You are here: HomeColumnsR SangaIndia Mal-Suah : Sixth Schedule Areas Vaihawmna Dinmun

India Mal-Suah : Sixth Schedule Areas Vaihawmna Dinmun

Written by  R. Sanga Published inR-Sanga Thursday, 23 July 2015 13:10
India Mal-Suah : Sixth Schedule Areas Vaihawmna Dinmun

~ By R. Sanga

 

Thumapi:

            India Mal-Suah bialsung ah, hun sawtpi akipan tunitan a buaina aomtouh ngitngetna ziak thilnih i taklangh diing: (a) Nam dang, gam dang leh mun dang akipan hong peemlut a, amaute’n angeinadan tuam uh hong pawlut in; nam tuantual (tribals) leh nam neute (ethnic groups) pupa tawndan ngeina aneihsate uh tummang leh mangthang mai thei diing a lauthawnghuai dinmun ah om tawntung bangdan a kikoihna, leh (b) Neekzonna niam leh tuantual lua dinmun a omden uh ahihna ah lungphawng in omden uhi. Mahni gam leitang sung a teeng hinapi a lungmuang thei taktak lou leh midangte in chikchiang hiam a tummang thei dinmun a om gige bangdan a kikoihna leh neekzonna toh kisai tuantual petmah uh ahih ziak in lungmuang taktak thei lou; thawmhau geuguau in om tawntung uhi.

 

            British gamkeekte nuai ah kivaihawmna, khantouhna leh lam chiteng ah hiai gam-leitang huapsung nawlkhin leh nelhsiah a tuam koih in om gige a, phaijang a kivaihawmna toh kibang lou in tuam bawl in ana omtou ngitnget uhi. Tua ahihman in, amaute pen “Excluded” or “Partially Excluded” chihdan a gamsung kivaihawmna khawlpi akipan pawsiah leh nawlkhin in omden uh a, amaute a diing a khantouhna himhim om thei mawngmawng lou in tunitan khawsa tawntung uhi. India in Zalenna buching angah akipan hiai, ‘Excluded Areas’ ah vaihawmna kichian leh omzenei khat, “Sixth Schedule Provisions” sung ah Tribal Areas mun tuamtuam ah, Phualpi Sorkar in District leh Regional Councils koihsak in, kong tuamtuam ah tualsung kivaihawmna mumalzaw deuh in omta hi. Himahleh, neekzonna niam, tuantual leh zawnna (backwardness) akipan suakta thei taktak lou in tunitan India Mal-Suah singtang mite omden veve lai uhi.

 

India Daan Bupi ah Schedule Sawm-le-Nih Om:

India Daan Bupi sung ah Schedule 12 om hi. Tua Schedule 12 lak ah, 5th Schedule pen Art. 244(1) ah kibulphuh hi a; 6th Schedule pen Art. 244(2) leh Art. 275(1) ah kibulphuh ahi. Tribals mite tanpual leh hamphatna piak a omte hiai Schedule nih, 5th & 6th chihte ah kiteltak in Autonomous District Councils thuneihna tuamtuam, Legislative, Judicial, Executive and Financial Powers chihte piak in om vek hi. Regional Councils zong om lai hi. Bodoland Territorial Council (BTC) bawlkhiak thak a om pen ahihleh ama a omsate toh kituam deuh hiau hi. Amasate pen ah palai 30 leh palai guanthoh bangzah hiam ahihlai in Bodoland Territorial Council in bel palai 46 tan aneithei hi, tuate lak ah palai guanthoh mi 6 om thei hi.

 

Sixth Schedule hong piankhiaktung akipan Colonial “Excluded Areas” sung a customary tribal traditions & cultures kepbitna leh humbit diing deihna ziak lel ana himahleh dinmun saangzaw deuh lametna nei in, tualsung mahni kivaihawmna (local self-governance) mumaltak aom diing ahi chih ngaihdan in India Mal-Suah pumpi zelsuak pah hi. Kum 1952 a Sixth Schedule bawlkhiak a om pen North Eastern Reorganization Act, 1971 in tawmkaanpah ziau ahihman in; Manipur, Meghalaya leh Mizoram chihte State piching dinmun ah dopkang in hong om zui ngal uhi.

 

Sixth Schedule Areas Kivaihawmdan Pianzia:

Autonomous District Councils tungtawn a Sixth Schedule Areas ah legislative and executive powers zapihuap a thuneihna nei in akivaihawm chiat uhi. ADCs-te in “Mini Parliament” bang phial in naa asem uhi. Customary Laws dungzui a thuneihna bukim zalenna, khua teng ah (village level bodies) kivaihawm diing in phalna apethei bok uhi. District leh aniamzaw courts-te a thutanna bawl a omte khempeuh High Court kia ah chouna bawltheih hileldan ahi. Tulel in India Mal-Suah State li (4) kia ah: (1) Assam, (2) Meghalaya, (3) Tripura leh (4) Mizoram ah Sixth Schedule Provisions zat in om hi: State dang thum: (1) Arunachal Pradesh, (2) Nagaland leh (3) Manipur ah ahihleh tunitan Sixth Schedule Provisions zat in aom kei hi.

 

Autonomous Councils tuamtuam ah thuneihna piak a omte kibang vek lou leh kikim vek sipsip lou hi. North Cachar Hills Autonomous District Council thuneihna saang in Bodoland Territorial Council (BTC) thuneihna pen saangzaw tham hi. Kum sawm vaal  a kikhia, NC Hills ADC pen ana om masazaw thamtham himahleh,  BTC thuneihnate pen saangzaw leh hoihzaw ahihman in mundang a ADCs-te in zong thuneihna tamzaw leh mahni deihtelna thupizaw (greater autonomy) aneihtheihna diing un Phualpi Sorkar ah ngetna pelut in Sixth Schedule Provisions Amendment bawl diing deih in naktak in panla lellel uhi. Phualpi Sorkar (Centre) ah Amendment bawl in om petmah henla, Manipur Hill/Tribal Areas, ADCC huapna chiangchiang ah; “Sixth Schedule Provisions Extended,” ahita chih bang hong tel maizenle bel kinuam khinkhian chiat diing in um bilbel ingh...!!

 

Mangkang gamkeekte in “Excluded & Partially Excluded Areas” gambung huapsungte ah vaihawmtu diing Officers sepkhia in ana vaihawmkhum zeldan uh ahi. Tua ahihman in singtang mipite in vaihawmna toh kisai haksatna leh buaina tampi aphutkhakte uh genkhawmna diing (platform) mumaltak huai hunlai in nei lou himhim uhi. Gamkeek Officers-te leh Hausate in mipite tung leh Excluded & Partially Excluded Areas huapsung teng ah  mimal thuneihna sangpen (Dictators)  nei bang hial khop in ana vaihawmkhum zeldan ahi uhi. Ataktak a gen in Government of India Act 1935 nuai a vaihawmna sung ah singtang mite teenna gam huapsung ah tualsuak mipite deihtelna dungzui a vaihawmna om lou himhim asuak hi. Mangkang gamkeekte vaihawmdan paizia pen angaihsut uh chiang in, a sumsinna ua punna angahtheihna diing lel ua Gamkeek-Officers-ten mipite vaihawmkhum uh ahi chih tribal mite’n ngaihdan kiptak nei bilbel uhi.

 

Himahleh, India in Zalenna angahnung bel nelhsiah leh tuantualtak a om Gam-Leitang huapsung khantouhna diing leh Tribals’ mite pupa ngeina-tawndan-zahtaksak a puahphat diing, India gamsung midangte toh tanbang kim a, lam tuamtuam a khantouhna aom diing ahi chi a geelsak in om uhi. Tribal mite deihna bang leh amaute pupa tawndan-ngeina aneih khempeuhte uh kepbit ahih a, namdangte toh khantouhdan kibang a, amaute masawnna diing akituahpih vaihawmna kichian zonkhiaksak in om uhi.

 

Bordoloi Sub-Committee:

            Advisory Committee on Fundamental Rights of Minorities in the Tribal Areas” kichi May, 1946 in Constituent Assembly of India in phutkhia hi. Advisory Committee in Sub-Committee asehkhiakte lak a khat, “Northeast Frontier (Assam) Tribal and Excluded Areas Sub-Committee under the Chairmanship of Assam Premier, Gopinath Bordoloi kichi phuhkhiat in om hi. Mun tuamtuam a minam tuamtuam toh Committee palaite kimu a, houlimna hoihtak aneihkhit uh chiang in hiai anuai a bang in ngaihsutna kichian geelkhawm diing a aluikhiakte uh ahi bangbang in i taklangh diing:

  1. 1.      The people of the region were sensitive towards their land, forest, lifestyle and traditional systems of justice and, thus, needed safeguards and protections so as to preserve their way of life, and (Free Translation: Gam-Leitang, gammaang, hinkhua-khawsakdan leh ngeinadan ngeinabang dungzui a ana zuih zelte uh toh kisai agam mipite in ngaikhawk lua uh ahihman in amaute hinkhua toh kituak a kepbitna leh humbitna bawlsak kisam hi);  
  2. 2.      There were traditional self-governing institutions which functioned democratically and settled issues according to their traditional lifestyle (Free Translation: Pupa tawndan ngeina dungzui a mipi vaihawmna kichian nuai ah buaina chituam tuam aneihte khempeuh uh amaute tawndan ngeina toh kituak in thukhenna bawl zel uhi).         

 

Sixth Schedule Pianzia:

            Bordoloi Sub-Committee in amuhdan leh ngaihdan akipan thilgeel khat neih hoih asak dungzui in Sixth Schedule thutuun leh paizia diing gelhkhiak in om zui ngal hi. Amasapen in Autonomous District Councils (ADCs) bawlkhiak in om hi. Assam Autonomous District (Constitution of District Councils) Rules 1951 leh Lushai Hills District a zat diing in Pawi-Lakher (Constitution of Regional Councils) Rules 1952  bawlkhiak in om bok hi. Huchi in hiai Councils-te in gam leitang, gammaang, sumsinna, primary schools, nasepdan diing geelna (planning activities) chihte tengteng vaisaina nei a akivaihawm uh chiang in, amau tawndan dungzui a vaihawmna omsate, etsakna di’n tribal chiefs, tribal councils, etc., chihte nakpitak in khoihkha hi.

 

            India Mal-Suah ah tulel in District Councils avek a gawm in sawm-le-nga om a, tuate lak ah Manipur Hill/Tribal Areas pen ah ADCs koih a om hinapi in, Sixth Schedule Provisions zat in om lou chitchiat hi – Assam ah nih, Meghalaya ah thum, Mizoram ah thum, Tripura ah khat, Manipur ah guk om lellel hi. Achil a Nagaland a diing a Sixth Schedule bawlkhiak hinapi in Autonomous District Council om lou ahi chih chiamtehtuak khat ahi. Autonomous District Councils li (4) Sixth Schedule nuai ah zat diing ahi chih kum 2003 in Arunachal Pradesh Assembly in thupukna bawl mahleh tunitan Parliament namkipna ngaakden lai uhi.  

 

Manipur Hill/Tribal Areas ah Autonomous District Councils Act, 1971 Parliament in abawl pen zat in om mahleh tunitan, Sixth Schedule Provisions bel zat in om het lou zel hi.

 

Autonomous District Councils (ADCs):

            Sixth Schedule pen India Daan Bupi sung a Daan Bupi-neu (mini-Constitution within the main Constitution) ahi chihdan a koih in om hi. Autonomous District Councils ahihna bangtak a koih leh bawlkhiak a om diing ahihdan mukhol kilkel a theikhol uh ahihman in Daan bawldan bang, Vaihawmdan bang, Thukhendan toh kisai a thuneihna kipiate (Legislative, Administrative and Judicial Powers) ngentel leh pilvangtak a hih leh bawl in om hi. District Council lemsakpihna tel lou in Phualpi Sorkar ahihke’h State Sorkar in Daan (Law) khat lel zong azatkhum thei kei hi. Village Councils leh Village Courts chihte phutkhia/bawlkhia diing a thuneihna saangtak piak in om bok hi.

 

            Councils huapsung vaihawmdan suangtuah a gelfel zel diing in Governor khut ah Sixth Schedule in thuneihna pia hi. Autonomous districts thakte, district om lel khek lamdang in, District min leh a gamgi kichiantak a khen vilvel in Governor in abawllem thei hi.   

 

District Council Pianzia leh Kilepkhawmdan:

            Sixth Schedule nuai a om, District ahihke’h Regional Council khempeuhte amin phuak in District ahihke’h Regional Council chihte pen amin toh kituak a district/regional piching a koih in om zel hi.Mi tam lou behlap/guanbeh (nominate) diing toh kisai in State Governor khut ah thuneihna piak in om a, Chief Executive Member (CEM) hoihsakna dungzui a guan diing ahi.

 

            District Councils in Chief Executive Member (CEM), Chairman leh Deputy Chairman (Speaker & Deputy Speaker toh kibang) chihte Council Members sung akipan telkhiak diing ahi. Sep-le-bawl ah Chairman leh Deputy Chairman in Speaker leh Deputy Speaker tegel nasepdan toh kibang in vaihawmna (legislature) mun leh hun ah asem un abawl diing uhi.

 

Executive Committee:        

            District Council nasep-silbawl bangkim a makai leh lamhilhtu diing Executive Committee (EC) kichi bawl diing in Sixth Schedule ah thahatna piak in om hi. Executive Committee ah Chief Executive Member (CEM) leh member dang bangzah hiam kipawlkhawm a bawl a om pen Councils tuamtuam ah akibang vek khol kei diing hi. District Council teelching a om teng in CEM atelkhiak diing uh ahi. Huchi in EC members diing mi bangzah hiam guang in Chief Executive Member genmawina dungzui in State Governor in asep (appointed) diing hi. Council nasep-silbawl toh kisai khempeuh Executive Committee sepsuah ahihman in State ahihke’h Phualpi Sorkar Cabinet nasepdan toh kizul in kibang mahmah hi. District Council pen district level a diing in “Innpi-neu” (miniature parliament) toh kibang ahi hi. CEM a kitawpleh, EC zong kintak a bei/tawp hi ngal mai hi. EC hihbei ahih akipan daakkal 48 sung ngei a CEM kintak a teelkhiak pah diing ahi; huchi ahih louh tawp in Governor in Council member khat peuhpeuh akipan CEM asehkhiak pah diing kisam hi.

 

              District Council huapsung a nasep-silbawl kong bangkim ah, khantouhna thilgeel hi in sepkhiakna lam ah hitaleh, mohpuakna tengteng Executive Committee ah kinga vek hi. Daan-le-dun bawlna leh sepna toh kisai nagotna chihte tengteng Executive Committee mohpuakna hi kawmkawm in District Council lemsakpihna dungzui a kibawl vek ahi hi. Budget bawl in District Councils ah EC in aluikhe diing a, paisuaksak (passed) diing zong EC khut ah kinga hi.

 

Legislative Function:

            Zapi huap a daan bawl diing in kong tuamtuam ah District Councils in thuneihna anei hi: Land, Agriculture, Primary Education, Health, Establishment of Village Councils and Town Committees, Appointment and Succession of Chiefs or Headmen, Inheritance of Property, Marriage, Divorce, Money-lending, Trading by non-tribals, etc., within their territories.

 

            Sixth Schedule Provisions toh kikalh a District Councils in Daan thak abawlte a paisuaksak khakleh, huchibang Daante pen khek lamdang diing in Governor in thuneihna anei hi. State leh Central Laws, District Councils gam-leitang huapsung ah zat ahihma in ADCs in hoih asak bangbang in pompih hiam ahihke’h adeihna bang dungzui a kheek lamdang diing in thuneihna leh thahatna anei hi. Phualpi leh State Sorkar akipan Daan bawl a omte khempeuh thakhat thu in Autonomous Districts-te in zui pah lou in, kheek lamdang diing om hia ahihke’h om lou chih pilvangtak a avelchet masak diing uh amaute mohpuakna ah kinga hi.

 

Executive and Judicial Functions:

            Daan dungzui a sep-le-bawl diing khempeuh semsuah diing in District Council in thuneihna aneihte primary schools, dispensaries, markets, cattle pounds, ferries, fisheries, road, and waterways, etc., chihte khawng ahi. ADCs thuneihna huangsung a primary schools-te ah sinsakna pauzat diing baan ah, siamsinna a gamtat zia leh omdan diing geelsak in om bok hi.

 

            Thubuai neite tribal mituak ahih ualeh pupa tawndan ngeina (customary laws) dungzui a thutanna bawlsak in om zel uhi. Thukhenna Zumpi, Village leh District Council Courts bawlkhe diing in District Council ah thuneihna piak in om hi. Himahleh kum nga vaal Taan Inn a khumtheih leh sihna tanpha thutanna piaktheih thubuai neite bel hiai Thukhenna Zumpi ah athu ngaihtuahkhawm diing a laaklut in om ngei lou hi. Thukhenna Zumpi neuzawte (subordinate courts) tengteng a thutanna kibawl tungtang a lungkim louhna nei, mi khat peuhpeuh in District Council Court leh Regional Council Court ah Ngetna apelut thei hi. Council Courts in thubuai-labuai toh kisai Thutanna abawlte khempeuh India High Court leh Supreme Court thuneihna huangsung kia ah thupukna bawlthaktheih hi lel hi.

 

Ngenteltak a ADCs Nasep-Vaihawmdan Paizia Etkiikna:

            Kum 1952 akipan tunitan Councils nasepdan leh paidan sui in buukkak le’ng thil kikhek lamdang tampi petmah om ngei diing hi. Sixth Schedule nuai a tuni a kivaihawmna leh kum 50 paita hun a thil omdan kintak a etkik poimoh hi.

 

Mihing Pundan: Kum sawm 10 hal zel a kisimpina dungzui in munchih-mualchih ah mihing tawm-le-tam kilepkhawmdan (population composition) nasatak in kikheng lamdang hi. Kum sawmguk (60) paita a mihing tawm-le-tam kilepkhawmdan pen tuhun toh tehkaak le’ng kikheng lamdang lua hinapi in ADCs palai lepkhawmdan ah mihing tawm-le-tamdan toh kituak a kheek lamdang in aom tuan kei hi. Pilsiamtak a etkiik ahih keileh 6th Schedule pentak kha akizatna gam huapsung mahmah, abiktak in Assam ah tunung chiang in buaina thupitak piangsaktu in pangkhathei hi.

 

Khantouhna Nasep a ADCs Pankhakna:     

            Mi kimkhatte’n atangpi a gen in, Autonomous District Councils pen Daan (Laws) bawl, lemna leh muanna om theihna diing a venbitna nasep, chihte baan ah tualsung zum innte ah adik-a-tang a thutanna bawl in om hiam chih khawng lou ngal adang sep diing nei het lou ahi uh chi in ngaihdan nei uhi. Khantouhna lam toh kisai Councils in pankhakna neidan in mite in akoih kei uhi. Bangteng hileh, tulai hun a alou-thei-lou thil poimoh masawnna lam leh Sixth Schedule pianzia diktak bel tualsung khantouhna nasep ah Councils-te in sunggiltak in pankhakna nei mahmah ahizaw uhi. Fifth Schedule Areas huapsung ah Panchayat guanlut ahih toh kiton in mipi deihna bang dungzui a kitelna nei in leh numeite a diing in zong mun sehkholhsak in om hi. Huchibang mah in Sixth Schedule Areas huapsung ah Fifth Schedule Areas a Panchayat hihdan ettontuak ahi mai diam chih zong ngaihtuahna ah thil piangthei khat ahi. Shri. J. B. Patnaik Assam ah Governor ahihlai in hiai anuai a bang in gen hi:

 

“In the Sixth Schedule areas, there’s no decentralization of powers and administration. There’s no Pachayat and Parishad. All you have is only a district council, which elects few people and they enjoy unbridled power. But democracy demands that power should not be concentrated in a few hands.” – J. B. Patnaik, Governor of Assam since December 2009.

 

(Free Translation: Shri. J. B. Patnaik, December 2009 akipan Assam Governor in pang a hiai bang in gen hi; “Sixth Schedule areas ah thuneihnate leh vaihawmna hawmlual a piaksawnna bangmah aom kei hi.  Huchi in Panchayat leh Parishad chihte zong om lou hi. District Council chih louh ngal adang bangmah neih nei lou in mi tawmchik lel teelkhia in thuneihna kamkaihlouh zang in nuamtal a om lel ahi hi. Himahleh, mipi vaihawmna in angiat bel mi tawmchik lel khut ah thuneihna piak a aom louh diing ahi).”         

 

District Councils Zalenna/Mahni Kivaihawmna:

            ADCs in lemsakpihna apiak ahihkei ngalleh State ahihke’h Phualpi Sorkar daante (laws) zat a om ngei lou ahihman in ahuangsung ah bel thunei mahmah lel hi. Ahihnatak a gen in District Councils tung a thuneitu bel Governor ahi lel hi; Sixth Schedule provisions toh kituak lou a Councils in vaihawmna aneih zenzenleh a vaihawmkhum theitu omsun bel Governor kia hi lel hi. District Councils vaihawmna khawlsak theitu, Governor in khaguk sung a thuneihnate leh nasepte laksuh thei hi. Inquiry Commission in hihbei diing chi’a agenmawi (recommend) peuhmahleh Governor in District Councils kivaihawmna ahihtawp thei hi. Ahihhang in amun taktak ah ahihleh State Cabinet thupiak dungzui a sepkhiak lel diing ahi leuleu zel hi. Governor thuneihna pen state Ministers khenkhat in thuneitak in achalaithei uh chihna suak hi. Tuateng baan ah, District Councils pen sum-le-pai toh kisai a state sorkar ah kinga lian mahmah ahihman in, state level politician-te’n baihlamtak in nawkthei veve uhi.

 

            Khantouhna leh masawnna lam ah Sixth Schedule Provisions akizatna mun tamtak ah lohsam sim bang mahleh kum asawm a sim phatuamtak leh hoihtak in naa seem hi. A nasepdan ngenteltak a etkikna nei in, a kivaihawmdan velphathak le’ng bawlhoihna diing tampi om diing in uphuai hi.

 

            Sixth Schedule bawlkhiak ahih akipan singtang mite gam-leitang (land) leh pupa ngeina tawndan (customary laws & traditions) humbit leh kepbit in om hi. Tribal Areas mumaltak a gambung sehkhen gamgite (district boundaries) Manipur State ah kichiantak a bawlfel a om hia, ahihke’h bawlfel louh chih pen tuni a Phualpi Sorkar bildohna mahmah ahi. Art. 371C nuai ah India President, Shri. V. V. Giri in Hill Areas Committee Orders, 1972 Manipur Hill Areas huapsung gamgi  puankhiakna ana neikhin thamdan ahi. Huchi in, Manipur (Hill Areas) District Councils Act, 1971 & Rules, 1972 Parliament in tribals mite a diing in Daan omzenei leh zuihtheih diing in bawlkhia hi. Kum 1973 akipan 1989 tan dong Manipur Hill/Tribal Areas gamgi huapsung teng ah ADC Constituencies Election omtou ngitnget hi. Kum 20 vengveng ADCCs Kitelna (Election) om lou a koihdap in om zenhouh hi. Kum 2010 kum bullam in mipite deihna bang in ADC Constituencies huapsung ah kitelna thakphuan in omnawn leuleu hi. ADC kitelna om lou a kum 20 vaal ihmu, huai sung a Manipur Sorkar in “Amendments” (Bawlphatna) (2000 AD & 2008 AD) nihvei ana bawlman zawmah lai hi. Amendment (Bawlphatna) chihdan ahihhang a singtang mite (tribals) a diing a bawlphatna khat lel zong om lou, ama a saang a huaise zawmah lai chihdan hi teldan ahi. Huaiziak a Manipur Hill/Tribal Areas huapsung ah Sixth Schedule Provisions poimoh lua hi.

 

            Tribal Leaders (Singtang mi, Heutu/Makaitu) masate in kum 1970s hunlai in Manipur (Hill Areas) District Councils Act bawlkhiak diing nasatak a ana buaipih uh ahihdan, Shri. (L) Haokholal Thangjom in kum 15 vaal paita a ka houlimna uah gen hi. A thugen khenkhat ka chiamteh theih laite i taklangh zual diing:

 

“… Manipur in Statehood ngah dekta ahihchiang in Tribals mite toh kituak, atuam a mahni kivaihawmna diing Phualpi Sorkar in hon bawlsak diing in kiman mahmah uh ahihchiang in baihlamtak a Sixth Schedule ngahtheih ahihlai in, Phualpi Sorkar ah kintak a i nget uh thilhoih ahi. Manipur Hill/Tribal Areas ah tu hun a Sixth Schedule Provisions zat a aom keileh tunung chiang in kisik ngeingei diing i hi uh…. Polictics ah khatvei hihkhelh in khang thum daihlaw mahmah ahihman in pilvang chiat ni.... Minphatna (Credit) deihluat ziak in mi khat-le-nih kintak a Delhi ah vahoh in tulel a zat a om, i.e., Manipur (Hill Areas) District Councils Act, 1971 kichi pen singtang mite a di’a zat diing chi in Phualpi Sorkar toh kithukimna vabawl in hong paikiik maimah uhi….”    

 

1990s hunlai in All Tribal Students’ Union, Manipur (ATSUM) in “Fullest Autonomy”deihhuaizaw ahi chi in Sixth Schedule Provisions neu koihna ziak in thusam (slogan) khat: “No Sixth Schedule, No Election” chih thupi a nei in mipite amhaisak (confused) mahmah hi. Fullest Autonomy pen India Daan Bupi ah Provisions tuam om geih lou ahihman in anung sawt lou in gen ging in omnawn vet lou hi. Hill Areas Committee (HAC) in hiai toh kizul mah in “No Sixth Schedule, No Election” chi inthupukna bawl behlap hi.

 

Thukhupna: 

Kum 20 val zeen beinung nangawn in zong Sixth Schedule Provisions Manipur Tribal/Hill Areas ah zat a aom tuanlouh chiang in mipite patau gawpzaak hingei diing hiven… Kum 2010 in ADCCs Election, Manipur State Sorkar in, singtang mite hon neisaknawn nainai hi. Hiai hunsung (term) ngei leng beinawnta; Kum 2015 in ADCCs Election pen “Sixth Schedule Provisions” zat a om tuan sam lou in kiteelna kineikhin zou zel hi. “No Sixth Schedule, No Election” thusam pen in omzia nei mahmah lou asuak maimah hi. Kum 25 bang pailiamta, tunitan Sixth Schedule Provisions Manipur Tribal/Hill Areas ah “Extended” in aom nai kei lailai hi. Kum 20 sung vengveng ADCCs koihdap ahihnung nasan a Manipur koimun mah ah 6th Schedule Provisions zat ahihlouh nilouh mawk pen bangziak pentak hi diing hiam chih lungsim hon kamkhat ahi.     

 

Tuni a koilam manohta diing chih pen ngaisuthuai mahmah leh bildoh hunlaitak ahi hi. Hill Areas Committee Members leh Manipur District Councils Members-te tengteng in mipite koilam hon manohpih sawm peuhmah uh hi hiam? Amaute pen mipite sik-le-tang a Innpi a Daan Bawl Pawl a kihelthei leh mipite ai-oh Palai diing a muang mahmah leh hawmthohtak a teelching a om ahi peuhmah chiat uhi. “Koilam nga a mainawt diing ka hi ua,” chi in mipi kahtam ‘Aw’ ging-husa athawn a paimangsak mai lou diing in Palaite kiang ah kingainiam mahmah in “Ngetna” khatna i thehlut ahi. Hiai ngetna ngeingaih lou a, thei nazenpi a kitheihmoh bawl teitei Palai aomleh… Mipite vangtahna thupitak ahih diing baan ah, mailam hun ah, lungzinna meipi vom ngeingoi in hon na vaidawn pelmoh diing ahi chih chiamteh mahmah diing in “Ngetna” nihna i thehlut ngal hi henla…!!

 

Thukin leh ngaihtuah thamching, “No Sixth Schedule, No Election” chih pen hong tung diing ADCCs Election omnawn ma ngei a, diahdiah lou a; kin-le-buang a, tu, hun hoih leh lohchintheih, hun manpha ahi chih phawk chiat a, khanglou guih a…buchinsak theih ahi chih chiantak a thei kilkelkawm a, hangsantak a, hon bohzui diing in, “Ngetna” thumna i Palai hawmthohte tengteng, ADCs & HAC., MPs-te kiang ah i pelutnawn bok ahi…. Banghang hiam i chihleh, Phualpi Sorkar, Ministry of Home Affairs akipan Chief Secretary, Government of Manipur ah dotna nih lel dong uh ahihman in; Dawnna dik leh phatuam piaklut ahihtheihna di’n bel mipi kiphin noinoi a phatuam diing hi lou in, Mipi Palaite mohpuakna ah kinga ahita hi. Palai ahihna uh ziak a, agenna diing mun diktak a agen ua, abohzui diing uh amaute sep-le-bawl diing him ahih baan ah, amohpuakna uh semsuah hi lel diing ahi uhi.

 

Mipite sik-le-tang a agenna diing hun-le-mun chih ah tangkoutu diing Palaite, MPs, MLAs & ADCs ahi ua, amaute’n amohpuakna uh semsuah diing a thu poimoh tua hong kiluikhia ahihman in mipite’n zong theisiam in nungthuapdan siam peuh le’ng mailam ah lohchinna kingah diing ahi chih lamethuai peuhmah hi. Hiai bang hun hoih leh manpha mansuah lou teitei diing in mipi ai-oh di’a teelching a om, palaite tengteng in zong bildoh deuh a, MLAs kiteelna hun hong nainawn zelta ahih toh kiton in, mipite sou-phu ditdit ahihlam atheihsiam mahmah uh i gingta hi. Manipur Tribal MLAs-te tengteng, HAC in Meeting sam a Ministry of Home Affairs, Government of India in dotna abawl pen dawnna piakdan diing toh kisai pilvangtak a thupukna bawl detdet in; Amaute in amohpuakna uh ahon sepkhiak ngei uh lamen petmah hi hangh…! A kitheihmoh bawl teitei ualeh bel mipite apoimoh hun uh hong tung pahta diing ahihman in, mipite’n pilvangtak in mainawt zel ni…!!   

Read 498 times Last modified on Thursday, 23 July 2015 23:18
Login to post comments