You are here: HomeColumnsSingngat SpecialKa Gelh Utlouhte Ngen - III

Ka Gelh Utlouhte Ngen - III

Written by  V L Mangzou Published inSingngat Special Tuesday, 06 August 2013 15:14
Ka Gelh Utlouhte Ngen - III

By ~ V L  Mangzou

“Tengkol khawng chu lian pipi hi henla, tawpkhiak zawng in dokdawn chiahchiah khawng in dangtong hon deng dop mai leh”
- U Lamzamuan

Eimite’n paunak hi hial kei mahleh thugen minthang i neih uh nalh mahmah khat chu ‘Tengkol a tui lai in tui sih, a tui louh lai in tui’ chih ahi. Ngaihtuah zual in chu gen neilou tawh kibang a, nuihzat-huai pi suak hi. ‘Tengkol in tuui a neih lai in a lim (tui) kei a, tuui a neihlouh lai in a lim’ chihna hizaw hi. Ka neu lai a tengkol duh ing a ka pichin nung a ka duh nawnkei leh ka Nu’n, “Tengkol lah tawpsak ngaih laiteng ne ut, mahni a kitawptheih tak a ne utlou” hon chi a, “Kikhop lah puak ngaih laiteng ut, mahni a kikhoptheih tak a kikhop thadah” hon chih behlap lai hi. Nalh vanglak. Tengkol chu a duhte’ adi’n lim mah inteh. Hileleng, a tuui a nekkhak chiang un zaw a men hial uh eihkha. Huchibang deuh in, thil himhim a guk a i hihsung nuam a bang na a, theihkhiak a ahong om a i hong mualphou zet chiang in zaw a nuam liai kei, a chi uh.

Atung a kigen dandeuh English te’n leng ana nei tei ringot uhi – ‘Left is Right and Right is Wrong’. Veilam chu taklam ahi a, a dik lah diklou ahi zel. Class X ka sim lai ua English poetry a ka simkhak hi in ka thei. A paidan chiangtak in genthei nawnkei mahle’ng khawpi a lampi zuihdan tawh kisai hileh kilawm hi. Eilamte’n leng gari a i tai chiang hiam, mihing leh mihing i kipelh chiang himhim in leng veilam tawn in i kipel uhi. Huaiziak in veilam kha taklam hilou in a diklam (left is right) ahi a, taklam chu diklou (right is wrong) ahi, chidan e. Khatvei, a awngna munmun ah chi a IB Road pentouh na bul a ka gari ka koih mawk leh Traffic Police khat in whistle hon mutkhum nilouh. Ke’n a omzia theilou, ka dot leh ka gari park-na diklou ana hi. A toutai hi’ng a right is wrong lam a va park kha, left is right lam a ka park ding hi a. Hehe.

Khatvei lah ka helmet (BSF te’ a ngat) khu mangngilh kha, Police Station kong a Traffic Police in hon na man. Hihkhial ka hih miau chiang a, kei huai ka hi, huchi-khachi chih leng nuam chiahlou, Police Station a hon hawllut inchin, kichai. Huchibang in, Police leh Lis-lou leng traffic rules in khentuam tuanlou hi. Himahleh, mi khenkhat bel check theihlouh ding hileh kilawm khop in ki om a huai in Dan enkoltute’ adi’n nawngkaina tunsek hi. Zanlam zek in leng vengkhat ah, traffic drive neih ziak in kiselbuaina piang a, a thu naktak a vekse pawl om in mipi leh Police kar buaihuai thei ding dinmun khop in om man hi. Police lam leng dikvek kei unteh, ahi a, mipi lam in engtat leh Dan kibawlte zuihlouh teitei tupna nei hilehang kilawm hi. Huaite nengneng in Police leh mipi’ kar a kizopna suse thei ahihman in akoilam peuh leng pilvan mahmah poimawh hi.

Police – Public Relation tawh kisai, nikumlam in leng 2/3 vei ka na gelh ngeita hi. Huaite kha, Police ka hih ziak a Police-te gum a gelh ka hi tuankei a, keimah mimal’ ngaihdan gelh ka hizaw hi. Ka chihsek bang in Lamka Police-te’ PRO ka hi laizang kei a, officer leng ka hikei. Police-te’ Public Relation Constable leng ka hi zenzen kei! Ngaihkhawk-huai ka sakzawk chu thil neuchik ah leng Police Station buluh chih i thangsak mahmah mawk ua, phaijangmite apat sinlai i lak tengteng lak ua hoihloupen leh haihuaipen hidi’n ka gingta. Nidang in, Singngat khua a kat munluat ziak in patau dak kizamun mahmah a, taangdak kikhen ging lomlom zel hi. Tulai in bel electric khuam khetging peuh in i patau maimah uhi. Patauhna patauh-huai loupen pawl hi’nteh.

Khuga Dam video clip ziak a mipite, lungtang tong apat lungkimlouhna tawh thangpai a i om lai un, vanzat tuamdeuh zang a betdaih poimawh sakna ka neih ziak in mipite’ lungsim heikoi na ding leh tawldamzaw a omtheih na ding ngaihtuahna in Sian Siamlouh Ngaihnou chih tangthu ka hon phorhkhia a, ahuntak a ahong kisuahkhiak ziak in kipahhuai ka sa a, phatuam in leng ka thei hi. Simtute apat thukup tampi ka za a, theih ngeilouh bangzah hiam apat in leng phone call ka dong nolhnolh mai. “Khuppol ka hikei na a Nenem ka ngailaw mawk ka chi, khatvei beek a inn uah hon va hawhpih dih, ka mu ut himhim” chi tawh, “Singngat te Nenem ka thei ngeikei na e” chi tawh ana buai mahmah pawl ki om hial hi. Nenem chu min phuahtawm hiven Zamzanem leng hithei, Thangnem, Nemngem, Nemzarual, Nemmuanching, Ngaizanem, Nemthriang, Nemngaihching chih khawng leng hithei aka.

Young Paite Association, General Headquarters in tuailaite’ kicheidan ding leh gamtat-khawhei tawh kisai a akilawmlou luate etkai ding thu ahon vawkkhiak uh kipahhuai mahmah napi in, huchitan hial khop a panlak a ngaih kha poi mahmah hi. I tanu te inn apat niik-siinglua tawh a pawtkhiak uh a nalhlouh lam i theihlouh hang in mi’ tanu te’ a bel kilawmlah sa hilehang kilawm maw? Ka gen omzia chu eimah inkuan/tate chiat etkai masak kisam chihthu. Hiai tungtang khauhtak a paipih ahih leh phatuam mahmah ding hi. Himahleh, YPA kia’ zawhvual ding hilou ahihman in YPA loudeuh te’n a kithuahpih kei mawk uleh bel a hoihna sang in a hoihlouhna lianzaw ding a, khat-le-khat kitauhtuahna mai hilou in Veng leh Khua, Beh leh Phung, Chi leh Nam tan a kinawkna hon tun kha thei hi. Huaiziak in, sepkhiak taktak ahihma a akua-akua chih omlou a kimin dimdem hoih ding hi. Mi neizou leh milian leh lal te’ tanu te’ niik leng siing teitei tuanlou di’n pan la lehang maw.

Khuga Dam honkhiak ahih nungzek in Pathianni khat ka lawmte tawh ka va hawhkha uhi. Gate bul a hotel om hiven, huai a tukawm a theitui (?) ka dawn uleh, nungak-tangval ahong taitung zungzung ua, hotel a lut-le-pawt kihelh in, a duhzawng uh lei in mun fianrial lam manawh souhsouh uhi. Khaih, i tate khawng leng ahong tel hial kei umaw? ka chikhe hial a. Ataktak in bel, nungak-nou leh tangval-nou tamzaw uhi. Ka lawmte khat in, “Huai gal a mual khawng kha kilukna mual eihkha” chitop mai hi. Ngaloi lam bel ka hawhkha ngeikei. Huailam leng a theite’n gen ding a hau mahmah uhi. I gam a mun nuam leh thawveng om sunsun te, hun awl nuamtak a zat na ding hiam inkuan a kisuk-harh na ding mun a zang-ut te’ a dia leng phakngam na ding hilou khop a bawlhlawh a gen in om hi. Huchibang mun te mi’n sum luahlutna dia a zat lai un eiloi in siatpih ding phet in i nei uhi. Huaiziak in, a enkaitu kichiantak om henla puahpha taktak lehang deihhuai mahmah hi.

A lamdang mahmah khat chu Khuga Dam vengtu ding a sepaih huaizah zouzai om ua, Guest House hoihtak a kibawl bang kikhense dimdem. Eh lamdang kei thak, mi chance mu khawng peuh ana buaipih khop hiding hive un. Zi leh pasal a kinei hilou a di’n nu leh pa bang a kipolh chu koimun peuh hileleng thildik ahikei. Hileleng, huchi ding thouthou chu, innsung hiam, hotel hiam zang hiau mai le uh kuamah mualphou khollou ding uhi. Huan, mi piching nih in amau’ lemsakna omtuak a nu-pa bang a a omkhawm uleh amau’ thu ahih na chiang om hi. Bangteng hileh, i khawtang in huchibang te mawhpaih i hihman in thuhilh bel kilawm a, sukmualphou a zahlaktak a koih na ding pentak chu kuama’n thuneihna kitawi lou hi. Huchibang ahihziak in, hun paisa a thiltung khenkhat in mipi’ lungtang suna in, miteng thangpai in, kuapeuh in mawhpaih in buaina namenlou pian khawlawh hi.

Ahihleh, June 30, 2013 a Lamka Police Station a buaina kha poimawh mah hi in i ngaihtuah uhia? Liamna mai hilou, sihna tanpha tuakte ka suunpih in poi ka sakpih mahmah hi. Hileleng, kei’ ngaihdan in chu huai buaina kha poimawh ka sakei. Tulaitak in i district hon enkoltu officer feltaktak, eite’ thuaknat bang a hon thuaknat pih thei i neikha ua, huchi’n khutkha (khutkhial hilou) te matkhiak in om ua, a kituahpih bang gawtna maituah ding a khum in om uhi. Mankhe zoulou tel hile uh bel ‘a nawhna’ a kap (inject) theih mah ahi. Huchi hilou a, matkhiak a a omnung ua va buluh teitei chu mi’ nahoih sepkhiak sunsun, minhoih a ngah ding sunsun uh bangmahlou suahsak kihizaw hi. Eiloi in, mipi’ vaihawmna, mipi’ thuneihna gam a om chi in i rights uh i thei vur ua, i duty uh bel i thei kholkei zel uhi. I theih ding ua poimawh chu, mi hoihlou tawp leng, misual tawp leng, bangteng hihkhial in tualthat hihial leleng a lubuk humna ding omsun chu Dan nuai ah ahi. Huaiziak eivoi gari a mi phukha khawng a om chiang a driver in Police Post naipen a delh vengveng a ava kipiakkhiak sek.

Eilak ah buaina neuchik a om chiang in leng, thulianpi suahsak i siam uhi. Mi khenkhat adia i khawtaang a buaina houchik-chik khawng bang leng pump-vah deuh a kisuklarna hoihtak, public leader kichite’ adia minsekna chance hileh kilawm in i kifuihporh sek uh abang hi. Mimal leh pawl tuamtuam te’ phatuamngaihna leh kipiakzawhna ka muhmaih ahi zenzen kei. Hileleng, thil khenkhat nepdeuh a paithei zenpi leng a poimawhlou tan a vawksia pawl ki om ahi diam chih in om a, huai lampang ah adiak in, heutute a pilvan uh poimawh ka sa. Huan, mimal khenkhat bang leng thuvekdan pilvanglah kitamlua hi. Tuma a buaina tawh kisai a liamkhate bang Salpha peuh chi, Zomi sisan a mawk a luang chihpeuh a tangkoupih hang a, Zomi/Zogam vai tawh a kisaikhakna lah om kholkei leh kilawm. Mi huaizah lak a amau a liamkhak sese uh Vangtah uh himailou hia, amau lah a hahpanpen, a matawng a va pangte hi khollou ding ua? Police Station kim-le-kiang lak a Bihari coolie hon, vai dawrkaite khawng liamkha hile uh bang min i khusak ding ua aw? chih khawng ka ngaihtuah maimai a.

Thukhawnung, a khingsa hon phorhthak sawm ka hikei a ka na muhdan leh huai tungtawn a sinlai, maban a hoihzaw ding bang a om a chih hon taklang ut ka hizaw hi. Khuga Dam issue ah mipi’ ngaihdan a mi suzahlaktute kha mawh a mawh petmah uh, a va takhial mi 2 te leh buaina bawltute kha siamtanhuai uh hileh kilawm in kilang hi. I zatkhelh veu uh khat chu i lak a thil deihhuai lou a tun chiang in mawhpaih a omte’ inn halsak ahi. Inn in bang ana hihkhial ahia? Heutute’ panlakna ziak in sihna leh liamna tuakte’n sorkar apat sum a huhna (exgratia/financial assistance) mu ding hile uh kilawm a kipahhuai mahmah hi. Mata a accused (ngoh a om) te’ inn halsawm ahihlai in a sung ah naupang khat ana om a, a khe kangliam hi. Kar 2 vel nung a ka va phakkhak in leng zun-le-ek nawnsak ngai in omlai hi. Huai naupang lungmawl milmel, thil omzia hilh lehang leng theisiam lou ding pi khat in ana thuak tei ringot na ding thu om hia? Amah leng huai issue a liamkha hithou hiven sum a huhna a mu saam diam? Huhna sum hong pai taktak leh a saisuahtu kituh in, nek-hek in a om guigui diam? Ngaihtuah ngai a tam telmai!

Hun hong pai zel ding ah Police leh mipi’ kar ah kinawktuahna, buaina a omkei ding chihtheih hilou hi. Huaiziak in i theih ding ua poimawh chu, Police te lak ah leng discipline loose deuh, training min zou taktak lou tamtak om uh a, thukhel leh control hak pipi tam uhi. Huaiziak in, buaina mun ah amau leng a lubuk uh a hum uh a ngaihton om ahihman in a khut ua om (meithal) hon zangkha guih thei uh a, a tang in hon kha leh kikhel mai ding ahihman in thautang kha lauhdeuh mai hoih leh kilawm hi. Ka ngaihtuahna a om mahmah chu, inn kihal pen bang kangtum dimdem henla, Police Station bang leng kangtum sipsip leh mipi’ kiphinna lawhching in thupi i sa d’uam? Police Station buluh ding a kisa mipi 5000 vual lak ah, zanlam zek a Police Constable kilakna a chin teitei sawm a sum sung toihtoih, inn-le-lou chaan ngam khop a lut teitei sawm bangzah a telkha ding ua aw? Police hong pang uh henla, huchibang buaina hon maituah le uh bangchi’n pan a la ding ua aw? Ka gennop zawk chu Police leh mipi’ kizopna hoihtak a omkei mawk a, ei-le-ei i kitauhtuah nilouh leh tunung chiang in, i deihlouh uh, i lauh uh, i huat mahmah uh Police Commando te kha, ei mahmah in samlut ding i hi ve ua!

Atawpna di’n ka gen utlouh khat k’on gen lai ding. Pangei a ka training lai un campus pawlam a eimite’ lak ah ka va pawt sek uhi. Eimi (Thadou speaking) te’ inn a ka hawh chiang un ka min hon thei napi ‘Paite-pa’ ahon chi chitchiat ua, ka hihna mah himahleh a nuam kholkei hi. Tuma a IRB te, IRB te, i chihchih uh bang leng dik khollou hi. On duty hilou unchin amau mimal’ lunglutna a thil va hih ahihman un amau’ mimal ah tusak mai lehang hoih ding hi. IRB hih a uthuai-louhpen kum hi hial leh kilawm. Huai mi 4 te a vangsiatna uh chu, mihausa, milian, khawtaang leh saptuam a rawntham ching, officer lian leh thuneite’ tate hiam, a tanaute khawng ana hikha lou uh. Huchibang inkuan apat ana hikha le uh jail leng lutlou ding uh eihkha. Deihkhop a mawhpaih a pau lanlan te tata a suahtak na ding uh ngaihtuah a phe ding, thilsuina a paizang louh na ding a Police te nawk ding, a mualphou louh teitei na ding ua pan la vengvung ngeingei ding ihi ve ua, maithei a!

@mangzouvl/August 5, 2013

Read 1055 times Last modified on Tuesday, 06 August 2013 15:20

  • phualva
    phualva
    Tuesday, 06 August 2013 15:43

    amen ing ei

  • ppguite
    ppguite
    Tuesday, 06 August 2013 19:24

    Hichibang i khotang thil toh kisai chimtak louin hon tangau zelzel un e...neukhakha a hong phatuam khamoh diai....

    A dangte leng hoih isa chihna hituan louin Policete custody a om lakkhiak a soisa a khutkhak sawm a gamtat zaw mi theih dingin leng a zum huai lampang ahi

Login to post comments