You are here: HomeColumnsR SangaManipur Singtang Mite: Electoral Politics

Manipur Singtang Mite: Electoral Politics

Written by  Dr Sanga R Laingek Published inR-Sanga Thursday, 28 April 2016 00:50
Manipur Singtang Mite: Electoral Politics

Dr Sanga R Laingek

 

Thupatna:

Manipur Singtang Mite ‘Electoral Politics’ paipihdan toh kisai Candidate asawm mite leh ateeltu diing mipite kivelthak chiat kul leh poimoh mahmah diing in uphuai hi. Tulel a singtang mite dinmun haksatak akipan ahaksazaw seem manoh a paitou lellel in, ih mailam hun khomial in hon tuam kimvel lellel ahi chih theihna kichian anei mite a diing in bel dinmun lauthawnghuai ah kiding ahi chih chiamteh gige a pilvangtak a mailam nawt zel ahihtheihna diing a kalsuan kisam takpi hi. Atuam kivaihawmna nuai ah mahni a deihtelna kibawlthei dinmun ah dingthei samta le’ng chihhuai sa mahmah in kum tampi paita akipan tunitan kiphinna chituam tuam, ahun leh mun zil a khawl mai lou in paitou nilouh hi. Singtang mite’n mun-le-mual kichian aneisa hinapi in, anei nai lou mahbang a koih a om in, pu-pa satsa gamleitang tung ah mahni kivaihawmna diing a Daan om sunsunte nasan anei lou bang mai a om; mipi ai-oh Palaite nasan in huai Daan omsunte nangawn nelhsiah leh palzuttu a pang zawsop in, kum 44 vaal zatlouh a koihdap in: ‘Hill Areas Committee Order, 1972’ tunitan mumal lou deuh mai in om zenhouh hi. Melmakte nawmvalh a om leh gamsa lauhuai Gulpiteek ahihke’h Humpinelkai toh kimaituah diing mahbang in, hon nawmvalh ut kisa in, Phaizaang mite kisingsa nasa mahmah mai uhi.

 

Imphal phaizaang bial ah, Scheduled Tribe Demand Committee of Manipur (STDCM) kichi in nasatak a beihpi suah a, ‘Hunger Strike’ ahihke’h sihtanpha a ‘Anngawl Nuakna’ paitouhpih nilouh diing chi in thupukna bawlnawn leuleu uhi. Singtang Gamleitang etlahna ziak mah a dinmun saangtak a omsa nangawn, dinmun niamzaw: Scheduled Tribe a kiakniamsuk mai nasan Meitei-te’n poisase lou in kithalawp tettet zaw uh hidan ahi. Manipur Sorkar in Singtang mite tanpual tampitak, Departments tuamtuam akipan tanvou sehkholhsa tengteng ahi diing bangtak a piak a om himaizenle bel Singtang mite Manipur Sorkar nuai a sepna angah mi 34% vel khawng om diing ahihlai in 10% zong pha zou lou a, thawmhau leh mangbangtak in sorkar nasemte nasan nuaisiahna chiteng niteng in tuaktou nilouh uhi. Departments dang tampi genlouh in khat lel gen le’ng: “Tribal Affairs & Hill Department” nuai ah sepna nei tengteng lak ah, ‘Tribal Employees,’ 5% aphakzoh aleh hoih mahmah hi lel diing hi. Meitei phaizaang mite Scheduled Tribe ah guanlut in om maizenle uh Singtang mite mailam dinmun bangchituk in ahuaise taphet diam aw…!!

 

Election Bangziak a Kiphamoh Hiam?

MipiVaihawmna (Democracies) gam khempeuh ah ahunbi teng in Kitelna om zel sek hi. Gamlian leh mipi tampi omna gamsung khat kivaihawmna toh kisai milip paikhawm a, mi tengteng in Vaihawmna Innpi (Assembly) sung ah ngaihdan genkhawm souhsouh a thilteng a thupukna bawl gige chih lemtang lou kia tham lou in thil om ngei lou leh hithei lou ahihman in, mipite in amau sik-le-tang a palai teelkhia in, Innpi (Assembly) ah, mipi ai-oh teelching a om, Palaite (Peoples’ Representatives) tungtawn in MipiVaihawmna kichi om zel hi. Tuabang kivaihawmna pen mipite’n amau sik-le-tang a gensaktu diing Palai muanhuai teelching a om MLAs-te tungtawn a “MipiVaihawmna” (Democracy) kichi ahi hi. Mipite sik-le-tang a Daan bawl pawlpi lak a pangkha, mipite’n ateelching uh, mikhat peuhpeuh in ahihna diktak, mipi ai-oh ahihna mangngilh mai lou a, ginomtak a amohpuaknate mimal angmasialna leh huaihamna pang lou a asep buchin diing pen thudik omsa ahi hi. Huaiziak in teelching a om, kuapeuh in thudik gum a, gam-le-nam humbitna diing a ahih diing khempeuh asepkhiak a, Innpi sung ah atangkou diing ahi chih thudik omsa pen azuih teitei diing a kul-le-poimoh petmah ahi hi. Singtang mite toh kihetkha Assembly ah Daan bawl pawlpi (MLAs) teng in thupukna abawl diing uh chiang a pilvangtak a enkaithei diing a muanhuai, gam-lenam a diing a mi hangsan huntawk, MipiVaihawmna a Palai poimohtak a pang diing: ‘Candidate’ khat peuhpeuh dinmun bang hi a, amah mimal hinkhua leh ahihna kichiantak a mipite in atheihtel uh kisam petmah hi. Aziak bel mipite palai hi diing a; Innpi a Vaihawmtu ahih diing ziak in kiteelna aom chiang a pilvangtak a ‘voters’-te’n “Vote” khiak diing ahi hi.

 

Kiteelna (Election) aom peuhmah chiang a ateeltu, mipite theih di’a hoih leh chiamtehtuak khenkhat i taklangh diing:

  • Mipi sik-le-tang a Daan bawlsiam diing mi ateelching uh kisam hi.
  • Mipite a di’a phatuam thupukna poimoih bawlthei diing leh sorkar bawltu diing Mi kizen ateelching uh kisam hi.
  • Mipite in pitu hoih sorkar makaitu leh daan bawlsiam mi ateelching uh kisam hi.
  • Mahni angmasial thei hunphet teelching lou diing a mipite in lungsim sia-le-pha theihna siang azatsiam petmah uh kisam hi. 
  • Mi hausa ahihziak leh teeltute (voters) lak ah sum tampi hawmzaakthei huntawk ahih ziak lel a Mipite in ateelching diing uh ahi het kei chih chiamteh diing ahi.
  • Gam-le-nam itna dik leh siangthou anei mi, Mipite in ateelching uh kisam hi.
  • Mipite in thudik gum ngam leh kembit thei mi ateelching uh kisam hi.

 

MipiVaihawm Di’a Palai Teel Hun Chiang A Thilhih Chiamtehtuak Tawmnou:

  • Mi piching kuapeuh in mimal deihna dungzui a Palai a kiteeltheih diing uh ahi. Hiai omzia bel michih in ‘Vote’ khat geih nei ahihman in a manphatdan kibang vek hi.
  • Candidate khat peuhpeuh in zalentak a Election atuh (Election Contest) theih ngeingei diing ahi; huchia ateeltu kuapeuh in adeihtelna uh sia-le-pha theihna siang diktak a azat chiat uh kisam hi. Tuabang ahihchiang in MipiVaihawmna (Democracy) kichithei pan lel hi. 
  • Mipite in adeihpen uh teelching ahih uh kisam hi. Mipi tamzawte deihlouh pen teelching chihdan a omthei ahih mawk ziak in; MipiVaihawmna ahih diing kisam hi.
  • Mipite in amau deihpentak ateel chiat theihna diing ua Kiteelna pen zalentak leh siangthou baan ah, Kiteelna saitute in diktak a avaisai ngeingei diing uh kisam hi.

 

Manipur Singtang Gam (Hill Areas) Huapsung Kiteelna Paizia:

Ahunbi ahong tun chiang in Manipur Phaizaang a kiteelna aom zel mahbang in, Manipur Hill Areas (Singtang Gam) huapsung teng ah zong kiteelna om zel sam mahleh chik akipan hiam in mipite’n adeihpen uh teelching ngei ngel lou uh abang maimah hi. Bangziak hiam chihleh, thautawi mi tam lua, mi nautang in a dikna uh azat diing uh bangtak a zatsak a om lou in, vaulau leh ‘vote’ khiak hun chiang a hawlmang a om pawl, mahni ‘vote’ nasan khethei lou a koih a om uh ahi chih kizamun petmah hi. Hichibang chiindan pen Daan toh kituak lou leh thildik lou ahi chih bel tangpi-tangta theihsa ahi. Kiteelna pen ahoihna leh asiatna bel om veve diing in a gintakhuai hi. Kitaitehna khat (Political Competition) aom pen thilhoih ahi diam chih ngaihtuah takzet diing kisam hi. Ahoihnate (Merits) leh Hoihlouhnate (Demerits) hiai bang in i taklangh diing:

 

Ahoihlouhnate (Demerits):

  • Vengsung ahihke’h insak-inkhang kal ah Kiteelna (Election) in kituahlouhna leh kituamhuina apiangsak hi.
  • Political parties tuamtuam leh heutute lak ah dikloutak a khat-le-khat kal a kingohtuahna apiang naknak sek hi.
  • Kiteelnate (Elections) aom peuhmah chiang in vualzoh utna leh deihna ziak in parties leh candidates-te in kikhemna thanghuai vanzat in anei zel sek uhi. 
  • Hiaibang kitaitehna thanghuai ah gam-le-nam a di’a nahoih asemnuam mi khenkhatte atuaklut nuam kei naknak uhi.

 

Ahoihnate (Merits):

  • India Daan Bupi bawltute’n hiai bang thil haksa om diing ahihlam athei mahmah uhi. Hinapi in mailam hun hong tung zel diing ah zalentak a kiteelna nei in kitaitehna hun a makaitu teel diing deihteel in anei veve uhi. Hichibang kiteelna paizia pen hun hong pai zel galdot in hoihzaw ngeingei diing ahi chih amuhkholh ziak uh ahi hi.
  • Lamkhat a gen in political leaders-te apilsiamna uh ahihke’h a dinmun uh diktak mipite lak ah hong kiphoukhia ahihman in amaute nungchang theihchetna hon pia hi. Tua ahihman in, amaute kipahman piakzom zeltuak hi hia, hi lou, chih leh gawtna piaktuak hi uh hi hiam chih mipite in thutanna bawlkhumthei pahpah uhi.
  • Thuneihna kia lel deihna ziak a kithalawp petmah a teelching a ana om kha zenzen hitale zong mipi a diing a phatuamngaihna toh seem diing a phutluih in aom hi.
  • Kitaitehna ahihke’h kichouna, kilangkhenna huaisetak piang sek mahleh atawpna bel mipite a diing a nasem diing in phutluih in heutute leh political parties khempeuh om veve uhi. 

 


India Ah Election (Kiteelna) Bangchi A Vaisai Hi Hiam?

India ah Kiteelna (Election) vaisaidan paizia akibat vek diing chih ahi. Himahleh, akibang het kei chih bel tangpi-tangta theih ahi hi. State tuamtuam ah Kiteelna aom chiang in ‘Vote’ nei lou nangawn in ‘Vote’ khia in Kiteelna ah hahpan thei petmah uhi. Mimal ‘Vote’ nei khenkhatte lah amau ‘Vote’ nangawn khethei lou a koih in om leuleu uhi. Kiteelna Buktate thagum-thatang leh thahatna a manchibilh in (Booth Captured): Daan kalh ahihlam phawk kawmkawm in mi tam lou pangkhawm in ‘Ballot Papers’ sun ziahziah pawl om veu sek uhi.

 

Tangpi thu a gen in, koimun peuh ah MPs; MLAs & MDCs - Kiteelna aom chiang in adik/dik lou chih pen ngaihtuah pha lou a, ngawngtat mi lah bei lou, thil kilawm, kilawm lou chih himhim ngaihtuah lou mawngmawng, chintheihna diing ahih peuhleh hihsuk miahmiah pen ‘Candidate(s)’ kimkhatte deihdan leh gamtatdan ahi utviau sek hi. Hichibang chiindan pen thilhoih loutak ahi: Kimelmakna, kimuhdahna, kihuatna, kituambawlna, innsak-innkhang kingeu-etna, unau kal kituahlouhna leh khat-le-khat kingeihlouhna bulpi ahi naknak hi. “Mun khenkhat ah ahihleh kilawmtak leh diktak a Kiteelna vaisai in om thei veve hi.” Hiai bang chiindan hoih in mun anei tawm lua a, thilkhawktak ahi. A teeltute – Mipilam kivelthak kul-le-poimoh ahi chih ‘Vote’ neithei chiang in bel ngaihtuah vengveng hun ahita hi.

 

India gamsung mun khenkhat ah Kiteelna kilawmtak leh siangthoutak a zoh in om mahleh, mun dang khenkhat leuleu ah bel huhamtak a kithahna tanpha tungthei thepthup hi. Tua ahihman in Manipur State ah Kiteelna aom chiang in MipiVaihawmna chih pen amin maimai asuak kha sek hi. Mipi ai-oh di’a teelching a om (i.e., MPs., MLAs., MDCs) mite pen ateelchingtu, mipite sik-le-tang a gensaktu ahihke’h palai hihna naa sembuching diing a muang mahmah a teelching a aom ni ua kipan mohpuakna liantak aliangkou uah kinga ahita hi. Daan Bawltu (Legislators) diing a teelching a om uh ahi chih kiteltak a theichian a, mipite in Kiteelna aom peuhpeuh chiang a mahni mimal deihtelna, sia-le-pha theihna siang toh a teel diing uh kisam hi.

 

Banghang hiam chihleh:

  • Manipur ah atuam kivaihawmna bulpat ahihtheihna diing in India Daan Bupi Sehkhen 371C-na pansan a India President, (Phamsa) V V Giri in 20th June, 1972 ni a tangpi-tangta theih di’a Parliament a apuankhiak: “Hill Areas Committee Order, 1972” pen ahi bangbang a zui dia lungsim a kimanna anei, Singtang mi MLAs 12 beek mipite’n Manipur Innpi ah Palai a sawllut diing uh kisam hi.
  • August 31, 2015 ni in Manipur Legislative Assembly (Innpi) ah “The 3 Anti-Tribal Bills” Passed in om hi. Hiai 3 Bills pen tunitan zatlouh a aom lai ziak a nuakna nasatak sunzom diing a lungsim a kimanna nei a kisakhol chiat diing in, ‘The Joint Committee on Inner Line Permit System’ (JCILPS) in a mipite uh kiang ah April 18, 2016 ni in chialna thupitak Imphal pansan tualsung thukizakna tungtawn in bawl hi (Source: The Sangai Express).
  • ‘The 3 Anti-Tribal Bills’ Innpi ah August 28, 2015 ni a puaklut (introduced) a om; Tribal MLAs tengteng in hiai Bills thum August 31, 2015 ni a Assembly ah, Passed ahihma in, ‘Hill Areas Committee ah piaklut in om masa phot hen’ achithei dinmun a mipite dopsang a om leh mohpuakna anei, Tribal MLAs mi khat beek in bangziak a genkhe tel lou hi hiam? Daan poimohtak leh singtang mite a diing a huaise petmah: “The 3 Anti-Tribal Bills” lemsakpih maimah mite, mailam hun hong tung zel diing ah zong mipite’n teelching zel bang hi le’ng Manipur Singtang mite, abiiktak in, Zosuante mabaan ‘Politics’ dinmun bang achita phet diam aw…!! Lungliaphuai petmah asuak hi. 
  • MipiVaihawmna (Democracy) ah bel mipite deihtelna ah kinga lian mahmah mai a, himahleh thahatna tuamtuam, gamnuaimi ahihke’h sesum thahatna bang, thagum-thatang hatna bang, guktaakna bang, hithei-himoh a dikloutak a hih chihte Zosuante lak ah genphak in om keileh MipiVaihawmna diktak eite lak ah om thei diing in lamethuai hi.
  • Manipur Singtang Mite: Electoral Politics paizia suikiik diing tampi om mahleh suiseng lou, genseng lou leh gelh vek zou lou diing i hihman in, tuni a hiai thulu a nei a tam lou i gelhna ziak pipen ahihleh, ‘Mipite in mahni sia-le-pha theihna siang’ zangthei chiat in, Kiteelna aom peuhmah chiang a mipite makhua khual taktak, mahni kimangngilh khop a gam-le-nam itna dik a it, palai ginom leh muanhuai teelching diing ahi chih theichian mahmah a, mipite kihanchiam in, pilvangtak a eimah mimal ‘Vote’ kia lel khiaktheih ahi chih pom kichian in zuichiat thei le’ng chih deihna ziak liuliau a hiai, ‘Article’ gelh ahi hi.
Read 579 times
Login to post comments