak a neih in om hi. Hiai hun a kihel diing a deihsakna tang in, Dr. N. Khaizalian IFS., Addl. Principal Chief Conservator of Forest, Government of Manipur akipan Delegate khat diing a chialna ka ngah dungzui in thanuamtak in hiai ninih hunsung ka vakihel sam hi. Pilvanna diing bang, Theihkholhna neih kiphamoh ahihdan bang, Zohuan bawl hoih lua leh poimoh petmah ahihdan bang, Medicinal & Aromatic Plants tuamtuam i tenna, Zogam ah, Zohuan bawltheih lua ahihdan bang kitelzaw seem a theihkholhna hon pia, Sinsaktute apan theihna leh pilna bangzah hiam ka ngahman in ka lungdam petmah hi.

 

April 13, 2015 ni in, City Convention Centre, Main Hall, Imphal ah Department of Commerce & Industries, Government of Manipur malakna tungtawn in Fragrance and Flavour Development Centre, Ministry of Micro, Small & Medium Enterprises (MSME), Government of India toh kithuah a Theihkholhna (Awareness) Program abawl uh: Workshop-cum-Farmers’ Conference On “Aromatic & Medicinal Plantation, Processing & Marketing Linkages” chih thupi a nei in Zohuan bawl kul leh poimoh ahihdan thute genkhawmna hun manphatak bawl in om bok hi. Hiai hun a kihel diing a Chialna ka ngah dungzui in kei zong ka vatel hi. Districts kua (9) akipan Lou-nei mite, tampi petmah kipaikhawm mahleh, Lamka lam akipan mi tawmchik lel kitel ahihna ah poisa mahmah in tampi kihelthei le’ng chih deihhuai ka sa petmah hi. Scientists, mipil leh siamna saang neite baan ah, Companies lian taktak akipan theihna leh pilna Lou-nei mite kiang ah ahon piaksawnte uh amanpha thei mahmah mai hi. Lou-nei mi tampite zaak leh theih diing in deihsakhuai ka sa petmah hi. Mailam hunte ah bel hichibang hun manpha leh lemtang aomnawn peuhmah chiang in Lou-nei mite atamtheipen akiheltheih teitei uh deihna ziak a akisaipih mite’n; Lou-nei mite kiang ah, “Theihsakna leh Chialna” hoihtak in bawl zel theile uh chih deihhuai petmah hi. Hill Districts dangte akipan in bel Lou-nei mi hunkhop hong paikhawm chiat uhi.

 

Zohuan Bawldan toh kisai ‘Theihkholhna’ (Awareness) hoihtak hiai hun in kigenkhawm a, Lou-nei mite a diing ngial in houh phatuam mahmah mai hi. Manipur Sorkar in naktak a panla tou lellel ahihdan muhtheih in omta a, ‘Aromatic Plants’(e.g., Lemongrass, Patchouli, Stevia, etc., etc.) Plantations toh kisai alunglut mite a diing in khua hong vakkhe dekdek abang simta hi. Tua ahihman in Zomite in zong lungsim kheek thei diing a kisakkholh thil kul leh poimoh takzet ahi. Khantouhna detdou i lak ah ahong piankhiakna diing in bel Lou neihdan ngeina pen gahsuang lou ahi chih chiantak a thei kawm a Zohuan pibawl petmah kisam hi. Hon’ble Minister, Pu Govindas Konthoujam, Chief Guest ahih toh kiton in hiai hun a athugenna ah, Aromatic & Medicinal Plantations toh kisai a Manipur Sorkar in Lou-nei mite kithuahpihna hoihtak geelsak diing ahihdan agen baan ah, Department of Commerce & Industries tungtawn a Lemongrass Farm pibawl diing ahi chih Manipur Sorkar in ‘Thupukna’ bawlta ahihdan mipi paikhawmte mai ah puang ziahziah mai hi. Tu kum pailel akipan Lemongrass Farm bawl diing a min pelut, Hill Districts nga (5) apan Lou-nei mi hunkhop om ngal bok uhi.  

 

Indian Companies tuamtuam akipan palaite in ‘Marketing’ toh kisai buaina bangmah om lou a, Lemongrass, Patchouli, Turmeric (Ai-eng), Stevia leh adang dang, aom zahzah chiklaipeuh a hon leisakthei gige diing uh ahihdan zong hon gen chiat uhi. Theihtuak tampi petmah kigente tengteng tu hun a gelh seng ahi kei hi. Adeihzah uh piakzoh sawmzaw ni…!!

 

April 23, 2015 ni chiang in Angels’ Place Campus, Lydia’s Hall ah,

“One Day Awareness Program On Lemongrass Plantation,”

Theihkholhna Hunzeek (Awareness Program) bawl in

Om diing a, Hiai hun ah chiangzaw seem a

Genkhawm ahi ngal bok diing hi.

 

Suahlam Galdotna Thilgeel (Look East Policy) Theihkholhna:

 

Asia Sim-Suah Kongpi ah Zomite kiteeng ahihman in, Leitung buppi in hon mitsuan uh ahihlam i phawk chiat uh thil kul leh poimoh petmah ahi. Suahlam Galdotna Thilgeel toh kisai akim sipsip in bel i thei nai kei a, tuni a theihtuak mahmah bel Zomite in i neekzonna uh kivelthak a, adetdou gahsuangthei leh kingaknatham neekzonna, akiningching sum-le-pai ngahna diing baan ah, siamsinna hoih i gam a aom theihna diing ‘Theihkholhna’ neih ahihtheihna diing a kalsuan zia mumaltak a bawlsiam kisam hi. Kisakkholhna om loupi a masawnna piang mawk lou diing ahihman in, kong tuamtuam: Gamvai ah bang, Neekzonna leh Zohuan Bawlna ah bang, Khawtang ah bang, Siamsinna ah bang leh Daan lam ah bang ‘Theihkholhna’ (Awareness) hoih leh kichian neih hun lua hi lou hiam hon chisak thakthak hi.

 

India Phaijang mite in pilsiamtak a hong heel in, hon nopneh deuhdeuh diing uh ahi chih lungtang a vom chinten kawm a, gulbang a pil – vakhubang a nunnem a amaute toh kithuah kisam phot lai hi. Zomite lak ah telsui mi asiam-apil tawm lua i hihman in, Kol-le-Vaite baan ah Manipur Phaijang mite siamna leh pilna kikoppih phot ngai lailai suak hi.       

             

Thukhupna:

 

Suahlam Galdotna Thilgeel (Look East Policy) ziak a Zomite in banglam ah hamphatna ngahtheih diing hi hiam chih lungsim a kisakkholhna kichian neih hunlaitak ahi. Kisakkholhna kizen leh chidamhuai i neihtheihna diing in kong tuamtuam ah pilvanna toh kithuah thilgeel i neih pen kitel sitset a ‘Theihkholhna’ – ‘Awareness’ neih ngeingei diing ahi.

 

Zohuan Bawl diing toh kisai Theihkholhna (Awareness) buching i neihna in adetdou neekzonna piangsak diing a; Mailam ah haksatna leh buaina maituah hun a zong lungkia ahihke’h lunglel chih himhim om lou diing khop a theihkholhna (awareness) neih kisam hi. Mengmuhna anei lou mite pen theihkholhna taksap ziak a lungkiatna buannawi leh lunglelhna kawkhuk ah tuaklut kha naknak uhi. Huchibang mite pen a nasep-silbawl uh toh kisai theihkholhna (awareness) anei mumal het lou; midangte lohchinna amawkna a etlahpih lel, mahni mimal hihtheihna bang hi hiam chih geel loupi a alohching mite haza pong mawk hi nuam ek zawmah lai uhi.

 

Gam kivaihawmna paizia leh Daan thute toh kisai theihna leh pilna (awareness) anei lou mite pen mipite sik-le-tang a palai diing in teelching in om hitale uh anasepna uh nawngkai in buai petmah diing a, mipite a diing a phatuam bangmah himhim asepkhiak uh lamethuai lou phing diing hi…! Mengmuhna leh Theihkholhna hoihtak anei mite zonkhiat hun ahita; Gam-le-Nam vai ah pilvantuak thu tampi om ahihman in, mipite in hiai thu poimohte theisiam a, Daan leh Thusehte kembit thei diing mi mah palai diing a achin hi diing uh ahi chih theihchetna hoihtak toh kalsuan diing kisam hi. Pilvang chiat ni…!!  

 

 

               R. Sanga

Email: This email address is being protected from spambots. You need JavaScript enabled to view it.

+91 8729871959/ 9436022454

Read 525 times
Login to post comments