You are here: HomeColumnsR SangaNI 175 NUNG CHIA’N

NI 175 NUNG CHIA’N

Written by  Dr. Sanga R. Laingek Published inR-Sanga Tuesday, 01 March 2016 00:30
NI 175 NUNG CHIA’N

~ Dr. Sanga R. Laingek

 

Thupatna:

August 28, 2015 (Friday) ni in Manipur Legislative Assembly in Innpi ah Bills thum phoukhia hi. Tua Bills thum phoukhiak ahihma in Imphal khopi sung mun tuamtuam ah ‘Inner Line Permit System’ Manipur ah zat in om teitei hen chi in kha nih vaal vengveng mipi kiphinna, valley district 4 huapsung ah sousang mahmah hi. August 31, 2015 (Monday) ni in Bills Thum Manipur Innpi ah nialtu khat lel leng om lou in paisuak ziahziah hi. Hill Areas Committee Members khat mah in nial het lou a dai sipsip a om in, baihlamtak in Bills Thum huaise deuh mai, Manipur Vaihawmna Innpi ah apaisuak zanzan ziak in Singtang mite lak ah buaina sousang petmah hi. India gam mun tuamtuam akipan Manipur hong lut diing mite daalna leh Manipur huapsung a ana omsa, singtang mite tengteng a di’a lauhuai leh tulel a Imphal phaijang mite in singtang mite gam-leitang laksuhsak theihna diing ngimna toh kithuah Daan lauhuai tawpkhawk, MLAs (Daan Bawl Pawlpi) teng in Manipur Innpi ah apaisuaksak uh ziak in Lamka khopi kia hilel lou in; Manipur Hill Areas huapsung teng ah buaina nasatak tunitan omtou ngitnget lai hi. Hiai, "The 3 Anti-Tribal Bills Passed" thu toh kisai a Singtang mipite tengteng buaina leh haksatna amaituahte uh State Sorkar in ngeingaih lou lailai hi. Adauthei lamlam a gen in tualsung toh kisai bitna-le-muana (law and order) leldan in Phualpi Sorkar ah thutut bawl nilouh mawk hi.

 

Hun sawttak Manipur phaijang mite in Inner Line Permit System zat diing deihna ziak in kiphinna nasatak ana neitou ngitnget uhi. Kum 2012 in ILPS zat diing deihna ziak in Manipur Assembly ah State Government sepsuah diing chi in thupukna bawl in om mahleh, Manipur Chief Minister, Shri Okram Ibobi Singh in March 2015 in Inner Line Permit zat ahih diing deihna ziak mah in, “The Manipur Regulation of Visitors, Tenants and Migrant Workers Bill, 2015” kichi Innpi ah phoukhia a, kintak in paisuak ngal hi. Hiai Bill in atup-le-ngim hiai bang in kigelh hi: “The bill proposed to list all visitors, tenants and migrant workers with the directorate of regulation of visitors and tenants, which will be set up under the proposed act and state labour department.” Himahleh, hiai Bill thutunte in tualsuak mite humbitna leh amaute a diing a phattuamna bangmah om lou ahi chi in Joint Committee on Inner Line Permit System thangpaisak mahmah ahihman in July 15, 2015 ni in, Manipur Legislative Assembly in Special Session kintak a sam in zukkiik leuleu hi. Chief Minister in kha thum sung a ILP zat ahihtheihna diing a Bill dang khat Assembly in bawl pah diing ahi chi in JCILPS palaite kiang ah thuchiam bawl hi.

 


The 3 Anti-Tribal Bills:

Ahuaisia mahmah Bills Thum, taangpi theihdan a, “The 3 Anti-Tribal Bills” kichi August 31, 2015 ni in nialkalhtu diing om het lou, Tribal MLAs tengteng in hoihsakpih leh pompih ahi ngei diing ua; Manipur Innpi ah kuamah pau lou, phun lou, maingaltak in paisuak ziahziah maimah hi. Singtang mite a diing in hiai ni pen Manipur khangthu ah, ngilhni tuang tung ngei lou diing ahita hi. "The 3 Anti-Tribal Bills" ahihleh:

(1) The Protection of Manipur People Bill, 2015,
(2) The Manipur Land Revenue & Land Reforms (Seventh Amendment) Bill, 2015 &
(3) The Manipur Shops and Establishments (Second Amendment) Bill, 2015 ahi uhi.

 

Bill 1-na: Hiai Bill in mihing hon khoihkha ahihna ah mailam hun ah pilvanhuai thu hunkhop tunkhawm hi. Manipur State mi hih-le-hih louh chetna diing a kigen: Manipur people; Manipur Person ahihke'h Native people chihte khawng ahi a: Manipur khua-le-tui hih-le-hih louh chetna diing in, National Register of Citizens, 1951; Census Report, 1951 & The Village Directory 1951 chihte a mintuang hih diing chih ahihziak in singtang mipite hon patausak petmah hi. Gamdang mi kisuak vek thei diing khop a huaisia ahihman in, pu-pa satsa gam-leitang tunitan ih luahna gam nikhat thu a melmakte khutnuai a om thei diing dinmun a om ahihna ah singtang mi ngaihtuahna neithei chiang liai mi kuapeuh a di'n alauhuai mah ahi chih kitel mahmah hi. Himahleh, mipi palaite, Tribal MLAs khat lel leng patau vet lou uh hidan ahi. Lamdang petmah mai hi….!!

 

Bill 2-na: Hiai Bill in gam-leitang toh kisai khoihkha ahihna ah mailam hun gaaldot thei mite a di'n bel patauhhuai lua mah ahi chih achian hi. District Councils thuneihna om sunsun bangmah lou a koih in; gamzuak leh neitu hihna diing a chiamtehna laidal sung ah Manipur Cabinet lemsakpihna laak masak teitei ahi diing chih ahihman in pu-pa tawndan ngeina dungzui a singtang gam huapsung, Hausate leh mipite khut a gam-leitang neitu hihna tanglai akipan tunitan ana om tou ngitnget pen in omzia neinawn lou diing chihna ahita hi. Singtang gam huapsung munkhat peuhpeuh mi kua hiam, Phaijang mi khat peuhpeuh in Gam-leitang leitheih ahi diing chih zong hiai Bill ah gelhlut in om zawmah lai hi.

 

Bill 3-na: Hiai Bill in neek-le-dawn, sumsinna leh khosakna hon khoihkha ahihna ah mailam hun saupi akhualthei mite a di'n bel beidothuai petmah asuak hi. Sumbuuk/Dawr ngaktu diing leltak zong ahihna kichiantak chetna aom masak phot diing, Manipur khua-le-tui hihna anei lou mite pen Dawr ngak diing a zong pangthei lou diing uh ahi chih kitel mahmah hi. Manipur mi hihna pen chetna diing a kigen lah Bill 1-na a kigelh dungzui in 1951 kum a kisimpina a min tuang ahih diing uh chih hi zel, huaiziak in nawngkai petmah diing ahi chih imvual louh in kilang chian mahmah hi. Tribal Social Customs zong khoihkha ahihman in nawngkaina tampi mahmah kimaituah diing ahi chih achian bok hi.

 

Salpha Siluang 9 (Nine):

Manipur Legislative Assembly ah 31.08.2015 ni a, "The 3 Anti-Tribal Bills" passed ahihziak in singtang gam-leitang humbit diing lungtup a anei, 'Salpha,' mi kua in sihloh uhi. Mulkimhuai petmah…! Salphate-siluang 9 atawldamna diing uh mun diktak a zong tawldam thei lou, ataksa uh lei a siam; lei ah kiiknawn diing hinapi in, District Hospital ah tunitan koih in om lai zenhouh uhi. Banghang hiam chihleh, Singtang mite'n palai diing a Manipur Innpi (Assembly) a mipite sik-le-tang a gensaktu diing, singtang gam-leitang humbittu diing a muang mahmah a teelching a omte, Innpi a sawllut a om hinapi in mipite mansaktu (betrayal) a pang hile uh kilawm zawsop; "Singtang mite a diing in hiai Bills 3-te asiatna om lou leh singtang gam-leitang khoihkha lou…" chi a gengen ngap lai uh ahihman in lamdang petmah hi. Amaute ziak a singtang gam buaigawp asuak hi.

 

Manipur State leh Phualpi Sorkar in singtang mite kipumkhatna hoihtak hihsiat dimdemna diing a salphate siluang vanzat chikhat a hon zatsak maimah uh hileh kilawm maw…. Aleh-amak in hon peituah hehu in, Innpite baan ah mimal khenkhat leh pawlpi makaite tungtawn a Salphate luang vui diing kia thupi a nei in, "The 3 Anti-Tribal Bills" pen ahi diing bangtak a genkhawm a houlim diing in kong hong ut het lou maimah uhi. Mipite hon pei amhai petmah uhi.

 

September 2, 2015 ni in Suonggel Community Hall ah Consultative Meeting neih in om a; "Joint Action Committee Against the 3 Anti-Tribal Bills" phuankhiak in om hi. Students Organization tuamtuam, Innpi tuamtuam leh Joint Philanthropic Organization baan ah UPF & KNO, SoO Groups palaite, hiai Consultative Meeting ah kihel uhi. Salphate leh Bills tungtang thu poimohtak ngaihtuah diing in Joint Action Committee Against the 3 Anti-Tribal Bills (JAC) leh Joint Philanthropic Organization (JPO) mohpuakna piak in om ngal bok uhi. Mohpuakna piak a om, JAC & JPO akipan Salphate siluang vui diing toh kisai thupukna bangmah om nai loupi a, kichinglah leh kisalah mi kuate hiam ziak in mipite lungphawng leh hamhaihtak in om nilouh uhi. State Sorkar in Singtang, nam tuantualte kipumkhatna khetzaak teitei sawm tinten in lamchiteng ah nasatak a panlatou ngitnget ahi chih chiang huntawkta hi.

 

Divide & Rule Policy:

Mangkangte hunlai akipan "Khenzaak a Vaihawmkhum Thilgeel" kichi ana omtou ngitnget ahihman in, tuni ngei in zong Singtang mite lak ah, "Divide & Rule Policy" kichi Manipur Sorkar in hon zatkhum ahi chih bil nei peuh in za uhen…!! Singtang mite kipumkhatna kembittu diing mituam hi lou in, ei, singtang mite mah i hi uhi. Himahleh, tuni a ei-le-ei lungsim a kidou leh ih kipumkhatna uh hihsiat a aom theihna diing a; Manipur Sorkar in vanzat chituam tuam, sum-le-pai kia hi lou, lalna leh thuneihna baan ah, dinmun saangtak a mi khenkhat hon koih in pilsiamtak a khem lungdamtheih mite tungtawn a, singtang mite khenzaak a, ut dandan a vaihawmkhum nuamsa mahmah leh lungkim petmah diing uh ahi chih phawkthak chiat ni…!!

 

Mipi Palaite (i.e., MLAs), mipite sik-le-tang a Manipur Vaihawmna Innpi a lut a, Daan tuamtuam 1,000 vaal zen passed theizet, mi muanhuai i neihte un Daan bawl a, laipek a Bills thu kigelhte, singtang mite a diing a huaisia leh gam-leitang laksuhna diing ngimna a Daan bawl a omte khawng; Phaijang mite deihdan toh kituak geih a lemsakpih lou diing a vaihawmna hun a alei (tongue) uh vengsiam a, pau lou leh phun lou a om chih pen mipite zuakmangna toh kibang hi lel lou diing hiam…!! Eite lak a mi lian-mi lalte mah, Sorkar in vanzat a zang in, "Divide & Rule Policy" hon zatkhum uh ahihlam phawkthak in, pangkhawm le'ng deihhuai petmah mai hi. Lal tutphah khiaklahhuai sa tuntun a, thudik pen dik lou chi a siam kitan teitei chih pen mipi nelhsiahna thupitak ahi chih haihvual hi lou; sum-le-pai lamtam saang in, ih chipih-sapihte toh gentheihna thuakkhawm le'ng gam-leitang humbitna diing in bel manphazaw mahmah diing ahi chih chiamteh chiat ni…?? Tunung-tubaan mipite pilvang chiat ni…!!

 

Lungpi Geel Hun Ahi:

Tuni in, Daan Bawl Pawlpi, MLAs mohpuakna leh dinmun saangtak a koih a om kuapeuh in akoihtute lungsim ngaihtuahna ah bang om peuhmah diing hi hiam chih ngaihtuah sese lou a, Vaihawmna Innpi a "Good Boys" vahih mai pen anung guun huaise lua diing hi lou hiam chih ngaihtuahna nei kuapeuh in hong lung-geel diing in deihsakna thupuak; Manipur Hill Areas Committee Members-te tengteng kiang ah, "Lungpi Geel Hun Ahi" chi in, thu vaikhah nanung i bawl ahi. Aziak bel, tunung zek chiang in lah thil thupitak hong om pah diing lah ahi ngal a.

 

Mipi deihtelna nelhsiahsak a aom chiang in diktatlouhna in azui a, huaihamna bang, mahni mimal angma sialna bang, Daan lou bang a gamtatna leh kimelmakna pung hulhul thei ahihman in nam heutute, saptuam heutute, khotang heutute leh thuneitu kuapeuh, aneu-a-lian pilvangtak a mailam nawt chiat diing ahi chih, tu hun haksatak kaal ah chiamteh tinten diing ahi. Singtang mite in pankhawm hatna ahi chih theichiat hinapi in pangkhawm nuam taktak lou i bang leltak uhi. Aziak bel ih pankhawm taktak diing uh lau a, i kaal a khetphim hon khenlut chetchettu om ahihman in: "Khenzaak a Vaihawmkhum Thilgeel" Singtang mite lak ah tulel in hat mahmah in khauh petmah hi. Tua ahihman in, "Lungpi Geel Hun Ahi…" chih phawkthak a, thil neu chikchik ah kihihbuai lou in, kong bangkim ah, "Tribal Unity" kepbit tinten kisam takpi hi. Heutu dinmun a om mite in mipite a diing leh gam-leitang humbitna diing toh kisai - ih kalsuan zia ah pilvanna diing aom ngei diing a; Mohpuakna semsuah zou diing in pankhawm thil kul-le-poimoh lua ahihlam michih in ih phawkthak chiat diing un deihhuai petmah hi.

 

Manipur Kivaihawmdan Paizia:

Manipur State kivaihawmdan paizia pen Mangkang gamkeekte hunlai pek akipan chinih in paitou ngitnget hi. Meeitei leh Singtang mite kivaihawmna pen tunitan atuam a ana om tou nilouh ahihdan India in Zalenna angah (Independence) kum, 1947 a Manipur Phaijang leh Singtang gam kivaihawmna tuam ahi chih chetna hoihtak hiai ah kingahthei hi: "The Manipur State Constitution Act, 1947" kichi Meeitei-Phaijang mite kivaihawmna diing in Manipur Maharaja in Daan ana bawl hi. Singtang mite atuam a kivaihawmna diing in, "The Manipur State Hill (Administration) Regulation, 1947" Daan tuam bawl in om bok hi.

 

Manipur in State piching angah ma kum, 1971 in Singtang gam atuam a kivaihawmna diing ngimna in, "The Manipur (Hill Areas) District Councils Act, 1971" kichi Phualpi Sorkar in Daan, hon bawlsak leuleu hi. Manipur State piching a dopkang ahih toh kiton in Manipur Legislative Assembly - Manipur Innpi Kivaihawmna sung ngei ah, Singtang Gam-leitang humbitna diing baan ah Kivaihawmna tuam aom theihna diing in India Daan Bupi Khenpi 371C pansan in, "The Manipur Legislative Assembly (Hill Areas Committee) Order, 1972" kichi tangpi-tangta theih diing in India President lui, Shri. V.V. Giri in ana puangkhia hi. Manipur Kivaihawmdan paizia pen State khat a om kawmkawm hinapi in, phaijang leh singtang gam akiton a kivaihawmna tuam ana paikhawm tou ngitnget ahi chih achiang huntawk hi.

 

Hill Areas Committee:

Manipur Singtang Gam huapsung (Hill Areas), khamtung mite atuam a kivaihawmna diing, Gazette of India ah June 20, 1972 ni in Hill Areas Committee Orders, 1972 (HAC) kichi suahkhiak (published) in om hi. Thuneihna saangtak piak a om hinapi in HAC Members, Tribal MLAs 20; singtang mipite sik-le-tang a gensaktu leh Daan bawltu di'a Manipur Innpi Vaihawmna ah sawllut a om teng in, athuneihna uh zangnuam het lou in; August 31, 2015 ni in bel, dai dide a omdan siam petmah uh ahi ngei diing a; pau lou phun lou a om khipkhep in Bills Thum, Gulpi teek saang a lauhuai zawtham nialkalhtu khat lel leng om het lou in ana paisuaksakta uhi. Bangziak pentak a hiai ni a HAC Members tengteng dai sipsip a om uh hi hiam chih mipite lungphawnna thupitak ahita hi. Hiai Bills thum teng Daan hong suah chiang in bel singtang mi atamzaw thamtham gamdang mi kisuak thei diing dinmun a om in, gam-leitang laksuh a om theih ahih baan ah, sumsinna toh kisai a nawngkaina nasatak singtang mite in maituah pah diing uh ahihman in chizauhuai lua hi. Huchi hinapi in Singtang mi MLAs-te ik ah namtham nai lou lailai abang settawk hi.

 

HAC Order, 1971 - Para 6: Development Plans:

(1) Before the Five Year Plan and Annual Plans of the State are finalised by the Government of the State, proposals in this behalf, which shall show separately the Plan Schemes proposed to be taken up in the Hill Areas and the rest of the State, shall be placed before the Hill Areas Committee and the views of the Committee shall be taken into account before the Plans are finalised.

(2) The Government of the State shall forward to the Hill Areas Committee quarterly reports showing the progress of implementation of the Plans relating to the Hill Areas.

 

February 19, 2016 ni in Manipur Assembly Budget Session kipan hi. HAC Order, 1971 nuai ah Para 6-na a kigen: "Development Plans" - sub-para (1) zui lou in Budget Session paizomtou zel lai hi. Hill Areas huapsung a sum zat diing bel 'Plan Schemes' atuam vilvel a bawl diing chih himahleh, bawl in om tuan het lou lai zawmah hi. Phaijang huapsung a sumzat diing toh kisai, Departments tuamtuam ah sum hawmzakna ahihleh State in bawl ziahziah mai hi. Hichi lawmlawm a kinelhsiahna leh singtang mite palzut a aomnung nangawn a zong Tribal MLAs teng in bang ngaihsutna nei uh hi mahmah tel hiam…!!

 

Sum-le-pai om lou in khantouhna nasep toh kisai nawngkaina om ngeingei diing ahihman in HAC in Hill Areas (Singtang Gam huapsung) kong tuamtuam ah akhantouh theihna diing a hiai atung a i taklat Para 6-na nuai a sub-para (1) & (2) a kigente Manipur Legislative Assembly in azuih ngeingei diing hinapi in zui ngei lou himhim hi. Thuneihna saangtak piak a om ngal a zangthei lou, ahihke'h zangnuam lou, kitheihmoh bawl a, singtang mite palai; MLAs; HAC Members mi sawmnih i neihte un bang hih a, Manipur Vaihawmna Innpi sung alut chiang ua bangziak a gam-leitang humbit diing a kamka a thugen lou a, mipite hon mansak zawmah lai uh hi hiam chih michih in theihsiam hun petmahta hi lou hiam chih hon ngaihtuahsak hi.

 

 

Hill Areas Committee Thuneihna leh Nasepdan Diing:

HAC Orders, 1972 dungzui in Sehkhen Nihna (Second Schedule) ah Tribal MLAs tengteng Manipur Vaihawmna Innpi ah thuneihna leh nasepdan diing baan ah mohpuakna kichian leh fel huntawk piak in om uhi. HAC nasepdan diing paizia Para 4-na nuai ah sub-para (1) akipan (5- a & b) kigelh diudeu hinapi in lamdangtak a koihdap in om maimah hi. Para 4-na, sub-para (5) nuai ah hiai bang in kigelh hi:

In its functioning, the Hill Areas Committee shall endeavour to:-

(a) safeguard the interests of the people of the Hill Areas, particularly through accelerated development of those areas; and

(b) promote unity between the people of the Hill Areas and other areas of the State by aiming at an integrated and evenly based economic growth of those areas and augment the resources of the state as a whole.

Himahleh, hiai atung a kigen sub-para (a) & (b) tunitan zuih a aom ngei louh ziak in mipite pangkhawm a Guite Road (National Highway No. 102-B) nasan bawlhoih a, puahphat kiphamoh zenhouh hi. Manipur Sorkar kia hi lou in, India Sorkar a diing nangawn a zong hiai National Highway No. 102-B, Guite Road puahphat a om pen mipi Palaite a diing a zahlakna thupitak ahi chih bil nei khempeuh in za uh hen...!!

 

HAC Order, 1972 Para 9-na ah Governor thuneihna saangtak piak in om hi:

 

Special Responsibility of the Governor: The Governor shall have special responsibility for securing the proper functioning of the Hill Areas Committee in accordance with the provisions of this Order and shall, in the discharge of his special responsibility, act in his discretion.

 

Governor khut ah thuneihna saangtak piak in om hi. Daan toh kituak a amah mimal in hoih leh dik asak bangbang a semsuah diing a thuneihna tuambiik piak a om hinapi in HAC Members-te in donsak lou ua, azatna diing bangtak a zat in om ngei lou hi. Manipur Chief Minister pen pibawl zaw ua, thuneizaw leh thahatzaw bangdan a koih in a pahtaak diing kituh nainai zenhouh uhi. Theisiam hile uh HAC- Chairman pen Hill Areas huapsung a Chief Minister dinmun toh kibang a thunei mahmah diing a, Committee Members dangte toh Development Plans, Para 6-na a kigen bang geih in, State Five Year Plan & Annual Plans - Valley & Hill Areas ah atuam vilvel a bawl diing chih pen zuisiam a, 'Annual Plan Schemes' bawl a om himai zeenle bel Manipur Chief Minister mai vil luatna diing om het lou diing hi. HAC Order, 1972 a akigelh dungzui a State Five Year Plan & Annual Plans - Valley & Hill Areas ah atuam a bawl in aom hia/om lou chih enkaitu diing leh abawl feltu diing a teelching a om, singtang mipite sik-le-tang a Palai, 20 Tribal MLAs; HAC Member tengteng tung ah hiai mohpuakna kinga himahleh ahi diing bangtak a zat leh zuih a aom louh ziak in Hill Areas Committee nawngkai petmah a thahatna nei lou bang mai in tunitan om zenhouh hi. HAC thahatna zangthei, Palai muanhuai mipite poimoh pipen ahi hi.

 

Hill Areas kong tuamtuam a puahphatna diing leh Khantouhna toh kisai, lam tuamtuam ah sum zat diing kiningching huntawk kum teng a akul bang dungzui a Phualpi Sorkar akipan Sum (Funds) ngahtheih gige ahihman in - Manipur Cabinet Minister dinmun deihluatna diing ziak-le-san om lou hi lou hiam i chi ahi:

 

India Daan Bupi Article 275-na a kigen bang in Tribal Sub-Plan akipan Manipur a sum hong lut khempeuh HAC thuneihna nuai ah koih diing ahihlam kiteltak a theisiam Palai muanhuai, mi ginom leh mi chitak tuni a mipite taaksap lianpen ahita hi.

 

Tua baan ah, Chief Minister maivil luatna diing zong om mahmah lou ahi chih Tribal MLAs teng in theihna kichiantak nei uh hia ahihke'h nei lou houh ahi uhia…?? Mipite khanloh hun, pilvan hun, mit hak kelkul a kikhem-kikhem hun hinawn mahmah lou…Pilvang chiat ni….!! Khemna ah lut ken, lut khelhna ahi; tua ahihman in sum-le-pai a khemzoh a na omleh, ih gam-le-nam mangthang ngeingei diing ahihman in 'TU' hun hoih leh hun manpha ahi, lunglel lou in pang hamham ni...!!

 

Chief Minister In Innpi Vaihawmna Pikawi In HAC Simmoh:

Manipur Sorkar kivaihawmna pen kithuaptuah netnot, kidelhthuah lemlum a om ahihman in Daan bangtak a kivaihawm chih himhim om lou mah abang tawntung hi. Vaihawmna tutphah a tu, mi kua hiam in Manipur Innpi pikawi a, Daan lou bangtak a thugen kua hiam a om hun chiang a thudik a vaihawmtu diing khat-le-nih beek om lou hita hiam chih ngaihsutna thuuktak ah hong sunglut hun atam mahmah hi.

 

Manipur State Budget Session February 19, 2016 ni in kipan a; February 22, 2016 ni in Chief Minister in Innpi ah hiai bang in gen hi: "The hill areas of the state are constitutionally protected by the Manipur Land Revenue & Land Reforms Act and people of the hills and valley are living peacefully" (Source: The People's Chronicle dated 23rd February, 2016, Vol. IV, Issue 164, p.8). "The hills have full constitutional protection under MLR & LR Act, 1960" (Source: Imphal Free Press dated February 23, 2016, Vol. XV/Issue 266 front page).

 

Daan toh kituak geih a 'Manipur Land Revenue & Land Reforms Act, 1960' nuai ah, 'Manipur Hill Areas' humbitna om ahih aleh bel, singtang gam-leitang toh kisai Hausate leh singtang mipite thuneihna bangmah om lou chihna ahi diing hi. Tribal MLAs-te lak ah khat lel leng Chief Minister thugen hilhchian diing a ngetna bawl aom louh ziak un pompih vek uh chihna asuak hi. Thu neu ahi het kei a; CM in a thugen pen thuuktak a ngaihtuah thamching petmah ahi hi. India Daan Bupi, Art. 371C pansan a Hill Areas Committee Order, 1972 dungzui a Hill Areas humbit a om pen lampam singsat a, nuaisiahtak a Innpi a vaihawmtute palzutna ahih baan ah; Manipur Legislative Assembly pikawina leh Hill Areas Committee simmohna ahi peuhmah hi. Bang tupna a hichibang a thugen hi hiam chih HAC Members tengteng in Chief Minister kiang ah hilhchetna anget uh thil dik leh kilawm ahih ngei i lamen tinten hi.

 

August 31, 2015 ni a Manipur Legislative Assembly in Bills Thum nialkalhtu om lou a apaisuaksak uh toh February 22, 2016 ni a Manipur Chief Minister in Assembly a athugen omzia a huaisiatdan kibang geih, akilamdanna himhim bangmah om lou hi. Manipur Sorkar in Singtang mite hon nawmvalh a, gam-leitang amaute deihdan a keeklian deuhdeuh in hon neh hulhul uhi. Tua ziak in, 'Tribal Movement' haatsak semsem thil kul-le-poimoh petmah ahita hi. Tuni in, "The 3 Anti-Tribal Bills' leh 'the 9 Martyrs' toh kisai thubuai aom laitak a hichibang thugen huaisetak mai CM in State Vaihawmna Innpi saangpen mun a agen pen aomden diing ahihtaak ziak in, 'Bawldikna' aom keileh HAC in amohpuakna zou lou lua leh singtang mite humbitna leh muanna diing toh kisai bangmah ngaihsak lou himhim chihna suak diing hi. Huaiziak in, Hill/Tribal Areas akipan teelching a om Tribal Ministers, Parliamentary Secretaries leh MLAs-te in a teelchingtu, mipite theihsiamna diing leh lungtunna di'n hilhchetna apiakpah uh thil kul-le-poimoh ahi. Hill Areas pen MLR & LR Act, 1960 nuai ah Daan bang dungzui a humbit leh kepbit a om ahihleh India Daan Bupi Khenpi 371C leh Hill Areas Committee Order, 1972 nelhsiahna leh palzutna ahi chih achian hi. Manipur Chief Minister in Assembly a athugen pen HAC Members-te in azukkiiksak diing uh kisam hi. Chief Minister, Okram Ibobi Singh in Assembly a athugen toh kisai in; MLR & LR Act, 1960 kichi daan leh thusehte Hill Areas huapsung tengteng a zong kizang hita hiam chih HAC Members-te in mipite mai ah kiteltak a hilhchetna apiak bok diing uh ahi. Aziak bel Assembly a adaih dide ziak un…!!

 

Hill Areas of Manipur huapsung gam-leitang pen Hill Areas Committe Order, 1972 dungzui in Sehkhen Khatna (The First Schedule) ah chiangtak in hiai anuai a bang a gelh in om hi:

 

Hill Areas

(1) Manipur North, Manipur East, Manipur West and Manipur South revenue districts.
(2) Chandel, Chakpikarong and Tengnoupal revenue sub-divisions of the Manipur Central revenue district (Manipur Statehood a dopkang ahih a District kikhendan diktak ahi).


Explanation:- Any reference to a revenue district or revenue sub-division in this schedule shall be construed as a reference to the areas comprised within that district or sub-division, as the case may be, on the 1st day of April, 1972 (Source: Rules of Procedure and Conduct of Business In Manipur Legislative Assembly Ninth Edition, Printed at Manipur Legislative Assembly Press, page 159).

 

Thukhupna:

Salphate luanghawm vui ahihtheihna diing in bel amaute asihna san-le-ziak, akituahpih lungtunna ngah ahih hunhun in lei a siam, lei ah akiiknawn uh thil kilawm him ahi; Tua diing in, 'The 3 Anti-Tribal Bills' toh kisai singtang mite a diing a akituahpih bitna leh muanna, 'Political Solution' detdou, Hill Areas ah aom masak phot diing kisam hi. Akituahpih bitna leh muanna Singtang gam a aom theihna diing in mipite in mohpuakna saangtak kinei chiat ahihlam michih in i phawk a, i pankhawm uh thil kul-le-poimoh takzet ahi, huchia sepsuah teitei ding ahi chih bil ah batchiat ni.

 

Mailam hun hong pai zel diing ah Singtang mite (Tribal Peoples) in ih kalsuan zia ah pilvangtak a mainawt diing kisam pha mahmah hi. Bills thum toh kisai in 'Joint Action Committee Against Anti-Tribal Bills' haat seem a apaitouh zel theihna diing in singtang mi kuapeuh pankhawm hun petmah hi. Thil neu chikchik ah kihihbuai lou in, 'Tribal Common Issues' bang hi hiam chih makaitu tuamtuam leh mipite in zong theichian kilkel a, adetdou kipumkhatna kembit chiat a mainawt diing kisam hi. Pasian muang kawm leh thumna toh kalsuankhawm in, Dialdial in Diamdiam le'ng nikhat ni chiang in lohchinna ngah diing hi hangh…!! Lunglel lou in hanlungchiam ni, 'Tribal Movement' lohchinna diing in nang zong mohpuakna nei na hi chih mangngilh het ken, Lawm aw…. Salphate luanghawm District Hospital Morgue a akikoih ni akipan simtouh a, ni 175 nung chia'n Singtang mite mailam hun ngaihtuah a geel chetchet diing in, "Think Tank for Manipur Tribal Political Future", Intellectuals, 'Issue Based' a ngaihdan kibang, mi bangzah hiam kipawlkhawm a, 'Political Party' khat bawlkhiak hileh tunung a diing in thil hoih leh phatuam ahi ngei diing chih na lungsim ngaihsutna ah aom ka gingta hi...??

 

'The 3 Anti-Tribal Bills' thutunte tengteng apianzia ah "Political Issues" ahi chih haihvual ahi kei hi. Mihing hinkhua, gam-leitang leh neekzonna baan ah sumsinna chihte khempeuh tunkhawm vek ahihman in Manipur singtang mite a diing in patauhna nasatak hon tun ahi hi. Tua ziaktak a Salphate luanghawm tunitan kivuithei ngei lou asuak hi. Hiai buaina pen apianzia a 'political issues' ahihziak in adamsakna zong 'political solution' mah ahi ngeingei diing kisam hi. Adetdou bitna leh muanna Hill Areas ah aom theihna diing in bel "Sustainable Political Solution" aom kiphamoh masa hi. Singtang mite atuam a kivaihawmna kintak a Phualpi Sorkar in apiak kei nilouh aleh bel Salphate luanghawm kivui thei ngei lou diing a; buaina pung deuhdeuh diing abang hi. 'Act East Policy' zong nawngkai phabaan mahmah diing in uphuai hi. Huaiziak in thuneitute in poimohngaih a Bills Thum toh kisai buaina leh salphate luanghawm kilawmtak a vuiliam ahihtheihna diing in, "Political Solution," - Manipur Singtang mite a diing a Kivaihawmna tuam, Phualpi Sorkar in kintak a apiak diing kisam hi.

Read 871 times
Login to post comments