You are here: HomeColumnsR SangaManipur Singtang Mite: Electoral Politics - II

Manipur Singtang Mite: Electoral Politics - II

Written by  Dr Sanga R Laingek Published inR-Sanga Thursday, 21 July 2016 01:06
Manipur Singtang Mite: Electoral Politics - II

Dr Sanga R Laingek

 

Thupatna:

Manipur Singtang Mite: ‘Electoral Politics’ chih thulu a nei in sehkhen khatna Social Network (ZogamOnline.com & Zogam.com) baan ah niteng thukizakna, The Lamka Post ah April 29, 2016 ni in hong suak hi. Asimnuam kuapeuh simtheih diing deihsakna lianpi toh tuni a hiai thu poimohtak; “Manipur Singtang Mite: Electoral Politics” chih thulu a nei in sehkhen nihna suahkhiak thilhoih leh phatuam ahih ngei i lamen hi. MipiVaihawmna (Democracy) ah bel mipite mah poimoh masapen ahi uh chih thudik omsa ahi; mipite in Palai hihna nasep seem buching diing a MPs., MLAs., MDCs chihte tengteng muang mahmah a ateelching uh ahih toh kiton in sep-le-bawl kong bangkim ah agenna mun-le-hun, sepna mun-le-hun chihte ah mipite hoihna diing khualna ziak a minsiatpih ngam Palai ahih diing uh kisam hi.

 

Electoral Politics i chih chiang in ‘Kiteelna’ ahihke’h ei-pau kammal mahbang a kizang chiat in ‘Election’ chih kammal tualleng peuhmah hi. Tu’n zong ahong tung diing - kumthak, February/March, 2017…? galdot a kisingsa, Manipur Singtang Mite lak ah mi bangzah hiam om ngei diing un gintakhuai hi. Huchibang a kisingsa leh kisakkholhna nasatak nei a, sum-le-pai tam huntawk seeng ngap a ‘Kitelna’ maituah di’a lungsim a kimanna anei mite in: “Bang pentak seem a, bawl utna nei hi uhiam…” chih pen ngaihsuthuai asuak hi. Mipite in lametna saangtak nei a, amaute tanpual diing: India Daan Bupi sung a kigelh mipite hamphatna ngahthei takpi diing a alametna uh buchingsak thei ngei diing leh gensaktu di’a muanhuai asak uh ziak a, Candidate kua hiam in ‘Election Contest’ ahi chih chetna mipite in muhtheih bang om hi hiam chih pen thil poimohtak ahi.

 

Manipur Singtang Mite Dinmun:

Nagate Political dinmun suitham aching hi. Hun paisa saupi gen lou in, 1997 akipan tunitan Indo-Naga Frame Work Agreement August 3, 2015 ni a letme (signed) bawl ahihnung siah Indo-Naga Political Dialogue, kihouna tatsat lou in paitou zel a; “share sovereignty” chih kammal nih ziak in Meeiteite lungsim ngaihsutna buaisak petmah hi. Arunachal Pradesh, Assam leh Manipur states sung ah Naga hunkhop teeng uh ahihman in, hiai State thum teng tulel dinmun a gamgi (boundaries) hihlamdang lou a, amaute kivaihawmna khat nuai ah koihkhawm taakdih phot a; tunung chiang a Nagaland State nuai a aomkhawm vek theihna diing uh buaipih pipen a nei ahi uhi. Huaiziak a ‘Frame Work Agreement’ pen ngenteltak a bawl ahi a, athu tuun kim sipsip a puankhiak in om lou a, puankhiak in zong om bok lou diing hi. Banghang hiam chihleh, zat ahih toh kiton a athu tuunte ataktak (practical) a zuihtouh kawmkawm diing chihdan hihtuak hi. Tua ahihman a mi tamtak in gintak haksa sa mahmah, thil hithei di’a gingta thei lou, muangmoh chiat in om uhi. Phualpi Sorkar in hiai ‘Agreement’ abawlna ah, “Naga Unique History” theihpihna abawl in omzia nei mahmah ahihlam phawkthak chiat diing in ahoih hi.

 

Tulel dinmun a Manipur State huamsung, Hill Areas District 5 (nga) lak ah District 4 (li) ah Nagate’n tampen hihna nei uh ahihman in ‘Indo-Naga frame work agreement’ huangsung ah huamsak in om a, himahleh Hill District 1 (khat) huam kha lou hi. Hill Districts 4 (li) sung a teengkhawm mite pen Naga kia hi lou in, singtang mi zaat tuamtuam zong om sam uhi. Kivaihawmna tuam chikhat tunung sawt lou a Phualpi Sorkar in a lemsakpih ngei gintakhuai ahihman in, hiai district li huapsung a singtang mi tengteng in hamphatpih ngei diing un mukholh theih in om hi. ‘Indo-Naga frame work agreement’ in ahuamkhak louh hill district khat pen bang dinmun geih a omta diing hi hiam chih mi piching, ngaihtuahna sia-le-pha theihna siang toh thuuktak a ngaihsuthuai petmah asuak hi.

 

Manipur Hill District 4 (li) huapsung a singtang miteng huap a kivaihawmna tuam, state gamgi bel khek lamdang tuan nai lou a, atuam vilvel kivaihawmna lah hi ngal si; Manipur Sorkar in vaihawmkhum lua nawn het lou a kum bangzah hiam aom khitchiang in bel ataktak a ‘frame work agreement’ thu tuun poimoh tak mai, ‘KIVAIHAWMNA TUAM’ zat leh zuih in hong om ngei diing in muhkholh theih in om hi.

 

Manipur Hill District 5 lak ah Churachandpur District kichi khat om hi. Alompi deuh a gen in Zomi/Mizo/Kuki/Chin/Hmar akichite tenkhawmna munpi zong ahi lai hi. Amaute Political dinmun delthawng lua ahihlam amaute mah in thuuktak a ngaihsun uh hi hia/hi lou chih pen tu hun a lungsim ngaihsutna hon chou mahmah khat ahi hi. Banghang hiam chihleh, Manipur Hill District 4 huapsung bel Naga huzapna nuai ah tunung sawt lou in atuam kivaihawmna khat nuai ah koih in ahong om ngei diing a, huai huntak chiang in Churachandpur District kichi pen bang dinmun ah om diing hi hiam chih tu hun a hiai District sung a mite in geelfel pah ahih keileh, thil kikhelthei ahi chih Nam Heutute leh Civil Society/Organization tuamtuam a Heutute in zong ngenteltak a ngaihtuahna piak hun laitak ahi hi. Churachandpur District huapsung kia ah: Zomi khazap nuai ah nam tuamtuam 9 kigawm uh a, milip nuai nih vaal khawng phazou diing in uphuai hi; Hmar milip singnga-le-sangnga vel khawng hi diing a, Kuki kichite pen sing-nga vel khawng hi diing in uphuai hi….

 

Electoral Politics:

Village Authorities, District Councils, Members of Legislative Assembly leh Members of Parliament kitelnate toh kisai i gen chiang in, ‘Electoral Politics’ chihdan a ei pau mahbang a gen in om sek hi. Kum nga hal a MDCs, MLAs & MPs Kitelna om zel ahih toh kiton in Manipur State ah February/March, 2017 in MLAs kitelna om diing a gintak ahi. India pen MipiVaihawmna (Demogracy) ahi chih milip in i theichiat uhi. MipiVaihawmna ah bel Kitelna (Election) alou thei lou ahi a; teelching a om mite pen mipi ai-oh a Daan Bawl Pawlpi (Legislature) ahihna ah amohpuakna uh gol in lian petmah hi. Mipite leh Gam-leitang kepbitna toh kisai bang, Gam-le-Nam humbitna toh kisai leh Singtang mite tanpual, India Daan Bupi sung a kigelhte bangbang a sep-le-bawl in aom hia/om lou chih enkaitu di’a teelching ahihna uah, abohsetu hi mai lou a, Daan omsate kembittu zong ahih diing uh kisam hi.

 

A kul leh poimoh bang dungzui a Inpi ah mipite ai-oh a Daan Thak abawltu di’a teelching a om uh ahihna ah, Daan siam hi kei mahle uh Daan theimi bang a ngaih ahi lai uhi. Dinmun saangtak luah a vaihawmna Inpi sung ah Palai nasemtu ahihna uh mangngilh mai lou a, mipite toh kiton a mailam nawt diing ahihlam chiamtehtuak lua khat ahi hi. Mahni angmasial thei lel mipite’n teelching khaak diing lauhuai lua ahihman in pilvantuak petmah ahi hi. Mi tamtak in MLAs Kitelna genkhak a aom chiang in lungsim tawng ah pannalam neisa leh deihtelna aneihsa pen uh Sumkuang chiangkeih a pang trentran in, mimal hamphatna diing lel ngaihsutna a nei mite in midangte dem zialzial khawksa het lou pawl zong pumdim sek hi. Eite dinmun delthawng lua ahihdan leh mailam hun ah bang thil hong tung diing hi hiam chih lunggeel a neih hun laitak ahi chih phawk chiat a, Kitelna maituah diing kisam hi.

 

Mipi saang tampite sik-le-tang a Sorkar mai a thugentu, Daan bawltu, vaihawmtu leh makaitu hihna nei leh mohpuakna piak a om MLAs dinmun pen nelhsiah vual hi lou hi. Dinmun saangtak ah mipite deihsakna ziak a dopsang a om leh mipite nasemtu di’a kipia uh ahi chih – teelching ahong hihnung ua atak a semkhe thei diing in chihtakna, hangsanna, ginomna, thudik gup ngamna leh sabiak limsak mi ahih uh thil hoih leh kilawm ahi hi. Huchi hi lou a, sum-le-pai deihtakna ziak hiam, dinmun it luatna ziak hiam khawng a mipite phatsan leh gam zuaktu a pang maimah hiam ahih un bel khovel a mi hehpihhuai penpen ahizaw diing uhi.

 

Thukhupna:

  1. Electoral Politics toh kisai in mimal deihtelna, sia-le-pha theihna siang zangthei chiat diing in Pasian in hon vualzawlta hen.
  2. Mipite in deihtelna i neih leh i tanpual zatdan ah siamnel mahmah le’ng gam leh i minam a diing in khangsawn nawnsawnte a diing a Kitelna aom hun chiang in kizuakmang mai lou in ginomna toh kithuah chihtaktak in pang chiat ni, huchia suangphum hoih i phumtheihna diing in Pasian kiang ah thumna toh pang in ngen ni.
  3. Atuam Kivaihawmna chikhat deihhuai ahi chih singtang mite lungsim ngaihsutna ah athuklut in a deihhuai petmah hi. Nelhsiah a om, singtang mite pankhawmna diing a malatu leh mapang thei diing mite mipite’n vawkkhiak leh teelching in om theileh lohchinna bul ahih ngei i lamen hi.
  4. Neekzonna leh Siamsinna toh kisai lemgeel siam mi leh ahi diing bangtak a semtu diing; abulpi a thil poimoh dangdang khenkhatte – Lamlian, Tuidawn kiningching, Meivak ahihke’h Khantouhna chituam tuam thil omsa sepkhiak mai diing tampite nasan nelhsiah ahihnawn louh a diktatna toh asem diing mite mipite’n i teelching theihna diing un thumna toh pang in ngen ngutngut ni. 
  5. Manipur Legislative Assembly huangsung ah Hill Areas Committee Order, 1972 semsuah thei diing mite tuni a Manipur Singtang mite kiphatmoh pipen ahi chih chiamteh tham ahi. 
  6. Manipur Singtang mite dinmun delthawng lua ahihdan lungsim tawng a vei taktak mi pen mipite in i kiphatmoh uh ahi bok hi.
  7. Mailam hun ah ‘Political Decision’ – Kivaihawmna toh kisai thupukna mumaltak bawlthei diing mi ginom leh mi chitak, mengmuhna kichian anei mi, mipite taaksap leh kiphatmoh ahihman in Pasian kiang ah ngen in tawp lou in thum ni…!! Manipur Hill District 4 + 1 = 5, tunung sawt lou chiang in bang dinmun ah aom dia, thupukna bawlsiam kisam petmah hita lou hiam hon chisak pha mahmah hi.

 

RELATED

Manipur Singtang Mite: Electoral Politics

 

Read 592 times
Login to post comments